ATV

Blog

  • Luis De la Fuente: Zubimendi është mesfushori i dytë më i mirë në botë pas Rodrit

    Luis De la Fuente: Zubimendi është mesfushori i dytë më i mirë në botë pas Rodrit

    Përzgjedhësi i Spanjës, Luis de la Fuente, ka mbushur me elozhe mesfushorin e Arsenalit, Martin Zubimendi, duke e cilësuar si futbollistin e dytë më të mirë në botë në pozitën e tij, menjëherë pas Rodrit.

    Komentet e teknikut spanjoll erdhën pas triumfit të Spanjës ndaj Argjentinës me rezultat 1-0 pas kohës shtesë në finalen e Kupës së Botës 2026. Rodri ishte një nga protagonistët kryesorë të turneut, duke fituar edhe çmimin “Topi i Artë” si lojtari më i mirë i kampionatit.

    Edhe pse Zubimendi u aktivizua vetëm në minutat shtesë të finales, pasi zëvendësoi Rodrin, De la Fuente theksoi se mesfushori mbetet një element kyç në projektin e kombëtares spanjolle.

    “Me gjithë respektin dhe pa dashur të ofendoj askënd, kam thënë se të dyshosh te Rodri është një fyerje për inteligjencën futbollistike. Ai është lojtari më i mirë në botë në pozitën e tij, ndërsa pas tij kemi Martin Zubimendin, i cili është një futbollist i madh dhe ndoshta i dyti më i mirë në botë”, deklaroi De la Fuente për TVE.

    Trajneri spanjoll vlerësoi gjithashtu paraqitjet e Rodrit gjatë Kupës së Botës, duke theksuar se mesfushori i Manchester Cityt u rrit nga ndeshja në ndeshje dhe tregoi superioritet edhe kur nuk ishte në formën e tij më të mirë fizike.

    De la Fuente komentoi edhe incidentet që ndodhën pas finales me disa pjesëtarë të Argjentinës, duke i dënuar ashpër ato dhe duke lavdëruar reagimin e futbollistëve të Spanjës.

    Në fund, De la Fuente foli edhe për të ardhmen e tij në stolin e “La Rojas”, duke pranuar se do të ishte një privilegj i madh ta drejtonte Spanjën edhe në Kupën e Botës 2030, e cila do të organizohet nga Spanja, Portugalia dhe Maroku.

  • Real Madridi arrin marrëveshje me Yan Diomanden, nis ofensivën për ta bindur Leipzigun

    Real Madridi arrin marrëveshje me Yan Diomanden, nis ofensivën për ta bindur Leipzigun

    Real Madridi ka hedhur një hap të rëndësishëm drejt transferimit të talentit Yan Diomande, pasi ka arritur një marrëveshje verbale me futbollistin për kushtet personale, sipas gazetarit të njohur të merkatos, Fabrizio Romano.

    Anësori 19-vjeçar nga Bregu i Fildishtë ka pranuar ofertën e klubit madrilen dhe është gati të firmosë një kontratë pesëvjeçare, e vlefshme deri në verën e vitit 2031. Edhe pse më herët kishte rënë dakord për kushtet personale me Paris Saint-Germainin, Diomande tashmë ka zgjedhur t’i japë përparësi kalimit te Real Madridi.

    Pas marrëveshjes me lojtarin, drejtuesit e “Los Blancos” pritet të rikthehen në tryezën e negociatave me RB Leipzigun me një ofertë të përmirësuar. Oferta e parë e Real Madridit, me vlerë 90 milionë euro plus 10 milionë euro në formë bonusesh, u refuzua nga klubi gjerman.

    Sipas raportimeve, Leipzigu e vlerëson kartonin e Diomandes në rreth 115 deri në 120 milionë euro, përfshirë bonuset, dhe nuk është i gatshëm ta lërë të largohet për një shumë më të ulët.

    Megjithatë, gara për shërbimet e sulmuesit të ri mbetet e hapur. Paris Saint-Germaini nuk ka hequr dorë nga synimi për ta transferuar dhe ka rifilluar kontaktet me përfaqësuesit e lojtarit, në përpjekje për ta bindur të zgjedhë kampionët e Francës përpara mbylljes së afatit kalimtar.

    Pavarësisht interesimit të PSG-së, Real Madridi konsiderohet aktualisht favoriti kryesor për të siguruar firmën e Diomandes dhe po përgatitet për negociatat vendimtare me RB Leipzigun, me objektivin për të finalizuar një nga transferimet më të bujshme të kësaj vere.

    Yan Diomande është një nga talentet më premtues të futbollit evropian dhe ka tërhequr vëmendjen e disa prej klubeve më të mëdha të kontinentit falë paraqitjeve të tij me RB Leipzigun. Real Madridi po vazhdon strategjinë e investimit te lojtarët e rinj me potencial të lartë, ndërsa PSG mbetet një konkurrent serioz në garën për transferimin e tij. Negociatat me Leipzigun pritet të jenë vendimtare në ditët në vijim.

  • Kristian Prenga kërkon falje pas humbjes nga Anthony Joshua: “Nuk ju bëra krenar, por do të rikthehem më i fortë”

    Kristian Prenga kërkon falje pas humbjes nga Anthony Joshua: “Nuk ju bëra krenar, por do të rikthehem më i fortë”

    Boksieri shqiptar Kristian Prenga ka reaguar për herë të parë pas humbjes me nokaut ndaj britanikut Anthony Joshua, duke u kërkuar falje tifozëve shqiptarë dhe duke premtuar se do të rikthehet më i fortë në ring.

    Prenga e nisi me shumë guxim përballjen, duke i shkaktuar vështirësi Joshuas në raundin e parë. Megjithatë, britaniku reagoi fuqishëm dhe e mbylli ndeshjen me nokaut në raundin e dytë.

    Pas sfidës, Prenga tha se e pranon rezultatin dhe se beson se gjithçka ndodhi sipas vullnetit të Zotit.

    “Urime Anthony Joshuas. Nuk ishte mbrëmja ime. Besoj se ishte plani i Zotit që ai të fitonte. Mendova se mund ta vazhdoja ritmin edhe në raundin e dytë, por nuk ndodhi,” u shpreh ai.

    Boksieri shqiptar falënderoi gjithashtu tifozët që e mbështetën, duke theksuar se prania e shqiptarëve do të ishte shumë më e madhe nëse dueli do të zhvillohej në Evropë.

    “Kisha vetëm 10 për qind të tifozëve në sallë, por nëse ndeshja do të zhvillohej në Evropë, jam i bindur se 90 për qind do të ishin shqiptarë. Ajo që mund të them është: më falni të gjithëve. Nuk ju bëra krenar këtë herë, por do të rikthehem më i fortë,” deklaroi Prenga.

    Nga ana tjetër, Anthony Joshua vazhdon të mbetet një nga emrat më të mëdhenj të peshave të rënda dhe pritet që në muajt e ardhshëm të përballet me rivalin e tij britanik, Tyson Fury, në një duel që konsiderohet ndër më të shumëpriturit në boksin profesionist.

  • Gashi ngre shqetësimin për moszbatimin e ligjit nga zyrtarët publikë

    Gashi ngre shqetësimin për moszbatimin e ligjit nga zyrtarët publikë

    Drejtori i Rrjetit të Organizatave Joqeveritare AVONET, Kenan Gashi, ka reaguar lidhur me, siç e quan ai, mungesën e përgjegjësisë ligjore të disa zyrtarëve publikë, duke theksuar se mosrespektimi i ligjit nga institucionet dëmton rëndë besimin e qytetarëve në drejtësi dhe në funksionimin e shtetit.

    Gashi ka deklaruar se kur zyrtarët publikë nuk japin llogari për veprimet e tyre dhe nuk përballen me përgjegjësi për shkeljet eventuale, atëherë pushteti rrezikon të largohet nga misioni i tij për t’i shërbyer qytetarëve dhe të shndërrohet në mjet presioni ndaj tyre.

    Sipas tij, në Komunën e Ferizajt janë vërejtur raste ku zyrtarë të caktuar kanë treguar qasje shpërfillëse ndaj kritikave publike dhe reagimeve për shkelje të mundshme ligjore, duke krijuar një perceptim se pozita zyrtare mund të shërbejë si mburojë ndaj përgjegjësisë.

    “Kur krijohet bindja se askush nuk mban përgjegjësi për shkeljet ligjore, atëherë dobësohet besimi i qytetarëve në institucionet publike dhe në drejtësi. Askush nuk duhet të jetë mbi ligjin, pavarësisht pozitës apo ndikimit që gëzon”, ka theksuar Gashi.

    Drejtori i AVONET-it ka kërkuar më shumë transparencë institucionale, përgjegjësi dhe zbatim të ligjit pa përjashtime, duke theksuar se vetëm përmes ndëshkimit të shkeljeve dhe respektimit të rregullave mund të rikthehet besimi i qytetarëve në institucionet publike.

    “Përgjegjësia, transparenca dhe sundimi i ligjit janë themeli i një shoqërie demokratike dhe i sigurisë juridike për të gjithë”, ka përfunduar Gashi.

  • ​Vendet kandidate për BE presin deri në 39 vjet, aplikimi i Kosovës ende nuk u shqyrtua

    ​Vendet kandidate për BE presin deri në 39 vjet, aplikimi i Kosovës ende nuk u shqyrtua

    Vendet kandidate për BE po presin me vite nga aplikimi i tyre për anëtarësim: Turqia 39 vjet, Maqedonia e Veriut 22 vjet, Mali i Zi 17 vjet, Shqipëria 17 vjet, Serbia 16 vjet, Bosnja dhe Hercegovina 10 vjet, Ukraina 4 vjet, Moldavia 4 vjet dhe Gjeorgjia 4 vjet, nxori në pah Bota e Statistikave.

    Nga ana tjetër, Kosova, aktualisht, është i vetmi vend evropian që nuk e ka statusin e vendit kandidat për anëtarësim në BE.

    Mbetet e vetmja nga dhjetë shtete të përfshira në procesin e zgjerimit të BE-së pa statusin formal të kandidates, shkruan KosovaPress.

    Kosova megjithëse e paraqiti aplikimin për anëtarësim në BE në fund të vitit 2022, kërkesa ende nuk i është përcjellë Komisionit Evropian për vlerësim.

    Arsyeja është se pesë shtetet anëtare të BE-së që nuk e njohin pavarësinë e Kosovës: Qiproja, Greqia, Rumania, Sllovakia dhe Spanja nuk janë pajtuar për ta çuar procesin përpara.

  • Arrestohet një kosovar në Ulqin, dyshohet për vjedhje nëpër plazhe

    Arrestohet një kosovar në Ulqin, dyshohet për vjedhje nëpër plazhe

    Një shtetas i Kosovës, G.R., 47 vjeç, është arrestuar të shtunën nga Policia e Malit të Zi pas dyshimeve për vjedhje të shumta në plazhet e Ulqinit. Ai ishte i kërkuar edhe nga Kosova.

    Sipas deklaratës së Policisë, gjatë kontrollin në banesën ku qëndronte i dyshuari u gjetën një pjesë e sendeve të vjedhura dhe sende nga periudha e mëparshme, të cilat dyshohet se burojnë nga vepra penale të kryera në zonën e Ulqinit.

    Gjithashtu, u gjet edhe një pako heroinë.

    G.R. dyshohet se në Plazhin e Madh dhe të Vogël të Ulqinit vodhi para, telefona, çelësa automjetesh, biçikleta, pije alkoolike të shtrenjta, cigare e të tjera.

    Sipas policisë malaziase, i dyshuari është person me vepra të shumëfishta penale edhe në Kosovë, shtet i cili e ka në listën e kërkimit.

    Ai është ndaluar, derisa do të vazhdojnë procedurat e mëtejme.

  • Festivali ‘Sunny Hill’ drejt “sold out”, 90 për qind e biletave tashmë janë shitur

    Festivali ‘Sunny Hill’ drejt “sold out”, 90 për qind e biletave tashmë janë shitur

    Entuziazmi për edicionin e sivjetmë të Sunny Hill Festival po arrin kulmin, teksa organizatorët kanë bërë të ditur se tashmë janë shitur 90 për qind e biletave për festivalin.

    Vetëm gjashtë ditë para nisjes së ngjarjes më të madhe muzikore në Kosovë, kanë mbetur në dispozicion vetëm edhe 10 për qind e biletave, duke sinjalizuar se festivali është shumë pranë statusit “sold out”.

    Përmes një videoje të publikuar në llogarinë zyrtare në Instagram, organizatorët u kanë bërë thirrje të gjithë atyre që ende nuk e kanë siguruar biletën, të nxitojnë ta bëjnë këtë sa më parë, pasi numri i biletave të mbetura është shumë i kufizuar.

    Videoja shoqërohet me ritmet e hitit “Last Friday Night” të Katy Perryt, një zgjedhje simbolike, pasi superylli amerikan është një nga emrat kryesorë të këtij edicioni të festivalit.
    Katy Perry do të ngjitet në skenën e Sunny Hill në natën e parë të festivalit, ndërsa në natën e dytë publiku do të argëtohet nga këngëtari skocez Lewis Capaldi. Mbyllja spektakolare e festivalit do t’i besohet DJ-it dhe producentit me famë botërore Martin Garrix, i cili do të performojë në natën e tretë.

    Me interesimin e jashtëzakonshëm nga publiku vendas dhe ai ndërkombëtar, gjithçka tregon se edhe ky edicion i Sunny Hill Festival do të zhvillohet para një audience të tejmbushur, duke konfirmuar edhe një herë statusin e tij si një nga festivalet më të mëdha muzikore në rajon.

  • Përparim Rama i kërkon sqarim publik Jeta Xharrës: Kush është autori me emrin “Lule Gjeli”, pres deri të hënën më së largu

    Përparim Rama i kërkon sqarim publik Jeta Xharrës: Kush është autori me emrin “Lule Gjeli”, pres deri të hënën më së largu

    Kryetari i Prishtinës, Përparim Rama, ka kërkuar nga mediumi “Kallxo.com” që të sqarojë se kush është personi prapa profilit “Lule Gjeli”, pasi ky medium kishte publikuar një opinion me autor me këtë emër.

    “Lule Gjeli” po dyshohet për nxitje të urrejtjes dhe shantazh derisa shumë figura publike kanë filluar denoncimin në rrjete sociale, por edhe në organet e rendit.

    Rama tha se vetë ishte viktimë.

    “Publikimi i analizës nga profili famëkeq fiktiv “Lule Gjeli” në Kallxocom, medium që drejton Jeta Xharra, është alarm i frikshëm për shkelje të rëndë të standardeve etike dhe ligjore dhe ngre pikëpyetje serioze që meritojnë përgjigje të qarta dhe publike!”, shkroi Rama.

    Ai kërkoi nga drejtoresha e këtij mediumi, Jeta Xharra, sqarim dhe tha se këtë duhet ta bëjë deri të hënën përndryshe Komuna e Prishtinës do ta shqyrtojë bashkëpunimin me këtë medium.

    Opinioni me titullin “Modeli i fshehur që mund të jetë në tavolinën e marrëveshjeve Kosovë-Serbi” u publikua në “Kallxo.com” më 27.8.2020 dhe ende është publik.

    “Lule Gjeli është konsulentë e ligjit komercial për një kompani për mbrojtje të fondeve”, e përshkruan Kallxo.com profilin e “Lule Gjeli”.

    Postimi i plotë i Ramës:

    Publikimi i analizës nga profili famëkeq fiktiv “Lule Gjeli” në Kallxocom, medium që drejton Jeta Xharra, është alarm i frikshëm për shkelje të rëndë të standardeve etike dhe ligjore dhe ngre pikëpyetje serioze që meritojnë përgjigje të qarta dhe publike!

    Në emër të transparencës dhe llogaridhënies publike, i bëj thirrje BIRN Kosovës, Kallxocom, Interneës Kosova dhe drejtoreshës Jeta Xharra që të sqarojnë publikisht këto çështje:

    1. Kush është autori me emrin “Lule Gjeli”?

    2. Çfarë bashkëpunimi tjetër kanë pasur me Lule Gjeli?

    3. Në cilën periudhë kohore ka bashkëpunuar me të, sa ka zgjatur ky bashkëpunim, a është paguar ajo/ai për publikimet e saj dhe me çfarë fondesh është paguar?

    4. A ka qenë ndonjë politikan i përfshirë në diskutimet gjatë angazhimit të Lule Gjelit në publikimin e “opinioneve” pro qeveritare?

    5. A do t’i kërkoni falje qindra viktimave, një prej të cilave jam edhe unë, për dëmin që u ka shkaktuar profili Lule Gjeli?

    Unë pres reagim dhe sqarim publik më se largu deri të hënën. Deri atëherë, dhe derisa këto çështje të jenë sqaruar plotësisht, në mënyrë transparente dhe bindëse, Kryeqyteti do të rishqyrtojë çdo formë të bashkëpunimit dhe mbështetjes institucionale me BIRN Kosovën. Nëse sqarimet nuk i përmbushin standardet e transparencës që qytetarët meritojnë, do të kërkoj ndërprerjen e çdo bashkëpunimi institucional me BIRN Kosovën.

    Institucionet publike kanë detyrim të mbrojnë jo vetëm resurset publike, por edhe interesin publik dhe besimin e qytetarëve!

    Për këtë arsye, Kryeqyteti nuk mund të vazhdojë të ofrojë mbështetje institucionale për asnjë organizatë ndaj së cilës ekzistojnë dyshime serioze dhe të pazgjidhura lidhur me përkushtimin e saj ndaj interesit publik, llogaridhënies demokratike dhe vlerave mbi të cilat është ndërtuar Republika e Kosovës.

    Paraja publike dhe hapësirat publike u përkasin qytetarëve. Ato administrohen ekskluzivisht në funksion të interesit të tyre dhe nuk mund të vihen në dispozicion të askujt derisa të jenë adresuar dhe sqaruar plotësisht çështjet që cenojnë besimin publik!

  • Besnik Tahiri kërkon veprime nga shteti për të gjithë ata që kanë përzier me “Lule Gjelin”

    Besnik Tahiri kërkon veprime nga shteti për të gjithë ata që kanë përzier me “Lule Gjelin”

    Deputeti i zgjedhur i AAK-së, Besnik Tahiri, ka thënë se është detyrë e organeve ligjzbatuese që të vendosin drejtësi për secilin individ, grupacion apo entitet që kanë çfarëdo lidhje me persona të tipit “Lule Gjeli”.

    Tahiri ka thënë se persona të tillë përdorin intimidim, urrejtje e shantazh për të dëmtuar reputacionin, prandaj duhet veprim urgjent i shtetit.

    “Është detyrë e organeve të zbatimit të ligjit dhe të sigurisë ta zbulojnë dhe të ndajnë drejtësi, për secilin individ, grupacion apo entitet që është në skemë kriminale, përfshirë çiftat me alias “Lule Gjeli”. Këta tipa përdorin praktika të intimidimit, urrejtjes, shantazhit dhe dëmtimit të reputacionit. Trajtimi institucional duhet të ndodh me urgjencë dhe seriozitet maksimal”, ka shkruar ai.

  • Haki Abazi i vetofrohet Prokurorisë: “Lule Gjeli” është në shërbim të Kurtit e Mihalit, e kam takuar në vitin 2021 në Delaware

    Haki Abazi i vetofrohet Prokurorisë: “Lule Gjeli” është në shërbim të Kurtit e Mihalit, e kam takuar në vitin 2021 në Delaware

    Ish-deputeti, Haki Abazi, ka reaguar lidhur me debatin e fundit të ngritur rreth profileve të rrejshme në rrjete sociale, debat ky i nxitur nga një llogari me emrin “Lule Gjeli”.

    Haki Abazi ka thënë se “Lule Gjeli” është lufta hibride për të cilën flet Albin Kurti dhe sipas tij “Lule Gjeli” është në shërbim të Kurtit dhe Dejona Mihalit.

    Ai ka thënë se është i gatshëm të flasë për Prokurorinë meqë thotë se në vitin 2021 në Delëare të SHBA-së e ka takuar “Lule Gjelin.

    “Publikisht kërkoj nga prokurori që ka marrë rastin në dorë të më dërgojë ftesë për dëgjim lidhur me Lule Gjelin, të cilin e kam takuar në Delaware në vitin 2021 me kërkesën e tij. Hera e parë dhe e fundit që kam komunikuar me atë njeri, por pasojat e luftës speciale kanë vazhduar deri në penetrimin e mediave dhe të opinionit dhe deformimin e së vërtetës|”, ka shkruar Abazi.

    Reagimi i plotë:

    Lule Gjeli është lufta hibride për të cilën Kurti flet në vazhdimësi! Kjo është lufta hibride e Kurtit por nuk përfundon me Lule Gjelin!

    Lule Gjeli është në shërbim të Kurtit dhe Dejona Mihalit në kuadër të LVV-së. Në vazhdimësi, së bashku kanë prodhuar lajme të pavërteta edhe për zyrtarë të lartë të SHBA-së dhe kanë kontribuar në prishjen e marrëdhënieve me SHBA-në duke sulmuar zyrtarët dhe poashtu në bashkëveprim me zyrtarë lokal të ambasadave të huaja në Kosovë, kanë keqinformuar dhe deformuar informacione me qëllim denigrimin dhe eliminimin e kundërshtarëve politik.

    Kurti ka përzgjedhur që në SHBA të ketë të tillë si përfaqësues dhe informatorë, ka injoruar Ambasadën dhe patriotët e intelektualët në mërgatë dhe ka angazhuar persona shumica me dosje dhe reputacion shumë të keq e për rrjedhojë kanë marrë urdhra nga ai dhe drejtpërdrejt nga Dejona!

    Konspiracioni dhe lufta speciale e Kurtit, i kanë rrënjët në zyrat e propagandës dhe të agjitacionit për sulm dhe dëmtim të reputacionit. Lule Gjeli është vetëm një nga ata që kanë marrë dhe kanë dhënë informacione dhe kanë kontaktuar zyrtarë me qëllime të panjohura.

    LVV – Mihali & Kurti and Co. – kanë krijuar tregimin se kinse SHBA-ja ka refuzuar kandidaturën time për Ambasador në SHBA. Ky tregim, mes shumë të tjerash me urdhër të Kurtit dhe Mihalit, është përhapur nga po këta aktorë medialë që sot po e konsiderojnë Lulë Gjelin ashtu siç është, por që janë shërbyer me informata të Lulë Gjelit, Kurtit e Mihalit.

    Lulë Gjeli duhet patjetër të merret në pyetje për mashtrim dhe konspiracion, si dhe për fushata denigruese me pasoja të rënda dhe rrezikshmëri të lartë për personalitete zyrtare, përfshirë edhe pengimin e kryerjes së detyrës zyrtare, por së pari duhet të merren në pyetje shefat e Lule Gjelit.

    Po ashtu, është koha që ata që kanë përhapur propagandën e Mihalit, Gjelit, Kurtit e Manxhukës, në pritje të vendimeve të gjykatave, të reflektojnë duke filluar me kërkim-falje, ndryshe nuk janë më pak fajtorë sesa vetë Lulë Gjeli.

    Publikisht kërkoj nga prokurori që ka marrë rastin në dorë të më dërgojë ftesë për dëgjim lidhur me Lule Gjelin, të cilin e kam takuar në Delaware në vitin 2021 me kërkesën e tij. Hera e parë dhe e fundit që kam komunikuar me atë njeri, por pasojat e luftës speciale kanë vazhduar deri në penetrimin e mediave dhe të opinionit dhe deformimin e së vërtetës.