Category: Sport

Ministri i Rinisë dhe Sportit i Turqisë, Osman Aşkın Bak, ka komentuar përballjen e shumëpritur ndërmjet Kosovës dhe Turqisë, e cila zhvillohet sonte në kuadër të finales së “play-off”-it për Kupën e Botës 2026.

Deklarata e tij erdhi pas takimit me homologun kosovar, Blerim Gashani, ku në fokus ishte edhe kjo sfidë e rëndësishme për të dyja përfaqësueset.

I pyetur për rezultatin e mundshëm të ndeshjes, Bak u tregua i rezervuar, duke theksuar se nuk preferon të bëjë parashikime para një dueli të tillë. Sipas tij, gjithçka do të vendoset në fushë nga vetë futbollistët, në një përballje që pritet të jetë e fortë dhe e nivelit të lartë.

Ndeshja ndërmjet Kosovës dhe Turqisë zhvillohet sonte në stadiumin “Fadil Vokrri” në Prishtinë, me fillim nga ora 20:45, dhe konsiderohet si një nga sfidat më të rëndësishme për kualifikim në Botërorin 2026.

Mëngjesin e sotëm janë zhvilluar ndeshjet e radhës në kuadër të Ligës më të fortë të basketbollit në botë, NBA.

Një nga duelet me të shumëpritura ka qenë ai në mes të dy liderëve së Konferencës së Perëndimit Oklahoma City Thunder dhe të Lindjes Detroit Pistons.

Të dy këto skuadra kanë qëndruar në krye të tabelave përkatëse, që nga fillimi I sezonit, duke treguar formë fantastike dhe duke qenë pothuajse të pamposhtur.

Mirëpo Thunder arriti të triumfonte në këtë super derbi me rezultat të ngushtë 114-110.

Si gjothmonë ylli I skuadrës së Thunder, Shai Gilgeous-Alexander udhëhoqi skuadrën e tijë drejt fitores me 47 pikë, duke qënë i pandalshëm.

Derisa te skuadra humbëse, paraqitje të mirë kishte Paul Reed me 21 pikë e 10 kërcime dhe Javonte Green me 19 sosh.

Kujtojmë që të dy skuadrat vazhdojnë të kryesojnë në Konferencën e Perëndimit respektivisht të Lindjes.

Boston Celtics është ndalur me humbje nga Atlanta Hawks me shfirat 112-102.

Më meritoret për fitoren e Haëks ishin Jalen Johnson me 20 pikë e 12 kërcime dhe Onyeka Okongëu me 20 pikë e 10 kërcime.

Nga ana tjetër, Jalen Broën po ashtu ishte efikas me 29 pikë, 10 kërcime dhe nëntë asistime por që nuk mjaftuan për fitore.

Hawks renditen në poziten e gjashtë në Konferencën e Lindjes derisa Celtics në poziten e dytë.

Los Angeles Lakers ka realizuar fitoren e tretë rresht, pas triumfit ndaj Washington Wizards me rezultat 120-101.

Më meritoret në këtë fitore ishin, Lebron James me triple-double prej 21 pikëve, 10 kërcimeve dhe 12 asistimeve, Austin Reaves dhe Luke Kennard me nga 19 sosh.

Te skuadra humbëse u dallua Will Riley me 20 pikë.

Lakers renditën në poziten e tretë në Konferencën e Perëndimit derisa Wizards në vendin e 14 në Lindje.

Vetëm pak orë para përballjes historike ndaj Turqisë, atmosfera në Prishtinë ka nisur të ndizet që gjatë natës, me tifozët e Kombëtares së Kosovës që kanë krijuar një ambient të pazakontë pranë ekipit mysafir.

Pas mesnatës, në afërsi të hotelit ku është akomoduar Kombwtarja turke janë dëgjuar shpërthime fishekzjarrësh dhe brohoritje nga tifozët vendas, duke prishur qetësinë e ekipit kundërshtar në prag të sfidës vendimtare.

Qëllimi i kësaj lëvizjeje ishte i qartë, të rritet presioni ndaj Turqisë dhe të krijohet një avantazh psikologjik para ndeshjes që zhvillohet sonte nga ora 20:45 në stadiumin “Fadil Vokrri”.

Ngjarja ka ngjallur reagime të shumta në rrjetet sociale, ku pamjet e fishekzjarrëve janë shpërndarë gjerësisht dhe kanë hapur diskutime të ndryshme mbi këtë formë mbështetjeje nga tifozët.

Megjithatë, mbetet për t’u parë nëse kjo natë e trazuar do të ndikojë në performancën e Turqisë në fushë, në një duel ku çdo detaj, fizik apo psikologjik, mund të jetë vendimtar.

Ndërkohë, gjithçka është gati për një mbrëmje të madhe në “Fadil Vokrri”, ku pritet një atmosferë elektrizuese dhe një ndeshje e zjarrtë që mund të përcaktojë fatin e Kosovës në rrugën drejt Kupës së Botës 2026.

Kombëtarja e Kosovës do të përballet sonte me Turqinë në stadiumin “Fadil Vokrri” në Prishtinë, nga ora 20:45, në kuadër të finalës së play-off për kualfikim në Kupën e Botës 2026.

Në prag të këtij dueli vendimtar, një mesazh i veçantë mbështetjeje ka ardhur nga Spanja. Klubi i Mallorcas ka dalë publikisht në përkrahje të sulmuesit dhe kapitenit të Kosovës, Vedat Muriqi, duke e cilësuar atë si “një hap larg Kupës së Botës” përmes një postimi motivues në rrjetet sociale.

Ky reagim vjen në një moment shumë të rëndësishëm për përfaqësuesen kosovare, e cila synon të shkruajë historinë me një kualifikim të parë në një turne madhor botëror.

Forma e Muriqit këtë sezon me Mallorcan ka qenë mbresëlënëse. Sulmuesi kosovar ka realizuar 18 gola në La Liga, duke u shndërruar në golashënuesin kryesor të skuadrës dhe një nga figurat më të rëndësishme në luftën për mbijetesë. Shumë nga golat e tij kanë qenë vendimtarë, duke mbajtur ekipin larg zonës së rënies.

Përtej formës në klub, Muriqi mbetet një figurë kyçe edhe te Kosova. Si kapiten, ai ka treguar vazhdimisht lidership, karakter dhe prezencë të fortë në fushë, duke udhëhequr ekipin në momentet më të rëndësishme. Përvoja e tij në futbollin evropian pritet të jetë një faktor i rëndësishëm në përballjen ndaj Turqisë.

Tani, të gjitha sytë janë drejt stadiumit “Fadil Vokrri”, ku Muriqi dhe shokët e tij do të kërkojnë të bëjnë hapin më të madh në historinë e futbollit kosovar.

Kualifikimi i mundshëm i Kosovës në Kupën e Botës 2026 do të kishte jo vetëm rëndësi historike në aspektin sportiv, por edhe përfitime të mëdha financiare. Sipas të dhënave, vetëm pjesëmarrja në këtë turne do t’i siguronte Kosovës të paktën 10.5 milionë dollarë, ku përfshihen 9 milionë për pjesëmarrje dhe 1.5 milionë për përgatitje.

Ky shpërblim paraqet një rritje prej rreth 50 për qind krahasuar me Kupën e Botës 2022, si rezultat i rritjes rekord të fondit të shpërblimeve nga FIFA për edicionin e ri me 48 skuadra pjesëmarrëse.

Përfitimet financiare mund të rriten edhe më shumë në varësi të ecurisë së Kosovës në turne. Nëse arrin në fazën e 1/32 së finales, secila skuadër përfiton rreth 11 milionë dollarë, ndërsa në 1/8 e finales kjo shumë rritet në 15 milionë. Një kualifikim në çerekfinale do t’i sillte federatës rreth 19 milionë dollarë.

Përveç shpërblimeve nga FIFA, edhe Qeveria e Kosovës ka paralajmëruar bonus shtesë prej 1një milionë euro për kombëtaren në rast kualifikimi. Ky bonus pritet të ndahet mes lojtarëve, ku secili prej tyre mund të përfitojë nga 40 mijë deri në 50 mijë euro./kp

Federata e Futbollit të Kosovës ka dalë me një postim emocionues lidhur me ndeshjen e sotme të Kosovës ndaj Turqisë, përballje kjo që vlen për kualifikimin e kombëtares në Kupën e Botës.

Në Facebook, FFK u ka bërë thirrje shqiptarëve që të bëhen zëri i historisë, duke theksuar se sonte është momenti.
“Ka momente në histori që nuk përsëriten. Momente që nuk vijnë dy herë, që nuk të japin luksin e hezitimit. Sonte është një i tillë. Sot nuk është ditë për të qëndruar ulur në tribunat e stadiumit. Nuk është mbrëmje për ta parë ndeshjen si spektatorë të qetë. Sot është momenti kur secili prej nesh duhet të jetë në këmbë, me zërin në maksimum, me zemrën që rreh për një emër të vetëm: Kosovë”, thuhet në postimin emocional.

FFK pos tjerash thekson se sot jemi vetëm një hap larg Botërorit.

“Një hap që për shumëkënd ka qenë ëndërr e largët për dekada. Një shans që mund të vijë vetëm një herë në jetën tonë. Dhe kur historia të troket në derë, nuk hapet me heshtje, hapet me zhurmë, me pasion, me shpirt. Stadiumi nuk është teatër. Nuk ka skenar të shkruar, nuk ka audiencë pasive. Ka vetëm një rol për të gjithë: të jemi lojtari i dymbëdhjetë. Dardanët në fushë kanë nevojë për atë shtysë që nuk matet me statistika, por ndjehet në çdo sprint, në çdo duel, në çdo goditje”.

Ndër të tjera, Federata thotë se respekti për kundërshtarin është vlerë dhe duhet të mbetet i tillë sidomos gjatë intonimit të himnit, ‘pasi përballemi me një shtet mik’.

“Por sapo topi të nisë të rrokulliset, stadiumi “Fadil Vokrri” duhet të shndërrohet në një arenë ku edhe kundërshtari i sotëm e ndjen peshën e një kombi të tërë. Një vend ku çdo metër i fushës fitohet edhe nga tribuna. Mos e ndal këngën kur topin e kemi ne. Mos e ndal atmosferën kur e kanë ata. Sepse energjia që krijohet nga tribuna është më shumë se atmosferë, është presion, është motivim, është avantazh”.

“Bileta për në Botëror nuk është vetëm një arritje sportive. Është një mundësi për të treguar Kosovën para botës, për të promovuar identitetin, historinë dhe krenarinë tonë në skenën më të madhe të futbollit. Sonte nuk luan vetëm një ekip. Sonte luan një komb i tërë. Beso. Këndo. Brohorit. Sepse sonte, historia mund të shkruhet me zërin tënd. Forca Kosovë!”, mbaron postimi.

Sulmuesi i Kombëtares së Kosovës, Fisnik Asllani, ndihet gati për ndeshjen e sotme (e martë) ndaj Turqisë në kuadër të finales së ‘play-off’-it për kualifikim në Kupën e Botës 2026.

Kosova është nikoqire e Turqisë në ndeshjen e sotme, e cila është planifikuar të zhvillohet në stadiumin Fadil Vokrri në Prishtinë, me fillim nga ora 20:45.

Dardanët janë gati për këtë ndeshje finale, pasi ëndrra e madhe është kualifikimi në një ngjarje të madhe sportive dhe Kupa e Botës është kulmi i çdo arritje.

Njëri nga lojtarët më në formë dhe më vendimtar të Kosovës në kampanjën kualifikuese padyshim ka qenë edhe Fisnik Asllani, i cili ka shënuar tri gola.

Dhe pikërisht Asllani është gati për ndeshjen e sotme dhe këtë e ka treguar me një postim emocionues në profilin e tij në rrjetet sociale.

“Gati”, ka qenë shkrimi i shkurt i Asllanit, i bërë me Inteligjencë Artificiale, postim i cili ka të bashkangjitur një fotografi të tij si i vogël, dorë për dore me legjendën e futbollit kosovar, Fadil Vokrri.

Kombëtarja e Kosovës do të zhvillojë ndeshjen finale të Play-Off për Kampionatin Botërorë kundër Turqisë me fillim nga ora 20:45.

Interesimi për të parë këtë ndeshje nga shkallët e stadiumit ka qenë jashtëzakonisht i madh, pasi nuk ka njeri në vendin tonë që nuk do të jetë prezent në Fadil Vokrri, por fatkeqësisht kapaciteti i stadiumit është vetëm 13,980 ulëse.

Dardanët kanë dalë me njoftim duke kërkuar falje që nuk kanë mundur t’i përmbushin gjitha kërkesat e tifozëve.

Gjithashtu tifo grupi i Kosovës ka bërë thirrje që të gjithë të pranishmit në stadium të jenë me simbole të Kosovës, shalla, duksa dhe flamuj.

Njoftimi i plotë nga Dardanët:

Ndjejmë keqardhje të thellë që nuk kemi arritur t’u përgjigjemi të gjithë të interesuarve për t’u pajisur me bileta për finalen e madhe Kosovë – Turqi.

Kërkojmë sinqerisht falje që nuk kemi mundur t’i përmbushim të gjitha kërkesat e panumërta, me mijëra të tilla, që tejkaluan çdo pritshmëri të imagjinueshme.

Kjo kërkimfalje është e ndier, sepse na vjen keq për secilin prej jush që shprehu dëshirën për të qenë pjesë e kësaj ngjarjeje madhore për vendin tonë, por që, fatkeqësisht, nuk do të mund të jetë i pranishëm. Megjithatë, ky është kapaciteti i sektorit të tribunave që mbulojmë ne; nuk kemi mundësi as ta zgjerojmë dhe as të bëjmë të pamundurën. Ju lutemi për mirëkuptim dhe besim se, brenda përgjegjësive tona, kemi bërë dhe po vazhdojmë të bëjmë maksimumin.U bëjmë thirrje edhe një herë të gjithë atyre që kanë paguar anëtarësimin vjetor të qëndrojnë të qetë, pasi biletat i kanë të garantuara.

Kombëtarja e Kosovës sot do të përballet me atë të Turqisë në finalen e “play-off”-it për kualifikim në Kupën e Botës, një duel që pritet me emocione të mëdha nga tifozët dardanë.

Kosova dhe Turqia janë përballur tre herë në të kaluarën, me bilanc që anon dukshëm në favor të Turqisë:

11.06.2017 – Kosova 1-4 Turqia (Kualifikime për Botëror);

12.11.2016 – Turqia 2-0 Kosova (Kualifikime për Botëror);

21.05.2014 – Kosova 1-6 Turqia (Ndeshje miqësore).

Bilanci historik tregon dominim të Turqisë, si në rezultate ashtu edhe në diferencën e golave.

Në këto tre ndeshje, Kosova ka shënuar vetëm dy gola, ndërsa ka pësuar 12, duke reflektuar diferencën në atë periudhë.

Megjithatë, këto përballje i përkasin një kohe kur Kosova sapo kishte nisur rrugëtimin e saj në arenën ndërkombëtare.

Në prag të përballjes vendimtare ndaj Kombëtares së Kosovës, përzgjedhësi i Turqisë, Vincenzo Montella, ka folur për rëndësinë e sfidës dhe pritshmëritë që e shoqërojnë këtë duel historik.

Trajneri italian pranoi se presioni do të jetë i madh, por u shpreh i bindur se skuadra e tij është e përgatitur për ta përballuar.

“Do të jetë presion. Ka lojtarë që nuk ishin të lindur kur Turqia luajti për herë të fundit në Botëror. Besoj se do ta përballojmë me sukses presionin”, tha Montella.

Ai e vlerësoi maksimalisht rrugëtimin e Kosovës deri në këtë finale, duke paralajmëruar një sfidë të barabartë dhe me emocione të forta.

“Kosova, me plot meritë, ka arritur deri këtu. Ka pasur rezultate pozitive në kontinuitet. Besoj se do të jetë një finale e madhe”, shtoi Montella.

Përvojën e tij si selektor i Turqisë, Montella e shoqëroi me fjalë besimi ndaj grupit të lojtarëve:

“Jam i lumtur që jam selektor i Turqisë. Kam përkrahjen e presidentit. Çfarëdo rezultati të jetë nesër, mburrem me këta lojtarë. Suksesi i deritashëm është falë tyre”.

Ndeshja mes Kosovës dhe Turqisë zhvillohet në stadiumin “Fadil Vokrri” në Prishtinë dhe pritet të jetë një nga sfidat më të rëndësishme në historinë e të dyja përfaqësueseve, me një atmosferë të jashtëzakonshme nga tifozët.