Blog

Ekipi negociator ukrainas në kryeqytetin e Emirateve të Bashkuara Arabe ka filluar ditën e dytë të bisedimeve trepalëshe me Rusinë dhe Shtetet e Bashkuara, që synojnë zgjidhjen e konfliktit me Rusinë.

Rustem Umerov, Sekretari i Këshillit Kombëtar të Sigurisë dhe Mbrojtjes së Ukrainës, njoftoi për këtë në profilin e tij në Facebook:

“Dita e dytë e negociatave në Abu Dhabi ka filluar,” shkroi Umerov, transmeton Telegrafi.

“Po punojmë në të njëjtat formate si dje: konsultime trepalëshe, punë në grupe dhe sinkronizim i mëvonshëm i pozicioneve. Rezultatet do të pasojnë,” shtoi ai.

Duke komentuar mbi progresin e bisedimeve më 4 shkurt, Sekretari i Shtetit i SHBA-së, Marco Rubio, foli për lajme të mira dhe të këqija.

Sipas Rubios, lajmi i mirë është se lista e çështjeve të pazgjidhura midis Ukrainës dhe Rusisë është ngushtuar ndjeshëm.

Delegacioni ukrainas po përgatit një raport për presidentin Volodymyr Zelensky mbi rezultatet e ditës së parë të negociatave, të cilat përfunduan më 4 shkurt.

Imazhe dhe video të paredaktuara që shfaqin lakuriqësi, të publikuara në dosjet Epstein, kanë mbetur të postuara online për ditë të tëra, pavarësisht se zyrtarët amerikanë ishin paralajmëruar për dështim në redaktim, ka raportuar të enjten (05.02.2026) televizioni BBC. Avokatët thonë se kjo u ka shkaktuar viktimave dëm “të pariparueshëm”. Dosjet e shqyrtuara nga “BBC Verify” janë në mesin e mijëra dokumenteve që avokatët thonë se përmbajnë informacione identifikuese për dhjetra viktima të Epsteinit.

Grupet e viktimave folën për herë të parë për këtë çështje gjatë fundjavës, kur gazeta “New York Times” do të raportonte se gati 40 imazhe të veçanta ishin publikuar të premten e javës së kaluar si pjesë e dosjeve Epstein.

Një gjykatës në Nju Jork ka thënë të martën se Departamenti i Drejtësisë (DoJ) ishte pajtuar ta rregullonte shpejt problemin, pasi viktimat kërkuan që faqja e internetit të mbyllej derisa të redaktoheshin emrat dhe imazhet siç duhet.

DoJ-i ka hequr mijëra dokumente nga faqja e internetit, duke deklaruar se dosjet ishin ngarkuar për shkak të një “gabimi teknik ose njerëzor”. Departamenti i Drejtësisë ka deklaruar se po vazhdon të shqyrtojë kërkesa të reja, si dhe të kontrollojë nëse kishte dokumente të tjera që mund të kenë nevojë për redaktim të mëtejshëm.

“BBC Verify” ka zbardhur në mënyrë të pavarur se një numër imazhesh të personave të identifikueshëm ende ishin të postuar online të mërkurën, pavarësisht se qeveria amerikane kishte deklaruar një ditë më parë se po trajtonte problemin e redaktimeve të paplota. BBC-ja i është drejtuar DoJ-it për koment, duke ia ofruar emrat e dosjeve të paredaktuara.

“Dëmi i shkaktuar është i pariparueshëm”, ka thënë një deklaratë Brad Edwards, avokat që përfaqëson viktimat.

Katër nga imazhet e identifikuara nga “BBC Verify” tregonin vajza të reja pjesërisht të veshura, me fytyrat dhe trupat të paredaktuara.

Këshilli i Investitorëve Europian ka organizuar eventin, “French Business Day”, qw synon të promovojë Kosovën si destinacion investimesh, të fuqizojë dialogun publiko-privat dhe të kontribuojë në thellimin e marrëdhënieve ekonomike dhe tregtare ndërmjet Kosovës dhe Francës.

Në këtë aktivitet morën pjesë përfaqësues të institucioneve të Kosovës, diplomacisë franceze dhe komunitetit të biznesit, ndërsa u theksua rëndësia e krijimit të partneriteteve afatgjata, rritjes së investimeve dhe bashkëpunimit ekonomik ndërmjet dy vendeve.

Kryeministri në detyrë, Albin Kurti, tha se bashkëpunimi duhet të ndërtohet mbi besimin.

“Dhe nëse ka një fjalë që duhet të përkufizojë bashkëpunimin tonë sot, ajo është besimi. Sepse besimi nuk është vetëm vlerë, është avantazh ekonomik. Në një botë të paqëndrueshme, të ndikuar nga tensionet gjeopolitike, transformimet teknologjike dhe rregullimi i fragmentuar, integriteti nuk është vetëm përmbushje rregullash, integriteti është konkurrueshmëri. Kur rregullat janë të qarta dhe zbatohen me drejtësi, kompanitë e mira sigurtë rriten, investitorët planifikojnë afatgjatë dhe shoqëritë fitojnë besim në të ardhmen”, tha ai.

Ai shtoi se Kosova është e gatshme për projekte të mëdha dhe zgjerim të bashkëpunimit tregtar.

“Sot dua të ndaj me ju tri mesazhe. Së pari, Kosova është e gatshme për partneritete të mëdha infrastrukturore. Së dyti, Kosova është e hapur për investime serioze. Dhe së treti, Kosova po zgjeron mundësitë tregtare me Evropën, me rajonin dhe më gjerë. Vendi ynë, Republika e Kosovës, është një shtet i pavarur dhe i konsoliduar, me orientim të qartë evropian dhe po, tash e kemi edhe stabilitetin institucional, i cili dëshirohet aq shumë prej bizneseve. Meqenëse ofron siguri publike, parashikueshmëri dhe disiplinë të fortë fiskale”, tha ai.

Drejtori Ekzekutiv i Këshillit të Investitorëve Evropianë, Emrush Ujkani, tha se platforma ishte përgatitur përmes një procesi të gjatë konsultimesh.

“Kjo nismë u nis në korrik të vitit të kaluar, pas një procesi të gjerë dhe gjithëpërfshirës përgatitor. Gjatë kësaj periudhe, u angazhuam në konsultime me institucionet përkatëse franceze, si dhe me Qeverinë e Kosovës dhe përfaqësues të sektorit privat, me qëllim që kjo platformë të pasqyrojë prioritetet e përbashkëta, nevojat reale të tregut dhe interesat strategjike afatgjata. Ambicia jonë është të nxisim lidhje domethënëse, të promovojmë investime dhe mundësi, si dhe të inkurajojmë inovacionin në këta sektorë, nga financat dhe energjia deri te infrastruktura, mobiliteti dhe teknologjia. Ne besojmë fuqishëm se duke bashkuar institucionet publike, partnerët ndërkombëtarë dhe sektorin privat, mund t’i shndërrojmë interesat e përbashkëta në projekte konkrete”, tha ai.

Ujkani u shpreh se kompanitë franceze janë të mirëpritura në Kosovë.

“Gjithashtu dëshiroj t’u shpreh një mirëseardhje të veçantë të gjitha kompanive franceze të pranishme sot me ne, që po eksplorojnë mundësi në vendin tonë të bukur, Republikën e Kosovës. Interesimi dhe angazhimi juaj janë jetikë për forcimin e lidhjeve ekonomike, nxitjen e inovacionit dhe mbështetjen e rritjes së qëndrueshme në rajonin tonë. Presim me padurim të ndërtojmë partneritete afatgjata dhe të krijojmë së bashku sukses të përbashkët”, tha ai.

Ambasadori i Francës në Kosovë, Olivier Guerot, theksoi se interesi i kompanive franceze dëshmon atraktivitetin e vendit.

“Mirëpo dy konstatime imponohen shumë qartë: së pari, marrja e këtij rreziku ishte një zgjedhje e mirë, dhe së dyti, Kosova është një vend tërheqës për kompanitë franceze. Dhe këtyre kompanive franceze të pranishme sot, e veçanërisht atyre që po e zbulojnë Kosovën, dua t’u them disa gjëra thjesht: faleminderit, faleminderit që po bëni bastin e zbulimit, sepse ka shumë gjëra për t’u zbuluar në këtë vend të bukur. Shumë energji, shumë rini, shumë dëshirë për të ndërmarrë. Dhe ata e ato që patën mundësinë dje ose këtë mëngjes të shëtisin nëpër Prishtinë, mund ta shohin këtë me sytë e tyre. Vendi po transformohet, po zhvillohet, po ndërtohet, po modernizohet, po investon”, tha ai.

Ai shtoi se marrëdhëniet ndërmjet Francës dhe Kosovës janë të forta.

“Është gjithashtu një vend me të cilin Franca mban një marrëdhënie shumë, shumë pozitive, një partner, por edhe më tepër një vend mik. Kjo marrëdhënie mbështetet në lidhje njerëzore me diasporën e cila është padyshim e dukshme mes nesh dhe në lidhje kulturore”, tha ai.

Prej 26 ditësh po kërkohet për gjetjen e trupit të 30 vjeçarit Jurgen Karaj nga fshati Fullqet i Klosit i cili dyshohet të jetë rrëmbyer nga rrjedha e ujit të zallit të Darsit në datën 10 Janar.

Që prej asaj dite kërkimet në rrjedhën e lumit Mat janë bërë pa ndërprerje ku çdo ditë në terren kanë qenë dhjetëra forca të Batalionit të Tretë të Repartit të Këmbësorisë Burrel, familjarë të Jurgenit e struktura të tjera.

Ndërkohë, që prej datës 29 Janar, kërkimeve ju është bashkuar edhe një grup i specializuar nga Forcat e Sigurisë së Kosovës. Mbi 11 persona janë çdo ditë në kërkime krah forcave tona të armatosura.

E gjithë vija lumore e lumit të Matit është kontrolluar disa herë, por pa mundur të gjejnë trupin e 30 vjeçarit apo ndonjë shenjë të tij. Sakaq, kërkime po bëhen edhe në basenin ujor të liqenit të Ulzës.

Forcat e Sigurisë së Kosovës kanë lëshuar dronin nënujor në hyrje të liqenit duke bërë të mundur kontrollin edhe në thellësi të tij. Deri në datën 3 Shkurt, nuk është gjetur asnjë shenjë e 30 vjeçarit Jurgen Karaj.

Kërkimet do të vijojnë ndërsa prurjet e lumit Mat kanë rënë ndjeshëm ditët e fundit, duke krijuar më shumë mundësi kontrolli nga grupet e angazhuara në terren.

Agjencia e Ushqimit dhe Veterinarisë, Policia e Kosovës dhe Drejtoria e Inspektoratit e Komunës së Prishtinës kanë mbajtur sot një takim të përbashkët lidhur me ndërmarrjen e veprimeve të koordinuara kundër shitjes dhe therjeve ilegale të kafshëve dhe shpezëve, duke vlerësuar se kjo veprimtari paraqet rrezik serioz për shëndetin publik.

Sipas njoftimit, institucionet janë dakorduar që të intensifikojnë bashkëpunimin dhe të zbatojnë masa të menjëhershme, të koordinuara dhe pa tolerancë ndaj çdo individi apo biznesi që ushtron veprimtari të paligjshme në këtë fushë.

Po ashtu, u është bërë thirrje publike të gjithë individëve dhe subjekteve ekonomike që merren me shitjen dhe therjen ilegale të kafshëve dhe shpezëve që t’i ndërpresin menjëherë këto veprimtari.

“Çdo shkelje do të trajtohet në përputhje me legjislacionin në fuqi dhe ndaj shkelësve do të merren masa të rrepta ligjore. Gjithashtu, ftojmë qytetarët të bashkëpunojnë dhe të raportojnë çdo rast të dyshuar të kësaj veprimtarie ilegale”, thuhet në njoftim.