Category: Sport

Sonte janë në orar për t’u zhvilluar dy ndeshje kthyese të fazës së 1/8-tës në Ligën e Kampionëve.

Tri javë pas ndeshjeve të para të fazës së 1/8-tës, tani i ka ardhur koha e ndeshjeve kthyese të skuadrave që duan një vend në çerekfinale.

Ndeshje më interesante pritet të zhvillohet në ‘Allianz Stadium’, ku Bayern Munichu e pret Lazion dhe pret ta shkrijë disavantazhin e humbjes 1-0 nga ndeshja e parë në Olimpico.

Në ndeshjen tjetër, Paris Saint-Germain pritet të ketë më lehtë në udhëtim te Real Sociedadi në ‘Reale Arena’ pas fitores 2-0 në Parc des Princes.

Të dy ndeshjet pritet të fillojnë nga ora 21:00.

Pas dakortësisë për të luajtur një ndeshje miqësore me Lihtenshtejnin, Federata Shqiptare e Futbollit ka gjetur gjuhën e përbashkët me Federatën e Azerbajxhanit për të zhvilluar një tjetër miqësore në muajin qershor, para nisjes së Kampionatit Europian “Gjermani 2024”.

Ndeshja miqësore me Azerbajxhanin do të luhet më datë 7 qershor, ndërkohë mbetet për t’u përcaktuar orari dhe stadiumi ku do të luhet kjo sfidë.

Kjo do të jetë ndeshja e gjashtë në histori mes dy skuadrave, teksa Shqipëria numëron tre fitore, një barazim dhe një humbje kundër Azerbajxhanit.

Kombëtarja shqiptare fillimisht do të luajë dy takime miqësore në muajin mars.

Kuqezinjtë do të përballen me Kilin më datë 22 mars në stadiumin “Ennio Tardini” në Parma të Italisë, duke nisur nga ora 20:45.

Ndërsa tre ditë më vonë më datë 25 mars, Kombëtarja do të luajë me Suedinë në stadiumin “Friends Arena”të Stokholmit.

Në muajin qershor Shqipëria do të zhvillojë edhe dy ndeshje të tjera miqësore.

E para me Lihtenshtejnin më datë 3 qershor, ndërsa takimi i fundit miqësor para nisjes së Europianit do të jetë ndaj Azerbajxhanit më datë 7 qershor.

Kombëtarja shqiptare do të debutojë në finalet e Europianit “Gjermani 2024” më datë 15 qershor në takimin e parë ndaj Italisë, që do të luhet në orën 21:00, në stadiumin “BVB Stadion Dortmund”.

Ndeshjen e dytë të grupit kuqezinjtë do ta luajnë katër ditë më pas, më datë 19 qershor kundër Kroacisë duke nisur nga ora 15:00, në stadiumin “Volksparkstadion Hamburg”.

Ndërsa takimin e fundit në grupin B, Shqipëria do ta luajë ndaj Spanjës më datë 24 qershor në stadiumin “Dusseldorf Arena” në orën 21:00.

Datat 5,6 dhe 7 mars shënojnë ditët e sakrificës së familjes Jashari në luftën për liri dhe pavarësi. Në rastin e shënimit të përvjetorit të 26 të Epopesë së Ushtrisë Çlirimtare të Kosovës, ka reaguar edhe trajneri i xhudos, Dirton Kuka.

Ai përmes një postimi në rrjetet sociale ka thënë se sakrifica e Jasharajve është vula e lirisë, duke se Kosova po vazhdon të rritet ditë pas dite, transmeton KosovaPress.

Postimi i plotë i Driton Kukës:

Vula e lirisë!

Sakrifica sublime e familjes Jashari dhe gjithë dëshmorëve e martirëve!

Kosova po rritet e po forcohet dita ditës

Ta duam pa kushte siç e deshën ata që dhanë jetën për lirinë që e gëzojmë

Malsor Gjonbalaj analisti i futbollit i ftuar në emisionin  ‘EKIPI A’ në ATV, e ka komentuar fitoren e Ballkanit përballë Dukagjinit.

Gjonbalaj ka deklaruar se Dukagjini edhe sikur t’i aktivizonte gjithë futbollistët përballë Ballkanit nuk do të dilte fitues.

‘Dukagjini edhe me komplet skuadrën nuk mund t`i rezistojë Ballkanit, nuk ka shumë futbollistë cilësor kjo skuadër që me pas synime kreun e tabelës’ tha Gjonbalaj.

Emisionin live mund të shihni më poshtë.

Lepenci e ka fituar me rezultat zyrtar, 0:3 ndeshjen me plot incidente ndaj Sharrit.

Futbollistët e ekipit nga Kaçaniku u sulmuan fizikisht nga lojtarët vendës në Han të Elezit, ndërsa minibusi i tyre u sulmua me gurë nga tifozët vendës.

Dhe sot, Lepenci njofton se Komisioni i Garave i Ligës së Dytë ka vendosur që ndeshja e ndërprerë mes këtij klubi dhe Sharrit, të regjistrohet me rezultat zyrtar 0:3.

Ndërkohë, për klubin e Sharrit priten dënime të tjera pas lëshimeve të mëdha në organizim të lojës.

Granit Xhaka nuk merr asgjë si të mirëqenë pas përvojës së tij me Arsenalin, pavarësisht epërsisë prej 10 pikësh të Bayer Leverkusen në krye të Bundesligës.

Xhaka ka luajtur një rol kyç në ecurinë e jashtëzakonshme të pamposhtur të Leverkusenit drejt titullit. Leverkusen ka krijuar distancë prej 10 pikësh por mesfushori zviceran është i kujdesshëm dhe i frikësohet ndonjë kapitullimi, një fat që ai pati sezonin e kaluar me Arsenalin pasi “Topçinjtë” ia dorëzuan Manchester Cityt titullin e kampionit.

Duke folur për “ESPN” pas fitores 2-0 të së dielës ndaj Kolnit me 10 lojtarë, Xhaka tha: “Ne duhet të jemi krenarë për pozicionin tonë, por asgjë nuk është fituar ende, po flas nga përvoja ime e sezonit të kaluar në Arsenal. Ne kishim një avantazh të ngjashëm me pikët ndaj ekipit të dytë dhe ne nuk e fituam ligën, kështu që unë e di këtë përvojë dhe e kam ndarë me dhomën e zhveshjes. Dhjetë pikë janë shumë kur të mbeten 10 ndeshje, por kanë mbetur edhe 30 pikë të marrë kështu që nuk ka mbaruar”, ka thënë Xhaka, përcjellë KosovaPress.

Arsenali kishte tetë epërsi ndaj Cityt në një fazë në sezonin 2022-2023 përpara një kolapsi në fund të sezonit. “Topçinjtë” ishin në krye ta tabelës për 248 ditë gjatë sezonit.

Jo befasisht, Xhaka do të jetë i etur për të shmangur një përsëritje të tillë. Me fitoren ndaj Kolnit, Leverkusen rriti epërsinë e tyre në renditje në 10 pikë pasi Bayern u ndal me barazim nga Freiburgu të premten mbrëma .

Kompeticioni më i rëndësishëm në botë Liga e Kampionëve nga sezoni i ri 2024/25 nuk do të ketë më fazë të grupeve.

Që shumë vite, në Ligën e Kampionëve kanë qenë tetë grupe me nga katër skuadra, që nënkupton se 32 skuadra do të “luftonin” për titullin e kampionit të Evropës.

Megjithatë, UEFA ka ndryshuar këtë sistem duke e rritur numrin në 36 sosh, andaj edhe faza e grupeve do të zëvendësohet me të ashtuquajturën “faza e ligës”.

Secila skuadër do t’i zhvillojë tetë ndeshje, katër në shtëpi dhe katër si mysafir, që është një më shumë se ato që realizoheshin në fazën e grupeve.

Skuadrat që renditen në pozitat 1-8 do ta sigurojnë direkt kualifikimin për raundin e 16-të më të mirëve, kurse ato që renditen në pozitat 9-24 do të përballen me njëra tjetrën në një play-off nokauti.

Kurse, skuadrat që do të renditen 25-36 do të eliminohen përfundimisht nga kompeticioni.

E njëjta do të ndodhë edhe me kompeticionet e tjera si Liga e Evropës dhe Liga e Konferencës, vetëm se te kjo e fundit secila skuadër do t’i zhvillojë vetëm gjashtë ndeshje në fazën e ligës.

An exciting new era for European club football awaits 🤩

Here’s how the #UCL will look from 2024/25 👇 pic.twitter.com/mEffFOpX2O

— UEFA Champions League (@ChampionsLeague) March 4, 2024

Kombëtarja e Kosovës në Hendboll për grupmoshat U18 ka shënuar një sukses historik. Ato kanë siguruar kualifikimin për në Kampionatin Botëror të Hendbollit që zhvillohet këtë vit në Kinë Kjo është hera e parë që kjo gjeneratë arrin të kualifikohet në këtë kompeticion kaq të rëndësishëm të hendbollit në botë.

Një sukses i tillë a kë bërë shumë të lumtur trajnerin e kësaj kombëtareje, Mitat Ferati i cili në konferencë për media ka thënë se pas kualifikimit, ata synojnë paraqitje sa më dinjitoze në këtë kampionat.

“Jam shumë i kënaqur që jam pjesë e kësaj historie që kanë shkruar vajzat tona, mirëpo kjo histori besoj që nuk përfundon këtu. Ne do të mundohemi me të gjitha forcat tona dhe angazhimin tonë që në Kinë ku e përfaqësojmë Kosovën që të jemi kundërshtar sa më i dinjitetshëm për çdo ekip që do ta kemi në grup…Fal angazhimit të pashoq të lojtarëve dhe stafit ndihmës timin kemi arritur një qëllim historik që ta përfaqësojmë Kosovën në këtë kampionat botëror. Unë jam krenar që vashat tona kanë qenë një kundërshtar i dinjitetshëm atje dhe e kanë përfaqësuar Kosovën shumë dinjitetshëm”, tha Ferati.

Për kapitenen e skuadrës, Sara Gjergjaj, puna e vështirë fillon tani. Ajo ka thënë se duhet nisur punën menjëherë në mënyrë që në Botërorin e Kinës Kosova ta paraqitet sa në fuqishme përballë kundërshtarëve.

“Ne vetëm po duam të japim sa më shumë që të mundemi. E dimë vet se jemi pak se hendbolli që është në Kinë është më i fortë se sa që e kishim në këtë turne, është hendbolli i Evropës, hendbolli më i miri, por prapë se prapë do të ushtrojmë sa më shumë sepse do të jemi në Kinë dhe të japim sa më shumë që mundemi dhe ta luajmë lojën sikur dimë”, nënvizoi Gjergjaj.

I kënaqur me suksesin e vashave të Kosovës U18 u shpreh edhe presidenti i Federatës së Hendbollit të Kosovës, Eugen Saraqini.

Kampionati Botëror i Hendbollit do të mbahet në Sugju të Republikës Popullore të Kinës nga 14 deri më 25 gusht të vitit 2024.