ATV

Blog

  • Kërkohet paraburgim ndaj një shtetasi serb, dyshohet për trafikim të paautorizuar të armëve

    Kërkohet paraburgim ndaj një shtetasi serb, dyshohet për trafikim të paautorizuar të armëve

    Prokuroria Themelore në Prishtinë ka kërkuar caktimin e masës së paraburgimit ndaj një personi me inicialet Z.M., shtetas i Republikës së Serbisë, i dyshuar për veprën penale të importit, eksportit, furnizimit, transportimit, prodhimit, ndërmjetësimit dhe shitjes së paautorizuar të armëve apo materialeve plasëse.

    Sipas Prokurorisë, i dyshuari është arrestuar në flagrancë më 22 korrik 2026, pas zhvillimit të hetimeve dhe sigurimit të provave materiale. Dyshohet se armët e zjarrit janë importuar nga Serbia dhe më pas janë modifikuar në kundërshtim me ligjin.

    Ndaj të dyshuarit është caktuar masa e ndalimit prej 48 orësh me urdhër të Prokurorit të Shtetit, ndërsa më 23 korrik Prokuroria ka dorëzuar kërkesë në gjykatën kompetente për caktimin e paraburgimit.

    Prokuroria Themelore në Prishtinë ka bërë të ditur se do të vazhdojë angazhimin në luftimin e kriminalitetit dhe në vënien para drejtësisë të personave që dyshohen për shkelje të ligjit.

  • Lirim Kastrati nis një kapitull të ri, zyrtarizohet te kampioni i Lituanisë

    Lirim Kastrati nis një kapitull të ri, zyrtarizohet te kampioni i Lituanisë

    Lirim Kastrati ka gjetur destinacionin e ri në karrierën e tij. Futbollisti kosovar është prezantuar zyrtarisht si lojtari më i ri i FK Kauno Žalgiris, kampionit në fuqi të Lituanisë, duke nisur kështu një sfidë të re në futbollin evropian.

    27-vjeçari vjen nga klubi hungarez Diósgyőri VTK dhe te skuadra e re do të mbajë fanellën me numrin 62. Transferimi shihet si një mundësi e rëndësishme për mbrojtësin e krahut, i cili synon të rikthehet në nivelin më të lartë të performancës.

    Kauno Žalgiris është një emër tashmë i njohur edhe për futbollin kosovar. Klubi lituanez tërhoqi vëmendjen gjatë kësaj vere pasi eliminoi Dritën në raundin e parë kualifikues të Ligës së Kampionëve, duke konfirmuar ambiciet e tij edhe në arenën evropiane.

    Kastrati i bashkohet skuadrës me një përvojë të pasur ndërkombëtare. Ai ka qenë pjesë e Kombëtares së Kosovës që nga viti 2017, duke regjistruar 15 paraqitje me fanellën e “Dardanëve”. Edhe pse vitet e fundit ka mbetur jashtë grumbullimeve të përfaqësueses, transferimi në Lituani mund t’i japë mundësinë të rikthejë formën dhe të rikthehet në radarët e ekipit kombëtar.

    Objektivi i tij tashmë është i qartë: të ndihmojë Kauno Žalgirisin në mbrojtjen e titullit kampion, të ketë një rol të rëndësishëm në garat evropiane dhe të hapë një kapitull të ri të suksesshëm në karrierën e tij.

  • Ambasadorët e BE-së vizitojnë veriun: Sundimi i ligjit të zbatohet njësoj në gjithë Kosovën

    Ambasadorët e BE-së vizitojnë veriun: Sundimi i ligjit të zbatohet njësoj në gjithë Kosovën

    Ambasadorët e shteteve anëtare të Bashkimit Evropian, së bashku me shefen e Zyrës së BE-së në Kosovë, zhvilluan të mërkurën një vizitë në Zveçan, ku u takuan me kryetarët e katër komunave veriore për të diskutuar mbi sfidat me të cilat po përballen në ushtrimin e mandateve të tyre pas zgjedhjeve lokale të tetorit 2025.

    Sipas një njoftimi të Zyrës së Bashkimit Evropian, gjatë takimit kryetarët e komunave paraqitën një sërë vështirësish që, sipas tyre, po ndikojnë në funksionimin e administratave lokale dhe në ofrimin e shërbimeve për qytetarët.

    Mes sfidave të përmendura ishin mungesa e arkivave administrative, mungesa e stafit të kualifikuar, kufizimet buxhetore, çështjet që lidhen me pronat, si dhe ajo që ata e cilësuan si kontroll nga niveli qendror mbi aktivitetet komunale.

    Gjatë vizitës, diplomatët evropianë zhvilluan edhe takime të ndara me përfaqësues të organizatave të shoqërisë civile dhe me anëtarë të kuvendeve komunale nga partitë opozitare, për të dëgjuar edhe perspektivat e tyre lidhur me situatën në veri të Kosovës.

    Në reagimin e BE-së thuhet se Bashkimi Evropian dhe shtetet e tij anëtare mbeten të përkushtuara ndaj forcimit të vetëqeverisjes lokale dhe procesit të decentralizimit në Kosovë, në përputhje me Kushtetutën dhe Ligjin për Vetëqeverisjen Lokale.

    “Bashkimi Evropian dhe shtetet e tij anëtare mbeten fuqimisht të përkushtuara ndaj një vetëqeverisjeje lokale të fortë në Kosovë dhe decentralizimit të mbështetur në Kushtetutë dhe Ligjin për Vetëqeverisjen Lokale. Ata bëjnë thirrje për përmirësimin e koordinimit ndërmjet nivelit lokal dhe atij qendror, mbështetje efektive për komunat nga ministritë përkatëse dhe zbatim të barabartë të parimeve të sundimit të ligjit në mbarë Kosovën”, thuhet në komunikatë.

    BE-ja thekson se administratat komunale funksionale dhe llogaridhënëse janë kyçe për ofrimin e shërbimeve cilësore për qytetarët dhe për forcimin e besimit në institucione.

    “Administratat komunale efektive, llogaridhënëse dhe plotësisht funksionale, që ofrojnë shërbime cilësore për të gjithë banorët e Kosovës, përfshirë në veri, janë në interes të publikut dhe thelbësore për ndërtimin e besimit, stabilitetit dhe prosperitetit”, thuhet më tej në reagim.

    Në përfundim, Bashkimi Evropian rithekson se do të vazhdojë të mbështesë Kosovën në procesin e reformave dhe forcimin e vetëqeverisjes lokale.

    “Si partneri më i fortë dhe më i besueshëm i Kosovës, si dhe donatori më i madh i asistencës financiare, Bashkimi Evropian do të vazhdojë të mbështesë komunat dhe reformat që forcojnë vetëqeverisjen lokale në mbarë Kosovën”, përfundon njoftimi i Zyrës së BE-së.

  • Prokuroria e Pejës: Vrasja në Deçan dyshohet të jetë nga pakujdesia

    Prokuroria e Pejës: Vrasja në Deçan dyshohet të jetë nga pakujdesia

    Një ngjarje tragjike ka ndodhur pasditen e sotme në Bjeshkët e Strellcit, në komunën e Deçanit, ku një person dyshohet se aksidentalisht ka vrarë babanë e tij.

    Rasti ka ndodhur në oborrin e një stani, ndërsa në vendin e ngjarjes kanë dalë dy prokurorë të shtetit së bashku me njësitet relevante të Policisë së Kosovës.

    Zëdhënësi i Prokurorisë Themelore në Pejë, Shkodran Nikçi, ka bërë të ditur për Telegrafin se i dyshuari është arrestuar në vendin e ngjarjes dhe është duke u intervistuar nga policia.

    “Dy prokurorë të shtetit kanë dalë në vendin e ngjarjes së bashku me të gjitha njësitet relevante policore. Personi i dyshuar është arrestuar në vendin e ngjarjes dhe aktualisht është duke u intervistuar nga policia. Ky rast është cilësuar si vrasje nga pakujdesia, ndërkaq në vendin e ngjarjes janë duke u ndërmarrë të gjitha veprimet e nevojshme”, ka deklaruar Nikçi.

    Sipas tij, është sekuestruar edhe arma me të cilën dyshohet se është kryer vrasja, ndërsa pritet që njësitë përkatëse të bëjnë tërheqjen e trupit të viktimës.

    Me urdhër të prokurorit, trupi i viktimës do të dërgohet për obduksion.

    Për tragjedinë e rëndë ka reaguar edhe kryetari i Deçanit Bashkim Ramosaj.

    “Me dhimbje të thellë mora lajmin për ndarjen tragjike nga jeta të Shpend Hasanramaj nga Strellci i Epërm, i cili humbi jetën në një ngjarje të rëndë aksidentale.Në këto çaste të vështira, shpreh ngushëllimet e mia më të sinqerta familjes Hasanramaj, të afërmve, miqve dhe të gjithë banorëve të Strellcit të Epërm.Lutem që Zoti t’ju japë forcë dhe durim për ta përballuar këtë humbje të madhe”, ka shkruar Ramosaj.

  • Aksident me fatalitet në magjistralen Prishtinë-Pejë, humb jetën 19-vjeçari

    Aksident me fatalitet në magjistralen Prishtinë-Pejë, humb jetën 19-vjeçari

    Një aksident i rëndë trafiku ka ndodhur sot në fshatin Llazicë të Malishevës, ku një 19-vjeçar ka humbur jetën pasi dyshohet se është vetaksidentuar me motoçikletë.

    Rastin e ka konfirmuar zëdhënësja e Policisë së Kosovës, Vlera Krasniqi.

    Sipas saj, aksidenti ka ndodhur rreth orës 15:40 në rrugën magjistrale Prishtinë–Pejë.

    “Sot, rreth orës 15:40, në rrugën magjistrale Prishtinë–Pejë, përkatësisht në fshatin Llazicë të Malishevës, dyshohet se një person është vetaksidentuar me motoçikletë”, ka deklaruar Krasniqi.

    Menjëherë pas pranimit të informacionit, në vendin e ngjarjes kanë dalë njësitë përkatëse policore dhe ekipi mjekësor.

    Mjeku ka konstatuar në vendin e ngjarjes se drejtuesi 19-vjeçar i motoçikletës ishte pa shenja jete.

    “Policia është duke i ndërmarrë veprimet e nevojshme hetimore për sqarimin e plotë të rrethanave të rastit”, ka thënë Krasniqi për Sinjalin.

  • Plagosja në Vushtrri: Katër persona shoqërohen në polici, i dyshuari në kërkim

    Plagosja në Vushtrri: Katër persona shoqërohen në polici, i dyshuari në kërkim

    Katër persona janë shoqëruar në polici, pas plagosjes së një personi këtë të enjte në Vushtrri.

    Zëdhënësi i policisë për rajonin e Mitrovicës, Avni Zahiti, tha se katër të shoqëruarit dyshohet se ishin pjesëmarrës në ngjarje.

    Ndërkohë, sipas Zahitit, i dyshuari për plagosjen është ende në arrati dhe po vazhdojnë kërkimet për kapjen e të njëjtit.

    Nga ana tjetër, i plagosuri është dërguar për trajtim mjekësor, ndërsa policia ka nisur veprimet operative dhe hetimore për zbardhjen e rastit.

  • Dardan Morina bën hapin e madh, talenti kosovar firmos me Lokomotivën e Zagrebit

    Dardan Morina bën hapin e madh, talenti kosovar firmos me Lokomotivën e Zagrebit

    Një kapitull i ri ka nisur në karrierën e Dardan Morinës. Mesfushori kosovar është zyrtarisht futbollist i Lokomotivës së Zagrebit, duke kaluar te një nga klubet më të njohura të futbollit kroat.

    20-vjeçari mbërrin në Kroaci pas aventurës me Dukagjinin, ku kontrata e tij u ndërpre, ndërsa tashmë ka bërë një hap të rëndësishëm përpara në karrierë, duke iu bashkuar një kampionati me traditë dhe nivel të lartë.

    Lokomotiva e Zagrebit e ka prezantuar Morinën si një nga përforcimet më të reja të skuadrës, duke vlerësuar cilësitë teknike dhe potencialin e tij.

    “Mesfushori i talentuar 20-vjeçar Dardan Morina ka nënshkruar kontratë profesionale. Ai është pjesë e Kosovës U21 dhe karakterizohet nga teknika e shkëlqyer, pasimi final dhe cilësitë që e bëjnë një nga talentet më premtues në brezin e ri të mesfushorëve”, thuhet në njoftimin e klubit kroat.

    Vetë Morina nuk e ka fshehur entuziazmin për mundësinë e re që i është ofruar. Ai ka falënderuar klubin për besimin dhe ka premtuar përkushtim maksimal në çdo stërvitje dhe ndeshje.

    “Jam shumë mirënjohës për besimin që më kanë dhënë dhe për mundësinë që të jem pjesë e këtij klubi. Që nga bisedat e para e ndjeva se njerëzit këtu besojnë tek unë dhe kjo ka shumë rëndësi për mua. Kam ardhur me dëshirë të madhe për të treguar vlerat e mia dhe për të dhënë maksimumin”, u shpreh Morina.

    Mesfushori kosovar e sheh kampionatin kroat si një sfidë të rëndësishme në zhvillimin e tij.

    “Liga e Kroacisë është shumë cilësore dhe për mua do të jetë një test i madh. E di që Lokomotiva është një skuadër me shumë kualitet dhe që çdo sezon arrin rezultate të mira. Jam shumë i lumtur që jam këtu dhe mezi pres të filloj këtë aventurë të re”, deklaroi ai.

    Me këtë transferim, Dardan Morina synon të vazhdojë rritjen e tij dhe të dëshmojë se talentet nga Kosova mund të hapin rrugë drejt skenave më të mëdha evropiane.

  • “150 euro në muaj për mjekët që punojnë vetëm në sektorin publik shëndetësor”, Ministria e Shëndetësisë del me vendim

    “150 euro në muaj për mjekët që punojnë vetëm në sektorin publik shëndetësor”, Ministria e Shëndetësisë del me vendim

    Ministria e Shëndetësisë vazhdon zbatimin e politikave që synojnë mbështetjen dhe motivimin e profesionistëve shëndetësorë, duke forcuar njëkohësisht sistemin publik të kujdesit shëndetësor.

    Sipas një postimi në rrjetin social në Facebook thuhet se edhe këtë vit është nënshkruar vendimi për vazhdimin e shtesës prej 150 euro në muaj për mjekët që punojnë vetëm në sektorin publik shëndetësor.

    “Kjo politikë ka për qëllim të kontribuojë në fuqizimin e sektorit publik shëndetësor, duke vlerësuar angazhimin dhe përkushtimin e mjekëve që angazhohen ekskluzivisht në sektorin publik. I falënderojmë për kontributin e tyre dhe u urojmë shëndet e suksese në punë”, thuhet në njoftim.

  • ASK: Eksporti i Kosovës u rrit me 26.9% në qershor 2026, por deficiti tregtar vazhdon të thellohet

    ASK: Eksporti i Kosovës u rrit me 26.9% në qershor 2026, por deficiti tregtar vazhdon të thellohet

    Agjencia e Statistikave të Kosovës (ASK) ka publikuar të dhënat për tregtinë e jashtme të mallrave për muajin qershor 2026, të cilat tregojnë rritje të eksporteve dhe importeve, por edhe një zgjerim të deficitit tregtar krahasuar me të njëjtën periudhë të vitit të kaluar.

    Sipas ASK-së, deficiti tregtar në qershor 2026 arriti në 578.3 milionë euro, duke shënuar një rritje prej 16.1% krahasuar me qershorin e vitit 2025, kur deficiti ishte 498.3 milionë euro. Eksportet mbuluan vetëm 15.0% të importeve gjatë kësaj periudhe.

    Vlera e eksporteve të mallrave në qershor 2026 ishte 102.0 milionë euro, që paraqet një rritje prej 26.9% në raport me një vit më parë. Në të njëjtën kohë, importet arritën në 680.3 milionë euro, me një rritje prej 17.6%.

    Në strukturën e eksporteve, pjesën më të madhe e përbënin metalet bazë dhe artikujt prej tyre me 27.4%, të ndjekura nga ushqimet e përgatitura, pijet dhe duhani me 12.7%, plastika, goma dhe artikujt prej tyre me 10.6%, artikujt e ndryshëm të prodhuar me 8.7% dhe produktet minerale me 7.1%.

    Sa i përket importeve, produktet minerale përbënin 15.2% të totalit, makineritë, pajisjet mekanike dhe elektrike 13.0%, mjetet e transportit 12.0%, ushqimet e përgatitura, pijet dhe duhani 11.9%, ndërsa metalet bazë dhe artikujt prej tyre 9.8%.

    Eksportet e Kosovës drejt vendeve të Bashkimit Evropian arritën në 32.5 milionë euro, ose 31.9% të eksporteve të përgjithshme, duke shënuar një rritje prej 17.7%. Partnerët kryesorë të eksportit në BE ishin Gjermania me 10.1%, Holanda me 3.8% dhe Italia me 3.1%.

    Ndërkohë, importet nga vendet e BE-së arritën në 304.9 milionë euro, ose 44.8% të importeve të përgjithshme, me një rritje prej 22.2%. Pjesën më të madhe të importeve e zunë Gjermania me 13.3%, Italia me 8.6% dhe Polonia me 4.3%.

    Tregtia me vendet e CEFTA-s mbetet një komponent i rëndësishëm i eksporteve të Kosovës. Eksportet drejt këtyre vendeve arritën në 44.0 milionë euro, ose 43.1% të totalit, me një rritje prej 19.3%. Partnerët kryesorë ishin Maqedonia e Veriut me 16.7%, Shqipëria me 14.3%, Mali i Zi me 5.7% dhe Serbia me 4.0%.

    Importet nga vendet e CEFTA-s arritën në 98.7 milionë euro, duke përbërë 14.5% të importeve të përgjithshme dhe duke shënuar po ashtu një rritje prej 19.3%. Pjesëmarrjen më të madhe e kishin Maqedonia e Veriut me 5.4%, Shqipëria me 4.8% dhe Serbia me 3.0%.

    Sa i përket vendeve të tjera, eksportet e Kosovës arritën në 25.5 milionë euro, ose 25.0% të eksporteve totale, ku partnerët kryesorë ishin Zvicra me 10.0% dhe Turqia me 5.4%.

    Nga ana tjetër, importet nga vendet e tjera arritën në 276.7 milionë euro, ose 40.7% të importeve të përgjithshme. Kina mbetet partneri më i madh në këtë kategori me 15.1% të importeve, e ndjekur nga Turqia me 11.6%.

    Sipas ASK-së, të dhënat konfirmojnë vazhdimin e rritjes së aktivitetit tregtar të Kosovës gjatë qershorit 2026, megjithatë ritmi më i lartë i rritjes së importeve në vlerë absolute ka ndikuar në zgjerimin e deficitit tregtar.

    Për më shumë informata, lidhur me Statistikat e Tregtisë së Jashtme për muajin qershor 2026,vizitoni: https://ask.rks-gov.net/Themes/ForeignTrade.

  • Zelensky zbret në vendin e katërt në renditjen e besimit të ukrainasve

    Zelensky zbret në vendin e katërt në renditjen e besimit të ukrainasve

    Presidenti i Ukrainës, Volodymyr Zelensky, nuk është më ndër tre liderët më të besuar në vend, sipas një sondazhi të ri të publikuar nga grupi “Rating”.

    Sipas anketës së zhvilluar më 20 dhe 21 korrik 2026, lideri më i besuar nga ukrainasit rezulton të jetë ish-komandanti i përgjithshëm i Forcave të Armatosura të Ukrainës, Valeriy Zaluzhnyi, me 70 për qind të mbështetjes.

    Në vendin e dytë renditet Mykhailo Fedorov me 65 për qind, ndërsa në vendin e tretë është Kyrylo Budanov me 62 për qind. Zelensky renditet i katërti me 59 për qind të besimit nga qytetarët.

    Rritja më e madhe në këtë renditje është shënuar nga Mykhailo Fedorov, niveli i besimit ndaj të cilit është rritur nga 35 për qind në 65 për qind brenda vetëm një jave.

    Ndërkohë, besimi ndaj shefit të ushtrisë ukrainase, Oleksandr Syrskyi, ka pësuar një rënie të ndjeshme, duke zbritur nga 39 për qind në 23 për qind.

    Rezultatet e sondazhit tregojnë ndryshime të rëndësishme në perceptimin e publikut ukrainas ndaj figurave kryesore politike dhe ushtarake të vendit, në një periudhë kur Ukraina vazhdon përballjen me agresionin rus.