Category: Sport

Sot, organi qeverisës i futbollit evropian, UEFA, mori një sërë vendimesh të rëndësishme që do të ndryshojnë pamjen e Ligës së Kombeve, si dhe kualifikimet për kampionatet evropiane, duke prekur të gjitha përzgjedhjet kombëtare evropiane, përfshirë Kosovën.

Komiteti Ekzekutiv i UEFA-s u mblodh sot në Stamboll dhe miratoi format e reja për garat e ekipeve kombëtare të meshkujve, të cilat do të hyjnë në fuqi nga viti 2028.

Në strukturën e re, Liga e Kombeve e UEFA-s (UNL) do të kalojë nga katër ligat aktuale në tre liga me nga 18 ekipe kombëtare secila. Çdo ligë do të përbëhet nga tre grupe me nga gjashtë ekipe, të cilat do të luajnë gjashtë ndeshje kundër pesë kundërshtarëve të ndryshëm: ndeshje në shtëpi ose jashtë fushe kundër ekipeve nga grupe të ndryshme, dhe ndeshje në shtëpi dhe jashtë fushe kundër kundërshtarëve nga i njëjti grup.

Me 55 ekipe pjesëmarrëse, Liga C do të përfshijë një grup prej shtatë ekipeve, ndërsa kalendari i tyre do të fillojë një dritare më herët. Çerekfinalet, Final Four dhe ndeshjet eliminatore për ngjitje ose rënie nga kategoria do të mbeten të pandryshuara.

Një ndryshim po aq i rëndësishëm ka të bëjë me kualifikimet për Kampionatin Evropian, për të cilat Kosova ka interes të madh. Kualifikueset do të kenë një strukturë me shumë nivele:

Liga 1: 36 ekipe nga Ligat A dhe B të Ligës së Kombeve të UEFA-s.
Liga 2: 18 (ose 19) ekipe të mbetura nga Liga e Kombeve.

Ndryshimet do të fillojnë në vitin 2028 dhe nuk do të ndikojnë në Kampionatin Evropian të ardhshëm, i cili do të zhvillohet në Britaninë e Madhe dhe Republikën e Irlandës.

Këto reforma synojnë të bëjnë garat më të ekuilibruara dhe konkurruese, duke rritur rëndësinë e çdo ndeshjeje në nivel evropian

Chelsea ka nisur lëvizjet konkrete në afatin kalimtar për t’i dhuruar Xabi Alonsos një përforcim të madh në repartin ofensiv për sezonin e ardhshëm.

Klubi londinez e ka vendosur si prioritet absolut transferimin e Victor Osimhenit, ndërsa kontaktet e para me rrethin e sulmuesit nigerian tashmë kanë filluar.

Pas konfirmimit të Xabi Alonsos në stolin e “Bluve” nga 1 korriku, drejtuesit e klubit po kërkojnë një qendërsulmues të nivelit të lartë, pasi reparti ofensiv nuk ka bindur plotësisht gjatë këtij sezoni. Edhe pse Joao Pedro ka realizuar mbi 20 gola, stafi teknik e sheh brazilianin më shumë si një lojtar që vepron pas një sulmuesi klasik të zonës.

Sipas raportimeve të TEAMtalk, Chelsea ka rikthyer fuqishëm interesimin për Osimhenin, një objektiv i kahershëm që më parë nuk u transferua për shkak të kufizimeve financiare të klubit anglez.

Forma fantastike e 27-vjeçarit te Galatasaray ka ndezur sërish interesimin e londinezëve. Për më tepër, Osimhen thuhet se e sheh me shumë interes mundësinë për të punuar nën urdhrat e Xabi Alonsos, edhe pse Chelsea mund të mbetet jashtë Ligës së Kampionëve sezonin e ardhshëm.

Megjithatë, operacioni pritet të jetë shumë i vështirë nga ana financiare.

Galatasaray kërkon rreth 100 milionë euro për kartonin e sulmuesit, ndërsa Chelsea duhet të lëvizë shpejt edhe për shkak të konkurrencës nga Arsenali, që po monitoron gjithashtu situatën e lojtarit.

Nëse transferimi realizohet, Chelsea do të krijonte një repart ofensiv mjaft të frikshëm për sezonin e ardhshëm, me emra si Cole Palmer, Estevao, Joao Pedro dhe Victor Osimhen.

Sulmuesi afrikan ka regjistruar 22 gola dhe tetë asistime në 33 ndeshje zyrtare këtë sezon, duke u shndërruar në një nga emrat më të kërkuar në tregun evropian.

Ernest Muçi do të vazhdojë karrierën te Trabzonspori, pasi klubi turk ka aktivizuar zyrtarisht opsionin e blerjes së futbollistit shqiptar nga Besiktasi.

Lajmi është konfirmuar nga vetë Besiktasi përmes një njoftimi zyrtar në rrjetet sociale, ku bëhet e ditur se marrëveshja e huazimit është kthyer në transferim të përhershëm.

“Sa i përket transferimit përfundimtar të futbollistit profesionist Ernest Muçi, e drejta e opsionit të blerjes e paraparë në kontratën e huazimit është përdorur nga Trabzonspor”, thuhet në deklaratën e klubit nga Stambolli.

Sipas raportimeve, Trabzonspori do t’i paguajë BesiktaTrabzonspori blen përfundimisht Ernest Muçin, Besiktasi konfirmon largimin e shqiptaritsit 8.5 milionë euro për kartonin e lojtarit, duke e bërë Muçin zyrtarisht pjesë të skuadrës për sezonet e ardhshme.

Besiktasi gjithashtu ka falënderuar reprezentuesin shqiptar për kontributin e tij gjatë periudhës në klub, duke i uruar sukses në vazhdim të karrierës.

“E falënderojmë Ernest Muçin për kontributin e dhënë për klubin tonë dhe i dëshirojmë shumë suksese në të ardhmen”, thuhet më tej në reagimin e klubit.

Edhe Trabzonspori ka zyrtarizuar marrëveshjen përmes rrjeteve sociale, duke konfirmuar se Muçi tashmë është pjesë e projektit afatgjatë të skuadrës.

Futbollisti shqiptar iu bashkua Trabzonsporit në formë huazimi në fillim të sezonit dhe shumë shpejt u shndërrua në një nga lojtarët më të rëndësishëm të ekipit, falë paraqitjeve mbresëlënëse dhe rolit kyç në repartin ofensiv.

Çiklistët e Kosovës kanë vazhduar paraqitjet pozitive në edicionin e 83-të të Turit Çiklistik të Shqipërisë, duke treguar qëndrueshmëri dhe konkurrencë të fortë në një nga etapat më sfiduese të garës.

Në etapën e tretë, që përfshinte itinerarin Elbasan–Vlorë me gjatësi prej 149 kilometrash dhe profil të theksuar malor, Agon Ahmeti u rendit në pozitën e 25-të, ndërsa Blerton Nuha përfundoi në vendin e 28-të në klasifikimin e përgjithshëm të etapës.

Kjo etapë u konsiderua shumë më e vështirë krahasuar me dy garat paraprake, për shkak të terrenit malor dhe ritmit të lartë që karakterizoi konkurrencën gjatë gjithë rrugës.

Në Turin Çiklistik të Shqipërisë po marrin pjesë mbi 20 ekipe elitare dhe më shumë se 95 çiklistë nga Shqipëria, Ballkani dhe vende të ndryshme të Evropës. Nga të gjithë pjesëmarrësit, vetëm 85 garues arritën ta përfundojnë me sukses etapën e tretë.

Paraqitjet e çiklistëve kosovarë po vlerësohen si tregues i progresit të vazhdueshëm të këtij sporti në vend, duke dëshmuar se Kosova po fiton gjithnjë e më shumë hapësirë në arenën ndërkombëtare të çiklizmit.

Etapa e katërt e garës do të zhvillohet nesër në itinerarin Vlorë–Vlorë.

Fermín López nuk do të jetë pjesë e Kupës së Botës, pasi mesfushori i Barcelonës ka konfirmuar se i është nënshtruar një ndërhyrjeje kirurgjikale, duke i dhënë fund shpresave për pjesëmarrje në turneun më të madh ndërkombëtar.

Sipas raportimeve, lojtari spanjoll pritet të qëndrojë jashtë fushave për të paktën dy muaj, ndërsa procesi i rikuperimit mund të zgjatet edhe më shumë, me qëllim që ai të rikthehet plotësisht i gatshëm për sezonin e ri.

Kjo mungesë përbën një goditje të rëndësishme si për Barcelonën, ashtu edhe për përfaqësuesen e Spanjës, pasi Fermín konsiderohej një nga elementët kyç në mesfushë dhe një lojtar me rol gjithnjë e më të rëndësishëm në skuadër.

Finalja e madhe e Kupës së Kosovës do të zhvillohet të enjten mbrëma në stadiumin “Fadil Vokrri” në Prishtinë, ku Ferizaj dhe Dukagjini do të kërkojnë të shkruajnë histori duke fituar trofeun e tyre të parë në këtë garë.

Ndeshja finale pritet të nisë në ora 20:00 dhe sjell përballë dy skuadra që kanë kaluar me sukses të gjitha sfidat deri në aktin përfundimtar.

Federata e Futbollit të Kosovës ka bërë tashmë edhe caktimin e gjyqtarëve që do të ndajnë drejtësinë në këtë ndeshje të rëndësishme.

Gjyqtari kryesor i finales do të jetë Genc Nuza, i ndihmuar nga Fatlum Berisha dhe Bujar Selimaj, ndërsa gjyqtari i katërt do të jetë Bardh Ajeti.

Në sistemin VAR do të jetë Burim Jahmurataj, ndërsa AVAR është caktuar Besnik Morina, duke garantuar mbikëqyrje të plotë të situatave vendimtare të ndeshjes.

Arsenali ka zyrtarizuar organizimin e paradës së titullit të Ligës Premier, e cila do të mbahet të dielën, më 31 maj, ku skuadra kampione do të festojë së bashku me tifozët e saj në Londër.

Edhe pse ende nuk janë bërë publike detajet e sakta të itinerarit, pritet që parada të nisë dhe të përfundojë në stadiumin “Emirates”, duke sjellë festën e madhe direkt në zemër të klubit.

Klubi londinez e ka konfirmuar lajmin përmes faqes së tij zyrtare, duke njoftuar një event të veçantë për tifozët dhe komunitetin.

“Jemi të kënaqur të njoftojmë se do të bashkohemi me mbështetësit dhe komunitetin tonë për një paradë të veçantë, duke filluar nga ora 14:00 të dielën, më 31 maj”, thuhet në njoftimin e klubit.

Parada është planifikuar vetëm një ditë pas finales së Ligës së Kampionëve ndaj Paris Saint-Germain, që luhet më 30 maj, duke rritur mundësinë që Arsenali të mbyllë sezonin historik me dy trofe të mëdhenj nëse gjithçka shkon sipas planit në Budapest.

Manchester City ka humbur garën për titullin e Ligës Premier, pas barazimit 1:1 në transfertë ndaj Bournemouthit, rezultat që i dha fund edhe matematikisht shpresave për kampionat, ndërsa Arsenali u shpall kampion pas 22 vitesh pritje.

Pas ndeshjes, atmosfera në konferencën për shtyp ishte e ngarkuar, sidomos pas raportimeve mediatike që sugjeronin një largim të mundshëm të Pep Guardiolës nga klubi në fund të sezonit, pavarësisht rezultateve të Cityt.

Trajneri spanjoll reagoi duke theksuar se ka ende kontratë me klubin dhe se çdo vendim për të ardhmen do të merret pas përfundimit të sezonit.

“Mund të them vetëm se kam edhe një vit në kontratë. Nga përvoja ime, kur gjëra të tilla dalin gjatë sezonit, ato nuk ndihmojnë dhe mund të ndikojnë në rezultate,” u shpreh Guardiola.

Ai mohoi se ka marrë një vendim përfundimtar për largim dhe konfirmoi se fillimisht do të bisedojë me drejtuesit e klubit.

“Personi i parë me të cilin do të flas është presidenti i klubit. Kemi vendosur më herët që në fund të sezonit do të ulemi dhe do të vendosim së bashku. Nuk do të flas për vendimin tim para se të diskutoj me klubin, lojtarët dhe stafin,” shtoi ai.

Në fund, Guardiola nuk kurseu fjalët e respektit për rivalët, duke e uruar Arsenalin për titullin kampion dhe punën e Mikel Artetës.

“Në emër të Manchester Cityt, i përgëzoj Arsenalin dhe Mikel Artetën. E merituan plotësisht titullin. Arteta ka bërë një punë të jashtëzakonshme,” deklaroi trajneri i Cityt.

Stafi teknik i Kombëtares së Kosovës në volejboll për femra është kompletuar me emërimin e trajnerit spanjoll Alberto Ruiz Rubio, i cili i është bashkuar përfaqësueses në kuadër të përgatitjeve për garat ndërkombëtare.

Rubio vjen me një përvojë të rëndësishme në volejbollin evropian, duke qenë pjesë e klubit gjerman VfB Suhl LOTTO Thüringen gjatë sezonit të fundit. Me këtë skuadër, ai ka arritur suksese të mëdha, përfshirë titullin e Bundesligës gjermane dhe triumfin në Kupën e Gjermanisë.

Me ardhjen e tij, shtabi teknik i Kombëtares së Kosovës në volejboll për femra tashmë është i plotësuar, me synimin për rritje të nivelit të përgatitjeve dhe paraqitjeve në arenën ndërkombëtare.

Ekipi kombëtar udhëhiqet nga përzgjedhësi Lorik Ilazi, i cili tashmë do të ketë në dispozicion edhe bashkëpunëtorët vendorë Ylli Kadriu dhe Vlora Berisha, si dhe trajnerin spanjoll Rubio, që pritet të sjellë eksperiencë shtesë në punën e ekipit.

Sytë e dashamirëve të futbollit janë të drejtuar nga Stambolli, ku sonte zhvillohet finalja e Ligës së Evropës, gara e dytë më prestigjioze në nivel klubesh në Evropë.

Në “Beşiktaş Park”, Freiburg dhe Aston Villa do të përballen në një duel vendimtar, me të dyja skuadrat që synojnë të shkruajnë histori duke fituar trofeun për herë të parë.

Freiburg ka siguruar finalen pas një kualifikimi të vështirë ndaj portugezëve të Bragës, ku pas dy ndeshjeve triumfoi me rezultat të përgjithshëm 4:3.

Në anën tjetër, Aston Villa ka kaluar me shumë më pak probleme deri në finale, duke u përballur me Nottingham Forest. Anglezet humbën ndeshjen e parë 1:0, por reaguan fuqishëm në takimin e kthimit me një fitore bindëse 4:0.

Të dy klubet vijnë në këtë finale pa asnjë trofe të mëparshëm në këtë garë, duke e bërë përballjen e sotme edhe më të veçantë dhe historike. Ndeshja nis në orën 21:00 dhe pritet të sjellë një spektakël të madh futbolli në Stamboll.