ATV

Blog

  • Data e lindjes zbulon dhuratën tuaj shpirtërore: Ja çfarë thotë numerologjia për ju

    Data e lindjes zbulon dhuratën tuaj shpirtërore: Ja çfarë thotë numerologjia për ju

    Sipas numerologjisë, data e lindjes mund të zbulojë dhuratat shpirtërore dhe energjitë që ndikojnë në karakterin dhe rrugën e jetës së çdo personi

    Çdo person, në varësi të datës në të cilën ka lindur, posedon një dhuratë të veçantë shpirtërore. Numerologjia na ndihmon t’i zbulojmë këto dhurata të shënuara në datën tonë të lindjes, duke i lidhur me sunduesit astrologjikë dhe ndikimet kozmike që u japin numrave një kuptim të veçantë.

    Ja si manifestohet spiritualiteti juaj sipas datës së lindjes, pavarësisht muajit:

    Të lindur më 1, 10, 19 ose 28 të muajit – Dhurata e udhëheqjes shpirtërore

    Këto data lidhen me udhëheqjen. Nën ndikimin e Diellit, burimit tonë kozmik të vullnetit dhe vitalitetit, këta persona ndihen të fuqizuar për të marrë iniciativë. Ata nuk presin lejen e askujt dhe ndjekin instinktet e tyre. Duke hapur rrugë të reja, frymëzojnë guxim tek të tjerët. Vetë autenticiteti i tyre krijon një hapësirë ku të tjerët ndihen të lirë të shprehen dhe të eksplorojnë mundësi që më parë u dukeshin të paarritshme.

    Të lindur më 2, 11, 20 ose 29 të muajit – Dhurata e shërimit të shenjtë

    Nga dhembshuria e thellë lind respekti i madh për jetën. Dëshira juaj për të ndihmuar dhe për të ngritur të tjerët nuk është rastësi; ju posedoni fuqinë e shërimit shpirtëror. Nën sundimin e Hënës, udhërrëfyesit tonë intuitiv, jeni të aftë të shihni përtej sipërfaqes. Ndikoni në mënyrë të butë në energjinë e hapësirës ku ndodheni, shpesh duke vepruar si ndërmjetës apo urë mes njerëzve. Kur jetoni sipas dhuratës suaj shpirtërore, mund të ndryshoni jetën e të tjerëve nga brenda.

    Të lindur më 3, 12, 21 ose 30 të muajit – Dhurata e shprehjes hyjnore

    Talentet, kreativiteti dhe zëri juaj janë krijuar për t’u dëgjuar dhe vlerësuar. Jeni nën ndikimin e Jupiterit, planetit të zgjerimit, prandaj filozofia juaj e jetës është natyrshëm optimiste. Njerëzit e përjetojnë praninë tuaj si frymëzuese dhe të freskët. Kur ndani idetë dhe ndiqni pasionet që ju sjellin gëzim, bëheni një krijues që ndërton komunitete ku të tjerët gjejnë guximin për të ndjekur të vërtetën e tyre të brendshme.

    Të lindur më 4, 13, 22 ose 31 të muajit – Dhurata e ndërtuesit shpirtëror

    Këto data ndikohen nga Urani, planeti i ndryshimit dhe transformimit. Besoni instinktit tuaj për t’u përqendruar në pamjen e përgjithshme. Falë objektivitetit tuaj, arrini të dalloni lehtë çfarë duhet përmirësuar dhe si të krijohen themele të qëndrueshme që nxisin zhvillimin në vend të kufizimeve. Frymëzoni të tjerët të pranojnë veçantinë e tyre, duke e ditur se pikërisht dallimet tona e bëjnë shoqërinë më të fortë.

    Të lindur më 5, 14 ose 23 të muajit – Dhurata e vizionit të shenjtë

    Keni një mendje jashtëzakonisht aktive që vëren edhe ndryshimet më të vogla në mjedisin përreth. Si nxënës të përhershëm nën sundimin e Merkurit, planetit të komunikimit dhe intelektit, jeni mendjehapur dhe pranoni lehtësisht ide të reja. Keni aftësinë e rrallë të kombinoni inteligjencën me intuitën, gjë që ju lejon të depërtoni në të vërteta më të thella të çdo situate. Njerëzit ju drejtohen për këshilla dhe për biseda interesante, sepse shpesh arrini të shihni përtej realitetit të dukshëm.

    Të lindur më 6, 15 ose 24 të muajit – Dhurata e dashurisë së pakushtëzuar

    Dashuria është forca që lëviz botën tuaj. Nën sundimin e Venusit, planetit të afërsisë dhe tërheqjes, shkëlqeni në marrëdhënie me të tjerët. Njerëzit admirojnë diplomacinë dhe hijeshinë tuaj. Kur lindin tensione, shpesh jeni ju ai që arrin të rikthejë harmoninë dhe paqen. Besoni gjithmonë zemrës suaj, sepse aty gjendet çelësi i dhuratave tuaja shpirtërore.

    Të lindur më 7, 16 ose 25 të muajit – Dhurata e mençurisë mistike

    Posedoni një mençuri që shpesh duket më e madhe se vetë mosha juaj. Mendja juaj introspektive dhe natyra analitike ju ndihmojnë të zbuloni të vërteta të fshehura. Nën ndikimin e Neptunit, planetit të sferave të larta shpirtërore, aura juaj shpesh duket misterioze. Kur i besoni zërit tuaj të brendshëm, rrallë devijoni nga rruga e duhur.

    Të lindur më 8, 17 ose 26 të muajit – Dhurata e autoritetit shpirtëror

    Shpirti juaj është i fortë dhe i qëndrueshëm. Saturni, planeti i disiplinës dhe kohës, udhëheq rrugën tuaj shpirtërore. Me një autoritet të lindur, dini të merrni përgjegjësi për fatin tuaj. Me durim dhe strategji të menduar mirë, arrini qëllimet më të larta dhe frymëzoni të tjerët me integritetin tuaj.

    Të lindur më 9, 18 ose 27 të muajit – Dhurata e empatisë hyjnore

    Me një ndjeshmëri të jashtëzakonshme, keni fuqinë të ndikoni në botë. Jeni të lidhur me ndërgjegjen kolektive dhe shpesh ndieni ndryshimet shoqërore para se të bëhen të dukshme. Nën ndikimin e Marsit, kuptoni se si të luftoni për të mirën e përbashkët. Sinqeriteti juaj i nxit njerëzit të reflektojnë thellë dhe të marrin përgjegjësi për veprimet e tyre.

  • Si ta rimbillni bimën pa e dëmtuar – Udhëzues i thjeshtë hap pas hapi

    Si ta rimbillni bimën pa e dëmtuar – Udhëzues i thjeshtë hap pas hapi

    Nëse rrënjët dalin nga vazoja ose bima nuk po rritet, është koha për rimbjellje. Me disa hapa të thjeshtë mund ta bëni këtë proces pa stres dhe pa rrezikuar dëmtimin e bimës

    Transplantimi i bimëve është një nga punët që shumë njerëz e shtyjnë, sepse kanë frikë se mund të bëjnë ndonjë gabim. Në të vërtetë, transplantimi është një proces i thjeshtë dhe shumë i rëndësishëm që i jep bimës hapësirë të re për t’u rritur.

    Nëse vëreni se rrënjët dalin nga vrimat në fund të vazos, se toka thahet shumë shpejt ose se bima nuk po rritet, atëherë është koha për ta transplantuar.

    Koha më e mirë për këtë është pranvera, kur bimët hyjnë në fazën e rritjes intensive. Mund të bëhet edhe në fillim të verës, ndërsa gjatë dimrit zakonisht duhet shmangur, sepse shumica e bimëve janë në fazë pushimi.

    Zgjidhni vazon dhe tokën e duhur
    Hapi i parë është zgjedhja e vazos së re. Ajo nuk duhet të jetë shumë më e madhe se e vjetra; mjafton të jetë dy ose tre centimetra më e gjerë. Vazo shumë e madhe mund të mbajë shumë lagështi dhe të shkaktojë kalbjen e rrënjëve.

    Po aq e rëndësishme është edhe toka cilësore. Toka universale për bimë të brendshme i përshtatet shumicës së llojeve, por për kaktuse, orkide apo bimë mesdhetare është më mirë të përdoret tokë e posaçme.

    Në fund të vazos vendosni gjithmonë një shtresë kulluese, si argjilë e zgjeruar, guralecë të vegjël ose copa qeramike, që ndihmon në largimin e ujit të tepërt.

    Nxirrni me kujdes bimën nga vazoja e vjetër
    Para se ta nxirrni, ujiteni pak që toka të zbutet. Kthejeni vazon me kujdes dhe mbajeni bimën pranë bazës së kërcellit. Shtypni lehtë anët e vazos ose trokitni nëse është qeramike, që rrënjët të shkëputen nga muret.

    Nëse rrënjët janë shumë të ngjeshura, hapini pak me gishta që bima të përshtatet më lehtë në tokën e re.

    Vendoseni në vazon e re
    Mbi shtresën kulluese shtoni pak tokë të freskët, pastaj vendoseni bimën në mes të vazos në të njëjtën lartësi si më parë. Mbusheni rreth rrënjëve me tokë dhe shtypeni lehtë që të mos mbeten hapësira ajri.

    Mos e ngjeshni shumë tokën, sepse rrënjët kanë nevojë për ajër.

    Ujitja dhe përshtatja
    Pas rimbjelljes ujiteni mirë bimën që toka të vendoset. Ujin e tepërt që mbetet në pjatëz duhet ta hiqni.

    Ditët e para mbajeni bimën larg diellit të drejtpërdrejtë. Transplantimi është një stres për të, ndaj ka nevojë për pak kohë për t’u përshtatur.

    Si ta kuptoni se rimbjellja ka pasur sukses
    Nëse pas dy ose tre javësh shfaqen gjethe të reja ose rritje e freskët, atëherë transplantimi ka qenë i suksesshëm.

    Rimbjellja nuk është vetëm një punë praktike. Është një mënyrë për të kontrolluar gjendjen e rrënjëve, për të freskuar tokën dhe për t’i dhënë bimës kujdesin që meriton.

  • Fillon procesi i deklarimit të pasurisë për zyrtarët publik, për një javë mbi 750 e deklaruan

    Fillon procesi i deklarimit të pasurisë për zyrtarët publik, për një javë mbi 750 e deklaruan

    10 mijë e 350 zyrtarë publik janë të obliguar të deklarojnë pasurinë e kohë për këtë kanë deri më 30 mars.

    Procesi që filloi më 1 mars, sipas Agjencisë për Parandalimin e Korrupsionit, për një javë e kanë kryer 7.5 përqind e tyre.

    Këtë vit, sipas Yll Buleshkajt sistemi për sigurinë e të dhënave është më i avancuar.

    Ata që nuk e kryejnë obligimin fillimisht përballen me gjobë e më pas me institucionet e drejtësisë.

    Njohës të drejtësisë theksojnë se ky proces është tejet i rëndësishëm, veçanërisht për parandalimin e korrupsionit dhe rritjen e transparencës në institucionet publike.

    Në deklarimin e pasurisë për vitin e shkuar asnjë zyrtar publik nuk mbeti pa e kryer obligimin, përveç 135 prej tyre që e deklaruan me disa ditë vonesë./atvlive.tv/

  • Komuna e Prishtinës hap thirrjen për subvencione në blegtori, bletari dhe shpezëtari për vitin 2026

    Komuna e Prishtinës hap thirrjen për subvencione në blegtori, bletari dhe shpezëtari për vitin 2026

    Komuna e Prishtinës, përmes Drejtorisë për Bujqësi dhe Zhvillim Rural, ka njoftuar fermerët e kryeqytetit për hapjen e thirrjes për aplikim për subvencione – pagesa direkte në fushat e blegtorisë, bletarisë dhe shpezëtarisë për vitin 2026.

    Në njoftim bëhet e ditur se fermerët mund të aplikojnë për mbështetje financiare që synon zhvillimin dhe përmirësimin e sektorit bujqësor në komunë.

    “Fermerë të nderuar, ju njoftojmë që Kryeqyteti Prishtina përkatësisht Drejtoria për Bujqësi dhe Zhvillim Rural ka hapur thirrjen për aplikim për subvencione – pagesa direkte në blegtori, bletari dhe shpeztari për vitin 2026”, thuhet në njoftim.

    Detajet për aplikim dhe formularët përkatës mund të gjenden në linkun e publikuar nga Komuna e Prishtinës: https://prishtinaonline.com/…/thirrje-per-aplikim.

  • “900 euro për metër katror” – Dyfishohen çmimet e banesave në Kosovë

    “900 euro për metër katror” – Dyfishohen çmimet e banesave në Kosovë

    Çmimet e banesave janë rritur dukshëm në Kosovë. Krahasuar me para pesë vjetësh, në shumë raste çmimi i tyre pothuajse është dyfishuar.

    “Tepër shtrenjte o tepër, kah mi marr kah……” – Hajdin Mirena nuk e ka idenë se si ta blejë një banesë për të birin.

    Çmimi për metër katror është rritur dukshëm.

    5 vjet më parë, Mirena kishte blerë banesë në lagjen “Dardania” në Fushë-Kosovë, 502 euro për metër katror, ndërsa tash, thotë se s’po gjen nën 900 euro.

    Ai thotë se edhe cilësia e disa banesave nuk është në përputhje me çmimet.

    Jo vetëm për Hajdin Mirenën, por, blerja e një banese del te jetë fort e vështirë edhe për shumë qytetarë.

    “E kanë të papërballueshëm çmimin aktual. Pa ndërhyrje institucionale, pa e zvogëlu çmimin ose pa i ndihmu familjet, me jetesë mesatare është e pamundur me u bë një banesë…”, tha ekonomisti Artan Muhaxheri.

    Rritja e çmimeve lidhet edhe me shtrenjtimin e materialeve të ndërtimit, për të cilat ATV raportoi javën e kaluar.

    Rritja e çmimeve në ndërtimtari pritet të reflektohet edhe te qiratë.

    Sipas një kalkulimi, kur tani për m2 cmimi ka kaluar shifrën prej 1700 euro, për të blerë një banesë prej 60 metrash katrorë në Prishtinë, me vlerë rreth 120 mijë euro, një qytetari në Kosovë që merrë rrogë mesatare, i duhen rreth 15 deri në 16 vjet punë,

    Për të njëjtën banesë, në Shqipëri duhen rreth 10–11 vjet, në Serbi 13–14 vjet, ndërsa në Mal të Zi dhe Maqedoni të Veriut rreth 9–10 vjet punë./atvlive.tv

  • Shkëlqeu ndaj Prishtinës me dy gola, Laurent Xhylani është ylli i javës së 23-të

    Shkëlqeu ndaj Prishtinës me dy gola, Laurent Xhylani është ylli i javës së 23-të

    Federata e Futbollit e Kosovës, në bashkëpunim me sponsorin zyrtar të Superligës, Albi Mall, vazhdon ndarjen e çmimit tradicional “Ylli i Javës”, i cili i dedikohet futbollistit më të dalluar të javës në Superligën e futbollit kosovar.

    Për javën e njëzet e tretë të këtij edicioni, ky çmim i është ndarë futbollistit të FC Malisheva, Laurent Xhylani, i cili shënoi dy gola në ndeshjen kundër FC Prishtina, e cila përfundoi me rezultat 3:0.

    Vlerësimi është bërë nga Komisioni i Veteranëve të Futbollit.

    Pasi mori këtë çmim, Xhylani u shpreh i lumtur që u vlerësua si lojtari më i mirë i javës.

    “Ka qenë një ndeshje e vështirë, të cilën e kemi përgatitur shumë mirë, duke i analizuar të gjitha pikat e forta dhe të dobëta të FC Prishtinës dhe në fund arritëm një fitore të rëndësishme”.

    “Në ekip kemi një atmosferë shumë të mirë, sidomos me ardhjen e stafit të trajnerëve. Vazhdojmë të kemi të njëjtin synim: daljen në Evropë apo titullin kampion. Jam shumë i gëzuar për këtë çmim, i falënderoj bashkëlojtarët e mi dhe këtë çmim ia dedikoj nënës time”, tha ai për faqen zyrtare të FFK-së.

  • Këto simptoma tregojnë rënie të kalciumit në gjak: Kur gjendja mund të bëhet e rrezikshme

    Këto simptoma tregojnë rënie të kalciumit në gjak: Kur gjendja mund të bëhet e rrezikshme

    Hipokalcemia është gjendje që ndodh kur niveli i kalciumit në gjak bie shumë. Në fillim mund të mos japë shenja, por në rastet e rënda mund të shkaktojë spazma muskulore, kriza, çrregullime të ritmit të zemrës dhe komplikacione serioze

    Hipokalcemia është një gjendje që ndodh kur niveli i kalciumit në gjak është shumë i ulët. Është e rëndësishme të theksohet se këtu bëhet fjalë për kalciumin në gjak, dhe jo për sasinë e kalciumit në kocka. Kjo gjendje mund të jetë pasojë e çrregullimeve të ndryshme shëndetësore dhe mund të paraqitet në formë të lehtë ose të rëndë. Në shumicën e rasteve hipokalcemia është e trajtueshme dhe mund të jetë e përkohshme ose kronike, varësisht nga shkaku.

    Pse është i rëndësishëm kalciumi për organizmin?
    Kalciumi është një nga mineralet më të rëndësishme në trupin e njeriut. Pjesa më e madhe e tij gjendet në kocka, por edhe kalciumi në gjak është thelbësor për shumë funksione jetike. Ai mundëson funksionimin normal të sistemit nervor, tkurrjen e muskujve, mpiksjen e gjakut dhe funksionimin e rregullt të zemrës.

    Kur niveli i kalciumit në gjak bie, organizmi e ka më të vështirë të kryejë këto funksione themelore. Në përpjekje për ta mbajtur nivelin e kalciumit në gjak të qëndrueshëm, trupi mund të fillojë ta marrë atë nga kockat, gjë që me kalimin e kohës mund të çojë në dobësimin e tyre.

    Rregullimin e nivelit të kalciumit në organizëm e kontrollojnë hormonet – hormoni paratiroid dhe kalcitonina, ndërsa vitamina D ka rol kyç në përthithjen e kalciumit nga ushqimi.

    Kush mund të zhvillojë hipokalceminë?
    Hipokalcemia mund të prekë njerëz të të gjitha moshave, përfshirë edhe të porsalindurit. Shkaku shpesh përcakton edhe periudhën e jetës kur shfaqet kjo gjendje. Te foshnjat, për shembull, hipokalcemia mund të jetë pasojë e disa çrregullimeve gjenetike.

    Në praktikë, kjo gjendje shpesh shfaqet si pasojë ose komplikim i problemeve të tjera shëndetësore. Për shembull, është relativisht e shpeshtë pas operacionit të gjëndrës tiroide, sepse mund të dëmtohet funksioni i gjëndrave paratiroide.

    Cilat janë simptomat e hipokalcemisë?
    Rënia e lehtë e kalciumit shpesh nuk shkakton simptoma. Megjithatë, me uljen e mëtejshme të nivelit të kalciumit, mund të shfaqen shenja të ndryshme.

    Te format më të lehta mund të paraqiten:

    ▪ ngërçe në muskuj, veçanërisht në shpinë dhe në këmbë
    ▪ lëkurë e thatë dhe me luspa
    ▪ thonj të brishtë
    ▪ ndryshime në strukturën e flokëve.

    Nëse gjendja zgjat dhe nuk trajtohet, mund të shfaqen edhe simptoma neurologjike dhe psikologjike, si:

    ▪ konfuzion
    ▪ probleme me kujtesën
    ▪ nervozizëm dhe irritim
    ▪ gjendje depresive
    ▪ halucinacione.

    Kur hipokalcemia bëhet e rrezikshme?
    Në rastet e hipokalcemisë së rëndë, pra kur niveli i kalciumit në gjak është shumë i ulët, mund të shfaqen simptoma serioze dhe potencialisht kërcënuese për jetën.

    Këto përfshijnë mpirje të buzëve, gjuhës, gishtërinjve dhe shputave, dhimbje dhe spazma të forta muskulore, ngërçe të muskujve të fytit që mund të vështirësojnë frymëmarrjen, kriza epileptike, çrregullime të ritmit të zemrës dhe dobësim të funksionit të saj.

    Në këto situata nevojitet ndihmë e menjëhershme mjekësore, sepse komplikacionet mund të jenë të rrezikshme për jetën.

    Shkaqet më të shpeshta të hipokalcemisë
    Ekzistojnë shumë faktorë që mund të çojnë në rënien e kalciumit në gjak, por tre prej tyre janë më të shpeshtët.

    1. Hipoparatiroidizmi
    Kjo gjendje ndodh kur gjëndrat paratiroide nuk prodhojnë mjaftueshëm hormon paratiroid (PTH), i cili rregullon nivelin e kalciumit në gjak. Mund të jetë pasojë e çrregullimeve gjenetike ose e ndërhyrjeve kirurgjikale në gjëndrën tiroide ose paratiroide.

    2. Mungesa e vitaminës D
    Vitamina D i mundëson organizmit të përthithë kalciumin nga ushqimi. Mungesa e saj mund të çojë në hipokalcemí. Shkaku mund të jetë ekspozimi i pamjaftueshëm në diell, ushqyerja e dobët ose disa çrregullime gjenetike.

    3. Dëmtimi kronik i veshkave
    Në rastet e pamjaftueshmërisë së veshkave ndodh çrregullim në metabolizmin e fosforit dhe vitaminës D, gjë që mund të ulë nivelin e kalciumit në gjak.

    Hipokalceminë mund ta shkaktojnë edhe faktorë të tjerë, si disa barna, niveli i ulët i magnezit, pankreatiti akut ose disa sëmundje të rralla gjenetike.

    Si vendoset diagnoza?
    Hipokalcemia diagnostikohet përmes analizës së gjakut, kur përqendrimi total i kalciumit është më i ulët se rreth 8,8 mg/dL. Përveç kësaj, mjekët shpesh bëjnë analiza shtesë për të zbuluar shkakun e çrregullimit, duke përfshirë matjen e magnezit, fosforit, hormonit paratiroid dhe vitaminës D.

    Në disa raste kryhet edhe elektrokardiogramë (EKG), sepse niveli i ulët i kalciumit mund të shkaktojë çrregullime të ritmit të zemrës.

    Trajtimi i hipokalcemisë
    Forma më e zakonshme e trajtimit janë suplementet e kalciumit, zakonisht në formë tabletash. Megjithatë, është po aq e rëndësishme të trajtohet edhe shkaku themelor që ka çuar në rënien e kalciumit.

    Terapia mund të përfshijë preparate orale të kalciumit, suplemente të vitaminës D, hormon paratiroid sintetik në rastin e hipoparatiroidizmit, si dhe dhënie intravenoze të kalciumit në kushte spitalore në rastet e rënda.

    Cila është prognoza?
    Në shumicën e rasteve hipokalcemia është një gjendje e trajtueshme dhe e kontrollueshme, veçanërisht kur zbulohet dhe trajtohet në kohë. Simptomat zakonisht zhduken pasi niveli i kalciumit në gjak normalizohet.

    Megjithatë, hipokalcemia e rëndë dhe e patrajtuar mund të çojë në komplikacione serioze, si kriza epileptike, çrregullime të zemrës ose dështim të saj, prandaj konsiderohet një gjendje potencialisht kërcënuese për jetën.

    Për këtë arsye është e rëndësishme të kërkohet ndihmë mjekësore nëse shfaqen simptoma që mund të tregojnë një rënie të theksuar të kalciumit në organizëm.

  • Teuta Krasniqi hap arkivat, publikon pamje të rralla nga vitet e 90-ta

    Teuta Krasniqi hap arkivat, publikon pamje të rralla nga vitet e 90-ta

    Aktorja Teuta Krasniqi, ka vendosur t’i kthejë ndjekësit e saj pas në kohë me një publikim nostalgjik.

    Së fundmi, ajo i është bashkuar një trendi mjaft të njohur në rrjetet sociale duke hapur arkivat personale dhe duke ndarë imazhe të rralla nga vitet ’90.

    Përmes një videoje të publikuar në Instagram, e cila nis me pyetjen “Mami si ishe në vitet ’90?”, aktorja ka treguar disa fotografi nga koha kur ishte më e re.

    Postimin ajo e ka shoqëruar me mbishkrimin “90’s vibes”.

  • Gjashtë raste të dhunës në familje të raportuara për 24 orë

    Gjashtë raste të dhunës në familje të raportuara për 24 orë

    Policia e Kosovës ka raportuar gjashtë raste të dhunës në familje në 24 orët e fundit.

    Në Fushë Kosovë, një burrë është arrestuar për dhunë ndaj një gruaje.

    Pas intervistimit dhe konsultimit me prokurorin, i dyshuari është liruar në procedurë të rregullt.

    Një tjetër rast në të njëjtën komunë ka përfshirë një burrë nën ndikim të alkoolit që sulmoi fizikisht një grua.

    Viktima ka pranuar tretman mjekësor, ndërsa i dyshuari është dërguar në mbajtje me vendim të prokurorit.

    Në Prishtinë, një grua është sulmuar fizikisht pas një mosmarrëveshjeje nga një burrë.

    I dyshuari është shoqëruar në stacion policor dhe rasti po procedohet në procedurë të rregullt.

    Në Lipjan, pas një mosmarrëveshjeje, një burrë ka sulmuar fizikisht një tjetër burrë. Të dy palët kanë pranuar tretman mjekësor, dhe rasti është nën hetim.

    Ndrësa, në Gjakovë më 27 shkurt, një grua është keqtrajtuar psiqikisht nga një burrë. I dyshuari është arrestuar dhe më pas është liruar në procedurë të rregullt me vendim të prokurorit.

    Po ashtu, në Skenderaj një burrë është arrestuar pasi dyshohet se pas një mosmarrëveshjeje sulmoi fizikisht një burrë tjetër.

    Policia njofton se në vendin e ngjarjes i dyshuari ka kanosur dhe ka tentuar të sulmojë edhe zyrtarët policorë.

    Pas intervistimit dhe me vendim të prokurorit, i dyshuari është dërguar në mbajtje.

  • Hotit merr vendimin e parë si ministër

    Hotit merr vendimin e parë si ministër

    Ministria e Punës, Familjes dhe Vlerat e Luftës Çlirimtare ka themeluar Komisionin e Ankesave për shqyrtim të ankesave ndaj vendimeve përfundimtare të inspektimeve nga Inspektorati Qendror i Punës.

    Kështu kanë njoftuar nga ministria që drejtohet nga Andin Hoti.

    “Me qëllim të adresimit të çdo ankese ose paqartësie në raport me vendimet e Inspektoratit Qendror të Punës, sot ministri Andin Hoti ka marrë vendim për themelimin e Komisionit të Ankesave për shqyrtimin e ankesave ndaj vendimeve përfundimtare të inspektimeve nga Inspektorati Qendror i Punës. Ministria për Punë, Familje dhe Vlerat e Luftës Çlirimtare fton të gjithë qytetarët që në përputhje me ligjin dhe me afatet e parapara, ta shfrytëzojnë të drejtën për t’i adresuar ankesat në ministri”, njofton ministria.