Category: Lajme

Gjykata Themelore në Gjakovë, ka njoftuar se është aprovuar kërkesa e prokurorisë Themelore atje, duke i caktuar masën e paraburgimit një muaj të pandehurit L.P., për shkak të dyshimit se i arrestuari ka kryer veprat penale; kanosje, mbajtja në pronësi, kontroll ose posedim të paautorizuar të armëve dhe posedimi i paautorizuar i narkotikëve, substancave psikotrope ose analoge.

Në komunikatën për media bëhet e ditur se i dyshuari, ka kundërshtuar policët, i ka ofenduar dhe kërcënuar ata. Aty shtohet edhe se i njëjti, ka nxjerr armë të zjarrit dhe një granatë dore duke ua drejtuar policëve.

‘’Me këtë vendim, i pandehurit L.P., do të mbahet n paraburgim në kohëzgjatje prej një (1) muaji, periudhë kjo që do të llogaritet nga data e arrestimit me 23 shkurt 2026 deri më 25 mars 2026’’, thuhet mes tjerash në komunikatë.

Ish-kryenegociatorja e Kosovës në dialogun me Serbinë, Edita Tahiri ka reaguar pas takimeve të fundit të ndërmjetësuesit të Dialogut të Brukselit, Peter Sorensen me kryeministrin e Kosovës, Albin Kurti dhe presidentin e Serbisë, Aleksandar Vuciç.

Tahiri tha se gjatë këtyre takimeve, Vuçiq ka kërkuar formimin e Asociacionit, ndërsa Kurti ka kërkuar normalizim të marrëdhënieve me Serbinë, e jo njohje reciproke mes dy shteteve.

“Vuçiqi kërkoi Asociacionin, Kurti kërkoi normalizim të marrëdhënieve me Serbinë, në vend se të kërkojë njohje reciproke mes dy shteteve, Kosovës dhe Serbisë”, ka shkruar Tahiri.

Sipas saj, kjo qasje e kryeministrit rrezikon ta vendosë Kosovën në pozitë të pafavorshme në raport me presionin ndërkombëtar.

“Me këtë qasje të Kurtit, diplomacia do t’i bëjë presion Kosovës për Asociacionin, ndërsa nuk do t’i bëjë presion Serbisë për njohjen reciproke”, theksoi ajo.

Tahiri shtoi se njohja reciproke është përkrahur nga ish-presidenti amerikan Donald Trump dhe më herët edhe nga Joe Biden.

“Diplomacia është negociatë, por me mungesë të dijenisë të Qeverisë Kurti, do ta pësojë tutje Kosova”, përfundoi Tahiri në reagimin e saj.

Instituti Kombëtar i Shëndetësisë Publike të Kosovës ka njoftuar se ka publikuar udhëzuesin me titull “Planifikimi i të ushqyerit për institucionet e kujdesit ditor të foshnjeve dhe fëmijëve (6 muaj – 6 vjeç) në Republikën e Kosovës”.

Sipas njoftimit, udhëzuesi përmban rekomandime të bazuara në evidencë shkencore për ushqyerjen e shëndetshme të fëmijëve, standarde për planifikimin e menusë, si dhe modele praktike të menuve të përshtatura sipas grupmoshave.

Qëllimi i këtij dokumenti është promovimi i rritjes dhe zhvillimit optimal të fëmijëve në mjediset parashkollore, duke ofruar orientime të qarta për institucionet e kujdesit ditor në hartimin dhe zbatimin e planeve ushqimore.

IKSHPK bën të ditur se të gjitha standardet e detajuara, modelet e plota të menuve dhe udhëzimet shtesë për zbatimin praktik mund të gjenden në dokumentin e plotë, i cili është i qasshëm në faqen zyrtare të institucionit.

Inspektorati Policor i Kosovës respektivisht Departamenti i Hetimeve në dy raste të ndara i ka rekomanduar Policisë së Kosovës suspendimin për tetë zyrtarë policorë në Gjakovë dhe Gjilan.

Rasti i parë raportohet të ketë ndodhur më 19.02.2026 ku fillimisht një qytetar në Gjakovë është njoftuar për një gjobë për parkim të veturës në vendin ku është e ndaluar. Qytetari kishte shkuar në stacionin policor për të marrë tiketën për kundërvajtje por i njëjti pas kontaktit dhe një bisede me zyrtarët policorë ishte arrestuar si i dyshuar për kanosje.

Hetuesit e IPK-së pas pranimit të informacioneve dhe ankesës për këtë rast kanë filluar të ndërmarrin veprime hetimore përfshirë analizimin e shkresave të rastit, raporteve të zyrtarëve policorë, analizimin e një audio-incizimi etj.

Pas ndërmarrjes së veprimeve hetimore është vërejtur se raportet e zyrtarëve policorë mbi bazën e të cilave është iniciuar rasti i kanosjes nuk përkojnë me atë që dëgjohet në incizim dhe dyshohet se edhe nuk janë të vërteta.

Hetuesit e IPK-së janë konsultuar me Prokurorinë Themelore në Gjakovë dhe veprimet tjera hetimore do të ndërmerren ndaj gjashtë zyrtarëve policorë në procedurë të rregullt në drejtim të veprës penale “Keqpërdorim i pozitës apo autoritetit zyrtar”.

Në interes të hetimit IPK i ka rekomanduar Policisë suspendimin për 6 zyrtarët policorë të Njësisë Rajonale të Komunikacionit Rrugor të Drejtorisë Rajonale të Gjakovës.

Në rastin tjetër, IPK i ka rekomanduar Policisë së Kosovës suspendimin për dy zyrtarë policorë në Gjilan.

Hetimet lidhur me këtë rast ndaj dy zyrtarëve policorë janë duke u zhvilluar në koordinim me Prokurorinë Themelore në Gjilan në procedurë të rregullt me dyshimin për veprën penale “Lajmërim apo Kallëzim i rremë”

Hetuesit e IPK-së në konsultim të vazhdueshëm me prokurorinë pritet të ndërmarrin edhe veprime të tjera hetimore lidhur me këtë rast për të sqaruar rrethanat e dy rasteve.

Presidenti i Serbisë, Aleksandar Vuçiq, njoftoi se është takuar në Beograd me përfaqësuesin e posaçëm të Bashkimit Evropian për dialogun mes Kosovës dhe Serbisë, Peter Sorensen, për vazhdimin e dialogut me një angazhim më aktiv të bllokut.

“Jam i bindur se është në interesin e të gjitha palëve të shmangen veprimet që do të çonin në përshkallëzim të mëtejmë dhe që, me ndërmjetësimin e BE-së, të këmbëngulet në zbatimin e plotë të obligimeve të marra dhe në ruajtjen e paqes dhe stabilitetit në terren”, shkroi Vuçiq në llogarinë e tij në Instagram më 25 shkurt, transmeton Radio Evropa e Lirë.

Vuçiq gjatë takimit me emisarin evropian përsëriti kritikat ndaj bashkëpunimit të Kosovës, Shqipërisë dhe Kroacisë në fushën e sigurisë dhe mbrojtjes, duke theksuar se me këtë “rriten më shumë tensionet dhe rrezikohet siguria e popullit serb”.

Kosova, Shqipëria dhe Kroacia nënshkruan në mars të vitit të kaluar një deklaratë në të cilën thuhet se tri shtetet do të bashkëpunojnë për forcimin e sigurisë dhe stabilitetit në Evropën Juglindore, teksa Vuçiq e përshkroi këtë si një “aleancë ushtarake dhe sulmuese kundër serbëve dhe Serbisë”, gjë që u mohua nga Prishtina, Tirana dhe Zagrebi.

Vuçiq gjithashtu “shprehu shqetësim” lidhur me Ligjin për të huajt dhe atë për automjetet, zbatimi i plotë i të cilit në Kosovë pritet të nisë më 15 mars.

Zbatimi i plotë i Ligjit për të huajt mund të ndikojë në funksionimin e institucioneve shëndetësore dhe arsimore në Kosova që punojnë sipas sistemit serb, pasi personat që nuk posedojnë dokumente të Kosovës duhet të pajisen me leje pune ose licencë për ushtrimin e veprimtarisë, për të cilën kërkesa paraqitet në Agjencinë e Punësimit të Kosovës.

Bashkimi Evropian ka deklaruar më herët për Radio Evropa e Lirë se statusi i strukturave dhe shërbimeve shëndetësore dhe arsimore që mbështeten nga Serbia në Kosovë do të trajtohet në kuadër të dialogut Kosovë-Serbi, në përputhje me marrëveshjet e arritura dhe ligjet në fuqi në Kosovë.

Para vizitës në Beograd, Peter Sorensen qëndroi në Prishtinë, ku pas takimeve me zyrtarë kosovarë deklaroi se fokusi i bisedimeve ishte në avancimin e normalizimit të raporteve mes Kosovës dhe Serbisë.

Kryeministri i Kosova, Albin Kurti, tha pas takimit se Kosova mbetet e përkushtuar për normalizim të raporteve me Serbinë, përmes njohjes reciproke.

Ndërkaq, kryediplomati i Kosovës, Glauk Konjufca, e ka njoftuar Sorensenin se Ministria e Punëve të Jashtme dhe Diasporës e Kosovës do të udhëheqë procesin e dialogut për normalizim të raporteve me Serbinë, që ka nisur më 2011.

Megjithatë, MPJD-ja nuk tha saktësisht nëse Konjufca do të jetë në krye të këtij procesi.

Duke reaguar ndaj njoftimit të MPJD-së, shefi i Zyrës për Kosovën në Qeverinë serbe, Petar Petkoviq, tha se “negociatori i Prishtinës në dialog, pavarësisht zgjedhjes kadrovike, është ekskluzivisht përfaqësues i institucioneve të përkohshme të vetëqeverisjes në Prishtinë” – formulim që Beogradi, i cili nuk e njeh pavarësinë e Kosovës, përdor për institucionet e shtetit fqinj.

Ndërkaq, njohësi i zhvillimeve politike në Kosovë, Artan Muhaxhiri, i tha Radios Evropa e Lirë se beson se marrja e udhëheqjes së dialogut nga MPJD-ja shënon një “momentum të ri”, por paralajmëroi se çdo gjë në këtë proces do të varet nga “gatishmëria për të bërë kompromise dhe për të qenë realist”.

Dialogu, tha ai, do të duhej të ishte projekti kryesor i Qeverisë së Kosovës në muajt e ardhshëm.

Viteve të fundit, Kosova dhe Serbia kanë zhvilluar një sërë rundesh të dialogut në nivel kryenegociatorësh, por takime të nivelit të lartë politik nuk ka pasur që nga shtatori i vitit 2023.

Atëbotë, rundi i fundit i dialogut në nivel të lartë u zhvillua pak ditë para sulmit të armatosur në Banjskë të Zveçanit, kur një grup i serbëve të armatosur vranë një polic të Kosovës. Kosova e fajëson Serbinë për këtë sulm, por Beogradi mohon se ka gisht në të.

Mbi një dekadë dialog, Kosova dhe Serbia kanë arritur një sërë marrëveshjesh, por jo të gjitha janë zbatuar në terren.

Më 2023, palët arritën Marrëveshjen për rrugën drejt normalizimit, e njohur edhe si Marrëveshja e Ohrit, por BE-ja ka thënë se ajo ende nuk është zbatuar.

Ndonëse kjo marrëveshje nuk është nënshkruar, sipas bllokut evropian, ajo është e detyrueshme për të dyja palët./REL

Me 10 vota për, Komisioni Qendror i Zgjedhjeve miratoi konkluzionet dhe rekomandimet e dala nga punëtoria për mësimet e nxëna nga zgjedhjet lokale 2025 dhe zgjedhjet e parakohshme parlamentare 2025, duke hapur diskutimin për ndryshime të mundshme në Ligjin për Zgjedhjet e Përgjithshme dhe reforma në procesin zgjedhor, raporton Ekonomia Online.

Anëtari i KQZ-së nga PDK-ja, Ilir Gashi, tha se i mbështet rekomandimet në parim, por shprehu rezerva për propozimet që kërkojnë ndryshime kushtetuese dhe për çështjen e numrit të kandidatëve në lista, duke theksuar se këto tejkalojnë kompetencat e KQZ-së.

“Në fakt parimisht mbështes rekomandimet për të cilat ne që së bashku kemi punuar për me ardhë në këto përfundime. Kam disa rezerva në nja tri çështje të cilat faktikisht i konsideroj ndoshta që nuk janë në domenin tonë. E para, kemi një rekomandim i cili kërkon ndryshime kushtetuese, për çka po besoj që është jashtë domenit tonë dhe i përket ligjvënësve me vendosë. Dhe ne e dimë që Parlamenti i Kosovës nuk ka mujt me ndryshu Ligjin për Zgjedhje Lokale, mos të flasim me hy në ndryshime kushtetuese ku i referohet kërkesës që fletëvotimet të jenë në 6-vjet e jo nga 30 në 45 sa është kushtetuta aktualisht. Çështja tjetër është te numri i kandidatëve në listë. Edhe kjo po besoj që ne jemi organ i cili administron procesin zgjedhor dhe ju përket subjekteve politike. Ato janë aktorët kryesorë në proces zgjedhor dhe vendosin nëse dojnë të kenë 10 kandidatë, pesë apo një. Nuk mund të paragjykojmë, kam rezervë në këtë rekomandim”, tha ai.

Ai vuri theksin te nevoja për fokusim në ndryshime që mund të bëhen pa ndërhyrje ligjore, sidomos te leximi elektronik i fletëvotimeve dhe identifikimi elektronik i votuesve, ndërsa propozoi edhe votimin e hershëm për kategori të caktuara.

“Tek skanimi i fletëvotimeve dhe leximi optik i fletëvotimeve, si dhe identifikimi i votuesve në vendvotim në mënyrë elektronike, është shumë mirë si rekomandim dhe po besoj që këto dyja do të futen edhe në planin e punës të cilën shpejt do ta kemi edhe përfundimtar. Pastaj një pikë të cilën, një propozim i imi i cili nuk e shoh këtu që figuron. Kjo nuk do të thotë që në qoftë se do të kemi përpjekje për ndryshime ligjore, unë do ta adresoj edhe përmes ndryshimeve ligjore që është votimi i hershëm, që unë konsideroj që Republika e Kosovës duhet të ketë votim të hershëm veçmas për disa kategori të shoqërisë tonë, sepse kjo pastaj do ta bënte një proces më të mirë zgjedhor në Kosovë dhe mos të ballafaqohemi me problemet të cilat veç janë përsëritë disa herë, sidomos për njerëzit me nevoja të veçanta, qoftë ata të cilët nuk dinë shkrim-lexim apo edhe kategori të tjera të shoqërisë. Prandaj, i kam këto kaq rezerva sa i përket miratimit të këtyre rekomandimeve dhe po besoj që në rekomandime të tjera ne, kryesues, po gjithë ne duhet të fokusohemi kryesisht tek ndryshimet që na sanksionojnë të kemi ndryshim në rregullat tona të brendshme edhe punë që ne mund t’i bëjmë pa ndryshime ligjore. Në qoftë se do të ketë ndryshime ligjore atëherë është një çështje tjetër, por nuk mund t’i mbajmë peng ato ndryshime, kështu që fokusohemi në ato çka është më rëndësi e kryesisht dy më të rëndësishmet janë: leximi elektronik i fletëvotimit dhe identifikimi i votuesve në vendvotim me procedura elektronike”, tha ai.

Anëtari nga VV-ja, Sami Kurteshi, deklaroi se rekomandimet janë produkt i diskutimeve profesionale dhe se KQZ-ja e ka për detyrë të japë rekomandime, pavarësisht nëse ato janë obligative apo jo, duke theksuar dallimin mes rekomandimeve profesionale dhe kërkesave administrative.

“I kemi pasë mundësitë me diskutu relativisht gjatë rreth këtyre çështjeve dhe mos me u pajtu dhe me u pajtu, dhe kjo ka qenë e mirë, por unë mendoj që janë nxjerrë disa rekomandime të mira. Ndoshta në nuanca nuk pajtohemi. Ne si trup profesional e kemi për detyrë me bë rekomandime. Një, domethënë, i bëjmë rekomandimet për jashtë sepse për brenda, ndryshimin e rregulloreve ne e bëjmë nëse pajtohemi edhe e bëjmë lehtë, s’duhet me pyet askënd. Por ne si trup profesional, edhe çdo trup profesionale e ka për detyrë me bë rekomandim. Rekomandimi është jo obligativ. A ta marrin rekomandimet? Natyrisht që i bëjmë me sqarime dhe arsyetime, qofshin ato ligjore, qofshin kushtetuese. Nuk pritet prej askujt tjetër me bë rekomandim ashtu qysh bën trupa profesionale që ballafaqohet me zbatimin e ligjit edhe të kushtetutës edhe të rregulloreve.

Prandaj në këtë drejtim, unë mendoj se në raportet jetore ne e kemi për detyrë, jo me thënë seçdo herë: nuk kemi infrastrukturë, nuk kemi ndërtesë. Nuk është vaj-rekomandim, ajo është kërkesë, ankesë. Rekomandimin në aspektin profesional ne e kemi për detyrë me bë”, tha ai.

Ndërkaq, anëtari nga LDK-ja, Sami Hamiti, sqaroi se dokumenti është bazë për planin e punës dhe planin vjetor që do t’i dërgohet Kuvendit, duke shtuar se secili rekomandim do të rishqyrtohet para se të procedohet, përfshirë edhe ato që lidhen me afatet dhe ndryshimet eventuale kushtetuese.

“Kjo është si rezultat i punëtorisë të cilën e kemi mbajtur për pesë ditë rresht edhe me thënë që kemi bërë një punë shumë të mirë. Këto janë mbledh dhe ky nuk është një dokument i cili ka me u botu, është një dokument bazë për dy elemente tash. Një është elemente për planin e punës tonë, edhe elementi tjetër është për planin vjetor të punës që kemi me dërgu në Kuvend. Edhe këto do të, ato që po thotë zoti Kurteshi, do të trajtohen në pjesën e planit të punës dhe ndryshimin e rregulloreve dhe do të caktohen krejt ato elemente të cilat i përmendi zoti Kurteshi. Po ashtu, edhe pjesa kur bëhet plani i punës edhe plani vjetor i punës që dorëzohet në Kuvend, atëherë do t’i rishikojmë secilin rekomandim sepse nuk është thënë që këto që i kemi qit kemi me i qit atje. Ne do ta diskutojmë në planin e punës edhe sigurisht do të shkojnë si rekomandime. Për anën tjetër, a do të ndërrohet, a do të bjerë prej 10-shit në 5-she, në 3-she, edhe tjetrën 60-ditësh, unë po ju rikujtoj që në një grup punues që kemi punuar për reformën zgjedhore, shumica jemi këtu. Këtë propozim e kemi pasë prej misionit vëzhgues të BE-së, pavarësisht u pa që s’ekziston një momentum me hy në ndryshim kushtetues, po që është nevojë me u bë. Edhe ky rekomandim shkon që nëse ka mundësi të bëhet, se dihet që pa ndryshim kushtetues atëherë u pa që s’do të jetë mundësia atje edhe që u pa që s’ashtë praktike”, tha ai.

Në të njëjtën mbledhje, u shty për herën tjetër miratimi i rekomandimit për ndarjen e mjeteve nga Fondi për Mbështetjen e Subjekteve Politike për vitin 2026. Sipas drejtorit të Zyrës për Regjistrim, Certifikim dhe Kontroll Financiar të Subjekteve Politike, Besnik Buzhala, rekomandimi nuk u finalizua për arsye teknike, por buxheti mbetet rreth 4.8 milionë euro, sa ka qenë edhe vitin e kaluar.

Sipas raportit më të fundit SecuriMeter 2025, Kosova renditet si vendi me perceptimin më të lartë të sigurisë në Ballkanin Perëndimor, i publikuar nga Regional Cooperation Council.

Sipas të dhënave zyrtare të anketës rajonale, 64% e qytetarëve në Kosovë deklarojnë se ndihen “shumë të sigurt” ose “mjaft të sigurt” në jetën e tyre të përditshme, duke shënuar përqindjen më të lartë në mesin e gjashtë vendeve të Ballkanit Perëndimor. Vetëm rreth 16–17% e të anketuarve shprehen se ndihen të pasigurt, që është ndër nivelet më të ulëta në rajon.

Raporti tregon gjithashtu se 58.4% e qytetarëve pajtohen se Kosova është vend i sigurt për të jetuar, ndërsa 16.8% nuk pajtohen me këtë vlerësim dhe 23.8% mbajnë qëndrim neutral. Këto shifra e pozicionojnë Kosovën në vendin e parë në rajon për perceptimin e sigurisë së brendshme.

Sa i përket sigurisë në nivel rajonal, 43% e qytetarëve të Kosovës konsiderojnë se Ballkani Perëndimor është rajon i sigurt për të jetuar, ndërsa 21.9% mendojnë të kundërtën dhe 33.3% janë neutralë.

Edhe në aspektin e së ardhmes, qytetarët e Kosovës rezultojnë më optimistë krahasuar me vendet tjera të rajonit. 36.9% presin që situata e sigurisë në Ballkanin Perëndimor të përmirësohet gjatë 12 muajve të ardhshëm, ndërsa vetëm rreth 15–16% presin përkeqësim. Pjesa më e madhe e qytetarëve në Kosovë shprehin gjithashtu shqetësim të ulët për mundësinë e një lufte që do të përfshinte vendin, me mbi 70% që deklarojnë se janë “pak” ose “aspak” të shqetësuar.

Sipas gjetjeve të raportit, Kosova shënon gjithashtu nivelin më të ulët të shqetësimit për konflikt të brendshëm apo luftë mes vendeve të rajonit, krahasuar me shtetet tjera të WB6.

SecuriMeter 2025 është realizuar gjatë periudhës maj–qershor 2025 me 6007 të anketuar në Shqipëri, Kosovë, Maqedoni të Veriut, Mal të Zi, Bosnje dhe Hercegovinë dhe Serbi, duke analizuar perceptimet për sigurinë, stabilitetin, besimin në institucione dhe sfidat ekonomike e sociale.

Gjetjet e këtij viti tregojnë se, pavarësisht sfidave globale dhe tensioneve ndërkombëtare, Kosova kryeson në rajon për ndjenjën e sigurisë dhe stabilitetit të perceptuar nga qytetarët.

Prokuroria Themelore në Mitrovicë ka hapur një rast për veprën penale “Lajmërimi apo kallëzimi i rremë” ndaj një personi me iniciale V.V., përkitazi me një denoncim të një dhunimi që e njëjta ka paraqitur ndaj dy personave.

E njëjta ka deklaruar se është dhunuar nga dy burra në Vushtrri, të cilët me vendim të prokurorit të shtetit janë ndaluar për 48 orë.

Prokuroria, përmes njoftimit të saj bën të ditur se gruaja që e ka denoncuar dhunimin është dërguar për ekzaminim gjinekologjik në Institutin e Mjekësisë Ligjore në Prishtinë, ku pas ekzaminimit tek e dëmtuara nuk janë konstatuar kurrfarë dëmtime në organet gjenitale, e për rrjedhojë nuk janë realizuar asnjëra nga elementet e veprave penale kundër integritetit seksual, e po ashtu asnjë vepre tjetër penale e cila ndiqet sipas detyrës zyrtare.

“Në mungesë të këtyre elementeve të pandehurit janë liruar nga qendra e ndalimit ku ishin vendosur paraprakisht, ndërkaq rasti ndaj denoncueses vazhdon në procedurë të rregullt”, thuhet në njoftim.