Category: Sport

Trajneri i Manchester United, Michael Carrick, ka konfirmuar interesimin e tij për të nënshkruar një kontratë të re me klubin. Me marrëveshjen aktuale që i skadon më 30 qershor, anglezi foli për të ardhmen e tij pas fitores së rëndësishme 1-0 ndaj Chelseat në Ligën Premier.

“Më pëlqen shumë këtu. E kuptoj situatën; jo gjithçka varet nga unë. Dua të jem pjesë e këtyre netëve, pjesë e diçkaje të veçantë dhe të vazhdoj të ndërtoj këtë ekip. Nuk kam një afat të caktuar për bisedimet,” u shpreh Carrick.

Ish-mesfushori i njohur anglez mori drejtimin e United më 13 janar dhe ka bërë një punë shumë të mirë në 12 ndeshje. Nën drejtimin e Carrick, Manchester United ka regjistruar tetë fitore, dy barazime dhe dy humbje, ndërsa aktualisht renditet në vendin e tretë në Ligën Premier.

Kujtojmë që Man United aktualisht gjendet në zonën e Champions në renditjen e Premierleague,ku pas 33 ndeshjeve ka grumbulluar 58 pikë.

Nevil Dede është shkarkuar nga pozita e kryetrajnerit të FC Ferizaj pas barazimit 1:1 me Prishtinën e Re në kuadër të javës së 29-të të Superligës së Kosovës.

Ky rezultat ka shkaktuar pakënaqësi në kampin ferizajas, pasi skuadra ishte favorit për të fituar ndaj ekipit të fundit në renditje, por pësoi golin e barazimit në minutën e 89-të.

Përmes një njoftimi, klubi ka bërë të ditur se ka ndërprerë bashkëpunimin me Deden në interes të objektivave të sezonit.

“Klubi ynë njofton se ka ndërprerë bashkëpunimin me trajnerin Nevil Dede.

Vendimi është marrë në interes të klubit dhe objektivave të sezonit.

Për zhvillimet e radhës, klubi do të njoftojë me kohë”, njofton FC Ferizaj.

Ferizajasit janë në vend të shtatë me 33 pikë e Prishtina e Re në fund me 28 sosh.

Ferizaj aktualisht mban vendin e shtatë në tabelë me 33 pikë, ndërsa Prishtina e Re mbetet në vendin e fundit me 28 pikë.

Oliver Kahn ka ofruar lëvdata të larta për Michael Olise, duke theksuar performancat mbresëlënëse të mesfushorit sulmues për Bayern Munich dhe duke sugjeruar se ai po zhvillohet në një pretendent serioz për Topin e Artë.

Kahn vuri në dukje formën e Olise në javët e fundit, duke theksuar ndikimin e tij gjithnjë e më të madh në lojën sulmuese të Bayernit dhe qëndrueshmërinë e tij në nivelin më të lartë. “Nëse e shikoni lojën e tij në javët e fundit, Michael Olise është padyshim në rrugën e duhur për të fituar Topin e Artë,” tha Kahn.

Sulmuesi francez ka qenë një figurë kyçe për Bayernin këtë sezon, duke regjistruar 18 gola dhe 25 asistime në 43 paraqitje në të gjitha garat, duke forcuar më tej reputacionin e tij si një nga lojtarët më të spikatur në futbollin evropian.

Olise zhvilloi dy ndeshje të jashtëzakonshme për Bayernin ndaj Real Madridit, ku bavarezët kaluan në gjysmëfinale pas dy fitoreve 1-2 dhe 4-3.

Luke Kennard shënoi një rekord personal prej 27 pikësh në playoff, ndërsa LeBron James shtoi 19 pikë dhe 13 asistime, duke udhëhequr Los Angeles Lakers drejt një fitoreje 107-98 ndaj Houston Rockets në ndeshjen e parë të serisë së raundit të parë të playoff-it në NBA, të shtunën në mbrëmje.

Deandre Ayton kontribuoi me 19 pikë dhe 11 ribaunde për Lakers, të renditur të katërt, të cilët siguruan një fitore mbresëlënëse pavarësisht mungesës së dy golashënuesve të tyre kryesorë. Të dy ekipet e nisën serinë pa lojtarët e tyre më të rëndësishëm. Luka Dončić dhe Austin Reaves kanë qenë jashtë fushës për një kohë të pacaktuar që nga 2 prilli për shkak të lëndimeve, ndërsa Kevin Durant u tërhoq nga formacioni në momentet e fundit për shkak të një dëmtimi në gjurin e djathtë. Los Angeles shkëlqeu me një përqindje gjuajtjeje prej 60.6% nga fusha, ndërsa kufizoi Rockets në vetëm 37.6% falë një mbrojtjeje agresive. Ky dominim u lejoi Lakers të fitojnë pavarësisht se realizuan vetëm 66 gjuajtje—numri më i ulët në një ndeshje të NBA-së në tre sezonet e fundit—dhe megjithëse lejuan deri në 21 ribaunde sulmuese.

Për Rockets, Alperen Şengün realizoi 19 pikë, ndërsa Jabari Smith Jr. shtoi 16 pikë dhe 12 ribaunde. Amen Thompson kontribuoi me 17 pikë.

Ndeshja e dytë e serisë do të zhvillohet të martën në mbrëmje në Los Angeles. Fitore mori edhe New York Knicks që mposhtën Atlanta Hawks me rezultat 113-102 duke kaluar në epërsi 1-0. Ndërkohë, Denver Nuggets mposhtën Minnesota Timberwolves me rezultat 116-105.

Ferizaj dhe Prishtina e Re kanë marrë nga një pikë në përballjen e mbijetesës, e vlefshme për xhiron e 29-të në Superligën e Kosovës.

Derbi ishte mjaft dramatik nga fillimi, me epilogun përfundimtar që rezultoi 1-1.

Ferizaj e nisi në mënyrë më agresive, duke krijuar disa aksione, por pa mundur t’i finalizojë. Ishte Silva-Richards që me një gol të bukur e zhbllokoi rezultatin, duke i dhënë epërsinë vendasve në minutën e 70-të.

Pas golit, Prishtina e Re u “zgjua” dhe krijoi disa aksione të bukura. Heroi i mysafirëve ishte Astrit Berisha, i cili barazoi rezultatin në minutën e 88-të.

Kësisoj, gara për mbijetesë në elitë bëhet edhe më dramatike, me Ferizajn në pozitën e tetë me 33 pikë, pesë më shumë se Prishtina e Re.

Derbi ndërmjet Llapit dhe Prishtinës në kuadër të xhiros së 29-të në Superligën e Kosovës përfundoi pa fitues, 0-0.

Pavarësisht rasteve të shumta dhe aksioneve të vazhdueshme nga të dyja skuadrat, gola nuk u shënuan. Llapi krijoi tentimet më të mira, por mungesa e Muhamet Hysenit ndikoi dukshëm, duke u ndjerë tek finalizimi i munguar.

Altin Gjokaj spikati nga ana e Prishtinës, duke shpëtuar skuadrën “bardhëkaltër” disa herë me pritje fantastike.

Prishtina u aktivizua më shumë vetëm në 10 minutat e fundit, duke kërkuar një penallti dhe duke tentuar përmes Ardian Mujës, por goditja përfundoi jashtë portës.

Pas kësaj ndeshjeje, Prishtina renditet e treta me 44 pikë, ndërsa Llapi pozicionohet i shtati me 33 pikë.

Dy skuadrat e fundit që kanë siguruar pjesëmarrjen në fazën “Play-Off” të elitës së basketbollit amerikan, NBA, janë përcaktuar pas zhvillimit të ndeshjeve të fundit të fazës “Play-In”.

Në Konferencën e Perëndimit, Phoenix Suns siguruan kualifikimin pas fitores 111-96 ndaj Golden State Warriors. Skuadra nga Phoenix zhvilloi një paraqitje të balancuar, me të gjithë titullarët që realizuan mbi 10 pikë, ndërsa protagonisti kryesor ishte Jalen Green me 36 pikë. Në fazën pasuese, Suns do të përballen me kampionët në fuqi, Oklahoma City Thunder.

Në Konferencën e Lindjes, bileta e fundit për në “Play-Off” u sigurua nga Orlando Magic, që dominoi bindshëm 121-90 ndaj Charlotte Hornets. Ndeshja nuk pati shumë histori, me Orlandon që kontrolloi lojën nga fillimi në fund. Të gjithë titullarët realizuan mbi 12 pikë, ndërsa më i spikaturi ishte Paolo Banchero me 25 pikë.

Toni Kroos ka komentuar spekulimet në rritje për një rikthim të mundshëm te Real Madrid, por ka mbajtur një qëndrim të kujdesshëm dhe nuk ka dhënë një përgjigje të prerë.

Në podcastin e tij “Einfach mal Luppen”, së bashku me vëllain Felix Kroos, legjenda gjermane u pyet drejtpërdrejt për zërat që e lidhin me një rikthim në klub në një rol jo-lojtar. Ai u përgjigj:
“Nuk mund të them asgjë për këtë, nuk dua të them asgjë, sepse nuk di asgjë.”

Më pas, Kroos shtoi me humor:
“Kjo është përgjigjja që mund të vazhdosh ta japësh.”

Raportet e fundit sugjerojnë se ai mund të rikthehet në Santiago Bernabeu si një urë lidhëse mes lojtarëve dhe bordit ose të marrë një rol në akademinë e klubit për të zhvilluar talentet e reja të “La Fábrica”.

Kroos ka përshkruar më herët Real Madridin si “shtëpinë” e tij dhe nuk ka përjashtuar një rikthim në të ardhmen në një rol administrativ ose teknik. Megjithatë, ai ka theksuar edhe nevojën për një pauzë pas kërkesave të mëdha të futbollit profesionist, pas tërheqjes nga karriera aktive në fund të sezonit 2023/202

Boksieri Amarildo Bakaj ka befasuar të gjithë duke njoftuar pensionimin nga boksi në moshën 26-vjeçare. Me një rekord të pamposhtur, ai kishte kërkuar një përballje me boksierin numër një të botës në kategorinë e tij, Ben Whitaker, por nuk u konsiderua.

Përmes një postimi në rrjetet sociale, Bakaj shpjegoi se mungesa e sponsorëve e pengonte të përballej me boksierët e tjerë, ndaj vendosi t’i “varë dorezat”.

“Sot ndaj me ju dorëheqjen time nga boksi. E di që disa do të mërziten dhe disa do të gëzohen. Gjatë karrierës sime nuk mbaj mend të kem derdhur lot gëzimi. Shumë kanë përpjekur të më njollosin emrin, sepse kanë parë talentin dhe potencialin tim. Tani, mos më helmoni më zemrën.”

Ai theksoi se nuk kishte frikë nga boksierët me emër, por për të marrë ndeshje të mëdha duheshin sponsorë:

“Boksierët në Angli dhe SHBA janë të fortë, jo për shkak të më shumë zemre apo forcë, por sepse u paguhen trajnerët më të mirë dhe biznesmenët i mbështesin. Tek ne kjo nuk funksionon. Shumë herë kam ndjerë se ëndrrat tona ndalojnë për shkak të rrethanave, jo talentit.”

Bakaj shprehu zhgënjimin ndaj ambientit lokal:

“Edhe shqiptarët e mi kanë tentuar të më pengojnë; interesoheshin vetëm për xhepat e tyre. Kam qenë gjithmonë patriot me zemër dhe nuk u komprometova, por kjo më kushtoi.”

Ai përfundoi me një reflektim të dhimbshëm për vendin dhe për veten:

“Jam 26 vjeç, në moshën më të mirë për boks, por shpirtërisht i lodhur. Kam lindur në vendin e gabuar. Do të më mungoni shumë. Faleminderit për çdo të mirë dhe të keqe. Ju dua.”

Liverpool ka intensifikuar interesimin për Anthony Gordon, anësorin e talentuar që po shkëlqen me Newcastle United në Ligën Premier. Sipas raportimeve, lojtari ka informuar rrethin e tij të ngushtë për dëshirën e fortë për një transferim drejt stadiumit legjendar “Anfield”.

Kjo lëvizje shihet si një përgjigje strategjike për të përforcuar repartin ofensiv pas dëmtimit të fundit të sulmuesit Hugo Ekitike.

Anthony Gordon kërkon një hap cilësor në karrierë, që i mundëson të garojë në Ligën e Kampionëve dhe të përfitojë një rritje page në përputhje me statusin e tij aktual. Megjithatë, Newcastle nuk pritet ta lejojë lehtësisht largimin e një prej lojtarëve kyç, duke e vlerësuar kartonin e tij rreth 92 milionë euro.

Për Gordon, veshja e fanellës së klubit gjashtë herë kampion të Europës përfaqëson realizimin e një ëndrre që më parë nuk arriti ta konkretizonte. Në vitin 2024, transferimi ishte shumë pranë finalizimit, por faktorë administrativë e penguan atë në atë kohë.

Lojtari tashmë ka nisur të eksplorojë aktivisht opsionet për largim, duke qenë i vetëdijshëm se periudha e tij në veri të Anglisë mund të jetë drejt fundit.