ATV

Blog

  • Kurti udhëton për në Gjermani, merr pjesë në Konferencën e Sigurisë në Mynih

    Kurti udhëton për në Gjermani, merr pjesë në Konferencën e Sigurisë në Mynih

    Kryeministri i Republikës së Kosovës, Albin Kurti, ka udhëtuar drejt Gjermanisë ku do të marrë pjesë në edicionin e 62-të të Konferencës së Sigurisë në Mynih – Munich Security Conference 2026 (MSC).

    Kjo u bë e ditur përmes një njoftimi për media, ku ndër të tjera thuhet e krahas pjesëmarrjes në ngjarjet e organizuara në kuadër të MSC, kryeministri gjithashtu do të ketë edhe takime bilaterale në margjina të konferencës.

    “Kryeministri i Republikës së Kosovës, Albin Kurti, ka udhëtuar drejt Gjermanisë ku do të marrë pjesë në edicionin e 62-të të Konferencës së Sigurisë në Mynih – Munich Security Conference 2026 (MSC). Krahas pjesëmarrjes në ngjarjet e organizuara në kuadër të MSC, kryeministri gjithashtu do të ketë edhe takime bilaterale në margjina të konferencës”, thuhet në njoftim.

    Ndryshe, presidentja e Republikës së Kosovës, Vjosa Osmani, e cila ishte ftuar edhe sivjet në Konferencën e Sigurisë në Mynih, ka anuluar pjesëmarrjen e saj për shkak të angazhimeve institucionale dhe prioriteteve të brendshme në vend.

    Këshilltari për Media i Presidencës, Bekim Kupina, ka theksuar se Presidentja është shumë mirënjohëse ndaj organizatorëve për ftesën.

    “Megjithatë, për arsye të angazhimeve institucionale dhe prioriteteve që lidhen me zhvillime brenda vendit, ajo ka vendosur të mos marrë pjesë këtë vit”, ka thënë Kupina.

    Konferenca e 62-të e Munihut do të mbahet nga 13 deri më 15 shkurt, ku do të marrin pjesë qindra udhëheqës botërorë, përfshirë edhe vendet e rajonit.

  • Medaljet e Olimpiadës 2026 po thyhen?! – Atletët ngrenë pikëpyetje, zyrtarët reagojnë 

    Medaljet e Olimpiadës 2026 po thyhen?! – Atletët ngrenë pikëpyetje, zyrtarët reagojnë 

    Olimpiada Dimërore 2026 duhej të ishte vetëm për lavdi, ar dhe momente historike në podium por tani vetë medaljet po bëhen pjesë e debatit.

    Pasi disa atletë publikuan foto ku dukeshin gërvishtje, çarje apo dëmtime sipërfaqësore në medaljet e tyre, rrjetet sociale shpërthyen me një pyetje të vetme “Si është e mundur që një medalje olimpike të dëmtohet?”

    Për shumë fansa, ideja dukej e pabesueshme. Këto nuk janë suvenire të zakonshme, janë simbol i viteve sakrifice dhe pune të palodhur. Por ekspertët rikujtojnë një fakt të rëndësishëm, medaljet e arta olimpike nuk janë prej ari të pastër.

    Në realitet, ato janë kryesisht prej argjendi, të veshura me një shtresë ari. Kjo shtresë, megjithëse e bukur dhe simbolike, mund të jetë më e ndjeshme ndaj goditjeve, rënieve apo presionit të tepërt.

    Zyrtarët kanë theksuar se rastet e raportuara janë të izoluara dhe se medaljet kanë kaluar kontrolle cilësie para shpërndarjes. Megjithatë, imazhet që qarkulluan online ndezën spekulime për mundësi kursimi kostosh, probleme me materialet apo edhe dobësi në dizajn, veçanërisht në pjesën ku lidhet shiriti, që zakonisht mban më shumë peshë dhe presion gjatë festimeve.

    Ekspertët e metalurgjisë sugjerojnë se dëmtimet mund të kenë ardhur nga goditjet gjatë festimeve apo rëniet, shtresë tejet e hollë e veshjes me ar, pika strukturore më të dobëta në dizajn.

    Aktualisht nuk ka prova për një problem të përhapur strukturor, por organizatorët thuhet se po shqyrtojnë rastet e publikuara për të garantuar që standardet të respektohen.

    Sepse kur stërvitesh gjithë jetën për një medalje… gjëja e fundit që dëshiron është që ajo të mos rezistojë si rezistove ti!

  • Sot seanca gjyqësore lidhur me vrasjen e 26-vjeçarit Auron Thaqi, dëshmojnë punonjësit e lokaleve ku ndodhi tragjedia

    Sot seanca gjyqësore lidhur me vrasjen e 26-vjeçarit Auron Thaqi, dëshmojnë punonjësit e lokaleve ku ndodhi tragjedia

    Sot, duke filluar nga ora 13:10, në Gjykatën Themelore të Prizrenit, mbahet seanca gjyqësore lidhur me vrasjen e 26-vjeçarit Auron Thaqi, i cili humbi jetën një vit më parë si pasojë e një therjeje me thikë.

    Seanca do të vazhdojnë me dëshminë e punonjësve të lokaleve përreth, ku edhe ndodhi rasti tragjik, shkruan IndeksOnline.

    Auroni u plagos rëndë në Prizren dhe ndërroi jetë në Qendrën Klinike Universitare të Kosovës (QKUK), pasi nuk arriti t’u mbijetonte plagëve. Dyshohet se pas sulmit ai është hedhur nga një veturë në lëvizje.

    Për këtë rast, janë arrestuar dhe ndodhen në paraburgim dy persona: Enes Ay dhe Hajrullah Brcani.

    Enes Ay po hetohet për veprën penale “Lëndim i rëndë trupor”, e cila ka rezultuar me vdekjen e Auron Thaqit. Ndërsa Hajrullah Brcani po mbahet për veprat penale: “Mosdhënia e ndihmës” dhe “Moslajmërimi i veprave penale apo kryerësve të tyre”.

    Ngjarja kishte tronditur opinionin publik për shkak të rrethanave të rënda dhe dyshimeve për përfshirjen e personave që njiheshin nga afër me viktimën. Një vit pas tragjedisë, familja e Auronit vazhdon të kërkojë drejtësi, ndërsa rasti do të shqyrtohet nesër në gjykatë.

  • Mbi 2000 gjoba trafiku e 50 aksidente trafiku brenda 24-orëve

    Mbi 2000 gjoba trafiku e 50 aksidente trafiku brenda 24-orëve

    Gjatë 24-orëve të fundit në vendin tonë janë shënuar 50 aksidente trafiku ku prej tyre 17 me të lëndur dhe 33 me dëme materiale.

    Po ashtu është bërë e ditur se në këtë interval kohor janë shqiptuar 2389 gjoba për shkelësit e rregullave të trafikut rrugor.

    44 persona janë arrestuar, 26 janë dërguar në mbatje dhe 3 në vuatje dënimi.

  • Haradinaj: Haga nuk mund t’i dënojë 27 shtetet e NATO-s që ndihmuan Kosovën

    Haradinaj: Haga nuk mund t’i dënojë 27 shtetet e NATO-s që ndihmuan Kosovën

    Ish-nënkryetari i OVL të UÇK-së, Nasim Haradinaj, deklaroi se trupi gjykues në Hagë nuk mund t’i shpallë fajtorë ish-krerët e UÇK-së, pavarësisht që ZPS ka parashikuar dënime deri në 45 vjet për secilin.

    Ai në Klan Kosova shtoi se nuk beson se gjykata do të guxojë të dënojë 27 shtetet e NATO-s që ndihmuan Kosovën në rrugën drejt lirisë.

    “Unë e kam shpresën dhe bindjen se trupi gjykues nuk guxon të shpallë fajtorë ndihmën humanitare që e kanë bërë 27 shtete të NATO-s, një luftë që ka pushtuar, që ka shkuar deri në gjenocid në Ballkan, që ka ndalu një kasap që i ka bërë pesë lufta, dhe që i ka dhënë një shteti të drejtën për liri, përfundimisht siç është Kosova”, tha Haradinaj.

  • “Mr. Fantasy” zbulon takimin e tij të ëndrrave me “Të Jashtëzakonshmen” Jenna Ortega – Dhe është çuditërisht i detajuar 

    “Mr. Fantasy” zbulon takimin e tij të ëndrrave me “Të Jashtëzakonshmen” Jenna Ortega – Dhe është çuditërisht i detajuar 

    Të kesh një “crush” me një personazh të famshëm është normale… por të ndërtosh një skenar të plotë filmi rreth saj? Kjo është tjetër nivel.

    Një personazh online që e quan veten “Mr. Fantasy” po bëhet viral pasi përshkroi me detaje takimin e tij të ëndrrave me yllin e Hollywood-it, Jenna Ortega dhe ai nuk kurseu asnjë detaj.

    Në një video që po qarkullon me shpejtësi, ai e quajti aktoren “të jashtëzakonshme”, “misterioze” dhe “ndryshe nga pjesa tjetër e Hollywood-it”. Por nuk u ndal vetëm me komplimente ai shpalosi një plan të plotë për natën perfekte që, sipas tij, do të kalonin bashkë.

    Sipas “Mr. Fantasy”, takimi do të fillonte në një restorant me ndriçim të zbehtë, qirinj dhe atmosferë dramatike. “Ajo do të vishte të zeza,” këmbënguli ai, duke iu referuar stilit të saj karakteristik. “Nuk do të përpiqej të ishte në qendër të vëmendjes… por gjithsesi do të ishte.”

    Më pas, sipas fantazisë së tij, do të shmangnin bisedat e zakonshme dhe do të futeshin menjëherë në diskutime të thella për filma, psikologji dhe humor të errët. “Ajo është e komplikuar!” tha ai me bindje. “E ndiej.”

    Dhe si çdo histori romantike që kërkon një fund dramatik, ai imagjinoi një shëtitje në mesnatë nëpër rrugë të qeta të qytetit, duke e krahasuar me një skenë nga një film indie romantik. “Do të dukej sikur jemi në filmin tonë,” imagjinoi ai.

    Interneti, sigurisht, reagoi. Disa e quajtën thjesht adhurim të pafajshëm. Të tjerë e panë si paksa të tepruar.

    Megjithatë, aura misterioze dhe magnetike e Jenna Ortega vazhdon të frymëzojë obsesion, admirim dhe shumë diskutime online. Dhe në epokën e rrjeteve sociale, edhe një takim imagjinar mund të kthehet në lajm brenda natës.

  • Bllokohet përkohësisht rruga Fushë Kosovë – Mitrovicë, shkak punimet hekurudhore

    Bllokohet përkohësisht rruga Fushë Kosovë – Mitrovicë, shkak punimet hekurudhore

    Komuna e Mitrovicës ka njoftuar se qarkullimi në drejtim të fshatit Frashër do të ndërpritet në tre ditët e ardhshme.

    Kjo po ndodh në kuadër të projektit “Rehabilitimi i rrugës Hekurudhore Linja 10, Pjesa Jugore (Fushë Kosovë – Mitrovicë)”.

    “Drejtoria për Shërbime Publike dhe Infrastrukturë njofton qytetarët se, në kuadër të realizimit të projektit ‘Rehabilitimi i rrugës hekurudhore Linja 10, Pjesa Jugore (Fushë Kosovë – Mitrovicë)’, do të ketë ndërprerje të përkohshme të qarkullimit.

    “Me këtë rast rruga që shpie në drejtim të fshatit Frashër (te hekurudha) do të jetë e bllokuar për qarkullim nga 13.02.2026, ora 08:00 deri më 15.02.2026, ora 24:00”.

    “Luten të gjithë qytetarët dhe shfrytëzuesit e kësaj rruge për mirëkuptim dhe që gjatë kësaj periudhe të shfrytëzojnë rrugë alternative për qarkullim”.

  • Katër të lënduar nga një vetaksident në Dren të Zubin Potokut

    Katër të lënduar nga një vetaksident në Dren të Zubin Potokut

    Katër persona janë lënduar pas një vetaksdeti në fshatin Dren të Zubin Potokut.

    Sipas policisë në aksidentin e ndodhur të enjten ka qenë e përfshirë një veturë udhëtarësh.

    “Përveç dëmeve materiale, lëndime trupore kanë pësuar vozitësja femër kosovare dhe tre pasagjerët (dy meshkuj dhe një femër kosovare) të cilët kanë pranuar tretman mjekësor”, thuhet në raportin 24-orësh të forcave të rendit.

  • Epstein instaloi kamera përgjimi në shtëpinë e tij në Florida, emailet zbulojnë vendin ku i kishte fshehur

    Epstein instaloi kamera përgjimi në shtëpinë e tij në Florida, emailet zbulojnë vendin ku i kishte fshehur

    Një korrespondencë me email nga viti 2014 është publikuar, e cila tregon se autori i dënuar i veprave penale seksuale, Jeffrey Epstein, i ka kërkuar një anëtari të stafit të instalojë kamera të fshehura video në shtëpinë e tij në Palm Beach, Florida. Asistenti u përgjigj se planifikonte t’i fshihte ato në kuti pecetash në shtëpi. Emailet janë pjesë e miliona dokumenteve që Departamenti Amerikan i Drejtësisë publikoi muajin e kaluar, shkruan SkyNews.

    Kamera të fshehura në kutitë e pecetave

    Në një email të datës 5 shkurt 2014, Epstein i shkroi një bashkëpunëtori: “Le të marrim tri kamera të fshehura me detektim lëvizjeje, të cilat regjistrojnë, faleminderit.” Pesë orë më vonë, ai mori një përgjigje: “Jeffrey, unë bleva dy kamera detektimi lëvizjeje dje nga Spy Store në Fort Lauderdale, i karikova mbrëmë dhe sapo po mësoj si t’i përdor… Aktualisht po i instaloj në kuti me peceta Kleenex.”

    Ekipi i të dhënave dhe i forenzikës i Sky News po shqyrton më shumë se një mijë video të fragmentuara të publikuara nga Departamenti i Drejtësisë. Shumë prej tyre duket se janë filmuar në zyrën e Epstein në shtëpinë e tij në Florida.

    Një video tregon një burrë që i ngjan Epsteinit duke folur me gratë në dhomë. Një tjetër tregon një grua të gjunjëzuar pranë tij. Sky News raporton se nuk mund të konfirmonte se kur janë bërë pamjet e kamerës së zyrës, përcjell në shqip gazeta online Reporteri.net.

    Sipas dokumenteve të policisë, viktimat kishin frikë se po filmoheshin fshehurazi. Këto email-e dhe imazhe, të cilat janë analizuar, sugjerojnë se kjo ka qenë vërtet e vërtetë. E gjitha kjo vjen pasi Prokurorja e Përgjithshme e SHBA-së, Pam Bondi, u përplas vazhdimisht me kritikët gjatë një seance të gjatë dëgjimore të komisionit në fillim të kësaj jave.

    Të mërkurën, Bondi dha dëshminë e saj të parë nën betim që kur dosjet e Epstein u publikuan, dhe seanca dëgjimore në një moment u shndërrua në një grindje me demokratët. Viktimat e mbijetuara të Epstein më vonë e akuzuan atë për mungesë empatie dhe humanizmi, ndërsa kritikët argumentojnë se për shkak se jo të gjitha dokumentet janë publikuar dhe shumë prej tyre janë redaktuar shumë, disa njerëz të fuqishëm janë ende duke u mbrojtur.

    Bondi, e cila si kreu i Departamentit të Drejtësisë në fund të fundit mbikëqyr publikimin e dosjeve, mbrojti mënyrën se si u zhvillua procesi dhe tha se i vinte “thellësisht keq për gjithçka që ka kaluar çdo viktimë, veçanërisht ai përbindësh”.

    Megjithatë, ajo refuzoi të merrte përgjegjësi personale për dështimet fillestare për të mbrojtur identitetin e viktimave individuale në dokumentet e publikuara, duke thënë se stafi, nën presion, bëri më të mirën që mundi.

  • Tentoi të ikë, kapet i dyshuari dhe sekuestrohet mall mbi 33 mijë euro në Vërmicë

    Tentoi të ikë, kapet i dyshuari dhe sekuestrohet mall mbi 33 mijë euro në Vërmicë

    Një person është ndaluar nga autoritetet doganore pasi tentoi të largohej nga Pikëkalimi Kufitar në Vërmicë, duke mos iu bindur urdhrit për ndalim. Në automjetin e tij janë sekuestruar mallra në vlerë mbi 33 mijë euro.

    Sipas njoftimit të Doganës së Kosovës, më 12 shkurt 2026, rreth orës 12:15, zyrtarët e Njësisë së Antikontrabandës kanë identifikuar automjetin që u largua nga pika e kontrollit. Pas reagimit të menjëhershëm, ata i janë vënë në ndjekje dhe e kanë ndaluar në autostradë.

    Automjeti është kthyer nën përcjellje zyrtare në PKK Vërmicë për kontroll të detajuar.

    Çfarë u gjet në automjet?

    • 233 pako

    • 1,376 njësi mallrash të ndryshme

    • Vlera e përgjithshme: 33,810.98 euro

    • Shmangie nga detyrimet doganore: 10,075.67 euro

    Malli përfshinte artikuj tekstili, këpucë, produkte kozmetike, aksesorë, produkte ushqimore dhe mallra të tjera konsumi, të destinuara për blerës në Kosovë dhe në Maqedoninë e Veriut.

    Në vendngjarje kanë dalë njësitë hetimore të Doganës së Kosovës dhe, me urdhër të prokurorit kompetent, është inicuar rast për vepër penale.

    I gjithë malli është sekuestruar sipas procedurave ligjore, ndërsa automjeti është konfiskuar përkohësisht dhe dërguar në hapësirat zyrtare të Doganës. Me urdhër të prokurorit kujdestar, i dyshuari është ndaluar për 48 orë.

    Dogana e Kosovës ka theksuar se mbetet e përkushtuar në luftimin e kontrabandës dhe shmangies së detyrimeve doganore, në mbrojtje të rendit ekonomik dhe sigurisë së tregut.