Kombëtarja e Kosovës në hendboll do ta zhvillojë sot ndeshjen e radhës në kuadër të kualifikimeve për në Kampionatin Botëror të hendbollit që zhvillohet në vitin 2025.
“Dardanët” do të ballafaqohen me Sllovakinë në Povazska Bystrica me fillim nga ora 18:00, raporton KP.
Me po të njëjtin kundërshtar, Kosova do të përballet edhe në Prishtinë të dielën.
Luis Suarez është përforcimi i ri i Inter Miami.
Sulmuesi uruguaian do ta mbyllë vitin në Gremio dhe do t’i bashkohet skuadrës së Lionel Messit në vitin 2024.
Kontrata e tij do të jetë për një sezon dhe klubi do të ketë mundësi ta zgjasë atë edhe për një tjetër, përcjellë KosovaPress.
Qendërsulmuesi uruguaian, siç theksohet nga “Tyc Sport”, do t’i bashkohet gjithashtu shokëve të tij të vjetër Jordi Alba dhe Sergio Busquets.
Ekipi kosovar elitar i xhudos do të marr pjesë në Kampionatin Evropian për Senior me 6 garues, i cili do të mbahet me datë 03-05 nëntor 2023.
Atje do të garojnë 46 shtete, 388 garues, 218 meshkuj dhe 170 femra.
Nga Kosova do të ndeshen:
1.Distria Krasniqi (-52 kg)
2.Nora Gjakova (-57 kg)
3.Flaka Loxha (-57 kg)
4.Laura Fazliu (-63 kg)
5.Loriana Kuka (-70 kg)
6.Akil Gjakova (-73 kg)
Distria, Nora e Flaka ndeshen të premten, kurse Laura, Loriana e Akili ndeshen ditën e shtunë.
Bashkë me garuesit kanë udhëtuar edhe kryetari i Federatës Agron Kuka, trajneri e selektori ynë Driton Kuka dhe trajnerja Majlinda Kelmendi.
Kanë përfunduar ndeshjet e sotme të Superligës së Kosovës, ku kemi rezultate tejet interesante.
Pas plot 90’ minutave lojë në stadiumin e qytetit në Suharekë, Ballkani e ka fituar derbin kundër Dritës me rezultat minimal 1:0, raporton KosovaPress.
Golin e vetëm të ndeshjes e shënoi Lumbardh Dellova, i cili i siguroi Ballkanit fitoren në minutën e 36’.
Fitore sot regjistroi edhe Gjilani, i cili e mposhti 2:1 Feronikelin ’74. Golat për gjilanasit i shënuan Redon Ismaili (minuta e 44’) dhe Nasko Milev (minuta e 63’), kurse golin e nderit te Feronikeli ’74 e shënoi Shilova në minutën e 88’.
Ndërkaq, skuadra e Malishevës e ka njoftuar Emmanuel Egbon me humbjen e parë në Superligë, pasi e mposhti Prishtinën 1:0.
Egbo e riktheu qysh në ndeshjen e parë të tij Prishtinën drejt fitores, kurse sot u mposht nga Malisheva 1:0, ku golin e vetëm të ndeshjes e shënoi Ilir Mustafa nga penalltia në minutën e 85’.
Rezultatet finale i gjeni më poshtë.
FC Ballkani 1:0 Drita
Gjilani 2:1 Feronikeli ‘74
Malisheva 1:0 Prishtina
Pritësi i Kupës së Botës në vitin 2034 do të jetë Arabia Saudite, pasi presidenti i FIFA-s, Gianni Infantino, ka konfirmuar se turneu do të kthehet në Lindjen e Mesme.
U raportua të martën se ofertuesi tjetër që ishte Australia u larguan nga gara, pasi iu dha një afat 25-ditor nga FIFA për të shprehur interesimin e tyre.
Kjo e la Arabinë Saudite si ofertuesin e vetëm për edicionin e Kupës së Botës 2034 dhe presidenti Gianni Infantino ka konfirmuar vendin e Lindjes së Mesme si kombin pritës të kësaj ngjarje sportive, përcjellë KosovaPress.
“Futbolli bashkon botën si asnjë sport tjetër, një Kupë Botërore është vitrinë e përsosur për një mesazh uniteti dhe përfshirjeje. Kultura të ndryshme mund të jenë së bashku”, tha ai.
Kampionia e Kosovës në basketboll, KB Peja dhe fituesja e Kupës së Kosovës, KB Trepça, do të vazhdojnë sot ëndrrën në garat evropiane, respektivisht në FIBA Europe Cup.
Me fillim nga ora 18:30 palestra sportive “Hala Miejska” në Stargard të Polonisë do të jetë nikoqire e përballjes mes Spojnia Stargard dhe KB Pejës, raporton KosovaPress.
KB Peja në ndeshjen e fundit e mposhti 99:84 Den Bosch, kurse Spojnia Stargard pësoi humbje 66:84 kundër Chemnitz.
Pejanët renditen në vendin e dytë në Grupin H me tre pikë pas dy ndeshjeve, aq sa ka edhe Spojnia Stargard në vendin e tretë.
Ndërkaq, KB Trepça me fillim nga ora 20:00 luan në palestrën “Sportica” të Gravelinës kundër Gravelines-Dunkerque.
Trepça e nisi me humbje aventurën në këtë garë, duke u mposhtur nga Leiden me rezultat të thellë 84:54, sikurse Gravelines-Dunkerque që pësoi humbje nga po i njëjti klub me shifrat 77:69.
Trepca zë vendin e fundit (4) në Grupin G me një pikë, pesë sosh më pak se Leiden në vendin e parë.
Superliga e Kosovës i rikthehet aksionit sot me tri ndeshje tejet interesante, të vlefshme këto për xhiron e 12-të të këtij sezoni.
Të gjitha ndeshjet do të zhvillohen me fillim nga ora 13:00, ku sytë do të jenë te derbi mes Ballkanit dhe Dritës, raporton KosovaPress.
Po ashtu, ndeshje sot do të zhvillojnë edhe Gjilani e Prishtina.
Gjilani e pret në shtëpi skuadrën e Feronikelit ’74, kurse Prishtina është mysafire e Malishevës.
Kryeqyteti i Kosovës, Prishtina edhe zyrtarisht ka kandiduar që të shpallet si “Qytet evropian i sportit” për vitin 2024.
Komisioni vlerësues evropian, ACES Europe ka qëndruar për dy ditë në Prishtinë ku ka inspektuar dhe vlerësuar situatën në lidhje me infrastrukturën sportive dhe qëllimi kryesor i kësaj kandidature është që të gjitha aktivitetet sportive që zhvillohen vitin e ardhshëm në Prishtinë të promovohen edhe nëpr vende të tjerave evropiane.
Me këtë rast, Kryetari i Komunës së Prishtinës, Përparim Rama, tha se kjo kandidatur nuk është vetëm sa për titull prestigjioz, por edhe për të dëshmuar se Prishtina është vend me gamë të gjerë sportive.
“Kemi paraqitur kandidaturën që Prishtinën tonë të na e pranojnë si njërin nga qytete evropiane të sporteve të vitit 2024. Kjo kandidaturë e Prishtinës nuk është thjeshtë aspiratë për një tjetër titull, ajo përbën një shpalle të hapur dhe është zotim i qartë për të krijuar një qytet që përqafon shëndetin, gjithëpërfshirjen dhe elanin sportiv. Prishtina, zemra e Kosovës, po kalon nëpër një metamorfozë që ndërthur vlerat tona thelbësore me një gamë të gjerë të sporteve e të ngjarjeve sportive…Vizioni ynë për vitin 2024 është dëshmi e përkushtimit tonë të palëkundshëm ndaj të gjitha këtyre idealeve. Rrugëtimi ynë drejt titullit të qytetit evropian të sportit i ka rrënjët te besimi se sportet janë një forcë e pandalshme dhe motor i fuqishëm për lëvizje dhe ndryshime pozitive…Ne e shohim këtë kandidaturë si një hap të rëndësishëm që do të na ndihmojë shumë drejt qëllimit tonë madhor”, tha Rama.
Ndërkohë që anëtari i këtij komisionin vlerësues nga Evropa, Hugo Alonso u shpreh shumë i bindur dhe madje i impresionuar më atë që ka parë me profilin sportiv që ka parë në Prishtinë dhe se meriton që ta fitojë titullin “Prishtina qytet evropian i sportit”.
“Më duhet të them se Prishtina ka një profil shumë sportiv. Ka një infrastrukturë të jashtëzakonshme sportive. Do të rindërtojë më shumë dhe do ta bëjnë më shumë edhe për shkak të Lojërave Mesdhetare 2030, po flisnim, mendoj dje, për 300 milionë euro investim, ky është investim i madh në objektet sportive. Kanë një përqindje të lartë të njerëzve aktivë në qytet, më shumë se 50% praktikojnë sportin në baza javore dhe ata i kushtojnë, dëgjojeni këtë sepse është shumë e rëndësishme, më shumë se 20% të buxhetit vendor sportit, kur mesatarja në Evropë është rreth dy-tre për qind. Pra, duhet të themi se jemi vërtet të impresionuar me profilin sportiv të qytetit të Prishtinës dhe ata i kanë të gjithë përbërësit për t’u bërë qytet evropian i sportit. Ne do të njoftojmë nëse përfundimisht Prishtina e merr titullin, në fund të javës së ardhshme dhe në rast të fitimit të këtij titulli, do ta marrin flamurin, më 7 dhjetor në Parlamentin Evropian me Komisionerin Evropian në një ceremoni të madhe me rreth 500 komuna të ndryshme nga e gjithë bota.
Ndërsa drejtori i Drejtorisë për Sport në Komunën e Prishtinës Granit Rugova theksoi se benefitet më të mëdha nëse Prishtina e fiton këtë titull, do të jetë promovimi i ngjarjeve sportive edhe në arenën ndërkombëtare.
“Përgatitje për këtë kandidaturë kanë filluar që nga janari i këtij viti. Është përgatitur një draft i cili ka rreth 85 faqe ku janë të detajuara infrastruktura e qytetit, aktivitete, mardhëniet dhe raportet tona me ministri, me federatat dhe me Komitet Olimpik. Gjatë kësaj kohe, nga dita e djeshme kur komiteti vlerësues ishte në Prishtinë, ne kishim takime dhe vizita te klubit i basketbollit Prishtina, tek Pripingi, ishim tek Rilindja, tokëbahçja në Gërmi. Sot ishim edhe tek Federata e Basketbollit, tek Komiteti Olimpik edhe qëllimi i tyre nuk është vetëm t’i inspektojmë apo t’i shohim vetëm klubet profesionale mirëpo t’i shohim edhe hapësirat nëpër lagje, nëpër parqe sepse në fund të fundit sporti është për të gjithë, nuk është vetëm për profesionistët…Benefiti më i madh është promovimi i kryeqytetit, i Prishtinës, i sportit të qytetit edhe në arenën ndërkombëtare.”, tha Rugova.
Ndryshe, sa i përket organizimeve ndërkombëtare, Kosova gjithashtu ka fituar të drejtën e organizimit të Lojërave Mesdhetare të vitit 2030.
Kombëtarja e Kosovës në konkurencën e femrave sot do të përballet me Maqedoninë e Veriut në kuadër të Ligës së Kombeve.
Ndeshja do të zhvillohet në stadiumin “Fadil Vokrri”, në Prishtinë, duke filluar nga ora 17:00.
Pas dy ndeshjeve të para në grup, Dardanet gjenden në pozitën e parë me 4 pikë, kurse Maqedonia e Veriut renditet në vendin e fundit në tabelë me zero pikë.
Në stadiumin e qytetit në Suharekë të mërkurën do të zhvillohet derbi i madh i futbollit kosovar ndërmjet Ballkani dhe Dritës.
Këto dy skuadra janë në luftë kokë më kokë për titullin e kampionit me Ballkanin që është lider i tabelës me 26 pikë, katër më shumë se sa Drita që është e dyta me 22 sosh.
Një fitore eventuale e skuadrës së Ilir Dajës mund ta thellonte diferencës e pikë në shtatë, por edhe një skenar i tille, sipas analistit Alban Lumi, nuk do ta “vriste” kampionatin sepse ka shume ndeshje për t’u zhvilluar.
Lumi për KosovaPress ka thënë se e sheh Ballkanin si favorit në këtë ballafaqim për shkak se skuadra nga Suhareka ka potencial më të madh në organikën e saj.
“E shoh Ballkanin si favorit në këtë ndeshje pasi ka më shumë kualitet, por edhe fond më të madh të lojtarëve. Ndërsa Drita në këtë aspekt mendoj që është në disavantazh pasi nuk ka treguar superioritet ndaj rivalëve që i ka pasur. Lojtarët e Ballkanit janë të gjithë gati dhe mezi presin që të marrin dritën jeshile për t’u futur në fushë.”, ka thënë Lumi.
Më tutje, ai ka shtuar se edhe në rast të fitores së Ballkani, kampionati nuk mund tq quhet i mbyllur, sidomos për faktin se këto dy skuadra kanë nga një ndeshje më pak të zhvilluar dhe do të ballafaqohen pikërisht mes vete dhe kjo mundëson që pastaj situata të rikthehet rikthehet në gjendjen e mëparshme, pra në katër pikë diferencë.
“Jo, nuk mund të themi që “vritet” kampionati nëse Ballkani e fiton derbin. Pra siç e dimë, do të zhvillohet edhe një derbi mes këtyre dy skuadrave që ka mbetur pa u zhvilluar dhe aty është mundësia që të rikuperohen pikët. Kështu që ka ende shumë ndeshje dhe madje mendoj se në garë për titull edhe më tutje është Llapi që mund të jetë aty në vazhdim të kampionatit.”, theksoi Lumi.
Ndeshja ndërmjet Ballkanit dhe Dritës do të zhvillohet të mërkurën me fillim nga ora 13:00.