Category: SPORT

Boksi shqiptar do të ketë sytë nga 17 tetori, kur Ermal Hadribeaj do të ngjitet në ring për sfidën më të madhe të karrierës së tij. Boksieri shqiptar është konfirmuar zyrtarisht si sfiduesi i detyrueshëm i kampionit Sebastian Fundora për titullin botëror në kategorinë WBC Super Welterweight.

Përballja do të zhvillohet më 17 tetor dhe do të vendosë për një nga titujt më të rëndësishëm në boksin profesionist. Brezi i WBC-së konsiderohet ndër më prestigjiozët në këtë sport, pasi organizata është një nga katër federatat kryesore botërore që njohin kampionët e botës.

I lindur në Tiranë dhe prej vitesh i vendosur në Shtetet e Bashkuara të Amerikës, Hadribeaj ka ndërtuar një karrierë të jashtëzakonshme në boksin profesionist. Në 23 duele të zhvilluara deri më tani, 32-vjeçari numëron 23 fitore dhe vazhdon të mbetet i pamposhtur.

Bileta drejt sfidës për titullin e botës erdhi pas triumfit të rëndësishëm ndaj francezit Bakary Samake më 23 maj në Oberhausen të Gjermanisë. Me atë fitore, Hadribeaj rrëmbeu titullin WBC Silver Super Welterweight, rezultat që i siguroi statusin e sfiduesit të detyrueshëm për kampionin në fuqi.

Tani, përballë Sebastian Fundorës, Hadribeaj do të ketë mundësinë të realizojë ëndrrën më të madhe të çdo boksieri profesionist dhe të shkruajë historinë, duke synuar të bëhet një tjetër shqiptar që ngjitet në majën e botës së boksit.

Dukagjini i ka dhënë fund rrugëtimit të tij në edicionin e sivjetmë të Ligës së Konferencës, pasi u eliminua në raundin e dytë kualifikues nga Lugano.

Pas humbjes minimale 1:0 në ndeshjen e parë në Zvicër, skuadra nga Klina shpresonte ta përmbyste rezultatin para tifozëve të saj në Kampin Nacional në Hajvali. Megjithatë, gjërat nuk shkuan sipas planit, pasi përballja u dominua nga mysafirët, të cilët fituan bindshëm me rezultatin 5:1.

Dukagjini e nisi ndeshjen me shumë vështirësi, duke pësuar dy gola të shpejtë në minutat e para. Reagimi i klinasve erdhi menjëherë, kur Maliqi ngushtoi shifrat në minutën e 10-të dhe riktheu përkohësisht shpresat për një rikthim në lojë.

Megjithatë, pjesa tjetër e takimit foli në favor të skuadrës zvicerane, e cila shfrytëzoi rastet e krijuara dhe vulosi fitoren me rezultat të thellë. Me rezultat të përgjithshëm 6:1 nga të dyja ndeshjet, Dukagjini u eliminua nga gara, duke mbyllur kështu paraqitjen e tij në Evropë për këtë sezon.

Pavarësisht këtij eliminimi, pjesëmarrja në garat evropiane mbetet një tjetër përvojë e rëndësishme për klubin nga Klina, i cili synon të vazhdojë rritjen dhe konsolidimin në skenën ndërkombëtare.

Ndërkohë, futbolli kosovar vazhdon të ketë përfaqësim në Evropë. Drita mbrëmjen e djeshme siguroi kualifikimin në raundin e tretë të Ligës së Konferencës, pasi mposhti Florianën me rezultat 2:1. Tashmë, vëmendja zhvendoset te Malisheva, e cila nesër do të përballet me Hibernianin, me synimin për të siguruar edhe ajo një vend në fazën e ardhshme të garës.

Barcelona po përgatitet për lëvizje të rëndësishme në ditët e fundit të afatit kalimtar të verës. Drejtori sportiv Deco dhe trajneri Hansi Flick kanë hartuar një plan për të riformatuar skuadrën, me pesë futbollistë që mund të largohen për t’i hapur rrugë afrimeve të reja.

Sipas Mundo Deportivo, objektivi kryesor i klubit katalanas është të ulë faturën e pagave dhe të krijojë hapësirë financiare për transferimin e një sulmuesi, i cili konsiderohet prioriteti i merkatos.

Portieri gjerman Marc-André ter Stegen është emri më pranë largimit. Raportohet se Barcelona ka arritur një marrëveshje me Ajaxin për transferimin e tij, ndërsa mbeten vetëm disa procedura fiskale për të finalizuar operacionin.

Në listën e largimeve vazhdon të jetë edhe mesfushori Marc Casadó. Edhe pse drejtuesit kanë rritur vlerën e tij në treg, e ardhmja e 22-vjeçarit mbetet e paqartë. Megjithatë, dëmtimi afatgjatë në gju i Frenkie de Jong mund të ndryshojë planet e klubit dhe ta mbajë Casadón në skuadër.

Një tjetër emër që mund të largohet është talenti suedez Roony Bardghji. Me ardhjen e Karim Adeyemit, konkurrenca në repartin ofensiv është rritur ndjeshëm, ndërsa Lamine Yamal mbetet zgjedhja e parë në krah, duke i kufizuar minutat e suedezit.

Edhe Alejandro Balde dhe Ronald Araujo nuk konsiderohen më të paprekshëm. Balde mund ta ketë më të vështirë të sigurojë një vend titullari pas rikthimit të João Cancelos, i cili pritet të shtojë konkurrencën në krahun e majtë të mbrojtjes.

Sa i përket Araujos, Barcelona është e gatshme të dëgjojë oferta të rëndësishme për mbrojtësin uruguaian. Në të njëjtën kohë, drejtuesit po monitorojnë situatën e Cristian Romeros së Tottenhamit, i cili shihet si një zëvendësues i mundshëm në rast të largimit të uruguaianit.

Me merkaton që po hyn në fazën vendimtare, Flick dhe Deco synojnë të balancojnë financat e klubit dhe njëkohësisht të krijojnë hapësirën e nevojshme për një përforcim cilësor në repartin ofensiv, i cili mbetet prioriteti kryesor i Barcelonës për sezonin e ri.

Dukagjini është gati për një nga ndeshjet më të rëndësishme në historinë e klubit. Skuadra nga Klina do të përballet sonte me Luganon në ndeshjen e kthimit të raundit të dytë kualifikues të Ligës së Konferencës, me synimin për të përmbysur disavantazhin minimal dhe për të siguruar një kualifikim historik.

Në takimin e parë të zhvilluar në Zvicër, Lugano fitoi me rezultatin 1:0, duke lënë gjithçka të hapur për sfidën e kthimit. Pavarësisht humbjes, paraqitja e Dukagjinit ka rritur besimin se skuadra kosovare ka potencialin për të befasuar edhe një kundërshtar me përvojë të madhe në arenën evropiane.

Ndeshja do të zhvillohet në Kampin Nacional të Federatës së Futbollit të Kosovës në Hajvali, ku pritet një atmosferë e zjarrtë dhe mbështetje e madhe nga tifozët. Pikërisht faktori vendas shihet si një nga armët më të forta të ekipit nga Klina në përpjekje për të shkruar histori.

Gjatë ditëve të fundit, stafi teknik ka analizuar me kujdes sfidën e parë, duke punuar për të korrigjuar gabimet në mbrojtje dhe për të rritur efikasitetin në repartin ofensiv. Objektivi është i qartë, të shënohet të paktën një gol dhe të përmbyset rezultati ndaj zviceranëve.

Kjo është vetëm pjesëmarrja e dytë e Dukagjinit në garat evropiane. Në debutimin e sezonit 2023/24, klubi kaloi me sukses raundin e parë kualifikues, por u eliminua në raundin e dytë. Tani, skuadra ka mundësinë të bëjë një hap më tej dhe të arrijë suksesin më të madh në historinë e saj.

Nëse arrin ta eliminojë Luganon, Dukagjini do të sigurojë një vend në raundin e tretë kualifikues të Ligës së Konferencës, ku e pret fituesi i përballjes mes Runavikut dhe Koperit.

Të gjitha sytë sonte do të jenë te Hajvalia, aty ku Dukagjini do të kërkojë të shkruajë një tjetër faqe të artë në futbollin kosovar.

Neymar ka vendosur t’i japë fund karrierës së tij me Kombëtaren e Brazilit, duke konfirmuar se nuk do ta veshë më fanellën verdhejeshile pas eliminimit të ekipit në Kupën e Botës 2026.

Ylli i Santosit e bëri të ditur vendimin e tij pas disfatës ndaj Norvegjisë në fazën e 1/8 së finales, duke mbyllur kështu një kapitull 16-vjeçar me përfaqësuesen braziliane. Botërori i zhvilluar nën drejtimin e Carlo Ancelottit rezultoi zhgënjyes për Brazilin, ndërsa fundi i rrugëtimit shënoi edhe fundin e aventurës ndërkombëtare të njërit prej futbollistëve më të mëdhenj në historinë e vendit.

Gjatë deklaratës së tij, 34-vjeçari reagoi edhe ndaj zërave të publikuar së fundmi në media, të cilët pretendonin se ai kishte pasur sjellje të papërshtatshme ndaj futbollistëve të rinj në dhomat e zhveshjes së Santosit, duke i hedhur poshtë këto raportime.

Duke folur për rrugëtimin e tij me Brazilin, Neymar u shpreh se largohet pa asnjë peng, pasi beson se ka dhënë gjithçka për fanellën e kombëtares.

“Koha ime me kombëtaren ka marrë fund. Kam shkruar histori, kam përjetuar momente të paharrueshme dhe kam dhënë gjakun e jetën time për këtë fanellë. Gjithmonë kam luftuar për Brazilin, por tani ka ardhur momenti të ndalem”, deklaroi ai.

Vendimi i Neymarit shënon fundin e një epoke për futbollin brazilian. Golashënuesi më i mirë në historinë e “Seleçaos” do ta përqendrojë tani karrierën e tij vetëm te Santosi, klubi ku nisi rrugëtimin drejt yllit të futbollit botëror.

Konfirmimi i largimit erdhi në një nga momentet më emocionuese të karrierës së tij. Në stadiumin “MetLife” në New Jersey, Neymar u pa me lot në sy pas eliminimit të Brazilit. Edhe pse realizoi një penallti në çastet e fundit të sfidës, ajo nuk mjaftoi për të shmangur eliminimin dhe fundin e një historie të jashtëzakonshme me kombëtaren.

Pas 16 vitesh, qindra paraqitjesh dhe statusit të golashënuesit më të mirë në historinë e Brazilit, Neymar largohet nga skena ndërkombëtare si një prej emrave që la gjurmë të pashlyeshme në futbollin botëror.

Një nga portierët më të mëdhenj në historinë e futbollit po i afrohet fundit të karrierës. Manuel Neuer ka bërë të ditur se sezoni 2026/27 pritet të jetë i fundit për të në futbollin profesionist, duke i dhënë fund një rruge të jashtëzakonshme që ka zgjatur më shumë se dy dekada.

Portieri legjendar gjerman po përgatitet për sezonin e tij të 16-të me Bayern Munich, ndërsa do të hyjë edhe në sezonin e 21-të në Bundesligë. Edhe pse së shpejti mbush 40 vjeç dhe përballet me konkurrencën në rritje nga talenti i ri Jonas Urbig, Neuer nuk e ka humbur dëshirën për të qenë pjesë e skuadrës bavareze.

Në një intervistë për gazetën gjermane Bild, kapiteni i Bayernit pranoi se vera e vitit 2027 është afati që ka vendosur për t’i dhënë fund karrierës së tij.

“Nuk futem në fushë duke menduar se kjo mund të jetë ndeshja ime e fundit, edhe pse një ditë sigurisht do të vijë ai moment. Megjithatë, duket pothuajse e sigurt se do të tërhiqem në vitin 2027.”

Neuer zbuloi se ishte shumë pranë pensionimit në fund të sezonit të kaluar, por atmosfera brenda klubit e bindi të vazhdonte.

“Në rreth 85 për qind të rasteve do ta kisha mbyllur karrierën pas sezonit të kaluar. Por është një kënaqësi e jashtëzakonshme të luaj në këtë ekip dhe të punoj me këtë staf trajnerësh.”

Sipas tij, ambicia e Bayernit për të luftuar në çdo kompeticion ishte arsyeja kryesore që e shtyu të vazhdonte.

“Ne kemi gjithmonë mundësinë të garojmë për çdo trofe. Ky grup lojtarësh, stafi dhe mënyra si funksionon klubi ishin ato 15 për qind që më bindën të vazhdoj. Është kënaqësi e pastër.”

Pas pesë sezonesh te Schalke 04 dhe një epoke të paharrueshme me Bayern Munich, Manuel Neuer është gati të mbyllë një karrierë që ndryshoi përgjithmonë mënyrën se si shihet roli i portierit modern. Sezoni i ardhshëm pritet të jetë kapitulli i fundit i një legjende që la gjurmë të pashlyeshme në futbollin botëror.

Real Madridi ka konfirmuar edhe një herë fuqinë e tij ekonomike, duke bërë të ditura të ardhurat rekord prej 1.221 miliardë eurosh për vitin financiar 2025/26, pa përfshirë fitimet nga shitja e lojtarëve. Shifrat u miratuan në mbledhjen e fundit të bordit drejtues të klubit.

Me një rritje prej 3.1% krahasuar me sezonin e kaluar, klubi madrilen hyn në histori si organizata e parë sportive në botë që tejkalon pragun e 1.2 miliardë eurove të ardhura vjetore.

Sipas raportit zyrtar, rritja është nxitur kryesisht nga performanca e fortë e stadiumit “Santiago Bernabéu” dhe zgjerimi i aktiviteteve komerciale. Të ardhurat nga stadiumi janë rritur me 11%, ndërsa ato nga marketingu kanë shënuar një rritje prej 6%, falë marrëveshjeve të reja të sponsorizimit.

Në aspektin financiar, Real Madridi ka regjistruar një fitim neto prej 26.3 milionë eurosh, duke zgjatur në 26 sezone radhazi serinë e bilanceve pozitive – një tregues i stabilitetit dhe menaxhimit të suksesshëm të klubit.

Aktualisht, pasuria neto e klubit vlerësohet në 624 milionë euro, ndërsa rezervat financiare arrijnë në 83 milionë euro.

Ndërkohë, investimi total në transformimin e stadiumit “Santiago Bernabéu” ka shkuar në 1.407 miliardë euro, me drejtuesit e klubit që theksojnë se Real Madridi vazhdon të gëzojë një pozitë të fortë financiare për të përballuar sfidat dhe investimet e ardhshme, përfshirë edhe merkaton e transferimeve.

Roberto Mancini është rikthyer zyrtarisht në krye të Kombëtares së Italisë, tre vjet pas largimit të tij, ndërsa Federata Italiane e Futbollit ka konfirmuar edhe emërimin e Claudio Ranierit në postin e drejtorit teknik.

Emërimi i Mancinit i jep fund një periudhe të trazuar në futbollin italian, e cila u karakterizua nga ndryshime të shumta në drejtimin e projektit sportiv të “Azzurrëve”.

Fillimisht, Paolo Maldini ishte emëruar drejtor teknik i kombëtares, me Leonardo në rolin e këshilltarit të tij. Dyshja prezantoi një projekt të ri për zhvillimin e futbollit italian, ndërsa në prapaskenë u zhvilluan bisedime edhe me Pep Guardiolën për stolin e Italisë.

Megjithatë, plani ndryshoi brenda pak ditësh. Maldini dhe Leonardo dhanë dorëheqjen pasi tentativa për të emëruar Andrea Pirlon dështoi, për shkak të angazhimit të tij si ambasador global i një kompanie ruse të basteve.

Pas këtij zhvillimi, drejtuesit e federatës vendosën t’i besojnë sërish Roberto Mancinit, i cili rikthehet në stolin e Italisë pas aventurës së tij me Kombëtaren e Arabisë Saudite.

Federata Italiane e Futbollit e bëri zyrtar emërimin përmes një njoftimi të shkurtër në rrjetet sociale.

“Roberto Mancini është trajneri i ri i Kombëtares.”

Për 60-vjeçarin bëhet fjalë për një rikthim në një ambient që e njeh shumë mirë. Ai drejtoi Italinë nga viti 2018 deri në vitin 2023, periudhë gjatë së cilës i dhuroi vendit titullin e Kampionit të Evropës në Euro 2020. Megjithatë, mandati i tij u shoqërua edhe me zhgënjimin e madh të moskualifikimit në Kupën e Botës 2022.

Tashmë, Mancini do të ketë misionin të rikthejë Italinë mes kombëtareve më të forta në botë dhe të ndërtojë një skuadër konkurruese për sfidat e ardhshme ndërkombëtare.

Manchester City ka siguruar të ardhmen e një prej lojtarëve më të rëndësishëm të repartit defensiv. Kampioni anglez ka zyrtarizuar vazhdimin e kontratës me Josko Gvardiolin, i cili do të jetë pjesë e skuadrës nga “Etihad” deri në verën e vitit 2031.

Mbrojtësi kroat, i cili iu bashkua Cityt në vitin 2023 nga RB Leipzig për rreth 90 milionë euro, kishte ende dy vite të mbetura në marrëveshjen e mëparshme, por drejtuesit e klubit vendosën ta shpërblejnë me një kontratë të re afatgjatë.

Pas firmosjes së kontratës së re, Gvardiol nuk e fshehu kënaqësinë për vazhdimin e aventurës në Manchester, duke theksuar se qëndrimi te City ishte zgjedhja e tij e parë.

“Sapo mësova se Man City dëshironte të ma rinovonte kontratën, e kuptova menjëherë se kjo ishte ajo që doja. Është klubi më i mirë në botë për të luajtur”, deklaroi 24-vjeçari.

Reprezentuesi kroat vlerësoi edhe potencialin e skuadrës për sezonet e ardhshme, duke theksuar se grupi aktual ka cilësi dhe ambicie të mëdha.

“Lojtarët që janë këtu janë të jashtëzakonshëm. Kemi një ekip të ri, me shumë cilësi dhe potencial. Besoj se do të arrijmë suksese të mëdha në vitet që vijnë”, shtoi ai.

Që prej transferimit në Premier League, Gvardiol është shndërruar në një nga figurat kryesore të mbrojtjes së Manchester Cityt. Me fanellën e klubit anglez ai ka fituar pesë trofe, përfshirë titullin e Premier Leagues dhe FA Cup, duke dëshmuar vlerat e tij në nivelet më të larta të futbollit evropian.

Edhe drejtori sportiv i Cityt, Hugo Viana, e cilësoi rinovimin si një lajm të rëndësishëm për klubin, duke theksuar besimin e plotë që kanë te mbrojtësi kroat.

“Josko është një futbollist tek i cili klubi beson plotësisht. Pavarësisht moshës së re, ai tashmë është një nga mbrojtësit më të mirë në botë. Jemi shumë të lumtur që ai ka firmosur një kontratë të re”, u shpreh Viana.

Me këtë marrëveshje, Manchester City siguron shërbimet e një prej mbrojtësve më premtues në botë edhe për shumë vite, ndërsa Gvardiol vazhdon të ndërtojë trashëgiminë e tij në “Etihad”.

Xhudisti i njohur kosovar, Akil Gjakova, ka bërë të ditur se para tij nis një sfidë e re madhore në karrierë, rrugëtimi drejt kualifikimit për Lojërat Olimpike, që do të mund të ishte pjesëmarrja e tij e tretë në ngjarjen më të madhe sportive në botë.

Përmes një postimi në rrjetet sociale, Gjakova ka shprehur krenarinë për rrugëtimin e tij në skenën ndërkombëtare të xhudos, duke theksuar se qëndrimi për më shumë se një dekadë në elitën botërore është rezultat i shumë viteve punë, sakrifice dhe përkushtimi.

“Para meje nis një tjetër kapitull i madh, rrugëtimi drejt kualifikimit për Lojërat Olimpike, Olimpiada e tretë në karrierën time. Të jem pjesë e elitës botërore të xhudos për rreth 13 vite është një arritje që më bën krenar për sakrificën, punën dhe rezultatet e arritura”, ka shkruar Gjakova.

Medalist dhe një prej emrave kryesorë të xhudos kosovare, Akili ka vlerësuar edhe rolin e trajnerit të tij, Driton Kuka, të cilin e konsideron si një nga njerëzit më të rëndësishëm në zhvillimin e tij sportiv.

“Trajneri im Driton Toni Kuka është ai që i dha drejtim dhe jetë rrugëtimit tim si sportist”, është shprehur xhudisti kosovar.

Gjakova ka falënderuar gjithashtu të gjithë ata që e kanë mbështetur gjatë rrugëtimit të tij, duke veçuar edhe përkrahësit e parë që i qëndruan pranë në hapat e parë të karrierës.

Tashmë objektivi i radhës për xhudistin kosovar është i qartë: të kalojë me sukses ciklin e ri olimpik dhe të sigurojë një tjetër paraqitje në Lojërat Olimpike, duke vazhduar ta përfaqësojë Kosovën në nivelin më të lartë të xhudos botërore.