Category: Lajme

Me temën globale “Të Drejta, Drejtësi, Veprim”, Agjencia për Barazi Gjinore ka shënuar 8 Marsin – Dita Ndërkombëtare e Gruas, ku Kryetarja e Kuvendit, Albulena Haxhiu, tha se të drejtat e grave janë standard për mënyrën se si një shoqëri e kupton lirinë dhe demokracinë, raporton Ekonomia Online.

Ajo theksoi se mënyra se si një vend i trajton gratë dhe vajzat është pasqyra më e ndershme e lirisë së atij vendi, duke shtuar se historia ka dëshmuar se të drejtat e grave nuk janë dhuratë, por rezultat i veprimit dhe angazhimit të vazhdueshëm të grave që kanë refuzuar ta pranojnë padrejtësinë si normalitet.

“Në këtë frymë duhet ta themi qartë se të drejtat e grave nuk janë vetëm çështje e grave. Ato janë standart për mënyrën se si një shoqëri e kupton lirinë por po ashtu edhe demokracinë e saj. Mënyra se si një vend i trajton gratë dhe vajzat e tij është pasqyra më e ndershme e lirisë së atij vendi. Historia na ka mësuar se të drejtat e grave nuk janë dhuratë. Ato janë rezultat i veprimit. Çdo e drejtë që sot na duket e natyrshme është fituar sepse një grua dikur e ka ngritur zërin. Një tjetër ka protestuar. Dikush ka refuzuar ta pranojë padrejtësinë si normalitet. Dhe me çdo veprim të tyre, ato frymëzuan gratë e tjera ta gjejnë zërin e tyre dhe të punojnë së bashku për ndryshim të vërtetë. Këtë e dëshmojnë shumë gra në historinë tonë. Gra që e kanë kthyer bindjen në punë të përditshme”, tha ajo.

Haxhiu shtoi se ndonëse Kosova ka bërë përparime në legjislacion, realiteti tregon se puna nuk përfundon me miratimin e ligjeve, pasi shumë gra vazhdojnë të përballen me dhunë në familje, pabarazi ekonomike dhe barriera në vendimmarrje e në tregun e punës.

“Kosova ka bërë përparimi në ligje. realiteti na kujton se puna nuk përfundon me miratimin e ligjeve. Shumë gra vazhdojnë të përballen me dhunë në familje, me pabarazi ekonomike dhe me barriera në qasjen në vendimmarrje, por po ashtu edhe në tregun e punës. Si Kryetare e Kuvendit të Republikës së Kosovës, zotohem se do t’i fuqizojmë mekanizmat e mbikëqyrjes parlamentare dhe do t’ua kujtojmë institucioneve përkatëse përgjegjësinë që kanë në zbatimin e ligjeve. Sepse në fund të fundit, qëllimi i gjithë këtij angazhimi është që progresi për të cilin flasim të bëhet i dukshëm, i prekshëm për vajzat dhe gratë e këtij vendi. Shpesh e kam menduar edhe në të kaluarën, gjatë kohës sa kam qenë Ministre e Drejtësisë, por edhe sot si Kryetare e Kuvendit, se si duket në praktikë progresi për të cilin flasim apo flasim kaq shpesh. Ligjet, po, janë të rëndësishme. Politikat janë të domosdoshme. Por ndryshimi duhet të ndihet në jetën e përditshme. Dhe ndonjëherë ky ndryshim shfaqet në mënyrë shumë konkrete, për shembull siç e kemi parë në zgjedhjet parlamentare të vitit 2021, ku pjesa më e madhe e deputeteve gra janë zgjedhur pa u mbështetur në kuotën gjinore”, tha ajo.

Kryeministri i Kosovës, Albin Kurti, tha se drejtësia e barabartë nuk është parim abstrakt, por përgjegjësi konkrete e Republikës së Kosovës, raporton Ekonomia Online.

Ai theksoi se drejtësia e barabartë nënkupton zbatim të plotë të të drejtave të garantuara me Kushtetutë dhe ligj në çdo institucion, mos tolerim të dhunës në familje dhe diskriminimit, si dhe ndjekje penale të rasteve të tilla.

“Në ditën ndërkombëtare të gruas flasim për drejtësi të barabartë, jo si një parim abstrakt, por si një përgjegjësi e Republikës së Kosovës. Drejtësia e barabartë në Kosovë do të thotë që të drejtat e garantuara nga kushtetuta dhe ligji të zbatohen plotësisht në çdo gjykatë, në çdo vend pune, në çdo komunë dhe në çdo stacion policie. Do të thotë që dhuna në familje dhe diskriminimi nuk tolerohen, justifikohen ose fshihen, por ndiqen penalisht dhe parandalohen. Do të thotë që çdo vajzë dhe grua në Kosovë ka qasje të barabartë në arsim dhe mundësi cilësore për jetë dhe karrierë. Drejtësia e barabartë do të thotë që gratë nuk janë vetëm votuese, por edhe vendimmarrëse. Do të thotë përfaqësim i barabartë në politikë, lidership, në institucione publike dhe pjesëmarrje kuptimplote në formësimin e së ardhmes së vendit tonë. Sepse një demokraci nuk mund të jetë e fortë nëse gjysma e popullsisë së saj është e nënpërfaqësuar”, tha ai në shënimin e Ditës Ndërkombëtare të Gruas – 8 Marsi, me temën globale të këtij viti: “Të Drejta, Drejtësi, Veprim”, organizuar nga Agjencia për Barazi Gjinore, në kuadër të Zyrës së Kryeministrit të Republikës së Kosovës.

Kurti shtoi se drejtësia e barabartë nënkupton tolerancë zero për dhunën me bazë gjinore, zbatim të urdhrave mbrojtës, mbështetje për të mbijetuarat dhe përgjegjësi për autorët e dhunës, si dhe barazi në paga dhe qasje në shërbime shëndetësore.

“Do të thotë tolerancë zero për dhunën me bazë gjinore, jo vetëm deklarata, por urdhra mbrojtje, të drejta të zbatuara. Autorët e dhunës mbahen përgjegjës, të mbijetuarat mbështeten me ndihmë ligjore të qasshme dhe strehimore me mundësi ekonomike. Do të thotë ligje pune që garantojnë pagë të barabartë për punë të barabartë, kujdes shëndetësor që respekton dinjitetin e grave dhe ligji për familjen që mbron barazinë, si dhe institucione drejtësie të lira nga paragjykimi dhe nga ndikimi. Drejtësia e barabartë nuk është vetëm një çështje e grave, është një masë e demokracisë sonë, rrugës sonë evropiane dhe e të ardhmes sonë.

Pra do të thotë që të drejtat e shkruara në letër duhet të zbatohen në praktikë. Gjatë mandatit tonë fuqizimi i grave dhe i vajzave ka qenë prioritet konkret, me politika, buxhet dhe me rezultate të matshme”, tha ai.

Anëtarja e Lëvizjes Vetëvendosje, Arbërie Nagavci, ka thënë se sot do ta dërgojnë në Kushtetuese dekretin për shpërndarjen e Kuvendit, i shpallur nga Presidentja e Kosovës Vjosa Osmani.

Kështu ka thënë Nagavci, kur është pyetur se pse ende ky dekret nuk është dërguar në Gjykatën Kushtetuese.

“Jemi në finalizim të shkresave, sot gjatë ditës e dërgojmë…një është dërgu vetëm tashmë”, ka thënë Nagavci për Kallxo.com

Presidentja e Kosovës, Vjosa Osmani, të premten ka nxjerrë dekretin për shpërndarjen e Kuvendit të premten.

Në seancën e jashtëzakonshme të së enjtes vonë, të mbajtur veç pak orë para skadimit të afatit kushtetues për zgjedhjen e presidentit, Kuvendi e ka ndalur procesin e zgjedhjes, si pasojë e mungesës së kuorumit të nevojshëm.

Një ushtar i shtatë amerikan është vrarë gjatë luftës në Iran, njoftoi Komanda Qendrore e SHBA-së.

Ushtari vdiq nga plagët e marra gjatë sulmeve fillestare të Iranit në të gjithë Lindjen e Mesme.

“Ushtari u plagos rëndë në vendin e një sulmi ndaj trupave amerikane në Mbretërinë e Arabisë Saudite”, thuhet në një deklaratë.

Identiteti i ushtarit do të mbahet i fshehtë deri në 24 orë pasi të jenë njoftuar të afërmit e tij më të afërt.

CENTCOM Update

TAMPA, Fla. – Last night, a U.S. service member passed away from injuries received during the Iranian regime’s initial attacks across the Middle East. The service member was seriously wounded at the scene of an attack on U.S. troops in the Kingdom of Saudi Arabia…

— U.S. Central Command (@CENTCOM) March 8, 2026

Të shtunën, presidenti amerikan, Donald Trump, mori pjesë në kthimin e trupave të gjashtë amerikanëve të parë të vrarë në luftë, në një ceremoni solemne dhe të qetë në Bazën Ajrore të Doverit në shtetin e Delaware.

Gjashtë rezervistë të Ushtrisë Amerikane u vranë pas një sulmi me dron iranian në portin e Shuaiba në Kuvajt të dielën.

Nafta vazhdoi rritjen e fundit të dielën, duke arritur në 100 dollarë për fuçi për herë të parë që nga korriku i vitit 2022, dhe më pas u rrit edhe më shumë, ndërsa efektet zinxhir nga lufta e SHBA-së dhe Izraelit kundër Iranit vazhduan të godasin tregjet globale.

Kontratat për blerje/shitje në të ardhmen për naftën bruto amerikane u rritën me më shumë se 25%, duke arritur në gati 115 dollarë për fuçi, ndërsa Brent, standardi ndërkombëtar i çmimeve të naftës, u rrit me më shumë se 20%, në rreth 110 dollarë për fuçi, shkruan sot NBC News.

Kërcimi i jashtëzakonshëm i naftës ndodhi edhe pse javën e kaluar ajo kishte shënuar një rritje rekord prej 35%.

Krahas kësaj, edhe çmimet me pakicë të benzinës në SHBA u rritën ndjeshëm, duke arritur në një mesatare kombëtare prej mbi 3.45 dollarë për gallon.

Herën e fundit që çmimet e naftës dhe gazit u rritën në nivele të tilla ishte menjëherë pasi Rusia pushtoi Ukrainën në shkurt të vitit 2022.

Presidenca e Republikës së Kosovës ka reaguar ashpër ndaj gjuhës së përdorur në debatet politike ku është bërë thirrje për “pushkatim” të Vjosa Osmani, duke e cilësuar këtë si nxitje të rrezikshme për dhunë dhe jo si kritikë apo opinion politik.

Në reagimin zyrtar thuhet se përdorimi i termit “pushkatim” në debat publik nuk përbën mendim politik, por një gjuhë që nxit urrejtje dhe normalizon dhunën në politikë.

“Kur në debat politik përdoret fjala ‘pushkatim’, kjo nuk ka të bëjë me kritikë apo opinion, por me një gjuhë të rrezikshme që nxit urrejtje dhe normalizon dhunën politike,” thuhet në reagimin e Presidencës.

Sipas Presidencës, Kosova nuk duhet të jetë vend ku aktivistë politikë vetëshpallen gjykatës dhe shpallin dënime me jetë ndaj figurave të zgjedhura nga qytetarët. Në reagim theksohet se një mentalitet i tillë ka dëmtuar për dekada debatin publik përmes etiketimeve, shpifjeve dhe linçimeve.

Presidentja Osmani nuk është ‘vegël’ e askujt dhe as pjesë e fantazive konspirative për kinse tradhti. Ajo është Presidente e Republikës së Kosovës, e zgjedhur në mënyrë legjitime dhe që ushtron mandatin e saj mbi bazën e Kushtetutës,” thuhet më tej në deklaratë.

Në reagim theksohet se ata që përdorin akuza për “tradhti” dhe bëjnë thirrje për “pushkatim” në fakt po nxisin dhunë dhe vrasje politike.

“Thirrjet për ‘pushkatim’ nuk janë retorikë politike, por nxitje e drejtpërdrejtë për dhunë dhe krim,” thekson Presidenca.

Në fund, Presidenca e Republikës së Kosovës u bën thirrje organeve të rendit dhe drejtësisë që të trajtojnë urgjentisht këto raste në përputhje me ligjin.

Gjatë javës që lamë pas, policia në Prishtinë në lokacione të ndryshme dhe aksione të ndara, karealizuar 210 urdhëresa të gjykatës, prej tyre 32 urdhëresa për vepra penale, ndërsa të tjerat për kundërvajtje, seanca, verifikime etj.

Në njoftimin zyrtar theksohet se në përputhje me urdhëresat, pas përfundimit të procedurave policore, personat e dënuar me burgim janë dërguar për vuajtje të dënimit, ndërsa personat e dënuar me gjobë, janë liruar, pasi të njëjtit kanë kryer obligimet e caktuara në urdhëresa, transmeton Klankosova.tv.

Aktivitetet policore janë shtrirë edhe në segmente të tjera të sigurisë. Kësisoj në harkun e njëjtë kohor janë sekuestruar katër armë zjarri të llojeve dhe kalibrave të ndryshëm, si dhe municione të llojeve dhe kalibrave të ndryshëm.

Në po të njëjtën periudhë kohore, kanë rezultuar me shqiptimin e 5185 masave administrative me gjobë për lloje të ndryshme të kundërvajtjeve dhe shkeljeve të kodit rrugor, prej tyre 578 të evidentuara nga vetura inteligjente dhe vetura me radar mobil.

Pas gati 20 vitesh, shërbimi i detyrueshëm ushtarak po kthehet sot në Kroaci, i cili do të zgjasë dy muaj, dhe ushtarët, për momentin, do të vendosen në tre kazerma, në Knin, Slunj dhe Pozhegë.

Në grupin e parë të të rinjve, të cilët kanë mbushur ose janë më të vjetër se 18 vjeç, janë 800 prej tyre që do të kalojnë nëpër stërvitjen e detyrueshme ushtarake.

Gjatë stërvitjes së detyrueshme ushtarake, ata do të marrin një pagë në vlerë prej rreth 1100 eurosh neto, dhe do t’u njihen gjithashtu dy muaj shërbim. Pas stërvitjes ushtarake, ata mund të zgjedhin të qëndrojnë në ushtrinë profesionale.

Kroacia hoqi shërbimin e detyrueshëm ushtarak në vitin 2007 dhe po rikthehet pas pothuajse 20 vitesh. Deri në 4,000 rekrutë do të thirren në Forcat e Armatosura Kroate për çdo vit.