Category: Lajme

Sipas rezultateve preliminare në komunën e Zubin Potokut, Partia Demokratike e Kosovës raportohet t’i prijë garës.

Izmir Zeqir, kandidati i PDK-së për të parin e kësaj komune raportohet të ketë mbledhur gjithsej 196 vota duke lënë pas kandidatin nga LVV-ja Flatron Hasanin me 180 vota.

Ndryshe, Komisioni Qendror i Zgjedhjeve bëri të ditur se është përmbyllur procesi zgjedhor në katër komunat në veri të Kosovës.

Në këto zgjedhje votuan 1.567 qytetarë apo 3.47 për qind e trupit votues.

Drejtori i të ashtuquajturës Zyre për Kosovë në Qeverinë e Serbisë, Petar Petkoviq, ka thënë se në zgjedhjet për katër komunat në veri të Kosovës të dielën kanë votuar vetëm 13 qytetarë të nacionalitetit serb.

Sipas Petkoviqit, dy kanë votuar në Mitrovicë të Veriut, shtatë në Leposaviq, katër në Zveçan. Nuk ka pasur asnjë votues serb në Zubin-Potok. Petkoviq tha se votuan 1566 shqiptarë në total, duke shtuar se kishte 499 shqiptarë më pak se zgjedhjet e kaluara.

“Ishin 499 shqiptarë më pak krahasuar me zgjedhjet e kaluara. Është e qartë se edhe shqiptarët bojkotuan këto zgjedhje”, tha Petkoviq në konferencë për media, transmeton “RTS”. “Fituesit e vërtetë janë serbët, që totalisht bojkotuan zgjedhjet, pasi nuk duan okupimin e veriut. Kjo është humbje për komunitetin ndërkombëtar, që përkrahu Kurtin. Tash dua të shohë përfaqësuesit e komunitetit ndërkombëtar që urojnë ata që votuan në kontejnerë”.

Petkoviq ka shtuar se “pa formimin e Asociacionit nuk ecet tutje”.

Në përcjelljen e Policisë, kandidatja e vetme për kryetare të Zveçanit nga komuniteti serb, Sladjana Pantovic, u paraqit në vendvotim.

Pasi hodhi votën e saj, Pantovic tha se shpreson në më shumë siguri për qytetarët e katër komunave në veri.

“Pres për qytetarët e Zveçanit se do të jetë më mirë se sa që ka qenë deri më tani, që zgjedhjet do të mbahen të qeta, në mënyrë të qetë dhe pa incidente, sepse mendoj se zgjedhjet po mbahen dhe duhet të mbahen në paqe, në dashuri dhe respekt për popullin dhe jo me urrejtje, kërcënime dhe shantazhe”, tha Pantovic.

Ndërhyrja e Policisë nuk ishte e nevojshme në asnjë moment – pasi procesi i jashtëzakonshëm zgjedhor në Mitrovicë e Veriut, Zveçan, Leposaviq e Zubin Potok vijoi pa incidente.

Megjithatë, për të siguruar mbarëvajtjen e procesit që u parapri me djegie veturash, Policia shtoi prezencën në afërsi të qendrave të votimit me njësitë e zakonshme patrulluese dhe të trafikut – pa angazhimin e specialëve.

“Synimi i PK-së si çdo herë mbetet, që përmes realizimit të detyrave në mënyrë profesionale të garantojë ushtrimin e lirë të së drejtës së votës, të ndërmarrë veprime parandaluese ndaj dukurive negative dhe aktiviteteve kriminale që në çfarëdo mase do të rrezikonin sigurinë, qetësinë dhe stabilitetin në vend”, thotë Policia.

Pos qendrave të votimit, njësi statike e patrulluese u panë edhe rrugëve përgjatë kryesore.

Në gjendje gatishmërie ishte edhe Prokuroria.

“Që nga ora shtatë e mëngjesit të ditës së sotme, prokurorët së bashku me Policinë e Kosovës janë të angazhuar, në stacione policore të katër komunave gjegjëse, për të mbikëqyr për së afërmi mbarëvajtjen e procesit zgjedhor, të cilët janë në gjendje gatishmërie që të reagojnë në çdo rast ku ka pengim të procesit të votimit. Gjithashtu, në këtë proces zgjedhor janë të angazhuar edhe gjyqtarët kujdestarë të cilët janë në gatishmëri për çdo eventualitet”, thuhet në përgjigjen e Prokurorisë.

Në afërsi të vendvotimeve u panë edhe ekipe të KFOR-it dhe EULEX-it. /atvlive.tv

Kryetari i Komisionit Qendror Zgjedhor, Kreshnik Radoniqi, ka treguar në një konferencë për media pas përfundimit të procesit zgjedhor në katër komunat në veri ka kalaur pa incidente dhe se dalja ka qenë e ulët.

Ai ka treguar numrin e votuesve dhe ka treguar kur përafërsisht mund të priten rezultatet preliminare.

“Procesi zgjedhor është zhvilluar pa problem. Komisionerët janë duke bërë numërimin e fletëvotimeve”

“Dua të ju njuftoj se pas numërimit në katër komuna rezutlatet preliminare do të publikohen në faqen zyrtare të KQZ-së përfaërsisht diku rreth orës 20:00”, ka thënë ai.

Siç ka njoftuar KQZ deri në ora 19:00 në Mitrovicën e Veriut ka pasur 837 vota, në Leposaviq 141 votues, në Zubin Potok 385, ndërkaq në Zveçan gjithsej 204 votues.

Një 50-vjeçar i nacionalitetit serb, i cili u zhduk të premten në afërsi të Zubin Potokut, sot është gjetur pa shenja jete në një kanal ku po kërkohet që nga dje, ka konfirmuar Policia e Kosovës.

Zhdukja e 50-vjeçarit u raportua dje në orët e para të mëngjesit nga vëllai i tij.

Prej asaj kohe deri në orën 17:00 policia dhe zjarrfikësit kanë kontrolluar kanalin Ibër-Lepenc, i cili ndodhet rreth 100 metra larg shtëpisë së të ndjerit.

Kërkimet e djeshme rezultuan të pasuksesshme, ndaj vazhduan edhe sot. Zhytësit e Njësisë Speciale të Policisë së Kosovës kanë arritur ta gjejnë një trup në rrezen e kërkimit prej 1 km, i cili, siç konfirmohet, është gjetur pa shenja jete.

Zëvendëskomandanti i policisë rajonale të veriut, Veton Elshani, ka treguar se për momentin supozohet se ka qenë aksident, por se do të përcaktohet ende.

Shumica e serbëve në katër komunat në veri të Kosovës duket se po i bojkotojnë zgjedhjet e parakohshme lokale në atë pjesë. Nga 45,095 qytetarë me të drejt vote, deri në orën 15:00, kanë votuar vetëm 1092 persona. Ndërkohë, nga 19 qendra të votimit, në pesë qendra nuk ka shkuar asnjë qytetarë për të votuar.

Sipas burimeve të KosovaPress-it, deri në këto momente asnjë qytetarë nuk ka shfrytëzuar të drejtën kushtetuese për të votuar në dy qendra të votimit në Zubim Potok, pastaj në dy qendra të votimit në Leposaviq dhe një qendër në Zveçan.

Në veri sot janë hapur 19 qendra të votimit, prej të cilave 13 janë alternative apo të ashtuquajtura “kontejnerë”, ku qytetarët kanë mundësi të zgjedhin katër kryetarët e komunave dhe në dy prej tyre edhe asambleistët.

Në dhjetor të vitit 2022, presidentja e Kosovës, Vjosa Osmani e ndikuar nga situata e brishtë e sigurisë, mori vendim për të shtyrë për disa muaj datën e zgjedhjeve, nga 18 dhjetori në 23 prill.

Që nga shpallja e datës së re të zgjedhjeve, partia më e madhe serbe, Lista Serbe, u ka bërë thirrje qytetarëve serbë që të bojkotojnë këto zgjedhje. Njëjtë ka vepruar edhe shteti serb, presidenti i të cilit, Aleksandër Vuçiq edhe personalisht ka përsëritur thirrjet për bojkot, duke pretenduar se vetëm “100 serbë” do të marrin pjesë në to.

Vetëm tri ditë para ditës së zgjedhjeve, njëra nga subjektet politike serbe, Partia Kosovskih Srba (PKS) është tërhequr nga gara zgjedhore. Kandidati i saj për kryetar të Leposaviqit, Aleksandër Jabllanoviq dhe 18 kandidatët për asamblenë e kësaj komune, janë tërhequr nga procesi zgjedhor.

Në përgjithësi, numri i kandidatëve të certifikuar për pjesëmarrje në zgjedhjet për kryetar të katër komunave është 11, ndërsa më shumë se 60 kandidatë janë certifikuar për pjesëmarrje në zgjedhjet për dy kuvendet komunale.

Në zgjedhjet për kryetar të komunës së Leposaviqit në garë janë: Albulena Hetemi Behluli (PDK) Aleksandër Jablanoviq (PKS) dhe Lulzim Hetemi (VV).

Në Zubin Potok gara zhvillohet mes dy kandidatëve, Izmir Zeqirin nga PDK dhe Flatron Hasanin e Vetëvendosjes.

Në Zveçan kandidojnë Ilir Peci nga PDK-së, Fetah Peci nga VV, ndërsa Sladjana Pantoviq është kandidate e pavarur.

Në zgjedhjet për kryetar të Mitrovicës së Veriut garojnë Iniciaitva Qytetare Mitrovica me kandidatin Betim Osmani, PDK me Taulant Kelmendin dhe Vetëvendosje me Erden Atiq.

Kurse, në zgjedhjet për dy kuvendet komunale, Partia Demokratike e Kosovës garon me 16 kandidatë në Zveçan dhe 2 në Leposaviq, e Lëvizja Vetëvendosje me 10 kandidatë në Zveçan dhe 18 në Leposaviq. Nga radhët e komunitetit serb, vetëm Partia Kosovskih Srba ka rreth 20 kandidatë në garë për kuvendin e komunës së Leposaviqit.

Tre qytetarë të nacionalitetit serb kanë votuar në qendrën e votimit në Leposaviq. Kështu bëri të ditur menaxheri i kësaj qendre, Enver Aliu.

Ai tha se nuk procesi i votimit është i qetë dhe nuk kanë evidentuar ndonjë parregullsi.

“Qendra është hap me kohë, deri në këtë moment i kemi tre votues të nacionalitetit serb. Votues serb… gjithçka ka shkuar qetë… jo jo, gjithçka është në rregull”, tregon ai, transmeton kp.

Në këto zgjedhje të jashtëzakonshme në Mitrovicë të Veriut, Leposaviq, Zubin Potok e Zveçan, të drejtë vote kanë mbi 45 mijë qytetarë. Në kuadër të këtij procesi, janë planifikuar të hapen 19 qendra të votimit, prej të cilave 13 janë alternative apo të ashtuquajtura “kontejnerë”. Në garë janë dhjetë kandidatë, prej të cilëve vetëm një nga komuniteti serb.