Category: Lajme

Kreu i Partisë Demokratike Sali Berisha ka reaguar këtë të martë pas votimit me 79 vota pro në seancën plenare të Kuvendit, me votat e mazhorancës lidhur me rezolutën për të shpallur Iranin vend sponsor të terrorizmit.

Berisha në deklaratën e shpërndarë thotë se Partia Demokratike mbështet përpjekjet e SHBA-së dhe Izraelit për përmbysjen e diktaturës mizore teokratike të Ajatollahëve.

Deklarata e Partisë Demokratike të Shqipërisë:

Partia Demokratike e Shqipërisë shpall Gardën Revolucionare të regjimit diktatorial të Teheranit si organizatë terroriste. Ajo e cilëson shtetin obskurantist të Ajatollahëve si sponsorin kryesor të terrorizmit në botë dhe një kërcënim madhor për paqen dhe stabilitetin në Lindjen e Mesme dhe kudo në glob.

Partia Demokratike e Shqipërisë dënon me forcën më të madhe sulmet e Teheranit ndaj vendeve të Gjirit Persik, Arabisë Saudite, Emirateve të Bashkuara Arabe, Katarit, Kuvajtit, Bahrejnit dhe vendeve të tjera mike të Shqipërisë dhe ju shpreh ketyre vendeve solidaritetin e saj të plotë.

Partia Demokratike mbështet përpjekjet e SHBA-së dhe Izraelit për përmbysjen e diktaturës mizore teokratike të Ajatollahëve dhe zëvendësimin e këtij regjimi me një qeveri të zgjedhur nga populli si një kontribut madhor për çlirimin e popullit iranian, si dhe për garantimin e paqes dhe stabilitetit në rajon e më gjerë.

Deputeti i Partisë Demokratike të Kosovës, Artan Behrami, i është përgjigjur asaj që Bashkimi Evropian e cilësoi si befasi, kur iu referua reagimit të këtij subjekti politik lidhur me çështjen e Ligjit për të huajt.

Behrami thotë se PDK-ja është viktima më e madhe e dialogut, bashkëpunimit dhe lojalitetit ndaj Perëndimit, kurse sipas tij Vetëvendosje është përfituesja më e madhe nga konfrontimi, nga dhuna politike dhe nga besëprerja ndaj Perëndimit.

“PDK-ja është viktima më e madhe e dialogut, bashkëpunimit dhe lojalitetit ndaj Perëndimit. Ndërsa VV-ja është përfituesja më e madhe nga konfrontimi, nga dhuna politike dhe nga besëprerja ndaj Perëndimit. Andaj, mos u befasoni me një standard që vetë e keni legjitimuar. Me negociatat sekrete dhe pranimin e strukturave paralele, Kurti ka vendosur themelet e jetësimit të Zajednicës. Ajo, bazuar në marrëveshjen e Ohrit, parasheh autonomi territoriale për veriun dhe eksteritorialitet për kishat ortodokse serbe”, ka shkruar ai.

Ali Larijani, kreu i Këshillit të Sigurisë Kombëtare të Iranit për të cilin ministri izraelit i Mbrojtjes Israel Katz tha se u “eliminua” të hënën mbrëma, ishte shfaqur si një nga figurat më të rëndësishme në Iran muajt e fundit, shkruan CNN.

Fillimisht ai u pa si një lider i rëndësishëm në shtypjen e protestave popullore në janar dhe më pas si pjesë e tranzicionit që pasoi vdekjen e Udhëheqësit Suprem Ali Khamenei.

67-vjeçari kishte një lidhje të gjatë me Gardën Revolucionare Islamike të Iranit (IRGC) dhe ishte bërë një simbol i dukshëm i regjimit – madje mori pjesë edhe në një tubim publik javën e kaluar në Teheran pavarësisht se ishte objektiv kryesor për Izraelin.

Larijani ka manovruar me aftësi në politikën e Republikës Islamike – duke shërbyer në role të ndryshme. Ai ishte komandant në IRGC gjatë luftës me Irakun në vitet 1980 përpara se të kalonte në role politike.

Larijani ka shërbyer si drejtues i transmetuesit shtetëror, kryenegociator bërthamor i Iranit dhe kryetar i parlamentit të Iranit (për 12 vjet deri në vitin 2020) – dhe gjithnjë e më shumë kishte besimin e Khameneit për çështje sigurie pas emërimit të tij si këshilltar në vitin 2004.

Pas konfliktit të vitit të kaluar me Izraelin, ai u rikthye në skenë si kreu i Këshillit të Sigurisë Kombëtare, duke u konsideruar nga shumë analistë si vendimmarrësi kryesor i Iranit.

Larijani vjen nga një familje klerikale me ndikim në Republikën Islamike. Një nga vëllezërit e tij, Sadegh, është Ajatollah dhe ish-kreu i gjyqësorit të Iranit.

Ai ishte gjithashtu një akademik i njohur. I trajnuar fillimisht në matematikë dhe shkenca kompjuterike në Universitetin e Teknologjisë Sharif, ai ka doktoraturë në filozofi nga Universiteti i Teheranit dhe ka shkruar gjerësisht për veprën e filozofit gjerman Immanuel Kant.

Analistët thonë se megjithëse Larijani shihej si pragmatist dhe jo si një ideolog i ashpër, ai ishte i përkushtuar ndaj mbijetesës së Republikës Islamike si nezam – ose sistemi i qeverisjes së Iranit.

Që nga fillimi i konfliktit Larijani ka provokuar shpesh Presidentin e SHBA-së Donald Trump dhe ka qenë thelbësor në hartimin e strategjisë së luftës së Iranit, sipas analistëve.

“Në dallim nga Shtetet e Bashkuara, (Irani) është përgatitur për një luftë të gjatë”, shkroi ai në X menjëherë pasi filloi konflikti.

Partia Social Demokrate e Kosovës gjatë ditës së sotme ka zhvilluar një aksion simbolik para objektit të Prokurorisë së Shtetit.

Në një prononcim për media gjatë aksionit, i pari i kësaj partie, Dardan Molliqaj është shprehur se Lëvizja Vetëvenodsje e ka kapur Prokurorinë.

Më tutje ai thotë se arsyeja kryesore se përse Albin Kurti e don postin e Presidentit është për shkak të mundësisë së kapjes së pozitës së Kryeprokurorit të Shtetit.

Një klip audio i publikuar dhe i parë nga “The Telegraph” zbulon se Mojtaba Khamenei ishte shënjestër e të njëjtit sulm që vrau të atin dhe anëtarë të tjerë të udhëheqjes së Iranit. Audio zbulon se ai kishte dalë jashtë “për të bërë diçka” pak para se raketat balistike izraelite “Blue Sparrow” të godisnin pallatin në orën 9:32 të mëngjesit sipas kohës lokale më 28 shkurt.

Një fjalim i mbajtur nga Mazaher Hosseini, shefi i protokollit për zyrën e Ali Khameneit, para klerikëve të lartë dhe komandantëve të Trupave të Gardës Revolucionare Islamike jepet rrëfimi i parë i detajuar i asaj që ndodhi brenda kompleksit të udhëheqësit suprem kur u qëllua.

Hosseini zbuloi se Mojtaba Khamenei u plagos në këmbë gjatë sulmeve, ndërsa gruaja dhe djali i tij u vranë menjëherë ndërsa kunatit të tij iu pre koka.

Trupi i Mohammad Shirazi, kreu i zyrës ushtarake të Khameneit, u “copëtua” gjithashtu. Vetëm “disa kilogramë mish” mund të përdoren për ta identifikuar atë, tha z. Hosseini në takimin, i cili u zhvillua më 12 mars në lagjen Kolhak të Teheranit.

Mojtaba Khamenei jetonte në të njëjtin kompleks me të atin në kryeqytetin iranian. Atje ndodhej gjithashtu një sallë fetare ku Ali Khamenei mbante fjalime, si dhe shtëpitë e fëmijëve të tjerë të Khameneit.

Më 28 shkurt, Ali Khamenei dhe zyrtarë të lartë të sigurisë u mblodhën për një takim kur raketat goditën kompleksin. Mohammad Pakpour, kreu i IRGC-së, Aziz Nasirzadeh, ministri i mbrojtjes i Iranit, dhe Ali Khamenei ishin mes viktimave.

Në regjistrim dëgjohet Hosseini duke thënë: “Ishte vullneti i Zotit që Mojtaba të dilte në oborr për të bërë diçka dhe pastaj të kthehej. Ai ishte jashtë duke u ngjitur lart kur ndërtesa u godit nga një raketë. Gruaja e tij, Haddad, vdiq menjëherë.”

Hosseini thotë se Mojtaba pësoi vetëm “një dëmtim të lehtë në këmbë”. Sipas Hosseinit, sulmet kishin në shënjestër disa vende brenda kompleksit të zyrave njëkohësisht dhe dukej se kishin për qëllim shfarosjen e të gjithë familjes Khamenei.

“Këta djaj kishin menduar të sulmonin vende të ndryshme brenda kompleksit të zyrave – njëra prej tyre ishte rezidenca e udhëheqësit suprem”, tha ai. “Ata e goditën këtë vendndodhje me tre raketa.”

Shtëpia e Mojtabës në katin e sipërm u dëmtua gjithashtu, si dhe rezidenca poshtë, e cila i përkiste kunatit të tij, Misbah al-Huda Bagheri Kani dhe shtëpia e vëllait të tij, Mustafa, dhe gruas së tij.

Ndër të tjera, Hosseini thotë: “Armiku e dinte se teksa po godisnin Udhëheqësin Suprem, po e godisnin edhe atë, sepse e dinin se ai do të zëvendësonte ata që ishin vrarë dhe, kur të emëroheshin komandantë të rinj, do të kishin mundësinë të ndikonin te protestuesit. E bënë copë-copë. Nuk gjetën asgjë prej tij dhe në fund gjetën disa kilogramë mish dhe e identifikuan si trupin e tij.”

Ministri i Punëve të Brendshme, Xhelal Svecla bashkë me kryetarin e Komunës së Mitrovicës së Jugut kanë bërë homazhe pranë pllakës përkujtimore për viktimat e trazirave të Marsit.

Nga komuna njoftojnë se u rikutjua dhimbja e madhe e humbjes tragjike, ngjarje që tronditi gjithë vendin.

Njoftimi i komunës:

Përkujtohen “3 Lulet e Çabrës” në 22-vjetorin e tragjedisë

Kryetari i Komunës, z. Faton Peci, së bashku me Ministrin e Punëve të Brendshme, z. Xhelal Sveçla, dhe Nënkryetarin, z. Enis Osmani, sot kanë bërë homazhe pranë pllakës përkujtimore në nderim të Egzon Deliut (13 vjeç), Avni Veselit (12 vjeç) dhe Florent Veselit (9 vjeç).

Kryetari z. Faton Peci, ka bërë të ditur se 4 fëmijët nga fshati Çabër, teksa po e shijonin fëmijërinë e tyre, një grup serbësh të organizuar lojën ua ndaluan në gjysmë dhe lumturinë ua shuan. Ata u ndoqën deri në lumin Ibër, ku nga frika u hodhën dhe prej nga aty i gjallë doli vetëm njëri prej tyre, Fitim Veseli.

Në këtë përvjetor, u rikujtua dhimbja e madhe e humbjes së tyre tragjike, një ngjarje që tronditi gjithë vendin dhe mbetet plagë e hapur për shoqërinë tonë.

Kujtimi për ta mbetet i gjallë dhe bëhet thirrje e vazhdueshme për drejtësi.

Shefi i sigurisë së Iranit, Ali Larijani, është vrarë, tha ministri i mbrojtjes i Izraelit, raporton Reuters.

Larijani është lideri më i lartë iranian i vrarë që nga fillimi i sulmeve të përbashkëta SHBA-Izrael më 28 shkurt, të cilat vranë ish-Udhëheqësin Suprem Ali Khamenei.

Drejtori për Ballkanin Perëndimor, Turqinë, Këshillin e Evropës dhe OSBE-në në Ministrinë e Punëve të Jashtme të Gjermanisë, Michael Reiffenstuel, në një postim në platformën X, pas fillimit të zbatimit të Ligjit për të Huajt në Kosovë me masa shtesë, theksoi se është koha për zbatimin e plotë të marrëveshjeve të Brukselit/Ohrit, transmeton Paparaci.

“Ne vlerësojmë përpjekjet e përfaqësuesit special të BE-së Sorensen dhe falënderojmë të gjithë ata që janë angazhuar në mënyrë konstruktive për të siguruar funksionimin e vazhdueshëm të shërbimeve publike në Kosovë. Gjithashtu, përshëndesim dhe mbështesim plotësisht përpjekjet për të shfrytëzuar momentumin e ri në dialog për zbatimin e plotë të marrëveshjeve të Brukselit/Ohrit”, ka shkruar Reiffenstuel.

Ai në postimin e tij në rrjetin social rikujtoi deklaratat e Kaja Kallas të 14 marsit, e cila theksoi se “Marrëveshja për Evidencën Civile dhe Ligjin për të Huajt përbën një hap të rëndësishëm përpara në dobi të të gjithë qytetarëve në Kosovë”.

“Është e domosdoshme të sigurohet vazhdimësia në ofrimin e shërbimeve publike”, ka deklaruar Kallas.

Pjesëtarët e KFOR-it nga Komanda Rajonale Lindje organizuan në kampin Bondsteel një demonstrim të kapaciteteve për luftimin e sistemeve ajrore pa pilot (CUAS), për zyrtarë të lartë ushtarakë të kësaj komande.

Siç është bërë e ditur nga KFOR-i, gjatë ngjarjes u prezantuan pajisjet dhe kapacitetet që përdoren për zbulimin dhe reagimin ndaj mjeteve ajrore pa pilot, ndërsa qëllimi i aktivitetit ishte gjithashtu forcimi i ndërveprueshmërisë ndërmjet forcave shumëkombëshe që marrin pjesë në këtë mision, transmeton Paparaci.

Ata shtuan se pjesëtarët e KFOR-it vazhdojnë të monitorojnë situatën e sigurisë dhe të kontribuojnë në stabilitetin në të gjithë rajonin.

“Ky aktivitet pasqyron gjithashtu përkushtimin e vazhdueshëm të KFOR-it për të siguruar një mjedis të sigurt dhe të qetë për të gjithë njerëzit që jetojnë në Kosovë”, thuhet nga misioni i NATO-s në Kosovë.

Edhe këtë herë theksuan se KFOR-i vazhdon të punojë në koordinim të ngushtë me Policinë e Kosovës dhe EULEX-in.

“Për të kontribuar në një mjedis të sigurt për të gjithë njerëzit që jetojnë në Kosovë dhe në lirinë e lëvizjes në çdo kohë dhe në mënyrë të paanshme, KFOR-i punon në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit (EULEX) në rolet e tyre përkatëse si forca të sigurisë”, thuhet nga KFOR-i.

Kuba ndodhet prej pak ditësh pa energji elektrike. Kompania shtetërore e energjisë njoftoi lajmin se dy të tretat e ishullit të Karaibeve mbetën pa energji elektrike, duke shkaktuar protesta të dhunshme antiqeveritare që përfshiu qytetet kryesore, përfshirë kryeqytetin, Havana.

“Shkëputja e plotë” e sistemit elektrik të vendit, siç thuhej në deklaratën e kompanisë kubaneze, është rezultat i embargos së ashpër të naftës të vendosur nga Shtetet e Bashkuara, pikërisht për të ushtruar presion mbi qeverinë dhe për të kthyer popullin kundër establishmentit.

Për javë të tëra, rrugët e Kubës kanë qenë të mbushura me protesta kundër politikës dhe Partisë Komuniste, e cila pa zyrën e saj të digjej në qytetin e Moronit.

Cacerolazo en Nuevo Vedado, La Habana. Todos somos Morón ahora mismo pic.twitter.com/seINxTQPmX

— Yoani Sánchez (@yoanisanchez) March 15, 2026

“Unë vërtet besoj se do të kem nderin të pushtoj Kubën”. Me këto fjalë, Donald Trump iu rikthye çështjes së ishullit të Karaibeve, duke mos i fshehur ambiciet e reja të Shtëpisë së Bardhë.

“Do të ishte fantastike. Është një nder i madh. Mund ta çliroj ose ta pushtoj: mendoj se mund të bëj çfarë të dua”.

Sipas “New York Times”, Shtëpia e Bardhë ka urdhëruar tashmë presidentin kuban, Miguel Díaz-Canel të tërhiqet dhe të japë dorëheqjen për të lejuar që negociatat të përparojnë mbi të ardhmen e ishullit.

Megjithatë, sipas rrjedhjeve të informacionit, dorëheqja e udhëheqësit nuk do të rezultonte në humbje të pushtetit për Partinë Komuniste.

Ndërprerjet e energjisë u shkaktuan nga një “mbyllje e plotë e rrjetit kombëtar të energjisë elektrike”, tha në një deklaratë Unioni Kombëtar i Energjisë Elektrike i Kubës, duke shtuar se puna ka filluar për të rivendosur energjinë elektrike.

Por pas javësh errësire, është e vështirë të parashikohet se kur dritat do të ndizen përsëri në ishull. Për momentin, energjia elektrike u garantohet vetëm atyre që mund të përballojnë gjeneratorët.

Të premten, presidenti Miguel Díaz-Canel, zbuloi se ishulli nuk kishte marrë furnizime me naftë për më shumë se tre muaj.

Energjia furnizohej nga energjia diellore, gazi natyror dhe termocentralet. Megjithatë, sistemi ishte i mbingarkuar pikërisht për shkak të mungesës së naftës bruto, duke e detyruar qeverinë të shtynte operacionet për dhjetëra mijëra njerëz.

Kapja e presidentit venezuelan, Nicolas Maduro më 3 janar nga forcat speciale amerikane, rezultoi fatale për Kubën.

Havana, në fakt, mbështetej te Karakasi për 50-60% të naftës së saj bruto të importuar. Pa të, Havana nuk mund të mbijetojë, përveç nëse arrin një marrëveshje me Uashingtonin, siç e konfirmoi vetë presidenti kubanez.