Category: Lajme

Ushtruesi i Detyrës së Drejtorit Ekzekutiv të Inspektoratit Qendror të Punës, Kastriot Jashari, ka deklaruar se gjatë inspektimeve në sektorin e ndërtimit nuk janë mbyllur kompani, por janë ndaluar përkohësisht punimet në rastet kur nuk janë respektuar kushtet e sigurisë në punë, raporton Ekonomia Online.

Ai theksoi se veprimet e inspektoratit kanë për qëllim rritjen e sigurisë për punëtorët dhe jo ndëshkimin e bizneseve.

“Në fakt, ne s’kemi mbyllur asnjë kompani ndërtuese. Ne kemi ndaluar punimet në mungesë të respektimit të kushteve të sigurisë në punë. Domethënë, është nga rreth 320 inspektime dhe ri-inspektime, numri total i kantierëve ndërtimorë ku janë vendosur shenja e plumbuzës ose shiritit është rreth 106. Janë rreth 27 ose 30 që janë ri-hapur, sepse i kanë plotësuar kushtet e sigurisë në punë. Domethënë kjo është krejt çështja që ne po e bëjmë. Domethënë ne në fakt nuk mbyllim kompani, por ne korrigjojmë, bashkëpunojmë me qëllim që qytetari, jeta e tij të jetë në qendër të vëmendjes sepse ky është mandati jonë. Unë besoj që edhe sepse nuk është korrekt mbase që të themi vetëm kompani ndërtimore, po flasim edhe për subjekte të tjera, po kësaj radhe kryesisht është në profilin me rrezikshmëri të lartë sepse statistikat zyrtare e nxjerrin këtë situatë. Dhe mbi bazën e kësaj ne veprojmë.

Përndryshe, ne kemi pasë bashkëpunim të vazhdueshëm, komunikim korrekt, kemi pasë edhe takim me shoqatat e ndërtimtarëve para disa ditëve në Ministri bashkë me Ministrin dhe po e kryejmë punën tonë”, tha ai.

I pyetur për mangësitë e konstatuara gjatë inspektimeve në kompanitë ndërtimore, Jashari tha se detajet teknike janë kompetencë e inspektorëve në terren.

“Ato janë detaje të cilat i takojnë inspektorëve, por ne si kornizë ligjore domethënë e kemi nxjerrë një plan veprimi që janë produkt i legjislacionit në fuqi, ku inspektorët nxjerrin në procesverbalin e tyre vendimet, detajet teknike të plotësimit ose mos-plotësimit të kushteve. Pra ato i takojnë inspektorëve dhe jo mua si kryeinspektor. Unë nuk e përjashtoj që ka pasur raste të tilla sepse këto janë edhe publike, por po them prapë këto janë detaje që mund t’i shihni, që janë me kërkesën tuaj, janë të qasshme. Secili dokumentacion, secili vendim për ndalim punimesh që është në Inspektoratin Qendror të Punës, por disa janë në proces deri në epilogun final të çështjes“, theksoi ai.

Sa i përket kapaciteteve të inspektoratit në terren, Jashari tha se aktualisht janë të mjaftueshme për aksionin në zhvillim, por pranoi se nevojiten më shumë inspektorë për të mbuluar të gjithë mandatin ligjor.

“Kemi absolutisht mjaftueshëm për këtë aksion dhe ne kemi thënë që jemi në 90% të kapaciteteve tona që po e zbatojmë këtë aksion. Inspektorati Qendror i Punës marrë në tërësi mandatin e tij ligjor që mbulon ligje specifike dhe disa dispozita ligjore të ligjeve për mbikëqyrjen dhe implementimin e tyre, nuk ka mjaftueshëm.

Por jemi në proces, të besoj në një kohë sa më të shkurtër, në një të ardhme të afërt, të shpallet konkursi edhe për një numër rreth 40 ose 50 inspektorë për ta plotësuar në tërësi mandatin ligjor. Nuk do të thotë që s’po e zbatojmë tani, por natyrisht kërkon pak kohë sepse kur koncentrohesh në një profil tjetër, do më shumë kohë që të trajtohen çështjet e tjera. Por po, tani për tani në terren kemi mjaftueshëm, absolutisht inspektorë“, shtoi Jashari.

Nagavci: S’jemi njoftuar për nënshkrimet e LDK-së as unë e as Kurti
Read more

Deputeti i LVV-së, Mefail Bajqinovci komentoi zërat që paralajmëruan protesta, pasi partia në pushtet mbrëmë e nisi e vetme procesin për zgjedhjen e Presidentit, që u konsiderua si cenim i rëndit kushtetues të vendit.

Bajqinovci tha se populli “ua dha përgjigjen” partive opozitare.

“Po kush del në rrugë pas oligarkëve politikë? Populli ua dha përgjigjen me 51.11% me Albin Kurti. E tash, kur s’kanë votë, kërkojnë zhurmë”, shkroi ai në një postim në Facebook.

“Ani kur i sheh kush po bën thirrje, të njëjtit që e shfrytëzuan shtetin, e sot kërkojnë “revolta” për me u kthyer prapë. Por koha e tyre ka kalu, populli nuk del për ta, populli i ka çu në opozitë”, shtoi Bajqinovci.

Prokuroria Themelore në Ferizaj ka njoftuar se ka nisur hetime ndaj tre personave, të dyshuar për disa vepra penale, përfshirë keqpërdorimin e pozitës zyrtare, falsifikimin e dokumenteve dhe legalizimin e përmbajtjes së rreme.

Në njoftim, thuhet se me vendim të Prokurorit të Shtetit nga Departamenti i Krimeve të Rënda, është marrë aktvendim për fillimin e hetimeve, ndërsa me urdhër të Gjykata Themelore në Ferizaj është realizuar kontroll në shtëpitë dhe lokalet përcjellëse të të dyshuarve. Pas kësaj, tre personat janë ndaluar për 48 orë.

Sipas organit të akuzës, të dyshuarit po hetohen për veprat penale “Keqpërdorimi i pozitës apo autoritetit zyrtar në bashkëkryerje në ndihmë”, “Falsifikimi i dokumenteve” në bashkëkryerje dhe “Legalizimi i përmbajtjes së rreme”, sipas dispozitave përkatëse të Kodit Penal të Republikës së Kosovës.

Në lidhje me mbrojtjen ligjore, dy nga të pandehurit nuk kanë angazhuar avokatë, andaj me urdhër verbal të prokurorit është kërkuar nga njësitet përkatëse që të njoftohet Oda e Avokatëve të Kosovës për caktimin e avokatëve sipas detyrës zyrtare.

Megjithatë, sipas Prokurorisë, zyra koordinuese e Odës në Prishtinë fillimisht ka kërkuar të dhëna shtesë, përfshirë emrat e të pandehurve dhe veprat penale, para se të dërgojë mbrojtësit. Lidhur me këtë, Prokurori i Shtetit ka paralajmëruar për pasojat e mundshme në rast të moszbatimit të kërkesave, duke theksuar se vonesa të tilla mund të pengojnë zhvillimin e procedurës hetimore.

Lidhur me zhvillimet politike në vend, ka reaguar kryetari i Drenasit, Ramiz Lladrovci.

Lladrovci ka theksuar se “komfori si fazë finale e arritjeve të çaushëve të rinj në kohën kur rrezikohet shteti, është mjerim”.

“Partitë politike me taban atdhetar domosdo i vërejnë dredhitë politike, prandaj punojnë që ta zvogëlojnë ndikimin e keqbërësve politikë dhe degradimin institucional”, shkruan mes tjerash ai.

Reagimi i tij i plotë:

Partitë politike me taban atdhetar domosdo i vërejnë dredhitë politike, prandaj punojnë që ta zvogëlojnë ndikimin e keqbërësve politikë dhe degradimin institucional.

Partitë e kanë obligim të veprojnë në mbrojtje të kushtetutshmërisë dhe kundër dredhive që e dëmtojnë shtetin, ndryshe, nuk e arsyetojnë ekzistencën. Komfori si fazë finale e arritjeve të çaushëve të rinj në kohën kur rrezikohet shteti, është mjerim.

Hapni krah o trima o dilni zot situatës!

Në zgjedhjet e ardhshme, Komisioni Qendror i Zgjedhjeve, mund të vendosë për rinumërim të votave deri në 10% të vendvotimeve të përzgjedhura në mënyrë të rastësishme.

Kështu ka bërë të ditur për Gazetën Express, zëdhënësi i KQZ’së, Valmir Elezi.

Ky i fundit ka theksuar se, KQZ ka ndërmarr masa të tilla si mënyrë për të adresuar problemet e evidentuara në Qendrat Komunale të Numërimit gjatë numërimit të votave të kandidatëve për deputetë.

“Për të adresuar problemet e evidentuara në Qendrat Komunale të Numërimit gjatë numërimit të votave të kandidatëve për deputetë, Komisioni Qendror i Zgjedhjeve ka ndërmarrë masa konkrete përmes përmirësimit të kornizës rregullative. Në akte nënligjore është paraparë një mekanizëm shtesë kontrolli i procesit të numërimit të fletëvotimeve. Konkretisht, është paraparë që pas pranimit të materialeve zgjedhore nga vendvotimet e rregullta në Qendrën e Numërimit dhe Rezultateve, KQZ vlerëson situatën dhe sipas nevojës mund të vendosë rinumërimin e votave deri në 10% të vendvotimeve të përzgjedhura në mënyrë të rastësishme”, tha Elezi për Express.

Kreu i AAK-së, Ramush Haradinaj, ka thënë se kandidatet e propozuara për presidente dhe deputetët e partive të pakicave s’duhet të bëhen pjesë e shkeljes së Kushtetutës.

Haradinaj ka thënë se do t’i mbulojë turpi kushdo që bëhet pjesë e një shkeljeje të tillë, pavarësisht se çfarë figure e çfarë pune ka bërë deri sot.

“Njëkohësisht zonjat që janë kandidate për presidente dhe deputetët e partive joshumicë, dhe të gjithë ata që kanë logjikë, të ndalen të mos vazhdojnë të jenë pjesë e këtij turpi. Kushdo që bëhet pjesë e cenimit të rendit kushtetues, do t’i mbulojë turpi. S’ka lidhje kush janë e çka kanë bo deri në në këtë moment”, ka thënë Haradinaj.

Kryeministri Albin Kurti ka pritur në takim delegacionin e prirë nga kreu i Komitetit Ushtarak të NATO-s, Admirali Giuseppe Cavo Dragone, dhe kreu i Komitetit Ushtarak të Bashkimit Europian, Gjenerali Sean Clancy.

Zyra e Kryeministrit tha se gjatë takimit, Kurti “shprehu falënderimin për angazhimin dhe përkushtimin e vazhdueshëm të NATO-s për paqe, stabilitet dhe parandalim në Kosovë dhe në Ballkanin Perëndimor, ndërsa tha se roli i KFOR-it mbetet thelbësor jo vetëm për sigurinë e vendit, por mbarë rajonit”.

“Kryeministri Kurti theksoi se, për Kosovën, NATO-ja nuk është vetëm garantues i sigurisë, por orientim strategjik dhe destinacion. Në kontekst të procesit të integrimit evropian, ai tha se krahas politikës së pranimit, duhet t’i kushtohet rëndësi edhe dëshirës për anëtarësim”, thuhet në njoftimin e ZKM-së.

Kurti u foli mysafirëve edhe për “rritjen e nivelit të sigurisë në vend”.

“Pasi foli për rritjen e nivelit të sigurisë në vend, me theks në veri, në kontekst rajonal kryeministri përmendi synimet destabilizuese të Serbisë të mbështetur nga Rusia. Kryeministri Kurti, po ashtu, theksoi bashkëpunimin e ngushtë të Forcës së Sigurisë së Kosovës me NATO-n”, thuhet në njoftim.

Ministri i Mbrojtjes, Ejup Maqedonci ka pritur sot në takim anëtarët e Komitetit Ushtarak të NATO-s, të kryesuar nga Admirali Giuseppe Cavo Dragone, si dhe kryetari i Komitetit Ushtarak të Bashkimit Evropian (CEUMC), Gjeneral Sean Clancy.

Ministri ka bërë të ditur se gjatë takimit u diskutua mbi zhvillimet aktuale të sigurisë, zhvillimin e Forcës së Sigurisë së Kosovës dhe kontributin e Kosovës në funksion të sigurisë regjionale dhe globale, transmeton Klankosova.tv.

Ndër të tjera, Maqedonci thotë se Komitetit Ushtarak të NATO-s, ia theksoi synimin strategjik që Republika e Kosovës ka për anëtarësim në Bashkimin Evropian dhe NATO, duke nënvizuar rëndësinë që kanë këto procese, jo vetëm për zhvillimin e gjithëmbarshëm të vendit por edhe për forcimin e stabilitetit dhe sigurisë në rajon.

“Për më tepër, delegacionin e Komitetit Ushtarak të NATO e informova rreth objektivat strategjike të Ministrisë së Mbrojtjes për katër vitet e ardhshme, të cilat janë fokusuara në zhvillimin e mëtejmë të kapaciteteve të FSK-së, zbatimin e mbrojtjes gjithëpërfshirëse, zhvillimin e industrisë së mbrojtjes, bashkëpunimin ndërkombëtar dhe vetëqëndrueshmërinë”, thotë Maqedonci në postimin e tij në Facebook.

Ministri shtoi se anëtarësimi i Kosovës në strukturat euroatlantike përbën një hap të natyrshëm dhe të domosdoshëm, që kontribuon për paqe të qëndrueshme, bashkëpunim të thelluar ndërkombëtar dhe arkitekturë më të fortë té sigurisë në Evropë.

“Republika e Kosovës mbetet e vendosur të ecë përpara si një partner i besueshëm, duke kontribuar aktivisht në sigurinë kolektive dhe mbrojtjen e vlerave që na bashkojnë”.

Kryetari i AAK-së, Ramush Haradinaj pas ndërprerjes së seancës për presidentin, deklaroi se situata politike në vend është e rrezikshme, duke akuzuar për shkelje kushtetuese VV-në me seancën e mbrëmshme.

Ai theksoi se veprime të tilla po e pamundësojnë funksionimin sipas Kushtetutës dhe paralajmëroi për pasoja nëse vazhdohet në këtë drejtim.

Haradinaj bëri thirrje për mobilizim qytetar në mbrojtje të Kushtetutës, duke përmendur se veprimet mund të përfshijnë edhe protesta.

“Është situatë ndryshe nga të gjitha zhvillimet që kemi parë në Kosovë pas pavarësisë. Ata që ushtrojnë funksione shtetërore, dje kanë bërë shkelje kushtetutese. Është ngjarje shumë e rrezikshme, një drejtim i rrezikshëm. Ju bëj thirrje të ndalen mos të vazhdojnë në këtë drejtim. Ruajtja e pushtetit, ardhja në pushtet është e mundshme duke respektuar Kushtetutën. Nëse shkojmë kësaj rruge të rrezikshme po na pamundësojnë funksionet në bazë të Kushtetutës. Nuk po na lëjnë rrugë tjetër veçse t’i drejtohemi sovranit, që të mobilizohemi të gjithë që të mbrojmë Kushtetutën. Besoj që sovrani e bën këtë, e ka bërë në çdo etapë, kuptohet me veprime që sovrani vet i identifikon, që mund të jenë edhe protesta. Edhe njëherë i thërras ndërgjegjës së gjithëve të mos bëhen pjesë e shkeljes së Kushtetutëtës, edhe këtij turpi. Kushdo që bëhet pjesë e veprimeve që me u shkel Kushtetuta në këtë mënyrë i mbulon turpi, do t’i mbulojë turpi për jetë”, tha Haradinaj para gazetarëve.

Mesazhet e bëra publike tregonin se Naim Bardiqi kishte shkruar që presidenti të zgjidhet “në mënyrën karate”, duke shtuar se më pas duhet pritur vendimi i Gjykata Kushtetuese, i ka reaguar shefja e Grupit Parlamentar të VV’së Arbërie Nagavci,

Nga ky mesazh u distancua Nagavci ku u shpreh se VV’ja ka qëndrime të përbashkëta duke e quajtur “gabim” qasjen e Bardiqit.

“Është gabim një qasje e tillë. Ne si grup parlamentar kemi qëndrime publike dhe i marrim si grup parlamentar. Qasja e tillë nuk është e duhura.”, u shpreh Nagavci.

Bardiqi u justifikua se komunikimi i tij privat është interpretuar gabimisht dhe është nxjerrë jashtë kontekstit.

Në paraqitjen e tij në RTV Dukagjini, Bardiqi deklaroi se publikimi i mesazheve përbën cenim të privatësisë./gazetametro