Category: Lajme

Shefja e grupit parlamentar të Lëvizjes Vetëvendosje, Arbërie Nagavci, ka akuzuar opozitën për bllokim të proceseve politike dhe refuzim të vazhdueshëm të çdo propozimi të partisë së saj.

Ajo ka deklaruar se përpjekjet e LVV-së për të shmangur zgjedhjet e parakohshme kanë hasur në bllokadë të plotë nga partitë opozitare.

“Secilit propozim të LVV-së, opozita iu përgjigj me refuzim. Përpjekja jonë për të shmangur zgjedhjet e parakohshme dhe të panevojshme hasi në një bllokadë të pakapërcyeshme. Në vend të angazhimit konstruktiv, pamë vetëm refuzim dhe mungesë vullneti për zgjidhje”, ka shkruar Nagavci.

Nagavci ka theksuar se, opozita nga PDK, LDK, AAK dhe Lista Serbe ka refuzuar një sërë propozimesh, përfshirë kandidatët për pozita të larta shtetërore dhe bashkëpunimin institucional.

“Nga PDK, LDK, AAK dhe Lista Serbe pamë refuzim ndaj propozimeve tona, refuzim për të marrë pjesë në votim, refuzim ndaj kandidatëve si Glauk Konjufca dhe Fatmire Kollçaku, si dhe ndaj figurave konsensuale si dr. Feride Rushiti dhe prof. Hatixhe Hoxha. U refuzua edhe bashkëqeverisja, pozita e kryeparlamentarit dhe ajo e presidentit. U refuzua edhe vetë procesi për zgjedhjen e Presidentit”, u shpreh ajo.

Ajo ka shtuar se situata aktuale po e çon vendin drejt zgjedhjeve të reja, për të cilat sipas saj, përgjegjësia bie mbi opozitën.

“Të dëshpëruar nga rezultati i zgjedhjeve të fundit, po na çojnë edhe një herë drejt zgjedhjeve të reja. Përgjegjësia për këtë situatë është e qartë dhe qytetarët do ta japin përgjigjen e tyre”, shkroi Nagavci.

Mbetje morore janë gjetur ditën e djeshme në Krushë të Vogël të Rahovecit.

Dyshohet se këto mbetje i përkasin personave të zhdukur nga lufta e fundit në Kosovë.

Lidhur me rastin detaje ka dhënë Kushtrim Gara, nga Komisioni Qeveritar për Persona të Zhdukur.

“Po flasim për një lokacion/rast të iniciuar nga Sektori për Persona të Zhdukur në kuadër të Drejtorisë së Policisë për Hetimin e Krimeve të Luftës. Në zbatim të urdhëresës së Gjykatës dhe sipas planifikimeve paraprake mes Komisionit Qeveritar për Persona të Zhdukur, Institutit për Mjekësi Ligjore dhe Drejtorisë së Policisë për Hetimin e Krimeve të Luftës në komunikim edhe me Departamentin për Krime Lufte në kuadër të Prokurorisë, gjatë ditës së djeshme janë realizuar gërmimet dhe zhvarrimi i mbetjeve mortore”, deklaroi Gara për Klankosova.tv.

Tutje, Gara deklaroi se në bashkëpunim me kolegët nga Instituti për Mjekësi Ligjore, ky lokacion është trajtuar në kuadër të procesit për konfirmimin e identitetit.

“Siç është bërë e ditur edhe përmes njoftimit të Policisë, mbetjet mortore të zhvarrosura janë dërguar në Institutin për Mjekësi Ligjore për ekzaminime të mëtejme dhe identifikim përmes analizës së ADN-së”, shtoi ai.

E ngarkuara me Punë e Shteteve të Bashkuara të Amerikës në Kosovë Anu Prattipati, nuk ka pranuar që të komentoj zhvillimet e fundit politike në Kosovë.

E, njëjta është pyetur lidhur me dështimin e zgjedhjes së presidentit të vendit dhe shkuarjen e vendit në zgjedhje të parakohshme.

Kuvendi i Kosovës, mbrëmë ka dështuar të zgjedhë presidentin e vendit.

Si shkak i kësaj, Kosova ka shkuar në zgjedhje të patakohshme. /eo

Nga: Dr. Arben Ahmeti

Si profesionist dhe akademik i angazhuar prej vitesh në fushën e Teknologjisë së Informacionit dhe Komunikimit (TIK), e kam ndjerë nga afër shpejtësinë e jashtëzakonshme me të cilën inovacioni po e riformëson realitetin tonë. Jemi në fillim të një epoke të re digjitale, të karakterizuar nga ndërlidhja e gjithçkaje, sistemet “e mençura” dhe një fuqi llogaritëse që deri para pak kohësh dukej e paimagjinueshme. Për të rinjtë që planifikojnë të ardhmen e tyre, njohja e këtyre trendeve nuk është thjesht çështje kureshtjeje akademike; është një orientim praktik drejt profesioneve me ndikim dhe perspektivë.

Në këtë kontekst, programet universitare të Shkencave Kompjuterike, siç janë programet studimore të ofruara nga Fakulteti i Shkencave Kompjuterike në Kolegjin AAB, kanë një vlerë të veçantë: ato krijojnë një rrugë të qartë nga bazat e të mësuarit deri tek aftësitë e aplikueshme, duke e bërë kalimin nga “të mësuarit” te “të ndërtuarit” më të natyrshëm dhe më të shpejtë. Për shumë studentë, ky rrugëtim është vendimtar, sepse shmang fragmentimin e dijes dhe e kthen përgatitjen akademike në kompetencë profesionale të matshme dhe të aplikueshme në praktikë.

Në vijim do t’i përmbledhim disa nga drejtimet kryesore teknologjike që po e shtyjnë këtë ndryshim dhe do të sqarojmë pse ndjekja e arsimit të lartë në programe të përshtatshme universitare nuk është vetëm një zgjedhje e mirë, por një domosdoshmëri për këdo që synon të shkëlqejë në një mjedis kaq dinamik.

Zhvillimi i pandalshëm i teknologjisë: prirjet që po e përcaktojnë të ardhmen

Bota e teknologjisë i ngjan një mozaiku të gjallë që pasurohet vazhdimisht me ide, metoda dhe zgjidhje të reja. Megjithatë, disa fusha janë qartësisht në vijën e parë, sepse hapin horizonte të mëdha, por njëkohësisht kërkojnë formim të specializuar dhe kompetenca të qëndrueshme. Pikërisht këtu, programet e mirëorganizuara universitare i ndihmojnë studentët të kuptojnë jo vetëm trendin, por edhe mekanizmat që e prodhojnë atë dhe si të kontribuojnë në të.

Inteligjenca Artificiale (IA) dhe Mësimi Makinerik (ML): “truri” i epokës digjitale

Inteligjenca Artificiale sot nuk është më një ide futuriste; ajo është një katalizator real i ndryshimit në pothuajse çdo industri. Qoftë te sistemet e rekomandimit, automjetet autonome, diagnostikimet moderne në mjekësi, apo përvojat e personalizuara për përdoruesit, IA po e shtyn përpara zhvillimin bashkëkohor. Veçanërisht, IA gjeneruese ka njohur një rritje të fuqishme, duke treguar se mund të prodhojë tekst, imazhe, madje edhe kod, duke e bërë kufirin mes krijimtarisë njerëzore dhe prodhimit të automatizuar më të paqartë.

Mësimi makinerik, si degë e IA-së, synon t’u japë sistemeve aftësinë të mësojnë nga të dhënat, të zbulojnë modele dhe të marrin vendime me sa më pak ndërhyrje manuale. Ndërkohë, mësimi i thellë, i frymëzuar nga rrjetet neurale, mbështet aplikime të avancuara si përpunimi i gjuhës natyrore dhe vizioni kompjuterik. Për pasojë, tregu po kërkon me ritëm të lartë inxhinierë të IA-së, ekspertë të ML, shkencëtarë të të dhënave me fokus në IA, si edhe profesionistë që merren me IA etike, duke e kthyer këtë fushë në një shtyllë për inovatorët e së nesërmes. Përveç mundësive të reja, automatizimeve, përmirësimeve të proceseve etj., IA dhe ML do të sjellin edhe sfida dhe transformim radikal të tregut të punës, siç është minimizimi apo edhe zhdukja e shumë llojeve të punëve që deri më tash janë kryer nga stafi njerëzor. Gjeneratat e reja të fuqisë punëtore duhet të jenë të përgatitura për këtë transformim radikal dhe për përfitimin e njohurive të reja të teknologjive të trendit.

Për studentët, përfitimi i një programi universitar është se IA nuk trajtohet vetëm si “mjet”, por si disiplinë dhe si garanci për aftësim në përputhje me nevojat e tregut të industrisë: nga bazat matematikore dhe logjika algoritmike, te puna me të dhëna, vlerësimi i modeleve dhe interpretimi i rezultateve. Një kurrikulë e strukturuar (siç synojnë programet studimore bashkëkohore në Shkenca Kompjuterike) e udhëzon studentin të ndërtojë aftësi hap pas hapi, duke krijuar vetëbesim profesional dhe një profil më të besueshëm në treg. Një kurrikulë të tillë, pa dyshim, e ofron Kolegji AAB.

Zhvillimi i softuerit: ndërtimi i realitetit digjital

Pas çdo aplikacioni, platforme në internet apo sistemi inteligjent që përdorim çdo ditë, qëndron puna e organizuar dhe komplekse e inxhinierisë së softuerit. Kjo fushë vazhdon të jetë baza e ekonomisë digjitale dhe po ndryshon vazhdimisht nëpërmjet qasjeve dhe mjeteve të reja, sidomos mundësive që ofrohen nga IA.

Kalimi drejt cloudit e ka transformuar mënyrën se si krijohen dhe shpërndahen shërbimet: infrastruktura bëhet më elastike, e shkallëzueshme dhe më e shpejtë për t’u menaxhuar. Praktikat DevOps e shkurtojnë dhe e standardizojnë ciklin e zhvillimit, duke rritur bashkëpunimin dhe automatizimin e shpërndarjes. Për më tepër, arkitekturat me mikroshërbime u lejojnë sistemeve të mëdha të ndahen në module më të vegjël, më të kontrollueshëm dhe të vendosshëm në mënyrë të pavarur.

Nga zhvilluesit full-stack, te zhvilluesit mobilë që ndërtojnë aplikacione për pajisjet tona, e deri te inxhinierët e specializuar në blockchain apo sisteme të integruara, kërkesa për profesionistë të aftë në softuer është e vazhdueshme. Njohja solide e gjuhëve programuese, si Python, C#, Java, JavaScript dhe C++, bashkë me kuptimin e algoritmeve, strukturave të të dhënave dhe programimit të sigurt, përbën bazën për këdo që dëshiron të krijojë zgjidhje të qëndrueshme për të ardhmen.

Këtu shfaqet qartë vlera e programeve universitare të orientuara drejt praktikës: studenti nuk mëson vetëm të shkruajë kod, por të punojë me standard, të dokumentojë, të testojë, të versionojë, të bashkëpunojë në ekip dhe të ndërtojë projekte që mund të shërbejnë si portofol profesional. Një program studimor i mirë (si ai që ofrohet nga programet e Fakultetit të Shkencave Kompjuterike të Kolegjit AAB) e përgatit studentin edhe për realitetin e punës në ekip, ku komunikimi teknik dhe përgjegjësia për cilësinë janë po aq të rëndësishme sa vetë programimi.

Shkenca e të dhënave dhe “Big Data”: nxjerrja e kuptimit nga sasia

Në një realitet ku çdo klikim, transaksion apo ndërveprim prodhon të dhëna, aftësia për t’i mbledhur, pastruar, analizuar dhe interpretuar ato është kthyer në një avantazh të madh. Shpesh dëgjojmë se të dhënat janë “derivati i ri”, sepse mbi to ndërtohen vendimmarrje në biznese, institucione publike dhe qendra kërkimore.

Shkenca e të dhënave është një fushë ndërdisiplinore që përdor metoda shkencore, algoritme dhe sisteme për të nxjerrë njohuri nga të dhëna të strukturuara dhe të pastrukturuara. Kjo përfshin që nga transformimi i të dhënave e deri te modelimi statistikor, parashikimi dhe vizualizimi. Profesionistët, si shkencëtarë të të dhënave, analistë të të dhënave dhe inxhinierë të ML, luajnë rol kyç në shndërrimin e informacionit të papërpunuar në inteligjencë të zbatueshme, që mbështet vendime strategjike dhe nxit risi. Paralelisht, po bëhen gjithnjë e më të rëndësishme praktikat e etikës së të dhënave, privatësisë dhe reduktimit të paragjykimeve në modele.

Për studentët, studimi i kësaj fushe brenda një programi universitar sjell një avantazh të çmueshëm: zhvillon mendim analitik të verifikueshëm. Në vend të përgjigjeve intuitive, studenti mësohet të argumentojë me prova, të testojë hipoteza dhe të shpjegojë kufizimet e rezultateve—aftësi që e rrisin besueshmërinë profesionale dhe e bëjnë më të gatshëm për role ku vendimmarrja mbështetet në të dhëna.

Drejtime të tjera me peshë

Edhe pse IA, zhvillimi i softuerit dhe shkenca e të dhënave përbëjnë “boshtin” kryesor, ka edhe fusha të tjera që po fitojnë rëndësi të veçantë. Siguria kibernetike është jetike për mbrojtjen e infrastrukturës digjitale ndaj kërcënimeve në rritje. Interneti i Gjërave (IoT) po lidh miliarda pajisje, duke prodhuar rrjedha të mëdha të dhënash që kërkojnë përpunim dhe menaxhim të avancuar. Blockchain sjell modele të decentralizuara për ruajtje dhe verifikim të të dhënave, me përdorime që shkojnë përtej kriptomonedhave. Ndërsa AR/VR po ndërtojnë përvoja inovative dhe po hapin rrugë drejt koncepteve si metaversi. Të kuptuarit e këtyre fushave të ndërlidhura është i domosdoshëm për një pamje të plotë të teknologjisë së sotme.

Për një student potencial, kjo do të thotë edhe diçka tjetër: një program studimor i mirë në Shkenca Kompjuterike nuk të “mbyll” në një rol të vetëm, por të jep fleksibilitet për të lëvizur mes disa rrugëve profesionale, nga zhvillimi i aplikacioneve te analiza e të dhënave, administrimi i sistemeve apo specializimi në siguri. Kjo liri zgjedhjeje është vlerë reale në një treg ku teknologjitë ndryshojnë, por nevoja për mendje të afta mbetet konstante.

Pse programet e kolegjeve universitare janë rruga më e sigurt drejt suksesit

Përballë këtyre zhvillimeve, dilema për të rinjtë ambiciozë është e thjeshtë: si përgatitesh në mënyrën më të mirë? Përgjigjja gjendet te programet universitare të hartuara me seriozitet, me orientim praktik dhe me vizion afatgjatë, siç janë programet studimore të Fakultetit të Shkencave Kompjuterike në AAB. Edhe pa hyrë në detaje specifike të një kurrikule të caktuar, mund të theksohen arsyet pse programet e ndërtuara mirë në këtë fushë janë thelbësore:

Bazë e fortë dhe e organizuar e njohurive: Studimet universitare ofrojnë themelin në shkenca kompjuterike, matematikë dhe statistikë, mbi të cilin ndërtohen teknologjitë moderne. Ato shkojnë më thellë se njohuritë sipërfaqësore, duke trajtuar algoritme, struktura të të dhënave, sisteme operative, rrjete dhe baza të të dhënave, në mënyrë që studenti të kuptojë jo vetëm “si”, por edhe “pse”. Kjo bazë e bën studentin më të sigurt kur përballet me teknologji të reja, sepse i njeh parimet që nuk ndryshojnë.

Specializim i lidhur me tregun e punës: Programet cilësore u japin studentëve mundësi të fokusohen në fusha me kërkesë të lartë si IA, inxhinieri softuerike, shkencë e të dhënave dhe siguri kibernetike. Kjo sjell aftësi konkrete dhe të aplikueshme, të cilat punëdhënësit i kërkojnë në mënyrë aktive. Për studentin, përfitimi praktik është i qartë: një profil më i dallueshëm dhe një drejtim më i qartë karriere.

Përvojë praktike dhe zgjidhje problemesh: Mësimi përmes projekteve, laboratorëve dhe praktikave profesionale në bashkëpunim me industrinë e shndërron teorinë në kompetencë reale. Studentët mësojnë të projektojnë, ndërtojnë, testojnë dhe vendosin zgjidhje që i afrohen standardeve të industrisë. Në të njëjtën kohë, krijojnë punë të dokumentuar (projekte, detyra, prezantime) që shërben si dëshmi e aftësive të tyre.

Mendim kritik dhe aftësi për t’u përshtatur: Meqë teknologjia ndryshon shpejt, vlera më e madhe e universitetit është se të mëson si të mësosh. Ai zhvillon arsyetim analitik, gjykim teknik dhe fleksibilitet intelektual, të domosdoshme për të ecur me ndryshimet dhe për të ndërtuar një karrierë afatgjatë. Kjo është veçanërisht e rëndësishme për studentët që synojnë të jenë konkurrues edhe pas disa vitesh, jo vetëm në momentin e diplomimit.

Rrjet profesional dhe mentorim: Ambienti akademik krijon mundësi për kontakte me pedagogë, profesionistë të industrisë dhe bashkëstudentë. Këto lidhje shpesh kthehen në bashkëpunime, mentorime, praktika pune dhe mundësi të reja karriere. Për një student, ky rrjet është një kapital i heshtur, por me ndikim të madh.

Qasje etike dhe ndikim shoqëror: Përtej aftësive teknike, programet serioze trajtojnë privatësinë, përgjegjësinë, ndikimin e automatizimit dhe etikën e IA-së. Kjo është thelbësore për të ndërtuar teknologji të besueshme dhe në shërbim të shoqërisë, dhe njëkohësisht i jep studentit një identitet profesional më të pjekur, ku “suksesi” matet edhe me përgjegjësi.

Përmbyllje: Merrni në dorë të ardhmen

Transformimi digjital nuk ndalet dhe as nuk pret. Ai po përshpejtohet, duke rritur kërkesën për profesionistë që dinë të krijojnë, të përmirësojnë dhe të udhëheqin. Për të rinjtë me pasion për teknologjinë, logjikën dhe krijimtarinë, një diplomë në Shkenca Kompjuterike ose fusha të afërta të TIK-ut në një program universitar të mirëstrukturuar, si programet studimore të Fakultetit të Shkencave Kompjuterike në AAB, është një investim me kthim të lartë: siguron njohuritë bazë, aftësitë praktike dhe formimin kritik për të mos qenë thjesht pjesë e ndryshimit, por për ta drejtuar atë.

Më e rëndësishmja, një program i tillë i jep studentit një avantazh të qëndrueshëm: disiplinën për të mësuar vazhdimisht, guximin për të provuar e ndërtuar dhe bazën për të konkurruar denjësisht në një treg gjithnjë e më ndërkombëtar. Angazhohuni seriozisht në mësim, ndërtoni kompetenca reale dhe përgatituni të jeni në pararojë të valës së radhës së inovacionit. E ardhmja është digjitale dhe i takon atyre që janë gati ta ndërtojnë.

(Autori është profesor universitar)

Një baner i madh e mbështetës për krerët e UÇK-së në Hagë është shfaqur sot në qendër të Prishtinës.

Fotografinë e ka publikuar sekretarja e Partisë Demokratike të Kosovës, Vlora Çitaku.

Në këtë baner janë fotot e Thaçit, Veselit, Krasniqit e Selimit.

Kujtojmë se në atë vend, më parë ka qenë flamuri i Ukrainës.

Ish-deputeti i PDK-së, Artan Behrami, ka reaguar me kritika ndaj zhvillimeve të fundit politike në vend, duke akuzuar për tentativë të dominimit të plotë institucional.

Sipas Behramit, gjatë mbrëmjes së kaluar, për disa orë, Parlamenti i Kosovës është shndërruar në një “Kongres Popullor”, pa opozitë, pa kundërshtime dhe pa respektim të rregullave.

Ai ka deklaruar se për një periudhë të shkurtër është krijuar një “realitet imagjinar”, me mbështetje absolute dhe dominim total, të shoqëruar me nënshtrim dhe duartrokitje nga përkrahësit.

Në reagimin e tij, Behrami shton se kjo situatë ishte e përkohshme, duke theksuar se “nën akrepat e orës”, në mesnatë, përfundoi ajo që ai e cilëson si një “ëndërr”.

Në fund, ai ka theksuar se “dielli sot lindi përsëri”, duke e lidhur këtë me vazhdimësinë e Republikës së Kosovës.

Presidentja e Komisionit Evropian, Ursula von der Leyen ka paralajmëruar për kostot e rënda ekonomike që konflikti në Iran po i shkakton Bashkimit Evropian, duke theksuar se pasojat mund të ndihen për muaj apo edhe vite.

Duke folur në seancën plenare të Parlamenti Evropian në Strasburg, ajo deklaroi se vetëm në 60 ditët e para të konfliktit, shpenzimet e BE-së për importet e lëndëve djegëse fosile janë rritur me mbi 27 miliardë euro.

“Po humbasim pothuajse 500 milionë euro në ditë”, u shpreh von der Leyen, duke e cilësuar situatën si krizën e dytë të madhe energjetike brenda katër viteve të fundit.

Sipas saj, zhvillimet e fundit tregojnë qartë se BE nuk mund të mbështetet më kaq shumë tek energjia e importuar. Ajo theksoi se rruga përpara është ulja e varësisë nga lëndët djegëse fosile dhe rritja e prodhimit vendas të energjisë së pastër dhe të përballueshme, përfshirë burimet e rinovueshme dhe energjinë bërthamore.

“Kjo është kriza e dytë e madhe energjetike në një periudhë të shkurtër prej katër vitesh. Mësimi duhet të jetë i qartë për të gjithë. Në një botë të trazuar si e jona, thjesht nuk mund të mbështetemi tepër në energjinë e importuar.

Rruga përpara është e qartë: duhet ta zvogëlojmë varësinë tonë të tepërt nga lëndët djegëse fosile të importuara dhe të rrisim prodhimin tonë vendas të energjisë së pastër dhe të përballueshme, nga burimet e rinovueshme te ato bërthamore, duke respektuar plotësisht neutralitetin teknologjik”, tha Von der Leyen.

Von der Leyen shtoi gjithashtu se ekziston një “realitet i ashpër”, pasi ndikimet e konfliktit në Lindjen e Mesme do të kenë efekt afatgjatë në ekonominë dhe sigurinë energjetike të BE-së.

“Ekziston një realitet i ashpër me të cilin të gjithë duhet të përballemi: pasojat e konfliktit në Iran mund të ndihen për muaj ose edhe vite që do të vijnë. Qëllimi ynë i përbashkët është tani të shohim një fund të qëndrueshëm të luftës. Kjo përfshin rivendosjen e lirisë së plotë dhe të përhershme të lundrimit në Ngushticën e Hormuzit pa taksa”, u shpreh më tej Von der Leyen.

Ajo nënvizoi se qëllimi kryesor i komunitetit ndërkombëtar mbetet arritja e një paqeje të qëndrueshme, duke përfshirë garantimin e lirisë së lundrimit në Ngushtica e Hormuzit dhe adresimin e çështjeve që lidhen me programin bërthamor dhe raketor të Iranit.

Një ndërhyrje e suksesshme kirurgjikale është realizuar në Klinikën e Kirurgjisë Torakale në kuadër të Qendra Klinike Universitare e Kosovës, ku një pacient 28-vjeçar është trajtuar me sukses pas një dëmtimi të rëndë që kishte pësuar muaj më parë.

Sipas njoftimit, bëhet fjalë për një pacient mashkull, i cili prej rreth 10 muajsh mbante një plumb të mbetur në lobin e poshtëm të mushkërisë së majtë.

“Falë përkushtimit dhe profesionalizmit të ekipit mjekësor, trupi i huaj është larguar përmes një ndërhyrjeje moderne dhe minimale invazive. Operacioni është kryer duke përdorur metodën bashkëkohore VATS-Uniportal, e cila mundëson ndërhyrje pa hapje të madhe kirurgjikale, duke reduktuar rrezikun e komplikimeve dhe duke përshpejtuar ndjeshëm procesin e rikuperimit”, thuhet në njoftimin e QKUK-së.

Sipas mjekëve, ndërhyrja ka rezultuar plotësisht e suksesshme, duke ruajtur funksionin e mushkërisë dhe duke shmangur çdo ndërlikim të mundshëm.

“Aktualisht, pacienti ndodhet në gjendje të mirë shëndetësore dhe po vazhdon rikuperimin pas operacionit”, thuhet tutje në njoftim.

Ky rast konsiderohet një tjetër dëshmi e avancimit të shërbimeve shëndetësore në vend dhe e përkushtimit të stafit mjekësor për të aplikuar teknikat më moderne në trajtimin e pacientëve.

Oda Ekonomike e Kosovës (OEK) i ka bërë thirrje Qeverisë që të ndërmarrë hapa të menjëhershëm për përfshirjen e vendit në projektet rajonale të gazit natyror, në një kohë kur rajoni po hyn në një fazë të rëndësishme të transformimit energjetik.

Sipas OEK-ut, zhvillimet e fundit në rajon – përfshirë marrëveshjen ndërmjet Bosnje dhe Hercegovinës dhe Kroacisë për lidhje me terminalin LNG në Krk, si dhe marrëveshjen e re në Shqipëri për gazin e lëngshëm natyror, e mbështetur nga Shtetet e Bashkuara të Amerikës – dëshmojnë qartë se Ballkani Perëndimor po ripozicionohet në hartën energjetike të Evropës.

Në këtë kontekst, kjo odë vlerëson se mungesa e Kosovës në këto iniciativa paraqet rrezik serioz për sigurinë energjetike dhe konkurrueshmërinë ekonomike të vendit.

“Kosova nuk ka luksin të mbetet anash, ndërsa rajoni po ndërton infrastrukturën e së ardhmes energjetike me mbështetjen e Shteteve të Bashkuara të Amerikës. Përfshirja në këto projekte është jetike për sigurinë energjetike, zhvillimin ekonomik dhe tërheqjen e investimeve strategjike,” ka deklaruar kryetari i Odës Ekonomike të Kosovës, Lulzim Rafuna.

OEK thekson se përfshirja e Kosovës në këto projekte duhet të bëhet në përputhje të plotë me standardet e Bashkimit Evropian dhe me mbështetjen e partnerëve strategjikë ndërkombëtarë, duke garantuar transparencë dhe procese të hapura konkurruese.

Oda Ekonomike e Kosovës njëherësh iu bën thirrje institucioneve vendore që të intensifikojnë dialogun me partnerët rajonalë dhe ndërkombëtarë, në mënyrë që Kosova të sigurojë një rol aktiv në këtë moment kyç për të ardhmen energjetike të rajonit.

Kompania Rajonale e Ujësjellësit “Mitrovica” ka njoftuar se konsumatorët që kanë borxhe mbi 50 euro, apo që janë në vonesë më shumë se 15 ditë nga data e pranimit të faturës, janë përfshirë në listën për shkyçje nga shërbimi.

“Të gjithë konsumatorët me borxh mbi 50€ ose që janë me 15 ditë vonesë nga dita e pranimit të faturës janë përfshirë në listën për shkyçje”, thuhet në njoftimin e KRU “Mitrovica”.

Nga kompania u ka bërë thirrje qytetarëve që të shmangin ndërprerjen e shërbimit dhe tarifat shtesë, duke kryer pagesat me kohë ose duke riprogramuar obligimet sa më parë.

“Shmangni ndërprerjen e shërbimit dhe tarifat shtesë duke kryer pagesat në kohë ose duke riprogramuar obligimet tuaja sa më parë”, thuhet më tej.

KRU “Mitrovica” ka apeluar që pagesat të mos shtyhen, duke u kërkuar konsumatorëve të veprojnë sa më shpejt.