Category: Sport

Kombëtarja e Kosovës po përgatitet për dy ndeshjet vendimtare në kualifikimet për Kupën e Botës: të shtunën (15 nëntor) ndaj Sllovenisë dhe të martën (18 nëntor) ndaj Zvicrës.

Aktualisht, “Dardanët” ndodhen në vendin e dytë me 7 pikë, tri më pak se Zvicra, që kryeson Grupin B me 10 pikë. Vendi i parë në grup kualifikohet direkt në Botëror, ndërsa vendi i dytë shkon në “Play-Off”, ku do të luajë dy ndeshje të tjera për të siguruar biletën.

Si mund të kualifikohet Kosova direkt në Botëror?

• Të fitojë të dy ndeshjet ndaj Sllovenisë dhe Zvicrës;

• Të presë që Zvicra të mos fitojë ndaj Suedisë (barazim ose humbje).

Në këtë rast, Kosova përfundon me 13 pikë, ndërsa Zvicra me 10 ose 11, duke bërë që “Dardanët” të shkojnë direkt në Botëror.

Si mund të shkojë Kosova në “Play-Off”?

• Fiton ose barazon ndaj Sllovenisë;

• Edhe nëse humb dy ndeshjet, mund të kualifikohet në “Play-Off” nëse Sllovenia pëson humbje ndaj Suedisë dhe suedezët nuk fitojnë ndaj Zvicrës më parë.

Si mund të eliminohet Kosova?

• Humb të dy ndeshjet dhe Sllovenia fiton ndaj Suedisë;

• Humb të dy ndeshjet, Sllovenia barazon ndaj Suedisë, por ka gol-ndalim më të mirë se Kosova;

• Humb të dy ndeshjet dhe Suedia fiton të dy ndeshjet, duke pasur gol-ndalim më të mirë se Kosova.

Kjo është java më e rëndësishme në histori për Kosovën që nga pranimi në UEFA dhe FIFA, dhe çdo pikë do të ketë rëndësi vendimtare për fatin e saj në Botëror. /ATVLIVE.TV

Kombëtarja e Anglisë do të zhvillojë nesër ndeshjen e saj të parafundit në kualifikimet për Kupën e Botës, duke pritur Serbinë në stadiumin legjendar “Wembley”.

Skuadra vizitore do të përballet me mungesë të mbështetjes nga tifozët e saj, pasi Federata Serbe e Futbollit ka vendosur të mos shesë bileta për sektorin e tifozëve miq.

Anglia ka siguruar tashmë pjesëmarrjen në Botërorin e verës së ardhshme, pas gjashtë fitoreve në po aq ndeshje kualifikuese. Në përballjen e shtatorit në Beograd, “Tre Luanët” triumfuan 5-0, duke vazhduar formën e shkëlqyer nën drejtimin e Thomas Tuchel.

Megjithatë, ajo ndeshje u shoqërua me incidente, pasi disa lojtarë anglezë u shënjestruan me lazer, ndërsa tifozët serbë u përplasën në shkallët e stadiumit, duke detyruar ndërhyrjen e policisë. Vetëm një muaj më vonë, FIFA gjobiti Federatën Serbe me 83 mijë paund për sjelljen e tifozëve në ndeshjen ndaj Shqipërisë në të njëjtat kualifikime.

Duke marrë parasysh këto episode, Federata Serbe ka njoftuar se nuk do të marrë përsipër shitjen apo shpërndarjen e biletave për sfidën ndaj Anglisë. Në deklaratën zyrtare thuhet:

“Duke pasur parasysh përvojat e mëparshme dhe gjobat e larta të paguara, jo vetëm për ndeshjet në shtëpi, por edhe për incidentet jashtë vendit, Federata Serbe e Futbollit nuk do të organizojë shitjen e biletave për tifozët miq në ‘Wembley’ dhe nuk do të mbajë përgjegjësi për sjelljen e tyre gjatë ndeshjes kundër Anglisë.” / ATVLIVE.TV

Kombëtarja e Kosovës vijoi sot stërvitjet për ndeshjen kundër Sllovenisë.

Ndryshe nga dy seancat e mëparshme, trajneri Franco Foda pati në dispozicion katërshen: Rrahmani, Muriqi, Rexhbeçaj dhe Muharrem Jashari.

I vetmi që mungoi ishte portieri Aro Muric, i cili nuk do të luajë ndaj Sllovenisë për shkak të suspendimit.

Kosova do të përballet me Slloveninë të shtunën, në një ndeshje të vlefshme për kualifikimin në Kupën e Botës 2026, ndërsa pas tre ditësh do të presë Zvicrën në “Fadil Vokrri”. /ATVLIVE.TV

Mesfushori i talentuar i Barcelonës, Pedri González, po i afrohet rikthimit pas dëmtimit që e ka mbajtur jashtë fushave për disa javë. Sipas raportimeve të Diario Sport, procesi i rikuperimit të tij po ecën shumë mirë dhe lojtari mund të jetë gati për ndeshjen ndaj Real Betis më 6 dhjetor.

Kthimi i Pedrit do të jetë një lajm i shkëlqyer për trajnerin Hansi Flick, i cili ka vuajtur mungesën e mesfushorit kreativ në ndeshjet e fundit.

Barcelona shpreson ta ketë 21-vjeçarin në formë të plotë për fazën e ngjeshur të dhjetorit, ku ekipi katalanas synon të ruajë ritmin në garën për titull në La Liga dhe të mbyllë me sukses fazën e grupeve në Champions League.

Bashkimi dhe Trepça do të luajnë sonte ndeshje të rëndësishme në grupet e FIBA Europe Cup.

Nënkampioni i Kosovës, Bashkimi, do të zhvillojë ndeshjen e fundit në shtëpi, ku do të përballet me Pallacanestro Reggiana. Prizrenasit kanë një fitore dhe tri humbje deri tani, ndërsa
italianët kanë dy fitore e dy humbje. Takimi i luajtur në Itali përfundoi 100:65 në favor të vendasve.

Kjo është hera e parë që nënkampionët e Kosovës garojnë në grupet e FIBA Europe Cup. Ndeshja zhvillohet nga ora 19:00.

Nga ana tjetër, kampionia e Kosovës, Trepça, udhëton drejt Gjermanisë për t’u përballur me Braunschweig. Për ‘Xehetarët’, ky është edicioni i dytë radhazi në grupet e FIBA Europe Cup.

Mitrovicasit kanë regjistruar katër humbje, ndërsa skuadra gjermane ka tre fitore e një humbje, po aq sa edhe PAOK, ndërsa Anwil ka dy fitore e dy humbje. Takimi në Gjermani fillon nga ora 18:30. /ATVLIVE.TV

Skenari që ishte paralajmëruar prej kohësh do të bëhet realitet më 15 shkurt 2026, kur në “Intuit Dome” të Los Angeles, Shtetet e Bashkuara të Amerikës do të sfidojnë botën në një nga “All Star Game”-t më të pritura të historisë.

Turneu do të zhvillohet midis tre skuadrave, secila e përbërë nga tetë lojtarë.

Dy ekipe do të përfaqësojnë Amerikën, ndërsa e treta do të përfaqësojë botën.

Çdo ndeshje do të zgjasë 12 minuta. Fituesi i takimit të parë do të ndeshet me ekipin e tretë, ndërsa më pas ekipi i tretë do të përballet edhe me ekipin që ka humbur në ndeshjen e parë.

Në fund, ekipet më të mira do të përcaktojnë fituesin e turneut. Nëse të gjitha skuadrat regjistrojnë nga një fitore dhe një humbje në takimet e para, finalistet do të vendosen sipas diferencës së pikëve të shënuara. /ATVLIVE.TV

Ylli portugez, Cristiano Ronaldo, ka bërë një deklaratë të bujshme lidhur me të ardhmen e tij në arenën ndërkombëtare. Në një postim të ndarë nga gazetari i njohur Fabrizio Romano, pesë herë fituesi i “Topit të Artë” ka konfirmuar se Botërori 2026 do të jetë i fundit në karrierën e tij.

“Po, 2026 do të jetë Botërori im i fundit, 100%. Atëherë do të jem 41 vjeç,” – ka thënë Ronaldo.

Kapiteni i Portugalisë, që prej më shumë se dy dekadash ka qenë një nga figurat më të ndritura të futbollit botëror, duket se po e përgatit publikun për përmbylljen e një epoke të artë.

Ronaldo pritet të udhëheqë sërish Portugalinë në “Botërorin 2026”, i cili do të zhvillohet në SHBA, Kanada dhe Meksikë – një skenë e madhe për mbylljen e karrierës së tij ndërkombëtare legjendare.
S

Të enjten do të luhen dy ndeshje të xhiros së tetë të Superligës së Kosovës në hendboll në konkurrencë të femrave.

Nga ora 18:30 zhvillohet ndeshja mes Kastriotit dhe Besës, në palestrën ‘Bill Clinton’ në Ferizaj.

Kastrioti e Besa janë ende pa pikë dhe të paktën njëra prej këtyre ekipeve do t’i ketë pikët e para.

Ndërkohë derbi i xhiros mes Samadrexhës dhe Ferizajt, fillon në ora 20:00. Kjo ndeshje luhet në palestrën “Afrim Bunjaku” në Samadrexhë.

Samadrexha është lidere me 12 pikë. I ka fituar gjashtë ndeshjet e deritashme, ndërsa synon fitore tjetër.

Ndërkohë Ferizaj është në vendin e katërt me tetë pikë. Ka katër fitore e një humbje.

Ndeshjet mes Shqiponjës e Prishtinës si dhe Istogut e Terezës do të zhvillohen më 19 nëntor.

Në mesjavë luhen edhe disa ndeshje të mbetura. Vëllaznimi – Rahoveci luhet të mërkurën nga ora 19:30 në Rahovec. Kjo ndeshje i takon xhiros së katërt të Superligës së hendbollistëve.

Të enjten prej orës 20:00 është ndeshja mes Llapit e Prishtinës, që po ashtu i takon xhiros së katërt të Superligës së hendbollistëve. /ATVLIVE.TV

Sllovenia ndodhet nën presion të madh para ndeshjes me Kosovën, e cila zhvillohet në kuadër të xhiros së parafundit të kualifikimeve për Kupën e Botës 2026.

Djelmoshat tanë synojnë të marrin pikë në stadiumin Stozhice të Lubjanës, një rezultat që praktikisht do t’i sigurojë pozitën e dytë në grup.

Sipas mediave sllovene, Rtvslo, Sllovenia duhet të mposhtë Kosovën në shtëpi për të mbajtur gjallë shpresat e saj për kualifikim përmes play-off-it. Deri tani, skuadra ka shënuar vetëm dy gola në katër ndeshje dhe ka tre pikë.

Sllovenët do të jenë pa Benjamin Šeško, i cili është dëmtuar në gju gjatë ndeshjes Tottenham – Manchester United dhe nuk do të luajë ndaj Kosovës. Po ashtu, Adam Gnezda Čerin, motori i ekipit, mungon për shkak të kartonëve të verdhë.

Në renditjen e Grupit B, Zvicra kryeson me 10 pikë, ndjekur nga Kosova me 7 pikë, Sllovenia me 3 dhe Suedia me 1 pikë. /ATVLIVE.TV

Lamine Yamal ka mbërritur dje në Barcelonë pas përjashtimit të tij nga kombëtarja e Spanjës, një vendim që ka shkaktuar jehonë në mediat ndërkombëtare.

Përjashtimi erdhi pas disa mosmarrëveshjeve mes Barcelonës dhe përfaqësueses spanjolle, duke përfshirë shqetësimet e lojtarit gjatë muajit të kaluar. Yamal do të pushojë në qytetin katalanas dhe do të përpiqet të rikthehet në formën më të mirë për ndeshjet e ardhshme me Barcelonën.

Trajneri i Spanjës, Luis de la Fuente, ka thirrur Jorge de Frutos në vend të 18-vjeçarit për ndeshjet që mbeten në nëntor.

Spanja do të përballet me Gjeorgjinë dhe Turqinë në ndeshjet kualifikuese për Botërorin 2026, më 15 dhe 18 nëntor. /ATVLIVE.TV