ATV

Blog

  • Gjashtë raste të dhunës në familje gjatë 24-orëve të fundit, policia jep detaje

    Gjashtë raste të dhunës në familje gjatë 24-orëve të fundit, policia jep detaje

    Policia e Kosovës, ka njoftuar se gjatë 24 orëve të fundit, në vend janë raportuar gjashtë raste të dhunës në familje.

    Të njëjtat, shton policia, janë raportuar të kenë ndodhur në Graçanicë, Prishtinë, Lipjan, Istog e Skenderaj.

    Raporti:

    DHUNË NË FAMILJE

    Graçanicë 10.08.2026 – 23:45. Viktima femër kosovare ka lajmëruar se i dyshuari mashkull kosovar deri sa ishte në gjendje të dehur ka hyrë në tarracën e banesës së saj dhe me shishe qelqi ka thyer dritaren e tarracës si dhe ka dëmtuar automjetin e saj. Është arrestuar i dyshuari dhe pas matjes me alkootest ka rezultuar 1.39 promil. Me vendim të prokurorit, pas këndelljes i dyshuari është dërguar në mbajtje.

    Prishtinë 05.08.2026 – 12:30. Është arrestuar i dyshuari mashkull kosovar, pasi që dyshohet se në vazhdimësi ka ushtruar dhunë psikike dhe fizike ndaj viktimës femër kosovare. Me vendim të prokurorit pas intervistimit i dyshuari është liruar dhe rasti vazhdon në procedurë të rregullt.

    Prishtinë 11.08.2026 – 15:30. Është shoqëruar në stacionin policor e dyshuara femër kosovare, pasi që dyshohet se ka sulmuar fizikisht viktimën mashkull kosovar. Nuk raportohet për të lënduar. Me vendim të prokurorit pas intervistimit palët janë liruar dhe rasti vazhdon në procedurë të rregullt.

    Lipjan 11.08.2026-21:00. Viktima femër kosovare ka njoftuar se në vazhdimësi ka dhunë psiqike nga i dyshuari mashkull kosovar. Pas intervistimit me vendim të prokurorit rasti procedurë të rregullt.

    DHUNË NË FAMILJE

    Istog 11.08.2026-10:00.Viktima femër kosovare ka njoftuar se pas një mosmarrëveshje ishte sulmuar fizikisht nga i dyshuari mashkull kosovar. Pas intervistimit me vendim të prokurorit rasti vazhdon në procedurë të rregullt.

    DHUNË NË FAMILJE

    Skenderaj 11.08.2026-21:00. Viktima femër kosovare ka njoftuar se pas një mosmarrëveshje është sulmuar fizikisht nga i dyshuari mashkull kosovar. Viktima nuk ka pranuar që të dërgohet ne tretman mjekësorë. I dyshuari gjendet në kërkim të policisë. Viktimës iu është caktuar urdhër mbrojtës.

  • Albina Kelmendi bëhet nënë për herë të parë – zbulon emrin e djalit

    Albina Kelmendi bëhet nënë për herë të parë – zbulon emrin e djalit

    Këngëtarja Albina Kelmendi është bërë nënë për herë të parë, duke përjetuar një nga momentet më të veçanta në jetën e saj. Ajo dhe bashkëshorti i saj, Valon Vataj, janë bërë prindër të një djali.

    Lajmin e gëzueshëm Albina e ka ndarë me ndjekësit e saj përmes një postimi në Facebook, ku ka shprehur emocionet dhe mirënjohjen për bekimin e ardhjes në jetë të djalit të tyre.

    “Faleminderit Zotit që na bekoi me një djalë.

    Lusim Zotin që të rritet me shëndet, me gjitha të mirat, të bëhet fëmijë i mbarë dhe të na bëjë gjithmonë krenarë.

    Mirë se erdhe në jetën tonë, !”, ka shkruar Albina në Facebook.

  • The Weeknd ndryshon mendje për emrin artistik, ja si do të quhet

    The Weeknd ndryshon mendje për emrin artistik, ja si do të quhet

    The Weeknd ka hequr dorë nga ideja për të lënë pas emrin artistik me të cilin është bërë i famshëm në mbarë botën. Këngëtari kanadez, emri i vërtetë i të cilit është Abel Tesfaye, kishte lënë më herët të hapur mundësinë që të vazhdonte karrierën me emrin e tij, por tashmë duket se ka ndryshuar mendje, bën të ditur Entertainment Weekly.

    Gjatë koncertit të tij në Stokholm, më 8 gusht, në kuadër të turneut “After Hours Til Dawn”, 36-vjeçari foli për këtë vendim para fansave.

    “Provova pak të përfundoja rrugëtimin tim si The Weeknd dhe nuk më pëlqen mënyra se si ndihem”, tha ai, sipas një videoje të publikuar nga një fans, Më pas shtoi: “Do të jem gjithmonë këtu me ju”.

    Deklarata e fundit vjen disa vite pasi këngëtari kishte nisur të mendonte publikisht për një ndryshim të rëndësishëm në karrierë. Në vitin 2022, gjatë një bisede online me fansat, The Weeknd kishte thënë se po mendonte të ndryshonte emrin artistik në “Abel”, duke marrë si shembull Kanye West, i cili kishte ndryshuar emrin e tij në Ye.

    “Ndihem sikur në këtë pikë duhet ta ndryshoj emrin tim artistik në ABEL”, ishte shprehur ai në atë kohë. Madje, këngëtari kishte lënë të kuptohej se mund ta ndryshonte ligjërisht emrin, duke e mbajtur vetëm “Abel”, pa mbiemër, siç kanë bërë artistë të njohur si Madonna, Cher dhe Prince.

    Në maj të vitit 2023, The Weeknd e kishte çuar edhe më tej këtë ide, duke deklaruar se albumi i ardhshëm mund të ishte i fundit i tij si The Weeknd.

    “Albumi me të cilin po punoj tani është ndoshta dalja ime e fundit e madhe si The Weeknd”, kishte thënë ai për W Magazine.

    Megjithatë, duket se artisti nuk është ende gati t’i japë fund epokës së The Weeknd. Për momentin, ai do të vazhdojë të performojë dhe të krijojë muzikë me emrin që e shndërroi në një prej yjeve më të mëdhenj të muzikës në botë.

  • Ramadani: Vetëvendosje po e lë Kosovën të ekspozuar ndaj rreziqeve të sigurisë

    Ramadani: Vetëvendosje po e lë Kosovën të ekspozuar ndaj rreziqeve të sigurisë

    Deputeti dhe nënkryetari i Aleancës, Burim Ramadani, ka reaguar lidhur me ditën e pestë të bllokadës së Kuvendit, duke e cilësuar si të papërgjegjshme situatën e krijuar.

    Ramadani ka thënë se, si deputet dhe si njeri që shërbimin ndaj sigurisë kombëtare e ka prioritet, nuk mund ta tolerojë këtë gjendje.

    Ai ka theksuar se sfidat gjeopolitike dhe kërcënimet në rajon kërkojnë një Kuvend funksional, i cili buxheton dhe mbështet sektorin e sigurisë, siguron koordinim me NATO-n dhe merr vendime të qarta qeverisëse e parlamentare.

    Sipas Ramadanit, duke ikur nga seancat, Vetëvendosje po e lë Kosovën të ekspozuar ndaj kërcënimeve dhe rreziqeve të sigurisë.

    “Siguria duhet të na bashkojë të gjithëve!”, ka përfunduar Ramadani.

  • VV e përsërit qëndrimin: Seanca do të thirret kur të arrihet marrëveshja për presidentin

    VV e përsërit qëndrimin: Seanca do të thirret kur të arrihet marrëveshja për presidentin

    Deputeti i Lëvizjes Vetëvendosje, Adnan Rrustemi, ka deklaruar se vazhdimi i seancës konstituive të Kuvendit do të thirret në momentin kur të arrihet marrëveshje politike për presidentin.

    Rrustemi, në një intervistë për KosovaPress, është shprehur se afati prej 48 orësh për thirrjen e vazhdimit të seancës konstituive është i përcaktuar në Rregulloren e Kuvendit, por, sipas tij, thelbi i krizës aktuale nuk lidhet me këtë afat, por me mungesën e dakordimit politik për presidentin.

    “Na duhet kohë për të arritur marrëveshje për presidentin. Për sa kohë nuk ksemi dakordim për presidentin, konstituimi i legjislaturës është hap drejt zgjedhjeve të parakohshme, të panevojshme, për bindjen tonë. Jo drejt dakordimit apo zgjidhjes së çështjes kryesore që e preokupon Kosovën prej fillimit të këtij viti. Insistimi i opozitës që të konstituohet Kuvendi e, në anën tjetër, kur thonë se nuk marrin pjesë në seancën ku zgjidhet presidenti, është në fakt thirrje për zgjedhje të parakohshme. Ne nuk besojmë se Kosova ka nevojë për zgjedhje. Në anën tjetër, ky afati prej 48-orësh është afat i përcaktuar në rregullore, por thelbi i krizës është dakordimi për presidentin”, tha ai.

    Ai ka theksuar gjithashtu se nuk ka shkelje kushtetuese për sa i përket afatit 30-ditor, duke iu referuar interpretimit të Gjykatës Kushtetuese, sipas të cilit moskonstituimi përfundimtar i Kuvendit brenda 30 ditësh nuk prodhon automatikisht pasoja në kuptimin e shpërndarjes së Kuvendit.

    Rrustemi ka thënë se edhe pjesëmarrja e ish-opozitës në seancën e javës së kaluar dëshmon, sipas tij, se nuk ka pasur pengesë kushtetuese për mbajtjen e saj.

    Ai iu bëri thirrje partive të tjera parlamentare që t’i drejtohen Gjykatës Kushtetuese nëse kanë paqartësi kushtetuese për këtë proces.

    “Opozita po e përdor kushtetutën dhe po thirret në kushtetutë për të pamundësuar krijimin e institucioneve. Ky pozicion është pak absurd, sepse kushtetuta nuk ekziston për të penguar krijimin e institucioneve, përkundrazi, është një mundësi dhe mjet në funksion të krijimit të institucioneve. Cila është alternativa e kritikës së opozitës? Shkuarja në zgjedhje? Kjo nuk është alternativë. Kushtetuta thotë se brenda 30 ditëve të certifikimit të rezultatit të zgjedhjeve duhet të thirret seanca konstituive. Ka një interpretim të Gjykatës Kushtetuese vitin e kaluar që i jep një kuptim tjetër lloj kësaj dispozite, por, në anën tjetër, të gjithë e dimë se edhe moskonstituimi përfundimtar brenda 30 ditëve të Kuvendit nuk prodhon pasoja në kuptimin e shpërndarjes së Kuvendit… Vetë pjesëmarrja e deputetëve të opozitës në seancën e së shtunës është konfirmim apo bindje e vetë atyre që nuk ka shkelje kushtetuese; në të kundërtën, nuk do të vinin në seancë. Por edhe vetë thirrja e tyre që të mbahet seanca çdo 48 orë është konfirmim se nuk ka pengesa kushtetuese për konstituim të Kuvendit”, shtoi ai.

    Rrustemi mohoi se po zvarritet procesi i konstituimit të Kuvendit në mënyrë që zgjedhjet e reja të mbahen në dhjetor, duke thënë se qëllimi i Vetëvendosjes është arritja e një marrëveshjeje për presidentin dhe shmangia e zgjedhjeve të parakohshme.

    “Ne nuk po e zvarrisim për këtë arsye. Ne thjesht po kërkojmë marrëveshje për presidentin dhe po insistojmë se Kosova s’ka nevojë për zgjedhje, por për president. Vetëm ata që i mendojnë zgjedhjet si alternativë kanë kritika dhe arsyetime të tilla. Ne nuk duam zgjedhje, por dakordim për një president konsensual”, theksoi ai.

    Megjithatë, deputeti i LVV-së paralajmëroi se shumë shpejt kryetari i partisë, njëherësh kryeministri në detyrë, Albin Kurti, do t’iu dërgojë ftesa të reja për takim liderëve të partive të ish-opozitës.

    “Do të ketë ftesa dhe do të ketë edhe takime, padyshim. Ne nuk do të lodhemi asnjëherë së dialoguari me partitë opozitare për të gjetur një zgjidhje të drejtë dhe të dobishme që i korrespondon situatës aktuale dhe që shmang zgjedhjet e parakohshme”, theksoi Rrustemi.

    Kuvendi i Kosovës ende nuk është konstituuar, pasi në dy tentimet e deritanishme nuk është arritur të zgjidhet kryetari i Kuvendit dhe të përmbyllet procesi i konstituimit të Legjislaturës së 11-të. Seanca konstituive po vazhdon të jetë në qendër të përplasjeve mes partive parlamentare, ndërsa dështimi për formimin e institucioneve po e zgjat krizën politike në vend. Kryeministri në detyrë, Albin Kurti, ka kërkuar kohë për arritjen e një marrëveshjeje politike, në përpjekje për t’i hapur rrugë konstituimit të Kuvendit dhe formimit të institucioneve të reja, ndërkohë që deputetët pritet të rikthehen sërish në përpjekje për konstituimin e Kuvendit, në një proces që është kusht për formimin e institucioneve të reja të Kosovës.

  • Deliu-Kodra: Në ora 11:00 do të jemi në Kuvend, as Kurti e as LVV-ja s’mund ta marrin peng Republikën

    Deliu-Kodra: Në ora 11:00 do të jemi në Kuvend, as Kurti e as LVV-ja s’mund ta marrin peng Republikën

    Deputetja e PDK-së, Blerta Deliu-Kodra ka njoftuar se në ora 11:00 do të jenë në Kuvend dhe do të përdorin çdo mjet mjet institucional e juridik për ta rikthyer rendin kushtetues.

    “As Albin Kurti, as LVV-ja nuk mund ta marrin peng Republikën dhe ta ndryshojnë Kushtetutën sipas skenarit të tyre”, ka shkruar ajo në rrjetin social Facebook.

    Postimi i saj i plotë:

    Nuk do të rrimë duarkryq. Në ora 11:00 do të jemi në Kuvend dhe do ta përdorim çdo mjet institucional e juridik për ta rikthyer rendin kushtetues.

    As Albin Kurti, as LVV-ja nuk mund ta marrin peng Republikën dhe ta ndryshojnë Kushtetutën sipas skenarit të tyre.

    Qëllimi i tyre është i qartë: ose ta çojnë vendin në zgjedhje të jashtëzakonshme në një datë që u konvenon, ose ta kapin edhe institucionin e Presidentit.

    Por Kosova nuk është pronë e askujt. Kushtetuta nuk interpretohet sipas interesit politik dhe nuk guxon të merret peng.

  • AVONET dhe 13 organizata kërkojnë ndërhyrjen e Kushtetueses për konstituimin e Kuvendit

    AVONET dhe 13 organizata kërkojnë ndërhyrjen e Kushtetueses për konstituimin e Kuvendit

    AVONET, së bashku me 13 organizata të tjera të shoqërisë civile, i janë drejtuar Gjykatës Kushtetuese të Kosovës me kërkesë për të vlerësuar nëse Aktgjykimi KO124/25 është zbatuar siç duhet në lidhje me afatin për konstituimin e Kuvendit.

    Kërkesa është paraqitur pas zhvillimeve të fundit në procesin e konstituimit të Kuvendit të dalë nga zgjedhjet e 7 qershorit 2026.

    Sipas organizatave nënshkruese, afati 30-ditor për konstituimin e Kuvendit ka përfunduar më 7 gusht, ndërsa seanca konstituive e mbajtur më 6 gusht nuk ka përfunduar me zgjedhjen e Kryetarit dhe Nënkryetarëve të Kuvendit.

    Në deklaratën për media, AVONET thekson se mbajtja e një seance që nuk përfundon me zgjedhjen e këtyre organeve nuk mund të konsiderohet si konstituim i plotë i Kuvendit, duke iu referuar përcaktimeve të Aktgjykimit KO124/25.

    Organizatat kanë vënë në dukje edhe faktin se vazhdimi i seancës ishte caktuar për 8 gusht, një ditë pas përfundimit të afatit 30-ditor.

    Përmes kërkesës së tyre, ato i kanë kërkuar Gjykatës Kushtetuese të vlerësojë nëse aktgjykimi është zbatuar në përputhje me përcaktimet e tij dhe brenda afatit të përcaktuar.

    Kërkesa është bazuar në Rregullin 60 të Rregullores së Punës së Gjykatës Kushtetuese, i cili përcakton procedurën për rastet kur pretendohet moszbatimi i një vendimi të Gjykatës.

    Në rast se konstatohet moszbatim, AVONET dhe organizatat nënshkruese kërkojnë që Gjykata të ndërmarrë masat e parapara me rregullore, përfshirë nxjerrjen e aktvendimit për moszbatim apo mospërmbarim, si dhe veprime të tjera që mund t’i konsiderojë të nevojshme.

    Sipas tyre, çështja është me rëndësi për funksionimin e institucioneve të dala nga zgjedhjet dhe për respektimin e rendit kushtetues.

    “Qëllimi është të sigurohet qartësi juridike dhe institucionale lidhur me procesin e konstituimit të Kuvendit dhe respektimin e vendimeve të Gjykatës Kushtetuese”, thuhet në deklaratën e organizatave.

  • Deri në fund të verës, këto 4 shenja do të kenë gjetur dashurinë e vërtetë

    Deri në fund të verës, këto 4 shenja do të kenë gjetur dashurinë e vërtetë

    Nëse muajt e fundit kanë qenë të mbushur me zhgënjime, ndarje ose marrëdhënie të dështuara, pjesa tjetër e verës duket se do të sjellë ndryshime të rëndësishme në jetën dashurore të katër shenjave të zodiakut. Ndikimet planetare të javëve të ardhshme favorizojnë njohje të reja, lidhje të forta emocionale dhe marrëdhënie me potencial. Shihni se cilat shenja të zodiakut kanë më shumë gjasa të gjejnë dashurinë e vërtetë para fundit të verës.

    Dashi

    Dashuria po hyn në jetën tuaj me një hakmarrje dhe gjithçka tregon se një njohje e papritur mund të ndryshojë rrjedhën e ngjarjeve. Një person që shfaqet papritur ka potencialin të zhvillohet në diçka shumë më thelbësore sesa një flirt i thjeshtë. Nëse jeni tashmë në një lidhje, kjo periudhë rinovon pasionin dhe sjell intimitet më të madh, duke e bërë lidhjen tuaj më të fortë se kurrë.

    Luani

    Nëse periudha e mëparshme ishte plot dyshime dhe zhgënjime, tani situata po ndryshon dukshëm. Njohjet e reja ose zhvillimet e rëndësishme në marrëdhënien tuaj ekzistuese krijojnë një klimë optimizmi dhe eksitimi. Dashuria që vjen në jetën tuaj karakterizohet nga stabiliteti, ndershmëria dhe një ndjenjë sigurie, elementë që mund t’ju kenë munguar deri më tani.

    Ujori

    Jeta juaj dashurore po hyn në një fazë krejt të re. Një takim ose një zhvillim i papritur mund t’ju bëjë t’i shikoni marrëdhëniet në një dritë tjetër dhe të ndjeni sikur diçka vërtet e veçantë po fillon. Nëse i keni ngritur standardet në kërkesat tuaja, tani është koha të kuptoni se ia vlen të prisni personin e duhur.

    Shigjetari

    Kthesat në dashuri janë tipari kryesor i kësaj periudhe. Një person i ri mund të shfaqet aty ku më pak e prisni ose një marrëdhënie miqësore mund të marrë papritur një dimension romantik. Deri në fund të verës, zhvillimet do t’ju bëjnë të rishqyrtoni atë që besonit për dashurinë dhe do të vërtetojnë se historitë më të bukura shpesh fillojnë në mënyrën më të paparashikueshme.

  • Pas më shumë se 20 vitesh pritjeje, hapet muzeu më i madh Guggenheim në botë

    Pas më shumë se 20 vitesh pritjeje, hapet muzeu më i madh Guggenheim në botë

    Pak projekte arkitekturore dhe kulturore kanë ngjallur kaq shumë interes gjatë dy dekadave të fundit sa Guggenheim Abu Dhabi

    Pikërisht për këtë arsye, lajmi se muzeu më në fund do t’i hapë dyert më 11 dhjetor 2026 dhe do të bëhet muzeu i katërt aktiv Guggenheim në botë, pas atyre në Nju Jork, Venecia dhe Bilbao, shënon fundin e një prej projekteve kulturore më të shumëpritura të shekullit XXI.

    Pikërisht për këtë arsye, lajmi se muzeu më në fund do t’i hapë dyert më 11 dhjetor 2026 dhe do të bëhet muzeu i katërt aktiv Guggenheim në botë, pas atyre në Nju Jork, Venecia dhe Bilbao, shënon fundin e një prej projekteve kulturore më të shumëpritura të shekullit XXI.I vendosur në ishullin Saadiyat, në një zonë kulturore që vitet e fundit ka ndryshuar tërësisht hartën kulturore të Lindjes së Mesme, Guggenheim Abu Dhabi nuk është konceptuar thjesht si një tjetër degë e muzeut të famshëm. Bëhet fjalë për muzeun më të madh Guggenheim të ndërtuar deri më tani, një hapësirë që synon të tregojë një histori të re të artit modern dhe bashkëkohor përmes një perspektive globale, me theks të veçantë te artistët nga Lindja e Mesme, Azia dhe Afrika e Veriut.

    Frank Gehry sjell sërish arkitekturën që sfidon kufijtë

    Pas këtij projekti qëndron një prej arkitektëve më të njohur në botë, Frank Gehry, autori i Guggenheimit ikonik në Bilbao, një ndërtesë që ndryshoi rrënjësisht mënyrën se si mendojmë për rolin e arkitekturës në zhvillimin e qyteteve.

    Planet për Guggenheim Abu Dhabi u prezantuan për herë të parë në vitin 2006, ndërsa projektet e Gehryt u bënë publike në vitin 2009.

    Për Abu Dhabin, Gehry ka projektuar një ndërtesë që tërheq vëmendjen po aq sa edhe veprat e artit që do të ekspozohen brenda saj. Muzeu përbëhet nga 30 galeri të lidhura përmes një atriumi të madh qendror, ndërsa silueta e tij, e cila pa dyshim do të bëhet një nga simbolet e reja të Abu Dhabit, formohet nga 10 kulla monumentale me forma skulpturore, që i japin hapësirës një karakter pothuajse futurist.

    Format e pazakonta janë realizuar me çelik inox, rrjetë metalike, oniks dhe xham. Vetë arkitektura është konceptuar si pjesë përbërëse e përvojës së vizitorëve dhe jo thjesht si një kornizë për ekspozitat.

    Me më shumë se 11.600 metra katrorë hapësira të brendshme galerish dhe me hapësira të jashtme ekspozimi më shumë se dy herë më të mëdha, Guggenheim Abu Dhabi do të jetë muzeu më i madh në të gjithë rrjetin Guggenheim.

    Një këndvështrim i ri për artin modern

    Ndryshe nga muzetë e tjerë Guggenheim, të cilët kryesisht mbështeten në koleksione ekzistuese, Guggenheim Abu Dhabi po krijon një koleksion të konceptuar posaçërisht për këtë hapësirë.

    Fokusi do të jetë te arti i krijuar nga vitet 1960 e deri më sot, duke përfshirë pikturën, fotografinë, skulpturën, instalacionet dhe mediat e reja.

    Vëmendje e veçantë do t’u kushtohet artistëve nga rajone që për një kohë të gjatë kanë qenë të përfaqësuara në mënyrë të pamjaftueshme në muzetë e mëdha të skenës kulturore perëndimore.

    Siç thekson Mariët Westermann, drejtoreshë dhe shefe ekzekutive e Solomon R. Guggenheim Foundation, ambicia e muzeut nuk është vetëm të prezantojë vepra të reja arti, por të ofrojë një këndvështrim tjetër mbi historinë e artit bashkëkohor – një histori që përfshin perspektiva të ndryshme kulturore dhe zëra nga të gjitha kontinentet.

    Guggenheim Abu Dhabi ndodhet në zemër të Saadiyat Cultural District, një zonë që vitet e fundit është shndërruar në një prej qendrave kulturore më ambicioze në botë.

    Aty tashmë ndodhen Louvre Abu Dhabi, teamLab Phenomena Abu Dhabi, Zayed National Museum dhe Natural History Museum Abu Dhabi, ndërsa është në ndërtim edhe një qendër e re e arteve të skenës, e cila gjithashtu është projektuar nga Frank Gehry.

    Ideja e të gjithë projektit është që në një hapësirë të vetme të bashkohen institucione që do ta pozicionojnë Abu Dhabin si një prej destinacioneve më të rëndësishme në botë për artin, arkitekturën dhe kulturën.

  • Harrojini produktet e shtrenjta, ky truk i thjeshtë heq njollat e gëlqeres nga xhami i dushit

    Harrojini produktet e shtrenjta, ky truk i thjeshtë heq njollat e gëlqeres nga xhami i dushit

    Asgjë nuk është më zhgënjyese sesa të pastroni tërësisht banjën dhe, megjithatë, të shihni se xhami i kabinës së dushit vazhdon të duket i turbullt dhe i mbuluar me njolla të papastra.

    Dyert e dushit mund të jenë të vështira për t’u pastruar siç duhet, pasi thjesht fshirja e tyre shpesh nuk mjafton për shkak të gëlqeres, e cila përbëhet nga minerale të forta që mbeten pas avullimit të ujit të fortë.

    Gëlqerja është ajo që e bën xhamin e dushit të duket i mjegulluar, por ajo që i bën këto njolla veçanërisht bezdisëse është fakti se me kalimin e kohës ato forcohen dhe ngjiten shumë më fort pas xhamit.

    Ato grumbullohen mbi mbetjet e sapunit dhe yndyrat që spërkaten në xham, duke krijuar njolla të mëdha uji dhe gjurmë të përhapura në të gjithë derën e dushit, të cilat nuk largohen lehtë, edhe nëse i fërkoni.

    Megjithatë, Charlie Gray, një ekspert i mirëmbajtjes së shtëpisë, ka treguar se nuk është e nevojshme të përdorni produkte të shtrenjta ose të veçanta për të hequr njollat nga xhami i dushit, pasi zgjidhja mund të jetë pikërisht në kuzhinën tuaj.

    Në një video të publikuar në internet, Charlie tha:

    “Kabina ime e dushit është jashtëzakonisht e papastër, ndaj mendova t’ju tregoja se si e pastroj. Mjafton një sfungjer abraziv dhe pak sodë buke, gjëra që duhet t’i keni të gjithë në kuzhinë.

    Hidhni pak sodë buke mbi sfungjer dhe më pas vjen pjesa më e mirë. Shtrydhni pak lëng limoni mbi sodën e bukës dhe shikoni se si fillon të shkumojë. E adhuroj!”

    Pse të përdorni lëng limoni dhe sodë buke?

    Njollat e gëlqeres mund të jenë të vështira për t’u pastruar, sepse përbëhen nga një mineral i quajtur karbonat kalciumi, i cili kërkon një tretësirë acide për t’u shpërbërë.

    Megjithatë, përdorimi i pastruesve shumë të fortë ose i produkteve acide të papërshtatshme në banjë mund të dëmtojë disa pajisje metalike, sipërfaqe të trajtuara dhe materiale të ndryshme të banjës. Prandaj, duhet të tregoni kujdes me produktet që përdorni.

    Lëngu i limonit është një zgjedhje e mirë, pasi përmban acid citrik, i cili ndihmon në shpërbërjen natyrale të gëlqeres dhe largimin e njollave të turbullta nga xhami.

    Nga ana tjetër, soda e bukës është lehtësisht alkaline, çka e ndihmon në lirimin e njollave yndyrore dhe mbetjeve të sapunit në xhamin e dushit, duke ndihmuar në largimin e papastërtive.

    Kombinimi i lëngut të limonit me sodën e bukës mund ta bëjë shumë më të lehtë pastrimin e një xhami dushi të ndotur, pa pasur nevojë për produkte të shtrenjta ose kimikate agresive.

    Si ta pastroni thellësisht xhamin e dushit

    Në fillim, hidhni pak sodë buke mbi një sfungjer abraziv dhe më pas shtrydhni mbi të edhe pak lëng limoni.

    Do të vini re se përzierja fillon menjëherë të shkumëzojë sapo të bashkohen të dy përbërësit. Më pas, gjithçka që duhet të bëni është të pastroni xhamin e dushit me sfungjer.

    Lëvizeni sfungjerin në formë rrethore derisa të mbuloni çdo njollë dhe çdo pjesë të turbullt të xhamit. Nëse xhami është shumë i ndotur, mund të shtrydhni edhe pak lëng limoni direkt mbi të.

    Shpëlajeni sfungjerin me ujë të ngrohtë dhe më pas kalojeni përsëri mbi xhamin e dushit për ta shpëlarë. Kjo do të ndihmojë në largimin e njollave më të forta.

    Në fund, thajeni dhe lustrojeni xhamin me një leckë të pastër. Pas kësaj, xhami i dushit duhet të jetë plotësisht i pastër.

    Në përgjithësi, pastrimi i plotë i xhamit të dushit duhet të zgjasë rreth 10 deri në 15 minuta, por në fund ai duhet të shkëlqejë dhe të mos ketë më njolla.

    Charlie tha:

    “Pak sodë buke, pak lëng limoni dhe pak fërkim, dhe xhami do të shkëlqejë. Nuk ka më njolla uji, nuk ka më vija dhe jam shumë i kënaqur me mënyrën se si duket.”