ATV

Blog

  • Mustafa: LDK ka forcë vetërregulluese, mund të ringritet si parti e fortë

    Mustafa: LDK ka forcë vetërregulluese, mund të ringritet si parti e fortë

    Ish-kryetari i LDK-së, Isa Mustafa ka reaguar lidhur me rrjedhat aktuale të subjektit ku ai vepronte.

    Përmes një postimi në Facebook, Mustafa tha se në LDK problemet më së paku mund të zgjidhen me tifozllëk, andaj, sipas tij, format e tilla të propagandës e deformojnë demokracinë dhe mund ta bëjnë Kuvendin e thirrur arenë të përçarjeve, që nuk i nevojitet LDK-së, e cila akoma nuk është shëruar nga një Kuvend i tillë i para njëzet viteve.

    Ai shtoi se LDK nuk meriton epitafe, teksa theksoi se kjo parti ka potencial, ka forcë vetërregulluese dhe mund të ringritet si subjekt i fortë politik, i cili siguron balancë në ndërtimin demokratik të shtetit të Kosovës.

    “Duhet ta kuptojnë se LDK qëndron para çdo emri të përveçëm; se përveç me kryetarin e saj historik Ibrahim Rugova, LDK nuk identifikohet me asnjë emër të veçantë. Kuvendi si organi më i lartë i Lidhjes Demokratike të Kosovës do duhej të sigurojë se LDK nuk është parti as e vjetër as e re por parti që zhvillohet mbi bazat e përcaktuara 36 vite më parë me aktin themelues të saj si parti konzervatore e qendrës së djathtë me orientim të palëkundur euroatlantik. LDK ka nevojë të rikonfirmojë se beteja e saj politike nuk është ankand se kush jap më shumë por ofertë se si ndërtohet një shtet perspektiv, i fortë dhe i qëndrueshëm. Se LDK nuk mund të përdoret si platformë mbi të cilën do të ndërtohet diçka tjetër duke e shfrytëzuar emrin e saj”, ka shkruar tutje ai.

    Mustafa theksoi se reformat në LDK i bëjnë njerëzit të cilët i kanë qëndruar besnik LDK-së, të hapur për ardhjet dhe ardhje të reja dhe njerëz të rinj.

    “LDK-së nuk i nevojiten ndarjet në ne dhe ata; të vjetrit dhe të rinjtë; të mitë dhe të atyre para meje. Ajo ka nevojë të mendojë për forma dhe mekanizma që sjellin sa më shumë anëtarë, simpatizantë dhe votues. Ndërkaq, përgjegjësia në LDK të trajtohet si standard normal i etikës demokratike që nënkupton se rezultati ka pasojë”, shtoi ai.

    Ish-kryetari i këtij subjekti politik krejt në fund tha se kuvendi mund ta gjejë zgjidhjen më të mirë duke vlerësuar se çfarë është e dobishme për rritjen dhe progresin e LDK-së, për forcimin e unitetit të brendshëm të saj, për ofrimin e veprimtarëve dhe veprimtareve, “sepse asnjë njeri në LDK nuk është i tepërt!”.

  • Katër fazat e gjumit dhe çfarë ndodh në secilën prej tyre

    Katër fazat e gjumit dhe çfarë ndodh në secilën prej tyre

    Gjatë natës, trupi juaj kalon nëpër katër faza të gjumit. Gjatë këtyre fazave, ndryshojnë valët e trurit, lëvizjet e syve dhe aktiviteti neurologjik. Të gjitha katër fazat zgjasin afërsisht 90 minuta, dhe trupi kalon nëpër këto faza rreth katër deri në gjashtë herë gjatë natës.

    Katër fazat përfshijnë dy faza kryesore: gjumi me lëvizje të shpejta të syve (REM) dhe gjumi pa lëvizje të shpejta të syve (NREM). NREM ndahet në tre nënkategori (N1, N2, dhe N3), duke e çuar numrin total të fazave të gjumit në katër.

    Lexoni më tej për të mësuar se çfarë ndodh në tru dhe trup gjatë secilës fazë të gjumit, si dhe faktorët që ndikojnë në cilësinë e gjumit në secilën fazë.

    Faza NREM 1
    Kjo është faza e parë e gjumit dhe nis ciklin e gjumit. Gjatë kësaj faze, ndodheni në gjumë të lehtë dhe zgjoheni lehtë. Me shumë gjasë keni përjetuar këtë fazë më parë, pasi është ajo që kaloni kur filloni të bini në gjumë.

    Fakte për këtë fazë:

    • Zgjat midis një dhe pesë minuta.

    • Zë rreth 5% të totalit të gjumit tuaj gjatë natës.

    • Sistemet e trupit, përfshirë frymëmarrjen, rrahjet e zemrës dhe lëvizjet e syve, fillojnë të qetësohen.

    • Gjatë kësaj faze, muskujt relaksohen dhe ndodhin lëvizje të vogla të tyre.

    • Valët e trurit fillojnë të ndryshojnë nga një model i ditës në atë të natës.

    Faza NREM 2
    Në fazën e dytë të gjumit NREM, filloni të hyni në një periudhë më të thellë të gjumit. Frymëmarrja dhe rrahjet e zemrës ngadalësohen, muskujt zbuten dhe relaksohen, dhe lëvizjet e syve zvogëlohen. Edhe temperatura e trupit fillon të bjerë gjatë kësaj faze.

    Fakte për këtë fazë:

    • Zgjat 10-25 minuta.

    • Zë rreth 45% të gjumit tuaj gjatë natës.

    • Nga të gjitha fazat e gjumit, në fazën e dytë kaloni më shumë kohë.

    • Koha që kaloni në këtë fazë zgjatet me kalimin e natës.

    • Aktiviteti i përgjithshëm i valëve të trurit zvogëlohet gjatë kësaj faze, por ndodhin momente të aktivitetit elektrik.

    • Nëse do t’ju bëhej një ECG gjatë kësaj faze, do të shfaqeshin “sleep spindles” (shpërthime të shpejta neurologjike) dhe “K-komplekse” (valë truri delta).

    • Faza e dytë e gjumit është ajo ku ka më shumë mundësi të kërcisni dhëmbët.

    Faza NREM 3
    Kjo është faza më e thellë e gjumit. Kur jeni në këtë fazë të gjumit, mund të jetë e vështirë t’ju zgjojnë. Kjo është faza më ripërtëritëse e gjumit dhe është e nevojshme për t’u ndier energjik dhe i rifreskuar në mëngjes. Nëse zgjoheni gjatë kësaj faze, me shumë mundësi do të ndiheni të përgjumur dhe të çoroditur.

    Fakte për këtë fazë:

    • Zgjat rreth 20-40 minuta.

    • Zë rreth 25% të gjumit tuaj gjatë natës.

    • Periudhat më të gjata të kësaj faze ndodhin gjatë cikleve të para të gjumit.

    • Gjatë kësaj faze, frymëmarrja, rrahjet e zemrës dhe muskujt janë të ngadalta dhe të qetësuara.

    • Gjatë kësaj kohe hyni në fazën e gjumit me valë delta ose gjumin me valë të ngadalta (SWS).

    • Trupi juaj riparon indet e tij dhe rindërton muskujt dhe kockat.

    • Qëndrimi në këtë fazë i jep një shtysë sistemit tuaj imunitar.

    • Me kalimin e viteve, kalojmë më pak kohë në këtë fazë të gjumit.

    • Gjatë kësaj faze ka më shumë mundësi për të ndodhur gjendje si ecja në gjumë apo lagia e shtratit.

    Faza REM
    REM (lëvizja e shpejtë e syve) është faza e gjumit në të cilën ndodhin shumica e ëndrrave. Kjo fazë karakterizohet nga lëvizjet e shpejta të syve nën qepallat. Megjithëse pjesa më e madhe e ëndrrave ndodh gjatë kësaj faze, disa ëndrra mund të ndodhin edhe në fazat e tjera të gjumit.

    Fakte për këtë fazë:

    • REM zgjat midis 10 minutave dhe një ore, dhe kohëzgjatja e saj rritet me kalimin e natës.

    • Faza REM fillon rreth 90 minuta pasi të keni rënë në gjumë.

    • Aktiviteti i valëve të trurit tuaj ngjason më shumë me gjendjen e zgjimit.

    • Frymëmarrja bëhet më e shpejtë, zemra rreh më shpejt, dhe presioni i gjakut është më afër atij të zgjimit.

    • Gjatë gjumit REM, trupi përjeton një lloj paralize, duke e parandaluar që të veprojë sipas asaj që ndodh në ëndrra.

    • Me kalimin e viteve, kalojmë më pak kohë në fazën REM të gjumit.

    • Kjo është faza ku ka më shumë gjasa të ndodhë eksitimi seksual.

    Faktorë që Ndikojnë në Ciklin e Gjumit
    Cilësia e gjumit dhe koha që kaloni në secilin cikël gjumi varen nga disa variabla. Nuk është e pazakontë të keni periudha ku nuk kaloni në mënyrë të përsosur përmes secilës fazë.

    Disa faktorë që mund të ndikojnë në ciklet e gjumit përfshijnë:

    • Mosha: Me kalimin e viteve, kalojmë më pak kohë në gjumë të thellë dhe REM.

    • Shëndeti mendor: Cilësia e gjumit ndikohet nga shëndeti mendor, përfshirë depresionin dhe ankthin. Depresioni klinik rrit kohën në gjumin REM, por zvogëlon kohën midis fillimit të gjumit dhe fillimit të ciklit të parë REM.

    • Çrregullime të gjumit: Çrregullime si çrregullimet e ritmit cirkadian, apnea e gjumit, çrregullimi i gjumit REM, ecja në gjumë dhe narkolepsia mund të ndikojnë në ciklet e gjumit.

    • Trauma e trurit (TBI): Jetesa me një TBI mund të ketë ndikim të madh në ciklet e gjumit, përfshirë më pak minuta në REM, zgjime të natës dhe më pak kohë gjithsej në gjumë.

    • Medikamentet dhe substancat: Alkooli, barbituratet dhe benzodiazepinat janë të njohura për të ulur kohën e kaluar në gjumin REM.

    Pyetje të Shpeshta
    • Çfarë ndodh nëse nuk kaloni mjaftueshëm kohë në gjumë REM? Nuk ka shumë kërkime për atë që ndodh kur nuk kalojmë mjaftueshëm në gjumë REM. Megjithatë, më pak gjumë REM është i lidhur me uljen e funksionit kognitiv dhe rritjen e niveleve të depresionit.

    • Pse njerëzit zgjohen në orën 3 të mëngjesit? Zgjimi gjatë natës njihet si zgjim natën. Kjo mund të ndodhë për shumë arsye, si nevoja për të urinuar, zhurmat shqetësuese, konsumimi i tepërt i kafesë apo alkoolit pranë orës së gjumit, ose përjetimi i stresit apo ankthit. Zgjimet e natës mund të shkaktohen gjithashtu nga apnea e gjumit, çrregullimi i lëvizjeve të gjymtyrëve, krizat natën dhe çrregullime të tjera të gjumit.

    • Cila fazë e ciklit të gjumit është më e mira për t’u zgjuar? Zakonisht, zgjohemi gjatë një cikli REM, që është një fazë më e lehtë e gjumit, kështu që kalimi në gjendje të zgjuar është më i lehtë. Faza më e vështirë për t’u zgjuar është faza e tretë NREM, faza më e thellë e gjumit. Njerëzit që zgjohen gjatë kësaj faze ndihen zakonisht të përgjumur dhe mund të përjetojnë një çorientim të përkohshëm dhe një rënie të humorit pas zgjimit.

    Një Përmbledhje e Shpejtë
    Katër fazat e gjumit përshkruajnë katër llojet e gjumit që trupi kalon gjatë natës. Këto faza përfshijnë tre faza pa lëvizje të shpejta të syve (NREM) dhe një fazë REM (me lëvizje të shpejta të syve). Gjatë një nate të plotë gjumi, kaloni përmes të katër fazave çdo 90 minuta dhe e bëni këtë rreth gjashtë herë çdo natë.

  • Besar Halimi transferohet në Marok tek Raja Club Athletic

    Besar Halimi transferohet në Marok tek Raja Club Athletic

    Futbollisti kosovar Besar Halimi karrierën pritet ta vazhdojë në elitën e futbollit marokien.

    Halimi nënshkroj me klubin e këtij shteti Raja Club Athetic,e cila bën gara në kampionatin maroken.

    Përndryshe me transferimin e Halimit synon që të luftojë për titullin e kampionit në Marok,teksa për ish reprezentuesin e Kombëtares së Kosovës pritet të jetë përvoja e tij e parë në karrierën jashtë futbollit evropian.

    Kujtojmë që Besar Halimi deri më tani luajti për ekipin sllovak Slasck Wroclaw,teksa në të kaluarën luajti për Mainz, Sandhausen, Riga, Frankfurt dhe Brondby.

  • Arrestohet kryesuesi i KKZ-së në Prizren për mosreagim, avokati: U paragjykua

    Arrestohet kryesuesi i KKZ-së në Prizren për mosreagim, avokati: U paragjykua

    Kryesuesi i Komisionit Komunal të Zgjedhjeve në Prizren, Nysret Bytyqi, është arrestuar në lidhje me dyshimet për manipulim të votave në këtë komunë.

    Lajmin për Gazetën Express e ka konfirmuar avokati Blend Gjini, i cili tha se arrestimi është i paligjshëm sepse është “paragjykuar detyra e tij”.

    “Ai është dorëzuar në polici dhe po presim çka do të vazhdojë”, tha Gjini, i cili shtoi se gjatë intervistës me të si avokat, Byqyti dhe ai kanë vendosur që të vazhdojnë në heshtje.

    “Nuk ka të bëjë me ankesa të ndonjë subjekti. Asnjë subjekt s’është ankuar për të si kryetar i KKZ-së. Ai dyshohet se nuk ka reaguar ndaj parregullsive. [Arrestimi] është paragjykues. Me shumë gjasë është ndaluar 48 orë”, tha ai.

    Prokuroria bashkë me Policinë e Kosovës në Prizren ditë më parë ndaluan 109 persona për manipulim votash gjatë numërimit të tyre të zgjedhjeve të fundit. Ndaj 23 prej tyre është caktuar masa e paraburgimit prej një muaji.

    Rinumërimi nga ana e Komisionit Qendror të Zgjedhjeve nxori në pah një vjedhje masive të votave, të cilat disa kandidatëve për deputetë iu shtuan e disa të tjerëve iu hoqën brenda partive politike.

  • Kabashi-Ramaj: Prokuroria të hetojë pamjet e rreme për fabrikën e prodhimit të dronëve

    Kabashi-Ramaj: Prokuroria të hetojë pamjet e rreme për fabrikën e prodhimit të dronëve

    Kandidatja për deputete nga radhët e Partisë Demokratike të Kosovës, Besa Kabashi-Ramaj ka kërkuar hetim institucional për pretendimet mbi dronët dhe transparencë të plotë për fabrikën e municionit, pas raportimeve të mediave lidhur me vërtetësinë pamjeve të publikuara nga kryeministri në detyrë, Albin Kurti gjatë fushatës zgjedhore.

    Kabashi-Ramaj duke thënë se ky mashtrim publik është problem institucional dhe i sigurisë kombëtare, theksoi se qytetarët duhet ta dinë të vërtetën.

    “Gjatë fushatës zgjedhore, ish-kryeministri Kurti promovoi publikisht edhe përmes vizitës atë që u paraqit si fabrikë e prodhimit të dronëve ushtarak në Gjilan, duke lënë të kuptohet se në Kosovë po prodhohen dronë dhe kapacitete të avancuara teknologjike për siguri”, theksoi ajo.

    “Prodhimi i dronëve nuk është aktivitet simbolik apo promovues. Ai kërkon infrastrukturë të certifikuar, personel të specializuar inxhinierik, protokolle të sigurisë dhe mbikëqyrje shtetërore, licenca e autorizime të qarta ligjore, testime të shumta teknike dhe operative. Asnjë prej këtyre nuk mund të zëvendësohet me video promocionale apo me montazh vizual. Prodhimi real i dronëve është proces i gjatë, i verifikueshëm dhe i dokumentuar, jo diçka që imitohet për kamera. Kur një kryeministër paraqet si kapacitet shtetëror diçka që nuk ka kaluar këto faza themelore, problemi nuk është vetëm etik. Problemi është institucional dhe i sigurisë kombëtare. Prandaj kërkojmë nga Prokuroria e Shtetit dhe institucionet e drejtësisë që të verifikojnë këtë mashtrim publik, keqpërdorim institucional dhe trajtim serioz në deklarimet e rreme në një sektor jetik për shtetin”, kërkoi më tej Kabashi-Ramaj.

    Ajo tha se siguria kombëtare e Kosovës nuk duhet të jetë material për video promovuese, montazh, shfaqje për kamera e as pronë nuk është pronë e një qeverie apo kryeministri.

    “Situatë të ngjashme nga ish-kryeministri kemi pasur edhe me deklaratat për fabrikën e municionit, por asnjë qytetarë nuk ka parë plan të qartë, partneritet industrial të certifikuar, standarde të sigurisë dhe cilësisë, apo afate të besueshme dhe të verifikueshme”, theksoi deputetja e PDK-së.

    Kabashi-Ramaj tha se shtyllat e sigurisë së shtetit të Kosovës kanë qenë dhe duhet të mbeten ndërtimi gradual i kapaciteteve reale dhe të verifikuara të mbrojtjes, partneriteti strategjik me Shtetet e Bashkuara të Amerikës, anëtarësimi në NATO dhe bashkëpunimi i thellë me vendet aleate.

    “Kapacitetet reale të mbrojtjes përfshijnë forcimin profesional të FSK-së, planin 10 vjeçar për transformim duhet ta përfundojnë mbrojtjen ajrore dhe kundër dronëve në koordinim me aleatët tanë, sigurinë kibernetike dhe mbrojtjen e infrastrukturës kritike, si dhe qëndrueshmërinë shtetërore ndaj krizave”, shtoi ajo.

  • FSK drejt Shqipërisë për gjetjen e një 24-vjeçari në lumin Mat

    FSK drejt Shqipërisë për gjetjen e një 24-vjeçari në lumin Mat

    Me kërkesën e autoriteteve të Shqipërisë, Forca e Sigurisë së Kosovës ka angazhuar një kontingjent të Kërkim-Shpëtimit për të intervenuar në operacionin e kërkimit të një personi të humbur në rrjedhën e lumit Mat.

    Lidhur me këtë rast, detaje ka dhënë presidentja e vendit, Vjosa Osmani e cila përmes një postimi në Facebook, njoftoi se i zhdukuri në lumin e lartpërmendur është Jurgen Karaj, 24-vjeçar.

    “Bashkë në çdo sfidë! Dje, pas propozimit të Qeverisë, kam autorizuar dërgimin e FSK-së në Klos të Shqipërisë në kërkimet për gjetjen e 24 vjeçarit Jurgen Karaj. FSK, si gjithmonë, e gatshme për ndihmë vëllazërore, kudo dhe kurdo që ka nevojë”, ka shkruar presidentja.

    Postimi i plotë:

    Bashkë në çdo sfidë! 🇽🇰🇦🇱

    Dje, pas propozimit të Qeverisë, kam autorizuar dërgimin e FSK-së në Klos të Shqipërisë në kërkimet për gjetjen e 24 vjeçarit Jurgen Karaj.

    FSK, si gjithmonë, e gatshme për ndihmë vëllazërore, kudo dhe kurdo që ka nevojë.

  • Pep Guardiola falenderon Jose Mourinhon për fitoren e benficës kundër Real Madrid-it

    Pep Guardiola falenderon Jose Mourinhon për fitoren e benficës kundër Real Madrid-it

    Trajneri i Manchester City-it Pep Guardiola ka thurur lavde për rivalin e tij Jose Mourinho.

    Guardiola u shpreh i gëzuar me fitoren e Benficës kundër Real Madridit,ku e vlerësoi strategjinë e Mourinhos si mjaft të qëlluar dhe e falenderoi për këtë gjë.

    “Ishte një strategji e mirë nga Jose, apo jo? Të shënohej goli i katërt.

    Përndryshe Guardiola thotë se kjo fitore e Benficës ndaj “Los Blancos’ishte e rëndësishme për City-in,kjo për faktin se barazimi do ta linte jashtë top 8shes që e dërgon direkt në 1/8 e finales.

    Kujtojmë që Man Citty fitoi ndeshjen e xhiros së 8-të të fazës së ligës në Champions me rezultat 2:0 kundër Galatasaray-it.

  • Miti i djegies së dhjamit, çfarë ndodh realisht kur dobësoheni

    Miti i djegies së dhjamit, çfarë ndodh realisht kur dobësoheni

    Për shumë persona, rënia në peshë mbetet një sfidë e vështirë, pavarësisht dietave dhe aktiviteteve fizike. Megjithatë, pak e dinë se çfarë ndodh realisht me dhjamin e akumuluar gjatë procesit të dobësimit.

    Shumë njerëz besojnë se dhjami i djegur shndërrohet drejtpërdrejt në energji ose në masë muskulore, por këto teori nuk janë të sakta. Sipas shpjegimeve shkencore, dhjami konvertohet kryesisht në dioksid karboni dhe ujë.

    Dioksidi i karbonit largohet nga trupi përmes frymëmarrjes, ndërsa uji eliminohet përmes djersës dhe lëngjeve trupore. Sipas studimeve, nëse një person humb rreth katër kilogramë peshë, afërsisht tre kilogramë yndyrë largohen përmes mushkërive si dioksid karboni, ndërsa një kilogram përmes lëngjeve të trupit.

    Natyrshëm lind pyetja nëse është e mundur të humbni peshë vetëm duke marrë frymë. Për fat të keq, kjo nuk funksionon në atë mënyrë. Rritja e nxjerrjes së dioksidit të karbonit ndodh vetëm përmes aktivitetit fizik, pra duke lëvizur muskujt.

    Edhe aktivitete të thjeshta si qëndrimi në këmbë, veshja, ecja, vrapimi, gatimi apo pastrimi ndihmojnë në rritjen e metabolizmit dhe përshpejtimin e procesit të dobësimit.

  • Haradinaj bën homazhe në Rogovë: Vazhduam luftën për ta jetësuar amanetin e trimave

    Haradinaj bën homazhe në Rogovë: Vazhduam luftën për ta jetësuar amanetin e trimave

    Kryetari i AAK-së, Ramush Haradinaj këtë të enjte ka bërë homazhe te varret e heronjve të betejës së Rogovës së Hasit.

    Përmes një postimi në Facebook, Haradinaj tha se më 27, 28 dhe 29 të vitit 1999, luftëtarë të zotë të UÇK-së dhanë jetën për lirinë e Kosovës, transmeton Klankosova.tv.

    “Në rrugëtimin e tyre për të siguruar armatim për bashkëluftëtarët, u përjetësuan burra elitarë që i kisha përkrah në shumë beteja: Agron Rama, Agim Zeneli, Sejdi Rama, Agush Gjocaj, Bahtiar Morina, Daut Kelmendi, Emrush Çetaj, Gaspër Karaqi, Gëzim Ademaj, Hamdi Berisha, Haxhi Kleçka, Ilir Merturi, Kasim Shala, Luan Smajli, Memë Lleshi, Prend Lleshi, Naim Dreshaj, Naim Gashi, Sahit Krasniqi, Valon Gashi dhe Vesel Avdyli. Në përpjekje për të shpëtuar luftëtarët e plagosur, u flijuan edhe rogovasit: Rrustem Morina me djemtë Selmanin, Muhametin e Nusretin, Ibrahim Kryeziu, Xhevdet Berisha, Zyber Shala, Adem Shala dhe Rifat Shala”, i ka kujtuar ai bashkëluftarët e tij.

    Haradinaj shtoi se homazhet e bënë në varrezat e dëshmorëve në Kodrën e Kuqe në Klinë, e po ashtu bë edhe rivendosja e pllakës përkujtimore të dëshmorit, Ilir Merturi.

    “Rënia e tyre ishte goditje e madhe, por nuk u thyem. Përkundrazi, e vazhduam luftën duke jetësuar amanetin e këtyre trimave, të cilët sot prehen në paqe në Kosovën e lirë! Faleminderit për shërbimin ndaj Atdheut!”.

  • Zhduket një grua nga Lipjani, policia kërkon ndihmë nga qytetarët për ta gjetur

    Zhduket një grua nga Lipjani, policia kërkon ndihmë nga qytetarët për ta gjetur

    Më 16.01.2026, në stacionin policor të Lipjanit, është raportuar për një person të zhdukur.

    Bëhet fjalë për personin, Zoja Velija e lindur në vitin 1984.

    Që nga dita e raportimit deri tani, njësitet policore të hetimeve, kërkimeve si edhe patrullat në koordinim me prokurorinë përkatëse dhe në bashkëpunim të ngushtë me familjarët, kanë ndërmarrë një varg veprimesh si:
    -intervistime të personave që mund të ndihmojnë në gjetjen e vendndodhjes së personit,
    -kontrollimi i hyrje-daljeve, në të gjitha pikat kufitare,
    -kërkime në zona që personi kishte frekuentuar zakonisht (ambiente të mbyllura dhe të hapura),
    -analizimi dhe hetimi i çdo lloj informacioni që lidhet me personin etj.

    Edhe pse veprimet dhe kërkimet policore janë duke vazhduar, pas marrjes së autorizimit prej prokurorit të shtetit, nga ana juaj kërkojmë kontributin tuaj qytetar.

    Të gjithë ata që kanë çfarëdo lloj informacioni, që ndërlidhet me personin e sipër shënuar, t’i përcjellin ato policisë përmes numrit 192 apo në [email protected]