Category: Lajme

Një rast i rëndë i dhunës në familje është regjistruar në rrugën “Marije Shllaku” në Pejë, ku një i ri dyshohet se ka ushtruar dhunë fizike ndaj nënës së tij.

Ngjarja ka ndodhur më 23 mars rreth orës 11:00, kur Policia ka pranuar informacion dhe ka dalë menjëherë në vendin e ngjarjes, ku janë takuar viktima dhe i dyshuari.

Bëhet fjalë për Gj. A., i cili sipas deklarimit të viktimës – nënës së tij, P.A., ka ushtruar dhunë fizike ndaj saj në mënyrë të vazhdueshme, duke e goditur me shuplaka dhe grushte në pjesë të ndryshme të trupit.

Viktima ka refuzuar trajtimin mjekësor dhe, pavarësisht rastit, ka vendosur të kthehet në shtëpinë e saj.

Sipas informacioneve, i dyshuari vuan nga probleme të shëndetit mendor dhe pas ekzaminimit nga psikiatri nuk ka qenë në gjendje të japë deklaratë.

Në lidhje me rastin janë njoftuar Qendra për Punë Sociale dhe Mbrojtësi i Viktimave, ndërsa me urdhër të Prokurorit të Shtetit, i dyshuari është ndaluar për 48 orë.

Ai është dërguar në repartin neuropsikiatrik të Spitalit në Pejë, ku ndodhet nën përkujdesjen e zyrtarëve policorë.

Hetimet janë në zhvillim.

Një inspektor i Inspektoratit Policor të Kosovës (IPK) është plagosur me armë zjarri të hënën mbrëma rreth orës 21:00 në Rrugën “B” në Prishtinë.

Sipas informacioneve fillestare, incidenti ka nisur si një konflikt verbal mes zyrtarit dhe një personi tjetër, i cili më pas ka eskaluar në të shtëna me armë. Policia ka dalë menjëherë në vendin e ngjarjes dhe ka konfirmuar plagosjen e një personi.

I plagosuri është dërguar në Qendrën Emergjente, ku sipas mjekëve ndodhet në gjendje stabile dhe jashtë rrezikut për jetë. Pas trajtimit fillestar, pritet të transferohet në Klinikën e Ortopedisë.

Autoritetet kanë bërë të ditur se rasti nuk ka lidhje me detyrën zyrtare të inspektorit. Ndërkohë, i dyshuari për sulmin është identifikuar dhe është në kërkim nga policia.

“Rreth orës 21:00 kemi marrë informatën për të shtëna me armë zjarri,në rrugën “B” në Prishtinë. Njësitet policore menjëherë kanë dalë në vendin e ngjarjes, nga ku është raportuar se një person është plagosur. Personi i plagosur, (mashkull), është dërguar për trajtim mjekësor. Aktualisht policia ka nisë një hetim për zbardhjen e rasrit ndërkohë që janë në kërkim të personit të dyshuar i cili tashmë është identifikuar”, njoftoi Flora Ahemeti nga policia.

Policia dhe Prokuroria kanë nisur hetimet për zbardhjen e plotë të rrethanave të këtij rasti.

Nga IPK është bërë e ditur se incidenti nuk lidhet me detyrën zyrtare, ndërsa Policia dhe Prokuroria kanë nisur hetimet dhe janë në kërkim të të dyshuarit të identifikuar.

“IPK ju konfirmon se nê incidentin e raportuar sot rreth orës 21:00 në rrugën “B” në Prishtinë është plagosur një zyrtar i IPK-së. Incidenti nuk ndërlidhet me detyrën zyrtare. Aktualisht policia dhe Prokuroria kanë filluar një hetim për zbardhjen e rastit, ndërkohë që janë në kërkim të personit të dyshuar i cili tashmë është identifikuar”, tha Arbër Beka nga IPK.

Anik Avdullah Babatinca, 17 vjeç, i cili vdiq pas një aksidenti tragjik në Gjermani, do të varroset sot.

Kështu kanë bërë të ditur familjarët e të ndjerit, teksa shtuan se Aniku do varroset në fshatin Pogragjë në Gjilan.

Sipas familjarëve, ceremonia e varrimit nis në orën 15:13, ndërsa e pamja do të mbahet nga dita e enjte deri të shtunën në Podujevë, në shtëpinë e familjes Babatinca.

Një fëmijë trevjeçar ka vdekur në Gjermani pak ditë pasi ka rënë në lumin Sieg River. Sipas RTL.de, vogëlushi ishte në koma që nga dita kur ra në lumë, por fatkeqësisht i njëjti ndërroi jetë sot pasi mjekët nuk arritën ta shpëtonin.

Ngjarja ka ndodhur më 17 mars në Siegen, derisa Peja në Fokus raporton se fëmija me iniciale Z.K., është me prejardhje nga Peja.

Sipas RTL.de, fëmijët nga një çerdhe kishin dalë për aktivitet pranë ujit, nën mbikëqyrjen e disa edukatorëve. Siç tha “German Red Cross”, që menaxhon institucionin, gjithsej tetë kujdestarë po përkujdeseshin për 46 fëmijë.

Në një moment u vu re mungesa e trevjeçarit. Kujdestarët nisën menjëherë kërkimet dhe e gjetën pas pak kohe në lumë, nga ku e nxorën. Ekipet emergjente e reanimuan në vendngjarje dhe më pas ai u dërgua në spital në gjendje kritike. Policia kishte deklaruar se nuk kishte indikacione për ndonjë vepër të qëllimshme dhe rasti po trajtohej si aksident tragjik.

Pas gati një jave në gjendje të rëndë, sot u konfirmua lajmi i rëndë se trevjeçari ndërroi jetë në spital në orët e pasdites.

Sot është një ditë tejet e veçantë për kryeministrin e Kosovës, Albin Kurti.

Më 24 mars shënohet ditëlindja e tij, ndërsa sot Kurti mbushi plot 51 vjet jetë.

Ditëlindja e tij lidhet edhe me një ngjarje historike të Kosovës, ditën kur nisën edhe bombardimet e NATO-s mbi caqet serbe, në vitin 1999, 24 vjet pasi lindi ai.

Sot bëhen 28 vjet nga zhvillimi i betejës së Ushtrisë Çlirimtare të Kosovës në Gllogjan, që ndryshe njihet “Epopeja e Dukagjinit” e zhvilluar me 24 mars 1998.

Në Gllogjan është zhvilluar beteja frontale mes UÇK-së dhe forcave serbe, të cilat e kishin rrethuar Gllogjanin.

Caku besohej të ishte shtëpia e familjes Haradinaj. Në këtë ditë ranë dëshmorë Him Haradinaj, Gazmend e Agron Mehmetaj.

E për nder të kësaj epopeje, komuna e Deçanit bashkë me OVL-UÇK-në organizojnë disa aktivitete.

Nga ora 11:00 do zhvillohen homazhe te Kompleksi Memorial “Dëshmorët e Kombit” në Gllogjan, për të vazhduar më pas me mbajtjen e manifestimit qendror të Epopesë së Dukagjinit nga ora 12:00.

Në ora 13:00 mbahet program artistik te Kulla e Haradinajve.

Sllovenia është bërë shteti i parë anëtar i BE-së që ka zbatuar racionimin e karburantit, për të përballuar krizën e shkaktuar nga sulmet e SHBA-së dhe Izraelit ndaj Iranit dhe kundërpërgjigjes së Iranit duke goditur fqinjët në Gjirin Persik – shumica prej tyre akterë kryesorë në tregjet globale të energjisë, raporton “BBC”.

Shumë vende kanë përjetuar rritje të mëdha të çmimeve të derivateve.

Në Slloveni, kjo ka çuar në të ashtuquajturin “turizëm të karburantit”, pasi shoferët nga vendet fqinje, veçanërisht nga Austria, kanë udhëtuar e mbushur veturat me karburant në Slloveni, për të përfituar nga çmimet më të lira.

Sipas masave të reja, drejtuesit privatë në Slloveni do të kufizohen në një blerje maksimale prej 50 litrash karburant në ditë. Bizneset dhe fermerët kanë një kufi më të lartë prej 200 litrash.

Disa shitës karburanti kanë vendosur tashmë masa të tyre. Kompania hungareze MOL, e cila operon stacione karburanti në të gjithë rajonin, ka vendosur një kufi prej 30 litrash.

“Më lejoni t’ju siguroj se ka mjaftueshëm karburant në Slloveni, depot janë plot dhe nuk do të ketë mungesë karburanti,” tha kryeministri i Sllovenisë, Robert Golob gjatë fundjavës.
Sipas masave të reja të Qeverisë së tij, kufizimet në nivel kombëtar do të zbatohen nga vetë pikat e karburantit, me punonjësit që duhet të sigurojnë se klientët nuk furnizohen mbi sasinë e lejuar.

Qeveria gjithashtu po inkurajon shitësit e karburantit që të vendosin kufizime më të rrepta për drejtuesit e huaj.

Çmimi për një litër benzinë “Euro-super 95” në Austri po i afrohet 1.80 euro, ndërsa dizeli është afër 2 euro. Në Slloveni aktualisht është i kufizuar në maksimum 1.47 euro dhe 1.53 euro përkatësisht, megjithëse pritet të rriten çmimet të martën.

Për disa shoferë austriakë, diferenca e çmimeve është e mjaftueshme për të justifikuar një udhëtim përtej kufirit.

Politikani i ekstremit të djathtë austriak Herbert Kickl, lideri i Partisë së Lirisë, ka përdorur udhëtimet e tij për furnizim si propagandë politike, duke postuar një foto të një radhe automjetesh me targa austriake që prisnin për t’u furnizuar në një pikë karburanti në Slloveni.

“A nuk është kjo e trishtueshme”, pyeti ai. “që jetojmë në një vend ku është bërë e nevojshme për shumë njerëz të shkojnë jashtë që jeta të jetë më e lirë?”

Disa sllovenë i shohin vizitorët si bezdi, duke shkaktuar radhë dhe mungesa për vendasit. Të tjerë, megjithatë, janë më mikpritës – duke theksuar se një pjesë e mirë e “turistëve të karburantit” e kthejnë këtë në një ditë të plotë, duke ngrënë në restorante lokale dhe duke bërë blerje.

Familja Brahimi nga Obiliqi ka njoftuar se sot do të varroset më i dashuri i tyre, Ilazi, i cili u vra të dielën në Majac të Podujevës.

Në postimin e një familjari thuhet se të ndjerit do t’i jepet lamtumira e fundit në varrezat e fshatit.

Ceremonia mortore do të nis nga ora 12:30.

Ndryshe, viktima u vra nga e dashura e tij, Ardita Gashi, e cila të dielën mbrëma e qëlloi edhe gruan e axhës së saj, 73-vjeçare, në rrethana.

E plagosura dhe vet e dyshuara, vdiqën të hënën në QKUK. Kjo e fundit u lëndua pasi e plagosi veten.