Category: SPORT

Jude Bellingham mund të jetë një nga emrat që do të udhëheqë Anglinë në vitet e ardhshme, me trajnerin Thomas Tuchel që ka lënë të hapur mundësinë që ylli i Real Madridit të marrë përgjithmonë shiritin e kapitenit të “Tre Luanëve”.

Në fitoren 2-0 ndaj Çekisë në Ligën e Kombeve, Bellingham u aktivizua në minutën e 71-të në vend të Harry Kane dhe, sapo hyri në fushë, mori edhe shiritin e kapitenit nga sulmuesi anglez.

E njëjta skenë ishte përsëritur edhe në fund të humbjes ndaj Spanjës, ku Kane ia kishte dorëzuar shiritin Bellinghamit.

Tuchel nuk e fshehu se ky veprim mund të jetë një tregues për të ardhmen.

“Kur je kapiten në fund të këtyre ndeshjeve, atëherë sigurisht që mund të jesh kapiteni i përhershëm”, deklaroi trajneri i Anglisë.

Gjermani tregoi gjithashtu se kishte zhvilluar një bisedë me Bellinghamin rreth rolit të tij në skuadër, duke vlerësuar veçanërisht gatishmërinë e mesfushorit për të qenë pjesë e ekipit edhe kur nuk është në formacionin startues.

“Mendoj se ai e pëlqen të jetë me ne për momentin, të paktën kështu e ndiej. Sot patëm një bisedë të shkurtër për rolin e tij. Të dy kishim ndjesinë se donim të vazhdonim dhe të nisnim përsëri, por më pas menduam se ndoshta 30 minuta ishin të mjaftueshme për sot”, tha Tuchel.

Trajneri gjerman shpjegoi se vendimi për ta aktivizuar Bellinghamin vetëm për pak minuta lidhej edhe me ngarkesën fizike të lojtarit, pasi ai nuk ka qenë i mësuar me një ritëm të tillë ndeshjesh gjatë këtij sezoni.

“Ai e ka bërë këtë më parë, por jo gjatë këtij sezoni, ndaj nuk donim të ishim të parët që do ta provonim. Megjithatë, edhe në këtë paraqitje të shkurtër mund ta shihni se ai është i sigurt në vete dhe i lumtur që të ndihmojë ekipin edhe nga banka”, shtoi Tuchel.

Sa i përket shiritit të kapitenit, Tuchel e cilësoi këtë si një moment të veçantë për Bellinghamin.

“Po, është një shpërblim t’i japësh shiritin e kapitenit. Është diçka e mirë”, u shpreh ai.

Megjithatë, në fund të ndeshjes pati edhe një moment shqetësues. Tuchel zbuloi se Bellingham ndjeu një shqetësim fizik dhe tani mbetet për t’u parë nëse do të jetë në gjendje të luajë në sfidën e ardhshme.

“Ai pati një shqetësim të vogël në fund të ndeshjes. Shpresojmë që të mos jetë asgjë serioze dhe që të jetë i gatshëm për ndeshjen ndaj Kroacisë”, përfundoi trajneri i Anglisë.

Lamine Yamal po vazhdon të mahnitë me paraqitjet e tij dhe tashmë po lë gjurmë edhe në historinë e kombëtares së Spanjës.

Sulmuesi i Barcelonës ishte protagonist absolut në fitoren e thellë 4-1 të Spanjës ndaj Kroacisë, të martën mbrëma në stadiumin “Ramon Sanchez Pizjuan”, në kuadër të Grupit 3 të Ligës A në Ligën e Kombeve.

Yamal realizoi dy gola dhe dhuroi një asistim, duke qenë vendimtar në triumfin e “La Roja”-s dhe duke regjistruar disa statistika të jashtëzakonshme.

Sipas “Stats du Foot”, kjo ishte hera e parë që Yamal arrin të shënojë dhe asistojë në të njëjtën ndeshje me fanellën e kombëtares spanjolle.

Por rekordi më i veçantë erdhi nga të dhënat e “Mister Chip”. Yamal u bë lojtari më i ri në historinë e Spanjës që realizon të paktën dy gola dhe regjistron një asistim në një ndeshje të vetme.

Ai e arriti këtë në moshën 19 vjeç e 78 ditë, duke lënë pas legjendën e Spanjës, Raul, i cili e kishte realizuar një statistikë të tillë në moshën 21 vjeç e 273 ditë.

Yamal po ashtu hyri në historinë e futbollit evropian duke u bërë lojtari më i ri që arrin në kuotën e 10 golave me kombëtaren A që nga danezi Harald Nielsen. Ky i fundit kishte arritur një shifër të tillë më 26 gusht 1960, në moshën 18 vjeç e 10 muaj.

Forma e jashtëzakonshme e talentit të Barcelonës nuk kufizohet vetëm te paraqitjet me Spanjën. Sipas “Stats du Foot”, Yamal ka qenë i përfshirë drejtpërdrejt në 18 gola në tetë ndeshjet e fundit me klubin dhe kombëtaren, duke regjistruar 11 gola dhe shtatë asistime.

Me katër kontribute direkte në gola, Yamal kryeson gjithashtu listën e lojtarëve me më shumë përfshirje në gola në Ligën e Kombeve deri më tani.

Në një moshë ende shumë të re, Yamal po vazhdon të vendosë rekorde njëri pas tjetrit dhe po shndërrohet në një prej figurave kryesore të Spanjës.

Epoka e Lionel Messit me fanellën e Argjentinës po shkon drejt fundit, ndërsa trajneri Lionel Scaloni tashmë ka përcaktuar edhe hierarkinë e re të kapitenëve të kombëtares.

Pas largimit të Messit dhe Nicolás Otamendit nga roli i kapitenit, shiriti do t’i besohet mbrojtësit të Atletico Madridit, Cristian “Cuti” Romero.

Scaloni ka bërë të ditur se Romero do të jetë kapiteni i parë, ndërsa pas tij në hierarki vijnë portieri Emiliano Martínez dhe sulmuesi Lautaro Martínez.

“Kapiteni pas Leos dhe Otamendit është Romero. I dyti do të jetë Emiliano Martínez, ndërsa i treti Lautaro Martínez”, deklaroi Scaloni.

Vendimi i trajnerit shënon një kapitull të ri për përfaqësuesen argjentinase, e cila po përgatitet për një periudhë pa liderin e saj historik, Lionel Messin.

Argjentina, ndërkohë, do të zbresë sonte në fushë për një ndeshje miqësore ndaj Bolivisë, ndërsa të shtunën do të përballet me Burkina Fason.

Takimi kundër Beninit, i planifikuar për 6 tetor, pritet të jetë ndeshja e lamtumirës së Messit me kombëtaren argjentinase.

Pas një epoke të jashtëzakonshme të udhëhequr nga Messi, “Albiceleste” tashmë po hyn në një fazë të re, me Cristian Romeron të caktuar si figurën e parë në hierarkinë e kapitenëve.

Kombëtarja e Kosovës po i zhvillon përgatitjet e fundit në Debrecen të Hungarisë për sfidën e radhës në Ligën e Kombeve ndaj Izraelit, e cila zhvillohet të enjten nga ora 20:45.

“Dardanët” kanë vazhduar sot me intensitet përgatitjet për këtë përballje, me përzgjedhësin Franco Foda që ka punuar me të gjithë futbollistët në dispozicion.

Portieri Arijanet Muriq, i cili pësoi lëndim në ndeshjen ndaj Austrisë në Vjenë, ka zhvilluar vetëm një stërvitje të lehtë nën përkujdesjen e trajnerit atletik.

Në kampin dardan mbizotëron optimizmi dhe fokusi është i plotë te sfida me Izraelin. Këtë e kanë konfirmuar edhe sulmuesit Baton Zabërgja dhe Milot Avdyli, të cilët besojnë se Kosova mund të rikthehet te fitorja.

Zabërgja ka vlerësuar atmosferën në skuadër dhe gjendjen fizike të futbollistëve, duke theksuar se ekipi është i gatshëm të japë maksimumin.

“Stërvitja shkoi mjaft mirë sepse i gjithë ekipi ishte në gjendje të mirë fizike dhe atmosfera është e mirë. Shpresojmë që në ndeshjen e ardhshme të japim maksimumin”, deklaroi Zabërgja për faqen zyrtare të FFK-së.

Sulmuesi kosovar bëri të ditur se kundërshtari është analizuar me kujdes dhe se skuadra e di se çfarë e pret në këtë përballje.

“Kemi analizuar Izraelin. Është kundërshtar i fortë dhe duhet t’i qasemi ndeshjes me përqendrim 100 për qind dhe në fund të arrijmë fitoren. Është koha të reflektojmë nga humbja e Austrisë në këtë grup dhe shpresoj në fitore”.

Në të njëjtën linjë është edhe Milot Avdyli. Ylli i Celjes theksoi se skuadra tashmë është kompletuar dhe po punon me përkushtim maksimal për ndeshjen e së enjtes.

“Stërvitja ka shkuar shumë mirë, tash jemi kompletuar të gjithë. Po përgatitemi për ndeshjen kundër Izraelit dhe po besoj që do ta japim maksimumin”.

Avdyli zbuloi gjithashtu se stafi teknik ka nisur analizën e kundërshtarit, të cilin e konsideron të vështirë, por beson se cilësia që posedon Kosova mund të bëjë diferencën.

“E kemi analizuar sot ndeshjen, besoj do ta analizojmë edhe nesër. Normal, shohim se është kundërshtar mjaft i vështirë, por me kualitetin që kemi do të arrijmë rezultat pozitiv”.

Mesazhi i Avdylit është i qartë, pas humbjes ndaj Austrisë, Kosova kërkon reagim dhe rikthim te fitorja.

“Tash është momenti me u rikthyer te fitorja dhe besoj që bashkërisht do t’ia dalim”.

Kosova do të kërkojë kështu pikët e plota ndaj Izraelit për të mbajtur gjallë objektivin e saj në Ligën e Kombeve. “Dardanët” tashmë kanë hyrë në fazën finale të përgatitjeve, me fokusin maksimal te sfida e së enjtes në Debrecen.

Përballja Izrael – Kosovë zhvillohet të enjten nga ora 20:45.

Turqia pësoi një tjetër goditje të rëndë në Ligën e Kombeve, duke regjistruar humbjen e dytë radhazi. Pas disfatës ndaj Francës, skuadra e drejtuar nga Vincenzo Montella u mposht thellë 4-1 nga Italia në Bursa.

Rezultati shkaktoi zhgënjim të madh te tifozët vendas, të cilët gjatë takimit shprehën hapur pakënaqësinë e tyre dhe kërkuan largimin e përzgjedhësit italian.

Megjithatë, pas ndeshjes, Montella bëri të qartë se nuk ka ndërmend të largohet nga posti.

I pyetur nëse e ka menduar dorëheqjen, trajneri italian u përgjigj:

“Jo, besoj te puna që kam bërë. Nuk u largova edhe pse mora oferta të rëndësishme. Vazhdoj të besoj te futbollistët tanë dhe jam me ta. Do të dimë si të vazhdojmë nga këtu”.

Montella shtoi se një largim i mundshëm nuk është aktualisht pjesë e diskutimeve brenda ekipit.

“Për sa i përket dorëheqjes, nëse do të ketë një temë diskutimi për këtë, do të flas me lojtarët e mi, por aktualisht nuk e kemi në agjendë”.

Duke analizuar paraqitjen e Turqisë, Montella pranoi se skuadra e tij nuk arriti të përballonte ritmin e ndeshjes në të njëjtën mënyrë si kundërshtari.

“Nuk mundëm të kishim të njëjtën qasje në ndeshje si kundërshtarët. Si kombëtare, nuk jemi mësuar të luajmë çdo tri ditë në këtë nivel. Kjo më trishton”, deklaroi ai.

Trajneri italian theksoi se skuadra tentoi të reagonte pas golit të tretë të pësuar.

“Pas rezultatit 3-1 e nisëm më mirë dhe një nga golat tanë u anulua”.

“E meritonim të fërshëlleheshim”

Montella foli edhe për reagimin e tifozëve në stadium, duke pranuar se skuadra nuk dha atë që pritej, veçanërisht në 45 minutat e para.

“E meritonim të fërshëlleheshim në pjesën e parë. U përmirësuam në pjesën e dytë, por nuk jemi mësuar të luajmë çdo tri ditë në nivele të tilla”.

Pavarësisht humbjes së thellë dhe presionit të tifozëve, Montella kërkoi që skuadra të mos humbasë besimin.

“U përpoqëm të ruanim qetësinë dhe të motivonim lojtarët teksa analizonim ndeshjen. Në përgjithësi, do të marrim mësime nga kjo ndeshje, por nuk duhet ta humbasim vetëbesimin”.

“Kemi ardhur deri këtu dhe do të vazhdojmë të luftojmë në mënyrën më të mirë në fushën e lojës”, përfundoi Montella.

Pas një starti pozitiv, Shqipëria rikthehet sonte në fushë për të zhvilluar ndeshjen e dytë në edicionin e ri të Ligës së Kombeve. Kuqezinjtë përballen me San Marinon në Serravalle, me takimin që nis në orën 20:45.

Synimi i skuadrës së Rolando Maranit është i qartë: të marrë një tjetër rezultat pozitiv dhe të vazhdojë rrugëtimin në këtë garë me ritëm të mirë.

Për sfidën e sontme, trajneri italian ka bërë disa zgjedhje në listën e lojtarëve. Naser Aliji nuk do të jetë pjesë e 23-shes dhe do ta ndjekë takimin nga tribuna, ndërsa vendin e tij e ka zënë Luis Hasa.

Aliji i bashkohet kështu Sabah Kerjotës dhe Feta Fetait, të cilët gjithashtu janë lënë jashtë listës së ndeshjes për arsye teknike.

Në ndërkohë, Klisman Cake nuk është i gatshëm për shkak të një dëmtimi, ndërsa portieri Simon Simoni është larguar nga grumbullimi i Kombëtares A për t’iu bashkuar ekipit U-21.

Rregullorja e UEFA-s përcakton se për një ndeshje mund të jenë në dispozicion maksimalisht 23 futbollistë.

Edhe pse kundërshtar është San Marino, Maran ka zgjedhur të ruajë alternativa të ndryshme në formacion. Në mesfushë, Ylber Ramadani dhe Stavro Pilo pritet ta nisin takimin nga stoli, duke qenë opsione për pjesën e dytë.

Në prag të sfidës, përzgjedhësi Rolando Maran dhe kapiteni Berat Gjimshiti kanë kërkuar përqendrim maksimal nga skuadra dhe një paraqitje sa më të mirë.

Shqipëria e nisi këtë edicion me fitore ndaj Bjellorusisë, ndërsa San Marino vjen pas humbjes së thellë kundër Finlandës.

Në letër, kuqezinjtë kanë avantazhin, por stafi teknik kërkon që ky superioritet të dëshmohet edhe në fushën e lojës. Shqipëria synon të hyjë në ndeshje me seriozitet dhe të mos i lërë asgjë rastësisë.

Tashmë mbetet vetëm që kuqezinjtë ta përkthejnë këtë ambicie në rezultat dhe të kërkojnë tri pikët në Serravalle.

Përballja mes Austrisë dhe Kosovës ishte ndeshja që tërhoqi numrin më të madh të tifozëve në stadium gjatë xhiros së dytë të Ligës së Kombeve.

Sipas të dhënave të publikuara nga Football Meets Data, dueli i zhvilluar në “Ernst-Happel-Stadion” të Vjenës u ndoq nga 47 mijë spektatorë, duke e renditur atë në krye të listës për nga numri i të pranishmëve në tribuna.

Shifra prej 47,000 tifozësh konfirmohet edhe nga të dhënat zyrtare të ndeshjes, të cilat tregojnë se stadiumi ishte i mbushur plot për këtë përballje.

Pas Austrisë dhe Kosovës, ndeshja me pjesëmarrjen e dytë më të madhe ishte ajo mes Gjeorgjisë dhe Ukrainës, e ndjekur nga 43,382 tifozë. Në vendin e tretë u rendit përballja Belgjikë–Francë, me 40,857 shikues.

Lista vijon me: Danimarkë–Uells – 34,588 tifozë, Turqi–Itali – 33,891, Gjermani–Greqi – 28,945, Norvegji–Portugali – 25,953, Suedi–Poloni – 24,637 dhe  Serbi–Hungari – 18,082.

Ndërkohë, përballja Izrael–Irlandë që gjenden në grupin e njejtë me Koosvën, u ndoq nga vetëm 319 tifozë, ndërsa në të dhënat e publikuara në grafik, sfida Rumani–Bosnjë e Hercegovinë figuron me zero të pranishëm.

Kështu, pavarësisht rezultatit 3-1 në favor të Austrisë, përballja në Vjenë regjistroi një tjetër të dhënë interesante për Kosovën, ajo ishte ndeshja me pjesëmarrjen më të madhe të tifozëve në stadium në të gjithë xhiron e dytë të Ligës së Kombeve.

Trepça dhe Bashkimi do të përballen të martën mbrëma në finalen e Superkupës së Kosovës, në një duel që pritet të sjellë rivalitet të madh dhe emocione në palestrën “Mizahir Isma” në Rahovec.

“Xehetarët” hyjnë në këtë përballje si kampionë të padiskutueshëm të viteve të fundit në basketbollin kosovar. Trepça ka fituar pesë Kupa të Kosovës radhazi, tre tituj kampioni radhazi, si dhe dy Superkupat e fundit. Megjithatë, fillimi i këtij sezoni nuk ka shkuar sipas pritshmërive për skuadrën mitrovicase.

Trepça e nisi kampionatin me një fitore të vështirë 106:101 në udhëtim ndaj Rahovecit 029, ndërsa në xhiron e dytë u mposht 87:81 nga Peja në “Minatori”. Në këtë takim munguan Mikaile Tmusic dhe Kevin Bracy-Davis, ndërsa trajneri Adis Beqiragic ka bërë të ditur se skuadra ka nevojë për përforcim në pozitën numër katër.

Në krahun tjetër, Bashkimi ka regjistruar një start shumë më pozitiv të sezonit. Prizrenasit triumfuan bindshëm ndaj Golden Eagle Yllit me rezultat 96:60, ndërsa më pas mposhtën Rahovecin 029, 100:84, pikërisht në palestrën “Mizahir Isma”, ku do të zhvillohet edhe finalja e Superkupës.

Bashkimi ka pasur disa përballje të vështira me Trepçën në finalet e viteve të fundit dhe këtë herë synon ta shfrytëzojë momentin pozitiv për të kërkuar trofeun.

Në anën tjetër, Trepça do të kërkojë reagimin pas humbjes në kampionat dhe njëkohësisht trofeun e parë të sezonit.

Finalja e Superkupës së Kosovës zhvillohet të martën nga ora 19:00 në palestrën “Mizahir Isma” në Rahovec.

Ndeshja fillimisht ishte paraparë të zhvillohej më 15 shtator, por Federata e Basketbollit e Kosovës e kishte shtyrë atë për një datë tjetër.

Të dyja skuadrat tashmë janë gati për një tjetër përballje mes tyre, me Superkupën si trofeun e parë të sezonit në horizont.

Mbrojtësi i Kosovës, Albian Hajdari, nuk do të jetë në dispozicion të përzgjedhësit Franco Foda për dy ndeshjet e ardhshme të “Dardanëve” në Ligën e Kombeve, ndaj Izraelit dhe Austrisë.

Federata e Futbollit e Kosovës ka bërë të ditur se Hajdari është larguar nga grumbullimi i ekipit në Debrecen, pasi nuk ka arritur të rikuperohet në kohë nga lëndimi.

Pavarësisht përpjekjeve të stafit mjekësor për ta rikthyer mbrojtësin në dispozicion të skuadrës, gjendja e tij nuk e lejon që të paraqitet në dy përballjet e radhës.

Ndërkohë, nga grumbullimi i Kosovës është liruar përkohësisht edhe mesfushori Leon Avdullahu. Sipas FFK-së, vendimi është marrë për arsye familjare, ndërsa futbollisti pritet t’i bashkohet ekipit sërish sa më shpejt që të jetë e mundur.

Kosova fillimisht do të përballet me Izraelin, ndërsa më pas “Dardanët” do të matin forcat me Austrinë në kuadër të Ligës së Kombeve.

Driton Kuka e ka nisur javën duke vënë në pah sukseset e gjeneratës së re të xhudos kosovare, por njëkohësisht ka ngritur shqetësime për disa probleme që, sipas tij, ende nuk kanë marrë zgjidhje.

Trajneri i njohur kosovar ka publikuar një fotografi nga Ballkaniku U23, i zhvilluar në Pejë, ku Kosova pati një paraqitje dominuese në konkurrencën me 10 shtete pjesëmarrëse.

“Për një javë të mbarë… Me foton nga Ballkaniku U23 i mbajtur në Pejë ku Kosova dominoi në një konkurrencë prej 10 shteteve pjesëmarrëse ju urojmë fillim të mbarë të javës”.

Kuka ka theksuar se rezultatet e kësaj gjenerate janë një sinjal pozitiv për të ardhmen e xhudos kosovare dhe dëshmi se kalimi nga një brez te tjetri po zhvillohet me sukses.

“Gjenerata e re po del në sipërfaqe duke treguar që ndërrimi i gjeneratave po ndodh me sukses!”.

Megjithatë, pas vlerësimit për sukseset sportive, Kuka ka ngritur edhe çështjen e obligimeve ndaj federatës, duke shprehur pakënaqësi për mungesën e një zgjidhjeje dhe përgjigjeje të qartë.

“Në anën tjetër… Po hyjmë në 3-mujorin e fundit për pak ditë, por problemet me TM, fjala është në kryerje të obligimeve për federatën, s’po ndalen aspak! Për më tepër, as përgjigje çka po ndodh s’kemi!”, shkroi Kuka.

Kështu, mes rezultateve premtuese të gjeneratës së re dhe shqetësimeve jashtë tatamit, Kuka ka përcjellë një mesazh që përfshin si aspektin sportiv, ashtu edhe sfidat që, sipas tij, ende presin zgjidhje.