Category: Lajme

Greva e pilotëve në “Lufthansa” hyri në ditën e dytë të martën, duke e detyruar grupin e linjave ajrore gjermane të anulojë qindra fluturime në qendrat e saj kryesore në Frankfurt dhe Mynih dhe duke ndërprerë udhëtimet për mijëra pasagjerë.

Në Frankfurt, afërsisht 550 fluturime u prekën, sipas sindikatës së pilotëve Vereinigung Cockpit (VC). Më shumë se 300 fluturime u anuluan në Mynih, qendra e dytë më e madhe e “Lufthansa”-s, ndërsa rreth 40 nisje dhe mbërritje u anuluan në Berlin.

Greva 48-orëshe, e thirrur nga VC-ja të hënën, rrjedh nga muaj të tërë negociatash të bllokuara mbi pagat dhe pensionet e kompanisë. Sindikata thotë se Lufthansa nuk ka arritur të bëjë oferta të pranueshme.

Edhe pse aksioni i pilotëve përfundon në mesnatë të martën, udhëtarët përballen me ndërprerje të reja. Një grevë e veçantë dyditore nga ekuipazhi i kabinës është planifikuar të fillojë në orën 12:01 të mëngjesit të së mërkurës (22:01 GMT të martën) dhe të zgjasë deri pak para mesnatës së së enjtes.

Organizata e Pavarur e Asistentëve të Fluturimit (UFO) tha se greva do të ndikojë në të gjitha nisjet e markave kryesore “Lufthansa” nga Frankfurti dhe Mynihu.

Ish-deputetja e LDK-së, Besa Gaxherri, ka thënë se janë të gatshëm për bashkëpunim për zgjidhjen e bllokadës për zgjedhjen e presidentit.

Gaxherri tha se me Albin Kurtin është gati e pamundur të qeverisësh. Mirëpo, siç thotë ajo, kontributi i tyre për presidentin mund të bëhet edhe pa përfshirje në qeverisje. Gaxherri kërkoi reflektim nga Kurti për të arritur marrëveshje politike, sepse sipas saj nuk mund t’i ketë një subjekt politik tri institucionet qendrore.

“LDK-ja është e gatshme të kontribuojë për të zhbllokuar krizën e stërzgjatur në vend, por duke pasur parasysh edhe pasojat si subjekt politik, sepse ne nuk mund ta mohojmë atë çfarë kemi thënë dje dhe për të cilën jemi të bindur se të qeverisësh me LVV-në është shumë e vështirë, gati e pamundshme. Por, duke pasur parasysh situatën në të cilën kemi ardhur me sjelljen e zotit Kurti, mendojmë se jemi të gatshëm të kontribuojmë. Nuk është e thënë që domosdoshmërish të jemi në qeverisje. Por, natyrisht, Kurti duhet të reflektojë dhe ta dijë se nuk mund t’i ketë të gjitha institucionet e shtetit në duart e tij. Këtë nuk do ta lejojmë ne si subjekte politike, nuk e lejon as vetë Kushtetuta e Kosovës. Kushtetuta parasheh që të ketë balancë të pushteteve dhe bashkëpunim midis partive politike, të ketë marrëveshje politike gjëra që zoti Kurti nuk i njeh, dhe kjo është për të ardhur keq. Kam bindjen se Kurti po krijon këto kriza, sepse vetëm kështu ai mund të funksionojë.”, tha Gaxherri për rtv21.

Anëtarja e LDK-së, Besa Gaxherri, po ashtu tha se LDK-ja nuk ka votë për asnjë kandidat të LVV-së për president nëse nuk ka marrëveshje politike.

“Kurti po përgatit skenarë si zakonisht dhe po e përgatit elektoratin, duke i paketuar mashtrimet e tij se ai deshi të bëjë zgjidhje, por partitë opozitare nuk ishin të gatshme. Unë uroj dhe shpresoj se qytetarët e këtij vendi tashmë e kanë parë lojën e Kurtit. Unë besoj se vendi duhet të shkojë në zgjedhje në qershor. Nuk mund të ketë votë nga LDK-ja pa marrëveshje politike. Kurti duhet të mësohet të bëjë marrëveshje politike, duhet të mësohet të respektojë opozitën, mediat dhe sindikatat. Kurti pretendon ta kapë shtetin.’’, u shpreh Gaxherri.

Caktimi i datës 15 prill për intervistimin e kandidatëve për bordin e RTK-së u shoqërua me kundërshtime nga opozita në Komisionin Ad hoc për bordin e RTK-së.

Opozita tha se data duhet të caktohet për javën e ardhshme.

Deputetja e PDK-së, Ganimete Musliu në një intervistë për Ekonomia Online u shpreh se intervistimi i kandidatëve po bëhet me qëllim me një afat të përshpejtuar për qëllime udhëheqjeje nga LVV në këtë bord.

“Siç e patë edhe ju, edhe ishit pjesë e këtij komisioni, këta po tentojnë që ta anashkalojnë çdo procedurë, domethënë jashtë çdo standardi po tentojnë që t’i kapin bordin e RTK-së edhe të KPM-së. Dhe unë nuk bëhem pjesë e një maskarade të tillë, e thashë edhe në komision. Krejt çka kemi kërkuar ne është që të respektohen procedurat. Kuvendi nuk ka filluar me ta. Ata, shumica e anëtarëve të komisionit, kanë qenë edhe më herët deputetë dhe i dinë procedurat. Ata qëllimisht po i anashkalojnë të gjitha procedurat thjesht për me i kapë bordin e RTK-së dhe bordin e KPM-së.

Ne i kemi rreth 100 kandidatë në të dy bordet që i kemi me i intervistuar. Saktësisht 70 i kemi për bordin e RTK-së dhe 30 i kemi për KPM-në. Domethënë llogarite tash, 100 kandidatë në mënyra të përshpejtuara. Nuk ka kapacitete komisioni në mënyrë të përshpejtuar sepse nuk është e nevojshme asnjë nguti. Krejt çka kemi kërkuar ne është që të caktohet intervista, të mbahet të hënën, të martën, të mërkurën dhe derisa të përfundojë. Këta po kërkojnë me fillua nesër, që është e mërkurë, pastaj me ndërpre atë që kemi seancë parlamentare, dhe me vazhdu të premten. Ka shumë gjasa që edhe të premten do të kemi seancë parlamentare dhe prapë na duhet me i ndërpre intervistat”, tha Musliu.

Musliu tha LVV po tenton ta “kap” bordin e RTK-së dhe KPM-në.

“Dhe në momentin kur ti i merr të mërkurën disa kandidatë në intervistë, pastaj pauzon tri-katër ditë, ajo është pabarazi ndaj kandidatëve dhe është shkelje e të drejtave të kandidatëve të cilët janë në konkurs. Dhe si anëtare e këtij komisioni, kam kërkuar që të respektohen rregullat bazë, që është minimalisht tri ditë punë përpara me i njoftuar kandidatët, me u përgatit kandidatët, së pari psikologjikisht për me ardhë në komision.

E mos flas tani edhe profesionalisht. Nuk mundesh ti sot me marrë vendim që ata nesër në ora 09:00 me ardhë në komision në intervistë. Por, fatkeqësisht, ata e kanë arrogancën e numrave. Na kanë mbivotuar edhe po na mbivotojnë, po marrin vendime qysh po dojnë vetë, jashtë rregullave të Kuvendit, jashtë procedurave, jashtë rregullores. Çdo gjë e bëjnë qysh atyre iu konvenon. Dhe synimi i tyre konkret është me e kap bordin e RTK-së dhe me e kap edhe KPM-në dhe pastaj me kriju diktat edhe anarki në të gjitha institucionet e vendit. Dhe unë jam kundër këtij regjimi. Nuk mundemi ne në këtë formë, duke degraduar çdo proces, me vazhdua tutje. Krejt çka kemi kërkuar është respektim i rregullave bazë të konkursit. Nuk mundesh ti qysh t’i marrësh direktivat dhe urdhrat nga grupi parlamentar i Vetëvendosjes me ardhë me na i imponu neve në komision”, thotë ajo.

Musliu tha se në emër të PDK-së nuk do të hesht dhe se do ta ngrisë zërin kundër parregullsive.

“Ne gjatë ditës do të konsultohemi edhe një herë faktikisht, dhe thjesht si Parti Demokratike, aty ku unë jam përfaqësuese e Partisë Demokratike, nuk do të hesht asnjëherë duke e ngritur zërin kundër parregullsive. Këto komisione janë krijuar në mënyrë të parregullt dhe kanë funksionuar në mënyrë të parregullt gjatë gjithë kohës dhe po vazhdojnë edhe tutje, dhe unë jam kundër parregullsive. Thjesht si Parti Demokratike do ta japim qëndrimin tonë në momentin e duhur. Vetë fakti që sot është ora afër 12:00 dhe nesër në ora 09:00 janë ftuar për intervistë, kjo tregon që nuk janë as 24 orë përpara që të përgatitemi për ato intervista. E thashë edhe një herë, kemi material voluminoz, kemi 100 kandidatë në dy borde. Dhe kjo është e papranueshme. Nuk ka nevojë, sepse nuk është përgjegjësi e askujt tjetër vetëm e partisë në pushtet që i ka zvarritur bordet deri tash dhe i ka lënë të pakompletuara. Dhe nëse kanë pritur gjashtë muaj a një vit, pse mos me pritur edhe dy ditë, tri, deri të hënën? Shkojmë të hënën, në mënyrë të rregullt, mbas procedurave, pa shkëputje i intervistojmë dhe e kryejmë procesin. Pse kjo nguti? Sepse dëshirojnë ta imponojnë mënyrën e vet të punës dhe t’i kapin institucionet. Është arrogancë numrash komplet. Aktualisht jemi të pafuqishëm që t’i ndalim këto procese të dëmshme, por po shpresoj shumë që shumë shpejt do të shkojmë në zgjedhje dhe qytetari i Republikës së Kosovës do t’ua tregojë vendin”, theksoi deputetja.

Ndërsa deputeti i Lidhjes Demokratike të Kosovës, Armend Zemaj për Ekonomia Online tha se partia në pushtet dëshiron që të ketë persona në krye të RTK-së që janë nga kjo parti.

“Po, ky proces duhet të jetë transparent, ku respektohet dinjiteti dhe integriteti i të gjithë kandidatëve. Dhe kur ka transparencë të plotë edhe në evidentimin e këtij procesi apo mbarëvajtjes së procesit, po mbi të gjitha sigurisë dhe barazisë në intervistë. Partia në pushtet dhe shumica nuk e dëshirojnë këtë. Dëshirojnë që ky proces të shkojë vetëm sa për sy e faqe dhe të ketë individë, sigurisht të përzgjedhur të pushtetit, për të vazhduar kapjen e Radio Televizionit të Kosovës. Këtë nuk mund as ta pranojmë, por as nuk dëshirojmë të jemi pjesë e saj, por do ta ngrisim në të gjitha nivelet e mundshme edhe kundërshtimet tona në aspektin demokratik të këtij procesi”, theksoi deputeti.

Zemaj tha se intervistimi duhet të jetë transparent dhe i barabartë për të gjithë kandidatët.

“Po, intervistimi së pari duhet të jetë një mundësi e barabartë për të gjithë kandidatët. Dhe kur fillon procesi, nuk duhet të ndërpritet procesi. Dhe insistimi im është që të kemi një proces kur fillon dhe kur përfundon, dhe ku barazia në kohë, në mundësi, në pyetje-përgjigje t’u jepet të gjithë kandidatëve në mënyrë të barabartë. Kjo nuk u pranua fatkeqësisht dhe dëshironin që të fillonin menjëherë intervistimin pa iu dhënë mundësinë e njoftimit të plotë të gjithë kandidatëve, dhe pa u evidentuar të gjitha çështjet që kanë të bëjnë edhe me materialet, por edhe me kushtet dhe kriteret që i plotëson çdo kandidat për këtë garë zgjedhore”, shtoi tutje Zemaj.

Intervista ndaj kandidatëve do të mbahet nga ora 09:00 gjatë ditës së nesërme.

Kina ka kërcënuar me “masa kundërpërgjigjeje” nëse Shtetet e Bashkuara vazhdojnë me rritjen e tarifave ndaj saj, të cilat Pekini thotë se bazohen në raportime të rreme mediatike që e akuzojnë Kinën për dhënie të mbështetjes ushtarake për Iranin.

“Raportimet mediatike që akuzojnë Kinën për ofrim të mbështetjes ushtarake për Iranin janë krejtësisht të sajuara,” tha zëdhënësi i Ministrisë së Jashtme kineze në platformën X.

“Nëse SHBA vazhdon me rritjen e tarifave ndaj Kinës mbi bazën e këtyre akuzave, Kina do të përgjigjet me masa kundërpërgjigjeje.”

Ai shtoi se Kina vepron gjithmonë në mënyrë të kujdesshme dhe të përgjegjshme në eksportin e produkteve ushtarake dhe ushtron kontroll të rreptë në përputhje me ligjet e saj dhe detyrimet ndërkombëtare. /a2cnn

Maxime Prevot, ministër i Punëve të Jashtme, Çështjeve Evropiane dhe Bashkëpunimit për Zhvillim i Belgjikës, ka njoftuar se sot do të nis një vizitë 6-ditore në rajonin e Ballkanit Perëndimor.

Kryediplomati belg, ka bërë të ditur se gjatë këtyre ditëve do të vizitojë Kosovën, Malin e Zi, Serbinë, Maqedoninë e Veriut, dhe Bosnjë Hercegovinën, kurse Shqipërinë, ka bërë të ditur ai, do ta vizitojë në një tjetër fazë, kur do të ketë ‘’kënaqësinë të hap ambasadën’’ belge në Tiranë.

“Angazhimi me Ballkanin Perëndimor është strategjik për sigurinë dhe stabilitetin e kontinentit tonë. Ballkani Perëndimor nuk është në pragun e Evropës — ai është në Evropë. Siguria e tyre është siguria jonë, stabiliteti i tyre është stabiliteti ynë”, ka shkruar ai mes tjerash.

Postimi:

Duke filluar nga sot, një vizitë pune 6-ditore në Ballkanin Perëndimor.

Do të vizitoj Malin e Zi, Serbinë, Maqedoninë e Veriut, Kosovën dhe Bosnjë e Hercegovinën. Shqipërinë do ta vizitoj në një fazë të mëvonshme, gjatë një misioni të veçantë, kur do të kem kënaqësinë të hap Ambasadën tonë në Tiranë.

Angazhimi me Ballkanin Perëndimor është strategjik për sigurinë dhe stabilitetin e kontinentit tonë. Ballkani Perëndimor nuk është në pragun e Evropës — ai është në Evropë. Siguria e tyre është siguria jonë, stabiliteti i tyre është stabiliteti ynë. Disa prej këtyre vendeve kanë pritur për më shumë se njëzet vjet për t’u anëtarësuar në BE. Prandaj është e rëndësishme të ruhet një perspektivë e besueshme integrimi, por procesi mbetet i bazuar në merita: presim prej tyre të kenë guximin për të zbatuar reformat e nevojshme, në lidhje me sundimin e ligjit, sistemin gjyqësor, luftën kundër korrupsionit dhe pajtimin rajonal.

Belgjika është dhe do të mbetet një partner i angazhuar në rajon, si politikisht ashtu edhe ekonomikisht. Jam këtu për të thelluar partneritetet tona.

Një 20 vjeçar është vrarë në Helsinborg të Suedisë.

Siç raporton TopChannel, viktima është shqiptar.

Po ashtu në këtë ngjarje, është plagosur edhe një vajzë e moshës 25 vjeçare e cila ishte në shoqëri të të ndjerit.

Policia deklaron se akoma nuk dihen motivet e këtij rasti, e gjithashtu nuk ka ndonjë të dyshuar lidhur me rastin.

Tutje i riu dyshohet se ishte pjesë e një rrjeti trafikimi droge në Helsinborg dhe në rajonin Skane.

Mësohet se viktima është shtetasi M.Ll, 20 vjeç, emigrant nga Fieri, i cili ndodhej prej vitesh në Suedi së bashku me familjen e tij.

Ish-deputeti Burim Ramadani ka thënë se në Kosovë nuk ka opozitë të strukturuar.

Sipas tij, ka parti që nuk janë në pushtet, por ato assesi nuk kanë arritur të gjejnë gjuhën e përbashkët dhe as qëllimet e përbashkëta.

“Që nga zgjedhjet e 9 shkurtit 2025, partitë jopushtetare nuk kanë arritur të ndërtojnë koncept e platformë të përbashkët. Kështu, nuk i kanë dhënë qytetarëve një alternativë, nuk i kanë dhënë qytetarëve besimin se ato mund të ndërrojnë pushtetin tashmë shumëvjeçar të LV-së”.

“Në vend se të ndërtojnë qasje të përbashkët, partitë jopushtetare kanë vazhduar të shohin vetëm veten në mënyrë të ndarë dhe nuk kanë dhënë opsion tjetër qeverisës e institucional. Në periudhën e fundit, kanë ndodhur disa takime të ndara midis LV-së dhe PDK-së e LDK-së për çështjen e presidentit. Uroj që këto takime të nxjerrin ‘tymin e bardhë’ më në fund, me qëllimin që Kosova të mos shkojë edhe njëherë në zgjedhje. Pasi që këto parti jopushtetare kanë filluar diskutimet me LV-në për Presidentin, besoj se do të ishte mirë që këto negociata të dalin ë suksesshme. Në të kundërtën, besimi qytetar do të tronditej edhe më shumë dhe kjo do të çon tek një apati politike qytetare”, ka shkruar Ramadani në “Facebook”.

Projektligji i ri i Qeverisë së Kosovës për masat e përkohshme ndaj produkteve themelore parasheh ndërhyrje të drejtpërdrejtë në treg vetëm në raste të destabilizimit ekonomik, me synim kryesor mbrojtjen e qytetarëve dhe ruajtjen e stabilitetit të çmimeve. Sipas draftit të publikuar, institucionet do të kenë të drejtë të vendosin çmime maksimale për produkte bazë, si dhe të përcaktojnë kufij të marzhës së fitimit për tregtarët me shumicë dhe pakicë, në mënyrë që të parandalohet rritja e paarsyeshme e çmimeve gjatë krizave.

Projektligji parasheh që këto masa të mos jenë të përhershme, por të aplikohen vetëm në situata të jashtëzakonshme kur tregu pëson luhatje të mëdha apo mungesë furnizimi. Për zbatimin e tyre pritet të krijohet një organ i veçantë vendimmarrës, i cili do të analizojë gjendjen e tregut dhe do të rekomandojë masa konkrete, duke synuar një balancë mes mbrojtjes së konsumatorit dhe funksionimit të ekonomisë së lirë.

Për qytetarët, përfitimi kryesor nga ky projektligj lidhet me mbrojtjen nga rritjet e menjëhershme dhe të pajustifikuara të çmimeve të produkteve esenciale, si ushqimet bazë dhe artikujt e domosdoshëm. Në situata krize, kjo nënkupton më shumë siguri për buxhetin familjar dhe qasje më të qëndrueshme në produkte të nevojshme.

Në anën tjetër, për bizneset projektligji sjell një kornizë më të qartë rregullative në raste emergjente, duke vendosur rregulla të njëjta për të gjithë operatorët në treg dhe duke shmangur konkurrencën e pandershme. Megjithatë, ato mund të përballen me kufizime në fitim gjatë periudhave kur aktivizohen masat, pasi marzhet dhe çmimet do të kontrollohen nga shteti.

Qeveria thekson se qëllimi i këtij ligji nuk është ndërhyrja e vazhdueshme në treg, por krijimi i një mekanizmi mbrojtës që aktivizohet vetëm kur ka rrezik për destabilizim ekonomik, duke tentuar të ruajë një ekuilibër mes interesit të qytetarëve dhe funksionimit normal të bizneseve.