Category: Lajme

Besnik Tahiri nga Aleanca për Ardhmërinë e Kosovës, ka kritikuar Vetëvendosjen dhe Albin Kurtin, duke thënë se ky i fundit po mundohet që ta bartë tek opozita përgjegjësinë për disa çështje.

Tahiri, po ashtu, ka thënë se Kurti po synon zgjedhjet për çështjen e presidentit, duke theksuar se deri më tani nuk ka asnjë veprim për zgjidhjen e kryetarit të shtetit.

Deputeti i AAK’së po ashtu ka deklaruar se AAK do ta votojë Byronë për Konfiskimin e Pasurisë, duke thënë se kjo byro le ta hetojë atë dhe Kurtin së pari.

‘‘Kryeministri u mundu me na e bartë përgjegjësinë neve di deputetët të opozitës, për çështje që janë saktësisht të qarta. Kanë kalu 8 ditë, nuk ka asnjë veprim se don me na çu deri në moment të fundit me bllokadën e njëjtë, e me i thirre edhe njëherë 1 milion qytetarë me dalë me votu. Është përgjegjësia e kësaj partie me gjet zgjidhje e jo me bart fajin e me sjell një kandidat të vet. AAK do ta votojë byronë për konfiskimin e pasurisë. I tham kryeministrit le të jam unë i pari, e ky i dyti, le ta na hetohet pasuria. E të këqyrim qysh u artrit ajo pasuri, sa kam unë e sa ka ky për shembull’’, ka deklaruar Tahiri.

Deputeti i PDK-së Artan Behrami ka folur lidhur me mos emërimin e anëtarit të dhjetë në KQZ-së nga presidentja Osmani të cilës vetëm veç së po i përfundon afati.

Behrami gjithashtu ka pasur një kërkesë drejtuar Osmanit, ”mos ia lë këtë në dorë një militanteje si Albulena Haxhiu”.

“Partia Demokratike e Kosovës ka kërkuar edhe njëherë nga presidentja Osmani që të emërojë të dytin në KQZ nga partia Demokratike e Kosovës sidomos pas vendimit të gjykatës kushtetuese prandaj ne presim që urgjentisht ajo edhe në frymën e këtij vendimi por edhe në frymën e argumentit që ne i kemi dhënë si parti të vendos për lirinë e dytë qe PDK duhet ta ketë patjetër në KQZ”, tha ai ndër të tjera.

Drejtoria e Inspekcionit në Komunën e Gjilanit ka nisur një aksion për largimin e reklamave të vendosura pa leje në hapësirat publike, si pjesë e angazhimeve për zbatimin e ligjit dhe mbrojtjen e rendit urban.

Sipas Drejtoratit për Inspekcion, një reklamë e madhe është hequr në rrugën “Nëna Tereze”, pranë rrugës së Prishtinës në qendër të qytetit, ndërsa aksioni përfshin edhe largimin e reklamave të tjera që ndodhen në zona të ndryshme.

“Inspektorët më 13 mars kishin vendosur shirita paralajmërues dhe njoftime në shtyllën e reklamës, duke informuar pronarin për pasojat e mundshme në rast mosveprimi. Reklama u hoq nga personat përgjegjës për vendosjen e saj,” njofton Drejtoria për Inspekcion.

Sipas zyrës për informim të komunës, aksioni do të vazhdojë deri në largimin e të gjitha reklamave dhe gjësendeve të tjera të paligjshme në hapësirat publike.

Debati disaditor se në Kosovë ka njehsorë elektrikë me orë tarifore të pasakta u kurorëzua më 1 prill, me tërheqjen e disa sosh prej funksionit nga një komision i themeluar nga Ministria e Industrisë, Ndërmarrësisë, Tregtisë dhe Inovacionit (MINTI).

Komisioni doli në terren pasi partia opozitare, Lidhja Demokratike e Kosovës (LDK), dhe media lokale Nacionale, publikuan gjetjet e hulumtimeve të tyre – rreth 2 mijë mostra në total – për mospërputhjet mes orës në njehsorët e rrymës me orën lokale.

Sipas autoriteteve, standardi i lejuar për pasaktësi është +/- 0.5 sekonda në ditë, varësisht prej temperaturës dhe kohëzgjatjes së njehsorit, ndërsa ka qytetarë që pretendojnë se pasaktësia shkon në disa orë, shkruan Evropa e Lirë.

Pse koha e saktë ka rëndësi?

Sepse çmimi i energjisë elektrike në Kosovë është ndryshe-ndryshe, varësisht se kur shpenzohet.

Ekziston tarifa e lartë gjatë ditës, dhe tarifa e ulët gjatë natës. Kjo e fundit, në dimër aplikohet në periudhën kohore 22:00 – 07:00, ndërsa verës gjatë orëve 23:00 – 08:00.

Sipas tarifave aktuale, konsumatorët familjarë që shpenzojnë deri në 800 kilovatë në orë (kWh) paguajnë 9.05 centë për kilovat, ndërsa 15.43 centë nëse e tejkalojnë këtë prag.

Gjatë tarifës së ulët, konsumatorët e paguajnë 3.88 centë kilovatin, ndërsa 7.28 centë nëse e tejkalojnë shifrën prej 800 kilovatësh.

LDK-ja pretendon se qytetarët janë dëmtuar nga “një skemë e madhe mashtrimi”, meqë ata mund të kenë besuar se e kanë shpenzuar energjinë në orët kur zbatohet tarifa e ulët, por me dallimet në kohë ata kanë shpenzuar shumë më tepër.

Kompania Kosovare për Distribuim të Energjisë Elektrike (KEDS) tha në një konferencë për media, më 1 prill, se mospërputhjet janë çështje teknike dhe nuk përfaqësojnë manipulim. Sipas kompanisë, nëse kalimi në tarifë është bërë me disa minuta vonesë, atëherë edhe ka përfunduar më vonë – por, në rast të identifikimit të pasaktësive jashtë normave të lejuara, “qytetarët do të kompensohen deri në centin e fundit”.

“KEDS dhe KESCO [Kompania Kosovare për Furnizim me Energji Elektrike] nuk mund të përfitojnë financiarisht nga kjo situatë. Një gjë të tillë nuk e lejon as korniza rregullative, e cila vendoset në bazë të parimit të të hyrave të lejuara maksimale”, thanë mes tjerash zyrtarë të kompanisë.

Zyra e Rregullatorit për Energji (ZRRE) – e cila mbikëqyr KEDS-in dhe KESCO-n – është zotuar se do të marrë masa në rast të konstatimit të gabimeve në funksionimin e njehsorëve elektrikë, dhe ka rikujtuar se përgjegjës për kalibrimin e njehsorëve është Agjencia e Metrologjisë së Kosovës, e cila funksionon në kuadër të MINTI-t.

Pse po ndërrohen njehsorët?

Një tjetër aspekt shumë i diskutuar në ditët e fundit ka të bëjë me ndërrimin e njehsorëve. Për KEDS-in, kjo procedurë është krejt normale dhe parashihet me rregulloret e punës.

“U kemi dhënë përparësi njehsorëve me vjetërsi më të lartë. Kemi një sasi të vogël të njehsorëve mekanikë”, tha Flamur Kurtaj nga KEDS-i, duke përmendur se bëhet fjalë për pothuajse 10 për qind të njehsorëve të tillë në total, pasi rreth 70 për qind e njehsorëve janë digjitalë dhe 20 për qind janë inteligjentë – ku pasaktësitë në kohë janë të pamundshme.

Kompania bëri të ditur se vetëm gjatë vitit të kaluar janë instaluar 130 mijë njehsorë të rinj digjitalë në gjithë Kosovën.

Por, Burim Ejupi nga Instituti për Politika Zhvillimore – INDEP i tha Radios Evropa e Lirë se beson që ky veprim vetëm sa i rrit dyshimet që njehsorët nuk kanë qenë të saktë.

“Fakti që këto ndryshime kanë nisur të bëhen në këtë moment tregon se kompania po tenton të fshehë gjurmë”.

LDK-ja paralajmëroi që dosjen me mbi 500 dëshmi të qytetarëve për pasaktësitë në orët tarifore në njehsorë do ta dërgojë në Prokurori.

“Ne i thërrasim organet kompetente që t’i hetojnë, edhe KEDS-in edhe Ministrinë, sepse këtu kemi të bëjmë me një skandal super serioz dhe super të madh. Nuk munden as KEDS-i dhe as Ministria të dalin dhe t’i tërheqin këta njehsorë, të pretendojnë që rastet janë të izoluara, pa pasur një hetim të plotë nga të gjitha organet e hetuesisë”.

Gjithë këto diskutime bëhen pak kohë pas ankesave të qytetarëve për reduktime të rrymës.

Ndonëse është vend që fle në thëngjill, Kosova prodhon pjesën më të madhe të energjisë përmes dy termocentraleve të vjetra prej disa dekadash – Kosova A dhe Kosova B. Marrëveshjet për ndërtim të një termocentrali të ri kanë dështuar vite më parë.

Kjo situatë e bën të pashmangshme blerjen e rrymës në vlera milionëshe në baza vjetore. Diçka e tillë reflektohet më pas në përcaktimin e tarifave vjetore të rrymës nga ana e ZRRE-së.

Ky institucion shpall tarifat prej 1 prillit, të cilat vlejnë deri më 31 mars të vitit pasues, mirëpo këtë vit vendimi është shtyrë për 1 maj.

Disa operatorë energjetikë kanë kërkuar rritje të tarifave prej 20 për qind, por asgjë nuk është përcaktuar ende.

Deputeti i Lidhjes Demokratike të Kosovës, Armend Zemaj, ka kritikuar kryeministrin Albin Kurti, pas sulmeve që ky i fundit ia ka bërë mediave.

Zemaj ka thënë se Kurti është futur ‘’në listën e zezë për ndërhyrje në pavarësinë e mediave’’.

‘‘Reporterët pa kufij, ambasadat, organizatat kredibile ndërkombëtare, të kanë vendos në listë të zezë për ndërhyrje në pavarësinë e mediave. Për çfarë po flasim sot? Për çfarë lirie dhe të drejtave të njeriut? Pse e ke financu Shkëlzen Gashin me botu libër me të pavërtetat e luftës? Jep llogari për ato para, që i ke shpërnda në krejt botën demokratike ato të pavërteta’’, ka thënë Zemaj.

Deputetja e Aleancës për Ardhmërinë e Kosovës, Time Kadrijaj iu ka drejtuar ministrit për Punë, Familje dhe Vlerave të Luftës Çlirimtare, Andin Hotit me një kërkesë në seancën e sotshme të Kuvendit të Kosovës.

Kadrijaj kërkoi nga Hoti të bëj një ligj për mbrojtjen e vlerave të luftës, duke theksuar se i takon si djali i Ukshin Hotit.

Kadrijaj kritikoi Qeverinë për vendosjen e rezolutës të propozuar nga PDK në rend të ditës, kundërshtimet nga ta se ku të vendoset, “më vjen keq çfarë derexhe ka ra kjo qeveri” tha ajo.

“A kemi të drejtë ne si shtet t’i fyejmë këta viktima, ne po bëjmë padrejtësi, e po më vjen keq në çfarë derexhe ka ra kjo qeveri. Për një rezolutë e cila nuk është politike për me e mbrojt vlerat e luftës, kemi kundërshtime se ku të vendoset në rendin e ditës një rezolutë e tillë. Po e lus Andin Hotin si ministër, bëje një ligj për mbrojtjen e vlerave të luftës, të takon, si djali i Ukshin Hotit, që nuk është gjetur”, tha Kadrijaj.

Ajo kërkoi që të tërheqin edhe librin për masakra nga Shkëlzen Gashi, ku ka histori të pavërteta të popullit, e financuar nga ministria e Punëve të Jashtme, raporton kp.

Ajo tha se është marre se vet shteti ka shpërnda librin në vende të ndryshme të Evropës.

“Historia nuk ndryshohet, nuk mundeni me ndryshu me këto linçime e organizime që po i bëni, tërhiqeni edhe librin për masakra të Gashit që ka shkruar të pavërteta që është financuar nga ministria e punëve të jashtme e shpërnda nëpër vende të tjera. Vet shteti i Kosovës ka shpërnda libra me të pavërteta në vende të ndryshme të Evropës, marre”, shtoi ajo.

Tringa Krasniqi, konsulente për edukim, në emisionin “LIBERO” ka ndarë historinë e saj frymëzuese të studimeve në Shtetet e Bashkuara të Amerikës, si dhe suksesin e jashtëzakonshëm të vëllait të saj në një nga universitetet më prestigjioze në botë.

Ajo tregoi se ka përfunduar studimet master në Universitetin George Washington, ndërsa vetëm tri vite më vonë, familja e saj përjetoi një tjetër moment krenarie – diplomimin e vëllait të saj në Universitetin Harvard.

Sipas Krasniqit, pranimi në Harvard është jashtëzakonisht konkurrues, pasi vetëm rreth 1 për qind e aplikantëve arrijnë të pranohen. Ajo theksoi se vëllai i saj është ndër të parët nga Kosova që ka përfunduar shkollën e mesme në vend dhe është pranuar drejtpërdrejt në studimet bachelor në këtë universitet elitar.

“Është jashtëzakonisht e vështirë me u pranu – prej 100 kandidatëve, vetëm 1 arrin të hyjë”, u shpreh ajo, duke nënvizuar nivelin e lartë të përzgjedhjes.

Përveç suksesit akademik, Tringa dhe vëllai i saj kanë arritur të sigurojnë edhe mbështetje të konsiderueshme financiare. Së bashku, kanë përfituar bursa që kapin vlerën mbi 650 mijë dollarë.

Për ta dëgjuar intervistën e plotë të Tringa Krasniqit, klikoni në linkun e mëposhtëm:

Albin Kurti ka paralajmëruar se projektligji për çmimet tavan do të rikthehet për votim në Kuvend, duke theksuar se synimi është mbrojtja e qytetarëve nga abuzimi me çmimet e larta.

Pas kësaj fjalën ka marrë kryetari i AAK-së, Ramush Haradinaj.

Ai hodhi akuza për keqmenaxhim në sektorin e energjisë, duke thënë se qeveria mban përgjegjësi për vjedhjet dhe faturat e larta, si dhe për, sipas tij, lidhje me kompani të afërta që përfitojnë nga tregu i energjisë.

“Mashtrimi nuk është fyerje. Du me demasku këtë mashtrim. Që sa vjet në pushtet mban përgjegjësi për vjedhjet në energji për faturat, nuk mund të ikni. Nuk mund të fshihni pas çmimit tavan sepse oligark tu po shesin e po blejnë energji, po shtohen çdo ditë e më shumë kompanitë për njerëz të tu të afërt. E dyta po thotë po financohen mediat, ky më së shumti shpenzon pare duke ushqy zagar për me dy qytetarë.

Pas këtyre deklaratave, Albulena Haxhiu, i tërhoqi vërejtjen për gjuhën e përdorur dhe më pas i ndërpreu fjalën, duke kërkuar respektim të rregullores së Kuvendit.

Ish-këshilltari sigurisë së SHBA-së, John Bolton në një intervistë për Euronews Albania, ka analizuar zhvillimet e fundit nga konflikti në Iran dhe pasojat.

Bolton ka ngre pikëpyetje mbi objektivat e administratës së Donald Trump, ndërsa lufta ka hyrë në javën e pestë.

Ai thekson se mungesa e një strategjie të qartë e bën situatën të paparashikueshme dhe rrit rrezikun e një konflikti të zgjatur.

Sipas tij, ndryshimi i regjimit në Iran mbetet kyç për stabilitetin në Lindjen e Mesme, megjithëse një objektiv i vështirë për t’u arritur.

Bolton paralajmëron gjithashtu për pasojat që kjo situatë mund të ketë për aleancat ndërkombëtare, përfshirë NATO.

Në këtë kontekst, ai ndalet edhe te Shqipëria, duke theksuar se vendi përballet me rreziqe të mundshme për shkak të strehimit të opozitës iraniane, por njëkohësisht meriton mbështetje të veçantë nga aleatët për sigurinë e saj.