Category: Sport

Selektori i Kombëtares së Kosovës, Franco Foda, ishte i ftuari i radhës në emisionin “FFK Podcast”.

Në këtë intervistë, ai foli për shumë tema të rëndësishme në prag të dy ndeshjeve të muajit tetor kundër Sllovenisë dhe Suedisë, të vlefshme për kualifikueset e Kupës së Botës.

Ndër të tjera, Foda u ndal edhe te një dukuri që ka qenë e pranishme kohët e fundit në Kombëtare – refuzimi i disa futbollistëve për t’u grumbulluar me ekipin për arsye të ndryshme.

“Për çdo lojtar, Kombëtarja duhet të jetë gjithmonë prioriteti më i lartë. Nëse je i shëndetshëm, duhet të jesh në dispozicion – sepse përfaqëson gjithë vendin; i gjithë vendi është pas teje. Kjo është ajo që e dallon Kombëtaren nga klubi. Në klub ke shumë tifozë, por jo të gjithë vendin,” theksoi Foda. /ATVLIVE.TV

Kombëtarja e Kosovës mban sot stërvitjen e fundit para përballjes me Slloveninë, në kuadër të kualifikimeve për Kupën e Botës 2026.

Seanca stërvitore e fundit e “Dardanëve” zhvillohet në orën 17:00, ndërsa paraprakisht, nga ora 16:30, përzgjedhësi Franco Foda do të mbajë një konferencë për media.

Po ashtu, nga ora 20:00, në stadiumin “Fadil Vokrri” do të mbahet konferenca për media e Kombëtares së Sllovenisë.

Kujtojmë se ndeshja mes Kosovës dhe Sllovenisë luhet nesër, me fillim nga ora 20:45, në stadiumin “Fadil Vokrri” në Prishtinë. /ATVLIVE.TV

Kampioni Olimpik Rio 2016, peshëngritësi, Kianoush Rostami, do të debutojë sot për Kosovën.

Rostami ka zgjedhur të përfaqësojë vendin tonë në fillim të këtij viti, ndërsa momentalisht ndodhet në Forde të Norvegjisë, ku po mbahet Kampionati Botëror në peshëngritje.
Rostami do të garojë në kategorinë deri në 94 kg. Gara e tij nis në ora 19:30.

Kianoush ka përfaqësuar Iranin deri në vitin 2022, por shkaku i mosmarrëveshjeve me Federatën e këtij vendi, ka vendosur të ndryshojë përfaqësim.

Derisa në Rio 2016 Kianoush fitoi medaljen e artë, katër vjet më herët në Londër 2012, u stolis me medaljen e argjendtë. Ka edhe tri medalje botërore, dy të arta dhe një të argjendtë.

Bazuar në rezultatet e tij, ai është kandidat për të fituar medalje botërore për Kosovën./ATVLIVE.TV

Ndeshja e shumëpritur mes Kombëtares së Kosovës dhe Sllovenisë, që do të zhvillohet këtë të premte në stadiumin “Fadil Vokrri” në Prishtinë, do të gjykohet nga italianët.

Sipas UEFA, drejtësinë në fushë do ta ndajë Marco Guido nga Italia, ndërsa ndihmës të tij do të jenë Giorgio Peretti dhe Giuseppe Perrotti dhe detyrën e gjyqtarit të katërt do ta mbajë Daniele Chiffi.

Teknologjia VAR do të jetë gjithashtu nën drejtimin e italianëve – Marco Di Bello do të jetë Video Assistant Referee, ndërsa Valerio Marini do të shërbejë si asistent i VAR-it.

Përballja që pritet me shumë interes nga publiku, bëri që biletat të shiten për tri orë, ndërsa rreth 13 mijë tifozë do të mbushin shkallët e “Fadil Vokrrit” për të mbështetur “Dardanët” në një duel të rëndësishëm kualifikues për Kupën e Botës 2026.

Pas ndeshjes në Prishtinë, Sllovenia do të presë Zvicrën në stadiumin “Stozhice”, ndërsa në nëntor do të zhvillojë edhe dy sfidat e fundit – në shtëpi kundër Kosovës dhe në udhëtim ndaj Suedisë.

Fituesi i grupit siguron biletën direkte për Botërorin 2026, ndërsa skuadra e vendit të dytë do të kërkojë kualifikimin përmes play-off-it. /ATVLIVE.TV

Shtëpia evropiane e futbollit, UEFA, ka ndaluar zhvillimin e gjashtë ndeshjeve ndërkombëtare për shkak të konflikteve dhe tensioneve të vazhdueshme politike mes disa shteteve. Këto përballje përfshijnë ndeshje si Gjibraltari – Spanja dhe Rusia – Ukraina, që konsiderohen të papërshtatshme për t’u zhvilluar në kushte normale sportive.

Ndryshe nga futbolli i klubeve, ku ekipet mund të përballen pavarësisht rivaliteteve, në nivel kombëtar UEFA ruan një qasje më të ndjeshme ndaj marrëdhënieve politike ndërmjet shteteve.
Për këtë arsye, disa ndeshje janë ndaluar përkohësisht ose përfundimisht.

Aktualisht, UEFA ka bllokuar përballjet:
• Ukrainë – Rusi
• Kosovë – Serbi
• Kosovë – Bosnje e Hercegovinë
• Kosovë – Rusi
• Armeni – Azerbajxhan
• Gjibraltar – Spanjë

Përjashtim bën një nga rivalitetet më të forta në Evropë, Serbia – Shqipëria, që do të zhvillohet këtë fundjavë si pjesë e kualifikimeve për Kupën e Botës. Kjo përballje, e mbushur me histori dhe emocione, kërkon masa të larta sigurie – mbi 2,000 forca policore janë mobilizuar për të garantuar rendin.

Rikujtojmë se përplasja e famshme e vitit 2014, kur një dron me flamur nacionalist shqiptar u shfaq mbi fushën në Beograd, shkaktoi tensione të mëdha, përleshje mes lojtarëve dhe tifozëve, si dhe ndërprerjen e ndeshjes. Më pas, UEFA ia dha fitoren 3-0 Shqipërisë.

Ndërkohë, ndalimi i ndeshjeve të tjera mbetet në fuqi për arsye të qarta politike. Konflikti Rusi – Ukrainë pas pushtimit të vitit 2022 ka thelluar ndarjen mes dy vendeve, ndërsa Armenia dhe Azerbajxhani nuk lejohen të përballen për shkak të konfliktit të pazgjidhur të Nagorno-Karabakut.

Edhe Gjibraltari dhe Spanja nuk mund të luajnë kundër njëra-tjetrës për shkak të mosmarrëveshjeve territoriale, pasi Spanja vazhdon të pretendojë sovranitetin mbi ishullin që aktualisht është nën administrimin britanik.

Kështu, futbolli edhe një herë dëshmon se, ndonëse është sport që bashkon miliona njerëz, politika vazhdon të ketë ndikim të drejtpërdrejtë në fushën e blertë.

Një moment krenarie për futbollin kosovar ka ndodhur në Romë, gjatë mbledhjes së Shoqatës Evropiane të Klubeve (ECA).

Presidenti i Paris Saint-Germain, Nasser Al-Khelaifi, ka marrë si dhuratë fanellën zyrtare të tre herë kampionit të Kosovës, Ballkanit, nga Sekretari i Përgjithshëm i klubit, Arben Osmani.

Ky gjest simbolik përfaqëson jo vetëm respektin dhe miqësinë mes klubeve, por edhe prezantimin e denjë të futbollit kosovar në arenën ndërkombëtare.

Ballkani, që ka bërë histori me paraqitjet e tij në garat evropiane, tashmë është bërë emër i njohur edhe për drejtuesit e futbollit botëror, ndërsa ky takim me Al-Khelaifin shënon një tjetër hap të rëndësishëm në ndërtimin e imazhit të futbollit kosovar në Evropë.

Takimi u zhvillua në kryeqytetin italian, Romë, ku u mblodhën drejtuesit e klubeve më të fuqishme të kontinentit për të diskutuar zhvillimin e mëtejshëm të futbollit evropian.

Sulmuesi i Kosovës dhe ylli i Hoffenheim-it, Fisnik Asllani, po përjeton një sezon të jashtëzakonshëm në Bundesliga dhe tashmë ka tërhequr vëmendjen e disa prej klubeve më të mëdha evropiane.

Sipas raportimeve të Sky Sport, futbollisti 22-vjeçar ka një klauzolë lirimi në kontratën e tij me Hoffenheimin, gjë që mund ta bëjë të mundur një transferim të madh gjatë verës së ardhshme – madje drejt një klubi që luan në Ligën e Kampionëve.

Në një intervistë për Sport Bild, Asllani ka treguar hapur ëndrrën e tij më të madhe:

“Klubi im i ëndrrave ka qenë gjithmonë FC Barcelona. Gjithmonë kam dashur të luaj atje. Dua të luaj në Ligën e Kampionëve një ditë. Është e rëndësishme të kesh ëndrra dhe të punosh drejt tyre.”

Forma e tij këtë sezon ka qenë mbresëlënëse – 4 gola dhe 1 asistim në gjashtë ndeshje të para – duke e bërë një nga golashënuesit më produktivë të Bundesligës. Kjo ka bërë që interesimi për të të rritet nga klube të Spanjës dhe Anglisë, përfshirë edhe skuadra elitare si Barcelona dhe Arsenali.

Asllani, i cili sezonin e kaluar shkëlqeu në huazim te SV Elversberg me 29 gola në 37 ndeshje, ka parë vlerën e tij në treg të rritet dhjetëfish, duke arritur në 8 milionë euro, ndërsa pritet të përditësohet në mbi 18 milionë euro në vlerësimin e ardhshëm të Transfermarkt.

Burime pranë tregut të transferimeve theksojnë se:

“Ai po e kalon fazën e talenteve dhe po hyn në një nivel të ri. Me këtë ritëm, vlera e tij pritet të dyfishohet. Ka sinjale të qarta që verën e ardhshme mund të jetë pjesë e një klubi të madh evropian.”

Me këtë formë dhe ambicie, Fisnik Asllani po e forcon gjithnjë e më shumë pozitën e tij si ylli i ardhshëm i futbollit kosovar në arenën ndërkombëtare.

Joshua Zirkzee po shqyrton seriozisht mundësinë e largimit nga Manchester United gjatë afatit kalimtar të janarit, pas zhgënjimit me minutazhin e kufizuar që ka marrë këtë sezon nën urdhrat e trajnerit Ruben Amorim.

Sulmuesi holandez, i cili iu bashkua “Djajve të Kuq” verën e kaluar nga Bologna për 36.8 milionë funte, ende nuk ka arritur të lërë gjurmë në “Old Trafford”. Edhe pse ka regjistruar katër paraqitje në total, Zirkzee ka grumbulluar vetëm 82 minuta lojë, pa arritur të shënojë apo të asistojë.

Burime nga Anglia bëjnë të ditur se 23-vjeçari është i shqetësuar për rolin e tij aktual dhe për ndikimin që kjo situatë mund të ketë në mundësinë e tij për të qenë pjesë e Holandës në Kupën e Botës 2026.

Pikërisht për këtë arsye, ai po mendon seriozisht për një transferim të ri, ndërsa interesimi për të nuk mungon. Klube të mëdha si Juventus, Roma dhe PSV Eindhoven kanë shfaqur gatishmëri për ta afruar sulmuesin që shihet si një talent me potencial të madh.

Zirkzee, i cili ende nuk ka nisur asnjë ndeshje si titullar këtë sezon, pritet të vendosë për të ardhmen e tij në javët në vijim, me një largim të mundshëm në janar që duket gjithnjë e më i afërt.

Në një intervistë të sinqertë për “TVP Sport”, portieri i njohur polak Wojciech Szczesny ka ndarë një tregim të rrallë nga karriera e tij — një histori që fillon me cigaret në zhveshtore dhe përfundon me dashurinë për familjen.

“Ajo cigare në zhveshtore e përshkruan në mënyrë perfekte gjithë historinë time. U largova nga Arsenali për shkak të duhanit, cigaret më kanë shoqëruar për shumë vite. Por në fund, ishte vetë presidenti i Barcelonës, Joan Laporta, që ma dhuroi një cigare të shkëlqyeshme”, rrëfen Szczesny me humor.

Ai kujton me nostalgji momentin e festës pas titullit:
“Hyra në zhveshtore dhe pashë të gjithë bashkëlojtarët e lumtur, duke festuar. Për mua ishte një çast i jashtëzakonshëm gëzimi — një mbyllje e bukur për një karrierë plot emocione.”

Tashmë 34-vjeç, Szczesny është përkushtuar plotësisht ndaj familjes së tij. Baba i dy fëmijëve, Liam dhe Noelia, ai tregon se ndonëse karriera i ka sjellë lavdi, jeta familjare i ka dhuruar lumturinë më të madhe.

“Të jesh baba është sfida më e vështirë, por edhe më e bukura. Nuk e di sa mirë po ia dal, ndoshta këtë duhet ta pyesni gruan time dhe fëmijët, por është roli që më jep më së shumti gëzim”, u shpreh ai me buzëqeshje.

Szczesny po ashtu pranoi se gruaja e tij, Marina, ka qenë arsyeja që e bindi të mos tërhiqej plotësisht nga futbolli:
“Nuk doja të luaja më, isha gati të përkushtohesha vetëm ndaj familjes. Por Marina këmbënguli… dhe kishte të drejtë. I jam shumë mirënjohës për këtë.”

Një rrëfim njerëzor e i ngrohtë nga një kampion që, përtej fushës, mbetet një burrë dhe baba me zemër të madhe.

Kylian Mbappé po vazhdon të bëjë histori, edhe pse ende nuk ka arritur ta fitojë Topin e Artë.

Ylli francez është tani futbollisti me më së shumti renditje në “Top 10” të Ballon d’Or, pa e fituar asnjëherë atë.

Me plot 8 herë të radhitura në mesin e 10 më të mirëve, Mbappé ka lënë pas legjenda si:
Thierry Henry – 7 herë
Andrés Iniesta – 7 herë
Neymar – 6 herë
Zlatan Ibrahimović – 6 herë

Edhe pse vetëm 26-vjeçar, Mbappé ka qenë pjesë e elitës së futbollit botëror për gati një dekadë.

Ai tashmë mban edhe statusin e një prej lojtarëve më konsistentë të epokës moderne — gjithmonë pranë majës, por ende pa arritur “kurorën e artë”.