Category: Lajme

Kërkesa e Prokurorisë u aprovua. Gjykata Themelore në Pejë vendosi që Urim Hyseni, i cili dyshohet për vrasjet e nënës së tij të mbahet në paraburgim për 30 ditë.

“Të pandehurit iu caktua masa e paraburgimit në kohëzgjatje prej tridhjetë (30) ditësh, pasi që gjykata konstatoi se kërkesa e prokurorit është e bazuar dhe në masën e duhur e arsyetuar, duke pas parasysh se i pandehuri është duke u hetuar për vepër të rëndë penale për të cilën Kodi Penal ka paraparë dënim me burgim jo më pak se dhjetë (10) vjet burgim ose me burgim të përjetshëm dhe se i pandehuri posedon leje qëndrimi jashtë shtetit, rrethana këto të cilat gjykata ka vlerësuar se tregojnë rrezikun e lartë se me gjetjen e të njëjtit në liri apo nën çfarëdo mase tjetër alternative, do të arratiset apo në çfarëdo mënyre do t’i shmanget organeve të ndjekjes dhe në këtë mënyrë do të pamundësojë apo vështirësojë në masë të madhe zhvillimin e hetimeve”, thuhet në përgjigjen e Gjykatës Themelore në Pejë.

Në një bisedë telefonike me ATV-në, avokati i të pandehurit, Asdren Mekaj potencon se gjendja psikike e klientit të tij është tejet e rënduar.

Ai ka kërkuar që Urim Hyseni të mbahet larg personave të tjerë.

“Nga veprimi që klienti im e ka bërë, gjenda e tij mentale është shumë e rënduar. Ne po ashtu kemi kërkuar nga Gjykata që i njëjti të mbahet larg njerëzve pasi mundë të jetë i rezikshëm edhe për ta. Unë nuk e di ku është ai tani, apo a është me dikë apo vet”, tha Mekaj.

Avokati Mekaj shprehet se duke u bazuar në gjendjen mendore të klientit të tij, vendin e ka në Institutin e Psikiatrisë Forenzike.

“Ne kemi bërë kërkesë në prokurori, që i njëjti të dërgohet në psikiatri forenzike. Ndërkohë kam lexuar se atje ka mungesë të kapaciteteve por ky është rast më i veçantë dhe besoj se organet e drejtësisë do ia bëjnë zgjidhjen.”, tha Mekaj.

Ndërkaq në aktvendimin e gjykatës thuhet se nëse ndaj të pandehurit ushtrohet ndonjë masë alternative, atëherë kjo mundë ta rrezikojë procesin e hetimeve.

“Po ashtu, duke pas parasysh peshën e veprës penale, mënyrën tejet mizore të kryerjes së veprës penale nga ana e të pandehurit, pasojat e rënda të kësaj vepre si dhe faktin se në këtë çështje pritet që të dëgjohen dëshmitarët okular të cilët janë familjarë të pandehurit, gjykata vlerësoj se të gjitha këto janë rrethana të posaçme që tregojnë rrezikun e lartë se me gjetjen e të njëjtit në liri apo nën çfarëdo mase tjetër alternative, do të arratiset apo në çfarëdo mënyre do t’i shmanget organeve të ndjekjes, do të mund të përsërisë veprën e njëjtë apo të ngjashme penale apo do të mund të ndikoj në dëshmitarë dhe në këtë mënyrë do të pamundësojë apo vështirësojë në masë të madhe zhvillimin e hetimeve por edhe procedurës penale në përgjithësi”, thuhet në përgjigjen e Gjykatës Themelore në Pejë.

Ndërkaq, Urim Hyseni dyshohet se me datë 14 prill në rrugën “Mbreti Zog” në Pejë, vrau nën e tij duke ia prerë kokën. Gjatë intervistimit në prezencë të psikiatrit është konstatuar se gjendja mendore e tij është e rëndë. /atvlive.tv

Kosova vazhdon të përballet me krizë ekonomike. Krahas kësaj, qytetarët vazhdojnë të blejnë artikuj me çmime mjaftë të larta.

E Qeveria nuk është se po bënë diçka në këtë aspekt, sipas ekspertëve të fushës.

Importi shumëfish më i madh se sa eksporti, sipas tyre është tregues i qartë se nuk mund të ketë zhvillim.

“Të gjitha ato mallra që blihen, që importohen e që ka mbërri në 5 miliard vitin e kaluar, krejt këto mjete dalin jashtë, kështu që ideja është ti shtoje prodhimin e mbaje në pronësi, ajo i ndihmon zhvillimit ekonomik, nuk i ndihmon importimi i mallrave. Por sido të jetë na duhet të punojmë shumë më shumë për me i orientu investimet brenda vendit”, tha kryetari i Odes Ekonomike të Kosovës, Lulzim Rafuna.

Përveç kësaj, qeveria po kritikohet edhe për mungesë të investimeve kapitale.

“Kjo Qeveri në aspekt të zhvillimit ekonomik, nuk ka treguar asnjë përkushtim dhe nuk ka marrë asnjë veprim për ta tejkaluar këto dhe me nxit zhvillimin ekonomik. Në anën tjetër i ka marrë disa veprime nga mjetet që i ka marrë nga qytetarët, duke i kthyer në forma të ndihmave dhe me këtë formë po mendojnë se e kanë larë ‘borxhin’ ndaj qytetarëve. Ato janë mjete të qytetarëve që u kanë marrë në formë të TVSh-së dhe taksave të ndryshme”, ish-ministër i Financave, Haki Shatri.

Kjo më pas thuhet se ndikon edhe në investimet e huaja, gjë që thonë se kanë rënë dukshëm.

“Mbetjet e rezervave të parave të pashfrytëzuara që janë rreth 760 milionë euro tregon se investimet kapitale kanë ngecur dhe kjo është tepër e dëmshme për zhvillimin ekonomik, për arsye se kur nuk ka investime kapitale, vjen pikërisht edhe rënia ekonomike dhe na është lidhur kjo, nga 2021 në 2022, ku kemi një rënie drastike nga 10. 7 për qind në 3, në mungesë të investimeve kapitale dhe në mungesë të investimeve të huaja”, tha kryetari i Aleancës Kosovare të Bizneseve, Agim Shahini.

Megjithatë, një investim në fushën e energjisë pritet të nis së shpejti.

Kjo falë marrëveshjes me Fondin Monetar Ndërkombëtar, në vlerë prej 260 milionë euro, të orientuar kryesisht në investime në ndërtim të kapaciteteve të reja të energjisë së ripërtrishme. /atvlive.tv

Ditët e pushimit i kalojnë në këtë fushë sportive, në lagjen “Bregu i Diellit”, në kryeqytet. Por për dallim nga vikendet e tjera, lojën po e zhvillojnë vetëm në një pjesë të saj.

Nga punimet që po zhvillohen aty për rregullimin e rrjetit të kanalizimit, rrethojat e fushës sportive u dëmtuan.

Rreziku që fëmijët të lëndohen, sipas prindërve, është i madh.

Për këtë arsye ata detyrohen të dalin me ta ose t’i mbajnë në banesë.

“Është dëmtua edhe fusha edhe lojërat e fëmijëve, tash po duhet ose me dal e me I ruajt fëmijët ose me I lanë brena, nuk kemi informata pse është tu ndodh kjo kështu”, tha Ilaz Grajqevci, banor.

E hallin e njëjtë e ka edhe Edi Mulaj. Ai thotë se për shkak të dëmtimit të fushës ata detyrohen të shkojnë e të luajnë diku tjetër

“Fusha për mu është bërë e pa shfrytëzueshme, unë me djalë dal e luaj diku tjetër këtu rrethojat janë dëmtua në afërsi s’mundesh me luajt se mundet me u rrezua e me pas fatalitet se aty ka hekura”, tha Edi Mulaj, banor.

ATV, ka provuar gjatë ditës të kontaktoj me dikë nga kompania e cila është duke i kryer punime aty, por kjo ka qenë e pa mundur.

Meqenëse se këta të fundit nuk u përgjigjen ATV, përmes telefonit ka biseduar me zyrtar të komunës së Prishtinës. Ata thanë se deri më tani nuk është marr asnjë vendim për rregullimin e saj, mirëpo vendimi për të do të bëhet gjatë javës së ardhshme. /atvlive.tv

Rreth 200 familje të Mitrovicës Jugore të cilat janë prekur nga vërshimet e janarit ende nuk janë kompensuar për dëmet shkaktuara.

Vlera e dëmit llogaritet të jetw rreth 9 milionë euro, ndërsa në veri mbi gjysmë milion.

Nënkryetari i komunës së Mitrovicës Jugore, Arianit Tahiri tha se çështja është ende në proces në Ministrinë e Financave.

“Vlera prej 500 mijë eurosh që është ndarë me propozim të kryetarit të Komunës dhe me votim unanim të Asamblesë të Kuvendit Komunal të Mitrovicës është procesuar në Ministrinë e Financave për alokim dhe në bazë të informacioneve të cilat aktualisht i kemi, janë çështje procedurale të cilat duhet të kalojnë nga zyra e ministrit të Financave… dhe presim përfundimisht që në këtë muaj të bëhet ekzekutimi i këtyre mjeteve tek familjet në nevojë”, tha nënkryetari i komunës së Mitrovicës, Arian Tahiri.

Sipas Kryesuesit të Kuvendit Komunal të Mitrovicës Veriore, Nexhat Uglani arsyeja e vonesës së kompensimit për familjet e prekura nga vërshimet është mosfunksionimi i punës në Komunë.

“Ende nuk e dimë sepse është mungesa e funksionalitetit këtu në pjesën veriore, kurse Komunat e tjera janë funksionale. Por, ne do të kërkojmë sa më shpejtë sepse njerëzit janë lodhur dhe janë kthyer në kushte jo adekuate, ndërsa ka familje që akoma nuk janë kthyer nëpër shtëpitë e veta… sepse nuk janë krijuar kushtet për një jetë normale”, tha Uglani.

Sipas tij, qeveria duhet të merr hapa më të shpejtë lidhur me këtë situatë, pasi që ka ende familje që nuk janë rikthyer në shtëpitë e tyre, e ka edhe raste të familjeve që po jetojnë ende në kushte jo adekuate.

Nga vërshime e janarit dëme kanë pësuar edhe shumë komuna të tjera në vend si Skenderaj, Istogu, Podujeva e Klina. /atvlive.tv

Një luftë për pushtet midis ushtrisë sudane dhe një force famëkeqe paraushtarake ka tronditur vendin, me më shumë se 50 civilë të raportuar të vdekur.

Banorët iu shmangën të shtënave në kryeqytet, Khartoum, ndërsa forcat rivale luftuan mbi pallatin presidencial, televizionin shtetëror dhe selinë e ushtrisë, raporton BBC.

25 persona, përfshirë 17 civilë, kanë vdekur në qytet dhe 595 njerëz kanë mbetur të plagosur. Përplasjet shpërthyen pas tensioneve mbi një kalim të propozuar në sundimin civil.

Si ushtria ashtu edhe kundërshtarët e saj, Forcat e Mbështetjes së Shpejtë (RSF), pretenduan se kishin kontrollin e aeroportit dhe vendeve të tjera kyçe në Khartoum, ku luftimet vazhduan gjatë natës.

Artileri e rëndë u dëgjua në Omdurman, që ngjitet me Khartoum-in, dhe aty pranë Bahri në orët e para të mëngjesit të së dielës. Dëshmitarët okularë raportuan gjithashtu të shtëna me armë zjarri në qytetin Port Sudan të Detit të Kuq.

Ushtria tha se avionët po goditnin bazat e RSF-së dhe forcat ajrore të vendit u thanë njerëzve të qëndronin në shtëpitë e tyre të shtunën mbrëma, ndërsa kryente një studim të plotë ajror të aktivitetit paraushtarak.