Category: ZGJEDHJET 2025

Kryetari aktual i Prishtinës nga radhët e Lidhjes Demokratike të Kosovës, i cili po kërkon edhe një mandat të dytë, Përparim Rama ka bërë të ditur se për herë të parë kryeqyteti ka një strategji të plotë për kulturën dhe artin me vizion afatgjatë deri më 2031.

Kurse në Fushë Kosovë, kandidati për kryetar Besnik Osmani të dielën e kishte rezervuar për Turneun në Futsall. Në këtë ngjarje sportive, Osmani tha se janë bashkuar ekipet e nëndegëve të LDK-së, strukturave dhe ato të rinisë për të treguar pasionin për sportin dhe fuqinë e bashkëpunimit në këtë drejtim.

Ndërsa, Visar Azemi nga LDK që synon të parin e Ferizajt, i kishte zgjedhur kafiteritë e qytetit që të takohet me ferizajas. Atyre, Azemi u premtoi një qytet me trotuar e parqe, si dhe mundësi pune që duhet t’u krijohen grave e vajzave.

E bizneset, kishte planifikuar ti vizitonte Jeton Mushkolaj që në vazhdimësi po bënë premtime, nëse do ta ketë në menaxhim Deçanin. Mushkolaj tha se në mandatin e tij si kryetar, dera do të jetë gjithmonë e hapur për çdo biznes që kontribuon në rritjen e ekonomisë, punësimit dhe përmirësimin e mirëqenies së komunitetit.

Ndërsa, Driton Selmanaj, që kandidon t’a udhëheq për katër vite Prizrenin, u takua me banorë në Shkozë.

Ishte një mundësi për të dëgjuar nga afër shqetësimet tuaja, për të ndarë mendime rreth problemeve të përditshme dhe për të diskutuar hapat konkretë që do të ndërmarrim për zgjidhjen e tyre– ka shkruar mes tjerash Selmanaj.

Në ditën e nëntë, LDK-ja në Kacanik prezantoi listën e kandidatëve për Asamble, në krye me Betim Shalën.

Në Prishtinë, kandidati për kryetar komune nga Lëvizja Vetëvendosje, Hajrulla Çeku, së bashku me ministrin Ejup Maqedonci dhe ekipin e kandidatëve për Asamblenë Komunale, ka vizituar disa fshatra të Prishtinës, nga ku edhe prezantoi plane konkrete për investime në infrastrukturë, ndriçim publik, çerdhe dhe parqe, duke theksuar se fshati do të kthehet në një hapësirë funksionale për jetesë dinjitoze.

Në Deçan, Faton Selmanaj, premtoi se do të fokusohet në investime në sport, kulturë dhe zhvillim për të rinjtë, duke premtuar një administratë më efikase.

Në Gjilan, kryetari aktual Alban Hyseni, në garë për mandatin e dytë, vizitoi fshatin Vrapqiq ku u prit nga banorët me përkrahje e angazhim për zgjedhjet që po afrojnë.

Në Dragash, Filiz Mustafa, së bashku me kryeministrin Kurti, vizitoi një fermer të prekur nga fatkeqësitë natyrore, duke theksuar përkushtimin për përkrahje të bujqësisë dhe zhvillimin rural.

Në Fushë Kosovë, kandidati Valon Prebreza u bëri thirrje të rinjve të jenë pjesë e ndryshimit, duke u zotuar për përfaqësim aktiv dhe reformë në institucione.

Në Kamenicë, kryetari aktual Kadri Rahimaj vlerësoi kontributin e diasporës për zhvillimin e komunës dhe theksoi lidhjen e fortë me mërgatën.

Në Mitrovicë, Faton Peci vizitoi Qendrën për Sindromën Down, ku premtoi mbështetje profesionale për fëmijët me nevoja të veçanta përmes logopedëve, psikologëve dhe punëtorëve social.

Në Lipjan, Ilir Qeriqi prezantoi projektin për ndërtimin e një nënkalimi modern në rrugën “Sadik Shala”, me qëllim përmirësimin e qarkullimit dhe sigurisë rrugore.

Në Pejë, Taulant Kelmendi ka intensifikuar takimet me qytetarët, i mbështetur edhe nga kryeministri Kurti, i cili e vlerësoi përvojën dhe energjinë e tij si një figurë të re, por me përkushtim të dëshmuar.

Në Prizren, Artan Abrashi zhvilloi takim me banorët e Hasit, ku nënvizoi rëndësinë e investimeve në këtë pjesë të rëndësishme të komunës.

Në Skenderaj, Hysni Mehani premtoi parqe dhe kënde lojërash për çdo lagje dhe fshat, për një Skënderaj gjithëpërfshirës.

Në Ferizaj, Enver Haliti diskutoi me qytetarët për mungesën e ujit të pijshëm dhe çerdheve në disa zona, duke e vendosur këtë problem si prioritet të programit të tij.

Ndërsa në Junik, Jetmir Tofaj, në shoqërinë e zv. ministres Daulina Osmani, zhvilloi një bisedë me gra dhe të rinj mbi rëndësinë e barazisë gjinore dhe përfshirjes në jetën publike.

https://www.facebook.com/share/p/19hPbjwGST/

 

Në Prishtinë, kandidatja për kryetare të komunës nga radhët e Partisë Socialdemokrate, Besa Shahini, së bashku me kandidaten për Asamble, Laura Berisha, vizituan Asociacionin Nacional për Autizëm në Kosovë.

Shahini tha se Komuna e Prishtinës duhet të ofrojë hapësira fizike dhe mbështetje financiare të rregullt për organizata të tilla, duke theksuar se puna e ANAK-ut është jetike për fëmijët me autizëm dhe familjet e tyre.

Ndërsa në Deçan, kandidatja për kryetare, Natyra Kuçi, prezantoi planin e saj për një Deçan më të drejtë dhe të barabartë për të gjithë qytetarët. Në programin e saj përfshihet: ujë i pijshëm për të gjithë banorët, rrjet kanalizimi, treg publik, shtëpi për pensionistë, festival i hiking-ut, pushimore verore për fëmijët, energji solare për blegtorët, mbështetje për nanat dhe bujtinat, si dhe pesë çerdhe të reja në komunë.

Kuçi premtoi gjithashtu transport falas për nxënësit, bursa të plota për studentët, trajnime për mësuesit dhe kontrolle shëndetësore për fëmijët nga çerdhja deri në fund të shkollës fillore.

Kandidati i PDK-së për kryetar të Prishtinës, Uran Ismajli, gjatë vizitës në klubin “2 Korriku” premtoi mbështetje më të madhe për sportin.

Ai tha se Prishtina do të vazhdojë të nxjerrë talente dhe se do të rriten investimet në infrastrukturën sportive në qytet dhe fshatra.

Në Drenas, kandidati Petrit Hajdari tha se qytetarët duhet ta votojnë atë për tri arsye.

Ndërsa në Gjilan, kandidati Riad Rashiti prezantoi një plan për qytet më të pastër, me buxhet 1.3 milionë euro për mirëmbajtje dhe rritje pagash për punonjësit komunalë.

Jona Arifi, kandidate në Kamenicë, premtoi se bujqësia do të jetë prioriteti i saj si kryetare. E nga Topanica, ajo u zotua për largimin e mbeturinave ilegale dhe një ambient të pastër.

Në Prizren, kryetari aktual dhe kandidati për një mandat të dytë, Shaqir Totaj, premtoi rritje të përkrahjes për nënat lehona dhe ndërtimin e më shumë çerdheve.

Kryetari aktual i Ferizajt, Agim Aliu, në një tubim në Gremë, tha se qytetarët tashmë e kanë ndarë mendjen për fitoren.

Bekim Azizi, kandidat në Viti, tha se mbështetja e të rinjve në fshatin Smirë e konfirmon entuziazmin për ndryshim dhe fitoren e PDK-së më 12 tetor.

Ndërsa në Vushtrri, Ferit Idrizi, që kërkon një mandat të dytë, prezantoi projektin për renovimin e “Banesave të Bardha”, duke theksuar se transformimi i qytetit është në vazhdim dhe investimet do të përhapen edhe në zona të tjera.

Në Mitrovicë, kandidati Arian Tahiri u zotua për ndërtimin e 2500 vendparkimeve të reja në tri lokacione strategjike, si zgjidhje për mungesën e hapësirave të parkimit.

Në Rahovec, Edon Cana akuzoi kryetarin aktual për mungesë transparence dhe paralajmëroi auditim të menjëhershëm të tenderëve, me qëllim që keqpërdorimet të shkojnë në Prokurori.

Kandidatët për kryetarë komunash nga radhët e Nismës Socialdemokrate kanë shpalosur planet dhe premtimet për qeverisje lokale në ditën e nëntë të fushatës zgjedhore.

Në Vushtrri, kandidatja për kryetare, Xhevahire Izmaku, ka zhvilluar një takim joformal me të rinjtë e qytetit, ku ka theksuar rëndësinë e përfshirjes së rinisë në proceset vendimmarrëse.

Ndërkaq në Malishevë, kryetari aktual dhe kandidati për një mandat të ri, Ekrem Kastrati, është shprehur i bindur në mbështetjen e qytetarëve, duke u bazuar në realizimet e deritanishme të projekteve.

Në Prizren, kandidatja Albulena Balaj-Halimi ka vizituar lagjen “11 Marsi”, ku është takuar me banorët dhe ka prezantuar pakot programore të Nismës. Ajo ka theksuar se qytetarët e Prizrenit janë të gatshëm për ndryshim dhe se përkrahja për kandidaturën e saj dhe të Dr. Fatmir Gërdellajt është në rritje.

Lideri i Aleancës për Ardhmërinë e Kosovës, Ramush Haradinaj zgjodhi Prishtinën që të kërkoj votë për kandidatin në këtë komunë, Bekë Berisha.

Sipas liderit të AAK-së, Berisha dhe lista për Asamble kanë për t’ia rikthyer qytetit madhështinë që e meriton.

Nga fshati Mramor i Prishtinës, u premtua turizëm malor dhe rekreacion.

Kurse të dielën, kryetari aktual i Gjakovës, Ardian Gjini, që synon edhe një mandat të radhës, ngriti lartë kontributi e Klubit të Futbollit “Vëllaznimi”, që thotë se korrën fitore e përgatitën gjenerata të reja.

Edhe Bali Muharremaj që synon plus 4 vite të tjera të parin e Suharekës thotë se do ta vazhdojë këtë traditë, duke thënë se e kemi dhënë fjalën, me duar të bashkuara, pas çdo suksesi të punës, se nuk do ta tradhtojmë njëri-tjetrin në momente të caktuara.

Ai luti qytetarët për besim gjatë këtij rrugëtimi.

Ndërsa, Bashkim Ramosaj, kryetar aktual i Deçanit gjatë vizitës së tij në ordinanca shëndetësore u takua me mjekë, infermierë dhe staf shëndetësor, duke theksuar lart rolin e tyre në shoqëri.

Biseduam se si mund të jemi edhe më pranë tyre, në mënyrë që shërbimet shëndetësore të jenë gjithmonë sa më cilësore- shkroi mes tjerash Ramosaj.

Bashkim të dy anëve të qytetit të Obiliqit ka premtuar kandidati Ali Krasniqi.

Në ditën e tetë të fushatës zgjedhore, subjektet politike kanë zhvilluar aktivitetet e tyre politike.
Në vazhdim ju sjellim një përmbledhje të aktiviteteve kryesore.

Në ditën e tetë të fushatës zgjedhore për zgjedhjet lokale të 12 tetorit, kandidatja e Partisë Socialdemokrate (PSD) për kryetare të Prishtinës, Besa Shahini, ka shpalosur një nga premtimet e saj kyçe: Vendosjen e 20 minibusëve për transportin e nxënësve në kryeqytet. Sipas saj, ky projekt synon të ofrojë transport të sigurt për fëmijët, të ndihmojë në uljen e trafikut gjatë orëve të pikut dhe të përmirësojë lidhjen mes lagjeve të kryeqytetit.

Ndërkohë, në komunën e Deçanit, Natyra Kuçi, kandidate për kryetare nga radhët e PSD-së, ka prezantuar një projekt që fokusohet në mirëqenien dhe zhvillimin social të fëmijëve. Ajo ka njoftuar për ndërtimin e një pushimoreje në Bjeshkët e Belegut me kapacitet prej 150 vendesh.

Teksa Qëndron Kastrati, kandidat për kryetar të PSD-së, ndau foto me mbishkrimin “Ju keni dhënë shumë për Kamenicën – tani është radha jonë”

Kandidati për kryetar të Prishtinës, Uran Ismajli, prezantoi projektin konkret për zhvillimin e fshatit Bardhosh, përfshirë ndërtimin e një çerdheje, qendër multifunksionale për sport dhe kulturë, rregullimin e infrastrukturës dhe mbështetje për agroturizëm.

Në Mitrovicë, Arian Tahiri ka premtuar ndërtimin e një fushe moderne tenisi dhe mbështetje për bizneset vendore si pjesë e zhvillimit ekonomik të qytetit.

Në Lipjan, Shukri Buja vë në qendër arsimin, duke bashkëbiseduar me profesionistë për zgjidhje konkrete ndaj sfidave aktuale.

Arta Nallbani në Pejë premton përshpejtimin dhe thjeshtimin e procesit të legalizimit të ndërtimeve pa leje përmes një zyre të dedikuar dhe një platforme online.

Isak Shabani në Podujevë angazhohet për përkrahjen e bujqve dhe rregullimin e shtratit të lumit për të mbrojtur prodhimet bujqësore nga dëmtimet.

Agim Aliu në Ferizaj kërkon një mandat të ri me projektin “Ferizaj Digjital” që digjitalizon shërbimet komunale për qytetarët, me transparencë dhe efikasitet të shtuar.

Bekim Azizi në Viti vendos në prioritet ujin, arsimin dhe të rinjtë, duke deklaruar se do të tërhiqet nga politika nëse nuk i përmbush premtimet.

Ndërsa në Vushtrri, kryetari aktual Ferit Idrizi ka nisur fushatën me projekte konkrete si zgjerimi i rrugës “Dibran Imeri”, si dëshmi e angazhimit të vazhdueshëm ndaj kërkesave të qytetarëve.

Rregullim të dy ndërtesave kolektive në qendër të qytetit të Vushtrrisë ka premtuar, kandidatja për kryetare, Xhevahire Izmaku nga subjekti politik, Nisma Socialdemokrate.

Kandidatja tjetër grua për të parën e Prizrenit, Albulena Balaj Halimaj, u zotua se nën udhëheqjen e saj, komuna do të subvencionojë 20% të shumës totale për blerjen e banesës së parë, për çiftet dhe individët e moshës 35-39 vjeçe.

Lideri i Nismës, Fatmir Limaj, zgjodhi Ferizajn për të bërë hapjen solemne të fushtës zgjedhore ku u prezantua platforma politike si dhe kandidatët për Kuvendin Komunal në këtë komunë.

Kurse rihapjen e ambulancës në fshatin Dyz të Podujevës, premtoi pretendenti për postin e kryetarit, Xhemajl Hasani.

Kryetari aktual i Malishevës, Ekrem Kastrati, i cili kandidon edhe për një mandat të ri, gjatë takimeve të së shtunës vizitoi fabrikën e letrës “Orto Paper” në Mirushë.
Kastrati premtoi vazhdimin e mbështetjes përmes granteve dhe subvencioneve komunale.