Category: Sport

Ish-sulmuesi i Venezuelës, Alejandro Moreno, ka kritikuar ashpër vendimin e gjyqtarit për të mos e përjashtuar Lionel Messin në fitoren 3-0 të Argjentinës ndaj Algjerisë në ndeshjen hapëse të Kupës së Botës 2026.

Incidenti i diskutueshëm ndodhi në minutën e 31-të, kur Messi ndërhyri nga prapa ndaj mbrojtësit algjerian Aissa Mandi, duke e goditur në pulpë me taka.

Gjyqtari polak Szymon Marciniak akordoi faull, por nuk ndëshkoi kapitenin argjentinas as me karton të verdhë, ndërsa VAR-i nuk e ftoi për rishikim të aksionit. Vendimi shkaktoi debat të madh mes tifozëve dhe analistëve sportivë.

Moreno ishte i bindur se ndërhyrja meritonte karton të kuq.

“Ky është karton i kuq 100 për qind për Lionel Messin. Duhej të jepej, duhej të jepej”.

“Ka edhe diçka tjetër që ngre dyshime. Kjo përputhet me narrativën se lojtarët e jashtëzakonshëm marrin trajtim të veçantë. Kur Messi ishte pranë het-trikut dhe portieri e priti goditjen, kamerat treguan Gianni Infantinon duke buzëqeshur, sikur po thoshte: ‘Ah, ishte afër, ishte afër’”.

Moreno vazhdoi kritikat ndaj mosndërhyrjes së VAR-it.

“Nëse e sheh incidentin drejtpërdrejt, menjëherë duket si faull. Pastaj e shikon përsëritjen dhe po, është një ndërhyrje që duhet rishikuar. Pse nuk u thirr Szymon Marciniak te monitori? Duhej të ishte karton i kuq për Lionel Messin”.

“Pavarësisht sa shumë e vlerësoj Lionel Messin, ai ishte një kontakt i ashpër dhe i gabuar. Kur zbret mbi pjesën e pasme të pulpës së një lojtari, nga gjuri deri te kyçi i këmbës, duhet të përjashtohesh për këtë”, deklaroi Moreno.

Polemikat nuk e penguan Messin të shkëlqente në vazhdim të takimit. Sulmuesi argjentinas realizoi het-trik, duke i dhuruar Argjentinës fitoren 3-0 dhe duke barazuar rekordin e Miroslav Klose me 16 gola në historinë e Kupave të Botës.

Tifozët anglezë që do të ndjekin nga afër ndeshjen e parë të kombëtares së tyre ndaj Kroacisë në Kupën e Botës 2026 po përballen me rregulla të pazakonta në Dallas, ku disa prej flamujve tradicionalë të Anglisë mund të konfiskohen nga stafi i sigurisë së stadiumit.

Ndërsa qindra mbështetës janë parë të mbështjellë me flamujt e Shën Gjergjit në ambientet përreth stadiumit, autoritetet lokale kanë vendosur kufizime të rrepta për përdorimin e tyre brenda arenës.

Ndalohet vendosja e flamujve mbi tabelat reklamuese

Klubi Zyrtar i Tifozëve të Anglisë (England Supporters Club) është informuar nga drejtuesit e stadiumit se një praktikë e zakonshme në stadiumet evropiane, varja e flamujve mbi tabelat LED rreth fushës nuk do të lejohet në Dallas.

Vetëm disa pankarta zyrtare, të miratuara paraprakisht, do të mund të vendosen në zonat pas portave. Ndërkohë, tifozët që sjellin flamuj personalë rrezikojnë t’i humbasin ata nëse përpiqen t’i ekspozojnë në vende që bien ndesh me rregulloren e stadiumit.

Sipas organizatorëve, kufizimet janë vendosur për arsye sigurie dhe për të shmangur mbulimin e hapësirave reklamuese.

Stadiumi i Dallasit ka tërhequr kritika edhe më herët për mënyrën e zbatimit të rregullave ndaj tifozëve.

Në një ndeshje të mëparshme, mbështetës të Holandës dhe Japonisë panë flamujt e tyre të konfiskoheshin nga stafi i sigurisë, pavarësisht se të njëjtët flamuj ishin lejuar pa probleme në stadiume të tjera të Shteteve të Bashkuara.

Drejtori ekzekutiv i organizatës “Football Supporters Europe”, Ronan Evain, kritikoi mungesën e qartësisë në zbatimin e rregullave, duke theksuar se politikat duket se ndryshojnë nga një stadium në tjetrin.

Sipas tij, në disa arena tifozët mund të shfaqin flamujt pa asnjë problem, ndërsa në të tjera përballen me kufizime të papritura, gjë që krijon konfuzion për mbështetësit që udhëtojnë për të ndjekur turneun.

Çfarë thonë rregullat e FIFA-s?

Udhëzuesi zyrtar i FIFA-s për Kupën e Botës parashikon që flamujt e vegjël, banderolat dhe pankartat e prodhuara nga materiale rezistente ndaj zjarrit lejohen brenda stadiumeve. Për flamujt ose pankartat më të mëdha kërkohet miratim me shkrim paraprak.

Nga ana tjetër, FIFA vazhdon të ndalojë çdo simbol apo mesazh me karakter politik.

Së fundmi, organizata fitoi një proces gjyqësor në Los Anxhelos që ndalon tifozët iranianë të përdorin flamurin para-revolucionar të Iranit në stadiume, duke e konsideruar atë një simbol politik.

Kjo situatë ka ngritur pikëpyetje mbi mënyrën e zbatimit të rregullave në Botërorin 2026, veçanërisht për tifozët që presin të shprehin mbështetjen e tyre përmes flamujve kombëtarë.

Ruben Amorim është rikthyer në pankinë pas largimit nga Manchester United, duke u emëruar trajneri i ri i Milanit. Klubi italian ka vendosur t’ia besojë drejtimin e skuadrës teknikut portugez, me synimin për t’u rikthyer në garën për trofetë në sezonin e ardhshëm.

Milani, që e mbylli edicionin e kaluar në vendin e pestë në Serie A, sheh te Amorim njeriun e duhur për të udhëhequr projektin e ri sportiv dhe për të rikthyer skuadrën në majat e futbollit italian dhe evropian.

Pas zyrtarizimit, 40-vjeçari nuk e fshehu emocionin për sfidën që e pret në “San Siro”.

“Gjatë gjithë karrierës sime kam pasur objektiva të mëdha dhe drejtimi i Milanit ka qenë gjithmonë një prej tyre. Ky është një klub me histori të jashtëzakonshme, traditë fituese dhe tifozë të mrekullueshëm në të gjithë botën. Jam krenar që do të jem pjesë e kësaj familjeje”, deklaroi Amorim.

Portugezi ka ndërtuar reputacionin e tij në futbollin portugez, ku fillimisht drejtoi Casa Pian dhe Bragën, përpara se të shkëlqente te Sporting Lisbona. Sukseset me gjigantin portugez i hapën rrugën transferimit te Manchester United, por aventura e tij në “Old Trafford” nuk rezultoi ashtu siç pritej.

Pas 14 muajsh në krye të skuadrës angleze, Amorim u largua nga detyra në mes të sezonit, duke i dhënë fund një periudhe të vështirë në Premier League.

Tashmë ai përballet me një sfidë të re në Itali, ku do të ketë detyrën të rikthejë Milanin në nivelin që tifozët presin. Një nga momentet më interesante të verës do të jetë pikërisht përballja mes Milanit dhe Manchester United në një ndeshje miqësore parasezonale më 15 gusht në Poloni, ku Amorim do të ketë mundësinë të përballet me ish-klubin e tij vetëm pak muaj pas largimit.

Presidenti i UEFA-s, Aleksandër Çeferin, ka ndezur debat me komentet e tij për Kupën e Botës 2026, duke vënë në pikëpyetje zgjerimin e turneut nga 32 në 48 kombëtare.

Në një intervistë për mediat sllovene, kreu i futbollit evropian u shpreh se formati i ri ka sjellë më shumë ndeshje, por jo domosdoshmërisht më shumë interes për tifozët.

“Sot ka shumë ndeshje që nuk zgjojnë interesin që kishte Botërori më parë”, deklaroi Çeferin, duke lënë të kuptohet se rritja e numrit të skuadrave ka ndikuar në cilësinë dhe atraktivitetin e garës.

Megjithatë, ai pranoi se zgjerimi i turneut ka edhe anën e tij pozitive, pasi u ka dhënë mundësi më shumë vendeve të vogla të përjetojnë emocionet e pjesëmarrjes në ngjarjen më të madhe të futbollit botëror.

Komentet e tij nuk kaluan pa reagime. Plot 13 federata nga Afrika, Azia dhe Amerika e Veriut e Karaibet dolën me një deklaratë të përbashkët, duke shprehur pakënaqësi ndaj qëndrimit të presidentit të UEFA-s.

Federatat e Kepit të Gjelbër, Curacaos, Uzbekistanit, Republikës Demokratike të Kongos, Haitit, Algjerisë, Tunizisë, Marokut, Egjiptit, Ganës, Senegalit, Bregut të Fildishtë dhe Afrikës së Jugut e kundërshtuan publikisht deklaratën e Çeferinit, duke theksuar se zgjerimi i Kupës së Botës ka krijuar mundësi të reja për zhvillimin e futbollit në vende që më parë e kishin shumë të vështirë të siguronin kualifikimin.

Në reagimin e tyre, federatat shprehën “keqardhje dhe zhgënjim” për komentet e presidentit të UEFA-s, duke insistuar se një Botëror më gjithëpërfshirës i shërben rritjes së futbollit në nivel global.

Kupa e Botës ka kaluar nëpër disa faza zgjerimi gjatë historisë së saj. Turneu u rrit nga 16 në 24 skuadra në vitin 1982, më pas në 32 ekipe në vitin 1998 dhe tani, për herë të parë, po zhvillohet me 48 kombëtare pjesëmarrëse.

Ndërsa vendet jashtë Evropës kanë përfituar shumicën e vendeve shtesë në formatin e ri, shumë federata e konsiderojnë këtë një hap të rëndësishëm drejt një përfaqësimi më të drejtë të futbollit botëror.

Kombëtarja e Brazilit nuk arriti të bindë në debutimin e saj në Kupën e Botës 2026, duke u ndalur në një barazim 1-1 ndaj Marokut. Rezultati ka shkaktuar pakënaqësi në kampin brazilian, ndërsa pritshmëritë për një nga favoritët kryesorë të turneut mbeten shumë të larta.

Sipas mediave braziliane, trajneri Carlo Ancelotti nuk e ka pritur mirë paraqitjen e skuadrës së tij dhe ka reaguar menjëherë pas ndeshjes. Mëngjesin e ditës pas barazimit, tekniku italian zhvilloi një takim të veçantë me futbollistët para seancës stërvitore.

Burime pranë ekipit bëjnë të ditur se Ancelotti i mblodhi lojtarët dhe për disa minuta qëndroi në heshtje, duke i vështruar një nga një. Atmosfera në kamp ishte e tensionuar dhe futbollistët e kuptuan shpejt se trajneri nuk ishte aspak i kënaqur me atë që kishte parë në fushë.

Pas atyre çasteve të heshtura, italiani thuhet se u ka drejtuar një mesazh të prerë lojtarëve të tij, duke kritikuar veçanërisht pasimet dhe qarkullimin e topit gjatë ndeshjes.

“Tani mësoni si ta pasoni topin e mallkuar!”, raportohet t’u ketë thënë Ancelotti futbollistëve brazilianë.

Deklarata e tij thuhet se ka lënë mbresa te skuadra, ndërsa stafi teknik pret një reagim të menjëhershëm në ndeshjet e ardhshme. Brazili mbetet një nga pretendentët kryesorë për trofeun, por paraqitja ndaj Marokut tregoi se “Seleçao” ka ende shumë punë për të bërë nëse dëshiron të arrijë deri në fund të turneut.

Tashmë të gjitha sytë janë te reagimi i brazilianëve në sfidën e radhës, ku çdo hap fals mund të shtojë edhe më shumë presionin mbi Ancelottin dhe lojtarët e tij.

Kampionia e Kosovës, Drita, tashmë e di rrugën e saj të parë drejt ëndrrës evropiane. Skuadra nga Gjilani do të përballet me Kauno Zalgiris në raundin e parë kualifikues të Ligës së Kampionëve për sezonin 2026/27.

Shorti u hodh të martën në selinë e UEFA-s në Nyon të Zvicrës, ku Drita ishte pjesë e grupit të ekipeve bartëse. Ky status i mundësoi klubit kosovar të shmangte disa kundërshtarë më të vështirë në fazën e parë të eliminatoreve.

Megjithatë, përballë Dritës do të jetë një skuadër me përvojë në garat evropiane. Kauno Zalgiris, kampioni i Lituanisë, kërkon po ashtu të kalojë më tej dhe do të tentojë ta shfrytëzojë avantazhin e ndeshjes së parë në shtëpi.

Sfida e parë mes dy skuadrave do të zhvillohet më 7 ose 8 korrik në Lituani, ku Drita do të udhëtojë si mysafire. Ndërsa vendimi për kualifikimin do të merret në Kosovë, një javë më vonë, më 14 ose 15 korrik, në ndeshjen e kthimit.

Drita synon të bëjë një paraqitje sa më të mirë në Evropë dhe të vazhdojë rrugëtimin drejt fazave të mëtejshme të Ligës së Kampionëve, ku çdo hap i kaluar do të ishte një sukses i madh për klubin gjilanas.

Ndërkohë, edhe skuadra tjetër shqiptare, Egnatia, ka mësuar kundërshtarin e saj në këtë fazë të garës. Kampionët e Shqipërisë do të përballen me Petrocubin, kampionin e Moldavisë.

Presidenti i FIFA-s, Gianni Infantino, ka vizituar dhomat e zhveshjes së Kombëtares së Iranit pas ndeshjes së parë të Kupës së Botës 2026, ku iranianët barazuan 2-2 me Zelandën e Re.

Kreu i futbollit botëror u takua me lojtarët dhe stafin teknik të Iranit, duke u dhënë mbështetje dhe duke vlerësuar paraqitjen e tyre në fushë. Infantino theksoi se skuadra tregoi karakter dhe se mesazhi i saj ka shkuar përtej rezultatit sportiv.

“E di që kjo ndeshje ishte e vështirë. Me pak më shumë fat mund të kishit marrë edhe fitoren, por ajo që treguat ishte pozitive. Po luani futboll të mirë dhe keni ende dy ndeshje përpara për të treguar edhe më shumë”, u shpreh Infantino.

Ai gjithashtu foli për situatën e vështirë me të cilën është përballur skuadra iraniane dhe vlerësoi forcën e saj për të vazhduar garën.

“E kuptoj se çfarë po kaloni, por ju jeni më të fortë se çdo sfidë. Ajo që po bëni po dërgon një mesazh të rëndësishëm për të gjithë botën. Sot e bashkuat stadiumin rreth jush”, tha presidenti i FIFA-s.

Infantino i falënderoi lojtarët iranianë për paraqitjen dhe për mënyrën se si e përfaqësuan vendin e tyre në skenën botërore.

Vizita e tij erdhi menjëherë pas përfundimit të sfidës, ku Irani arriti të marrë një pikë të vlefshme ndaj Zelandës së Re. Ky rezultat e mban skuadrën ende në garë për një vend në fazën eliminatore, me dy ndeshje të tjera për t’u luajtur në grup.

Irani tani synon të shfrytëzojë maksimalisht ndeshjet e ardhshme për të siguruar kualifikimin në raundin tjetër të Kupës së Botës.

Lionel Messi vazhdon të shkruajë histori në skenën më të madhe të futbollit. Kapiteni i Argjentinës është vetëm një asist larg vendosjes së një rekordi të ri në historinë e Kupës së Botës.

Ylli argjentinas aktualisht ndan vendin e parë për numrin më të madh të asistimeve në historinë e Botërorit me legjendën Diego Maradona. Të dy kanë nga 8 asistime në këtë kompeticion, por një pasim final i Messit në një ndeshje të radhës do ta vendoste atë të vetëm në krye të listës.

Përveç golave dhe trofeve, Messi ka qenë gjithmonë i njohur edhe për aftësinë e tij për të krijuar raste për bashkëlojtarët. Në disa edicione të Kupës së Botës, ai ka luajtur një rol vendimtar jo vetëm si realizues, por edhe si organizator i lojës së Argjentinës.

Në Botërorin e Katarit, ku udhëhoqi Argjentinën drejt titullit të tretë botëror, Messi ishte një nga protagonistët kryesorë të turneut, duke shënuar gola, duke dhënë asistime dhe duke drejtuar ekipin në momentet më të rëndësishme.

Tani, në atë që pritet të jetë pjesëmarrja e tij e fundit në një Kampionat Botëror, Messi ka mundësinë të thyejë edhe një tjetër rekord të madh dhe të lërë pas një prej figurave më të mëdha të futbollit argjentinas, Diego Maradonën.

Nëse arrin asistimin e nëntë në një ndeshje të Botërorit, “pleshti” do të bëhet lojtari me më së shumti asistime në historinë e këtij kompeticioni, duke shtuar edhe një kapitull tjetër në një karrierë tashmë legjendare.

Lewis Hamilton më në fund ka shijuar triumfin e parë me Ferrarin, duke triumfuar në garën e zhvilluar në Barcelonë dhe duke i dhënë fund pritjes së gjatë që prej transferimit të tij te skuadra italiane.

Suksesi i shtatë herë kampionit të botës ka marrë vlerësime edhe nga ish-shefi i tij te Mercedes, Toto Wolff, i cili nuk e fshehu kënaqësinë për fitoren e britanikut.

“E kam thënë gjithmonë se kur ne nuk fitojmë, dua që të fitojë Lewis. Jam shumë i lumtur për të dhe për Ferrarin”, deklaroi Wolff.

Drejtuesi i Mercedesit beson se triumfi në Barcelonë është një sinjal i fortë për rivalët dhe e konsideron Hamiltonin si një nga pretendentët kryesorë për titullin e kampionit këtë sezon.

“Pa asnjë dyshim, ai është në mesin e favoritëve. Lewis ka shpejtësi, përvojë dhe një forcë mendore të jashtëzakonshme. Kam punuar me të për 12 vite dhe e di shumë mirë se çfarë është në gjendje të bëjë”, shtoi austriaku.

Megjithatë, Wolff nuk kishte të njëjtin humor kur foli për paraqitjen e Mercedesit. Ai shprehu zhgënjimin e tij pas problemeve që i kushtuan skuadrës pikë të rëndësishme, veçanërisht pas tërheqjes së Andrea Kimi Antonellit nga gara.

“Humbja e pikëve në këtë mënyrë është e papranueshme. George Russell humbi 25 pikë në Montreal, ndërsa Antonelli 18 pikë sot. Nëse dëshiron të luftosh për titullin, duhet të përfundosh garat. Shpejtësia e vetme nuk mjafton”, theksoi ai.

Wolff kritikoi gjithashtu mënyrën se si u menaxhuan disa situata gjatë garës, duke pranuar se skuadra bëri gabime që ndikuan drejtpërdrejt në rezultat.

“Jam shumë i zhgënjyer me mënyrën si i menaxhuam gjërat. Në fund humbëm dy herë gjatë kësaj gare. Ne nuk përdorim urdhra ekipi, por duhet të gjejmë zgjidhje më të mira për situata të tilla në të ardhmen”, përfundoi shefi i Mercedesit.

Fitorja në Barcelonë mund të jetë një pikë kthese për Hamiltonin dhe Ferrarin, të cilët tani duken më të gatshëm se kurrë për t’u përfshirë seriozisht në betejën për titullin botëror.

E ardhmja e Marcus Rashford ka marrë një kthesë të re. Sulmuesi anglez është rikthyer zyrtarisht te Manchester United pasi Barcelona vendosi të mos aktivizojë klauzolën e blerjes prej 30 milionë eurosh që kishte në marrëveshjen e huazimit.

Sipas gazetarit të njohur Fabrizio Romano, afati për aktivizimin e opsionit ka skaduar dhe Rashford do të jetë sërish pjesë e skuadrës së United, të paktën për momentin.

Barcelona vazhdon ta vlerësojë lart 28-vjeçarin dhe nuk e ka përjashtuar mundësinë e një bashkëpunimi të ri, por drejtuesit katalanas nuk janë të gatshëm të investojnë 30 milionë euro për transferimin e tij të përhershëm. Opsioni i preferuar i klubit mbetet një huazim i ri për sezonin e ardhshëm.

Kjo situatë e vendos Manchester United përpara një vendimi të rëndësishëm. Klubi nga “Old Trafford” duhet të përcaktojë nëse Rashford do të jetë pjesë e projektit për sezonin e ri, do të shitet përfundimisht ose do të huazohet sërish.

Rikthimi i sulmuesit anglez vjen në një moment kur United po planifikon ndryshime të rëndësishme në repartin ofensiv, ndërsa e ardhmja e disa lojtarëve mbetet ende e paqartë.

Rashford është produkt i akademisë së Manchester United dhe për shumë vite ka qenë një nga figurat kryesore të skuadrës. Megjithatë, forma e luhatshme në sezonet e fundit ka bërë që pozita e tij në klub të vihet në diskutim.

Tani mbetet të shihet nëse ai do të ketë një tjetër mundësi për të dëshmuar vlerat e tij në “Old Trafford”, apo nëse rikthimi i tij do të jetë vetëm i përkohshëm përpara një aventure të re në një klub tjetër.