Category: Sport

E ardhmja e Andriy Lunin tek klubi mbretëror spanjoll Real Madrid pritet të vendoset gjatë kësaj vere.

Portieri ukrainas sipas Mundo Deportivo mund të largohet nga Santiago Bernabeu,përkundër që Lunin ka kontratë deri në vitin 2030 me “Los Blancos”.

Përndryshe Lunin ka hyrë në një fazë ku dëshiron që të luaj rregullisht në çdo ndeshje,dhe se tek Reali është pothuajse e pamundur marrë parasysh faktin që zgjedhja e parë Thibaut Courtois pritet që të rikthehet nga lëndimi.

Ndërkohë drejtuesit e Real Madrid po synojnë që të gjejnë një portier që mund të jetë zëvendësues i gardianit belg,i cili sipas tyre duhet të trajtohet me kujdes edhe pse nuk për momentin si çështje urgjente.

Kujtojmë që Andriy Lunin ka qenë titullar në ndeshjet e fundit me Real Madrid-it që prej lëndimit të Thibaut Courtois,duke përfshirë edhe dy ndeshjet cerekfinale të Ligës së Kampionëve kundër Bayern Munich në të cilën pësoi 6 gola cka bëri që “Los Blancos” të eliminohet nga Champions.

Kombëtarja e Italisë mund të marrë pjesë në Kupën e Botës 2026 në vend të Kombëtares së Iranit.

Sic raporton Financial Times i dërguari special i presidentit të SHBA-së Donald Trump Paolo Zampolli ka bërë kërkesë FIFA-së që ta përjashtojë Iranin,dhe në vend të saj të merrë pjesë kampioni i katërfisht i botës dhe sipas tij ka mjaft arsye për ta bërë këtë.

“Konfirmoj se u kam sugjeruar Trumpit dhe Infantinos që Italia të zëvendësojë Iranin në Kupën e Botës. Unë jam me origjinë nga Italia dhe do të ishte një ëndërr të shihja Azzurrët në turneun në SHBA. Me katër tituj, ata kanë prejardhjen për të justifikuar përfshirjen e tyre”, tha Zampolli.

Përndryshe kjo lëvizje shihet si një përpjekje për të zbutur marrëdhëniet mes presidentit amerikan Donald Trump dhe kryeministres italiane Giorgia Meloni,ku kohëve të fundit ka pasur akuza nga presidenti amerikan Trump në drejtim të qeverisë italiane lidhur me moslejimin e avionëve ushtarakë amerikanë, të përfshirë në bombardimin e Iranit, të përdorin bazën amerikane në Sicili për t’u furnizuar me karburant.

Në anën tjetër Irani është i gatshëm që të luaj në botërorin e këtij viti,edhe pse ka kërcënuar se do të tërhiqej për shkaqe sigurie dhe se pas sulmeve ajrore amerikane dhe izraelite që vranë udhëheqësin iranian dhe një numër zyrtarësh të lartë dhe qytetarësh,ndërkohë që kishte kërkuar që ndeshjet kombtarja iraniane t’i luante në Meksikë por që kjo kërkesë u hodh poshtë nga FIFA.

Kujtojmë që Italia nuk arriti që të kualifikohej në botëror,kjo pasi humbi në play-off nga Bosnja e Hercegovina pas ekzekutimit të penalltive.

Lëvizjet e shumta në pankinë vazhdojnë të jenë një tipar dallues për Chelsea FC, i cili në një dekadë ka ndërruar plot 10 trajnerë të ndryshëm, pa përfshirë emërimet e përkohshme.

Që nga viti 2016, klubi londinez ka kaluar nëpër një rotacion të vazhdueshëm teknik, duke nisur me Guus Hiddink, e më pas me emra të mëdhenj si Antonio Conte dhe Maurizio Sarri.

Në këtë listë nuk mungojnë as trajnerë që sollën trofe, si Thomas Tuchel, por as eksperimente që nuk rezultuan të suksesshme, si Graham Potter dhe Mauricio Pochettino. Më pas drejtimin e mori Enzo Maresca, ndërsa i fundit në këtë seri ishte Liam Rosenior.

Megjithatë, situata ka marrë një tjetër kthesë të papritur, vetëm dje, Liam Rosenior u shkarkua nga detyra, duke e lënë aktualisht Chelsean pa trajner të përhershëm.

Ky zhvillim vetëm sa thekson krizën e vazhdimësisë në klub, i cili pavarësisht investimeve të mëdha dhe ambicieve të larta, ende nuk ka arritur të gjejë stabilitet në pankinë. Tani mbetet për t’u parë se kush do të jetë emri i radhës që do të marrë drejtimin e skuadrës në një moment delikat për “Blutë”.

Skena është vendosur për një finale që pritet të dhurojë emocione të mëdha në futsallin kosovar. FC Prishtina 01 dhe FC Liqeni do të përballen për trofeun e Kupës së Kosovës, në një duel që premton rivalitet të fortë dhe spektakël.

Përballja vendimtare do të luhet më 29 prill, nga ora 20:00, në Pallati i Rinisë dhe Sporteve, ku pritet një atmosferë e zjarrtë dhe mbështetje e madhe nga tifozët në tribuna.

FC Prishtina 01 vjen në këtë finale si një nga skuadrat më të suksesshme të viteve të fundit, me disa trofe të fituar dhe me ambicien për të vazhduar dominimin në skenën vendore.

Në anën tjetër, FC Liqeni hyn në këtë sfidë me besim të madh dhe përvojë në ndeshje vendimtare, duke synuar rikthimin e kupës dhe përsëritjen e suksesit të mëparshëm.

Dy ekipe me histori fituese, një trofe në lojë dhe shumë krenari në fushë — kjo finale pritet të jetë më shumë se një ndeshje, një betejë e vërtetë për lavdi.

Barcelona mori një fitore të rëndësishme ndaj Celta Vigos, por mbrëmja u shoqërua me momente shqetësuese, sidomos për talentin e ri Lamine Yamal.

Ylli 18-vjeçar kaloi katalanasit në avantazh në minutën e 39-të, duke realizuar saktë nga penalltia dhe duke vulosur epërsinë 1-0, që në fund rezultoi vendimtare për triumfin e Barcelonës. Megjithatë, festa zgjati pak për të riun, pasi menjëherë pas golit ai u rrëzua në tokë dhe sinjalizoi stolin për një problem fizik.

Yamal u largua nga fusha drejt dhomave të zhveshjes, duke lënë pas shumë paqartësi mbi natyrën e dëmtimit. Ky episod ngriti shqetësim te stafi dhe tifozët, veçanërisht duke pasur parasysh formën e tij të jashtëzakonshme këtë sezon, ku ka arritur në 24 gola dhe 20 asistime.

Situata u bë edhe më e pazakontë kur ndeshja u ndërpre për disa minuta në fund të pjesës së parë. Sipas raportimeve nga Marca, arsyeja ishte një emergjencë në tribuna, ku një tifoz i Celta Vigos kishte nevojë për ndihmë mjekësore. Lojtarët qëndruan në fushë pa aktivitet deri në normalizimin e situatës.

Pas rifillimit, pjesa e parë u mbyll me rezultatin 1-0, rezultat që Barcelona arriti ta ruajë deri në fund për të marrë tre pikët, edhe pse me shqetësime për gjendjen e një prej lojtarëve më premtues të skuadrës.

Kampionët në fuqi të NBA-së, Oklahoma City Thunder, kanë siguruar edhe fitoren e dytë në serinë e Play-Off-it ndaj Phoenix, këtë herë me rezultat 120:107, ndonëse me më shumë vështirësi krahasuar me përballjen e parë.

Megjithatë, jo gjithçka ishte pozitive për skuadrën kampione. Trajneri i Thunder mbetet i shqetësuar për gjendjen e Jalen Williams, i cili pësoi një dëmtim në pjesën e pasme të trupit, duke ngritur pikëpyetje për vazhdimin e tij në seri.

Shai Gilgeous-Alexander ishte sërish lideri i ekipit, duke shkëlqyer me 37 pikë, nëntë asistime dhe pesë kërcime. Ai u mbështet mirë nga Chet Holmgren dhe Jalen Williams, që kontribuuan me nga 19 pikë secili. Holmgren shtoi edhe tetë kërcime, ndërsa Williams katër asistime. Kontribut të rëndësishëm dha edhe Mitchell me 14 pikë, pesë kërcime dhe pesë asistime.

Te Phoenix, performancë të jashtëzakonshme pati Brooks me 30 pikë dhe gjashtë kërcime, ndërsa Devin Booker shtoi 22 pikë, shtatë kërcime dhe katër asistime. Green realizoi 21 pikë, ndërsa O’Neale u dallua me 16 pikë, nëntë kërcime dhe katër asistime.

Seria tani zhvendoset në Phoenix, ku do të zhvillohen dy ndeshjet e radhës, me të parën që luhet të shtunën në mbrëmje në orën 21:30.

 

Në ndeshjen tjetër të mbrëmjes në Konferencën e Lindjes, Detroit Pistons triumfoi ndaj Orlando Magic me rezultatin 98:83, duke barazuar serinë në 1:1.

Cade Cunningham udhëhoqi Detroitin me një paraqitje të shkëlqyer prej 27 pikësh, 11 asistimesh dhe gjashtë kërcimesh. Tobias Harris kontribuoi me 16 pikë dhe 11 kërcime, ndërsa Duren dhe Thompson shtuan nga 11 pikë secili. Edhe Robinson dhe Stewart u regjistruan me pikë dyshifrore.

Për Orlandon, më i dalluari ishte Suggs me 19 pikë, gjashtë kërcime dhe katër asistime. Paolo Banchero shtoi 18 pikë, tetë asistime dhe gjashtë kërcime, ndërsa Bane dhe Franz Wagner realizuan nga 12 pikë secili.

Dy ndeshjet e ardhshme do të zhvillohen në Orlando, me përballjen e parë të planifikuar për të shtunën në orën 19:00.

Boksierja kosovare Donjeta Sadiku ka shënuar një fitore të thellë në kuadër të turneut prestigjioz World Boxing Cup – Brazil 2026, që po mbahet në Foz do Iguaçu.

Në duelin e zhvilluar mbrëmjen e 22 prillit, në kategorinë 60 kilogramë, Sadiku triumfoi ndaj boksieres nga Zelanda e Re, Jordan Wilson, me rezultat të pastër 5:0.

Ajo e nisi meçin fuqishëm që në raundin e parë, duke e rrëzuar dy herë në knockdown kundërshtaren. Dominimi vazhdoi edhe në raundin e dytë, ku Sadiku realizoi një tjetër knockdown, duke detyruar gjyqtarin të ndërhyjë me numërim dhe të ndalojë përkohësisht ritmin e luftës. Në raundin e tretë, ajo ruajti kontrollin e plotë, duke e përmbyllur duelin në mënyrë bindëse.

Ky turne ka rëndësi të veçantë për boksierët, pasi pikët e fituara ndikojnë drejtpërdrejt në kualifikimin për Lojërat Olimpike Los Angeles 2028.

Sadiku pritet të rikthehet në ring më 24 prill, nga ora 16:00, në përballjen e saj të radhës, ku synon të vazhdojë rrugëtimin e suksesshëm në këtë kompeticion ndërkombëtar.

Me 50 ditë deri në nisjen e Kupës së Botës, FIFA dhe shtetet nikoqire po përballen me kritika për çështje sociale, politike dhe logjistike që po e rrethojnë turneun.

Kanadaja dhe Meksika do ta bashkëorganizojnë turneun me Shtetet e Bashkuara, të cilat së bashku me Izraelin më 28 shkurt nisën një luftë kundër Iranit, shtet pjesëmarrës në Kupën e Botës. Edhe pse lufta është aktualisht nën një armëpushim të përkohshëm dhe të brishtë, pjesëmarrja e Iranit mbetet e paqartë.

Tifozët në të tri vendet nikoqire po reagojnë ashpër edhe ndaj çmimeve të larta të biletave, ndërsa politikanë lokalë dhe publiku kanë shprehur shqetësime për rritjen e tarifave të transportit në linjat që lidhin stadiumet në SHBA.

Al Jazeera Sport sjell një pasqyrë të shqetësimeve kryesore në prag të turneut, që nis më 11 qershor me ndeshjen hapëse mes Meksikës dhe Afrikës së Jugut.

Çfarë është më e fundit rreth pjesëmarrjes së Iranit në Kupën e Botës?

Kombëtarja e Iranit po vazhdon përgatitjet, por zyrtarët kanë bërë të ditur se vendimi përfundimtar për pjesëmarrjen do të merret nga qeveria dhe Këshilli i Sigurisë Kombëtare, pasi të shqyrtohet siguria e lojtarëve në SHBA.

Irani kishte deklaruar muajin e kaluar se mund të mos marrë pjesë, sidomos nëse vendi nikoqir nuk garanton sigurinë e ekipit. Kjo erdhi pas një postimi në rrjete sociale nga presidenti Donald Trump, ku ai sugjeroi se siguria e ekipit iranian nuk mund të garantohej në SHBA vend ku Irani pritet t’i luajë të gjitha ndeshjet e grupit.

Federata iraniane më pas i kërkoi FIFA-s t’i zhvendoste ndeshjet e Iranit nga SHBA në Meksikë, por FIFA e refuzoi kërkesën. Presidenti i FIFA-s, Gianni Infantino, deklaroi javën e kaluar se Irani “duhet të vijë” në turne.

Irani do t’i luajë të gjitha ndeshjet e fazës së grupeve në Bregun Perëndimor të SHBA-së. Nëse kalon tutje, edhe ndeshjet e fazës me eliminim do të zhvillohen po në SHBA.

Çmime të larta të transportit në qytetet nikoqire në SHBA

Tifozët pritet të paguajnë gati 12 herë më shumë se tarifa e zakonshme prej 12.90 dollarësh për një udhëtim vajtje-ardhje me tren nga Penn Station në Manhattan drejt stadiumit MetLife në East Rutherford, New Jersey stadiumi ku do të luhet finalja e Kupës së Botës dhe edhe shtatë ndeshje të tjera.

Guvernatorja e New Jerseyt, Mikie Sherrill, dhe FIFA janë kritikuar reciprokisht për çmimin prej 150 dollarësh për një udhëtim rreth 15-minutësh (14 km). Sherrill ka thënë se FIFA duhet t’i mbulojë kostot, ndërsa FIFA ka reaguar se nuk është e obliguar ta bëjë këtë.

Në Boston, udhëtimi me tren drejt stadiumit Gillette kushton rreth katër herë më shumë se çmimi normal (rreth 20 dollarë), ndërsa autobusi vajtje-ardhje drejt Foxborough arrin 95 dollarë.

Los Angeles dhe Philadelphia janë zotuar se nuk do t’i ndryshojnë tarifat. Kansas City ofron 15 dollarë vajtje-ardhje drejt stadiumit Arrowhead. Houston ka shtuar autobusë dhe vagona treni, por synon t’i mbajë tarifat aktuale: 1.25 dollarë për autobusët dhe trenat e lehtë, si dhe opsione parkim+transport nga 2 deri në 4.50 dollarë.

Çmime të larta të biletave, kërkesë më e ulët

Çmimet e larta të biletave kanë shkaktuar zemërim te tifozët, të cilët thonë se politika e çmimeve po i përjashton mbështetësit e zakonshëm. Raportohet se shitjet për disa ndeshje të mëdha kanë mbetur prapa pritshmërive, çka shihet si pasojë e çmimeve.

FIFA i nxori biletat në shitje në dhjetor me çmime nga 140 dollarë (Kategoria 3 në raundin e parë) deri në 8.680 dollarë për finalen. Më pas, kur shitja u rihap më 1 prill, çmimet u rritën deri në 10.990 dollarë.

Kandidatura e Amerikës së Veriut kishte premtuar bileta deri në 21 dollarë, por bileta më e lirë është vendosur 60 dollarë. Shumica e biletave kushtojnë të paktën 200 dollarë për ndeshjet me ekipe më të forta.

FIFA ka paralajmëruar edhe një raund tjetër shitjesh, në përputhje me numërimin mbrapsht prej 50 ditësh: biletat do të jenë të disponueshme në kategoritë 1-3 për të gjitha 104 ndeshjet, me parimin “i pari vjen, i pari shërbehet”.

Kundërshtime për bastisjet ndaj emigrantëve gjatë ndeshjeve

Politikat e administratës Trump për deportime masive dhe shtrëngim të emigracionit ligjor kanë ngritur frikë se audienca ndërkombëtare e Botërorit mund të vihet në shënjestër nga autoritetet amerikane të emigracionit.

Javën e kaluar, Infantinos iu kërkua të ushtrojë presion që të shmangen bastisjet gjatë turneut. Gazetarë sugjerojnë se agjentë të ICE dhe CBP kanë qenë të pranishëm në ndeshjet e Kupës së Botës për Klube vitin e kaluar, edhe pse administrata Trump ka mohuar se ka pasur operacione zbatimi.

Sipas The Athletic, drejtues të FIFA-s e kanë paraqitur idenë e një moratoriumi të përkohshëm si përfitim të mundshëm për imazhin e administratës, dhe shpresojnë që Infantino ta përdorë marrëdhënien e tij me Trumpin për të ulur frikën e tifozëve.

Dhuna në Meksikë ngre alarm për sigurinë e turneut

Meksika po përballet me shqetësime për sigurinë pas një sulmi ndaj turistëve pranë kryeqytetit. Të hënën, një sulmues i vetëm hapi zjarr në Teotihuacan vend i Trashëgimisë Botërore të UNESCO-s dhe një nga atraksionet më të vizituara në Meksikë duke vrarë një turist kanadez dhe duke plagosur 13 të tjerë.

Ngjarja ka shtuar pyetjet mbi protokollet e sigurisë të qeverisë së presidentes Claudia Sheinbaum në prag të turneut. Sheinbaum ka thënë se Meksika do ta forcojë sigurinë.

“Detyrimi ynë si qeveri është të marrim masat e duhura që një situatë e tillë të mos përsëritet. Por është e qartë se kjo është diçka që nuk kishte ndodhur më parë”, tha ajo.

Chelsea FC ka vendosur të ndërpresë bashkëpunimin me Liam Rosenior, duke e bërë zyrtare shkarkimin e tij pas një periudhe të mbushur me tensione, rezultate të dobëta dhe probleme të brendshme në skuadër.

Vendimi erdhi pas humbjes së rëndë ndaj Brighton & Hove Albion, që duket se ishte pika kulmore e krizës. Në ditët pasuese, drejtuesit e klubit zhvilluan takime të shumta për të analizuar situatën, ndërsa presioni mbi trajnerin u rrit ndjeshëm.

Raportimet nga mediat britanike zbuluan një prishje serioze në komunikim mes Rosenior dhe lojtarëve. Brenda dhomës së zhveshjes kishte konfuzion për udhëzimet taktike, dhe shumë futbollistë nuk ndiheshin të qartë për rolet e tyre në fushë. Megjithatë, burime pranë klubit theksuan se problemi nuk lidhej me qëndrimin apo disiplinën e lojtarëve, por me mënyrën se si po menaxhohej ekipi.

Situata u përkeqësua edhe më shumë pasi Rosenior kritikoi publikisht disa lojtarë për mungesë vendosmërie, një lëvizje që nuk u prit mirë brenda skuadrës. Një burim nga dhoma e zhveshjes e cilësoi këtë si një hap të gabuar, duke theksuar se deklaratat publike vetëm sa shtuan tensionin.

Pas ndeshjes me Brighton, pati paqartësi edhe për reagimin e trajnerit në dhomat e zhveshjes. Disa raportime pretendonin se ai nuk iu drejtua fare ekipit, ndërsa të tjera se vetëm i përshëndeti shkurt lojtarët dhe stafin, pa mbajtur një fjalim të plotë.

Paralelisht, bordi i Chelsea kishte nisur të shqyrtonte alternativa për të ardhmen, duke kërkuar një trajner me përvojë në nivelet më të larta. Emra si Andoni Iraola dhe Edin Terzić u përmendën si kandidatë potencialë, ndërsa klubi kishte vendosur që këtë herë të shmangë një tjetër emër pa eksperiencë në nivele të larta.

Me largimin e Rosenior, drejtimin e ekipit e merr Callum McFarlane si trajner i përkohshëm deri në fund të sezonit. Ai pritet të stabilizojë skuadrën në një moment delikat, ndërsa drejtuesit do të vazhdojnë kërkimin për një zgjidhje afatgjatë në pankinë.

Klubi italian Juventus ka nisur lëvizjet për përforcimin e portës gjatë merkatos së verës, duke vendosur në krye të listës emrin e Alisson Becker. Portieri i Liverpool konsiderohet si kandidati “ideal” për bardhezinjtë, të cilët synojnë të rikthejnë një emër të madh në Serie A.

Sipas raportimeve, gardiani brazilian është i hapur për një aventurë të re dhe një rikthim në futbollin italian, ku më parë ka shkëlqyer me AS Roma. Megjithatë, gjithçka mbetet në dorën e Liverpool-it, që së fundmi ka aktivizuar një opsion për zgjatjen e kontratës së tij edhe për një sezon tjetër.

Alisson Becker vazhdon të respektojë klubin anglez dhe nuk do të marrë asnjë vendim pa dakordësinë e tyre. Nga ana tjetër, drejtuesit e Juventus janë në pritje të zhvillimeve, ndërsa Liverpool pritet të bëjë një vlerësim të plotë të repartit të portës në javët në vijim, ku pjesë e diskutimeve është edhe Giorgi Mamardashvili.

Merkatoja e verës pritet të sjellë zhvillime të rëndësishme, ndërsa Juventusi mbetet në gatishmëri për të përfituar nga çdo hapësirë e mundshme për të siguruar shërbimet e një prej portierëve më të mirë në botë.