ATV

Blog

  • Dhimbjet e shpinës, sëmundjet që paralajmërojnë probleme serioze të kolonës

    Dhimbjet e shpinës, sëmundjet që paralajmërojnë probleme serioze të kolonës

    Dhimbjet e shpinës shpesh janë shenja e parë e problemeve serioze të kolonës vertebrale. Një nga shkaktarët më të zakonshëm është artroza, një sëmundje degjenerative e artikulacioneve që shkatërron kërcet e nyjeve dhe shkakton proliferime dhe trashje kockore, si dhe ngurtësim të ligamenteve dhe kapsulave që lidhin elementët e nyjeve.

    Artroza prek shpesh artikulacionet mbajtëse, si shpatullat, bërrylat, gjunjët dhe këmbët, dhe sidomos kolona vertebrale, duke shpjeguar pse dhimbjet e shpinës janë ndër simptomat e para që shfaqen.

    Kur artroza prek kolonën, ajo quhet spondilartrozë dhe zakonisht prek traktin cervical dhe lumbar. Sëmundja shpesh shoqërohet me simptoma neurologjike, si radikuliti dhe neuriti, të shkaktuara nga shtypja ose irritimi i trungjeve nervore që dalin nga palca shpinore. Dhimbja mund të jetë e fuqishme dhe të kufizojë funksionin e përditshëm.

    Një tjetër faktor shqetësues është se artroza mund të komplikohet me osteoporozën, një gjendje që shkakton dekalcifikim dhe dobësim të kockave, duke rritur rrezikun e frakturave. Edhe pse infarktet dhe tumorët janë sëmundjet kryesore që prekin njerëzit në moshë të mesme dhe të tretë, osteoporoza dhe spondilartroza janë gjithashtu shkak i rëndësishëm i sëmundshmërisë kronike.

    Parandalimi mund të arrihet përmes ushqyerjes së shëndetshme, aktivitetit fizik të rregullt, respektimit të ekuilibrave të ngarkesës gjatë ngritjes së peshave apo aktiviteteve sportive, përdorimit të shtratit të përshtatshëm dhe kontrolleve periodike të gjendjes së kolonës vertebrale. Kujdesi i hershëm mund të reduktojë ndjeshëm pasojat e dhimbjeve kronike të shpinës dhe të përmirësojë cilësinë e jetës.

  • Kurti: 26 vjet pa drejtësi për spastrimin etnik në veri të Mitrovicës

    Kurti: 26 vjet pa drejtësi për spastrimin etnik në veri të Mitrovicës

    Kryeministri në detyrë i Kosovës, Albin Kurti, ka përkujtuar sot 26-vjetorin e natës së 3 dhe 4 shkurtit 2000, kur forcat policore të Serbisë, në bashkëpunim me grupin paraushtarak kriminal të njohur si “Rojet e urës”, kryen spastrim etnik në pjesën veriore të Mitrovicës, duke dëbuar me dhunë mijëra shqiptarë nga shtëpitë e tyre.

    Sipas Kurtit, nën kërcënimin e armëve dhe vdekjes, shqiptarët u detyruan të largohen drejt jugut të lumit Ibër, ndërsa gjatë këtij aksioni kriminal u vranë 10 qytetarë shqiptarë dhe u plagosën 25 të tjerë.

    Ai përmendi edhe emrat e viktimave të asaj nate tragjike, nga mosha 13 deri në 65 vjeç.

    Kryeministri në detyrë theksoi se spastrimi etnik në Mitrovicë ndodhi vetëm shtatë muaj pas çlirimit të Kosovës, në një periudhë kur në vend ishin të pranishme forcat paqeruajtëse dhe administrata ndërkombëtare.

    Megjithatë, gjatë shkurtit të vitit 2000, përmes strukturave të saj të sigurisë, Serbia arriti të dëbojë nga Mitrovica 1.564 familje shqiptare, me gjithsej 11.364 anëtarë.

    “Edhe sot, 26 vjet më pas, drejtësia për këtë krim mbetet e paplotë”, theksoi Kurti, duke shtuar se viktimat dhe familjet e dëbuara vazhdojnë të përballen me pasojat e rënda të humbjeve dhe dëmeve të pësuara.

    Ai vuri në pah se për më shumë se dy dekada, mijëra shqiptarë të dëbuar nga Mitrovica nuk kanë mundur të kthehen në shtëpitë dhe pronat e tyre, ndërsa kthimi ka filluar vetëm vitet e fundit, pas shtrirjes së sovranitetit, sundimit të ligjit dhe kontrollit institucional në veri të vendit.

    Sipas tij, gjatë katër viteve të fundit janë ndërtuar dhe rindërtuar mbi 150 shtëpi në katër komunat veriore, ndërsa si shembull përmendi rastin e Mustafë Behramit, i cili në vitin 2024 u kthye për të jetuar me familjen në shtëpinë e ndërtuar nga Qeveria e Kosovës.

    Kurti theksoi se sot, ndryshe nga viti 2000, Mitrovica është qytet ku jetojnë së bashku qytetarë të të gjitha komuniteteve, nën angazhimin e institucioneve për barazi, ligjshmëri dhe sundim të ligjit.

  • Dënohet me burgim dhe gjobë E.K. për vjedhje të rëndë në Pejë

    Dënohet me burgim dhe gjobë E.K. për vjedhje të rëndë në Pejë

    Gjykata Themelore në Pejë, departamenti i Përgjithshëm – Divizioni Penal, me gjyqtaren e vetme gjykuese Blerta Kelmendi, ka shpallur aktgjykimin përmes video-lidhjes/video-incizimit, ndaj të pandehurit E.K., për veprat penale “Vjedhje e rëndë” dhe “Vjedhja”.

    Sipas një njoftimi për media bëhet e ditur se gjykata e ka shpallur të pandehurin fajtor për pikat III dhe IV të aktakuzës dhe pas unifikimit të dënimeve e ka dënuar me dënim unik me gjobë 800 (tetëqind) euro dhe dënim unik me burgim në kohëzgjatje prej 3 (tri) vite e 4 (katër) muaj, në të cilin i llogaritet edhe koha e kaluar në paraburgim nga data 02.07.2025.

    Për pikat I, II dhe V të aktakuzës, gjykata ka refuzuar akuzën në bazë të dispozitave ligjore përkatëse, meqenëse Prokurori i Shtetit ka hequr dorë nga aktakuza.

    Kundër këtij aktgjykimi, palët kanë të drejtë ankese në afat prej 30 (tridhjetë) ditësh nga dita e pranimit të aktgjykimit me shkrim.

  • PZAP-ja aprovon ankesën e Listës Serbe, i refuzon gjashtë të tjera

    PZAP-ja aprovon ankesën e Listës Serbe, i refuzon gjashtë të tjera

    Paneli Zgjedhor për Ankesa dhe Parashtresa (PZAP) ka aprovuar ankesën e subjektit politik Lista Serbe dhe ka urdhëruar Komisionin Qendror të Zgjedhjeve (KQZ) që të shpallë rezultatet përfundimtare për këtë subjekt politik dhe kandidatët e tij në Zgjedhjet e Parakohshme për Kuvendin e Kosovës, të mbajtura më 28 dhjetor 2025. Ky panel ka refuzuar gjashtë ankesa të tjera.

    Vendimi është marrë në seancën e mbajtur sot (3 shkurt), ku PZAP ka konstatuar se refuzimi i KQZ-së për publikimin e rezultateve për Listën Serbe ka qenë i pajustifikuar dhe në kundërshtim me dispozitat ligjore në fuqi, shkruan Gazeta Online Reporteri.net.

    Në vendim thuhet se KQZ-ja, në mbledhjen e 31 janarit 2026, kishte shpallur rezultatet përfundimtare për subjektet e tjera politike, por jo edhe për Listën Serbe, pasi votimi për këtë subjekt nuk kishte marrë shumicën e dy të tretave të votave të anëtarëve të KQZ-së.

    Sipas PZAP-së, një shpallje e pjesshme e rezultateve përfundimtare nuk ka bazë ligjore, pasi të gjitha procedurat e numërimit dhe rinumërimit të votave kishin përfunduar për të gjitha subjektet politike pa përjashtim. Paneli ka vlerësuar se një veprim i tillë cenon parimet e barazisë së subjekteve zgjedhore, sigurisë juridike dhe transparencës së procesit zgjedhor.

    PZAP ka theksuar gjithashtu se KQZ-ja nuk ka ofruar asnjë arsyetim ligjor për refuzimin e shpalljes së rezultateve për Listën Serbe, duke e cilësuar vendimin si të mangët dhe në kundërshtim me Ligjin për Zgjedhjet e Përgjithshme dhe rregulloret zgjedhore.

    Në bazë të kësaj, Paneli ka ndryshuar pikën III të vendimit të KQZ-së dhe ka urdhëruar shpalljen e rezultatit përfundimtar për Listën Serbe dhe kandidatët e saj, shkruan Reporteri.net

    Kundër këtij vendimi është e lejuar ankesë në Gjykatën Supreme të Kosovës, brenda 48 orëve nga momenti i pranimit të vendimit.

  • Kush ishte Jeffrey Epstein?

    Kush ishte Jeffrey Epstein?

    Ai lindi më 20 janar 1953 në Brooklyn, New York. Prindërit e tij ishin hebrenj amerikanë, pjesë e komunitetit hebre urban të Nju Jorkut. Nuk vinte nga familje e pasur apo elitare. Babai punonte si kopshtar për bashkinë, nëna si ndihmëse shkollore.

    Jeffrey Epstein ndër vite u bë një financier amerikan, shumë i pasur dhe shumë i lidhur me njerëz të pushtetshëm. Zyrtarisht merrej me investime. Në realitet u bë i famshëm për një nga skandalet më të rënda të abuzimit seksual në dekadat e fundit.

    Ai akuzohej se për vite me radhë kishte krijuar një rrjet trafikimi dhe shfrytëzimi seksual të vajzave të mitura. Vajzat rekrutoheshin me premtime pune apo parash dhe dërgoheshin në rezidencat e tij në SHBA, Karaibe dhe gjetkë.

    Ajo që e bën çështjen edhe më të rëndë është rrethi i tij shoqëror. Epstein kishte kontakte të drejtpërdrejta me politikanë, biznesmenë, akademikë, figura mbretërore dhe njerëz shumë me ndikim ndërkombëtar. Kjo ngriti dyshime serioze se ai jo vetëm abuzonte, por edhe shantazhonte njerëz të fuqishëm.

    Në vitin 2008 ai u dënua lehtë, çuditërisht lehtë, për krime të rënda. Kjo ushqeu bindjen se ishte i mbrojtur. Në vitin 2019 u arrestua sërish për trafikim seksual të të miturve. Pak javë më vonë u gjet i vdekur në burg. Zyrtarisht u shpall vetëvrasje, por shumë njerëz nuk e besojnë këtë version.

    “Dosjet Epstein” janë dokumente gjyqësore, lista emrash, dëshmi dhe lidhje që tregojnë se sa i thellë ishte rrjeti i tij dhe sa shumë njerëz të fuqishëm u përfshinë ose u mbrojtën.

    Me pak fjalë, Epstein nuk ishte thjesht një pervers i pasur. Ishte nyje e errët mes parasë, pushtetit, krimit dhe hipokrizisë globale.

    Si dhe kush e zbuloi Dosjen Epstein?

    Dosja Epstein nuk doli nga qielli dhe as nga ndonjë shërbim sekret. U zbulua hap pas hapi, nga këmbëngulja e viktimave, disa gazetarë kokëfortë dhe pak prokurorë që nuk pranuan ta mbyllnin gojën.

    Gjithçka nisi në fillim të viteve 2000. Vajza të reja në Florida filluan të denonconin Jeffrey Epstein për abuzim seksual. Policia lokale e hetoi dhe në vitin 2005 u ngritën akuza serioze. Por në vitin 2008, Epstein arriti një marrëveshje skandaloze me prokurorin federal Alexander Acosta. Dënim minimal. Pa burg real. Pa hetim të rrjetit. Kjo ishte pika ku shumë gjëra u mbuluan.

    Dosja u ringjall falë gazetarëve hulumtues. Sidomos Julie K. Brown e Miami Herald. Ajo publikoi në vitin 2018 serinë investigative “Perversion of Justice”, ku tregoi si ishte fshehur rasti, si ishin heshtur viktimat dhe si ishte mbrojtur Epstein nga sistemi. Ky investigim e detyroi drejtësinë amerikane ta rihapte çështjen.

    Në vitin 2019 Epstein u arrestua sërish, kësaj here nga prokuroria federale e New Yorkut, për trafikim seksual të të miturve. Pas arrestimit, dolën dokumente gjyqësore, dëshmi të viktimave, regjistra fluturimesh, lista kontaktesh. Këto u quajtën në publik “Dosjet Epstein”.

    Një pjesë tjetër doli nga procesi civil i Virginia Giuffre kundër Ghislaine Maxwell. Në këto dokumente u përmendën emra njerëzish shumë të fuqishëm. Jo të gjithë të përfshirë domosdoshmërisht në krime, por mjaftueshëm sa për të treguar sa i thellë ishte rrjeti.

    Pas vdekjes së Epstein në burg në vitin 2019, presioni publik u rrit edhe më shumë. Gjykatat nisën të hapnin dokumente të mbyllura prej vitesh. Në vitet 2023–2024 u publikuan pjesë të tjera të dosjeve, duke konfirmuar se sistemi për vite me radhë kishte zgjedhur të mos shihte.

    Pra, nuk e zbuluan “të fortët”. E zbuluan viktimat që nuk heshtën, gazetarët që nuk u trembën dhe presioni publik që nuk u shua. Dhe kjo është arsyeja pse dosja Epstein mbetet e rrezikshme edhe sot. Jo për atë që dihet, por për atë që ende është fshehur.

    Si u pasurua Epsteini?

    Epstein nuk u pasurua në mënyrë klasike. Nuk ndërtoi kompani, nuk shpiku asgjë, nuk la pas ndonjë gjurmë normale biznesi.

    Fillimi i tij ishte modest. Në vitet 1970 punonte si mësues matematike në një shkollë private në New York. Pa diplomë universitare. Pastaj, papritur, kalon në financë. Kjo është pika e parë e errët.

    Në fund të viteve 1970, ai u punësua në bankën investuese Bear Stearns, falë një klienti të pasur që e rekomandoi. Edhe aty nuk qëndroi gjatë. U largua në rrethana të paqarta, por kishte bërë lidhje.

    Hapi i madh ndodhi kur u afrua me Leslie Wexner, miliarder amerikan dhe pronar i imperiumit Victoria’s Secret. Wexner i dha Epstein-it diçka që nuk ia jep askujt:
    kontroll pothuajse të plotë mbi financat e tij personale.

    Për vite me radhë, Epstein menaxhoi pasurinë e Wexner-it. Në këtë periudhë, ai fitoi rezidenca luksoze, përfshirë vilën famëkeqe në New York, që në fakt iu transferua nga vetë Wexner për një çmim simbolik. Kjo është e dokumentuar.

    Më pas Epstein krijoi një firmë private, J. Epstein & Co., që pretendonte se menaxhonte pasuri vetëm për miliarderë. Por firma kishte shumë pak klientë të njohur. Nuk ka bilance publike. Nuk ka transparencë. Asnjë rekord normal për një njeri kaq të pasur.

    Këtu fillon misteri i vërtetë.
    Ai jetonte si miliarder, por askush nuk e dinte saktë nga vinte paraja. As bankierët, as gazetarët financiarë. Shumë analistë thonë se ai fitonte jo nga investimet, por nga ndërmjetësimi i sekreteve. Lidhje. Informacion. Shantazh.

    Kjo shpjegon pse rrethi i tij përfshinte politikanë, princa, akademikë, shefa shërbimesh dhe njerëz shumë të fuqishëm. Ai nuk ishte thjesht financier. Ishte njeri që dinte gjëra.

    Me pak fjalë
    Epstein nuk u bë i pasur sepse ishte gjeni i financës.
    U bë i pasur sepse u bë i dobishëm për njerëz shumë të fuqishëm.
    Dhe kur u bë i rrezikshëm, historia e tij mori fund në një qeli burgu.

  • Tesla pëson rënie të fortë të shitjeve në Norvegji, rivalët elektrikë marrin avantazh

    Tesla pëson rënie të fortë të shitjeve në Norvegji, rivalët elektrikë marrin avantazh

    Tesla po përballet me një rënie të ndjeshme të shitjeve në Norvegji, treg i cili për vite me radhë është konsideruar një nga pikat e saj më të forta në Evropë.

    Sipas të dhënave të regjistrimeve për muajin janar 2026, kompania ka shitur vetëm 62 njësi të Model Y, ndërsa numri i përgjithshëm i automjeteve Tesla të regjistruara ka qenë 83, që përfaqëson një rënie prej rreth 88 për qind krahasuar me të njëjtën periudhë të vitit të kaluar.

    Në të njëjtën kohë, disa modele rivale elektrike, përfshirë Volkswagen ID.3 dhe Toyota bZ4X, e kanë kaluar dukshëm Teslan në renditjen mujore të shitjeve, duke reflektuar rritjen e konkurrencës në tregun e automjeteve elektrike.

    Megjithatë, pavarësisht rënies së Teslas, tregu norvegjez vazhdon të dominohet nga automjetet elektrike, të cilat përbëjnë rreth 94 për qind të shitjeve të reja të makinave.

    Në disa vende të tjera evropiane, Tesla ka shënuar rritje të moderuar të shitjeve, kryesisht falë versioneve më të përballueshme të modeleve Model 3 dhe Model Y. Sidoqoftë, panorama e përgjithshme mbetet e përzier, pasi kompania po përballet me rënie të theksuara në disa tregje kyçe dhe me konkurrencë gjithnjë e më të fortë nga prodhuesit evropianë dhe markat kineze të automjeteve elektrike.

  • Osmani takohet me presidentin e Sierra Leones, flasin për bashkëpunim mes dy vendeve

    Osmani takohet me presidentin e Sierra Leones, flasin për bashkëpunim mes dy vendeve

    Presidentja Vjosa Osmani njoftoi se është takuar me presidentin e Sierra Leones, Julius Maada Bio, gjatë vizitës së saj në Emiratet e Bashkuara Arabe.

    “Diskutuam për thellimin e bashkëpunimit ndërmjet dy shteteve tona, në përfitim të qytetarëve tanë dhe për adresimin e sfidave të përbashkëta”, tha ajo.

    Osmani shtoi se “Kosova mbetet e përkushtuar të ndërtojë partneritete të forta e të qëndrueshme me vende në mbarë botën”.

    Presidentja më herët njoftoi se kishte shkuar në Emirate për të marrë pjesë në World Governments Summit.

  • Komuna e Klinës njofton fermerët përfitues të subvencionit me freza bujqësore

    Komuna e Klinës njofton fermerët përfitues të subvencionit me freza bujqësore

    Komuna e Klinës, përkatësisht Drejtoria për Bujqësi dhe Zhvillim Rural, ka njoftuar fermerët të cilët janë përzgjedhur nga Komisioni për t’u subvencionuar me pajisje bujqësore – freza me gjerësi 1.65 metra.

    Sipas njoftimit zyrtar, shpërndarja e pajisjeve do të bëhet më 5 shkurt 2026, duke filluar nga ora 09:00, sipas numrit rendor të përfituesve.

    Fermerët me numra rendorë 1 deri në 55 janë të obliguar të paraqiten në orën 09:00, ndërsa përfituesi me numër rendor 56 duhet të paraqitet në ora 13:00.

    Shpërndarja e frezave do të realizohet në ambientet e Palestrës Sportive “Adem Jashari” në Klinë.

    Nga Drejtoria për Bujqësi dhe Zhvillim Rural bëhet e ditur se prania e fermerëve përfitues në kohën e caktuar është e detyrueshme, pasi mospjesëmarrja nënkupton humbjen e të drejtës për përfitim nga ky subvencion.

    Ky aktivitet realizohet në kuadër të mbështetjes së Komunës së Klinës për zhvillimin e sektorit bujqësor dhe fuqizimin e fermerëve lokalë.

  • Australi, ​13-vjeçari notoi disa orë për të shpëtuar familjen

    Australi, ​13-vjeçari notoi disa orë për të shpëtuar familjen

    Pasi notoi me orë të tëra, një djalë 13 vjeçar arriti të shpëtonte jetën e nënës dhe motrës e vëllait më të vegjël. Familja ishte tërhequr në det, përtej bregut australian, raporton Associated Press, transmeton KosovaPress.

    Austin Appelbee, i cili po cilësohet si një hero, notoi 4 kilometra deri në breg për të kërkuar ndihmë, pasi ai u gjend në vështirësi së bashku me nënën e tij, Joanne Appelbee, 47 vjeçe, vëllanë Beau, 12 vjeç, dhe motrën Grace, 8 vjeçe, njoftoi policia.

    Austin tregoi se fillimisht u nis për ndihmë me një kajak të fryrë që po merrte ujë. Ai e braktisi kajakun dhe hoqi jelekun e shpëtimit, pasi i pengonte notin.

    Ai tha se u përqendrua tek mendimet pozitive gjatë notit prej rreth katër orësh në det të trazuar për të arritur bregun, duke dhënë alarmin rreth orës 18:00.

    “Valët ishin të mëdha dhe unë nuk kisha jelek shpëtimi… Thjesht vazhdoja të mendoja ‘vetëm vazhdo të notosh, vetëm vazhdo të notosh’”, tha Austin të martën. “Dhe më në fund arrita në breg, preka pjesën e poshtme të plazhit dhe thjesht u rrëzova”.

    Familja, nga kryeqyteti i shtetit Perth, ishte në pushime dhe po përdorte kajakë dhe dërrasa lundrimi të marra me qira nga hoteli i tyre rreth orës 12:00, kur kushtet e detit dhe era e fortë filluan t’i tërhiqnin në det të hapur.

    Një helikopter kërkimi gjeti nënën dhe dy fëmijët, të cilët mbanin jelekë shpëtimi dhe u mbajtën pas një dërrase lundrimi, rreth orës 20:30, njoftoi policia. Ata ishin larguar 14 kilometra nga Quindalup në shtetin e Australisë Perëndimore, pas qëndrimit deri në 10 orë në ujë.

    Të katër anëtarët e familjes u kontrolluan nga mjekët, por asnjëri nuk kërkoi shtrim në spital.

  • Manipulimet me vota në rajonin e Gjilanit, prokuroria jep detaje rreth intervistimit të të dyshuarve

    Manipulimet me vota në rajonin e Gjilanit, prokuroria jep detaje rreth intervistimit të të dyshuarve

    Prokuroria Themelore në Gjilan ka autorizuar Policinë e Kosovës që të hetojë çdo dyshim për keqpërdorim të votave gjatë procesit zgjedhor, përfshirë falsifikimin apo ndryshimin e rezultateve në favor ose në dëm të subjekteve politike apo kandidatëve për deputet.

    Sipas njoftimit për media, autorizimi është dhënë më 20 janar 2026, ndërsa provat konkrete lidhur me këto dyshime janë pranuar nga Komisioni Qendror i Zgjedhjeve më 2 shkurt 2026.

    “Më 3 shkurt 2026, Prokuroria ka autorizuar intervistimin e të dyshuarve, duke filluar nga Komuna e Vitisë, ku pas rinumërimit është vërejtur ndryshim më i madh i rezultateve krahasuar me komunat e Gjilanit, Kamenicës, Novobërdës, Ranillugut dhe Parteshit. Intervistimet në këto komuna janë ende në proces”, thuhet në njoftim.

    Prokuroria bën të ditur se në territorin e saj nuk ka dallime të theksuara mes rezultateve paraprake dhe atyre pas rinumërimit të votave, duke theksuar se vetëm një kandidat ka rezultuar me 145 vota më pak, ndërsa të gjithë kandidatët e tjerë kanë ndryshime më të vogla.

    Hetimet do të vazhdojnë në procedurë të rregullt deri në intervistimin e të gjithë personave të dyshuar, përveç nëse paraqiten rrethana të reja.

    Prokuroria Themelore në Gjilan ka theksuar se mbetet e përkushtuar që të hetojë dhe të sjellë para drejtësisë çdo person që ka keqpërdorur qoftë edhe një votë, me qëllim të mbrojtjes së integritetit të procesit zgjedhor dhe sundimit të ligjit.