Category: Lajme

Kandidati i Vetëvendosjes për kryetar të Komunës së Mitrovicës Veriore, Erden Atiq, në një intervistë për KosovaPress, ka premtuar se do të demokratizojë komunën të cilën synon ta udhëheqë.

Ai konsideron se diskriminimi i hapur ndaj komuniteteve të caktuara është problemi më i madh që ka kjo komunë, me të cilin do të ballafaqohet menjëherë pas ardhjes në pushtet.

Atiq, duke folur edhe për kundër kandidatët nga subjektet e tjera politike që garojnë për udhëheqjen e kësaj komune, thotë për vete se është kandidati më i aftë për t’u përballur me sfidat e kësaj komune, siç e quan ai, problematike.

‘Mendoj se jam kandidati më i aftë për t’i përballuar sfidat e kësaj komune problematike, dhe mendoj se programi i Lëvizjes Vetëvendosje dhe i imi si kandidat për kryetar komune ofron program më të gjerë dhe më të mirë për qytetarët e komunës Veriore të Mitrovicës… Problemet (me të cilat do të merrem menjëherë) janë në të gjitha sferat, për shkak se institucioni i Komunës së Mitrovicës Veriore ka pasur mosfunksionalitet goxha të thellë, kështu që kjo ka me qenë një sfidë e vështirë… Menjëherë (do të ndërhyj) të demokratizoj institucionin e Komunës për shkak se ka pasur një diskriminim të hapur ndaj komuniteteve të caktuara, kështu që mendoj se kjo lyp një zgjidhje imediate menjëherë pas shpalljes së rezultatit, krijimit të organizmave qëllimi dhe hapi i parë që kam me ndërmarrë si kryetar i komunës’, ka thënë Atiq.

Sipas tij, ka kushte të plota për mbajtjen e zgjedhjeve më 23 prill dhe sa i përket situatës së sigurisë në veri ka ndryshime të mëdha që nuk ka pasur asnjëherë deri më tash, prej pas lufte.

Atiq nuk pret të ndodhë ndonjë incident në veri ditët në vijim dhe as ditën e zgjedhjeve, ndërsa thekson se institucionet e Republikës së Kosovës më në fund po e shtrijnë autoritetin e tyre edhe në këto katër komuna veriore të vendit.

‘Ka ndryshime të mëdha në terren në aspektin e sigurisë, pothuajse çdo dy-tre ditë ka intervenime, arrestime nga ana e policisë dhe është duke u luftuar krimi si asnjëherë më parë gjatë këtyre 23 viteve pas luftës… Po ndryshojnë rrethanat në terren, mirëpo ka një optimizëm se më në fund edhe institucionet e Republikës së Kosovës po shtrihen në këto katër komunat të veriut të Kosovës… Jo aspak (nuk pres incidente). Me informatat që i kemi, të gjitha institucionet janë duke i kryer obligimet dhe punët e tyre në terren, deri tash përveç incidenteve me vetura, incidente tjera nuk ka pasur, dhe me gjasë edhe kjo natyrë e problemeve shumë shpejtë ka me u ndalë… Ka kushte (për mbajtjen e zgjedhjeve). KQZ-ja i ka bërë përgatitjet e duhura dhe përveç vendvotimeve statike kanë caktuar edhe vendvotime në kontejnerë që kanë me ua lehtësuar qasjen qytetarëve me pas më afër dhe më lehtë vendvotimin”, vijoi Atiq.

Atiq iu ka bërë thirrje qytetarëve që të dalin ditën e zgjedhjeve në numër sa më të madh për të votuar, ndërsa ka garantuar se do të qëndrojë prapa të gjitha premtimeve të dhëna ndaj tyre.

“Mesazhi im për qytetarët është me dalë sa më shumë të votojnë, me përkrahë cilindo kandidat që ata mendojnë se meriton me udhëheqë komunën për këto dy vite e gjysmë. Me dalë sa më shumë pra, mos të hezitojnë, ndërsa unë si kandidat do të qëndroj prapa premtimeve dhe brengave të cilat i kanë ata’, u shpreh Atiq për KosovaPress.

Përpos kandidatit të LVV-së, për kryetar të Komunës së Mitrovicës Veriore garojnë edhe Taulant Kelmendi nga Partia Demokratike e Kosovës dhe Betim Osmani nga Iniciativa Qytetare Mitrovica. Të drejtë vote në këtë komunë kanë 18,118 qytetarë.

Edhe sot në Gjykatën Speciale të Kosovës do të vazhdojë gjykimi ndaj ish-krerëve të UÇK-së, teksa tërë javën do të jenë katër seanca.

Ndryshe dje ka përfunduar dëshminë e saj, dëshmitarja e parë, ndërsa trupi gjykues ka pranuar mocionin e mbrojtjes së Rexhep Selimit, për mospranim si prova, disa pjesë të dëshmisë së saj.

Ndërkohë ka filluar dëgjimi i dëshmitarit të dytë, po ashtu i mbrojtur, i cili ka thënë se është anëtar i LDK-së dhe ka thënë se ka qenë prezent në daljen e parë publike të UÇK-së. Ai, po ashtu ka thënë se Drejtoria Politike e UÇK-së në Malishevë, kishte ushtruar presion që LDK ta pushojë aktivitetin e saj.

Në rastin ndaj Hashim Thaçit, Kadri Veselit, Jakup Krasniqit dhe Rexhep Selimit, në javën e kaluar filloi procesi i paraqitjes së provave nga ana e Zyrës së Prokurorisë Speciale, respektivisht me dëgjimin e dëshmitarëve.

Ndryshe aktakuza e parë kundër katër të akuzuarve u konfirmua më 26 tetor 2020 dhe u bë publike më 5 nëntor 2020. Më 22 korrik 2021, Gjykatësi i Procedurës Paraprake, përmes dy vendimeve, miratoi pjesërisht mocionet e Mbrojtjes dhe urdhëroi ZPS-në që të korrigjojë dhe ndryshojë aktakuzën, mes tjerash, duke përjashtuar përgjegjësinë e ndërmarrjes së përbashkët kriminale III për krime me synim konkret (tri apele kundër këtij vendimi, të dorëzuara nga Thaçi, Selimi dhe Krasniqi, u hodhën poshtë nga Gjykata e Apelit më 22 gusht 2022).

Punëtorët teknik të Spitalit Rajonal “Isa Grezda” në Gjakovë kanë hyrë në ditën e 18-të të grevës. Arsyeja e grevës është paga e ulët, ndërsa kanë paralajmëruar se e njëjta do të vazhdojë deri në përmbushje të kërkesave të tyre.

Kryetari i Sindikatës së Pavarur të Sektorit Privat (SPSPK), Jusuf Azemi, ka thënë për Ekonomia Online, se kjo grevë është paralajmëruar katër muaj më herët, por që sipas tij, nuk janë marrë për bazë kërkesat e tyre. Kritika ka edhe për drejtorin e spitalit, për të cilin e akuzon për moskomunikim.

“Ka qenë një paralajmërim më shumë se 4 muaj ditë që kemi paralajmëruara drejtorinë e spitalit që mungesa e pagave adekuate, me një pagë 287 euro nuk mund të punojnë më gjatë. Pas 4 muajve, insistimi që të bisedojmë, të dialogojmë dhe të rrisim këtë pagë nuk kemi pasur rezultate dhe përfundimisht para 18 dite kemi hyrë në grevë, për të cilën ne menjëherë pas dy tre ditësh kemi komunikuar me drejtorin e Administratës së Spitalit, në fakt kërkesa jonë është parë si kërkesë legjitime, por kërkesat tona që i kemi shkruar para 4, 5 muaj dite për rritje pagave ata thonë se administrata nuk na e ka drejtuar, por megjithatë kjo nuk çon peshë”, tha Azemi për EO.

Azemi ka deklaruar se grevën nuk do ta ndërprenë nëse paga nuk rritet në 450 euro. Ai thotë se mungon vullneti që paga të bëhet aq sa kërkohet.

“Problemi është se spitali sipas asaj çka po mundem me pa nuk po e shtyn procesin përpara, ka rrugë ligjore i kemi shtjelluar të gjitha janë të gatshme vetëm po mungon vullneti i spitalit, që këto paga të rriten në 450 euro. Domethënë gjithçka është në rregull në aspekt ligjor, ka mbështetje ligjore, ka mjete por pse po e vargisin çështjen që të vjen deri tek kjo ditë”, thotë Azemi.

Azemi thotë se punëtorët aty kanë përgjegjësi aq të madhe sa e mjekut, pasi sipas tij, punën kryesore pas mjekut e kryejnë këtë punëtorë. Ai ka premtuar se do t’i vizitojë sërish të martën, pasi shprehen këmbëngulës për kërkesat e tyre.

“Gjithherë po flasim në emër të punëtorëve që janë në grevë, pasi që unë i kam vizituar 3 herë dhe duhet t’i vizitojë sërish, ata janë këmbëngulës sepse normal që nuk mund të jetohet edhe nuk mund të punohet me këtë pagë çfarë e kanë, është një punë shumë e ndjeshme, të bësh mirëmbajtjen e sallave të operacionit në spital nuk është punë e lehtë, por është përgjegjësi jashtëzakonisht e madhe, sa është përgjegjësi e madhe e mjekut që ta kontrollojë pacientin aq është përgjegjësi e madhe edhe e këtyre punëtorëve që të mirëmbajnë sallat e operacionit dhe është përgjegjësi dhe meqë kushtet ekzistojnë, mjete ka atëherë nuk e di pse nuk rriten këto paga, kur edhe vet thashë udhëheqja e spitalit e ka paraparë që kërkesa e tyre është legjitime”.

Teksa ka folur për grevën e këtyre punëtorëve, Azemi e quan legjitime kërkesën për rritje të pagave, me ç’rast thotë se konfirmim kanë marrë edhe nga drejtuesit e spitalit për këtë çështje. Ai shpreh keqardhje ndaj pacientëve për këtë grevë.

“Normal i zoti i shtëpisë është gjithherë fajtor pasi që në moment kur lindin një problem, duhet t’i thërret punëtorët, duhet ta thërret sindikatën dhe të shpjegojë ka mundësi, s’ka mundësi, ne bashkërisht jemi ulur dhe me drejtorin ekzekutiv dhe me drejtorët të tjerë dhe kërkesa është legjitime, modeli se si duhet të vihet deri te përfundimi i kësaj i kemi qitë në tavolinë ata kanë premtuar që për dy tre ditë, do të përfundojë kjo për megjithatë kjo nuk po përfundon. Neve na vjen keq për shkak të pacientëve por megjithatë në rend të parë që duhet t’i vijë keq, duhet t’i vijë keq Drejtorisë së Spitalit sepse ata për këtë paguhen”, u shpreh Azemi.

Në vitin 1982 u miratua vendimi që më 18 prill të çdo viti të shënohet Dita Ndërkombëtare e Monumenteve dhe Vendbanimeve Historike.

Kjo ditë shihet si mundësi për të gjithë komitetet kombëtare që të mbrojnë qëllimet e tyre të përbashkëta.

Një vit më vonë, Konferenca e Përgjithshme e UNESCO-s, u ka rekomanduar shteteve anëtare që të shqyrtojnë mundësinë e deklarimit të kësaj dite.

Sot bëhen 24 vjet nga beteja e zhvilluar te Shkëmbi i Gradinës, për të mos lejuar depërtimin e forcave armike në rrafshnaltën e Berishës, ku ndodhej SHP i UÇK-së, Spitali Ushtarak, Qeveria e Përkohshme e Kosovës, Agjencia e lajmeve “KosovaPress”, radio “Kosova e lirë” dhe rreth 100 mijë banorë nëpër grykat e maleve.

Në këtë betejë, pikërisht më 18 prill 1999, ranë heroikisht Islam Kastrati nga Kishnareka, Halim Bajraktari nga Drenasi, Mentor Morina nga Bushati, Ramadan Bytyqi nga Gjergjica dhe Mentor Gashi nga Llapushniku.

Luftimet e prillit 1999 në këtë anë kanë qenë vendimtare jo vetëm për rrjedhat e luftës çlirimtare, por mbi të gjitha kanë qenë vendimtare për të shpëtuar jetën e njerëzve që kanë qenë në këto gryka.

Po ashtu, luftëtarët që e bënë betejën e prillit 1999 kanë qenë muri i gjallë që nuk e ka lejuar ushtrinë dhe policinë serbe të depërtojë te popullata.