Category: Sport

Federata e Futbollit e Kosovës, në bashkëpunim me sponsorin zyrtar të Superligës, Albi Mall, vazhdon ndarjen e çmimit tradicional “Ylli i Javës”, i cili i dedikohet futbollistit më të dalluar të javës në Superligën e futbollit kosovar.

Për javën e njëzet e nëntë të këtij edicioni, çmimi i “Yllit të Javës” i është ndarë për herë të dytë futbollistit të KF Dukagjini, Dienit Isufi, i cili shënoi një gol dhe, nga ndërhyrja ndaj tij, skuadra e tij fitoi penallti në ndeshjen kundër SC Gjilani, e cila përfundoi me rezultatin 2:3, duke i siguruar ekipit të tij tre pikë shumë të rëndësishme.

Vlerësimi është bërë nga Komisioni i Veteranëve të Futbollit.

Pas marrjes së çmimit, Isufi u shpreh i lumtur që u vlerësua si lojtari më i mirë i javës: “E kemi pasur një ndeshje të rëndësishme kundër Gjilanit dhe këto tri pikë na kanë dhënë vetëbesim që ta presim Ballkanin në mesjavë për kupë, po ashtu na japin edhe qetësi në vijim të kampionatit.”

“Synimi ynë është fitimi i Kupës së Kosovës, në mënyrë që të dalim në Evropë, dhe shpresoj që do ta arrijmë këtë qëllim. Loja akoma nuk ka mbaruar dhe kemi koncentrim maksimal”, shtoi ai.

“Për vlerësimin si më i miri i javës, falënderoj familjen time, bashkëlojtarët dhe gjithë stafin e KF Dukagjinit, sepse pa ta performanca ime individuale do të ishte e pamundur”, tha Isufi për faqen zyrtare të FFK-së.

Pas shkarkimit të Nevil Dedës, FC Ferizaj ka vepruar shpejt dhe ka emëruar një trajner të ri. Skuadra ka rikthyer legjendën e klubit, Arsim Abazin, i cili e kishte nisur sezonin në krye të ekipit.

Pas largimit të Dedës, drejtuesit e klubit ferizajas kanë vendosur që ta besojnë stolin Abazit, një trajner që e njeh mirë skuadrën dhe grupin e futbollistëve.

Në një njoftim të bërë nga FC Ferizaj, theksohet se ky rikthim është një vendim i shumëpritur dhe kërkuar fuqishëm nga tifozët. Abazi, që ka një lidhje të ngushtë me klubin dhe qytetin, do të drejtojë skuadrën në një periudhë sfiduese, duke synuar rezultate pozitive dhe stabilitet.

Ky rikthim nuk është vetëm një ndryshim në pankinë, por një mesazh për stabilitet dhe ambicie të mëdha. Tifozët kanë besuar gjithmonë në Abazin, dhe me të në krye, FC Ferizaj synon të rikthejë identitetin dhe frymën garuese, për të arritur objektivat e sezonit me më shumë motivim dhe siguri.

Drejtuesit e Barcelonës po vazhdojnë të hulumtojnë tregun e transferimeve për një sulmues për sezonin e ardhshëm dhe tashmë kanë disa opsione me kosto të ulët për të zëvendësuar polakun Robert Lewandowski.

Së fundmi, Barcelona ka marrë një propozim të ri, ku klubit spanjoll i është sugjeruar sulmuesi i Kombëtares së Shqipërisë, Armando Broja, si alternativë për të forcuar repartin ofensiv. Menaxhmenti i Barcelonës do ta vlerësojë Brojën, duke pasur parasysh se i përshtaten operacionet me kosto të ulët për shkak të situatës financiare të klubit.

Në fakt, Broja shihet si një profil i përshtatshëm, pasi Barcelona mund ta huazojë apo mund të arrijë një marrëveshje me kosto të ulët për transferimin e tij. Megjithatë, në fund, është trajneri Hansi Flick ai që merr vendimin për gjithçka.

Broja është pjesë e Burnleyt në Angli dhe ka pasur një sezon të mbushur me lëndime, ku deri më tani ka realizuar 1 gol dhe ka bërë 2 asistime në 24 paraqitje në të gjitha garat.

Mesfushori i Manchester City-t, Rodri (29), pësoi një dëmtim në ijë në fund të ndeshjes derbi midis Manchester City dhe Arsenal në Ligën Premier dhe u detyrua të largohej nga fusha në minutën e 88-të.

Rodri kishte arritur të rikthehej në formë pas një dëmtimi të mëparshëm të ligamenteve të gjurit, dhe ky problem i ri vjen në një moment jashtëzakonisht të papërshtatshëm për të dhe për klubin. Pas fitores 2:1 ndaj Arsenalit, që e vendosi Manchester City-n vetëm tre pikë pas liderëve në garën për titull, lajmi për dëmtimin e një lojtari kyç si Rodri e ka zbehur këtë triumf.

Trajneri i Manchester City-t, Pep Guardiola, u shpreh: “Nuk e di sa gjatë do të mungojë Rodri. Mjeku tha se është një problem në ijë, por do të shohim pas analizave.”

Rodri ka pasur probleme të mëparshme me shpinën dhe gjurin, për shkak të të cilave humbi 11 ndeshje në ligë. Pavarësisht kësaj, ai ka bërë 31 paraqitje këtë sezon dhe mbetet një nga lojtarët më të rëndësishëm të ekipit.

Klubi i Futbollit FC Besa Peja ka reaguar publikisht pas ndeshjes së zhvilluar në Ferizaj, duke shprehur shqetësim për zhvillimin e takimit dhe duke kërkuar trajtim të drejtë në garat sportive. Në reagimin e klubit thuhet se, ndonëse zakonisht ata zgjedhin të flasin vetëm përmes lojës dhe rezultateve, ngjarjet e fundit i kanë detyruar të dalin publikisht. “Ajo që ndodhi dje në Ferizaj na detyron të reagojmë, sepse tejkalon çdo kufi të pranueshëm për një garë sportive të drejtë dhe të ndershme”, thuhet në deklaratën e klubit.

Klubi nga Peja thekson se deri në momentin kur skuadra e tyre filloi të avanconte në rezultat, loja ishte e barabartë. “Ekipi ynë ishte i organizuar, konkurrues dhe i barabartë në çdo aspekt të lojës. Por, pas këtij momenti, loja mori një rrjedhë që nuk ka lidhje me futbollin që ne përfaqësojmë”, theksohet në reagim.

Më tej, Besa pretendon për ndërhyrje të rënda ndaj lojtarëve dhe ndikim në vendimet e gjyqtarit. “U lejuan ndërhyrje të rënda ndaj lojtarëve tanë pa top, ndërsa vendimet në fushë filluan të ndikohen në mënyrë të dukshme”, thuhet ndër të tjera, duke shtuar se si pasojë e këtyre situatave, janë detyruar të bëjnë zëvendësime për shkak të lëndimeve që, sipas tyre, nuk janë sanksionuar siç duhet.

Mesfushori francez, Eduardo Camavinga, nuk ka ndërmend të largohet nga Real Madrid në fund të sezonit, pavarësisht spekulimeve të fundit për të ardhmen e tij.

Sipas një raporti të publikuar nga Marca, 23-vjeçari mbetet i përkushtuar ndaj klubit madrilen dhe është i vendosur të përmirësojë paraqitjet e tij pas një sezoni nën pritshmëri. Lojtari pranon se forma e tij nuk ka qenë në nivelin e zakonshëm, por nuk e sheh largimin si opsion. Përkundrazi, objektivi i tij është i qartë: të rrisë intensitetin në punë, të rikthejë nivelin optimal dhe të rifitojë besimin e tifozëve në Santiago Bernabeu. Camavinga pritet të shfrytëzojë ndeshjet e mbetura në kampionat për të treguar vlerat e tij, duke nisur nga përballja e radhës kundër Deportivo Alavés, e cila konsiderohet si një moment kyç për rikthimin e tij në formë.

I transferuar nga Rennes në vitin 2021 për rreth 31 milionë euro, mesfushori ka regjistruar deri tani 217 paraqitje zyrtare me fanellën e Real Madridit, duke kontribuar me gjashtë gola dhe 11 asistime. Ai është gjithashtu pjesë e rëndësishme e kombëtares franceze, me 29 ndeshje dhe dy gola të shënuar.

Pavarësisht zërave të merkatos, gjithçka tregon se e ardhmja e Camavingas mbetet e lidhur me “Los Blancos”, të paktën për momentin.

Mbrëmë u luajtën ndeshjet e raundit të parë të play-off-it të NBA-së, ku u shënua një natë emocionuese me fitoret e Orlando Magic dhe San Antonio Spurs.

Orlando Magic mundi Detroit Pistons me rezultatin 112:101 në një ndeshje jashtë fushës së tij dhe mori epërsinë 1-0 në seri. Ekipi nga Florida e kontrolloi ndeshjen që nga fillimi dhe nuk u ndal kurrë pas. Paolo Banchero ishte udhëheqësi i Orlando-s me 23 pikë, nëntë kërcime dhe katër asiste, ndërsa Franz Wagner shënoi 11 nga 19 pikët e tij në çerekun e fundit, duke siguruar fitoren.

Nga ana tjetër, Detroit regjistroi humbjen e 11-të radhazi në shtëpi në fazën eliminatore, duke vazhduar kështu një rekord negativ që zgjat që nga viti 2008. Lojtari më i mirë për Pistons ishte Cade Cunningham, i cili shënoi 39 pikë, një rekord personal në karrierë për të në play-off, ndërsa Tobias Harris shtoi 17 pikë.

Në një tjetër ndeshje, San Antonio Spurs arriti një fitore bindëse ndaj Portland Trail Blazers me rezultatin 111:98. Shfaqja më e madhe e natës ishte Victor Wembanyama, i cili shënoi 35 pikë në debutimin e tij në play-off, duke vendosur një rekord të ri për më shumë pikë në një ndeshje hapëse në play-off, duke e tejkaluar rekordin e Tim Duncan nga viti 1998.

Wembanyama u mbështet nga Steph Castle dhe De’Aaron Fox, të cilët shënuan nga 17 pikë secili dhe ndanë nga 15 asistime. Portland u udhëhoq nga Deni Avdija, i cili shënoi 30 pikë dhe mori 10 kërcime.

Përballja mes Manchester City dhe Arsenal në fundjavë u konsiderua si një “finale e parakohshme” për titullin në Ligën Premier dhe rezultati nuk zhgënjeu në aspektin dramatik.

City i Pep Guardiola arriti një fitore të rëndësishme 2-1 në “Etihad”, duke i dhënë një goditje të fortë Arsenalit në garën për titull. Me këtë sukses, diferenca është ngushtuar në vetëm tre pikë dhe gara tashmë duket si një duel i drejtpërdrejtë deri në fund të sezonit.

Megjithatë, sipas parashikimeve të “superkompjuterit” të Opta-s, Arsenal mbetet favorit për titullin. “Topçinjtë” kanë 72.97% shanse për të përfunduar në vendin e parë, ndërsa Manchester City ka vetëm 27.03%, me një diferencë të parashikuar prej dy pikësh në fund.

Ndërkohë, Manchester United është praktikisht i sigurt për një vend në Ligën e Kampionëve, me 98.64% gjasa për kualifikim pas fitores ndaj Chelsea.

Në garën për zonën evropiane, Liverpool dhe Aston Villa kanë forcuar pozitat e tyre. Një moment vendimtar erdhi nga Virgil van Dijk, i cili realizoi në minutën e 100-të ndaj Everton, duke krijuar një avantazh të rëndësishëm për Liverpoolin.

Forma e dobët e Chelsea në këtë fazë të sezonit mund t’i kushtojë shumë, pasi londinezët rrezikojnë seriozisht të mbeten jashtë çdo gare evropiane. Në të njëjtën zonë, Brentford dhe Bournemouth janë në garë të ngushtë, me këta të fundit që madje kanë gjasa të ngjiten më lart në renditje.

Sa i përket mbijetesës, Leeds United ka marrë frymë pas fitores ndaj Wolverhampton Wanderers, duke krijuar një diferencë prej tetë pikësh nga zona e rënies.

Ndërkohë, Burnley dhe Wolverhampton Wanderers konsiderohen tashmë të rënë nga kategoria, me 100% gjasa sipas parashikimeve.

Skuadra e tretë që pritet të bjerë ende nuk është e qartë. Aktualisht, Tottenham Hotspur ndodhet në atë pozitë pas një barazimi dramatik ndaj Brighton & Hove Albion, ndërsa West Ham United është menjëherë mbi ta dhe mbetet në rrezik serioz, me rreth 38.97% gjasa për rënie.

Java në vazhdim mund të jetë vendimtare, sidomos për Cityn që luan ndaj Burnleyt – një ndeshje që mund t’i çojë përkohësisht në krye dhe ta kthejë garën për titull në një duel edhe më të ashpër deri në fund.

Javën e ardhshme, Milan dhe Juventus do të përballen jo vetëm në fushën e lojës, por edhe në merkato, në një betejë të mundshme për të siguruar shërbimet e Robert Lewandowskit. Sulmuesi polak, i cili ka kontratë me Barcelonën që skadon në dy muaj, është në një moment të rëndësishëm të karrierës së tij. Ai do të duhet të vendosë nëse do të rinovojë me katalanasit, duke pranuar një ulje page, apo do të kërkojë një kapitull të ri në fund të karrierës.

Përveç interesit të dy klubeve italiane, Lewandowski ka gjithashtu ofertat nga Arabia Saudite dhe Major League Soccer në SHBA. Edhe pse po afrohet 38 vjeç, ai vazhdon të mbetet një nga sulmuesit më të suksesshëm, duke shënuar mbi 560 gola gjatë karrierës së tij me Dortmundin, Bayern Munich dhe Barcelonën. Gjatë këtij sezoni, ai ka realizuar 17 gola me ekipin katalanas.

Lewandowski ka pohuar se ende nuk ka marrë një vendim përfundimtar dhe është i hapur për mundësi të ndryshme. Ai theksoi se Barcelona është në dijeni të mendimeve të tij. Ndërkohë, Milan dhe Juventus janë duke përgatitur ofertat e tyre, dhe gara mes këtyre dy klubeve pritet të jetë një luftë e fortë, jo vetëm në fushën e lojës, por edhe në merkato