Category: Sport

Erling Haaland beson se përvoja e Manchester Cityt në fitimin e trofeve mund të jetë vendimtare në përballjen ndaj Arsenalit në Premier League. Sulmuesi norvegjez thekson se City mbetet “i uritur për më shumë” ndërsa gara për titull hyn në fazën vendimtare të sezonit.

Manchester City shkon në këtë duel me mundësinë për të marrë kryesimin e tabelës. Një fitore ndaj Arsenalit dhe më pas tri pikë kundër Burnley do t’u jepte kampionëve aktualë një kontroll të fortë në garën për titull.

Pavarësisht ardhjes së disa lojtarëve të rinj, bërthama e skuadrës mbetet e njëjtë dhe përbëhet nga lojtarë me përvojë të madhe në fitimin e trofeve. Haaland, pjesë e kësaj bërthame, është optimist se skuadra mund të përsërisë sukseset edhe këtë sezon.

Duke folur para ndeshjes, ai theksoi se përvoja në fitimin e trofeve ka rëndësi të madhe, se City është një klub ku duhet të vish dhe të fitosh trofe, dhe se ndeshja e fundit kundër Chelsea tregoi fuqinë e ekipit, i cili është i uritur për më shumë suksese.

Barcelona tashmë ka një ide të qartë për llojin e sulmuesit që dëshiron të nënshkruajë këtë verë në rast se nuk arrin të sigurojë objektivin e tyre kryesor, Julián Alvarez nga Atletico Madrid.

Klubi katalanas ka ndjekur nga afër sulmuesin kosovar të Mallorcas, Vedat Muriqi, për javë të tera, megjithëse ende nuk ka pasur kontakte zyrtare me përfaqësuesit e tij.

Muriqi po kalon një sezon të shkëlqyer me Mallorcan, ku ka shënuar 21 gola dhe është golashënuesi i dytë më i mirë i sezonit në La Liga. Në moshën 31-vjeçare, ai është bërë një nga lojtarët kryesorë të ligës. Me një gjatësi prej 1.94 metra, ai dominon në ajër, sfidon qendërmbrojtësit dhe ka nuhatje për gol – një profil i ndryshëm nga sulmuesit aktualë të Barcelonës, por pikërisht kjo e bën tërheqës për ekipin.

Real Madrid ka bërë një gjest të madh human dhe mbështetës ndaj ish-lojtares së saj, Kosovare Asllani, pas dëmtimit të rëndë që ajo ka pësuar së fundmi.

Klubi madrilen i ka dërguar një letër zyrtare Asllanit, duke i uruar shërim të shpejtë dhe duke shprehur mbështetje të plotë institucionale nga e gjithë struktura e klubit, përfshirë edhe presidentin Florentino Pérez.

Në mesazhin e publikuar, Real Madridi thekson respektin dhe lidhjen e veçantë me futbollisten, e cila ka qenë pjesë e ekipit të femrave dhe ka lënë gjurmë të rëndësishme gjatë periudhës së saj në klub.

Letra e plotë e dërguar nga drejtori i marrëdhënieve institucionale të klubit, Emilio Butragueno, është si më poshtë.

“E dashur Kosova, në emër të të gjithëve ne që formojmë Real Madridin, dhe veçanërisht të presidentit tonë, Florentino Perez, dua t’ju përcjell urimet tona më të mira për një shërim të shpejtë nga dëmtimi juaj. Me shumë dashuri. Një përqafim të madh”, thuhet në letrën e nënshkruar nga Emilio Butragueno, drejtori I Marrëdhënieve Institucionale të klubit.

Ky gjest nga “Los Blancos” vjen si dëshmi e vlerësimit dhe respektit që klubi ruan për ish-lojtarët e tij, si dhe për kontributin e Asllanit gjatë kohës së saj në ekipin madrilen.

Akil Gjakova nuk arriti të sigurojë një vend në podium në Kampionatin Evropian të xhudos që po mbahet në Tbilisi të Gjeorgjisë, ku marrin pjesë rreth 400 xhudistë nga 46 shtete.

Xhudisti nga Peja humbi në repesazh për medaljen e bronztë në kategorinë deri në 73 kilogramë, duke u ndalur nga turku Bilal Ciloglu, i cili realizoi një hedhje që i solli 10 pikë. Kështu, Gjakova u rendit në vendin e pestë në këtë evropian.

Në ditën e sotme të garave, edhe Laura Fazliu dhe Dardan Cena u eliminuan më herët nga konkurrenca e tyre.

Megjithatë, Kosova ka arritur një sukses të madh në këtë kampionat, pasi Distria Krasniqi fitoi medaljen e artë në kategorinë deri në 52 kilogramë.

Trajneri i Brazilit, Carlo Ancelotti, ka ngritur shqetësime serioze për gjendjen aktuale të futbollit italian, duke theksuar se hendeku mes Serie A dhe elitës evropiane po zgjerohet gjithnjë e më shumë.

Në një intervistë për “Il Giornale”, Ancelotti u shpreh se problemi kryesor lidhet me mungesën e ritmit dhe intensitetit në lojë, jo vetëm në aspektin fizik, por edhe në atë mendor.

“Sipas tij, dallimi themelor është ritmi, përqendrimi dhe pjesëmarrja e vazhdueshme në lojë. Futbolli italian e ka humbur këtë,” u shpreh ai.

Ai theksoi gjithashtu se Italia ka humbur një nga pikat e saj më të forta historike: organizimin dhe qëndrueshmërinë mbrojtëse. Sipas Ancelottit, fokusi i tepruar te taktika ka ndikuar negativisht në stilin tradicional të lojës.

“Futbolli nuk është vetëm të shënosh më shumë, por edhe të pësosh më pak. Nëse nuk rikthejmë mentalitetin mbrojtës, do të vazhdojmë të vuajmë,” deklaroi ai.

Duke komentuar ndeshjet e fundit në Ligën e Kampionëve, Ancelotti tha se ndeshjet me shumë gola shpesh tregojnë edhe dobësi në mbrojtje dhe gabime individuale.

“Ndeshje si Atletico Madrid–Barcelona apo Bayern Munich–Real Madrid janë spektakolare, por shumë gola nënkuptojnë edhe shumë gabime nga mbrojtësit dhe portierët,” shtoi ai.

Në fund, ai ngriti shqetësimin edhe për të ardhmen e futbollit italian, duke theksuar se Serie A nuk po arrin më të tërheqë talentet më të mëdha, pasi tregje të tjera janë bërë më konkurruese

Humbja e thellë 4-0 në Strasburg të enjten mbrëma i dha fund aventurës evropiane të Mainz në UEFA Europa Conference League, duke shuar shpresat për një surprizë të madhe.

Pas përfundimit të ndeshjes, situata u tensionua në fushë. Lojtari i Strasburgut, Martial Godo, festoi në mënyrë provokuese para tifozëve të Mainz, duke përdorur flamurin e këndit, gjë që shkaktoi reagim të menjëhershëm nga lojtarët mysafirë.

Nadiem Amiri dhe Phillip Tietz iu afruan Godos, duke çuar në një përplasje fizike dhe verbale mes lojtarëve. Situata u përshkallëzua aq sa ndërhyrja e sigurimit u bë e domosdoshme për të ndarë palët.

Si pasojë e incidentit, Amiri u ndëshkua me karton të kuq për sjellje josportive pas ndeshjes. Nga ana e Mainz pati reagime të ashpra, duke e cilësuar festën e lojtarit vendas si mungesë respekti dhe veprim të papranueshëm në frymën e sportit.

Mesfushori i Real Madrid, Eduardo Camavinga, ka reaguar publikisht pas eliminimit në UEFA Champions League ndaj Bayern Munich, duke marrë përgjegjësinë për kartonin e kuq.

Francezi u përjashtua nga loja pas dy kartonëve të verdhë brenda pak minutash, një moment që ndikoi drejtpërdrejt në rrjedhën e ndeshjes në Mynih.

Pas takimit, Camavinga përdori rrjetet sociale për t’u kërkuar falje tifozëve dhe bashkëlojtarëve.

“Dua të kërkoj falje. Marr përgjegjësinë time dhe i kërkoj falje ekipit dhe tifozëve. Faleminderit për mbështetjen. Hala Madrid, përgjithmonë”, shkroi ai.

Mesfushori hyri në fushë në pjesën e dytë, në një moment kur Reali ishte në avantazh, por situata ndryshoi shpejt. Ai u ndëshkua fillimisht për një ndërhyrje ndaj Jamal Musiala dhe më pas për një veprim të panevojshëm pas një faulli ndaj Harry Kane, duke larguar topin pas sinjalit të arbitrit Slavko Vinčić.

Me një lojtar më pak, Real Madridi nuk arriti të ruajë rezultatin, ndërsa Bayerni përmbysi gjithçka dhe siguroi kualifikimin.

Vendimi i arbitrit ka shkaktuar reagime të forta në Spanjë, ku shumë e kanë cilësuar ndëshkimin si të ashpër. Megjithatë, gabimi i Camavingas rezultoi vendimtar në një mbrëmje dramatike për madrilenët

Sulmuesi i FC Barcelona, Robert Lewandowski, ka folur për situatën e tij me klubin katalanas, duke theksuar se i duhet kohë për të marrë një vendim për të ardhmen.

“Ne kemi kohë. Klubi e di saktësisht se çfarë mendoj. Më duhet pak kohë për të reflektuar, kjo është e qartë për të dyja palët”, u shpreh sulmuesi polak.

37-vjeçari ndodhet në vitin e fundit të kontratës së tij, e cila skadon në fund të sezonit, ndërsa Barcelona raportohet se i ka ofruar një zgjatje afatshkurtër me ulje page.

Duke folur për eliminimin nga UEFA Champions League, Lewandowski pranoi zhgënjimin e skuadrës.

“Gjithmonë dhemb kur eliminohesh nga Liga e Kampionëve. Donim të luftonim deri në fund dhe të arrinim në gjysmëfinale, por ky është futbolli”, deklaroi ai.

Megjithatë, sulmuesi theksoi se skuadra ka potencial të madh për të arritur objektivat.

“Futbolli nuk është gjithmonë i drejtë, por ne kemi potencial të madh. Jemi të etur për të fituar dhe për të luajtur futboll të bukur. Nuk mund të ndalemi te ajo që ka ndodhur, e ardhmja është më e rëndësishme”, shtoi ai.

Në fund, Lewandowski bëri të qartë se fokusi aktual i ekipit është fitimi i titullit në La Liga.

“Tani duhet të përqendrohemi te La Liga. Duam ta fitojmë. Kemi disa ditë për t’u përgatitur dhe kjo është gjithçka që kemi në mendje”, përfundoi ai.

Mbrojtësi i kombëtares së Austrisë, David Alaba, pritet të largohet nga Real Madrid si lojtar i lirë, sipas raportimeve të gazetarit të njohur Fabrizio Romano.

Sipas këtyre burimeve, kontrata e 33-vjeçarit me klubin madrilen skadon më 30 qershor 2026 dhe aktualisht nuk ka sinjale për rinovim të marrëveshjes, çka e vendos mbrojtësin drejt një largimi të mundshëm në fund të sezonit.

Gjatë kësaj periudhe, disa klube thuhet se kanë nisur kontaktet fillestare me përfaqësuesit e lojtarit, duke shprehur interes për shërbimet e tij. Përvoja e gjatë në nivelet më të larta të futbollit evropian e bën Alabën një profil tërheqës në treg, pavarësisht problemeve të fundit me dëmtimet dhe minutazhit të kufizuar.

Alaba iu bashkua Real Madridit në verën e vitit 2021 si transferim i lirë, pas largimit nga Bayern Munich, ku ishte një nga figurat kyçe të skuadrës dhe fitoi trofe të shumtë.

Këtë sezon, mbrojtësi austriak ka regjistruar 13 paraqitje në të gjitha garat, duke grumbulluar gjithsej 391 minuta lojë, pa arritur të kontribuojë me gola apo asistime. Kjo statistikë reflekton kryesisht rolin e tij të kufizuar në formacion, si pasojë e konkurrencës dhe rikuperimit nga dëmtimet.

E ardhmja e tij pritet të qartësohet në muajt e ardhshëm, ndërsa interesimi nga klube të ndryshme evropiane mund ta bëjë atë një nga emrat më të diskutuar të afatit kalimtar të verës.

Kjo fundjavë pritet të sjellë xhiron e 29-të në Albi Mall Superligën e Kosovës,ku në program pritet të ketë ndeshje mjaft interesante për dashamirët e futbollit vendor.

Vëmendja pritet të jetë të shtunën në stadiumin “Zahir Pajaziti”në Podujevë,ku Llapi e pret Prishtinën në ndeshjen kryesore të kësaj fundjave.

Të dyja skuadrat kanë synime të ndryshme deri në fund të sezonit,ku ekipi i Tahir Batatinës synon pikë të plota në mënyrë që të shmangë pozitat që shpien në rënie nga elita e futbollit vendor,teksa në anën tjetër kryeqytetasit 3 pikët janë mjaft të rëndësishme për të siguruar pozitën e tretë që dërgon në garat evropiane.

Po të shtunën pritet të zhvillohet edhe takimi ndërmjet Ferizajt dhe Prishtinës e Re,ku Ferizaj synon pikë në mënyrë që të largohet nga zona e barazhit teksa Prishtina e Re synon pikë për të mbajtur gjallë shpresat për mbijetesë në Albi Mall Superligë.

Të dielën pritet të zhvillohen 3 ndeshje të tjera,ku kampioni aktual Drita luan në Skënderaj ndaj Drenicës,teksa Ballkani dhe Gjilani pritet të takohen kundër Malishevës respektivisht Dukagjinit.

Kujtojmë që të gjitha ndeshjet pritet të nisin nga ora 15:00