Category: Sport

Trajneri i Barcelona, Hansi Flick, ka vendosur një rregull të ri disiplinor, më të rreptin në historinë e klubit, që parashikon gjobën më të madhe deri më tani. Ky vendim është pjesë e politikës së disiplinës së ashpër që gjermani ka zbatuar që nga momenti kur mori drejtimin e skuadrës verën e vitit 2024.

Pas 25 xhirove të zhvilluara në La Liga, Barcelona ka rikuperuar vendin e parë në tabelë. Fitorja e fundit ndaj Levantes, me gola nga Marc Bernal, Frenkie De Jong dhe Fermin Lopez, i dha katalunasve mundësinë të përfitonin nga humbja e Real Madrid kundër Osasunës dhe të riktheheshin në krye.

Flick ka treguar që në fillim se këmbëngul në disiplinë dhe saktësi të lartë. Që nga mbërritja e tij, ai ka prezantuar dhjetë rregulla të rrepta për lojtarët, me fokus të veçantë tek respektimi i orarit dhe profesionalizmi. Një shembull i kësaj ishte ndëshkimi i mbrojtësit Jules Kounde në mars të vitit të kaluar për vonesë, që u konsiderua një mesazh i qartë për gjithë skuadrën.

Së fundmi, masat u ashpërsuan edhe më shumë. Siç konfirmoi mesfushori Pedri në një intervistë për televizionin spanjoll: “Sa i përket saktësisë, i kemi ndryshuar pak rregullat. Nëse vonohesh, paguan një gjobë.”

Sipas rregullores së re, një vonesë prej dhjetë minutash në ditën e ndeshjes do të përkthehej në një gjobë deri në 40,000 euro, shuma më e lartë e vendosur ndonjëherë në klub. Ferran Torres gjithashtu komentoi masën e re me humor, duke shtuar se: “Nuk mund ta imagjinoj sa do të kushtonte një vonesë prej 20 minutash.”

Ky rregull tregon qartë qasjen e Flick ndaj profesionalizmit në Barcelonë, duke theksuar rëndësinë e disiplinës, saktësisë dhe respektit ndaj skuadrës dhe kohës, në një periudhë kur klubi synon të mbajë kryesimin në La Liga dhe të arrijë suksese në nivel europian.

Në një konferencë të jashtëzakonshme për media, drejtori i përgjithshëm i Sigal Prishtina, Luan Maloku, reagoi publikisht për situatën aktuale në klub, duke folur hapur për sfidat financiare dhe procesin në Gjykatwn e Arbitrazhit të Basketbollit, por edhe për të dhënë një mesazh shprese për tifozët dhe komunitetin sportiv.

Para një numri të madh gazetarësh, Maloku nisi fjalimin me një deklaratë që tërhoqi menjëherë vëmendjen:

“Po e shoh këtë zyrë sot më të mbushur se kurrë me media. Ndoshta keni ardhur për të dëgjuar lajmin e keq, që klubi po shuhet. Por unë jam këtu për t’ju dhënë lajmin e mirë.”

Ai pranoi se Sigal Prishtina po përballet me një periudhë të vështirë, përfshirë sfidat financiare dhe çështjet në gjykatë, por theksoi se brenda klubit ekziston një unitet dhe vendosmëri e jashtëzakonshme.

“Edhe pse kemi shumë probleme, duke përfshirë faktin që jemi në BAT, ju garantoj se ky klub është më i bashkuar se kurrë. Brenda nesh ka më shumë vendosmëri, më shumë besim dhe më shumë vullnet për të ecur përpara,” deklaroi Maloku.

Drejtori i përgjithshëm i klubi të trofeshëm kosovar theksoi se as sfidat ligjore, as ato financiare nuk do ta ndalojnë klubin nga rruga e suksesit:

“Sigal Prishtina nuk do të shuhet. Përkundrazi, do të ringrihet edhe më e fortë. Ne do të ecim përpara drejt sukseseve, ashtu siç e kërkon historia dhe pesha e këtij emri.”

Deklarata e Malokut vjen në një moment delikat për klubin, por mesazhi ishte i qartë: sfidat aktuale janë të përkohshme dhe Sigal Prishtina synon të kthehet fuqishëm në arenën e basketbollit vendor, duke mbajtur gjallë emrin dhe traditën e tij të pasur me trofe.

Klubi mbetet i përkushtuar për të ruajtur unitetin e skuadrës, për të përballuar vështirësitë dhe për të ofruar performanca të larta në garat e ardhshme, duke dërguar një mesazh optimizmi për tifozët bardhekaltër.

Sami Sermaxhaj, përzgjedhësi i Kombëtares së Kosovës për vajza, ka bërë publike listën e futbollisteve të ftuara për dy ndeshjet e para të ciklit kualifikues për Kampionatin Botëror 2027.

Dardanet do të nisin aventurën e re në Ligën C, Grupin C2, ku përballë do të kenë Kroacinë, Gjibraltarit dhe Bullgarinë. Këto dy ndeshje janë vendimtare për të nisur sezonin me ritëm pozitiv dhe për të konsoliduar formacionin para fazave të mëtejshme të kualifikimeve.

Ndeshja e parë do të zhvillohet më 3 mars në stadiumin “Fadil Vokrri” në Prishtinë, ku Kosova do të presë Gjibraltarin. Për Dardanet, kjo sfidë përbën një mundësi për të marrë një start të fortë dhe për të dhuruar spektakël për tifozët vendas.

Vetëm katër ditë më vonë, më 7 mars, Kombëtarja e Kosovës do të udhëtojë drejt Kroacisë për të përballuar skuadrën e këtij vendi në stadiumin “Branko Čavlović-Cavlek” në Karlovac. Kjo ndeshje pritet të jetë më e vështirë, por një mundësi e shkëlqyer për vajzat kosovare të tregojnë karakter dhe potencial në arenën ndërkombëtare.

Ky cikël kualifikues shënon një hap të rëndësishëm në rrugëtimin e Kombëtares së Kosovës për vajza drejt Botërorit të 2027-s, duke i dhënë mundësi stafit teknik të testojë formacionin dhe të forcojë skuadrën për sfidat e ardhshme.

Florent Hadergjonaj po vazhdon të lërë gjurmë në elitën e futbollit turk, duke treguar se forma e tij e lartë nuk është e rastësishme.

Mbrojtësi kosovar ka shfaqur edhe një herë klas dhe ndikim të madh në Superligën e Turqisë, duke shënuar një gol në ndeshjen ku skuadra e tij, Alanyaspor, u mund 1-2 nga Başakşehir.

Pavarësisht humbjes, paraqitja e Hadergjonajt u vlerësua nga ekspertët si e jashtëzakonshme dhe tregoi rëndësinë e tij në formacion.

Ky është një moment i shkëlqyer në karrierën e 31-vjeçarit, i cili po kalon një periudhë fantastike në të dyja frontet, kampionat dhe Kupë e Turqisë.

Nga fillimi i sezonit, Hadergjonaj ka shënuar gjithsej shtatë gola dhe ka dhuruar pesë asistime, një statistikë e jashtëzakonshme për një mbrojtës, që dëshmon për aftësitë e tij sulmuese dhe ndikimin që ka në lojën e skuadrës.

Formën e tij të lartë e ka vlerësuar edhe platforma e njohur për statistikat e futbollit, SofaScore, e cila e ka futur Hadergjonajn në formacionin e javës së 23-të në Superligën e Turqisë.

Mbrojtësi i reprezentacionit të Kosovës u vlerësua me notën 8,3, duke treguar se edhe në humbje, performanca e tij individuale mbetet e jashtëzakonshme dhe një pikë referimi për skuadrën.

Ky sezon duket se po shënon një kulm të ri në karrierën e Hadergjonajt, i cili me kombinimin e eksperiencës, forcës fizike dhe teknikës po tregon se mund të jetë një nga mbrojtësit më të rrezikshëm dhe të vlefshëm në Superligën turke.

Për tifozët e Alanyaspor dhe admiruesit e futbollit kosovar, ai mbetet një nga figurat më të spikatura dhe një shembull i shkëlqyer i përfaqësimit të Kosovës në arenën ndërkombëtare.

Në vazhdim, mbetet për t’u parë se si Hadergjonaj do të ndikojë në ndeshjet vendimtare të kampionatit dhe Kupës, duke mbajtur ritmin e tij të lartë dhe duke u konfirmuar si një nga lojtarët më të rëndësishëm të ekipit dhe një nga liderët e të rinjve që ndjekin karrierën e tij me admirim.

Kupa e Kosovës në volejboll rikthehet në skenë me nisjen e raundit të parë për edicionin 2025/26, duke hapur një kapitull të ri garash në sezonin aktual. Për skuadrat e elitës, ky kompeticion përfaqëson një tjetër mundësi për trofe, në një format ku çdo ndeshje është eliminatore dhe gabimet paguhen shtrenjtë.

Takimet e para do të zhvillohen më 24 dhe 25 shkurt, në të dyja konkurrencat – meshkuj dhe femra, me përballje që pritet të sjellin rivalitet të fortë dhe emocione në palestra.

Në konkurrencën e meshkujve, Ulpiana do të përballet me Skënderbeun në “Palestrën e Re” në Lipjan. Të dyja skuadrat synojnë ta nisin me fitore rrugëtimin në Kupë, duke parë këtë kompeticion si mundësi reale për sukses këtë sezon.

Ndërkohë, te femrat do të zhvillohen dy takime interesante. Prishtina Elite pret Skenderajn në Pallatin e Rinisë dhe Sporteve në Prishtinë, në një duel ku vendaset synojnë të shfrytëzojnë përparësinë e terrenit. Në anën tjetër, Feniksi dhe Vëllaznimi do të përballen në Kamenicë, në një sfidë që pritet të jetë e balancuar dhe me intensitet të lartë.

Me formatin eliminator që nuk lejon hapësirë për gabime, raundi i parë i Kupës së Kosovës pritet të ofrojë ndeshje të forta dhe surpriza, duke e bërë këtë fazë një nga më të ndjekurat nga tifozët e volejbollit vendor.

Federata e Futbollit e Kosovës, në bashkëpunim me sponsorin zyrtar të Superligës, Albi Mall, ka vazhduar traditën e ndarjes së çmimit “Ylli i Javës”, vlerësim që i takon futbollistit më të spikatur të xhiros në elitën e futbollit kosovar.

Për javën e 21-të të këtij sezoni, ky çmim i është akorduar sulmuesit të FC Ferizaj, Ruben Silva Richards, i cili ishte protagonist absolut në fitoren 2:1 ndaj FC Ballkani. Richards realizoi dy gola vendimtarë, duke i siguruar skuadrës së tij tri pikë të arta përballë kampionëve.

Vlerësimi u bë nga Komisioni i Veteranëve të Futbollit, ndërsa pas pranimit të çmimit, Richards u shpreh i lumtur dhe falënderues për ekipin.

Sulmuesi vlerësoi gjithashtu nivelin e Superligës së Kosovës, duke e cilësuar si një kampionat me cilësi dhe organizim të mirë. Ai theksoi se është pritur ngrohtësisht nga bashkëlojtarët dhe ambienti në klub, ndërsa çmimin ia dedikoi kapitenit të ndeshjes, Mexhit Neziri, për kontributin dhe lidershipin e treguar në fushë.

Me paraqitjen e tij vendimtare, Richards jo vetëm që i dha fitoren Ferizajt, por konfirmoi edhe formën e lartë personale në këtë fazë të kampionatit.

Mbrëmja e sotme sjell verdiktet e para të mëdha në fazën play-off të UEFA Champions League. Katër ndeshje kthyese do të vendosin skuadrat që do të prenë biletën për në 1/8 e finales, në një natë ku çdo detaj mund të bëjë diferencën mes festës dhe zhgënjimit.

Në “San Siro”, Inter Milan përballet me surprizën norvegjeze FK Bodø/Glimt. Pas humbjes 3-1 në ndeshjen e parë, zikaltërit janë të detyruar të reagojnë dhe të tregojnë peshën e përvojës evropiane për të përmbysur rezultatin. Nga ana tjetër, Bodø/Glimt synon të vazhdojë rrugëtimin historik dhe të shkruajë një tjetër kapitull të artë në këtë edicion.

Në Madrid, Atlético Madrid pret Club Brugge pas barazimit spektakolar 3-3 në takimin e parë. Spanjollët do të mbështeten në eksperiencën e ndeshjeve me eliminim direkt dhe atmosferën e zjarrtë në shtëpi, ndërsa belgët kërkojnë të shfrytëzojnë organizimin dhe shpejtësinë në kundërsulm për të befasuar sërish.

Në Gjermani, Bayer Leverkusen hyn me avantazhin e fitores 2-0 ndaj Olympiacos. Gjermanët konsiderohen favoritë për ta mbyllur çështjen e kualifikimit, por skuadra greke njihet për karakterin luftarak dhe për faktin se nuk dorëzohet lehtë, duke e mbajtur përballjen të hapur deri në fund.

Ndërkohë në Angli, Neëcastle United pret Qarabağ FK me një epërsi komode 6-1 nga ndeshja e parë. Për “Magpies” sfida duket më shumë si formalitet, por Qarabag ka dëshmuar se di të luftojë deri në sekondat e fundit dhe do të kërkojë të largohet me dinjitet nga kompeticioni.

Katër stadiume, katër histori të ndryshme dhe vetëm një synim i përbashkët: një vend mes 16 më të mirëve të Evropës. Emocionet janë të garantuara, ndërsa mbrëmja do të japë përgjigjet përfundimtare.

RCD Mallorca ka zyrtarizuar ndërprerjen e bashkëpunimit me trajnerin Jagoba Arrasate, pas një periudhe me rezultate të luhatshme në këtë sezon të La Liga.

Vendimi i klubit vjen në një moment delikat të kampionatit, me synimin për të hapur një kapitull të ri dhe për të siguruar mbijetesën në elitën e futbollit spanjoll. Drejtuesit e Mallorcas theksuan se ndryshimi në pankinë shihet si një hap i nevojshëm për të rikthyer stabilitetin dhe për të rritur konkurrueshmërinë në javët vendimtare të sezonit.

Në komunikatën zyrtare, klubi falënderoi Arrasaten dhe stafin e tij për profesionalizmin dhe përkushtimin e treguar gjatë periudhës në krye të skuadrës, duke u uruar suksese në sfidat e ardhshme.

Pavarësisht luhatjeve kolektive, një nga pikat më të ndritura të këtij edicioni ka qenë forma e shkëlqyer e sulmuesit kosovar Vedat Muriqi. Nën drejtimin e Arrasates, ai ka realizuar 16 gola këtë sezon dhe ka arritur shifrën e 50 golave në La Liga me fanellën e Mallorcas.

Muriqi tashmë renditet si golashënuesi i dytë më i mirë në historinë e klubit në kampionat, duke lënë pas shumë emra të njohur. Rekordi vazhdon të mbahet nga Samuel Eto’o me 54 gola të shënuar për Mallorcan në La Liga.

Një incident i pazakontë shënoi një ndeshje futbolli amator në Stamboll, dhe në vend të golave, historia flet për një akt heroik dhe shpëtimin e një jete të pafajshme në mes të ndeshjes.

Konkretisht, ishte minuta e 22-të e ndeshjes midis Mevlanakapi Guzelhisar dhe Istanbul Yurdum Spor kur portieri Muhammet Uyanik gjuajti topin nga zona e tij e penalltisë.

Topi goditi një pulëbardhë në fluturim, e cila ra menjëherë në bari, dhe Uyanik më vonë pranoi se në fillim as nuk e kuptoi se çfarë kishte ndodhur derisa iu afrua zogut.

Ai tha se ishte i shokuar dhe thellësisht i tronditur sepse ishte i vetëdijshëm se ishte një qenie e gjallë, dhe heroi i ditës ishte kapiteni i ekipit Gani Catan.

Catan ishte i pari që vrapoi te zogu i lënduar dhe vuri re se pulëbardha nuk po tregonte shenja jete, kështu që instinktivisht filloi ringjalljen, ose masazhin e zemrës.

Kapiteni shpjegoi se procesi zgjati rreth dy minuta dhe ai nuk donte të hiqte dorë derisa të shihte këmbët dhe sytë e zogut të lëviznin.

Pulëbardhës shpejt filloi t’i rikthehej vetëdija, iu dha menjëherë ujë dhe më pas u nxor jashtë fushës dhe iu dorëzua personelit mjekësor.

Mediat turke raportojnë se Catan nuk ka trajnim mjekësor, por veproi sipas instinktit për të shpëtuar zogun, i cili pësoi një dëmtim në krah që do ta pengojë të fluturojë për një farë kohe. /Telegrafi/

Roberto Martínez, trajneri i Kombëtares së Portugalisë, ka theksuar ndikimin e jashtëzakonshëm të Cristiano Ronaldos në ekip, duke e quajtur atë një shembull të papërshkrueshëm të profesionalizmit dhe përkushtimit.

Martínez shpjegoi se lojtarët vlerësohen mbi tri kritere: talentin, përvojën dhe qëndrimin.

Sipas tij, Ronaldo i përmbush të tri këto kritere, duke treguar aftësinë për t’u përshtatur gjatë viteve, duke kaluar nga një sulmues krahu në një “numër 9” vendimtar në zonë, me lëvizje të mençura dhe instinkt për golin.

Ky sezon, ai ka shënuar 25 gola në 30 ndeshje.

Trajneri portugez theksoi se ajo që e bën Ronaldon kaq të veçantë është qëndrimi i tij përditshëm ndaj punës dhe dëshira e pandalshme për përmirësim.

Ai shtoi se prania e Ronaldos në dhomën e zhveshjes është një burim frymëzimi për lojtarët e rinj dhe një model i qartë i mentalitetit fitues që ka siguruar jetëgjatësinë e tij në futboll.