Category: Lajme

Presidenti i SHBA-së, Donald Trump, njoftoi sot se SHBA-të kanë nisur “operacione ushtarake në shkallë të gjerë” në Iran.

“Qëllimi ynë është të mbrojmë popullin amerikan duke eliminuar kërcënimet e menjëhershme nga regjimi iranian”, tha Trump në një video të postuar në rrjetet sociale.

“Ne do të shkatërrojmë raketat e Iranit dhe do të rrafshojmë industrinë e tij të raketave “, siguroi ai, “ne do të eliminojmë marinën e tyre”, shtoi ai.

Presidenti amerikan theksoi se SHBA-të “do të sigurohen që Irani të mos pajiset me armë bërthamore”, duke shpjeguar se Teherani “është përpjekur të rindërtojë programin e tij bërthamor”.

Në të njëjtën kohë, ai theksoi se SHBA-të kanë marrë çdo masë të mundshme për të kufizuar rreziqet për personelin amerikan në rajon, por paralajmëroi se “jeta e heronjve të guximshëm amerikanë mund të humbasë dhe ne mund të pësojmë viktima, siç ndodh shpesh në luftë. Por ne nuk po e bëjmë këtë për të tashmen. Ne po e bëjmë këtë për të ardhmen dhe është një mision fisnik”.

Për më tepër, presidenti amerikan la të kuptohej se qëllimi i sulmeve kundër Iranit është përmbysja e regjimit, duke i thënë popullit iranian se “koha e lirisë suaj është afër”.

“Anëtarëve të Gardës Revolucionare, forcave të armatosura dhe të gjithë policisë: Ju them sonte se duhet të dorëzoni armët tuaja në mënyrë që të keni amnisti të plotë. Alternativa është të përballeni me vdekjen e sigurt”, paralajmëroi ai.

“Dorëzoni armët. Do të trajtoheni në mënyrë të drejtë dhe me humanizëm të plotë, ose do të përballeni me vdekjen e sigurt”, tha ai.

“Popullit të madh dhe krenar të Iranit, sonte u them se koha juaj e lirisë është afër. Qëndroni në vende të sigurta. Mos i lini shtëpitë tuaja. Jashtë është shumë e rrezikshme. Bombat do të bien kudo”, vazhdoi Trump.

“Kur të mbarojmë, merrni qeverinë tuaj. Do të jetë e juaja ta merrni përsipër. Ky mund të jetë shansi i vetëm që do të keni për breza të tërë”, theksoi ai.

Një person ka raportuar se disa persona të panjohur kanë hedhur një mjet shpërthyes në oborrin e shtëpisë së tij në Vushtrri.

Sipas raportit të policisë, si pasojë janë shkaktuar dëme materiale, por nuk ka të lënduar.

“Në vendin e ngjarjes kanë dalë njësitet përkatëse policore. Lidhur me rastin është njoftuar prokurori”.

Kryeministri izraelit, Benjamin Netanyahu, ka thënë se sulmi i përbashkët amerikano-izraelit kundër Iranit “do t’i krijojë kushtet për popullin guximtar të Iranit që të marrë fatin në duart e veta”.

“Ka ardhur koha për çdo segment të popullit në Iran që të heqë thundrën e tiranisë nga (regjimi) dhe të krijojë një Iran të lirë dhe paqedashës”, ka thënë Netanyahu përmes një deklarate.

Izraeli mbylli hapësirën ajrore të shtunën në mëngjes, tha Ministria e Transportit, pasi vendi kreu sulme ajrore ndaj Iranit.

Komanda e Frontit të Brendshëm të Izraelit urdhëroi po ashtu publikun të kryejë vetëm aktivitete thelbësore në të gjithë vendin pas sulmeve ajrore ndaj Iranit.

Kufizimet e shpallura rishtazi ndalojnë tubimet publike, shkuarjen në punë dhe shkuarjen në shkollë, shkruan CNN.

Një përjashtim bëhet për atë që Izraeli e quan “sektorë të jashtëzakonshëm”.

Njohës të çështjeve politike në Kosovë kanë vlerësuar rëndësinë e dialogut Kosovë–Serbi si të domosdoshëm për avancimin e agjendës evropiane dhe për shmangien e izolimit politik të Kosovës, raporton Ekonomia Online.

Sipas tyre vazhdimi i bisedimeve është kyç për stabilitetin politik dhe diplomatik të vendit, si dhe për respektimin e marrëveshjeve të arritura më parë.

Analisti politik Artan Muhaxhiri, theksoi se Bashkësia Ndërkombëtare e sheh dialogun si mënyrën e vetme për avancimin e Kosovës në agjendën evropiane. Ai paralajmëroi se çdo vonesë apo bllokadë në dialog do të ndikojë direkt në rrugën eurointegruese të vendit.

“Po bashkësia ndërkombëtare është absolutisht e qartë në raport me dialogun. Pra dialogu është e vetmja mënyrë që Kosova dhe Serbia të avancojnë në agjendën evropiane. Nuk ka asnjë mënyrë tjetër, asnjë qasje tjetër, asnjë opsion tjetër që Kosova veçanërisht të ketë ndonjë përparim, ndonjë progres dhe çdo vonesë, çdo bllokadë e dialogut është në mënyrë të drejtpërdrejtë edhe bllokadë dhe vonesë e rrugës evropiane të Kosovës”, tha ai.

Ai gjithashtu nënvizoi se kthimi i palëve në tavolinën e bisedimeve është kërkesë e përbashkët e komunitetit ndërkombëtar.

“U pa që në të gjitha urimet edhe nga presidenti Macron, edhe nga kancelarja Merkel, edhe nga të gjithë, kryefjala ishte vazhdimi i dialogut edhe kthimi në tavolinën e bisedimeve. Pra nuk ka asnjë mënyrë tjetër për zoti Kurti që ta shpërbëjë këtë izolim pa dialog. Deklaratat kështu populiste, propagandistike për konsum të brendshëm janë diçka tjetër, mirëpo pa u rikthyer në tavolinën e bisedimeve në Bruksel edhe zoti Kurti edhe Kosova do të jenë të izoluar politikisht”, tha ai.

Politologu Albinot Maloku tha se dialogu tani do të fokusohet në implementimin e marrëveshjeve të arritura në Bruksel dhe Ohër në vitin 2023, duke përfshirë edhe aneksin.

“Kemi kryenegociatorin dhe dialogu do të bëhet në atë të implementimit të pajtimit të ndodhur në Bruksel dhe në Ohër në vitin 2023, flasim edhe për aneksin. Tani, në këtë rrafsh unë konsideroj që tani do të kemi dialog për jetësimin, implementimin e marrëveshjeve të arritura. Këtë e kërkon në një formë ose tjetër edhe faktori ndërkombëtar, e kërkon posaçërisht Bashkimi Evropian që e ka të angazhuarin e vet lehtësuesin dhe në instancë të fundit ky dialog po bëhet me lehtësimin e Bashkimit Evropian”, tha ai.

Ai vlerësoi se për këtë proces ka një angazhim të posaçëm nga Bashkimi Evropian si lehtësues dhe nënvizoi se suksesi i dialogut është i lidhur drejtpërdrejt me progresin eurointegrues të Kosovës dhe Serbisë.

Ai shtoi se kryenegociatori i ri i Kosovës, Glauk Konjufca, ka potencial të zbusë tensionet dhe të bëjë procesin e implementimit më të pranueshëm.

“Dialogu është, sidomos me marrëveshjen e fundit ku edhe anëtarësimi në BE si për Serbinë si për Kosovën është i ndërlidhur fuqishëm me çështjen e dialogut dhe në këtë rrafsh, me suksesin në dialog. Dhe në këtë rrafsh unë konsideroj që nuk ka alternativë më të veçantë sesa dialogu për arsye se është fakt. Dhe në këtë rrafsh dua të besoj dhe shpresoj që edhe Republika e Kosovës me kryenegociatorin e ri, zotëri Glauk Konjufca, që në gjykimin tim, duke u dëshmuar në vazhdimësi si një zbutës i mirë në këtë pozicion, dua të besoj që do të shkëlqejë për të zbutur, qetësuar edhe shumë nga ato premtime jashtëzakonisht të agravuara të kryeministrit të vendit në mënyrë që të jetë edhe implementimi më i pranueshëm për në mënyrën edhe të narrativës, shpjegimit që mund ta ketë në të ardhmen kryeministri i vendit në ato situata ku shpjegimi për të ka qenë ndryshe, tani do të jetë ndryshe për arsye se do të kemi të bëjmë me jetësimin e marrëveshjes”, tha ai.

Bill Clinton i tha një paneli të Kongresit se “nuk pa asgjë” dhe “nuk bëri asgjë të gabuar” në lidhje me të ndjerin, të dënuar për krime seksuale, Jeffrey Epstein.

Seanca dëgjimore që zgjati gjithë ditën, me dyer të mbyllura në Nju Jork, përfshiu pyetje drejtuar ish-presidentit lidhur me përfshirjen e tij në dosje të sapopublikuara që lidhen me financierin, përfshirë edhe një fotografi ku ai shfaqet me një person të paidentifikuar në një vaskë me ujë të ngrohtë, raporton BBC, transmeton Gazeta Express.

Dëshmia e tij erdhi një ditë pasi bashkëshortja e tij, ish-Sekretarja e Shtetit e SHBA-së, Hillary Clinton, i tha komitetit se edhe ajo “nuk kishte asnjë ide” për krimet e Epstein.

Të qenit i përmendur në dosje nuk përbën tregues për keqbërje, dhe asnjëri prej Clinton-ëve nuk është akuzuar për sjellje të pahijshme nga të mbijetuarit e Epstein-it që kanë dalë publikisht deri më tani.

Clinton tha se do t’i kishte ndërprerë marrëdhëniet me Epstein-in dhe nuk do të kishte fluturuar kurrë me avionin e tij nëse “do të kishte pasur ndonjë dyshim për atë që ai po bënte”.

“Do ta kisha denoncuar vetë,” tha ai në deklaratën hapëse të publikuar përpara dëshmisë së tij.

Pas dëshmisë në Nju Jork, ai publikoi një video që në thelb përsëriste deklaratën e tij hapëse, duke thënë se nuk kishte dijeni për krimet e Epstein-it “pavarësisht sa fotografi tregojnë me mua”.

“Kur të publikohet videoja e dëshmisë sime sot, shpresoj që do të motivojë këdo të paraqitet përpara Kongresit për të thënë atë që di,” tha Clinton. “Shpresoj që do të motivojë Departamentin e Drejtësisë që më në fund të publikojë të gjitha dosjet dhe të sigurojë që kjo të mos ndodhë më kurrë. Të mbijetuarit e meritojnë këtë.”

Si ai ashtu edhe bashkëshortja e tij kishin kundërshtuar më parë thirrjet me detyrim nga paneli, duke i cilësuar si të motivuara politikisht, përpara se të pranonin të dëshmonin përpara Komitetit të Mbikëqyrjes së Dhomës së Përfaqësuesve, ndërsa mbi ta rëndonin procedura të mundshme për shpërfillje të Kongresit.

Kur u pyet për fotografinë që e tregonte ish-presidentin duke pushuar në një vaskë me ujë të ngrohtë me një person që dukej si grua – fytyra e së cilës është nxirë për të mbrojtur identitetin – Clinton u tha ligjvënësve se nuk e njihte atë. Kur u pyet nëse kishte pasur marrëdhënie seksuale me gruan, ai tha se jo, sipas një burimi për BBC-në.

Ndryshe nga bashkëshortja e tij, Clinton nuk doli të fliste me gazetarët pasi përfundoi dëshmia e tij.