Category: Lajme

Një vlerë prej 1 milion eurove të fshehura në një hapësirë të improvizuar brenda një furgoni janë gjetur nga zyrtarët e Doganës dhe policët kufitarë në Merdarë më 24.02.2026.

Të dyshuarit në këtë rast janë Aurel Kaziu, polic në radhët e Policisë së Shtetit, konkretisht në Komisariatin numër 5 në Tiranë, Ardit Laska dhe Etnik Ahmaxhokaj, të cilët u arrestuan dhe janë në ndalim.

KALLXO.com ka siguruar kërkesën për caktimin e masës së sigurisë, përmes të cilës Prokurori special ka kërkuar paraburgim prej një muaji ndaj tre të pandehurve, mbi bazën e rrezikut të ikjes së tyre, asgjësimit, fshehjes, ndryshimit dhe falsifikimit të provave. Të njëjtit po dyshohen për “shpëlarje të parave”.

“Ekziston dyshimi i bazuar se të pandehurit me dashje dhe duke e ditur se pasuria e caktuar është fituar përmes aktivitetit kriminal, kanë hyrë në territorin e Republikës së Kosovës”- thuhet në kërkesën për caktimin e masës së sigurisë ndaj policit shqiptar dhe dy personave të tjerë që u kapën në Merdarë duke transportuar 1 milion euro të padeklaruara.

Sipas dosjes, furgoni i tipit “Sprinter”, me targa shqiptare, kishte hyrë në Kosovë përmes Merdarës i vozitur nga i pandehuri Edmir Ahmagjokaj, i cili ishte i shoqëruar nga dy të pandehurit e tjerë; Aurel Kaziu dhe Ardit Laska. Në dosje thuhet se në “bunkerin” e improvizuar në furgon janë gjetur 18 pako me bankënota 10, 20, 50, 100 dhe 200 euro.

Të tre kur janë marrë në pyetje kanë deklaruar se me profesion janë shoferë.

I pandehuri Edmir Ahmagjokaj në deklaratën e dhënë te hetuesit doganorë më 24.02.2026 deklaroi se nuk kishte asnjë dijeni për paratë e gjetura në furgon. Ai shpjegoi se kishte udhëtuar në Gjermani më 22.02.2026 për të punuar në shpërndarje postash për klientë të ndryshëm. Ai qëndroi në hotel rreth orës 22:00 dhe planifikonte të nisej drejt Shqipërisë më 25.02.2026.

I pandehuri Aurel Kaziu, i cili është polic në Shqipëri, në deklaratën e dhënë te hetuesit doganorë më 24.02.2026, i pandehuri deklaroi se më 21.02.2026 ishte nisur nga Tirana për në Gjermani me një furgon të kaltër, të cilin e kishte ndryshuar në Kosovë me furgonin që u ndalua nga Dogana.

“Furgonin nga Kosova për në Tiranë e kishte marrë kompania. Ai tha se kishte qëndruar një natë në Dortmund dhe më pas është takuar me Edmir Ahmagjokajn në Këln, ku kishin ngrënë së bashku dhe më pas vazhduan udhëtimin për në Shqipëri. Për paratë e konfiskuara, deklaroi se nuk kishte asnjë dijeni”- thuhet në dosje

Kurse i pandehuri i tretë, Ardit Laska, sipas dosjes, deklaroi se kishte shkuar për herë të parë në Gjermani për tre muaj. Mohoi çdo lidhje me paratë. Tha se kishte kontaktuar një kompani përmes Instagramit për transport Gjermani–Shqipëri.

“Kompania i kishte dhënë kontaktin e Aurel Kaziut dhe lokacionin e pikës së nisjes. Më 23.02.2026, ai së bashku me Aurel Kaziun dhe EdmirAhmagjokaj ishin nisur nga Dortmundi për në Shqipëri”- vazhdon dosja.

Vlera prej 1 milion euro e gjetur në një hapësirë të fshehtë në një furgon sipas Prokurorisë dyshohet se janë përfituar përmes aktivitetit kriminal.

Në dosje thuhet se të dyshuarit kur ishin ndaluar dhe ishin pyetur nga hetuesit doganorë e kishin mohuar se kanë diçka për të deklaruar.

Ahmagjokaj, Kaziu e Laska janë ndaluar në pikën kufitare më 24.02.2026 rreth orës 13:00. Të tre këta janë ndaluar fillimisht për një kontrollë nga Dogana e Kosovës ndërsa nga pajisjet digjitale me rreze X është hasur në disa dyshime për mjete monetare të fshehura brenda një furgoni.

Komandanti i Komandës së Forcave të Përbashkëta Aleate të NATO-s, Admiralin amerikan George M. Wikoff, ka vizituar sot Mitrovicë, ku është takuar me Kryetarin Faton Peci.

Për këtë takim ka njoftuar Peci, i cili ka thënë se diskutuan për gjendjen e përgjithshme të sigurisë dhe për aspektet socio-ekonomike që ndërlidhen me integrimin e komuniteteve.

“E falënderova për kontributin që NATO ka dhënë për Kosovë në kohën më të vështirë të popullit tonë, që nga viti 1999, në krye me Shtetet e Bashkuara të Amerikës. Shpreha vizionin dhe prioritetet e komunës sonë për projekte zhvillimore që kontribuojnë në ekonomi dhe në paqe, veçanërisht në këtë periudhë kur gjendja e sigurisë po shënon progres të dukshëm drejt stabilitetit në vend dhe rajon. Gjithashtu, u falënderuam dhe uruam njëri-tjetrin për marrjen e mandateve, duke u zotuar për bashkëpunim të ndërsjellë dhe të vazhdueshëm”, ka shkruar Peci.

Pas fjalimit të tij për Gjendjen e Kombit, Donald Trump ka mbajtur një tjetër fjalim të zemëruar në platformën e tij “Truth Social”, në të cilën bëri thirrje që disa nga kundërshtarët e tij të deportohen.

Këtu përfshiu përfaqësuesen Ilhan Omar dhe përfaqësuesen Rashida Tlaib (të dyja demokrate dhe qytetare amerikane), të cilat ngacmuan Trumpin ndërsa ai mbante fjalimin e tij në sallën e Dhomës së Përfaqësuesve, dhe fituesin e çmimit Oscar Robert De Niro – pas fjalimit të tij plot pasion para fjalimit për Gjendjen e Kombit.

De Niro, një kritik i zjarrtë dhe i hershëm i Trump, u shfaq në MS NOW për të folur rreth presidentit aktual të SHBA-së, duke ndarë parashikimin e tij se Trump “nuk do të largohet kurrë” nga detyra dhe se u takon amerikanëve ta “heqin qafe atë”.

“Ai nuk do të largohet kurrë. Duhet ta detyrojmë të largohet”, tha aktori. “Ai tani bën shaka për shtetëzimin e zgjedhjeve. Nuk po bën shaka. Kemi parë mjaftueshëm tashmë”.

Aktori i famshëm – dhe qytetar amerikan – u shfaq gjithashtu në një aktivitet të quajtur Gjendja e Kënetës në Klubin Kombëtar të Shtypit, të sponsorizuar nga Defiance.org, gjatë të cilit ai i tha turmës: “Tragjikisht, tani jemi në një vend të, nga dhe për një grusht autoritarësh të pandershëm, lakmitarë dhe mizorë.”

De Niro shtoi: “Në fund të fundit, ndihem i tradhtuar nga vendi im. Nuk ka pse të jetë perfekt, por duhet të kthehet te vlerat që na dhanë forcën dhe humanitetin tonë”.

Trump nuk ishte aspak i kënaqur, duke postuar se Omar dhe Tlaib “duhet të hipin në një varkë me Robert De Niron e çmendur, një tjetër person i sëmurë dhe i çmendur me, besoj, një IQ jashtëzakonisht të ulët, i cili nuk ka absolutisht asnjë ide se çfarë po bën ose thotë – disa prej të cilave janë seriozisht KRIMINALE!”

Ai vazhdoi, në lidhje me De Niron: “Kur e pashë të shpërthente në lot mbrëmë, ashtu siç do të bënte një fëmijë, kuptova se ai mund të jetë edhe më i sëmurë se Rosie O’Donnell e çmendur, e cila është tani në Irlandë duke u përpjekur të kuptojë se si të kthehet në Shtetet e Bashkuara tona të bukura. E vetmja ndryshim midis De Niros dhe Rosie është se ajo është ndoshta disi më e zgjuar se ai, gjë që nuk thotë shumë”.

Vitin e kaluar, Trump kërcënoi se do t’i hiqte shtetësinë amerikane aktores dhe komedianes Rosie O’Donnell, pavarësisht një vendimi dhjetëvjeçar të Gjykatës së Lartë që ndalon shprehimisht një veprim të tillë nga qeveria.

Pas rizgjedhjes së tij, O’Donnell u zhvendos në Irlandë.

Prokurori Joshua Hafetz tha se ka dëshmi të shumta kundër Hashim Thaçit dhe të akuzuarve, përfshirë nëntë audio-incizime në qendrën e paraburgimit në Hagë, thirrje telefonike, urdhra të gjykatës që pretendohet se janë shkelur dhe ekspertizë që dëshmojnë se dokumentet që u gjetën në Kosovë ishin printuar nga printeri që përdorte Thaçi në Hagë.

Gjatë seancës u shfaq edhe një audio-incizim i Thaçit dhe Fazliut në takimin e tyre më 2 korrik 2023 në Hagë.

Prokuroria tha se ata po flisnin për dëshminë e komandant Remit.

“Thuaj shkurt, po, jo, mos filozofo”, dëgjohet Thaçi në këtë audio-incizim.

Më vonë, ai thotë se të dëshmojë shkurt e jo 12 orë siç ishte planifikuar. “Shkurt jo 12 orë, se 12 orë pa rrëshqit diku nuk e lë”, tha Thaçi, sipas audio-incizimit të ZPS-së.

ZPS po ashtu shfaqi mesazhe të Mustafës dhe Fazliut, që këmbyen me t’u kthyer Fazliu në Kosovë, ku edhe ishin takuar./REL/

Kryetari i Prishtinës, Përparim Rama, ka bërë të ditur se është në pritje të përgjigjeve përfundimtare nga partitë politike për bashkëqeverisje në kryeqytet, ndërsa paralajmëroi se kabineti i ri pritet të prezantohet brenda ditëve në vijim.
Rama theksoi se qeverisja në kryeqytet është në vazhdimësi të mandatit të kaluar, me disa ndryshime tashmë të publikuara, ndërsa drejtoritë janë funksionale dhe puna po vazhdon normalisht në të gjitha sektorët.

“Unë po them që jemi në vazhdën e marrëveshjeve, diskutimeve me të gjitha partitë edhe si rezultat po them ne po vazhdojmë, puna vazhdon në kryeqytet. Të gjitha, të gjithë drejtorat janë në punim e sipër, pra nuk është kjo një qeverisje e cila është e re, është një qeverisje që është në vazhdimësi prej katërvjeçarit të përparshëm edhe si e tillë tash jemi duke bë disa ndryshime. Domethënë, disa gjëra kanë me qëndru të njëjta, disa ndryshime janë publike, tashmë vetëm mundeni me i pa në website-in e Prishtina online, ku ndryshimet vetëm se i kemi bërë publike. Edhe po vazhdojmë në këtë vazhdë të krijimit të ekipit tash për katër vitet e ardhshme”, tha ai.

Ai bëri të ditur se ftesa për bashkëqeverisje u është dërguar të gjitha partive, por sipas tij, disa prej tyre janë në pritje për shkak të zhvillimeve në nivel qendror, përfshirë proceset zgjedhore dhe zgjedhjen e presidentit, raporton EO.

“Po i kam bo të gjitha partive. Të gjitha, faktikisht edhe e kam përmend këto edhe paraprakisht, jam po them në pritje tash përfundimtare. Mendoj që është edhe një ndoshta prolongim për shkak të çështjeve të edhe të niveleve të tjera, për shembull se kemi pas një numër të madh tash të zgjedhjeve në vitin 2025. Po vazhdojmë po them, edhe tash e kemi edhe në nivelin parlamentar, në nivelin qeverisës, të nivelit qendror, edhe zgjedhjen e presidentit. Pra janë disa çështje të cilat ndërlidhen edhe me nivelin lokal, për këtë arsye po them që të kemi edhe pak durim, edhe me siguri që brenda shumë pak kohësh do ta bëjmë prezent të gjithë kabinetin. Pra sot po mendoj, mendoj deri në javën e ardhshme, në fund të javës së ardhshme apo në fillimin e javës tjetër do ta kemi ashtu pasqyrën e plotë. Për ata që janë të rinj, ata që do të qëndrojnë. Mirëpo çka du me cek është që të gjitha drejtoritë janë duke u marrë me punë në të gjitha pjesët e kryeqytetit, pra jemi duke vazhduar me proceset”, tha ai.

Rama shtoi se synon një koalicion sa më të gjerë për shkak të projekteve madhore që e presin kryeqytetin, përfshirë përgatitjet për “Lojërat Mesdhetare 2030”, investimet në arsim, sport dhe transport urban, duke siguruar se vonesat në formalizimin e kabinetit nuk kanë ndikuar në mbarëvajtjen e punës.

Mbi 1100 raste të personave të prekur nga gripi janë regjistruar në javën e fundit në Maqedoni të Veriut.

Sipas Institutit të Shëndetit Publik, numri më i madh i të prekurve janë persona të moshës nga 15 deri 64 vjeçare.

Listën me më shumë të sëmurë nga gripi e kryeson Shkupi, me gjithsej 669 të prekur.

Në sezonin 2025-2026 numri i përgjithshëm i të prekurve shkon në rreth 15 mijë, ndërsa deri më tani janë regjistruar 4 vdekje të lidhura me gripin.

Kryeministri britanik, Keir Starmer po përballet me presion të madh pasi Partia Laburiste pësoi një humbje të thellë në zgjedhjet e pjesshme në Manchester.

Kjo zonë konsiderohej prej dekadash një bastion i sigurt për laburistët. Vetëm një vit e gjysmë më parë, në zgjedhjet e përgjithshme, Laburistët kishin fituar aty me 51% të votave. Por këtë herë, partia shkoi në vendin e tretë me vetëm 26%, duke u tejkaluar nga dy parti populiste.

Fituesit surprizë ishin të Gjelbrit, të udhëhequr nga lideri i ri karizmatik Zack Polanski. Kandidatja e tyre, Hannah Spencer, arriti 41% të votave, duke siguruar fitoren e parë historike të partisë në veri të Anglisë. Në vend të dytë doli partia e djathtë Reform UK, e drejtuar nga Nigel Farage, me 29% të votave.

Pse është kjo humbje kaq e rëndë?

Humbja shihet si një sinjal alarmi për Starmer. Brenda Partisë Laburiste ka pakënaqësi të forta, dhe disa figura tashmë kanë tentuar ta sfidojnë udhëheqjen e tij. Skandali i fundit me ish-ministrin Peter Mandelson, i cili u përfshi në polemika për lidhjet e tij me financierin amerikan Jeffrey Epstein, ka dëmtuar më tej imazhin e qeverisë.

Edhe pse Starmer ka deklaruar se nuk do të dorëhiqet, shumë deputetë laburistë kanë frikë se partia po humbet mbështetjen si nga e majta, ashtu edhe nga e djathta.

Çfarë ndodhi në Gorton dhe Denton?

Zona ka një përbërje të veçantë demografike. Gorton ka një popullsi të madhe emigrantësh, kryesisht myslimanë dhe me origjinë aziatike. Atje, të Gjelbrit zhvilluan një fushatë shumë aktive pro Palestinës dhe kundër politikave të ashpra të emigracionit.

Nga ana tjetër, Denton ka më shumë banorë të bardhë britanikë dhe të moshuar. Këtu, Reform UK arriti të fitojë shumë mbështetje me mesazhe kundër emigracionit dhe retorikë nacionaliste.

Çfarë pritet tani?

Kjo humbje vjen vetëm dy muaj para zgjedhjeve të rëndësishme lokale në Mbretërinë e Bashkuar dhe atyre kombëtare në Skoci dhe Uells. Rezultatet e ardhshme mund të vendosin fatin politik të Starmer. Megjithëse laburistët ende kanë shumicë të madhe në Parlament, presioni po rritet. Nëse humbjet vazhdojnë, pozita e kryeministrit mund të bëhet e paqëndrueshme.

Zhvillimet e fundit tregojnë se politika britanike po hyn në një fazë të re pasigurie, ku votuesit po largohen nga partitë tradicionale dhe po kërkojnë alternativa të reja.

Policia italiane, në bashkëpunim edhe me autoritetet në Spanjë, ka arrestuar në Barcelonë djalin e ish-bankierit 54-vjeçar ukrainas, i cili u gjet i pajetë pasi ra nga një ndërtesë në Milano më 23 janar.

Mediat italiane bëjnë të ditur se 34-vjeçari Igor Adarich dyshohet për rrëmbimin e babait të tij, Alexandru Adarici.

Hetuesit dyshojnë se i biri e kishte bindur të atin të udhëtonte drejt Milanos me pretekstin e një takimi biznesi në një objekt në zonën Via Nerino, ku më pas dyshohet se është organizuar rrëmbimi. Hetuesit pretendojnë se ai ndihmoi në rrëmbimin e të atit për ta detyruar atë të transferonte 250,000 euro në kriptovaluta.

Sipas dosjes hetimore, 34-vjeçari akuzohet gjithashtu se ka shkaktuar rënien e të atit nga dritarja e apartamentit, pasi ai ishte i vetmi person në dhomë në atë kohë.

Autoritetet italiane kanë hedhur poshtë versionin e dhënë më parë nga i dyshuari para policisë së Barcelonës, sipas të cilit ata ishin sulmuar nga një grup personash të armatosur.

Sipas deklarimeve të të dyshuarit, ai dhe babai i tij kishin udhëtuar në Itali për një takim me një person të quajtur “Kirill”, por hetuesit nuk kanë gjetur prova për ekzistencën e një takimi të tillë, shkruan A2CNN.

Hetimet po vijojnë për zbardhjen e plotë të rrethanave të ngjarjes.

Në gjykimin ndaj Hashim Thaçit, Fadil Fazliut, Isni Kilajt, Bashkim Smakajt dhe Hajredin Kuçit, Prokuroria ka paraqitur audio incizimet se si Thaçi e udhëzoi Fazliun për të ndikuar tek dëshmitarët.

Në audio dëgjohet se Thaçi i tregon Fazliut për Rrustem Mustafën se kur pritej të udhëtonte për Hagë dhe se cfarë t’i thoshte e si duhej të dëshmonte.

Në audio dëgjohej teksa Thaçi e pyeste se a e ke pa, ndërkohë që Fazliu i thoshte se e kishte parë pa shkuar në vizitë në Hagë në “66-sh”.

“Kogja vendimtar është. Po ta them të drejtën”, dëgjohet teksa i thotë Thaçi.

Fazliu i tregonte Thaçit se ky person i kishte thënë se në rast që ata kanë ndonjë porosi unë e kryj s’është problem.

Ndërsa, Thaçi e udhëzon që t’i thotë Mustafës që të deklarohet shkurtë gjatë dëshmisë dhe të mos filozofoj dhe të thotë që s’i kanë ndihmuar as me logjistikë dhe as me armatim.

Në anën tjetër, vetë Fazliu e konfirmon se e ka udhëzuar djalin e tij Fahriun që ta thërras me telefon Mustafën.

Përveç kësaj, publikohen edhe bisedat që Fahri Fazliu dyshohet se i ka bërë me Rrustem Mustafën ndërkohë që po organizonte takimin e babait të tij me atë./BetimipërDrejtësi

Në Gjykatën Speciale sot po mbahen deklaratat hyrëse në gjykimin ndaj Hashim Thaçit, Bashkim Smakajt, Isni Kilajt, Fadil Fazliut dhe Hajredin Kuçit.

Prokurori Joshua Hafetz pretendoi se akuzat ndaj Fadil Fazliut kanë të bëjnë me udhëzimet që ai mori dhe ia përcolli Rrustem Mustafës- Remit, se si dëshmonte në Hagë gjatë gjykimit të Thaçit.

Fazliu e kishte vizituar Thaçin në paraburgim në Korrik të vitit 2023. Sipas ZPS, me të kuptuar Thaçi se kur do të jepte dëshminë në Hagë Remi, si dëshmitar i ZPS, djali i Fazliut e kontaktoi Remin dhe më pas ai u takua me të akuzuarin.

“Tre ditë më vonë Fazliu shkoi e takoi Thaçin në Hagë dhe vizita u incizua”, tha prokurori.

Pesë ditë pasi ZPS njoftoi për dëshmitarin për 26 qershor, djali i Fazliut kontaktoi Remin që Fadil Fazliu të takohej në Kosovë. Tre ditë më vonë Fazliu shkoi e takoi Thaçin në Hagë dhe vizita u incizua në bazë të një urdhi gjyqësor.

“Gjatë vizitës ai foli për dëshminë e Remit dhe tha se dëshmia e tij ishte vendimtare dhe se ai do të vendoste precedentin e dëshmitarëve pasues që do ta ndiqnin atë, duke thënë atë që Thaçi i tha në hollësi se si do të duhej të ishte dëshmia e Mustafës, çfarë duhej të thoshte ai, në mënyrë që Remi të kthehej në Kosovë ‘ose si hero ose si njeri i turpëruar’. Thaçi i dha urdhër Fazliut që këto udhëzime t’ia jepte Mustafës para se ai të dëshmonte në Hagë”, tha prokurori duke shtuar se Fazliu u pajtua dhe madje kontribuoi se çfarë duhej të thoshte Mustafa.

Ndërkaq, Kuçi, tha ai, foli me Thaçin për ndikim ndaj dy dëshmitarëve dhe një viktime.

Gjatë seancës, prokurori tha po ashtu se në vizitën në Hagë, Kilaj kishte marrë udhëzime se si dëshmitari 4, të ndryshonte dëshminë.

Ky dëshmitar ishte viktimë, “që më parë e kishte implikuar Thaçin lidhur me keqtrajtimin që i kishin bërë anëtarë të UÇK-së”.

Kilaj, tha Prokuroria, mori shënime gjatë takimit në Hagë.

“Thaçi nënvizoi rreshtin dhe faqen e dëshmisë paraprake të dëshmitarit, saktësisht se çfarë duhej të ndryshonte ai”, pretendoi prokurori./REL/