Category: Sport

Real Madrid nuk ka hequr dorë nga ideja për të nënshkruar me Rodrin gjatë afatit kalimtar të verës, sipas raportimeve të “El Larguero”.

Mesfushori i Manchester City mbetet një nga objektivat kryesorë të “Los Blancos”, por klubi madrilen po pret miratimin e trajnerit të ri, Jose Mourinho, përpara se të ndërmarrë hapa konkretë për transferimin.

Drejtuesit e Real Madridit besojnë se një largim i mundshëm i Pep Guardiola nga Manchester City në fund të sezonit, së bashku me dëshirën e vetë Rodrit për të veshur fanellën madrilene, mund të hapin rrugën për një transferim të bujshëm. Megjithatë, theksohet se një marrëveshje e tillë mbetet shumë e vështirë për t’u realizuar për arsye financiare.

Real Madrid pritet të ketë një verë të ngarkuar me ndryshime në skuadër, ku planifikohen disa afrime dhe largime.

Në mesfushë, klubi po monitoron nga afër situatën e Dani Ceballos, Federico Valverde dhe Eduardo Camavinga, të cilët mund të ndikojnë në strategjinë e transferimeve të verës.

Julian Alvarez pritet të jetë një nga emrat më të përfolur në afatin kalimtar të verës. Sulmuesi i Atletico Madrid është kthyer në objektivin kryesor të disa prej klubeve më të mëdha evropiane, ndërsa interesimi më serioz vjen nga Paris Saint-Germain dhe Barcelona.

Sipas raportimeve pranë lojtarit, PSG-ja ka marrë avantazhin vendimtar në garën për transferimin e Alvarezit. Thuhet se vetë sulmuesi e sheh me prioritet kalimin në Paris, ku do të kishte mundësinë të punonte nën drejtimin e trajnerit Luis Enrique. Klubi francez e konsideron lojtarin si figurën ideale për të udhëhequr projektin e ri ofensiv, pasi Luis Enrique prej kohësh kërkon një sulmues me profil të plotë, të aftë të bëjë diferencën si brenda, ashtu edhe jashtë zonës.

Lëvizshmëria, instinkti për gol dhe intensiteti në lojë e bëjnë Alvarezin një nga objektivat kryesorë të PSG-së. Në Francë flitet se parisienët janë gati të ofrojnë rreth 150 milionë euro për kartonin e tij, një shumë që e rendit këtë transferim ndër më të mëdhenjtë e viteve të fundit. Brenda klubit ekziston bindja se marrëveshja mund të finalizohet, si me Atletico Madridin, ashtu edhe me rrethin e futbollistit.

Nga ana tjetër, Barcelona vazhdon të admirojë profilin e Alvarezit dhe e konsideron atë liderin ideal të repartit ofensiv për vitet e ardhshme. Megjithatë, problemet financiare të klubit katalanas e bëjnë pothuajse të pamundur konkurrimin me ofertën e PSG-së. Edhe pse në “Camp Nou” shpresonin se preferenca sportive e lojtarit mund të hapte një mundësi, hyrja e fuqishme e parisienëve e ka komplikuar ndjeshëm situatën.

Atletico Madrid nuk dëshiron të humbasë yllin e skuadrës. Drejtuesit po përgatisin një projekt të ri sportiv rreth sulmuesit argjentinas, me synimin për ta bindur të qëndrojë në “Metropolitano”. Në klub konsiderohet si lojtari më i rëndësishëm i skuadrës, dhe largimi i tij do të ishte një goditje e madhe, si në aspektin sportiv, ashtu edhe emocional.

Megjithatë, sipas burimeve pranë futbollistit, Alvarez i ka bërë të qartë klubit se, nëse duhet të zgjedhë mes Barcelonës dhe PSG-së, preferenca e tij është kalimi në Paris. Projekti ambicioz i kampionëve francezë dhe mundësia për të luftuar për Ligën e Kampionëve duket se e bindin më shumë sulmuesin, i cili po kalon një nga momentet më të mira të karrierës së tij.

Vendimi përfundimtar ende nuk është marrë, pasi lojtari dëshiron të dëgjojë edhe ofertën përfundimtare të Atletico Madridit përpara se të mbyllë çdo derë.

Mesfushori portugez Vitinha ka vlerësuar ndikimin e jashtëzakonshëm që Cristiano Ronaldo vazhdon të ketë te Kombëtarja e Portugalisë, duke theksuar se e gjithë skuadra ëndërron ta fitojë Kupën e Botës 2026 së bashku me kapitenin legjendar.

Në një intervistë për faqen zyrtare të FIFA-s, Vitinha foli me admirim për Ronaldon, duke e cilësuar si një frymëzim të përditshëm për ekipin, pavarësisht faktit se ylli portugez po i afrohet fundit të karrierës së tij.

Edhe pse aktualisht aktivizohet te Al Nassr në Arabinë Saudite, Ronaldo mbetet figura kryesore e Portugalisë dhe lideri që vazhdon të motivojë skuadrën në prag të Botërorit që do të zhvillohet në Amerikën e Veriut.

“Cristiano është një nga lojtarët më të mëdhenj në historinë e futbollit. Është privilegj të ndajmë dhomën e zhveshjes me të, të mësojmë çdo ditë nga profesionalizmi dhe përkushtimi i tij. Shpresojmë ta fitojmë Kupën e Botës bashkë me të dhe për të”, deklaroi Vitinha.

Mesfushori i Portugalisë nënvizoi se sekreti i suksesit të Ronaldos qëndron te puna dhe serioziteti maksimal në çdo detaj.

“Ai nuk lë asgjë rastësisë. Gjithmonë përgatitet në mënyrë perfekte dhe futet në fushë duke ditur se ka bërë maksimumin për ekipin. Profesionalizmi i tij është unik”, shtoi ai.

Vitinha pranoi se Portugalia ka ambicie të mëdha për Botërorin 2026, por theksoi se skuadra duhet të ecë hap pas hapi dhe të mos mendojë menjëherë për trofeun.

“Ne duam vetëm fitore. E dimë se rruga do të jetë shumë e vështirë, ndaj duhet të fokusohemi fillimisht te faza e grupeve. Vetëm pasi të bëjmë mirë aty, mund të mendojmë për fazat tjera”, u shpreh portugezi.

Portugalia do të mbështetet te kombinimi i brezit të ri të talentuar me eksperiencën dhe lidershipin e Ronaldos, ndërsa trajneri Roberto Martinez pritet të publikojë së shpejti listën përfundimtare të lojtarëve për Kupën e Botës 2026.

Në turneun që do të zhvillohet në SHBA, Kanada dhe Meksikë, Portugalia bën pjesë në Grupin K së bashku me RD Kongon, Uzbekistanin dhe Kolumbinë.

Carlo Ancelotti ka shuar çdo dyshim rreth së ardhmes së Neymarit në Kombëtaren e Brazilit, duke konfirmuar se sulmuesi veteran do të jetë pjesë e “Seleçaos” për Kupën e Botës 2026.

Rikthimi i Neymarit ka qenë një nga temat më të përfolura në futbollin brazilian, sidomos pas periudhës së gjatë të vështirë që lojtari kaloi për shkak të lëndimeve dhe mungesës nga fushat e lojës.

Sulmuesi 34-vjeçar i Santos rikthehet në ekipin kombëtar për herë të parë që nga viti 2023, pasi për muaj të tërë u përball me probleme fizike që vunë në pikëpyetje vazhdimësinë e tij në nivelin më të lartë.

Megjithatë, trajneri italian Carlo Ancelotti ka vendosur t’i besojë përvojës dhe cilësisë së njërit prej futbollistëve më të rëndësishëm në historinë moderne të Brazilit.

“Neymar do të jetë një lojtar shumë i rëndësishëm për ne në Kupën e Botës. Gjatë gjithë vitit kemi ndjekur me kujdes gjendjen e tij dhe kemi parë progres të madh. Kohët e fundit ka treguar vazhdimësi në paraqitje dhe një formë fizike shumë të mirë”, deklaroi Ancelotti në konferencën për media.

Përfshirja e Neymarit konsiderohet si një nga vendimet më të rëndësishme të teknikut italian para nisjes së Botërorit, me Brazilin që synon t’i rikthehet lavdisë botërore dhe të fitojë trofeun e shumëpritur në vitin 2026.

Me eksperiencën, kreativitetin dhe lidershipin e tij, Neymar pritet të ketë një rol kyç në skuadrën braziliane, e cila po ndërtohet nga Ancelotti për të rikthyer “Seleçaon” në majën e futbollit botëror.

San Antonio Spurs e nisi në mënyrën më të mirë finalen e Konferencës Perëndimore në NBA, duke triumfuar 122:115 ndaj Oklahoma City Thunder në transfertë, pas një sfide dramatike që u vendos vetëm pas dy vazhdimeve. Me këtë fitore, Spurs kalojnë në epërsi 1-0 në seri dhe njëkohësisht ia marrin avantazhin e parketit skuadrës së Oklahomës.

Ylli francez Victor Wembanyama ishte i pandalshëm për mysafirët, duke realizuar një super paraqitje me 41 pikë dhe 24 kërcime. San Antonio kështu regjistroi fitoren e pestë ndaj Thunder në gjashtë përballjet sezonale mes dy ekipeve.

Ndihmë të madhe në suksesin e Spurs dha edhe Dylan Harper, i cili e mbylli takimin me 24 pikë dhe shtatë topa të vjedhur – rekord klubi në fazën “Play-Off”. Kontribut të rëndësishëm dhanë edhe Stephon Castle me 17 pikë, Devin Vassell dhe Keldon Johnson me nga 13 secili, si dhe Julian Champagnie me 11 pikë. Spurs luajtën pa De’Aaron Fox, i cili mungoi për shkak të një dëmtimi në kyçin e këmbës.

Në anën tjetër, Alex Caruso shkëlqeu për Oklahoma City Thunder me 31 pikë të ardhura nga banka rezervë, duke regjistruar një nga paraqitjet më të mira të karrierës së tij.

Jalen Williams u rikthye pas gjashtë ndeshjeve mungesë për shkak të lëndimit dhe kontribuoi me 26 pikë, ndërsa MVP-ja i sezonit, Shai Gilgeous-Alexander, e përfundoi sfidën me 24 pikë dhe 12 asistime, megjithëse pati një mbrëmje jo shumë efikase në gjuajtje, duke realizuar vetëm 7 nga 23 tentime nga loja.

Përballja e dytë e serisë zhvillohet të mërkurën, sërish në Oklahoma City.

Rolando Maran tanimë edhe zyrtarisht është emëruar selektor i Kombëtares së Shqipërisë.

Federata Shqiptare e Futbollit pas largimit të Sylvinhos e ka emëruar italianin në stolin e kuqezinjve, duke bërë një lëvizje të shpejtë dhe duke mos e lënë Kombëtaren pa një selektor të kalibrit të madh.

Mirëpo kush është Rolando Maran?

Rolando Maran është një nga trajnerët më të njohur dhe më të respektuar të futbollit italian, me një karrierë të gjatë si futbollist dhe trajner në elitën e futbollit në Itali.

I lindur më 10 gusht 1963 në Trento, Maran është konsideruar gjithmonë si një figurë e disiplinuar dhe një punëtor i palodhur i futbollit italian.

Karriera e tij nisi si futbollist, ku luante në repartin defensiv dhe njihej për karakterin e fortë, shpirtin luftarak dhe aftësitë udhëheqëse në fushë. Periudha më e rëndësishme e karrierës së tij si lojtar lidhet me Chievo Verona, klub ku luajti nga viti 1986 deri më 1995.

Gjatë asaj kohe, Maran zhvilloi rreth 300 ndeshje me fanellën e Chievos dhe ishte një nga figurat kryesore të skuadrës, transmeton Klankosova.tv.

Ai mbajti edhe shiritin e kapitenit dhe u bë simbol i periudhës historike të klubit, kur Chievo arriti të ngjitej nga Serie C2 deri në Serie B. Pikërisht ajo periudhë u konsiderua më vonë si fillimi i “mrekullisë së Chievo-s”, histori që mbeti gjatë në futbollin italian.

Pas përfundimit të karrierës si futbollist, Maran kaloi menjëherë në rolin e trajnerit.

Fillimisht ai punoi si ndihmës trajner te Chievo dhe më pas te Brescia, ndërsa gradualisht nisi të ndërtojë profilin e tij si një trajner i disiplinës taktike dhe organizimit defensiv.

Me kalimin e viteve, italiani arriti të drejtojë mbi 250 ndeshje në Serie A, duke u bërë një nga trajnerët më me eksperiencë në elitën e futbollit italian.

Një nga momentet më të rëndësishme të karrierës së tij erdhi gjatë sezonit 2012/2013 me Catania. Nën drejtimin e Maranit, skuadra siciliane realizoi sezonin më të mirë në historinë e saj në Serie A, duke e mbyllur kampionatin në vendin e tetë me 56 pikë, transmeton Klankosova.tv.

Ky mbetet ende rekordi më i mirë i Catanias në elitën italiane.

Suksesi me Catanian e rriti edhe më shumë reputacionin e trajnerit italian, i cili më pas u rikthye te Chievo Verona në vitin 2014.

Në katër sezonet qëndroi në krye të skuadrës dhe arriti ta mbajë ekipin larg zonës së rënies nga kategoria, pavarësisht buxhetit të kufizuar të klubit.

Gjatë asaj periudhe, Chievo u konsiderua një skuadër shumë e vështirë për kundërshtarët e mëdhenj, kryesisht për shkak të organizimit defensiv dhe disiplinës taktike që Maran kishte instaluar në ekip.

Në vitin 2018, ai mori drejtimin e Cagliari, ku nisi një projekt ambicioz me skuadrën nga Sardenja. Në sezonin 2019/20, Cagliari ishte një nga surprizat e kampionatit italian gjatë pjesës së parë të sezonit dhe për një periudhë qëndroi edhe në zonën që siguronte kualifikimin në kompeticionet evropiane.

Megjithatë, rënia e rezultateve në pjesën e dytë të sezonit çoi në ndërprerjen e bashkëpunimit mes klubit dhe trajnerit italian.

Përveç këtyre eksperiencave, Maran ka drejtuar edhe skuadra të tjera të njohura italiane si Genoa, Pisa dhe Brescia.

Në Itali ai konsiderohet si një trajner me aftësi të mëdha në menaxhimin e grupeve, stabilitetin e skuadrës dhe organizimin taktik, sidomos në situata të vështira apo momente krize.

Giorgio Chiellini, drejtori i Strategjisë së futbollit te Juventusi, ka deklaruar se “bardhezinjtë po i marrin gjërat ditë pas dite” pas humbjes 2-0 ndaj Fiorentinës. Ky rezultat i la ata vetëm dy pikë larg një vendi që dërgon në Ligën e Kampionëve, me vetëm 90 minuta për t’u luajtur deri në fund të sezonit.

Juventusi rrezikon seriozisht të mbetet jashtë Ligës së Kampionëve pas disfatës në “Allianz Stadium”. Raportime nga Italia sugjerojnë se pronari i klubit, John Elkann, mund të vendosë ndryshime në menaxhim për sezonin 2026/27, përfshirë edhe drejtorin ekzekutiv Damien Comolli, i cili ka vetëm një vit në Torino. Vendimet pritet të merren pas ndeshjes së fundit të sezonit, derbit të qytetit kundër Torinos të dielën.

“Dje ishte patjetër një ditë negative. Ne i marrim gjërat ditë pas dite dhe po presim ta përfundojmë sezonin”, u shpreh Chiellini gjatë një eventi të hënën, siç raportohet nga TMW.

Ironikisht, Fiorentina e mposhti Juventusin me Fabio Paraticin – ish-drejtori i “Zonjës së Vjetër”, tani ekzekutiv te Viola – i cili u rikthye në Torino si kundërshtar për herë të parë që nga largimi i tij në vitin 2021.

“Kam pasur fatin të punoj me Paraticin, prandaj mendoj se ata janë në duar të mira për të tashmen dhe të ardhmen. Ai mund të krijojë diçka të rëndësishme; e ka rikthyer ekipin në rrugën e duhur në një sezon të vështirë”, shtoi Chiellini.

Për t’u kualifikuar në Ligën e Kampionëve, Juventusi duhet ta mposhtë Torinon, por njëkohësisht duhet të shpresojë që Milani, Roma dhe Como të mos fitojnë ndeshjet e tyre ndaj Cagliarit, Veronës dhe Cremoneses.

Pas largimit të Robert Lewandowskit, një epokë ka marrë fund te Barcelona, ndërsa klubi katalanas ka nisur menjëherë planet për rindërtimin e repartit ofensiv për sezonin e ardhshëm.

Sipas gazetarit Sique Rodriguez, prioritetet e Barcelonës në afatin kalimtar janë të qarta: afrimi i një sulmuesi qendror, transferimi i një anësori ofensiv dhe, nëse situata financiare e lejon, përforcimi i repartit defensiv.

Në këtë kuadër, drejtuesit sportivë të klubit kanë refuzuar disa mundësi të rëndësishme në tregun e transferimeve. Një prej tyre ishte edhe Bernardo Silva, i cili iu propozua Barcelonës pas largimit nga Manchester City. Megjithatë, katalanasit konsiderojnë se mesfusha është tashmë e kompletuar, ndaj burimet financiare do të fokusohen në repartet e tjera.

Në listën e objektivave kryesorë për repartin ofensiv përfshihen emra si Joao Pedro, Julian Alvarez dhe Lautaro Martinez. Brendapër brenda klubit është diskutuar edhe emri i Mikel Oyarzabal. Realizimi i transferimeve të mëdha mbetet i lidhur ngushtë me gjendjen financiare të klubit dhe respektimin e rregullave “1:1” të fair-play financiar të La Liga. Barcelona besohet se ka përmirësuar marrëdhëniet me La Ligën dhe është optimiste se gjatë verës do të arrijë të regjistrojë normalisht lojtarët e rinj.

Megjithatë, klubi mund të detyrohet të realizojë shitje të tjera përpara se të konkretizojë afrime të mëdha. Largimi i Lewandowskit pritet të ulë ndjeshëm presionin mbi fondin e pagave, edhe pse dalja e sulmuesit polak nuk mjafton për të zgjidhur plotësisht problemet financiare të klubit katalanas.

Sulmuesi Xherdan Shaqiri ka konfirmuar se nuk ka plan të largohet nga Baseli dhe dëshiron ta ndihmojë klubin të rikthehet në nivelet ku e meriton.

Edhe pse Basel u shpall kampion para dy vitesh, këtë sezon nuk ishte në formën më të mirë, ndërsa skuadra e sapo promovuar Thun fitoi titullin. Shaqiri për “Blick” ka deklaruar se do t’i qëndrojë besnik kontratës, e cila skadon në qershor 2027.

“Jam dikush që do ta drejtoj dhe mbështes Baselin për ta kthyer ku i takon, dhe kjo nënkupton të garojmë për tituj. Kam edhe një vit në kontratë, prandaj gjithçka është e qartë”, theksoi ai.

Shaqiri kritikoi gjithashtu lojtarët më të rinj të skuadrës për paraqitjet e këtij sezoni. “Lojtarët tanë të rinj duhet të mësojnë të funksionojnë ndryshe. Shpresoj të shohim rezultate të njëjta, por performanca të përmirësuara sezonin tjetër”, shtoi ai.

Ky sezon, Shaqiri ka zhvilluar 34 paraqitje për Baselin në elitën e futbollit zviceran, duke shënuar 11 gola dhe dhuruar 10 asistime, duke treguar se është ende një lojtar kyç për skuadrën.

Trajneri i Kombëtares së Kroacisë, Zlatko Daliç, ka publikuar sot listën e lojtarëve të ftuar për Kampionatin Botëror, i cili do të zhvillohet në SHBA, Kanada dhe Meksikë.

 

Kroacia bën pjesë në Grupin L, së bashku me Kombëtaren e Anglisë, Panamasë dhe Ganës. Përgatitjet zyrtare do të nisin më 25 maj. Para fillimit të turneut, kroatët do të zhvillojnë dy ndeshje miqësore në vendlindje: më 2 qershor kundër Hungarisë në Rujevica dhe më 7 qershor kundër Sllovenisë në Varazhdin.

 

Ndeshjen e parë në Kampionatin Botëror, Kroacia do ta zhvillojë më 17 qershor kundër Anglisë, më pas do të përballet me Panamanë më 24 qershor, dhe fazën e grupeve do ta mbyllë kundër Ganës më 27 qershor.

 

Lista e Kroacisë:

 

Portierë: Dominik Livakovic, Dominik Kotarski, Ivor Pandur.

 

Mbrojtës: Josko Gvardiol, Duje Caleta-Car, Josip Sutalo, Josip Stanisic, Marin Pongracic, Martin Erlic, Luka Vuskovic.

 

Mesfushorë: Luka Modric, Mateo Kovacic, Mario Pasalic, Nikola Vlasic, Luka Sucic, Martin Baturina, Kristijan Jakic, Petar Sucic, Nikola Moro, Toni Fruk.

 

Sulmues: Ivan Perisic, Andrej Kramaric, Ante Budimir, Marco Pasalic, Petar Musa, Igor Matanovic.

 

Në listën paraprake të ftesave janë përfshirë edhe Lovro Majer, Franjo Ivanovic, Dion Drena Beljo, Ivan Smolcic, Karlo Letica, Adrian Segecic dhe Luka Stojkovic.