ATV

Category: Lajme

  • Arratiset nga QKUK’ja një i burgosur, pezullohen dy zyrtarë korrektues

    Arratiset nga QKUK’ja një i burgosur, pezullohen dy zyrtarë korrektues

    Shërbimi Korrektues i Kosovës ka njoftuar se është arratisur një i burgosur. Rasti ka ndodhur në orën 03:10, në QKUK.

    Ai ishte arrestuar më 24 tetor 2025 dheishte duke mbajtur dënimin me burgim në kohëzgjatje prej katër (4) vitesh për vjedhje të rëndë dhe do të lirohej më 8 qershor 2029.

    Në njoftim bëhet e ditur se ai ishte hospitalizuar më datë 16 shkurt në repartin e Onkologjisë, kati i dytë, dhoma nr. 2, së bashku me pacientë të tjerë.

    Lidhur me rastin janë pezulluar nga puna dy zyrtarë korrektues.

    “Menjëherë pas rastit, është njoftuar Policia e Kosovës dhe është themeluar komision i brendshëm hetimor administrativ për të shqyrtuar rrethanat e arratisjes dhe dyshimet për shkelje eventuale nga zyrtarët korrektues që kanë qenë përgjegjës për sigurinë dhe prezencën e tij. Komisioni disiplinor, si masë e menjëhershme, ka pezulluar nga puna dy zyrtarë korrektues deri në përfundim të procedurave hetimore. Pas pranimit të raportit nga komisioni hetimor, Shërbimi Korrektues i Kosovës do të ndërmarrë masat përkatëse në përputhje me gjetjet dhe rekomandimet që do të dalin nga ky proces”, thuhet në njoftim.

  • Osmani, Kurti e Maqedonci në ceremoninë e ndërrimit të komandës KFOR-it

    Osmani, Kurti e Maqedonci në ceremoninë e ndërrimit të komandës KFOR-it

    Ministri i Mbrojtjes i Kosovës, Ejup Maqedonci, ka marrë pjesë sot në ceremoninë e ndërrimit të komandës në Grupin Luftarak shumëkombësh Lindje, e cila u mbajt në kampin amerikan Camp Bondsteel.

    Në këtë ceremoni morën pjesë edhe Presidentja Vjosa Osmani-Sadriu dhe Kryeministri Albin Kurti.

    Maqedonci falënderoi Kolonel Jonathan Lloyd për kontributin dhe përkushtimin gjatë mandatit të tij në krye të Grupit Luftarak shumëkombësh Lindje, ndërsa i uroi suksese Kolonel Samuel Sargeant në marrjen e detyrës së re.

    Ai theksoi se partneriteti me NATO dhe misionin KFOR mbetet thelbësor për sigurinë e Republikës së Kosovës dhe përparimin e saj në rrugën euroatlantike.

  • Gjashtë vjet nga vrasja e Qerim Kelmendit, familja kërkon hetim efektiv dhe llogaridhënie

    Gjashtë vjet nga vrasja e Qerim Kelmendit, familja kërkon hetim efektiv dhe llogaridhënie

    Sot, më 27 shkurt 2026, bëhen gjashtë vjet nga vrasja e qëllimshme e Heroit Qerim Kelmendi, një nga guerilët e parë të Ushtria Çlirimtare e Kosovës (UÇK) dhe bashkëluftëtar i Adem Jashari, Zahir Pajaziti, Fehmi Lladrovci, Luan Haradinaj, Ilir Konushevci, Adrian Krasniqi dhe Mujë Krasniqi.

    Familja Kelmendi vlerëson se, edhe pas më shumë se gjashtë vitesh nga nata e 27–28 shkurtit 2020, rasti mbetet i pazbardhur dhe pa rezultate konkrete hetimore. Sipas tyre, deri më sot nuk ka pasur informim zyrtar substancial që do të dëshmonte përparim real në hetime, çka sipas familjes bie ndesh me standardet e një hetimi efektiv, të pavarur dhe brenda afateve të arsyeshme.

    Familjarët theksojnë se nga përfundimi i luftës e deri në ditën e vrasjes, Qerim Kelmendi nuk ishte thirrur, ndaluar apo marrë në pyetje nga Policia apo Prokuroria për ndonjë vepër penale, duke e konsideruar këtë fakt me peshë juridike në kontekst të prezumimit të pafajësisë dhe mbrojtjes së reputacionit.

    Sa i përket trajtimit të rastit në Prokuroria Speciale e Republikës së Kosovës, familja përmend ndryshimet e prokurorëve përgjatë viteve dhe mungesën e rezultateve të dukshme në hetim. Ata shprehin dyshimin se vrasja mund të lidhet me veprimtarinë çlirimtare të Kelmendit dhe kërkojnë që kjo pistë të trajtohet me seriozitet profesional.

    Familja Kelmendi kërkon transparencë mbi veprimet hetimore, llogaridhënie për vonesat dhe angazhim konkret për zbardhjen e plotë të rastit.

    Në fund, familjarët theksojnë se nuk do të heqin dorë nga kërkimi i drejtësisë dhe paralajmërojnë se, në mungesë të rezultateve, do të kërkojnë përgjegjësi ligjore dhe institucionale për dështimet e deritanishme.

  • AUV ndalon importimin e 1080 litrave vaj ulliri në Vërmicë

    AUV ndalon importimin e 1080 litrave vaj ulliri në Vërmicë

    Agjencia e Ushqimit dhe Veterinarisë (AUV) ka ndaluar importimin e 1,080 litrave vaj ulliri për sallatë, pas një kontrolli të realizuar nga Inspektorati Fitosanitar Kufitar në pikën doganore në Vërmicë.

    Sipas njoftimit, pas shqyrtimit të lëndës me nr. të aplikacionit PIKF297960/2026, të datës 18 shkurt, është ndaluar hyrja në Kosovë e produktit të destinuar për tregun vendor nga kompania “Euro Made 2021” nga Lushnja, Shqipëri.

    Gjatë kontrollit fizik është konstatuar se produkti nuk përmbante të dhënat e duhura në deklaracionin e mallit. Po ashtu, është vërejtur se vaji ishte transportuar në kushte jo të mira higjienike dhe së bashku me mallra të tjera jo ushqimore, si detergjentë, çka rrit mundësinë e kontaminimit”, thuhet në njoftim.

  • Vlera e aseteve arrin në 3.28 miliardë euro: Ku janë të investuara kursimet e qytetarëve të Kosovës

    Vlera e aseteve arrin në 3.28 miliardë euro: Ku janë të investuara kursimet e qytetarëve të Kosovës

    Trusti i Kursimeve Pensionale të Kosovës ka njoftuar se vlera e përgjithshme e aseteve të tij ka arritur në 3.28 miliardë euro, duke shënuar nivelin më të lartë që nga themelimi.

    Tri miliardë e më shumë euro të mbledhura nga kontributet e punëtorëve të Kosovës sot punojnë për ta, jo në Kosovë, por në tregjet më të mëdha financiare të planetit.

    Trusti i Kursimeve Pensionale të Kosovës raportoi se asetet e tij kanë arritur në 3.28 miliardë euro, shumica e të cilave janë investuar në aksione, fonde ndërkombëtare dhe obligacione shtetërore në tregjet e zhvilluara.

    Ky është një nga momentet më të forta të performancës së Trustit, që tregon jo vetëm rritjen e vlerës së kursimeve, por edhe varësinë e tyre nga ekonomia globale.

    Por, ku janë te investuar dhe ku po mbahen këto para?

    Ky raport analizon në detaje se ku janë të investuara këto para, cilat janë organizatat që i menaxhojnë fondet, në cilat vende operojnë ato, si dhe cili është niveli i rrezikut për secilën kategori.

    Struktura e përgjithshme e investimeve:

    Nga 3.28 miliardë euro:

    59.7% (1.96 miliard €) janë në aksione

    12.9% (424 milion €) në instrumente borxhi

    9.9% (325 milion €) në fonde multi-asete

    8.1% (267 milion €) në asete reale

    9.4% (307 milion €) në kesh dhe treg të parasë

    Kjo strukturë tregon se Trusti ka orientim kryesisht drejt rritjes afatgjatë, pasi pjesa më e madhe është në tregun global të aksioneve.

    Investimet në tregun e aksioneve (1.96 miliard €)

    Aksione pasive (ETF dhe fonde indeksuese) -1.45 miliard €

    Këto investime ndjekin indekse të mëdha botërore dhe konsiderohen më të qëndrueshme dhe me kosto më të ulët.

    Vanguard Group (SHBA) – 715,047,183 €

    Një nga menaxherët më të mëdhenj të aseteve në botë. Investimi përmes fondit global përfshin kompani si Apple, Microsoft, Nestlé, etj.

    Invesco (SHBA) – 259,188,871 €

    Përmes ETF që ndjek indeksin S&P 500.

    BlackRock / iShares (SHBA) – përmes disa ETF-ve evropiane dhe britanike

    MSCI Europe Value ETF – 128,485,240 €

    Core FTSE 100 ETF (Mbretëria e Bashkuar) – 50,578,350 €

    Listed Private Equity ETF- 26,254,295 €

    Amundi (Francë)

    MSCI Europe Quality Factor ETF – 76,591,015 €

    MSCI Japan ETF – 46,079,586 €

    UBS Group (Zvicër)

    Core SPI ETF – 32,810,999 €

    State Street Global Advisors (SHBA) përmes SPDR ETF

    European Dividend Aristocrats – 32,563,525 €

    Russell 2000 Small Cap – 32,536,530 €

    Këto fonde konsiderohen me rrezik të moderuar, pasi ndjekin tregje të gjera dhe janë të diversifikuara.

    Aksione aktive- 384 milion €

    Këtu menaxherët përzgjedhin kompani specifike me synim tejkalimin e tregut.

    Nordea (Finlandë) – 109,992,426 €

    Schroders (Mbretëria e Bashkuar)

    Global Equity Alpha – 93,851,276 €

    Sustainable Growth – 89,520,548 €

    JPMorgan Chase (SHBA) – 91,245,917 €

    Dihet se rreziku këtu është më i lartë se fondet pasive, sepse performanca varet nga strategjia e menaxherit.

    Aksione tematike- 121 milion €

    Investime në sektorë specifikë, që mund të jenë më të paqëndrueshme.

    **BNP Paribas – Healthcare Innovators – 30,321,054 €

    **State Street Global Advisors – Oil & Gas ETF – 28,449,173 €

    **VanEck – Defense ETF- 19,653,695 €

    Future of Defence ETF – 17,281,441 €

    Edhe këto fonde janë më të rrezikshme sepse varen nga sektorë specifikë si energjia apo mbrojtja.

    Instrumente borxhi dhe stabilitet

    Obligacione të Kosovës – 139,449,356 €

    Obligacione të Austrisë – 31,826,544 €

    Obligacione të Francës -30,907,378 €

    Obligacione të Italisë – 30,023,720 €

    Vanguard Eurozone Government Bond ETF – 27,898,760 €

    Këto konsiderohen investime me rrezik më të ulët krahasuar me aksionet.

    Multi-asete. 325 milion €

    Schroder ISF Global Multi Asset Balanced -121,150,458 €

    Nordea Stable Return Fund – 80,432,802 €

    BlackRock Global Allocation – 69,323,426 €

    Allianz Dynamic Multi Asset – 54,560,369 €

    Këto fonde kombinojnë aksione dhe obligacione për të balancuar rrezikun.

    Asete reale, 267 milion €

    Investime në infrastrukturë dhe pasuri të paluajtshme përmes ETF-ve amerikane si:

    iShares US Infrastructure – 107,420,437 €

    Global X US Infrastructure – 79,552,464 €

    Global X Data Center & Digital Infrastructure – 42,541,862 €

    Janë investime të lidhura me ekonomi reale, por ndikohen nga normat e interesit dhe ciklet ekonomike.

    Likuiditet dhe para të gatshme

    Amundi Smart Overnight Return ETF – 152,754,906 €

    Amundi Euro Liquidity – 138,730,060 €

    Depozita bankare – 164,313,515 €

    Kesh në banka – 16,258,308 €

    Këto shërbejnë për stabilitet dhe reagim të shpejtë ndaj tregut.

    Shumica e parave të pensioneve të qytetarëve të Kosovës janë të investuara në tregjet e SHBA-së dhe Evropës përmes fondeve gjigante ndërkombëtare. Ekspozimi më i madh është ndaj ekonomisë amerikane. Rreth 60% janë në aksione, që do të thotë se fondi është i orientuar drejt rritjes afatgjatë dhe mund të ketë luhatje në periudha krize globale.

    Një pjesë e investimeve janë në sektorë më të rrezikshëm si energjia dhe industria e mbrojtjes, ndërsa rreth një e treta e portofolit është në instrumente më të sigurta si obligacionet dhe depozitat bankare.

    Trusti i Kosovës nuk i mban paratë në Kosovë, por i investon në tregjet financiare ndërkombëtare për të rritur vlerën e tyre në afatgjatë. Struktura aktuale tregon një strategji të balancuar mes rritjes dhe stabilitetit, por me dominim të qartë të tregut të aksioneve.

    Kjo nënkupton se pensionet e ardhshme të qytetarëve varen drejtpërdrejt nga performanca e ekonomisë globale.

    Sipas të dhënave zyrtare të Trustit të Kursimeve Pensionale të Kosovës, viti 2025 ka shënuar një performancë të rëndësishme pozitive në investime, me kthim bruto nga investimet prej rreth 312 milionë euro deri më 24 dhjetor 2025. ‎

    Kjo është shifra e fitimit që Trusti ka arritur vetëm nga performanca e aseteve të tij, dhe është rreth 68 milionë euro më e lartë se kthimi në vitin 2024, kur ai kishte qenë rreth 244 milionë euro. ‎Ky rezultat konfirmon se pensionet e kosovarëve kanë sjellë rritje të vlerës së kursimeve edhe gjatë vitit 2025, duke kontribuar në rritjen e totalit të mjeteve të menaxhuara dhe duke rritur besueshmërinë e sistemit të pensioneve./Monitor/

  • Shukri Buja propozon që Jakup Krasniqi të zgjidhet president: Personalitet atdhetar, mesazh i fuqishëm për drejtësinë ndërkombëtare

    Shukri Buja propozon që Jakup Krasniqi të zgjidhet president: Personalitet atdhetar, mesazh i fuqishëm për drejtësinë ndërkombëtare

    Shukri Buja nga Partia Demokratike e Kosovës, ka komentuar çështjen e zgjedhjes së presidentit të ri të vendit, duke propozuar Jakup Krasniqin për këtë pozitë. Buja ka thënë se Krasniqi është një personalitet atdhetar, i sakrificës, i përkushtimit, profesionist dhe mbi të gjitha një figurë konsensuale.

    Buja në postimin e tij, ka thënë edhe se zgjedhja e Krasniqit si president do të ishte ‘’verdikt i qartë politik i popullit’’ të Kosovës, dhe se, do të ishte një mesazh i fuqishëm për drejtësinë ndërkombëtare, që tregon qartë se cili është qëndrimi i këtij populli për udhëheqësit e luftës së tij çlirimtare.

    Tutje, ai ka deklaruar edhe se, Partia Demokratike e Kosovës dhe Aleanca për Ardhmërinë e Kosovës nuk kanë asnjë arsye ta kundërshtojnë, ndërsa Lidhja Demokratike e Kosovës ‘’mund ta kundërshtojë po aq sa mund ta përkrahë’’. Buja ka deklaruar edhe se, edhe Lista Guxo dhe në veçanti Vjosa Osmani ‘’do të dëshmonin se pjesëmarrja e tyre në protesta ishte bindje e sinqertë për pafajësinë e çlirimtarëve.’’

    Postimi:

    Të nderuar qytetarë të Kosovës!

    Të nderuar Kryetarë të subjekteve politike parlamentare!

    Kosova po gjendet në një rreth vicioz të konstituimit të organeve shtetërore, një bllokadë pa dalje. As zgjedhjet e reja nuk ofrojnë zgjidhje reale.

    Vendi ynë ka nevojë për një hap të guximshëm, të mençur dhe të qëndrueshëm.

    Prandaj po paraqes një propozim që e konsideroj zgjidhjen më të drejtë, më të qëlluar politikisht dhe më të qëndrueshme për kohën dhe rrethanat në të cilat ndodhemi.

    Kjo është një zgjidhje sfiduese, me një porosi të qartë për luftën çlirimtare dhe një mesazh të fuqishëm për drejtësinë.

    Janë vetë përfaqësuesit e popullit ata që, me votën e tyre, e miratuan rezolutën dhe e obliguan vetveten për procesin e Dhomave të Specializuara.

    Sot, po me votën e tyre, ata mund të japin verdiktin politik dhe moral të popullit për pafajësinë e bashkëluftëtarëve tanë.

    Propozimi im, i dalë nga zemra dhe mendja, natyrisht do të ishte ish-Presidenti Hashim Thaçi.

    Por duke njohur qëndrimet e LVV-së, të z. Kurti, të znj. Osmani dhe të koalicionit qeverisës, e kuptoj se kjo mund të jetë e vështirë politikisht e kalueshme.

    Megjithatë, ky qëndrim refuzues nuk mund dhe nuk duhet të vlejë për një personalitet tjetër të luftës, një figurë për të cilën askush nuk mund të thotë se ka përkrahur Dhomat e Specializuara, që nuk përfaqëson interesa të ngushta partiake dhe nuk është figurë përçarëse.

    Propozimi im është i qartë: Z. Jakup Krasniqi.

    Një personalitet atdhetar, i sakrificës, i përkushtimit, profesionist dhe mbi të gjitha një figurë konsensuale.

    Një njeri që sot ndodhet në burg, por nuk është i dënuar.

    Kushtetuta e Republikës së Kosovës e përcakton qartë prezumimin e pafajësisë, dhe rregullon edhe mënyrën e ushtrimit të funksionit të Presidentit në rast pamundësie të përkohshme.

    PDK dhe AAK nuk kanë asnjë arsye ta kundërshtojnë.

    LDK mund ta kundërshtojë po aq sa mund ta përkrahë.

    Lista Guxo dhe në veçanti znj. Osmani do të dëshmonin se pjesëmarrja e tyre në protesta ishte bindje e sinqertë për pafajësinë e çlirimtarëve.

    Zgjedhja e z. Jakup Krasniqi si President nga deputetët e Kuvendit do të ishte verdikt i qartë politik i popullit të Kosovës.

    Do të ishte një mesazh i fuqishëm për drejtësinë ndërkombëtare, që tregon qartë se cili është qëndrimi i këtij populli për udhëheqësit e luftës së tij çlirimtare.

    Ky është moment historik për përgjegjësi!

    Me respekt,

    Sh. Buja

  • Tramvaji del nga shinat në Milano, një i vdekur dhe të paktën 40 të plagosur

    Tramvaji del nga shinat në Milano, një i vdekur dhe të paktën 40 të plagosur

    Një aksident i rëndë ka ndodhur pasditen e kësaj të premteje, në Milano, ku një tramvaj ka dalë nga shinat dhe është përplasur me një pallat, duke lënë një person të vdekur dhe të paktën 40 të plagosur, disa prej tyre në gjendje të rëndë.

    Ngjarja ka ndodhur rreth orës 16:00, më 27 shkurt, në zonën e Vittorio Veneto. Sipas dëshmitarëve, tramvaji po ecte shumë shpejt dhe menjëherë u kuptua se diçka nuk ishte në rregull.

    Në pikën ku ndodhet një devijim i shinave që lejon kthesën majtas, tramvaji, që teorikisht duhej të vazhdonte drejt, ka marrë kthesën. Për shkak të shpejtësisë së lartë, ai ka dalë nga shinat dhe është përplasur me pallatin në cep të rrugës, duke rrëzuar edhe semaforin dhe duke shkatërruar vitrinën e një restoranti.

    Sipas disa burimeve, disa persona kanë mbetur të bllokuar poshtë tramvajit. Ende nuk është e qartë nëse ata po kalonin rrugën dhe makinisti ka tentuar një frenim të menjëhershëm apo një manovër të papritur për t’i shmangur.

    Në vendngjarje kanë mbërritur dhjetëra mjete të emergjencës dhe forca policie, ndërsa zona është izoluar për hetime.

  • ‘‘Foto e ditës’’, Taulant Balla pret në takim veteranët e UÇK-së

    ‘‘Foto e ditës’’, Taulant Balla pret në takim veteranët e UÇK-së

    Kryetari i grupit parlamentar të Partisë Socialiste, Taulant Balla ka njoftuar se ka pritur në takim veteranët e UÇK-së priten në Kuvendin e Shqipërisë.

    Në fotografitë e shpërndara nga Balla shihet se veteranët i kanë dhuruar fotografinë e Hashim Thaçit.

    Ndërkaq krahas postimit, Balla ka shkruar: Fotot e Ditës.

  • Epopeja e UÇK-së: Publikohet agjenda e aktiviteteve për 5, 6 dhe 7 mars

    Epopeja e UÇK-së: Publikohet agjenda e aktiviteteve për 5, 6 dhe 7 mars

    Institucionet e Republikës së Kosovës kanë publikuar agjendën zyrtare të aktiviteteve për shënimin e Epopesë së UÇK-së, që do të zhvillohen më 5, 6 dhe 7 mars në disa qytete të vendit.

    Aktivitetet përfshijnë mbledhje solemne, homazhe, ekspozita, aktivitete sportive dhe programe artistike, në nderim të Epopesë së Ushtrisë Çlirimtare të Kosovës.

    “Në nderim të Epopesë së Ushtrisë Çlirimtare të Kosovës, Ministria e Mbrojtjes fton qytetarët që të marrin pjesë në aktivitetet përkujtimore dhe festive sipas agjendës zyrtare.

    Le të bashkohemi për të nderuar sakrificën e dëshmorëve dhe për të festuar me dinjitet vlerat e lirisë” thuhet në njoftimin e Ministrisë së Mbrojtjes.

    Agjenda e 5 marsit

    Epopeja nis më 5 mars në orën 08:00, kur ora e parë mësimore në të gjitha shkollat e Republikës së Kosovës do t’i kushtohet Epopesë së UÇK-së.

    Në orën 09:00 mbahet mbledhja solemne e Qeverisë së Republikës së Kosovës, ndërsa në orën 10:00 do të zhvillohen seanca solemne në kuvendet komunale.

    Në mesditë, në orën 12:00, do të bëhet rreshtimi i kuadrateve të FSK-së në Kazermën “Adem Jashari” në Prishtinë.

    Ndërkaq, në orën 14:30, në Skenderaj do të mbahet gara mbarëkombëtare e volejbollit për femra “Adem Jashari”.

    Agjenda e 6 marsit

    Aktivitetet e 6 marsit nisin në orën 10:00 me homazhe nga krerët e shtetit në Kompleksin Memorial “Adem Jashari” në Prekaz.

    Nga ora 10:00 deri në 12:00, homazhe do të bëjnë edhe përfaqësuesit komunalë në komplekset memoriale të dëshmorëve.

    Në orën 13:00 do të hapet ekspozita “Tri ditë që ndryshuan historinë”, e organizuar nga Kuvendi i Republikës së Kosovës.

    Në mbrëmje, në orën 19:00, do të mbahet Akademi përkujtimore për Epopesë e UÇK-së, me pjesëmarrje artistike nga Opera dhe Filarmonia e Kosovës, në Pallatin e Rinisë (Salla e Kuqe), ndërsa në orën 21:00 parashihet mbyllja e ceremonisë.

    Agjenda e 7 marsit

    Epopeja përmbyllet më 7 mars me “Natën e Zjarreve” në Prekaz, duke nisur nga ora 18:00.

    Në orën 18:15 do të bëhet ndezja e flakadanëve në shtatë rajonet e Republikës së Kosovës, ndërsa në orën 19:00 në sheshin “Adem Jashari” në Skenderaj do të mbahet program artistik.

    Institucionet kanë ftuar qytetarët që të marrin pjesë në aktivitetet përkujtimore, në nderim të një prej ngjarjeve më të rëndësishme në historinë e Kosovës.

  • Dënimi me 15 vjet i kosovarit në Beograd, Syla: Serbia po tenton ta njollosë luftën e UÇK-së

    Dënimi me 15 vjet i kosovarit në Beograd, Syla: Serbia po tenton ta njollosë luftën e UÇK-së

    Nënkryetari i OVL-UÇK-së, Gazmend Syla, ka deklaruar për Klan Kosova se besojnë në pafajësinë e bashkëluftëtarit Gjelosh Krasniqi, i cili është dënuar me 15 vjet burgim në mungesë nga Gjykata e Beogradit.

    Ai tha se pretendimet e akuzat që ia drejton shteti serb janë të pabaza dhe të pavërteta.

    Sipas Sylës, kjo nuk është diçka e re, duke e ditur që Serbia vazhdimisht tenton ta njollosë luftën e pastër të UÇK-së.

    Ai theksoi se Gjelosh Krasniqi, përveç që vetë doli në mbrojtje të vendit në kohën më të vështirë, është edhe vëllai i dëshmorit, Gjergj Krasniqi.

    “Lufta jonë ka qenë e drejtë. UÇK-ja nuk ka bërë krime. Jemi krenarë me çdo luftëtar të UÇK-së. Me luftën speciale të Serbisë jemi duke u ballafaquar çdo ditë prej ditës së çlirimit të Kosovës”, u shpreh Syla.