Category: SPORT

Jannik Sinner po konfirmon statusin e favoritit kryesor në Wimbledon. Tenisti italian, që mban vendin e parë në renditjen botërore, ka siguruar një vend në gjysmëfinale pas një paraqitjeje solide ndaj gjermanit Jan-Lennard Struff, të cilin e mposhti me rezultat të pastër 3-0 në sete (7-5, 7-6, 6-3).

Edhe pse Struff i bëri rezistencë të fortë në dy setet e para, Sinner tregoi qetësi në momentet vendimtare, duke fituar fillimisht 7-5 dhe më pas setin e dytë pas një “tie-break”-u të luftuar. Në setin e tretë, italiani dominoi lojën dhe e mbylli ndeshjen me rezultatin 6-3, duke siguruar kualifikimin mes katër tenistëve më të mirë të turneut.

Me këtë fitore, 24-vjeçari vazhdon ëndrrën për ta fituar për herë të parë trofeun e Wimbledonit, pasi deri më tani ka zhvilluar një turne pothuajse perfekt dhe mbetet një nga pretendentët kryesorë për titull.

Në konkurrencën e femrave janë mësuar gjithashtu gjysmëfinalistet e para. Amerikania Coco Gauff përmbysi rezultatin ndaj bashkëkombases Jessica Pegula, duke triumfuar 2-1 me sete (4-6, 6-3, 6-3) dhe duke siguruar një tjetër paraqitje në mesin e katër më të mirave.

Rivalja e saj në gjysmëfinale do të jetë çekja Karolina Muchova, e cila eliminoi ish-numrin një të botës, Naomi Osaka. Muchova fitoi në dy sete, 7-6 dhe 6-4, pas një ndeshjeje me ritëm të lartë dhe shumë rivalitet.

Ndërkohë, në garën e meshkujve u zhvillua edhe çerekfinalja e mbetur, ku Alexander Zverev kaloi me sukses pengesën e çekut Jiri Lehecka. Gjermani triumfoi me rezultat 3-1 në sete, duke kompletuar kështu listën e gjysmëfinalistëve në Wimbledon.

Turneu më prestigjioz i tenisit po hyn në fazën vendimtare, ndërsa tifozët presin përballje spektakolare në luftën për një vend në finalen e madhe.

Mesfushori i Kombëtares së Shqipërisë, Ylber Ramadani, i ka dhënë fund aventurës së tij në futbollin italian, duke u transferuar zyrtarisht te ARCA Çorum FK, klub që garon në Superligën e Turqisë.

Lajmi është konfirmuar nga vetë klubi turk, i cili ka bërë të ditur se ka arritur marrëveshje me Lecce për transferimin përfundimtar të 29-vjeçarit, ndërsa me futbollistin shqiptar është firmosur një kontratë dyvjeçare me opsion rinovimi edhe për një sezon tjetër.

Në deklaratën zyrtare, ARCA Çorum FK i uroi mirëseardhje Ramadanit, duke shprehur besimin se ai do të jetë një përforcim i rëndësishëm për skuadrën.

“Klubi ynë ka arritur marrëveshje me US Lecce për transferimin përfundimtar të futbollistit profesionist Ylber Ramadani. Me lojtarin është nënshkruar një kontratë 2+1-vjeçare. Besojmë se ai do të ketë një karrierë të suksesshme me fanellën e ARCA Çorum FK dhe i urojmë mirëseardhje e shumë suksese në rrugëtimin e ri”, thuhet në komunikatën e klubit.

Për Ramadanin, ky transferim shënon një etapë të re në karrierë, pas dy sezoneve të kaluara në Serie A me Leccen, ku u dallua për paraqitjet e tij të qëndrueshme dhe rolin kyç në mesfushë.

Tashmë, reprezentuesi shqiptar do të synojë të lërë gjurmë edhe në futbollin turk, ku pritet të ketë një rol të rëndësishëm në planet e skuadrës së re.

Sipas raportimeve, ARCA Çorum FK ka paguar rreth 1 milion euro për të siguruar kartonin e mesfushorit shqiptar, duke e bërë Ramadanin një nga investimet më të rëndësishme të klubit në këtë afat kalimtar.

Lionel Messi edhe një herë dëshmoi pse konsiderohet një nga futbollistët më të mëdhenj të të gjitha kohërave, duke vendosur një rekord të ri historik në Kupën e Botës FIFA gjatë fitores dramatike 3-2 të Argjentinës ndaj Egjiptit në fazën e 1/8-tës së finales.

Kapiteni i “Albiceleste” ishte protagonisti absolut në një mbrëmje të paharrueshme, ku Argjentina përmbysi disavantazhin 0-2 për të siguruar kualifikimin në çerekfinale me tre gola të shënuar në pjesën e mbetur të ndeshjes.

Messi fillimisht shërbeu Cristian Romeron për golin që hapi rikthimin e argjentinasve, më pas gjeti vetë rrugën e rrjetës për të barazuar shifrat, ndërsa Enzo Fernández vulosi përmbysjen në minutat shtesë pas asistimit të Lautaro Martínez.

Falë një goli dhe një asistimi në këtë sfidë, ylli argjentinas hyri sërish në librat e historisë. Në moshën 39 vjeç e 13 ditë, Messi u bë futbollisti më i vjetër që arrin të shënojë dhe të japë një asistim në të njëjtën ndeshje të fazës eliminatore të një Kampionati Botëror.

Ky është vetëm një tjetër kapitull në karrierën e jashtëzakonshme të tetë herë fituesit të “Topit të Artë”, i cili vazhdon të thyejë rekorde edhe në Botërorin 2026.

Messi tashmë ka zgjeruar edhe më tej epërsinë si golashënuesi më i mirë në historinë e Kupës së Botës, ndërsa mbetet figura kyçe e Argjentinës në synimin për të mbrojtur titullin e kampionit të botës.

Federata Egjiptiane e Futbollit ka reaguar ashpër pas eliminimit dramatik nga Argjentina në fazën e 1/8-tës së Kupës së Botës 2026, duke dorëzuar një ankesë zyrtare në FIFA për arbitrimin e sfidës që përfundoi me fitoren 3-2 të argjentinasve.

Sipas raportimeve të RMC Sport dhe TyC Sports, drejtuesit e futbollit egjiptian janë të bindur se skuadra e tyre u dëmtua nga vendime të rënda të arbitrave dhe kanë kërkuar nisjen e një hetimi të menjëhershëm, si dhe masa disiplinore ndaj trupës gjykuese.

Në qendër të kritikave është arbitri francez François Letexier, për të cilin Egjipti kërkon pezullim deri në përfundim të Botërorit, së bashku me asistentët e tij.

Në ankesën e paraqitur në FIFA, egjiptianët theksojnë dy momente që, sipas tyre, ndikuan drejtpërdrejt në fatin e ndeshjes.

I pari lidhet me golin e shënuar nga Mostafa Ziko në minutën e 58-të, i cili do t’i jepte Egjiptit epërsinë 2-0. Gjyqtari e anuloi realizimin për një faull të pretenduar të Marëan Attia në nisje të aksionit, vendim që pala egjiptiane e cilëson të pabazuar.

Momenti i dytë ka të bëjë me aksionin që parapriu golin e tretë dhe vendimtar të Argjentinës, të realizuar nga Enzo Fernández. Sipas Egjiptit, Mohamed Salah u pengua në mënyrë të parregullt, por arbitri nuk akordoi penallti, ndërsa VAR-i nuk ndërhyri për ta rishikuar situatën.

Eliminimi i Egjiptit ka ndezur debat të madh në opinionin sportiv, me shumë diskutime rreth rolit të arbitrimit në një nga ndeshjet më dramatike të këtij Botërori.

Tashmë topi është në fushën e FIFA-s, e cila pritet të shqyrtojë ankesën dhe të vendosë nëse do të ndërmarrë masa ndaj gjyqtarit Letexier dhe ekipit të tij apo do t’i konsiderojë vendimet e marra si pjesë e interpretimit të lojës.

Kapiteni shqiptar i Kombëtares së Zvicrës, Granit Xhaka, ka ndarë një mesazh plot emocion në rrjetet sociale pas triumfit dramatik ndaj Kolumbisë, që i siguroi helvetikëve një vend në çerekfinalen e Kupës së Botës 2026.

Zvicra shkroi histori duke eliminuar Kolumbinë në fazën e 1/8-tës së finales. Pas një përballjeje të luftuar deri në fund, fituesi u vendos nga penalltitë, ku zviceranët triumfuan me rezultat 4-3 dhe vazhduan rrugëtimin në turneun më prestigjioz të futbollit botëror.

Menjëherë pas përfundimit të ndeshjes, Xhaka reagoi në llogarinë e tij në Instagram, duke shprehur krenarinë dhe besimin për atë që e pret skuadrën në vazhdim.

“Rrugëtimi vazhdon… Ëndrra është ende gjallë. Jemi në çerekfinale. Le të vazhdojmë të besojmë,” shkroi kapiteni i Zvicrës.

Ky sukses e rendit Zvicrën mes tetë kombëtareve më të mira të Botërorit, ndërsa skuadra e drejtuar nga Xhaka tashmë synon një tjetër befasi në fazën çerekfinale.

Sfida e radhës nuk do të jetë aspak e lehtë, pasi helvetikët do të përballen me kampionët e botës, Argjentinën. Takimi do të zhvillohet në orën 03:00 të mëngjesit të së dielës, në një duel që pritet të dhurojë spektakël dhe emocione.

Ndërkohë që skuadra kombëtare e Argjentinës po shijon sukses në Kupën e Botës në Shtetet e Bashkuara, një dramë financiare po zhvillohet prapa skenave. Autoritetet amerikane kanë nisur një hetim ndaj Federatës së Futbollit të Argjentinës (AFA) me dyshimin për pastrim parash dhe parregullsi të tjera financiare me vlerë më shumë se 300 milionë dollarë.

Një hap kyç në hetim u zhvillua në Miami, i njëjti qytet ku po qëndronte delegacioni argjentinas i udhëhequr nga presidenti i AFA-s, Claudio “Chiqui” Tapia.

Agjentët e FBI-së dhe prokurorët e Departamentit të Drejtësisë të SHBA-së e morën në pyetje biznesmenin Guillermo Tofoni në lidhje me strukturën financiare të përdorur për të menaxhuar kontratat tregtare ndërkombëtare të AFA-s.

Takimi me Tofonin zgjati më shumë se dy orë dhe është pjesë e një hetimi paraprak që synon të përcaktojë nëse operacionet e AFA-s përmes bankave dhe kompanive me seli në SHBA përbënin krim sipas ligjit amerikan.

🇦🇷🇺🇸‼️ | ¡TERREMOTO EN LA AFA! — Mientras Argentina disputa el Mundial, agentes del FBI y fiscales del Departamento de Justicia de EE. UU. citaron a declarar en Miami al empresario Guillermo Tofoni. Según adelantó Infobae, las autoridades federales iniciaron una investigación… pic.twitter.com/HzUlWQiS6J

— UHN Plus — Deportes (@UHN_Deportes) July 8, 2026

Tapia nën presion të dyfishtë

E gjithë situata përkeqësohet nga fakti se drejtuesit e AFA-s, përfshirë vetë Tapian, është në Shtetet e Bashkuara gjatë Kupës së Botës. Ironikisht, Tapia mori miratimin e gjykatës speciale për të udhëtuar pavarësisht se i ishte ndaluar të largohej nga vendi në Argjentinë.

Ai po ndiqet penalisht në atdheun e tij për keq menaxhim të dyshuar të fondeve tatimore dhe pensionale që arrijnë në më shumë se 19 miliardë peso (11,168,827 euro). Hetimi në SHBA po drejtohet nga tre prokurorë federalë të specializuar në krime ekonomike: Patrick Gushue dhe Christopher Ting nga Uashingtoni, dhe Michael Berger nga Zyra e Prokurorit të SHBA-së për Distriktin Jugor të Floridës.

Detyra e tyre është të mbledhin prova të mjaftueshme për të vendosur nëse do të fillojnë procedurat penale zyrtare. Deri më tani, nuk janë ngritur akuza zyrtare. Procesi është në një fazë të hershme dhe qëllimi është të identifikohen të gjitha palët e përfshira, të analizohen flukset financiare dhe strukturat e përdorura nga AFA në çështjet e saj ndërkombëtare.

🗞️ Informa @LANACION

⚠️ El FBI investiga, en pleno Mundial, las operaciones millonarias de la AFA (Asociación del Fútbol Argentino) en Estados Unidos por presunto fraude y blanqueo

📻 #PartidazoCOPEhttps://t.co/4gIVjDrtjg

— El Partidazo de COPE (@partidazocope) July 8, 2026

Edhe Evropa është përfshirë në histori

Skandali po i shton një dimension tjetër lajmit se edhe Parlamenti Evropian është përfshirë. Është kërkuar një hetim mbi menaxhimin e Gianni Infantinos dhe vendimet e supozuara të arbitrimit që favorizuan ekipe të caktuara në këtë kampionat.

Në përgjithësi, duket se Kupa e Botës e këtij viti në SHBA do të mbahet mend jo vetëm për futbollin, por edhe për numrin e madh të skandaleve që e shoqëruan atë.

Amerikani i njohur në rrjetet sociale, IShowSpeed, është përfshirë në një incident të dyshuar me përmbajtje raciste gjatë ndeshjes mes Argjentinë dhe Kepi i Gjelbër, të cilën Argjentina e fitoi me rezultat 3:2.

Si pasojë, FIFA ka nisur një hetim zyrtar.Sipas FIFA-s, incidenti dyshohet se ka ndodhur më 3 korrik në Hard Rock Stadium në Miami, ku u zhvillua ndeshja e fazës së 1/16-ës së finales.

Organizata bëri të ditur se, sapo u njoftua për rastin, nisi menjëherë procedurat hetimore.

Në pamjet e publikuara në kanalin e tij në YouTube, IShowSpeed, emri i vërtetë i të cilit është Darren Jason Watkins Jr., shihet i veshur me fanellën e Kepit të Gjelbër, teksa përballet me një tifoz të Argjentinës në tribunë.

Në reagimin e saj, FIFA theksoi se Kupa e Botës është një festë e unitetit, diversitetit dhe respektit.

“Çdokush që vepron në mënyrë që cenon këto vlera nuk është i mirëpritur në lojën tonë”, thuhet në deklaratën e FIFA-s.

Ky incident vjen vetëm pak ditë pasi sulmuesi francez Kylian Mbappe dënoi publikisht komentet raciste të bëra nga senatorja paraguajane Celeste Amarilla, të cilën e cilësoi si të neveritshme dhe të padenjë për postin që mban.

Ndërkohë, Federata Franceze e Futbollit ka njoftuar se do të ngrejë kallëzim penal, duke i cilësuar deklaratat e senatores si plotësisht të papranueshme dhe të neveritshme.

Lionel Messi përjetoi një tjetër moment zhgënjyes nga pika e bardhë gjatë përballjes së Argjentinës ndaj Egjiptit, duke vendosur një rekord të padëshiruar në historinë e Kupës së Botës.

Kapiteni argjentinas nuk arriti ta shndërrojë në gol penalltinë e fituar nga skuadra e tij, pasi portieri egjiptian Mostafa Shobeir lexoi saktë drejtimin e goditjes dhe e priti topin me një pritje të shkëlqyer.

Penalltia u akordua pasi Haissem Hassan ndërhyri në mënyrë të parregullt ndaj Nicolas Tagliafico brenda zonës, duke i dhënë Argjentinës mundësinë ideale për të barazuar rezultatin në minutat e para të takimit.

Megjithatë, Messi nuk arriti ta shfrytëzonte rastin. Me këtë penallti të humbur, ai ka dështuar të realizojë katër nga tetë penalltitë që ka ekzekutuar në historinë e Botërorit, duke regjistruar një përqindje realizimi prej vetëm 50 për qind.

Ky është një rekord negativ për një futbollist të kalibrit të tij, pasi asnjë lojtar tjetër me kaq shumë tentativa nga pika e bardhë në Kupën e Botës nuk ka humbur kaq shumë penallti.

Pavarësisht këtij momenti të vështirë, kjo nuk e zbeh aspak ndikimin e Messit në historinë e kompeticionit.

Tetë herë fituesi i Topi i Artë vazhdon të jetë golashënuesi më i mirë në historinë e Botërorit dhe një nga lojtarët më vendimtarë të turneut.

Një kapitull i madh i futbollit brazilian ka marrë fund. Pas eliminimit të Brazilit nga Kupa e Botës, me humbjen 1-2 ndaj Norvegjisë, Neymar Jr. ka vendosur të mbyllë aventurën e tij me fanellën e kombëtares.

Sulmuesi 34-vjeçar i Santosit ka njoftuar tërheqjen nga futbolli ndërkombëtar, duke i dhënë fund një rrugëtimi të gjatë me “Selecaon”, ku për vite me radhë ishte figura kryesore dhe një nga shpresat më të mëdha të Brazilit për të rikthyer trofeun e Botërorit.

Pas këtij vendimi, babai i tij, Neymar Sr., ka reaguar me një mesazh emocional në rrjetet sociale, duke shprehur krenarinë për rrugëtimin e të birit, por edhe duke i bërë një kërkesë të veçantë që të vazhdojë të luajë futboll.

“Oh, bir… Çfarë udhëtimi. Një ëndërr që ende nuk është realizuar nuk do të thotë se ka vdekur.”

Neymar Sr. kujtoi rrugën e jashtëzakonshme të djalit të tij, nga një talent i ri deri te një prej futbollistëve më të mëdhenj të brezit të tij.

“E pashë djaloshin të rritej dhe të bëhej një nga lojtarët më të mëdhenj të gjeneratës së tij. Më i miri nuk përcaktohet nga mosha apo rrethanat.”

Në fund, ai i kërkoi Neymarit të vazhdojë të shijojë atë që ka dashur gjithmonë.

“Bir, vazhdo të luash futboll. Rizbulo gëzimin e topit në këmbët e tua. Zoti të ka dhënë një mundësi tjetër për të bërë atë që gjithmonë ke dashur. Shijoje futbollin.”

Mesazhi i Neymar Sr. ishte një përkrahje e fuqishme nga një baba që beson se talenti dhe pasioni i djalit të tij ende nuk janë shuar.

Edhe pse aventura me Brazilin ka përfunduar, Neymar mbetet një nga figurat më të rëndësishme të futbollit brazilian në dekadat e fundit, me gola, magji dhe momente që do të mbeten gjatë në kujtesën e tifozëve.

Pas një mungese të gjatë nga oktagoni, Conor McGregor është gati të rikthehet në skenën më të madhe të arteve marciale të përziera. Ish-kampioni i dyfishtë i UFC-së do të ngjitet sërish në kafaz këtë të shtunë në T-Mobile Arena në Las Vegas, ku do të përballet me Max Holloway në eventin kryesor të UFC 329, në kategorinë welter.

Kjo do të jetë ndeshja e parë e irlandezit që nga korriku i vitit 2021, kur pësoi një frakturë të rëndë në këmbë gjatë përballjes me Dustin Poirier në UFC 264. Pas një rikuperimi të gjatë, McGregor beson se është gati të nisë një kapitull të ri në karrierën e tij.

Luftëtari me rekord 22 fitore dhe 6 humbje deklaroi se rikthimi i tij nuk ka të bëjë vetëm me një ndeshje, por me ambicien për të dominuar sërish sportin.

“Ndjej se kam ende shumë për të arritur. Dua më shumë tituj, më shumë rripa kampioni, më shumë nokaut, më shumë rekorde dhe më shumë fitore. Kam punuar shumë për të ndërtuar këtë trashëgimi dhe tani dua të përfitoj nga gjithçka që kam krijuar.”

McGregor shtoi se vazhdon ta konsiderojë veten një nga figurat më të mëdha të sporteve luftarake dhe është i bindur se mund ta dëshmojë këtë edhe një herë.

“Bota e arteve marciale të përziera është bota ime. Jam këtu për ta treguar sërish se çfarë jam në gjendje të bëj dhe këtë do ta shihni të shtunën.”

Edhe pse në korrik mbush 37 vjeç, irlandezi nuk mendon ende për tërheqjen. Ai pranoi se ndodhet në fazën e fundit të karrierës, por jo në fundin e ambicieve të tij. Pas sfidës me Holloway, McGregor do të ketë edhe një ndeshje të mbetur në kontratën aktuale me UFC-në, çka e bën këtë duel edhe më të rëndësishëm për të ardhmen e tij.

Nga ana tjetër, Max Holloway nuk do të jetë aspak një kundërshtar i lehtë. Ish-kampioni dhe një nga emrat më të respektuar të UFC-së synon t’i japë fund rikthimit të bujshëm të McGregorit dhe të rikthehet në garën për titujt më të rëndësishëm.

Pavarësisht sfidës që e pret, McGregor mbetet i bindur se është gati të dëshmojë edhe një herë vlerat e tij.

“Fjalët nuk kanë më rëndësi. Tani është radha ime ta tregoj në kafaz, dhe pikërisht këtë do të bëj.”