Category: SPORT

Pak ditë pas rinovimit rekord të Max Verstappen me Red Bull, ka ardhur edhe përgjigjja e Lando Norris. Kampioni në fuqi i botës në Formula 1 ka nënshkruar një kontratë të re me McLaren, e cila e lidh atë me skuderinë britanike deri në vitin 2030.

Në marrëveshje është përfshirë edhe një opsion shumëvjeçar, që mundëson zgjatjen e kontratës edhe përtej këtij viti.

Lidhja mes Norrisit dhe McLarenit ka nisur në vitin 2017, kur britaniku iu bashkua skuadrës përmes programit të të rinjve, fillimisht duke marrë rolin e pilotit testues dhe duke punuar në simulator.

Në vitin 2019, Norris u bë pilot titullar i skuderisë britanike dhe që nga atëherë ka zhvilluar 163 gara, një rekord absolut për një pilot të McLarenit.

Gjatë kësaj periudhe, Norris ka regjistruar 18 pole position, 48 podiume dhe 13 fitore në gara, ndërsa ka kontribuar në dy tituj botërorë për konstruktorë dhe ka fituar edhe titullin botëror për pilotë.

Rinovimi i Norrisit vjen pas atij të Oscar Piastrit, i cili u realizua në mars të vitit të kaluar, ndërsa i bashkohet kontratave afatgjata të nënshkruara gjatë dy viteve të fundit edhe nga drejtori ekzekutiv Zak Brown dhe drejtori i ekipit, Andrea Stella.

Por dhurata për Norris nuk përfundon me kontratën e re. Britaniku do të marrë edhe makinën MCL39, me të cilën garoi gjatë sezonit 2025 dhe që e ndihmoi të kurorëzohej kampion bote.

Kjo dhuratë dëshmon edhe një herë për rëndësinë e Norrisit për McLarenin dhe kontributin e tij në sukseset e fundit të skuadrës, veçanërisht në fitimin e titullit të dytë radhazi për konstruktorë dhe në triumfin e tij personal në Formula 1, duke u bërë piloti i parë i McLarenit që fiton titullin botëror që nga viti 2008.

“Prishtina Open 2026” ka nisur në Prishtinë, duke mbledhur për tri ditë sportistë nga vende të ndryshme. Dita e parë solli garat e kategorisë U21 dhe të veteranëve, me paraqitje të shkëlqyera edhe nga sportistët kosovarë.

Kryefjala e ditës ishte Anisa Domaniku, e cila triumfoi në kategorinë U21. Pas një rrugëtimi të suksesshëm, ajo mposhti në finale maqedonasen Stojanovska me rezultat 3:2 në sete. Në vendin e tretë u rendit Sara Hoxha.

Te djemtë U21, Akil Mahmuti zuri vendin e dytë, pasi u mposht në finale nga turku Ibrahim Zer, ndërsa Adriatik Maloku fitoi medaljen e bronztë pas fitores ndaj Eron Karabaxhakut.

Gara interesante u zhvilluan edhe në kategoritë e veteranëve. Oleh Biletskyi triumfoi në kategorinë 40–49 vjeç, Oleksii Naplokov në atë 50–59, Jonuz Tufa nga Shqipëria në kategorinë 60–64, Remzi Shala në 65–69, ndërsa Sheshivar Veliu triumfoi në kategorinë 70+.

Një risi e veçantë e këtij edicioni ishte prezantimi i “VR Table Tennis Experience”. Pjesëmarrësit dhe vizitorët patën mundësinë të provojnë pingpongun përmes realitetit virtual, duke i dhënë turneut një dimension të ri teknologjik dhe argëtues.

“Prishtina Open 2026” vazhdon sot, të shtunën, me garat e kategorisë U13 nga ora 10:00, ndërsa nga ora 14:00 nis faza e grupeve për seniorë.

Xhudistja kosovare, Laura Fazliu, ka siguruar kualifikimin në gjysmëfinale të Lojërave Mesdhetare “Taranto 2026”.

Pasi e nisi garën pa luftë, Fazliu u tregua e fortë në çerekfinale, duke e siguruar fitoren e parë në këtë garë.

Xhudistja jonë dominoi ndaj kundërshtares turke, Özlem Yıldız, të cilën e detyroi të merrte tri dënime dhe, në këtë mënyrë, siguroi eliminimin e saj.

Fazliu tashmë do të garojë në gjysmëfinale, ku do të synojë të avancojë edhe më tej dhe të luftojë për medaljen e artë në “Taranto 2026”.

Pak ditë përpara se të festojë ditëlindjen e 24-t, Bradley Barcola pritet të marrë një dhuratë të veçantë, një transferim historik në karrierën e tij.

Sulmuesi francez, i cili aktivizohet në krahun e majtë dhe është autor i tre golave në Kupën e Botës së fundit, është shumë pranë largimit nga Paris Saint-Germain për t’iu bashkuar Liverpoolit.

Detajet e marrëveshjes mes dy klubeve janë bërë publike nga gazetari i njohur David Ornstein, i cili raporton se transferimi i Barcolas në Anfield është mbyllur.

Sipas tij, Liverpooli dhe PSG-ja kanë arritur marrëveshjen përfundimtare. Klubi anglez do të paguajë 106 milionë funte, rreth 125 milionë euro, si shumë fikse, ndërsa marrëveshja përfshin edhe 17 milionë funte, rreth 20 milionë euro, në formën e bonuseve.

Reprezentuesi i Francës pritet t’i kryejë testet mjekësore brenda 24 orëve, përpara se të firmosë një kontratë pesëvjeçare me Liverpoolin.

Gjatë periudhës së tij te PSG-ja, Barcola ka zhvilluar 152 ndeshje, duke shënuar 39 gola dhe dhënë 37 asistime.

Me klubin parisien, francezi ka fituar tre tituj kampionë, dy trofe të Ligës së Kampionëve, dy kupa vendase dhe një Kupë Ndërkontinentale.

Barcola iu bashkua PSG-së nga Lyon tre vjet më parë, për një shumë prej 45 milionë eurosh. Tashmë, ai është pranë një transferimi që do ta çojë në një tjetër nivel karrierën e tij dhe do ta bëjë një nga blerjet më të shtrenjta të Liverpoolit.

Real Madridi po shqyrton mundësinë e largimit të mbrojtësit 27-vjeçar, Trent Alexander-Arnold, me Liverpoolin dhe Newcastle Unitedin si dy opsione të mundshme për të ardhmen e tij.

Situata e transferimeve te Real Madridi mund të ndryshojë në mënyrë dramatike në orët në vijim, ndërsa Alexander-Arnold po shqyrton një rikthim të menjëhershëm në Ligën Premier.

Mbrojtësi anglez ka humbur vendin e titullarit pas ardhjes së Denzel Dumfries nga Interi, me trajnerin Jose Mourinho që i ka dhënë përparësi holandezit në krahun e djathtë të mbrojtjes.

Alexander-Arnold iu bashkua Real Madridit si lojtar i lirë, pasi kontrata e tij me Liverpoolin skadoi. Megjithatë, sezoni i tij i parë në Spanjë u shoqërua me ndryshime taktike dhe probleme fizike, ndërsa transferimi i Dumfries ka reduktuar ndjeshëm minutat e tij në fushë.

Pakënaqësia për situatën aktuale ka bërë që përfaqësuesit e lojtarit të kërkojnë përshpejtimin e negociatave për një largim nga kryeqyteti spanjoll përpara 1 shtatorit.

Bordi i Real Madridit nuk e ka përjashtuar mundësinë e një transferimi zyrtar në ditët e fundit të afatit kalimtar, nëse vjen një ofertë që përmbush kërkesat financiare të klubit.

Liverpooli po e shqyrton gjithashtu mundësinë e rikthimit të Alexander-Arnold. Drejtuesit e klubit anglez e shohin atë si një alternativë për të konkurruar për vendin e titullarit në krahun e djathtë, si dhe për të ofruar më shumë opsione në mesfushë.

Aftësia e tij për të dhënë pasime të gjata dhe për të ndërtuar aksione nga thellësia mbetet një nga pikat e tij më të forta, duke e bërë atë një profil tërheqës për Liverpoolin.

Ndërkohë, Newcastle Unitedi është gjithashtu një opsion i mundshëm, ndërsa orët e ardhshme pritet të jenë vendimtare për të ardhmen e mbrojtësit anglez.

Real Madridi dhe klubet e interesuara pritet të zhvillojnë bisedime intensive në 48 orët e ardhshme. Drejtuesit madrilenë do të përcaktojnë shumën përfundimtare të transferimit për të vendosur nëse do të pranojnë një ofertë zyrtare për Alexander-Arnold përpara mbylljes së afatit kalimtar të verës.

Enzo Fernández raportohet se ka arritur një marrëveshje verbale me Manchester Cityn për kushtet personale, ndërsa kampionët e Ligës Premier vazhdojnë të ndjekin nga afër mesfushorin argjentinas të Chelseat.

Sipas gazetarit të njohur Fabrizio Romano, Fernández dhe Manchester City kanë gjetur tashmë gjuhën e përbashkët për kushtet personale të kontratës. Megjithatë, transferimi nuk është ende pranë përfundimit, pasi klubi nga Etihad Stadium nuk i ka paraqitur ende një ofertë zyrtare Chelseat.

Hapi i radhës pritet të jetë kontakti mes dy klubeve, me Chelsean që do të përcaktojë çmimin përfundimtar për të lejuar largimin e mesfushorit.

Chelsea e ka vlerësuar më parë Fernándezin rreth 140 milionë euro, një shifër që do ta detyronte Manchester Cityn të bëjë një investim të madh financiar për ta transferuar argjentinasin.

Ndërkohë, Fernández mund të mungojë edhe në ndeshjen e ardhshme të Chelseat në fundjavë, duke shtuar edhe më shumë pasigurinë rreth të ardhmes së tij.

Për momentin, marrëveshja mes lojtarit dhe Manchester Cityt është arritur në parim, por gjithçka varet nga negociatat që do të zhvillohen mes dy klubeve.

Julian Alvarez është në qendër të një sage të re te Atletico Madrid, pasi sulmuesi argjentinas raportohet se dëshiron të largohet nga klubi dhe të transferohet te Barcelona.

Sipas raportimeve në Spanjë, Atletico ka arritur marrëveshje me Arsenalin për transferimin e tij, por Alvarezi e ka refuzuar këtë mundësi, pasi dëshiron vetëm kalimin te Barcelona.

Situata është tensionuar edhe më shumë ditët e fundit. Sipas “COPE”, argjentinasi është paraqitur te klubi me një raport mjekësor që lidhet me gjendjen e tij psikologjike dhe nuk është stërvitur me skuadrën për tri ditë radhazi.

Alvarezi thuhet se ka pasur një përplasje me drejtuesit e klubit, duke shprehur hapur pakënaqësinë për situatën. Madje, sipas burimeve jozyrtare, gjatë bisedës ai ka përjetuar një krizë emocionale dhe një sulm paniku.

Sulmuesi ka kontratë edhe për katër vite me Atleticon, por raportohet se u ka bërë të qartë drejtuesve se nuk dëshiron të vazhdojë aventurën në Madrid. Për momentin, klubi spanjoll mbetet i vendosur të mos e shesë atë te një rival i drejtpërdrejtë si Barcelona.

Akil Gjakova, Dardan Cena dhe Flaka Loxha janë vetëm një fitore larg sigurimit të medaljes së bronztë në Lojërat Mesdhetare “Taranto 2026”.

Gjakova dhe Cena kanë shënuar nga dy fitore në repasazh, ndërsa Loxha, pas humbjes në gjysmëfinale, do të kërkojë rikthimin përmes repasazhit.

Në këtë fazë pritet të garojnë edhe xhudistet kosovare Erza Muminoviq dhe Fatjona Kasapi.

Luftërat për medalje nisin nga ora 16:00, me përfaqësuesit e Kosovës që synojnë të shtojnë medalje të tjera në “Taranto 2026”.

Sot, të premten e 28 gushtit, është hedhur shorti për fazën e ligës së Ligës së Konferencës për sezonin 2026/27.

Në short morën pjesë 36 skuadra, të ndara në gjashtë vazo me nga gjashtë ekipe.

Pjesë e kësaj faze është edhe Egnatia, që do të përballet me Braga, Midtjylland, Lincoln Red Imps, Craiova, Kauno Žalgiris dhe Aarhus.

Në short janë përfshirë edhe disa emra të njohur të futbollit evropian, si Atalanta, Ajax, Freiburg, Monaco, Copenhagen, Gent, Brighton, Twente, Trabzonspor dhe Hajduk Split.

Egnatia do të kërkojë të bëjë një tjetër paraqitje të mirë në arenën evropiane, përballë kundërshtarëve të fortë në këtë edicion të Ligës së Konferencës.

Sot, të premten e 28 gushtit, është hedhur shorti për fazën e ligës së Europa League për sezonin 2026/27.

Në short morën pjesë 36 skuadra, të ndara në katër vazo me nga nëntë ekipe. Pas shortit, të gjitha klubet mësuan kundërshtarët me të cilët do të përballen në këtë fazë të garës.

Edicioni i ri sjell disa emra të mëdhenj të futbollit evropian. Juventus, Milan, Benfica, Bayer Leverkusen, Lyon dhe Marseille janë mes skuadrave që synojnë të shkojnë larg në këtë kompeticion.

Në garë janë edhe Real Sociedad, Dinamo Zagrebi, Celtic, Sparta e Pragës, Besiktasi dhe Hoffenheimi, duke premtuar përballje interesante që në fazën e ligës.