Category: Lajme

Lidhja Demokratike e Kosovës ka emëruar dy kryetarë komunash dhe një anëtar kryesie në tri pozita sekretarësh.

Kryetari i Istogut, Ilir Ferati është emëruar në pozitën e sekretarit të përgjithshëm, kurse kreu i Vitisë, Sokol Haliti nga sot do të jetë edhe sekretar për mërgatën.

Ndërkaq, anëtari i kryesisë, Visar Azemi është emëruar si sekretar organizativ.

Për këto ndryshime në strukturën udhëheqëse të LDK-së ka njoftuar kreu i saj, Lumir Abdixhiku.

“Këto emërime janë pjesë e fazës së konsolidimit organizativ dhe politik të Lidhjes Demokratike të Kosovës, në përputhje me orientimet të përcaktuara nga Kuvendi i fundit i partisë.”, ka thënë Abdixhiku.

Ai ka bërë të ditur se së shpejti do të prezantojë edhe përbërjen e re të Kryesisë së LDK-së.

Një projekt i ri madhor mjedisor, i financuar nga BE-ja, u nis sot zyrtarisht në Termocentralin “Kosova B” në Obiliq, duke shënuar një hap të rëndësishëm drejt përmirësimit të cilësisë së ujit në lumin Sitnicë dhe uljes së ndotjes industriale.

Si partneri më i fuqishëm i Kosovës dhe ofruesi më i madh i asistencës financiare, Bashkimi Evropian po investon 12 milionë euro në infrastrukturë për trajtimin e ujërave të ndotura në Kosova B.

Projekti do të zbatohet nga UNOPS dhe pritet të ndihmojë në uljen e ndotjes, përmirësimin e cilësisë së ujit dhe sjelljen e përfitimeve afatgjata për mjedisin dhe shëndetin publik të komuniteteve që jetojnë përgjatë lumit.

Ai përfshin ndërtimin e pesë impianteve për trajtimin e ujërave të ndotura dhe të një objekti për ruajtjen e kimikateve. Pasi të jetë funksionale, kjo infrastrukturë do të ndihmojë në uljen e shkarkimit të ujërave të patrajtuara në lumin Sitnicë, përmirësimin e trajtimit të efluenteve industriale dhe mbështetjen e përputhshmërisë me vlerat kufitare të emetimeve të BE-së dhe legjislacionin vendor.

Ceremonia e nënshkrimit të kontratës mblodhi përfaqësues të BE-së në Kosovë, UNOPS-it, KEK-ut, Ministrisë së Ekonomisë, Ministrisë së Mjedisit dhe Planifikimit Hapësinor, NIPAC-ut dhe Zyrës së Koordinatorit të Zhvillimit të OKB-së, duke nënvizuar rëndësinë e partneritetit në adresimin e sfidave mjedisore të Kosovës. Përfaqësuesit e qeverisë dhe të KEK-ut e mirëpritën këtë investim dhe falënderuan Bashkimin Evropian për mbështetjen.

Duke folur në ceremoni, Hubert Perr, Shef i Bashkëpunimit në BE në Kosovë, tha se ky projekt tregon përkushtimin e BE-së për të sjellë rezultate që kanë rëndësi për njerëzit në Kosovë: “Ne jemi partneri më i fuqishëm dhe më i besueshëm dhe duam të sjellim rezultate që kanë rëndësi për njerëzit, dhe duam t’i sjellim ato shpejt. Çfarë mënyre më të mirë për ta bërë këtë sesa me një program si ky, që lidh ekonominë me mjedisin dhe prek jetën e kaq shumë njerëzve në Kosovë.”

Ministrja e Ekonomisë, Artane Rizvanolli, tha: “Lumi Sitnicë prek më shumë se 400,000 banorë në disa komuna, gati një të katërtën e popullsisë së Kosovës. Kjo tregon sa i rëndësishëm është ky projekt dhe sa i gjerë do të jetë përfitimi i tij publik.”

Gramos Hashani, Drejtor Ekzekutiv i KEK-ut, tha: “Për herë të parë në funksionimin e Kosovës B, ujërat e ndotura do të trajtohen në një mënyrë plotësisht të integruar, të kontrolluar dhe të standardizuar.”

Përveç vetë infrastrukturës, projekti përfshin edhe ngritje të kapaciteteve dhe trajnim të stafit për të mbështetur funksionimin dhe mirëmbajtjen e objekteve të reja në vazhdimësi. Kjo do të ndihmojë që investimi të japë rezultate afatgjata dhe ta mbështesë KEK-un në funksionimin efektiv të sistemeve të reja.

Ky projekt është pjesë e mbështetjes më të gjerë të Bashkimit Evropian për mbrojtjen e mjedisit, infrastrukturën e qëndrueshme dhe përmirësimin e menaxhimit të ujërave të ndotura në Kosovë. Përmes këtij angazhimi të vazhdueshëm, BE-ja mbështet përpjekjet për të ulur ndotjen, për të forcuar standardet mjedisore dhe për të mbrojtur mirëqenien e komuniteteve në mbarë vendin.

Kryeministri i vendit, Albin Kurti, ka kujtuar të vrarit në masakrën e Lybeniqit të Pejës, duke thënë se, drejtësia për këtë krim në Serbi, është zvarritur dhe mjegulluar.

Kurti ka thënë se dëshmia më e madhe se sakrifica e martirëve u shndërrua në liri, në zhvillim dhe në një të ardhme më të ndritur për të gjithë, është fakti se Kosova, nga një vend i shkatërruar nga lufta, sot është një shtet që krijon mundësi dhe që u jep shpresë brezave të rinj.

‘’ Serbia, duke refuzuar të ballafaqohet me të kaluarën e saj, mbetet peng i saj, tokë e varrezave masive, e strehë e kriminelëve të luftës’’, ka shkruar Kurti.

Postimi:

Më 1 prill të vitit 1999, në agimin e një dite pranvere, forcat e armatosura të Serbisë rrethuan fshatin Lybeniq të Pejës. Në orën 07:00 të mëngjesit, pjesëtarë të njësitit “Çakejt”, në kuadër të njësitit “177” të ushtrisë jugosllave, bashkë me pjesëtarë të njësitit ushtarak të Mbrojtjes Territoriale, e sulmuan fshatin, me një plan të errët shfarosjeje.

Brenda pak çastesh, banorët u dëbuan nga shtëpitë e tyre, u mblodhën në mes të fshatit, pranë xhamisë. Gratë, fëmijët dhe të moshuarit u ndanë dhe u dëbuan, ndërsa 59 burrat u vranë me rafalë të pandalshëm armësh automatike.

Në Serbi, drejtësia për këtë krim është zvarritur dhe mjegulluar, një drejtësi e cunguar në një shtet gjenocidal.

Por përballë mohimit të tyre, qëndron e vërteta jonë. Përballë errësirës së djeshme, sot qëndron Kosova e lirë, demokratike që po punon të anëtarësohet në Bashkimin Evropian dhe në NATO.

Serbia, duke refuzuar të ballafaqohet me të kaluarën e saj, mbetet peng i saj, tokë e varrezave masive, e strehë e kriminelëve të luftës.

Ndërkohë, Republika e Kosovës po forcohet çdo ditë. Po rrisim kapacitetet mbrojtëse me ushtarë të rinj dhe një ushtri gjithnjë e më të përgatitur, po fuqizojmë Policinë dhe po avancojmë drejtësinë. Numri i hetimeve, aktakuzave dhe gjykimeve për krime lufte është në rritje, ndërsa dokumentimi i së vërtetës po bëhet nga Instituti i Krimeve të Kryera gjatë Luftës në Kosovë.

Shteti ynë u qëndron pranë familjeve të dëshmorëve dhe martirëve përmes përkushtimit institucional, përfshirë Ministrinë për Punë, Familje dhe Vlerat e Luftës Çlirimtare.

Nga një vend i shkatërruar nga lufta, sot kemi një shtet që krijon mundësi dhe që u jep shpresë brezave të rinj. Kjo është dëshmia më e madhe se sakrifica e martirëve u shndërrua në liri, në zhvillim dhe në një të ardhme më të ndritur për të gjithë.

Organizata AVONET ka reaguar përmes një komunikate lidhur me zhvillimet në sektorin e energjisë, duke shprehur shqetësim për dyshime serioze për manipulim me njehsorët elektrikë nga kompanitë KEDS dhe KESCO, si dhe faturim të padrejtë ndaj qytetarëve.

“Pas pranimint të disa informacioneve, nga burimet e sakta të informacionit, ne seriozisht dyshojmë se KEDS dhe KESCO duke keqpërdorur autorizimet që u janë dhënë përmes marrëveshjes së distribucionit të energjisë, ku kanë faturuar qytetarët me shuma marramendëse, që arrijnë miliona euro dëme, përmes njësorëve elektrikë përmes mashtrimit që ditëve të fundit është diskutuar shumë në hapësirën publike të Kosovës”, thuhet në komunikatë.

AVONET gjithashtu thekson dyshime për investime fiktive nga pronarët e lidhur me Çalık Holding dhe menaxhmenti i kompanive energjetike.

“Në bazë të informacioneve që posedojmë, pronarët e lidhur me Çalık Holding, përkatësisht z. Ahmet Çalık dhe z. Özdemir, së bashku me menaxhmentin e KEDS dhe KESCO, dyshohet se kanë paraqitur para institucioneve shtetrore investime fiktive, në kundërshtim me detyrimet kontraktuale të privatizimit të ish-distribucionit të KEK-ut.”

Në komunikatë ngrihen dyshime edhe për rolin e institucioneve rregullatore.

“Këto veprime nuk mund të kenë ndodhur pa dijeninë dhe mosveprimin e ZRRE, e cila ka kompetencë dhe detyrim eksluziv ligjor të monitoroj tregun e energjisë në Kosovë. Për këtë arsye, ekziston dyshim i arsyeshëm për përfshirje dhe bashkëpërgjegjësi institucionale në këtë skemë të dyshuar mashtrimi.”

Sipas AVONET-it, këto dyshime mbështeten nga analiza profesionale dhe paralajmërime të mëhershme të ekspertëve.

“Këto dyshime nuk janë thjeshtë spekulime të pa baza. Ato janë të mbështetura nga analiza profesionale dhe fakte konkrete të prezantuara publikisht nga ekspert të ndryshëm dhe ekspertë të tjerë të fushës, të cilët prej kohësh kanë paralajmëruar për këtë fenomen.”

Organizata shton se mosrealizimi i investimeve ka ndikuar në përkeqësimin e infrastrukturës energjetike.

“Në bazë të informacioneve dhe dyshimeve tona ne konsiderojme se investimet e obliguara nuk janë realizuar qëllimisht nga kompanitë e lartpërmendura, ku përmes skemave fiktive, me qëllim përfitimi financiar në kurriz të qytetarëve dhe bizneseve nuk janë kryer investimet në infrastrukturën energjetike.”

Në fund, AVONET përmend edhe dyshime për një skemë të ngjashme në sektorin financiar.

“AVONET sipas informacioneve që posedon dyshon se në të njëjtën kohë një mashtrim i ngjashëm nga po këto pronarë ka ndodhur nga një institucion financiar i licencuar nga Banka Qendore e Kosovës, ku për vite me radhë ka dëmtuar klientët përmes një sistemi të sofistikuar financiar.”

“Burime nga Banka Qendrore e Kosovës kanë konfirmuar jozyrtarisht se gjatë ushtrimit të kompetencave të tyre, përmes mbikqyrjes, të cilat kanë ardhur nga ankesat e personave të ndryshëm janë evidentuar një mori shkeljesh, që për nga natyra e mashtrimit janë të ngjashme sikurse dyshimet për mashtrim me njesorë të energjisë elektrike”, thuhet tutje.

Partitë kryesore politike në Kosovë ende nuk kanë bërë ndonjë lëvizje drejt arritjes së një marrëveshjeje të mundshme për zgjedhjen e presidentit të ri të vendit, pavarësisht se ka një javë që po rrjedh afati rreth njëmujor i vendosur nga gjykata më e lartë e vendit për këtë çështje.

Javën e kaluar, Gjykata Kushtetuese u dha ligjvënësve 34 ditë kohë për ta zgjedhur kreun e shtetit, në të kundërtën, vendi shkon në zgjedhje të parakohshme, që duhet të mbahen brenda 45 ditësh, raporton Radio Evropa e Lirë.

Presidentes së tanishme, Vjosa Osmani, i mbaron mandati më 4 prill dhe ligjvënësit kanë tani kohë deri më 28 prill për ta emëruar pasuesin e saj.

Megjithatë, që nga nxjerrja e aktgjykimit për këtë afat, kanë kaluar shtatë ditë, e veprime në drejtim të gjetjes së një zgjidhjeje apo arritjes së një marrëveshjeje për presidentin nuk janë parë në publik.

Burime të Radios Evropa e Lirë (REL) brenda dy partive më të mëdha opozitare, Partia Demokratike e Kosovës (PDK), dhe Lidhja Demokratike e Kosovës (LDK), konfirmuan se ende nuk kanë pranuar ftesë për takim nga kryeministri Albin Kurti, kryetari i partisë në pushtet, Lëvizjes Vetëvendosje.

Në PDK thanë se janë duke organizuar mbledhjen e Këshillit Drejtues dhe se në këtë organ “do të përcaktohen qëndrimet zyrtare të partisë në raport me zhvillimet politike në vend”.

“Pas këtij procesi të brendshëm, PDK-ja do të dal me një qëndrim të qartë dhe të unifikuar për hapat e mëtejmë”, tha një zyrtar nga kjo parti.

Dy ditë më parë, kryeministri Kurti paralajmëroi se do t’iu dërgojë ftesa liderëve të partive politike, por nuk tregoi se kur.

Ai shtoi se do ta bënte këtë pas “konsultimeve të brendshme”, pa dhënë më shumë hollësi.

“Sa është e rëndësishme që ta trajtojmë me urgjencë është e rëndësishme edhe që të kemi edhe sukses. Sepse, në fund të fundit, nuk do të matemi me përpjekjet që bëjmë, por me suksesin që e arrijmë”, theksoi Kurti më 30 mars.

Politologu Dritëro Arifi vlerëson për REL-in se Lëvizja Vetëvendosje duhet t’i tërheqë dy kandidatët e propozuar për president, Glauk Konjufcën e Fatmire Mullhaxha-Kollçakun, që të krijojë hapësirë për diskutime me partitë e tjera.

“Esenca është a do të dërgojnë sinjale paraprake, siç thashë me largimin e atyre kandidatëve. Ata duhet ‘të japin dorëheqje’ teknikisht, që krijohet hapësirë për negociata më serioze”, thekson Arifi, duke shtuar se kësisoj diskutimet do të mund të zhvilloheshin në frymë kompromisi.

Zgjedhja e presidentit të ri dështoi në fillim të muajit të kaluar pikërisht për shkak të mungesës së një marrëveshjeje mes partive.

Glauk Konjufca dhe Fatmire Kollçaku-Mullhaxha, nuk u hodhën fare në votim në mungesë të kuorumit.

Presidenti i Kosovës zgjidhet me dy të tretat e votave në dy rundet e para apo me 61 vota në rundin e tretë, por nevojiten 80 deputetë në sallë që seanca të mundë të mbahet.

Deputeti i Lëvizjes Vetëvendosje, Artan Abrashi, tha të mërkurën se çështja e zgjedhjes së presidentit varet nga takimet që do të zhvillohen.

Sipas tij, Vetëvendosje ka “vullnetin dhe gatishmërinë” që të gjejë një kompromis.

“Uroj që (përfaqësuesit e partive opozitare) do të reflektojnë pozitivisht dhe Kosova ta tejkalojë këtë krizë të panevojshme, e cila ka rrezik që të na çojë në zgjedhje, prapë po them të panevojshme”, tha Abrashi për agjencinë e lajmeve “EkonomiaOnline”.

Pas publikimit të aktgjykimit të Kushtetueses, kryetari i Lidhjes Demokratike të Kosovës, Lumir Abdixhiku, tha se përgjegjësia kryesore për çështjen e presidentit mbetet te shumica parlamentare.

“LDK mbetet e gatshme të kontribuojë në çdo përpjekje serioze për zgjidhje, që garanton stabilitet dhe funksionim normal të institucioneve. Por, njëkohësisht, nuk do të bëhet alibi e dështimeve të askujt”, tha ai.

Nëse presidenti i ri nuk zgjidhet deri më 4 prill, atëherë detyrën e presidentit do ta ushtrojë kryetarja e Kuvendit, Albulena Haxhiu.

Sipas Kushtetutës, posti i ushtruesit të detyrës së presidentit nuk mund të ushtrohet për një periudhë më të gjatë se gjashtë muaj.

Marrjen e detyrës nga Haxhiu, politologu Arifi e sheh si një nga arsyet pse Lëvizja Vetëvendosje është duke shtyrë nisjen e diskutimeve me partitë opozitare për zgjedhjen e presidentit.

Sipas tij, ndonëse të gjitha partitë politike deklarohen se janë të gatshme për zgjedhje, koha e mbajtjes së tyre mund të jetë më e përshtatshme për njërën palë se sa për tjetrën.

“Mendoj që në këtë rast partia në pushtet po luan me elementin kohë me qëllim që të krijoj presion por ndoshta edhe një zvarritjen e radhës për caktimin e datës së zgjedhjeve të jashtëzakonshme”, tha ai./REL

Në Liban, numri i njerëzve që kanë vdekur që nga fillimi i luftës më 28 shkurt tani është 1 mijë e 318,

Kështu ka bërë të ditur Ministria e Shëndetësisë atje, duke publikuar shifrat zyrtare, raporton BBC.

Sipas këtyre shifrave, 3 mijë e 935 persona të tjerë janë plagosur.

Ministria e Shëndetësisë ka bërë të ditur se në 24 orët e fundit kanë vdekur 50 persona.

Kryeministri i Republikës së Kosovës, Albin Kurti, priti në takim Shefin e Misionit të EULEX-it, Giovanni Pietro Barbano.

Në takim, u shpreh vlerësimi për punën e EULEX-it në Kosovë, me theks roli në monitorimin e institucioneve të drejtësisë dhe kontributi në avancimin e sundimit të ligjit.

Në këtë kontekst, pati dakordim se sfidat në sistemin gjyqësor vazhdojnë të jenë të pranishme, veçanërisht në aspektin e vonesave në trajtimin e rasteve, menaxhimit joefikas të tyre dhe mungesës së konsistencës në vendimmarrje. U theksua nevoja për reforma të thella që rrisin disiplinën, llogaridhënien dhe efikasitetin e gjyqësorit.

Palët u pajtuan që digjitalizimi është element kyç në dobi të transparencës dhe llogaridhënies së sistemit gjyqësor dhe prokurorial. Po ashtu, u theksua se është e domosdoshme që sistemi elektronik për menaxhimin e lëndëve të zbatohet nga çdo gjykatës dhe prokuror.

EULEX-i mbetet një partner i rëndësishëm për Kosovën në fushën e sundimit të ligjit.

Kryeministri riafirmoi përkushtimin e Qeverisë së Republikës së Kosovës ndaj ligjshmërisë e legalitetit dhe si rrjedhojë, vazhdimin e reformave që sigurojnë drejtësi efikase, transparente dhe llogaridhënëse.

Policia e Kosovës, me njësitet e saj nga Drejtoria për Bashkëpunim Ndërkombëtar Policor në koordinim dhe bashkëpunim me njësitet tjera relevante të policisë së Kosovës dhe institucionet e drejtësisë, me datë 01.04.2026 kanë bërë ekstradimin e shtetasit Kosovar B.Z. nga Zvicra për në Kosovë.

I dyshuari ishte arrestuar nga autoritetet zvicerane pasi që i njëjti kërkohej përmes Interpolit me letër rreshtim ndërkombëtar lëshuar nga institucionet e drejtësisë së Kosovës, për veprën penale “Mashtrim” dhe se i njëjti iu ishte shmangur drejtësisë.

“Ekstradimi u realizua bazuar në ligjet në fuqi dhe falë bashkëpunimit të ngushtë mes institucioneve të Republikës së Kosovës dhe atyre Zvicerane”.

“Policia e Kosovës do vazhdoj me shkëmbimin e informacioneve me institucionet vendore, shtetet dhe organizatat ndërkombëtare me qëllim të parandalimit, hetimit dhe zbulimit të aktiviteteve kriminale që ndërlidhen me hetimin e kryesve të veprave penale, si dhe aktivitete tjera në gjurmimin, kapjen-arrestimin e personave dhe grupeve kriminale që veprojnë brenda dhe jashtë vendit”, njofton Policia.

Visar Azemi , nga Lidhja Demokratike e Kosovës (LDK) në një konferencë për media ka njoftuar se do t’u drejtohet prokurorisë speciale lidhur me njehësorët elektrike, raporton Ekonomia Online.

Ai ka thënë se nëse Ministria e Industrisë dhe Tregtisë ka dalë me i heqë njehësorët elektrikë ku ka qenë më herët.

“Dhe sot pikërisht e mësuam se ku paska qenë edhe problemi dhe shtylla kryesore ku duhet me u bazuar i gjithë ky skandal. Pra shteti e paska pasur fjalën e vet, të cilën nuk e paska ushtruar asnjëherë. Nëse Ministria e Industrisë dhe Tregtisë sot paska dalë me i hequr njësorët elektrikë, atëherë pyetja e thjeshtë është: ku paskan qenë këta gjithë këto vite që nuk paskan reaguar? Të dy palët madje, edhe KEDS-i edhe Ministria, e konfirmojnë që kanë pasur ankesa prej qytetarëve. Pra paska pasur ankesa edhe në KEDS, edhe në Ministrinë e Industrisë dhe Tregtisë, po pse s’paskan reaguar? Pra, Ministria ka rregullore, e ka Agjencinë e Metrologjisë, i cili është rregullues i këtyre pajisjeve që matin. Pra nuk paskan bërë punën e vet, nuk kanë licencuar asnjë laborator të pavarur për me i bërë këto matje në formë të drejtë dhe të pavarur, dhe rrjedhimisht i kanë lejuar operatorët ekonomikë sikurse KEDS në këtë rast, me manipuluar me njësorë elektrikë. Pra shteti paska dështuar dhe mend paska reaguar vetëm kur ka plasur skandali nga ne. Pra, nuk pajtohem me qasjen e MINT-it në këtë rast, të ministrisë dhe të pushtetit, sepse këta po thonë që nga sot do t’i pranojmë edhe ankesat e qytetarëve dhe do ta marrim këtë çështje pak më me seriozitet. Pyetja është çka do të bëni me rastet të cilat janë manipuluar deri tash? Me të gjitha ato kërkesa të qytetarëve që nuk i keni adresuar deri tash?”, tha Azemi para medieve.

Ai bëri thirrje që organet kompetente t’i hetojnën të dy institucionet edhe KEDS edhe MINT.

“Ne thërrasim organet kompetente që t’i hetojnë edhe KEDS-in, edhe Ministrinë, sepse këtu kemi të bëjmë me një skandal super-serioz dhe super të madh. Pra nuk mundesh as KEDS-i e as Ministria me dalë me i tërhequr këta njësorë, sepse sot dy palët kanë tërhequr nga shtëpitë dhe banesat tona njësorë elektrikë, me pretenduar që janë raste të izoluara pa pasur një hetim të plotë nga organet e hetuesisë. Prandaj, unë me të drejtë po e them që në dështimin e shtetit në këtë rast, qytetarët janë penalizuar dhe edhe Ministria, edhe KEDS-i duhet me u hetuar deri në fund. Pra nuk po flasim për toleranca teknike, po flasim për skema të manipulimeve në shkallë të madhe të vendit. Mua në ditët në vazhdim nuk më mbetet gjë tjetër pos me i u drejtuar Prokurorisë së Shtetit, Prokurorisë Speciale, për KEDS-in dhe Ministrinë e Industrisë, në mënyrë që ky rast të gjejë zgjidhje sa më shpejt. Qytetarët e dëmtuar me të drejtë po kërkojnë kompensimin e tyre dhe kjo do të jetë ndoshta edhe kërkesa kryesore e këtij skandali të zbardhur. Po e përsëris: ku ishte shteti i cili nuk i mbrojti qytetarët e vet, e la KEDS-in me manipuluar me njësorë elektrikë dhe reagoi vetëm në momentin kur plasi skandali tyre nga ne” tha Azemi.

Kryeministri i vendit, Albin Kurti, ka kujtuar të vrarit në masakrën e Lybeniqit të Pejës, duke thënë se, drejtësia për këtë krim në Serbi, është zvarritur dhe mjegulluar.

Kurti ka thënë se dëshmia më e madhe se sakrifica e martirëve u shndërrua në liri, në zhvillim dhe në një të ardhme më të ndritur për të gjithë, është fakti se Kosova, nga një vend i shkatërruar nga lufta, sot është një shtet që krijon mundësi dhe që u jep shpresë brezave të rinj.

“Serbia, duke refuzuar të ballafaqohet me të kaluarën e saj, mbetet peng i saj, tokë e varrezave masive, e strehë e kriminelëve të luftës’’, ka shkruar Kurti.

Postimi:

Më 1 prill të vitit 1999, në agimin e një dite pranvere, forcat e armatosura të Serbisë rrethuan fshatin Lybeniq të Pejës. Në orën 07:00 të mëngjesit, pjesëtarë të njësitit “Çakejt”, në kuadër të njësitit “177” të ushtrisë jugosllave, bashkë me pjesëtarë të njësitit ushtarak të Mbrojtjes Territoriale, e sulmuan fshatin, me një plan të errët shfarosjeje.

Brenda pak çastesh, banorët u dëbuan nga shtëpitë e tyre, u mblodhën në mes të fshatit, pranë xhamisë. Gratë, fëmijët dhe të moshuarit u ndanë dhe u dëbuan, ndërsa 59 burrat u vranë me rafalë të pandalshëm armësh automatike.

Në Serbi, drejtësia për këtë krim është zvarritur dhe mjegulluar, një drejtësi e cunguar në një shtet gjenocidal.

Por përballë mohimit të tyre, qëndron e vërteta jonë. Përballë errësirës së djeshme, sot qëndron Kosova e lirë, demokratike që po punon të anëtarësohet në Bashkimin Evropian dhe në NATO.

Serbia, duke refuzuar të ballafaqohet me të kaluarën e saj, mbetet peng i saj, tokë e varrezave masive, e strehë e kriminelëve të luftës.

Ndërkohë, Republika e Kosovës po forcohet çdo ditë. Po rrisim kapacitetet mbrojtëse me ushtarë të rinj dhe një ushtri gjithnjë e më të përgatitur, po fuqizojmë Policinë dhe po avancojmë drejtësinë. Numri i hetimeve, aktakuzave dhe gjykimeve për krime lufte është në rritje, ndërsa dokumentimi i së vërtetës po bëhet nga Instituti i Krimeve të Kryera gjatë Luftës në Kosovë.

Shteti ynë u qëndron pranë familjeve të dëshmorëve dhe martirëve përmes përkushtimit institucional, përfshirë Ministrinë për Punë, Familje dhe Vlerat e Luftës Çlirimtare.

Nga një vend i shkatërruar nga lufta, sot kemi një shtet që krijon mundësi dhe që u jep shpresë brezave të rinj. Kjo është dëshmia më e madhe se sakrifica e martirëve u shndërrua në liri, në zhvillim dhe në një të ardhme më të ndritur për të gjithë.