Blog

Policia e Kosovës ka njoftuar se e ka arrestuar një person që ka qenë i kërkuar për vjedhje të rëndë.

Sipas njoftimit, arrestimi i 33-vjeçarit B.A, nga Ferizaj është bërë pasi që ai dyshohet se për së paku dy raste të vjedhjeve në Prizren.

“Falë bashkëpunimit të zyrtarëve nga të dy stacionet, është arritur të lokalizohet dhe të arrestohet i dyshuari B.A., mashkull rreth 33 vjeç nga Ferizaj”, thuhet në njoftim.

Sipas policisë, pas intervistimit në prani të avokatit dhe me aktvendim të prokurorit përgjegjës është ndaluar për 48 orë.

NATO ka prezantuar një program të ri të quajtur “Front Door” (Dera e Përparme).

Aleanca synon t’ua lehtësojë kompanive të industrisë së mbrojtjes nga Turqia qasjen në fondin e inovacionit të Aleancës, me vlerë 5.3 miliardë euro. Programi u prezantua gjatë Samitit të NATO-s në Ankara.

Iniciativa është krijuar për të zvogëluar pengesat burokratike dhe për të përshpejtuar përfshirjen e kompanive turke në projektet e NATO-s që lidhen me zhvillimin e teknologjive të avancuara ushtarake, raportojnë mediat.

Përmes programit, ndërmarrjet turke do të kenë më shumë mundësi të aplikojnë për financim dhe të marrin pjesë në projekte që lidhen me inteligjencën artificiale, sistemet autonome, mbrojtjen kibernetike, teknologjitë hapësinore dhe fusha të tjera strategjike.

Zyrtarët e NATO-s theksuan se synimi është forcimi i bashkëpunimit me industrinë e mbrojtjes së vendeve anëtare dhe përshpejtimi i zhvillimit të teknologjive inovative që do të rrisin aftësitë mbrojtëse të Aleancës.

Turqia, e cila ka zhvilluar ndjeshëm industrinë e saj të mbrojtjes në vitet e fundit, pritet të jetë një nga përfitueset kryesore të kësaj nisme, duke pasur mundësi më të mëdha për të kontribuar në projektet e përbashkëta të NATO-s dhe për të siguruar financim nga fondi shumëmiliardësh i inovacionit.

Nënkryetarja e Komunës së Prishtinës, Besianë Musmurati, ka bërë të ditur nisjen e një iniciative për renovimin e këndeve të lojërave në lagje të ndryshme të kryeqytetit, duke u bërë thirrje qytetarëve që të raportojnë lodrat e dëmtuara.

Përmes një videomesazhi të publikuar në rrjetet sociale, Musmurati tha se, si shumë prindër të Prishtinës, edhe ajo kalon kohë me djalin e saj, Tomorin, në parqet e qytetit, ku ka vërejtur se një numër i madh i lodrave janë të dëmtuara dhe kanë nevojë për riparim.

“Prindër të dashur të Prishtinës, e kemi marrë një iniciativë me i renovu këndet e lojërave nëpër lagje të ndryshme. Sikur shumë prindër të Prishtinës, edhe unë mundohem çdo ditë me Tomorin në parqe të ndryshme të qytetit. Kudo që po shkojmë bashkë me djalin, po e shohim që ka lojëra të prishura që kanë nevojë për riparim”, u shpreh ajo.

Ajo u bëri thirrje qytetarëve që, nëse hasin në lodra të dëmtuara, të dërgojnë një email në adresën [email protected], duke bashkëngjitur një fotografi, lokacionin e këndit të lojërave dhe një përshkrim të shkurtër të dëmtimit.

Musmurati tha se ajo dhe djali i saj e kanë nisur këtë iniciativë duke raportuar një lodër të dëmtuar në lagjen Ulpiana, ndërsa ftoi qytetarët që ta vazhdojnë aksionin edhe në lagjet e tjera.

“Unë e Tomori po e fillojmë me një foto nga kjo lojë e prishur në Ulpianë, e ju vazhdojeni nëpër lagjet e tjera. Për një fëmijë, një lodër e dëmtuar është një lojë e munguar. E për mua, si nënë e si nënkryetare, është një përgjegjësi”, deklaroi ajo.

Kryetari i Odës Ekonomike të Kosovës (OEK), Lulzim Rafuna, ka vlerësuar se ndërprerjet e shpeshta të energjisë elektrike po shkaktojnë dëme të konsiderueshme për bizneset, duke ndikuar në procesin e prodhimit, furnizimin e klientëve dhe klimën për investime.

Rafuna nw njw intervistw për Ekonomia Online tha se mungesa e energjisë elektrike gjatë procesit të prodhimit u shkakton humbje të drejtpërdrejta bizneseve.

“Bizneset pësojnë shumë. E para, për shkak se në momentin që ndërpritet energjia elektrike, e tërë linja e prodhimit ajo lëndë e parë apo gjysmë lloj produkti që ndodh në linjën e prodhimit—shkon shkart. Ose nuk mund më të përpunohet dhe të shkojë si produkt final. Dhe kjo kosto i faturohet biznesit. E dytë, ka më pas vonesa në furnizim të të blerësve, për shkak të ndërprerjes së energjisë elektrike, se prodhuesi nuk ka mundësi që të prodhojë sasinë që e ka planifikuar sot, për shembull. Dhe padyshim kjo të nesërmen nuk mund të kompensohet, nuk mund t’i dyfishojë kapacitetet, se atë makineri e ka, që atë sasi duhet ta prodhojë brenda një dite ose një afati të caktuar. Dhe padyshim kjo reflektohet te zinxhiri i furnizimit, sidomos te dërgimi te blerësi. Dhe këtu bizneset dëmtohen shumë. Biznesi dëmtohet edhe në kuptimin e kohës, po edhe në kuptimin material”, deklaroi Rafuna.

Sipas tij, bizneset duhet të njoftohen të paktën 24 orë para ndërprerjeve të planifikuara të energjisë elektrike, në mënyrë që të organizojnë procesin e punës dhe të shmangin humbjet.

“Po koha e duhur do të ishte 24 orë më herët, që të njoftohet biznesi për ndërprerjen që do të ketë. Mos të befasohet biznesi me u ndërprerë energjia elektrike, siç e thamë, në momentin që është në kulmin e prodhimit, me i’u ndërprerë energjia elektrike dhe gjithë ajo vijë e prodhimit të shkojë shkart, të shkojë në në dëm të prodhuesit. Kjo është një prej pengesave më të mëdha edhe për thithjen e investimeve të huaja në Kosovë. Mosstabiliteti me energjinë elektrike ndikon shumë te ardhja e investitorëve të huaj ose në gjerësinë e kapaciteteve të prodhimeve tona. Dhe kjo është një prej arsyeve pse po kërkojmë që të ketë edhe alternativa të tjera, domethënë mos të jetë vetëm energjia elektrike që importohet apo prodhohet në KEK si alternativë e vetme, por të jetë edhe gazi, por të jetë edhe energjia e ripërtëritshme e kështu me radhë”, u shpreh ai.

I pyetur nëse ndërprerjet e energjisë mund të kenë ndikuar në mbylljen e një numri të madh biznesesh gjatë gjashtëmujorit të parë të vitit, Rafuna tha se Oda Ekonomike nuk ka të dhëna konkrete, por theksoi se faktorët janë të shumtë.

“Nuk kemi të dhëna sa i përket kësaj, a mund të jetë energjia elektrike shkaktar, mirëpo kur mbyllet një biznes mblidhen shumë shkaktarë. E kështu që duhet të identifikohen nga ana e institucioneve tona, mirëpo kjo bllokada politike, mosfunksionimi i institucioneve me fuqi të plotë, duke mos qenë të fuqiplota për me marrë vendime, po ndikon edhe në investime, po ndikon edhe në jetën e përditshme. Dhe presim që sa më shpejt t’i kemi institucionet dhe të fillojë punën për përmirësimin e ambientit për të bërit biznes në Republikën e Kosovës”, tha ai.

Duke komentuar njoftimet e KEDS-it për ndërprerjet e energjisë elektrike për shkak të punimeve në rrjet, Rafuna tha se bizneset nuk duhet të mbesin pa furnizim, pavarësisht nevojës për mirëmbajtje.

“Po me siguri që duhet ndërhyrja në rrjet, duhet të bëhen punimet, se punimet bëhen edhe në vendet më të zhvilluara, mirëpo nuk ndërpritet energjia elektrike. Sigurohet në mënyrë alternative furnizimi derisa të bëhen punimet në rrjet. Nuk është e drejtë që vetëm të ndalet energjia elektrike dhe kemi punime në rrjet. Biznesit nuk i intereson rrjeti, biznesit i intereson që të ketë furnizim të rregullt dhe paguan që të ketë furnizim të rregullt. Edhe ashtu çmimi i energjisë elektrike tani po e shohim sa ka mbërritur. Kërkesa jonë si Odë Ekonomike është që të sigurohet furnizim i rregullt për biznesin. Në çfarë forme e siguron, si e siguron, kur i përfundon punimet në rrjet, ne nuk na intereson. Ne na intereson që të kemi furnizim të pandërprerë të energjisë elektrike”, shtoi Rafuna.

Ndërkaq, sot është bërë e ditur se në disa lagje të Prishtinës ka ndërprerje të energjisë elektrike dhe se sipas njoftimit ndërprerja zgjatë deri në ora 20:00.

Kryetari i Aleancës, Ardian Gjini, ka shprehur mbështetjen e tij për nismën e Institutit të Kosovës për Drejtësi (IKD), e cila synon forcimin e përgjegjësisë ligjore për shkeljen e vendimeve të Gjykatës Kushtetuese dhe keqpërdorimin e parasë publike gjatë fushatave zgjedhore.

Përmes një postimi në rrjetet sociale, Gjini ka deklaruar se respektimi i Kushtetutës dhe mosshfrytëzimi i parasë publike duhet të jenë norma të një demokracie funksionale, duke shtuar se abuzimet e viteve të fundit kanë krijuar nevojën për ndërhyrje ligjore.

“Edhe pse në një demokraci normale respektimi i Kushtetutës dhe mosshfrytëzimi i parasë publike janë norma standarde, abuzimi flagrant në vitet e fundit po na imponon ‘presionin’ për rregullimin e tyre me ligj. Prandaj e mbështes nismën e IKD-së!”, ka shkruar Gjini.

Ai ka kritikuar praktikën e ndarjes së mjeteve publike pak para zgjedhjeve, duke e cilësuar atë si përpjekje për manipulim të vullnetit të qytetarëve.

“Ndarja e parave publike disa ditë para zgjedhjeve nuk është politikë sociale, është manipulim i pastër për të blerë vota të qytetarëve me paratë e tyre. Zgjedhjet duhet të jenë garë e barabartë, jo një treg ku pushteti hyn në garë me buxhetin e shtetit në dorë”, ka theksuar ai.

Gjini ka kërkuar gjithashtu përgjegjësi penale për shkelësit, duke theksuar se ligji duhet të vlejë për të gjithë.

“Duhet të ketë përgjegjësi penale si për shkeljen e vendimeve të Gjykatës Kushtetuese, ashtu edhe për keqpërdorimin e parasë publike për fushata. Ky abuzim duhet të dënohet me ligj për këdo. Unë do ta nënshkruaj!”, ka shtuar Gjini në reagimin e tij.