Partitë opozitare në Kuvendin e Kosovës kanë propozuar anëtarët dhe kryetarët e tyre për komisionet parlamentare.
Nga 16 komisione, nëntë do të udhëhiqen nga Lëvizja Vetëvendosje, tri nga PDK-ja dhe dy nga LDK-ja. Një komision do të drejtohet nga Grupi Multietnik dhe një nga Lista Serbe.
Opozita ka theksuar rëndësinë e përfaqësimit të barabartë dhe transparencës në funksionimin e komisioneve.
Një rast i dhunës në familje është raportuar në Fushë Kosovë, ku një grua ka kërkuar mbrojtje institucionale pas presioneve psikologjike nga bashkëshorti i saj.
Sipas Policisë, ngjarja ka ndodhur më 12 shkurt rreth orës 12:00, kur viktima, rreth 36-vjeçare, është paraqitur në stacion policor dhe ka deklaruar se bashkëshorti, rreth 47 vjeç, ka ushtruar dhunë psikologjike ndaj saj për arsye xhelozie, pas realizimit të një fotografie me kolegët e punës.
Me urdhër të prokurorit, rasti është iniciuar si “Dhunë në familje”, ndërsa viktima ka kërkuar urdhër mbrojtës. Hetimet janë në vazhdim.
Kjo fundjavë pritet të sjellë xhiron e 20-të në Albi Mall Superligën e Kosovës në futboll,ku në program pritet të ketë ndeshje tejet interesante.
Vëmendja pritet të jetë në stadiumin “Fadil Vokrri”,ku Prishtina e pret skuadrën e Llapit në derbin e kësaj fundjave.
Kryeqytetasit në xhiron e kaluar iu rikthyen fitoreve në ligë por më pas u eliminuan në Kupën e Kosovës në mesjavë nga Ballkani,dhe synojnë që ndaj Llapit ta harrojnë këtë humbje ndaj nënkampionit të Kosovës.
Në anën tjetër Llapi e cila eliminoi Dritën nga Kupa e Kosovës vjen me motivim të plotë në këtë ndeshje,dhe do të tentoj që nga kjo ndeshje të dal me 3 pikë të plota.
Ndeshja Prishtina-Llapi pritet të zhvillohet të dielën me fillim nga ora 18:00.
Të shtunën pritet të zhvillohet vetëm një ndeshje,ku kampioni aktual Drita e pret Drenicën ku gjilanasit synojnë të sigurojnë 3 pikë,teksa Drenica do të tentoj të nxjerrë pikë.
Të dielën pritet të zhvillohen edhe dy takime të tjera ku Dukagjini e pret Gjilanin si dhe Ferizaj do të jetë mysafir i Prishtinës së Re,kurse xhiroja e 20-të do të mbyllet me ndeshjen Ballkani-Malisheva.
Një dekorues mbretëror që pikturoi dhomën e gjumit të Princit dhe Princeshës së Uellsit u gjet i varur pasi ‘ Mbreti Charles ‘ thuhet se kritikoi një nga lyerjet e tij, sipas një hetimi.
I vetëpunësuari Chris Eadie, 63 vjeç, kishte punuar në pronën Sandringham për më shumë se 30 vjet dhe krenohej shumë me kryerjen e projekteve për Mbretëreshën e ndjerë dhe më vonë Mbretin Charles, dëgjoi Gjykata e Mjekut Ligjor të Norfolkut.
Vëllai i tij, Mark Eadie, tha se kishte mbetur i mërzitur pasi iu ngarkua detyra të pikturonte një pagodë mbi një Budë në kopshtet e Sandringham House me ngjyrat e kërkuara nga
Marku tha se vëllai i tij shumë i aftë mendonte se ngjyrat ishin ‘pak të ndezura’, por e lyeu pikërisht siç u udhëzua. Megjithatë, sipas EDP-së, Mbreti u tha se ishte i pakënaqur me pamjen e saj dhe urdhëroi që të lyhej përsëri.
Babai i dy fëmijëve, Z. Eadie, e çmontoi me përkushtim strukturën dhe e përgatiti atë për ngjyrat e reja të zgjedhura nga Mbreti, vetëm që puna përfundimtare e lyerjes t’i dorëzohej një kontraktori tjetër, tha ai.
Marku shtoi: “Pas gjithë asaj përgatitjeje të detajuar, dikush tjetër iu dha puna. Ai ishte i shkatërruar”.
Gjykata dëgjoi se afërsisht në të njëjtën kohë, zoti Eadie kishte filluar të humbiste peshë dhe vuante nga mungesa e oreksit, duke u bindur se mund të kishte kancer.
Bisedat telefonike me vëllain e tij zbuluan se shëndeti i tij mendor po përkeqësohej, ndërsa shqetësimet e tij shtoheshin si për shëndetin e tij ashtu edhe për pakësimin e punës në Sandringham.
Marku tha se “perfeksionizmi” i vëllait të tij nënkuptonte se ai emërohej shpesh për “punët më të larta” brenda familjes mbretërore, duke përfshirë edhe lyerjen e dhomës së gjumit të William dhe Kate.
Por në vitet e fundit, thuhet se ai është prekur thellësisht nga kjo, pasi puna nga prona u bë më e rrallë pas ndryshimeve në menaxhim dhe futjes së kontraktorëve të rinj
Marku i tha seancës dëgjimore se vëllai i tij ishte një ‘perfeksionist i talentuar’ që jetonte për punën e tij dhe ishte jashtëzakonisht krenar që kryente punë diskrete për familjen Mbretërore.
Ai tha: “Vëllai im ishte absolutisht i shkëlqyer në punën e tij. Ai kishte një vëmendje të jashtëzakonshme ndaj detajeve dhe nuk linte asgjë të ikte nëse nuk ishte perfekte.”
“Ai ishte besnik dhe nuk fliste për atë që bënte, por unë e di që ai e lyeu dhomën e gjumit të William dhe Kate dhe madje i takoi fëmijët e tyre një herë në kopsht. Ai tha se ishin të mrekullueshëm.”
Partnerja e zotit Eadie, Joanna, e përshkroi atë si një baba të dashur për dy djemtë e tij, të cilët krenoheshin shumë me karrierën e tij dhe shërbimin e tij të gjatë ndaj familjes mbretërore.
Por ajo tha se reduktimi i punës nga Sandringham pas dekadash besnikërie e mërziti thellësisht atë, me incidentin me pagodën që u bë një burim i veçantë ankthi.
Gjashtë javë para vdekjes së tij, ajo e gjeti të ulur në errësirë në shtëpi dhe më vonë kishte frikë se ai kishte menduar të dëmtonte veten.
Në ditët para se ai të vdiste, ajo i tha seancës dëgjimore se ai u bë jashtëzakonisht i dashur, diçka që ajo tani beson se ishte pjesë e lamtumirës së tij.
Ajo e gjeti të vdekur në kopshtin e shtëpisë së tij në pronën Sandringham më 10 tetor të vitit të kaluar.
Polici David Norris i Policisë së Norfolkut i tha hetimit se zoti Eadie u gjet i varur në një hapësirë të vogël kopshti midis hambareve.
Paramedikët u përpoqën ta ringjallnin pasi e prenë përtokë, por nuk arritën ta shpëtonin.
Oficerët gjetën një shishe pije alkoolike të hapur dhe një shënim të shkruar me dorë brenda shtëpisë. Z. Eadie u kërkoi falje të dashurve në shënim, duke shkruar: “Thuaju të gjithëve se i dua shumë. Më vjen keq”.
Testet toksikologjike më vonë treguan vetëm një sasi të vogël alkooli në sistemin e tij, së bashku me nivele të larta të paracetamolit, megjithëse jo aq sa për të shkaktuar vdekjen.
Një ekzaminim pas vdekjes arriti në përfundimin se ai vdiq duke u varur.
Provat mjekësore treguan se zoti Eadie kishte vizituar mjekun e tij të familjes në fillim të vitit duke u ankuar për humbje peshe dhe shqetësime abdominale dhe kishte filluar të merrte ilaçe kundër depresionit pasi kishte raportuar ankth dhe stres të lidhur me punën.
Hetimi dëgjoi se ilaçet e tij për ankthin mbaruan pak para vdekjes së tij dhe nuk ishte kërkuar një recetë e përsëritur.
Edward Parsons, agjent tokash për Sandringham Estate, tha se zoti Eadie nuk kishte qenë kurrë i punësuar drejtpërdrejt nga prona, por ishte një nga shumë kontraktorë të përdorur për punë, me vende pune të ndara bazuar në kërkesa.
Ai tha se megjithëse zotit Eadie i ishin dhënë një numër vendesh pune në vitin 2025, më pas ishte marrë një vendim që puna të mos vazhdonte.
Mjekja ligjore e zonës së Norfolkut, Yvonne Blake, tha se shqetësimet për shëndetin e tij të kombinuara me shqetësimet në punë kishin çuar në një përkeqësim të shëndetit mendor të zotit Eadie.
Por ajo arriti në përfundimin se nuk kishte prova të mjaftueshme për të thënë se ai kishte ndërmend t’i jepte fund jetës së tij dhe regjistroi një përfundim që pasqyronte përkeqësimin e shëndetit mendor dhe jo vetëvrasjen.
Ajo tha: “Nuk jam e bindur që ai kishte ndërmend të vdiste. Ai kishte një përkeqësim të shëndetit mendor dhe ishte i mërzitur për punën. Këto gjëra penguan qartësinë e mjaftueshme të mendjes.”
Ai ia mori jetën vetes, por përkeqësimi i shëndetit mendor do të thotë që nuk po e përfundoj vetëvrasjen, shkruan Daily Mail.
Ajo shprehu ngushëllime familjes së tij, duke e përshkruar atë si një njeri që ishte thellësisht i dashur nga ata që ishin pranë tij, transmeton Sinjali.
Znj. Blake shtoi: “E di që ai ishte një njeri që krenohej shumë me punën e tij. Ai ishte i vetëpunësuar, por bënte shumë punë në Sandringham. Ai ndihej i lënë pas dore sepse nuk kishte aq shumë punë atje sa më parë dhe ia atribuoi këtë punësimit të kontraktorëve të ndryshëm”.
Chad Mair i cili është pjesë e ekipit mbrojtës të Rexhep Selimit ka thënë se në pjesën e parë të 1998-ës nuk ka pasur strukturë me zingjirë komanduese por grumbullim të njësive lokale-guerile që kanë veprua në mënyrë të pavarur dhe horiziontale.
Ai tha se edhe brenda Shtabit të Përgjithshëm në këtë moment kohor nuk ka pasur strukturë komanduese të vërtetë dhe nuk kishte përcaktim të qartë të përgjegjësive.
“Kjo nuk është strukturë me zingjir komanduese por grumbullim i njësiteve lokale, njësitet guerile që veprojnë në mënyrë të pavarur dhe horizontale pa ndonjë kohezion apo unitet. Brenda Shtabit të Përgjithshëm në këtë moment kohor nuk kishte strukturë komanduese të vërtetë dhe nuk kishte përcaktim të qartë të përgjegjësive”, tha avokati Mair.
Përpara kësaj, avokati Mair tha se shumë ushtarë të UÇK-së duke përfshirë edhe komandantët, gjatë kësaj periudhe kohore nuk e dinin as ekzistencën e Shtabit të Përgjithshëm apo anëtarëve të cilët ishin pjesë të tij.
“Provat dëshmojnë se gjatë pjesës më të madhe të 1998-ës ka patur pak lidhje midis këtyre njësiteve dhe kishte një lidhje shumë të dobët me Shtabin e Përgjithshëm. Lidhje shumë e dobët kur e themi këtë është se shumë ushtarë të UÇK-së duke përfshirë komandantët nuk dinin as për ekzistencën e Shtabit të Përgjithshëm apo anëtarëve të tyre dhe thjeshtë”, tha ai.
Përveç kësaj, Mair tha se në atë kohë, vetë zonat ishin në zhvillim e sipër, raporton “Betimi për Drejtësi.
“Vetë zonat ishin në zhvillim e sipër dhe pjesën më të madhe të paformuara. Kjo vlen për pjesën e parë të 1998-ës”, tha avokati Mair.
Tutje, Mair tha se është e rëndësishme mungesa e provave që Shtabi i Përgjithshëm kishte autoritetin për të përcaktuar detyra apo për të zbatuar urdhra.
“E rëndësishme është mungesa e provës që Shtabi i Përgjithshëm kishte autoritet për të përcaktuar detyra apo për të zbatuar urdhra”, tha ai.
Donika Gërvalla e ka pranuar detyrën e ministres së Drejtësisë duke e vlerësuar rolin e kësaj ministrie në raport me ligjin dhe drejtësinë.
“Gjatë ditës së djeshme, nga ish-U.D. i Ministrit të Drejtësisë, z. Blerim Sallahu, pranova detyrën e Ministres së Drejtësisë, e vetëdijshme për rolin vendimtar që ky dikaster, si strukturë kyçe e shtetit, luan në konsolidimin e tij dhe përkushtimin e palëkundur për të krijuar institucione të forta, ligj të zbatueshëm dhe drejtësi të barabartë për të gjithë”, shkroi Gërvalla në Facebook.
“Drejtësia është gurthemeli i Republikës sonë. Reformat në drejtësi janë dëshmi e vendosmërisë tonë për të ndërtuar një shtet ku ligji nuk negocion, ku përgjegjësia nuk shmanget dhe ku drejtësia nuk njeh emër, pozitë apo ndikim”.
Ajo tha se askush nuk guxon të jetë mbi ligjin dhe se ky parim udhëheq kauzën për një Kosovë të drejtë.
“Kjo është beteja jonë për drejtësi, dinjitet institucional dhe besimin e qytetarëve”.
“Askush nuk guxon të jetë mbi ligjin! Ky është parimi që udhëheq kauzën tonë dhe garancia se Republika e Kosovës do të qëndrojë gjithmonë edhe më e fortë, edhe më e drejtë dhe edhe më krenare për secilin qytetar të Kosovës. Na priftë e mbara!”
Dy komisione të Kuvendit të Kosovës, ai për buxhet, punë dhe transfere si dhe Komisioni për integrimet evropiane do të mblidhen sot për herë të parë pas formimit.
Komisioni për Buxhet punë dhe transevere ka në rend dite shqyrtimi në parim të Projektligjit mbi ndarjet buxhetore për Buxhetin e Republikës së Kosovës për vitin 2026 si dhe projektligjet për katër marrëveshje ndërkombëtare.
Në mbledhjen e thirrur për në orën 12 ky komision do të shqyrtojë Projektligjin për ratifikimin e Marrëveshjes së financimit, për programin e parë për “financimin e politikave zhvillimore për efektivitetin fiskal, konkurrueshmërinë dhe rritjen e gjelbër” në mes të Republikës së Kosovës e përfaqësuar nga Ministria e Financave, Punës dhe Transfereve dhe Asociacionit Ndërkombëtar për zhvillim, atë për ratifikimin e marrëveshjen e kredisë në mes të Republikës së Kosovës përfaqësuar nga Ministria e Financave, punës dhe transfereve, dhe asociacioni ndërkombëtar për zhvillim për projektin “kompas” – qasja gjithëpërfshirëse e Kosovës për forcimin e sistemit të shëndetësisë, Projektligjin për ratifikimin e marrëveshjen e kredisë në mes të Republikës së Kosovës përfaqësuar nga Ministria e financave, punës dhe transfereve, dhe asociacioni ndërkombëtar për zhvillim (anzh) për projektin “edukimi në fëmijërinë e hershme dhe kujdesi për kapitalin njerëzor të Kosovës” si dhe Projektligjin për ratifikimin e marrëveshjes së kredisë për “instrumentin për reforma dhe rritje për ballkanin perëndimor” ndërmjet Bashkimit Evropian, që përfaqësohet nga Komisioni Evropian si huadhënës, dhe Kosovës si huamarrës dhe bankës qendrore të Kosovës si agjent i huamarrësit.
Ndërsa Komisioni për Integrime Evropiane, do të mblidhet në orën 11:30 dhe do ta shqyrtojë Projektligjit për ratifikimin e “Marrëveshjes ndërmjet Republikës së Kosovës dhe Bashkimit Evropian mbi aranzhimet për zbatimin e përkrahjes së Unionit për Kosovën në kuadër të Instrumentit për reforma dhe rritje”.
Ambasadori britanik, Jonathan Hargreaves, mbrëmë në një pritje në Prishtinë mblodhi shtetas britanikë e ata që kanë nënshtetësi të dyfishtë Kosovë-Mbretëri e Bashkuar për të festuar 17 Shkurtin pak më herët.
“Ishte një mundësi e mrekullueshme për të festuar lidhjet e thella dhe të qëndrueshme Mbretëri e Bashkuar-Kosovë, si dhe për të vlerësuar qytetarët, kontributet e të cilëve forcojnë të dy vendet tona”, tha ambasadori.
“Ndërsa Kosova përgatitet të shënojë javën e ardhshme 18-vjetorin e pavarësisë, ne ishim të lumtur ta festonim më herët me miq dhe partnerë që mishërojnë frymën e miqësisë sonë të kahershme. Mbretëria e Bashkuar ka qëndruar përkrah Kosovës që para pavarësisë dhe ne mbetemi të përkushtuar për të mbështetur një Kosovë të qëndrueshme, demokratike dhe të begatë”, shtoi Hargreaves.
Ai falënderoi të gjithë ata që iu bashkuan në “një mbrëmjeje të paharrueshme bisede, lidhjeje dhe krenarie të përbashkët për gjithçka që kemi arritur së bashku”.
“Shpresojmë të organizojmë më shumë ngjarje në të ardhmen, duke bashkuar komunitetin britanik në Kosovë”.
Për britanikët që s’ishin pjesë e kësaj feste, ambasadori la një porosi.
“Nëse jeni britanik në Kosovë dhe këtë herë nuk ju kemi përfshirë në listë, ju lutemi na njoftoni”.
Ndër mysafirët e Hargreaves ishte edhe i pari i Prishtinë, Përparim Rama.
Nëse kompjuteri juaj, qoftë Windows apo Mac, fillon të sillet në mënyrë të pazakontë, kjo mund të mos jetë thjesht një defekt teknik.
Ekspertët paralajmërojnë se ndryshimet e papritura në funksionim mund të sinjalizojnë praninë e një programi të dëmshëm apo edhe një tentativë për spiunim.
Një nga shenjat më të zakonshme është ngadalësimi i papritur i pajisjes apo bllokimet e shpeshta. Kur programet hapen me vështirësi ose sistemi punon jashtë normales, mund të jetë duke u konsumuar nga një malware që përdor burimet e kompjuterit tuaj në sfond.Një tjetër sinjal alarmi është shfaqja e dritareve apo reklamave të panjohura.
Nëse në ekran shfaqen aplikacione që nuk i keni instaluar vetë, mos i klikoni dhe kontrolloni menjëherë shtesat e shfletuesit. Po ashtu, nëse antivirusi çaktivizohet pa arsye dhe nuk mund ta ndizni sërish mbrojtjen në kohë reale, provoni ta nisni kompjuterin në “Safe Mode” dhe të kryeni një skanim të plotë.Ndryshimi i papritur i faqes kryesore të shfletuesit apo i motorit të kërkimit është një tjetër tregues se dikush mund të ketë ndërhyrë në sistem.
Rivendosni cilësimet dhe hiqni çdo shtesë të panjohur. Nëse drita e kamerës ndizet edhe kur nuk jeni në një video-telefonatë, kontrolloni menjëherë aplikacionet që kanë qasje në kamerë dhe fshini ato të panevojshme.Edhe njoftimet për ndryshim fjalëkalimesh që nuk i keni kërkuar vetë janë shenjë rreziku. Në këtë rast, ndryshoni menjëherë fjalëkalimet dhe aktivizoni verifikimin me dy hapa.
Për më tepër, kontrolloni “Task Manager” në Windows ose “Activity Monitor” në Mac për të identifikuar procese të dyshimta që konsumojnë shumë burime.Ekspertët këshillojnë që, nëse vëreni disa nga këto shenja njëkohësisht, të veproni menjëherë: kryeni një skanim të plotë me një antivirus të besueshëm, hiqni aplikacionet e panjohura dhe rivendosni cilësimet e sistemit. Në epokën digjitale, vigjilenca është mbrojtja juaj më e mirë.
Kuvendi i Kosovës ka miratuar mbrëmjen e së enjtes përbërjen e 16 komisioneve parlamentare për legjislaturën e dhjetë, me 100 vota për, një kundër dhe asnjë abstenim.
Në mesin e tyre, 9 komisione do të drejtohen nga Lëvizja Vetëvendosje, ku në emër të këtij subjekti politik përbërjen e tyre e prezantoi, shefja e Grupit Parlamentar të VV-së, Arbërie Nagavci.
Sa i përket Komisionit për Buxhet, Punë dhe Transfere, ajo bëri të ditur se kryetar është propozuar deputeti Enver Haliti, ndërsa anëtarë Fatos Geci, Ilir Kërçeli dhe Valon Hoti.
Komisioni për Punë të Jashtme dhe Diasporë do të udhëhiqet nga Arbreshë Kryeziu, ndërsa anëtarë janë propozuar Shqipe Selimi, Vigan Qorrolli, Abdullah Klinaku dhe Fjolla Ujkani.
Në Komisionin për Arsim, kryetare është propozuar Arjeta Fejza, ndërsa anëtarë Fahrush Rexhepi, Mitaher Askuka, Arbërie Nagavci dhe Shqipe Jusufi.
Komisioni për Ekonomi, Industri, Ndërmarrësi, Tregti dhe Inovacion do të udhëhiqet nga Rozeta Hajdari, ndërsa anëtarë janë propozuar Driton Hyseni, Ejup Ahmeti dhe Taulant Kelmendi.
Për Komisionin për Mjedis, Ushqim, Bujqësi, Pylltari, Zhvillim Rural, Infrastrukturë dhe Transport, kryetar është propozuar Arsim Ademi, ndërsa anëtarë Alban Bajrami, Salih Zyba, Artan Abrashi dhe Drita Pajaziti.
Në Komisionin për Shëndetësi, kryetar është propozuar Haxhi Avdyli, ndërsa anëtarë Naim Bardiqi, Fitim Haziri, Labinotë Demi-Murtezi dhe Sylejman Meholli.
Për Komisionin për Siguri dhe Mbrojtje, kryetar është propozuar Mefail Bajqinovci, ndërsa anëtarë Enver Dugolli, Ilir Qeriqi, Rufki Suma dhe Shqipe Selimi.
Komisioni për të Drejtat e Njeriut, Barazi Gjinore, Familje, Vlera të Luftës Çlirimtare dhe Peticione do të udhëhiqet nga Fatmire Kollçaku, ndërsa anëtarë janë propozuar Afërdita Hajrizi, Salih Zyba, Mytaher Askuka dhe Edona Llalloshi.
Në Komisionin për Mirëqenie Sociale, Viktimat e Dhunës Seksuale të Luftës dhe Personat e Pagjetur, kryetar është propozuar Adnan Rrustemi, ndërsa anëtarë Mytaher Askuka, Sylejman Meholli, Mimoza Shala dhe Jeton Raka.
Nagavci theksoi se këto janë propozimet e Lëvizjes Vetëvendosje për përfaqësim në komisione, duke shtuar se në rastet kur nuk është përmendur pozita, emri i parë i listuar nënkupton funksionin e nënkryetarit.
“Kuvendi miratoi përbërjen e 16 komisioneve parlamentare për legjislaturën e 10-të të Kuvendit të Kosovës”, tha kryeparlamentarja Haxhiu, teksa mbylli punimet e kësaj seance.