Category: Sport

Pas ditëve të vështira dhe kritikave të shumta nga mediat zvicerane, Granit Xhaka dha përgjigjen më të mirë në fushë. Kapiteni i Zvicrës ishte ndër lojtarët më të dalluar në fitoren 4:1 ndaj Bosnjë-Hercegovinës, duke treguar lidership dhe formë të lartë në mesfushë.

Vëmendja e opinionit ishte përqendruar te Xhaka pas deklaratave të tij kritike për paraqitjet e Zvicrës në barazimet 1:1 ndaj Australisë dhe Katarit. Më pas, mediat zvicerane raportuan për pakënaqësi të disa lojtarëve me komentet e kapitenit dhe për një atmosferë jo të mirë brenda ekipit.

Pas ndeshjes me Bosnjën, Xhaka pranoi se raportimet mediatike e kishin prekur.

“Sigurisht që nuk është gjithmonë e lehtë. Do të gënjeja nëse do të thosha se gjithçka hyn nga njëri vesh dhe del nga tjetri. Disa gjëra të shkruara më kanë lënduar, sidomos ditët e fundit”, deklaroi ai.

Mesfushori theksoi se gjithmonë e kritikon fillimisht veten para se të flasë për të tjerët dhe se shpesh deklaratat e tij keqkuptohen. Ai shtoi se mund të ndikojë vetëm në atë që ndodh në fushë, ndërsa mënyra se si mediat e trajtojnë kombëtaren nuk është në dorën e tij.

Xhaka, i cili ka zhvilluar 148 ndeshje me fanellën e Zvicrës, u shpreh se mbështetja e bashkëlojtarëve është gjëja më e rëndësishme për të.

Paraqitja e tij ndaj Bosnjë-Hercegovinës ishte përgjigjja më e mirë ndaj kritikëve. Pas golit të shënuar, ai bëri një gjest që u interpretua si mesazh për ata që e kishin kritikuar në ditët e fundit.

SC Gjilani ka bërë të ditur lëvizjet e para në kuadër të përgatitjeve për sezonin e ri, duke konfirmuar largimin e tre futbollistëve nga ekipi i parë.

Klubi kuqebardhë ka njoftuar se bashkëpunimi me Leonit Abazin, Astrit Thaqin dhe Agron Kolajn ka përfunduar, duke i dhënë fund rrugëtimit të tyre me skuadrën nga Anamorava.

Përmes një komunikate zyrtare, drejtuesit e Gjilanit kanë falënderuar tre lojtarët për kontributin, përkushtimin dhe profesionalizmin e treguar gjatë periudhës sa ishin pjesë e klubit.

Një falënderim i veçantë është adresuar edhe për FC Prishtinën në rastin e Agron Kolajt, me Gjilanin që vlerësoi bashkëpunimin korrekt dhe sportiv mes dy klubeve.

Largimi i Abazit, Thaqit dhe Kolajt vjen në kuadër të riorganizimit të skuadrës për edicionin e ardhshëm, ndërsa klubi pritet të vazhdojë me lëvizje të tjera në merkato gjatë javëve në vijim.

Në fund, Gjilani u ka uruar tre futbollistëve suksese të mëtejshme në karrierë, si dhe shëndet e mbarësi në sfidat e tyre të ardhshme sportive.

Raundi i parë i Kupës së Botës 2026 dhuroi gjithçka që tifozët e futbollit dëshironin të shihnin: gola spektakolarë, ritëm të lartë, surpriza dhe paraqitje individuale që morën vëmendjen e mbarë botës.

Pas përfundimit të ndeshjeve të para në fazën e grupeve, vlerësimet e Sofascore kanë nxjerrë në pah 11 futbollistët që spikatën më shumë, duke formuar ekipin ideal të javës në skemën klasike 4-3-3. Në krye të listës qëndron, si shumë herë më parë, Lionel Messi.

Kapiteni i Argjentinës dha një tjetër shfaqje magjike në skenën më të madhe të futbollit. Me tre gola në fitoren bindëse 3-0 ndaj Algjerisë, Messi ishte lojtari më i dalluar i raundit të parë, duke u vlerësuar me notën perfekte 10.

Paraqitja e tij jo vetëm që i siguroi Argjentinës tri pikët, por e konfirmoi edhe një herë statusin e tij si një nga figurat më vendimtare të këtij Botërori.

Në repartin ofensiv, Messit i bashkohen dy futbollistë që ishin vendimtarë për skuadrat e tyre.

Folarin Balogun udhëhoqi SHBA-në drejt një fitoreje të rëndësishme 4-1 ndaj Paraguait, duke realizuar dy gola dhe duke qenë vazhdimisht kërcënim për mbrojtjen kundërshtare.

Po aq i rëndësishëm ishte edhe Elijah Just, i cili shpëtoi Zelandën e Re me dy golat e tij në barazimin 2-2 kundër Iranit. Përveç kontributit në sulm, ai u dallua edhe për angazhimin në fazën mbrojtëse, duke kompletuar një paraqitje të nivelit të lartë.

Në qendër të fushës vendin e liderit e zë Pedri. Ylli spanjoll dominoi ndeshjen ndaj Kepit të Gjelbër, duke kontrolluar ritmin e lojës me saktësi të jashtëzakonshme në pasime dhe duke krijuar vazhdimisht raste për bashkëlojtarët.

Përkrah tij qëndron Hwang In-beom, i cili ishte arkitekti i fitores së Koresë së Jugut ndaj Çekisë. Një gol dhe një asistim e bënë mesfushorin korean një nga figurat më të rëndësishme të javës.

Trioja plotësohet nga Yasin Ayari, i cili shkëlqeu në triumfin e thellë të Suedisë ndaj Tunizisë. Dy golat e tij dhe paraqitja energjike në të gjitha zonat e fushës i siguruan një vend të merituar në ekipin ideal.

Edhe pse vëmendja zakonisht përqendrohet te golashënuesit, disa futbollistë në repartin defensiv zhvilluan paraqitje të shkëlqyera.

Richie Laryea ishte ndër më të spikaturit në krahun e djathtë, duke dominuar duelet dhe duke kontribuar në të dyja fazat e lojës në barazimin e Kanadasë ndaj Bosnje-Hercegovinës.

Në qendër të mbrojtjes, Schlotterbeck dhe Diney ofruan siguri dhe qetësi për skuadrat e tyre, ndërsa Rezaeian kompleton katërshen mbrojtëse falë paraqitjes së tij solide.

Heroi mes shtyllave ishte pa diskutim Vozinha. Portieri i Kepit të Gjelbër realizoi një nga performancat më mbresëlënëse të këtij Botërori në barazimin pa gola ndaj Spanjës.

Me shtatë pritje vendimtare, disa prej tyre në situata të pastra shënimi, ai arriti të neutralizojë një nga repartet më të forta sulmuese të turneut dhe të mbajë portën e paprekur.

Paraqitja e tij u kthye menjëherë në një nga temat më të diskutuara të raundit të parë, duke i siguruar një vend të merituar në formacionin ideal.

Formacioni i javës (4-3-3)

Vozinha; Laryea, Schlotterbeck, Diney, Rezaeian; Ayari, Hwang In-beom, Pedri; Elijah Just, Folarin Balogun, Lionel Messi.

Pas një starti plot emocione, ky formacion përfaqëson më së miri futbollistët që lanë gjurmën më të madhe në javën e parë të Kupës së Botës 2026.

Paraqitja mbresëlënëse e Ferrarit në Çmimin e Madh të Barcelonës ka ndryshuar ndjeshëm balancat në Formula 1, duke e shndërruar skuadrën italiane në një pretendente serioze për të dy titujt e kampionatit këtë sezon.

Një vlerësim i tillë vjen edhe nga kampioni i botës, Lando Norris, i cili beson se “kokëkuqja” ka bërë një hap të madh përpara dhe se rivalët duhet të jenë të kujdesshëm ndaj potencialit të saj.

Sezoni nuk ka nisur sipas pritshmërive për pilotin britanik dhe McLarenin. Deri më tani, Norris ka arritur të fitojë vetëm një garë sprint, ndërsa skuadra kampione e botës nuk ka treguar dominimin që shumëkush priste. Në të njëjtën kohë, rikthimi i Ferrarit në majën e konkurrencës ka shtuar presionin mbi rivalët.

Duke analizuar forcën aktuale të skuadrës italiane, Norris nuk i kurseu vlerësimet.

“Jemi me fat që Ferrari nuk ka një motor më të fuqishëm në këtë moment”, deklaroi britaniku.

Sipas tij, përmirësimet e shfaqura në Barcelonë janë vetëm një paralajmërim për atë që mund të vijë në vazhdim të sezonit.

“Ata treguan potencialin e tyre në Barcelonë. Nëse do të kishin një motor më konkurrues, do të dominonin garat. Për momentin, Ferrari është skuadra më e fortë në kthesa dhe askush nuk është afër nivelit të tyre në atë aspekt”, u shpreh Norris.

Piloti i McLarenit paralajmëroi se ardhja e përditësimeve të reja teknike mund ta bëjë Ferrarin edhe më të frikshëm në pistë.

“Kur të sjellin zhvillimet e reja në motor, mund t’i lënë të gjithë pas. Shpejtësia e tyre mund të bëhet e pakapshme për rivalët. Ne duhet të punojmë shumë më tepër nëse duam të mbetemi në garë për titullin”, përfundoi kampioni i botës.

Deklaratat e Norrisit tregojnë qartë respektin që po fiton Ferrari në paddock, ndërsa sezoni i Formula 1 po hyn në një fazë ku beteja për titull pritet të bëhet më e ashpër se kurrë.

Futbolli i femrave në Kosovë ka arritur një tjetër moment historik. Për herë të parë që nga pranimi në arenën ndërkombëtare, Kombëtarja e Kosovës në konkurrencën e femrave do të garojë në fazën play-off të kualifikimeve për Kupën e Botës 2027.

Në selinë e UEFA-s u hodh shorti që përcaktoi rrugën e Dardaneve drejt ëndrrës botërore. Fati deshi që Kosova të përballet me Austrinë në gjysmëfinalen e play-offit, në një duel që premton emocione dhe sfidë të madhe për vajzat kosovare.

Ndeshja e parë do të zhvillohet më 9 tetor në stadiumin “Fadil Vokrri” në Prishtinë, ku Dardanet do të kërkojnë të hedhin hapin e parë drejt kualifikimit, ndërsa takimi vendimtar i kthimit do të luhet katër ditë më vonë, më 13 tetor, në Austri.

Federata e Futbollit e Kosovës në ceremoninë e shortit u përfaqësua nga shefja e futbollit të femrave, Valbona Gashi Uka, dhe përzgjedhësja e Kombëtares, Xhuli Berisha.

Nëse arrijnë të eliminojnë Austrinë, Dardanet do të jenë vetëm një hap larg historisë. Në finalen e play-offit ato do të përballeshin me fituesin e çiftit Izrael – Zvicër, me ndeshjet vendimtare që janë planifikuar për datat 1 dhe 5 dhjetor.

Arritja në këtë fazë përfaqëson kulmin e një cikli të suksesshëm për Kosovën. Kombëtarja siguroi vendin në play-off pasi dominoi grupin e saj në Ligën C të kualifikimeve, duke e mbyllur fushatën në pozitën e parë.

Suksesi nuk përfundon këtu. Përveç kualifikimit historik në play-off, Kosova ka siguruar edhe promovimin në Ligën B për ciklin e ardhshëm, një dëshmi e progresit të vazhdueshëm dhe e rritjes së futbollit të femrave në vend.

Tashmë sytë janë drejt tetorit, kur Dardanet do të kenë mundësinë të vazhdojnë të shkruajnë kapituj të rinj në historinë e sportit kosovar dhe të afrohen më shumë se kurrë me skenën më të madhe të futbollit botëror.

Fenerbahçe ka nisur menjëherë punën për ndërtimin e skuadrës së re pas emërimit të trajnerit Ismail Kartal, duke zyrtarizuar edhe afrimin e parë të merkatos verore.

Gjiganti turk ka arritur marrëveshje me sulmuesin e Kosovës, Vedat Muriqi, i cili pritet të rikthehet në Stamboll për të veshur sërish fanellën verdheblu.

Përmes një njoftimi zyrtar, klubi bëri të ditur se palët kanë arritur një marrëveshje parimore dhe se futbollisti do të mbërrijë në Turqi gjatë mbrëmjes për të kryer kontrollet mjekësore dhe për të përfunduar detajet e fundit të transferimit.

“Klubi ynë ka arritur marrëveshje parimore me Vedat Muriqin. Lojtari do të vijë në Stamboll për ekzaminimet mjekësore dhe finalizimin e procedurave të transferimit”, thuhet në komunikatën e Fenerbahçes.

Sipas klubit, avioni që transporton reprezentuesin kosovar do të aterojë në Terminalin Ndërkombëtar të Aeroportit Sabiha Gökçen në orët e mbrëmjes, ku pritet të pritet nga një numër i madh tifozësh.

Për Muriqin bëhet fjalë për një rikthim të veçantë në klubin ku kishte lënë gjurmë të rëndësishme. Gjatë aventurës së tij të parë me Fenerbahçen, sulmuesi shtatlartë zhvilloi 36 ndeshje, duke realizuar 17 gola dhe duke kontribuar me shtatë asistime, para se të transferohej në futbollin evropian.

Tashmë, pas disa vitesh eksperiencë në arenën ndërkombëtare, “Pirati” rikthehet në Kadıköy me synimin për të udhëhequr sërish repartin ofensiv të Fenerbahçes dhe për të ndihmuar skuadrën në garën për trofetë në sezonin e ri.

Real Madridi ka njoftuar zyrtarizisht transferimin e mbrojtësit francez, Ibrahima Konate, i cili vjen si lojtar i lirë pas skadimit të kontratës me Liverpoolin.

Klubi mbretëror ka zyrtarizuar tashmë edhe transferimin e tretë në këtë afat kalimtar, përveç trajnerit Jose Mourinho.

I fundit që i është bashkuar Los Blancos është qendërmbrojtësi francez, Konate, i cili ka nënshkruar një kontratë katërvjeçare.

“Real Madrid CF dhe Ibrahima Konate kanë arritur një marrëveshje që ai të bëhet lojtar i Real Madridit për katër sezonet e ardhshme, deri më 30 qershor 2030”.

👋 ¡Bienvenido, @IbrahimaKonate_! 👋 pic.twitter.com/Zv4jT0wxB5

— Real Madrid C.F. (@realmadrid) June 18, 2026

Para mbrojtësit francez, Real Madridi ka zyrtarizuar edhe transferimin e Marc Cucurellas dhe Bernardo Silvas.

Në listën e zyrtarizimeve të afërta është edhe ylli i Interit, Denzel Dumfries, teksa ka përparuar edhe në negociatat për transferimin e Enzo Fernandez nga Chelsea.

Një moment prekës që përfshin babain e Luis Diaz është bërë viral gjatë Kupës së Botës 2026.

Pak para ndeshjes së Kolumbisë, në rrjetet sociale u shpërnda një video ku babai i sulmuesit shihet i gjunjëzuar pranë një shtrati në dhomën e hotelit, duke u lutur përballë disa fanellave të kombëtares kolumbiane, mes tyre edhe asaj me emrin e të birit.

Pamjet emocionuese kanë prekur mijëra tifozë, të cilët kanë vlerësuar besimin dhe mbështetjen e palëkundur të familjes ndaj yllit të Bayern Munichut.

Luis Diaz’s father Mane today. 🙏🏼🇨🇴 pic.twitter.com/LWI3fx672x

— Fabrizio Romano (@FabrizioRomano) June 18, 2026

Videoja u publikua menjëherë pas paraqitjes së shkëlqyer të Luis Diaz në fitoren 3-1 të Kolumbisë ndaj Uzbekistanit në stadiumin “Azteca”.

Sulmuesi kolumbian realizoi golin e dytë të ekipit të tij dhe dhuroi asistimin për golin e parë të shënuar nga Daniel Munoz, duke qenë një nga protagonistët kryesorë në nisjen pozitive të “Los Cafeteros” në turne.

Falë performancës së tij, Diaz u shpall lojtari më i mirë i ndeshjes, duke fituar çmimin MVP në debutimin e tij në Kupën e Botës.

Pamjet e babait të tij vetëm sa e bënë edhe më të veçantë një ditë tashmë të paharrueshme për Luis Diaz dhe familjen e tij.

Federata e Futbollit e Kosovës ka pranuar një donacion të vlefshëm nga Forca e Sigurisë së Kosovës, në kuadër të Memorandumit të Bashkëpunimit të nënshkruar ndërmjet Ministrisë së Mbrojtjes dhe FFK-së. Ky bashkëpunim, i formalizuar nga presidenti i FFK-së, Agim Ademi, dhe ministri i Mbrojtjes, Ejup Maqedonci, po sjell rezultate konkrete për zhvillimin e futbollit në vend.

Donacioni përfshin 50 kontejnerë, të cilët do të shfrytëzohen për përmirësimin e infrastrukturës sportive dhe krijimin e kushteve më të mira për klubet dhe futbollistët në të gjithë Kosovën.

Transporti i kontejnerëve është realizuar me mbështetjen logjistike të KFOR-it, i cili ka mundësuar dërgimin e tyre në lokacionet e përcaktuara nga Federata e Futbollit e Kosovës.

Sipas planit të FFK-së, një pjesë e kontejnerëve do të vendosen në Kampin Nacional në Bërnicë, ndërsa pjesa tjetër do të shpërndahet në stadiume të ndryshme që aktualisht nuk kanë hapësira adekuate për zhveshtore. Ky investim pritet të ndikojë drejtpërdrejt në përmirësimin e kushteve të punës dhe zhvillimit për klubet, futbollistët dhe aktivitetet sportive në përgjithësi.

Ky projekt konsiderohet një shembull i suksesshëm i bashkëpunimit ndërinstitucional në funksion të sportit dhe rinisë, duke dëshmuar përkushtimin e institucioneve për avancimin e infrastrukturës sportive në Kosovë.

Me këtë rast, presidenti i FFK-së, Agim Ademi, ka shprehur mirënjohjen e tij ndaj Ministrisë së Mbrojtjes dhe Forcës së Sigurisë së Kosovës për mbështetjen e vazhdueshme, si dhe ndaj KFOR-it për ndihmën e ofruar në transportimin e kontejnerëve. Ai theksoi se bashkëpunimi i institucioneve vendore dhe ndërkombëtare mbetet thelbësor për realizimin e projekteve që ndikojnë drejtpërdrejt në zhvillimin e futbollit dhe krijimin e mundësive më të mira për gjeneratat e reja.

Ndërkohë, FFK-ja synon të thellojë më tej bashkëpunimin me FSK-në edhe në të ardhmen. Përveç projekteve infrastrukturore, po shqyrtohen iniciativa të reja që do të mundësonin organizimin e garave dhe aktiviteteve të përbashkëta sportive. Duke qenë se FSK-ja ka qenë vazhdimisht pjesë e turneve dhe manifestimeve të organizuara nga FFK-ja, synimi është krijimi i një formati të ri gjithëpërfshirës që do të forcojë edhe më shumë lidhjen mes futbollit dhe institucioneve të sigurisë në Kosovë.

E ardhmja e Raphinhas te Barcelona po vihet sërish në pikëpyetje. Sulmuesi brazilian është bërë objekt i një oferte gjigante nga Arabia Saudite, e cila sipas raportimeve mund të arrijë deri në 100 milionë euro, duke e vendosur klubin katalunas përballë një prej vendimeve më të rëndësishme të kësaj vere.

Megjithëse Barcelona e konsideron brazilianin një pjesë kyçe të projektit të trajnerit Hansi Flick, shuma e ofruar nga klubet saudite është e vështirë të injorohet. Në një periudhë kur gjiganti katalunas vazhdon të monitorojë me kujdes financat e tij, një transferim i tillë do të sillte përfitime të konsiderueshme ekonomike.

Raphinha nuk ka ndërmend të nxitojë me vendimin e tij. Aktualisht i angazhuar me Kombëtaren e Brazilit në Kupën e Botës, 29-vjeçari dëshiron të përqendrohet plotësisht te turneu, duke shtyrë çdo diskutim për të ardhmen deri pas përfundimit të aventurës së Seleçaos.

Që nga ardhja e Hansi Flick në stolin e Barcelonës, Raphinha ka fituar një rol edhe më të rëndësishëm në skuadër. Intensiteti, sakrifica në fazën mbrojtëse, presioni ndaj kundërshtarëve dhe aftësia për të bërë diferencën në ndeshjet e mëdha e kanë shndërruar atë në një nga lojtarët më të vlefshëm të ekipit.

Megjithatë, oferta saudite ndryshon tërësisht situatën. Përveç shumës së transferimit, raportohet se brazilianit i është ofruar një pagë marramendëse prej rreth 48 milionë eurosh në sezon, një shifër që do ta vendoste mes futbollistëve më të paguar në botë.

Barcelona ndodhet në një pozicion të favorshëm negociues, pasi Raphinha rinovoi kontratën deri në vitin 2028. Kjo i jep klubit mundësinë të kërkojë maksimumin nga çdo klub i interesuar dhe të mos pranojë oferta nën vlerësimin e tij.

Megjithatë, drejtuesit katalunas janë të vetëdijshëm se mosha e lojtarit mund ta bëjë këtë verën ideale për të siguruar fitimin më të madh të mundshëm nga shitja e tij. Në kushte normale, largimi i Raphinhas do të dukej pothuajse i pamundur, por fuqia financiare e futbollit saudit po ndryshon rregullat e tregut.

Sipas raportimeve të fundit, klubet saudite Al Hilal dhe Al Nassr kanë monitoruar prej kohësh situatën e brazilianit. Më herët janë përmendur oferta që varionin nga 80 deri në 90 milionë euro, por tani shifra prej 100 milionë eurosh mund të jetë ajo që do të ndryshojë gjithçka.

Për momentin, fokusi i Raphinhas mbetet te Brazili dhe Kupa e Botës. Megjithatë, sapo të përfundojë turneu, pritet që bisedimet të intensifikohen dhe e ardhmja e tij të marrë një drejtim përfundimtar.

Mbetet të shihet nëse Barcelona do të rezistojë ndaj tundimit financiar apo nëse një nga yjet e saj do të nisë një kapitull të ri në Arabinë Saudite.