ATV

Category: Lajme

  • Qytetarët ankohen se s’ka punë, bizneset se s’ka punëtorë

    Qytetarët ankohen se s’ka punë, bizneset se s’ka punëtorë

    Derisa qytetarët ankohen se nuk ka punë, punëdhënësit ankohen se nuk ka punëtorë.

    Mekanizmat ndërmjetësues që bëjnë lidhjen mes punëkërkuesve dhe tregut të punës nuk funksionojnë si duhet, sipas njohësve të çështjeve socio-ekonomike.
    Sipas tyre, çështja e punës nuk ka qenë kurrë temë politike në vend.

    “Pa u bërë çështja e punës temë politike nuk ka demokratizim domethënës të shoqërisë së Kosovës. Ikja masive drejt perëndimit e ka origjinën pikërisht te çështja e demokracisë në vendin e punës, të ardhurat shumë të ulëta, pabarazia shumë e lartë, sistemi i mbrojtjes sociale i cili është tepër primitiv”, tha Artan Mustafa, socio-ekonomist.

    Megjithatë, për ta rregulluar raportin punëtor – punëdhënës, Ministria e Financave ka bërë gati një Koncept-Dokument.

    Ky ka për qëllim shkrirjen e 3 ligjeve, përfshirë atë për ofrimin e shërbimeve për të papunët, punëkërkuesit dhe punëdhënësit, Ligjin për Agjencinë e Punësimit dhe atë për Aftësimin, Riaftësimin Profesional, në një ligj të vetëm; atë për politikat e tregut të punës.

    Një nismë e tillë, vlerësohet se mund të ketë sukses në uljen e papunësisë në vend.

    “Rritja e efiçiencës së administratës, do t’i kontribuojë implementimit më të suksesshëm të këtyre politikave. Nuk është me rëndësi çfarë rezultati kanë sot këto politika, sot për sot është me rëndësi fillimi i ndryshimit të paradigmës dhe nuk do të ketë maksimizim të shkallës së punësimit, nuk do të arrijmë shkallën e punësimit 60 për qind e më lart, pa një formë gjithëpërfshirëse”, tha Mustafa.

    Një plan i tillë parashihet të kontribuojë në punësim më të lartë dhe gjithëpërfshirës, si dhe të zvogëlojë barrën administrative të bizneseve që ofrojnë shërbime të punësimit, për rreth 12 mijë euro.

    Për t’u bërë i plotfuqishëm, sipas Ministrisë së Financave, këtij ligji do t’i duhen plot 2 vjet kohë. /atvlive.tv

    Edicionin e Qendror të lajmeve e gjeni në videon më poshtë:

  • Shteti “heq dorë” nga ish drejtuesit e inteligjencës

    Shteti “heq dorë” nga ish drejtuesit e inteligjencës

    Asnjë nga pesë ish-drejtorët e Agjencisë së Kosovës për Inteligjencë nuk janë të angazhuar në pozita të larta në institucionet shtetërore të sigurisë e as pjesë e kabineteve të presidentes apo kryeministrit.

    Vite më parë, disa prej tyre, punuan si këshilltarë për siguri në Presidencë, por një praktikë e tillë nuk u vazhdua – pasi legjislacioni aktual nuk krijon obligime ndaj institucioneve për angazhimin e tyre pas përfundimit të mandatit në Agjenci.

    Ekspertë të sigurisë e vlerësojnë moskujdes institucional në dëm të sigurisë kombëtare, mos-angazhimin e personave që kanë ushtruar ndonjërën nga tri pozitat kyçe në AKI: drejtor, zëvendës-drejtor dhe kryeinspektor.

    “Kjo është një neglizhencë nga niveli politik që nuk e ka paraparë fare mundësinë e inkorporimit të tyre për një periudhë afatgjate, për arsye se këta persona, të cilët kanë bartur funksione të larta në këtë institucion kanë klasifikuar informacione që e atakojnë në mënyrë të drejtpërdrejtë sigurinë nacionale të Republikës së Kosovës”, tha eksperti i sigurisë, Drizan Shala.

    Duke përmendur ndjeshmërinë e informacioneve dhe përvojën e tyre, ekspertët vlerësojnë se duhet të bëhen ndryshime në legjislacion – për të mundësuar sistemimin në pozita të përhershme këshillëdhënëse.

    “Këta të mbesin në rrugë, në mëshirën e grupeve të tjera të interesit. Mendoj se në këtë aspekt duhet që sa më parë të jetë e mundur që këta persona të ri-inkorporohen në Këshillin e Sigurisë Kombëtare, ku mund të japin mendime, sugjerime në aspektin profesional, duke pasur parasysh përvojën e tyre. Në Këshillin e Sigurisë Kombëtare duhet fillimisht të ndryshojë ligji, në rend të parë, por njëkohësisht t’u jepet mundësia që të gjithë akterët, edhe ish-drejtorët e Policisë të inkorporohen në këtë mekanizëm”, tha Shala.

    “Do të duhej që kjo çështje të rregullohej me Ligjin për AKI-në, të bëhet plotësimi dhe ndryshimi i këtij ligji, në mënyrë që këto tri figura kryesore udhëheqëse në Agjencinë Kosovare për Inteligjencë të angazhohen dhe të japin kontribut në ato vende ku japin kontribut për sigurinë kombëtare të Kosovës”, tha Avni Islami, profesor i lëndëve të sigurisë.

    Angazhimi si ligjërues në Akademinë për Siguri Publike përmendet si opsion tjetër.

    Së fundmi, kryeministri i Shqipërisë, Edi Rama, propozoi ish-zëvendësdrejtoren e AKI-së, Vlora Hyseni, për ta udhëhequr inteligjencën shqiptare. Tri javë më parë ajo mori detyrën në krye të shërbimeve sekrete shqiptare, pas dekretimit nga ana e Presidentit, Bajram Begaj.

    Bashkim Smakaj, Agron Selimaj, Driton Gashi, Shpend Maxhuni dhe Kreshnik Gashi janë pesë ish-drejtorët e AKI-së në periudhën 2009-2020. Nga vitit 2021, në këtë pozitë është Petrit Ajeti. /atvlive.tv

    Edicionin e Qendror të lajmeve e gjeni në videon më poshtë:

  • Zbrazet Gërmia për 1 maj, shitësit nuk lejohen të shesin ushqime në parkun e gërmisë

    Zbrazet Gërmia për 1 maj, shitësit nuk lejohen të shesin ushqime në parkun e gërmisë

    Ëmbëlsirat i mori me shpresë që do t’i shesë, por bashkë me to mbeti në rrugë.

    Veton Zejnullahu, bashkë me shumë shitës të tjerë u ndaluan nga policia në hyrje të Parkut të Gërmisë, në të cilin çdo 1 maj kanë shitur produkte të ndryshme për vizitorët.

    “Sot është dita e 1 majit, nuk janë duke na lejuar, as leje nuk na japin, as në dorë nuk lejojnë, nuk e di tash, as nuk të lojnë me punu, as punë nuk ka kurrkund. Kërkesë nuk kemi bërë, por as leje nuk na kanë dhënë, secilën herë 1 Maji ka ra, qysh është bërë më herët. Nëse nuk mundemi në një vend, të paktën të na lejojnë në dorë me i mbajtë e m’i shitë”, tha Zejnullahu.

    Por edhe sikur t’i lejonte policia të futeshin me produktet e tyre brenda parkut, të paktë ishin blerësit e mundshëm.

    “Qe 44 vjet jam në Prishtinë, rregullisht kam dalë për 1 maj në Gërmi, por kjo është hera e parë që nuk ka qytetarë dhe nuk i di arsyet pse nuk ka”, thotë Ahmet Ahmeti, qytetar.

    Sipas tyre, kriza ekonomike ka ndikuar që të mos ketë numër të lartë të qytetarëve.

    “Kur të del njeri me bo pushim duhet me pasë pare, duhet me pasë me hangër me pi, sot nuk ka asgjë. Me 100 euro, me 300 euro nuk mundesh me mbijetu, të gjithë kanë qef me dalë, por nuk kanë mundësi, përpara nuk kemi pasë, por prapë më mirë se sot kemi qenë”, tha Tafë Duraku, qytetar.

    Megjithatë, Komuna e Prishtinës për këtë ditë ishte përgatitur. Një ditë më parë ka marrë vendim që për Ditën e Punëtorëve të ndalojë qarkullimin e automjeteve që kalojnë në Parkun e Gërmisë, me qëllim që të evitohet tollovia në komunikacion për 1 maj. /atvlive.tv

    Edicionin e Qendror të lajmeve e gjeni në videon më poshtë:

  • Kurti niset për Bruksel pa e parë draft statutin e Asociacionit

    Kurti niset për Bruksel pa e parë draft statutin e Asociacionit

    Kryeministri Albin Kurti është shprehur i lumtur që, në takimin 2 Majit në Bruksel, do të shohë përmbajtjen e draft-statutit për Asociacionin e komunave me shumicë serbe, i përgatitur nga Ekipi Menaxhues.

    Në një intervistë për agjencinë kroate të lajmeve “Hina”, kryeministri, megjithatë, tha se do të ishte më i lumtur po ta shihte draftin në Prishtinë, paraprakisht.

    “Do të sigurohem që të përmbushet ajo që është dakorduar më 27 shkurt në Bruksel, ekzistenca e një niveli të duhur të vetëqeverisjes së komunitetit serb, sipas standardeve më të larta ndërkombëtare evropiane për mbrojtjen e pakicave. Por, ajo që nuk do të lejojmë është territorializimi dhe krijimi i çdo gjëje që do të dukej si Republika Srpska në Bosnjë dhe Hercegovinë. Nuk do të lejojmë një parashtet satelitor, me thelb shkatërrues, që do të minonte shtetësinë e Kosovës”, tha Kurti.

    Në një reagim, kryenegociatori i Serbisë, Petar Petkoviç, tha se Kurtit nuk i takon të lejojë ose jo formimin e Asociacionit.

    “Marrëveshja e parë e Brukselit, plani i zbatimit i marrëveshjes për normalizimin e marrëdhënieve, fusha e punës dhe mandati i Ekipit Menaxhues, si dhe parimet e përgjithshme për formimin e Asociacionit janë marrëveshje shumë të qarta, të cilat saktësojnë të gjitha obligimet me të cilat përballet Prishtina”, tha Petkoviç.

    Në një reagim në rrjetet sociale, Përfaqësuesi i Posaçëm i BE-së për Dialogun, Miroslav Lajcak, e vlerësoi shumë të rëndësishëm takimin ndërmjet kryeministrit të Kosovës, Albin Kurti, dhe presidentit të Serbisë, Aleksandar Vucic.

    Miratimi i deklaratës për të zhdukurit gjatë luftës dhe prezantimi i draft-statutit të parë të Asociacionit, janë dy pikat e para në rend dite në takimin që pritet të nisë rreth orës 18, të martën. /atvlive.tv

    Edicionin e plotë të lajmeve e gjeni në videon më poshtë:

  • ​Ministri bullgar i Drejtësisë: Abuzuesit duhet të trajtohen, jo thjesht të mbyllen

    ​Ministri bullgar i Drejtësisë: Abuzuesit duhet të trajtohen, jo thjesht të mbyllen

    Duke komentuar Projektligjin për dhunën në familje, ministri në detyrë i Drejtësisë në Bullgari, Krum Zarkov, tha të hënën se nuk mjafton thjesht të mbyllësh abuzuesit dhe kriminelët. Zarkov saktësoi se persona të tillë kërkojnë trajtim.

    Ai tha se kriminelët duhet të trajtohen në mënyrë të tillë që të rehabilitohen.

    “Nëse ata përballen me vështirësi mendore ose të tjera, ata duhet të trajtohen në mënyrë që të mos lëndojnë më të tjerët. Kjo është një nga çështjet e mëdha që unë do të përpiqem të trajtojë si ministër i drejtësisë,” tha ai.

    Zarkov deklaroi se recidivizmi është një kërcënim për publikun. Ai shtoi se “për shkak se këta njerëz shkojnë në burg, dënohen, pastaj dalin dhe përsërisin krimet e tyre, dhe të tjerët vuajnë pasojat. Nuk bëhet fjalë vetëm për vrasje. Një numër shumë i madh i grave dhe fëmijëve i nënshtrohen abuzimeve të llojeve të ndryshme ose mbahen në varësi, qoftë psikologjike apo financiare”.

    Ai nuk ka dashur të nënvizojë ndonjë rast konkret, ai ka thënë se për një kohë të gjatë ky debat ka dështuar të zhvillohet në mënyrë normale, gjë që fatkeqësisht ka rezultuar me viktima njerëzore.

    Duke komentuar kërkesën e Këshillit të Lartë Gjyqësor në Bullgari për rritje të pagave prej 20% në vitin 2023, Zarkov tha se debati për buxhetin është i hapur.

    “Disa nga [kërkesat] janë legjitime dhe të tjerat duhet të shqyrtohen. Tani kjo është në dorën e deputetëve, të cilët duhet të vendosin. Ajo që ka bërë qeveria e përkohshme është të tregojë planet e shtetit me politikat që janë në rrezik. Ato janë subjekt i ndryshimit, por jo nga një qeveri e përkohshme”, tha ai./BTA

  • ​Falimenton edhe një tjetër bankë e madhe amerikane

    ​Falimenton edhe një tjetër bankë e madhe amerikane

    Korporata Federale e Sigurimit të Depozitave (FDIC) e konfirmoi të hënën, më 1 maj, se banka e madhe amerikane, First Republic, ka falimentuar. Gjiganti bankar i investimeve, JP Morgan Chase, do ta marrë përsipër tani këtë bankë.

    Sipas marrëveshjes së ndërmjetësuar nga rregullatorët, JP Morgan Chase do t’i marrë përsipër të gjitha depozitat dhe shumicën e aksioneve të bankës First Republic.

    First Republic është banka e tretë amerikane që ka falimentuar gjatë muajve të fundit, gjë që ka nxitur shqetësimet për një krize më të gjerë bankare.

    Aksionet e bankës me seli në San Francisko ranë për më shumë se 75 për qind javën e kaluar pasi ajo pranoi se klientët kishin tërhequr 100 miliardë dollarë gjatë muajit mars.

    Falimentimi i First Republic vjen pas kolapsit të Silicon Valley Bank (SVB) në mars dhe rënies së një huadhënësi tjetër amerikan, Signature Bank.

    Jamie Dimon, shefi ekzekutiv i JP Morgan Chase tha se qeveria e kishte “ftuar” gjigantin bankar, së bashku me të tjerë, ta merrnin situatën në duar “dhe ne e bëmë”.

    Ai shtoi se blerja do të sillte “përfitime modeste” për firmën dhe do të ishte pjesë “plotësuese” e firmës aktuale.

    Si pjesë e marrëveshjes, FDIC do të ndajë humbjet nga huatë me JP Morgan. 84 zyrat e bankës së dështuar në tetë shtete të ndryshme do të rihapen si degë të JP Morgan Chase Bank nga 1 maji, pasi rregullatorët morën kontrollin e saj dhe ia shitën menjëherë institucionit të Wall Street.

    Tërheqja e depozitave nga disa huadhënës gjatë muajve të fundit e ka detyruar Rezervën Federale, bankën qendrore të SHBA-së, të ndërhyjë me masa urgjente për t’i stabilizuar tregjet financiare.

    Në mars, një grup i bankave më të mëdha të Amerikës i grumbulluan së bashku 30 miliardë dollarë për First Republic në një përpjekje për ta stabilizuar atë, por përpjekjet rezultuan të kota.

    E themeluar në vitin 1985, First Republic është një huadhënëse amerikan e madhësisë së mesme, e ngjashme me Silicon Valley Bank. Për vite me radhë, ajo u ka shërbyer klientëve të pasur – paratë e të cilëve ishin në rrezik përpara se marrëveshja të shpallej pas një fundjave negociatash, shkruan REL.

    Kur Silicon Valley Bank dhe Signature falimentuan, FDIC tha se do të garantonte të gjitha depozitat për ta parandaluar një situatë ku njerëzit do të nxitonin t’i tërhiqnin paratë e tyre.

    E përderisa bankat qendrore në mbarë botën kanë ngritur dukshëm normat e interesit për ta ulur inflacionin, disa huadhënës janë vënë nën presion.

    Por, situata aktuale nuk duket të jetë një përsëritje e krizës financiare së vitit 2008, që kishte çuar në pako të shumta ndihme nga qeveritë dhe një recesion ekonomik global.

  • Mediumi britanik raporton për protestën e 1 Majit në Kosovë

    Mediumi britanik raporton për protestën e 1 Majit në Kosovë

    Tabloidi britanik ‘Daily Mail’ në një artikull ku raporton për protestat për Ditën Ndërkombëtare të Punëtorve, më 1 maj, ka përdorur edhe fotografinë e protestës së mbajtur të hënën në Prishtinë.

    “Një protestues mban pankartë gjatë një proteste për të shënuar ditën ndërkombëtare të punëtorëve, në Prishtinë, Kosovë më 1 maj 2023”, thuhet në përshkrimin e fotografisë.

    Në Francë, sindikatat planifikuan demonstrata masive për të protestuar kundër vendimit të diskutueshëm të presidentit francez, Emmanuel Macron për të rritur moshën e pensionit nga 62 në 64. Vendi është në trazira civile që nga vendimi i reformave të skemës pensionale, në janar të këtij viti.

    Në prag të zgjedhjeve presidenciale turke më vonë këtë muaj, protestuesit e goditur rëndë nga kriza e kostos së jetesës u përleshën gjithashtu me policinë turke në Stamboll.

    Ndërkaq, në protestën e 1 majit në Kosovë, u kërkua përmirësim i kushteve nga sektori privat.

  • Kurti: Kemi marrë vendime që prekin direkt jetën punëtorëve

    Kurti: Kemi marrë vendime që prekin direkt jetën punëtorëve

    Me rastin e Ditës Ndërkombëtare të Punëtorëve, kryeministri i Kosovës Albin Kurti ka thënë se ekzekutivi nën udhëheqjen e tij ka marrë një sërë hapash, vendimesh e iniciativash për punëtorët.

    Kryeministri Kurti ka shkruar në Facebook se vendimet e Qeverisë kanë prekur direkt jetën e punëtorëve.

    “Si qeverisje e re kemi ndërmarrë një sërë hapash, vendimesh e iniciativash ligjore që prekin direkt jetën e punëtorëve. Kemi hartuar dhe dërguar në Kuvend Projektligjin për Pagën Minimale, ligj që presim që Kuvendi ta miratojë sa më parë. Me qëllim shtimin e inspektimeve për zbatim sa më të mirë të ligjit të punës është ndarë buxheti për të shtuar numrin e inspektorëve në terren. Ndërkohë që në buxhetin e këtij viti kemi paraparë 240 inspektorë shtesë në sektorë të ndryshëm”, ka shkruar ai.

    Kurti përmendi punësimin e të rinjve që tha se u bë përmend platformës “Superpuna”, rritjen e pagave në sektorin publik, si dhe planin që ta rrisin numrin e inspektorëve të punës.

    “Gjatë këtyre dy viteve qeverisje kemi ndërmarrë masa që nxisin punësimin me theks të veçantë punësimin e grave dhe të rinjve. Me masën 1.3, rreth 5 mijë gra më shumë janë punësuar, ndërkaq përmes platformës ‘Superpuna’ kemi mbështetur punësimin e të rinjve, me ç’rast nga muaji shkurt janë realizuar 4501 marrëdhënie pune përmes kësaj platforme (deri në çastin e këtij postimi)”, shkruan Kurti.

    Postimi i plotë i Kurtit:

    ”8 orë punë, 8 orë argëtim dhe 8 orë pushim”, ishte slogani i kërkesës në kundërshtim të eksploatimit të punëtorëve që për herë të parë u bë publikisht në Australi më 1885. Një vit më vonë në po këto kërkesa kujtojmë rezistencën e njohur të punëtorëve në Çikago. Sot e asaj dite me 1 Maj shënojmë Ditën Ndërkombëtare të Punëtorëve, jo vetëm duke i kujtuar ata, por edhe duke u angazhuar për barazi, të drejta dhe kushte më të mira të punës e jetesës.

    Si qeverisje e re kemi ndërmarrë një sërë hapash, vendimesh e iniciativash ligjore që prekin direkt jetën e punëtorëve. Kemi hartuar dhe dërguar në Kuvend Projektligjin për Pagën Minimale, ligj që presim që Kuvendi ta miratojë sa më parë.

    Me qëllim shtimin e inspektimeve për zbatim sa më të mirë të ligjit të punës është ndarë buxheti për të shtuar numrin e inspektorëve në terren. Ndërkohë që në buxhetin e këtij viti kemi paraparë 240 inspektorë shtesë në sektorë të ndryshëm.

    Gjatë këtyre dy viteve qeverisje kemi ndërmarrë masa që nxisin punësimin me theks të veçantë punësimin e grave dhe të rinjve. Me masën 1.3, rreth 5 mijë gra më shumë janë punësuar, ndërkaq përmes platformës ‘Superpuna’ kemi mbështetur punësimin e të rinjve, me ç’rast nga muaji shkurt janë realizuar 4501 marrëdhënie pune përmes kësaj platforme (deri në çastin e këtij postimi).

    Po ashtu, kemi rritur pagat në sektorin publik dhe përmes pakove të ndërmarra nga Qeveria kemi mbështetur rritjen e pagave për 17 mijë punëtorë të sektorit privat.

    Punësimi ka qenë njëri prej prioritete tona kryesore dhe së bashku me të esenciale janë edhe të drejtat në punë. Në këtë drejtim në vitin e kaluar janë bërë 6316 inspektime nëpër biznese që synim kanë pasur monitorimin e respektimit të Ligjit të Punës dhe ligjeve të tjera në fuqi. Vetëm në tremujorin e parë të këtij viti janë shqiptuar 153 gjoba për mosrespektim të këtyre ligjeve.

    Kosova ka vuajtur edhe nga papunësia edhe nga shkelja e të drejtave në punë. Jemi duke u përpjekur që krahas zgjerimit të punësimit, të eliminojmë në maksimum shkeljet e të drejtave në punë. Jemi të vetëdijshëm për gjendjen në të cilën e kemi gjetur punëtorin, por do të vazhdojmë të jemi të pakompromis në rregullimin e kushteve të punës dhe respektimin e të drejtave të tij të garantuar me Kushtetutë.

    Urime 1 Maji i punëtorëve!

  • Tentoi të vetëvritej, shpëtohet 62-vjeçari në Ferizaj

    Tentoi të vetëvritej, shpëtohet 62-vjeçari në Ferizaj

    Një 62-vjeçar në Ferizaj është shpëtuar nga Policia pasi ka tentuar të vetëvritet. Sipas një komunikate dërguar mediave, Policia ka bërë të ditur se 62-vjeçari kishte hipur në një vinç të lartë rreth 40 metra, afër një objekti banesor në Ferizaj dhe po tentonte të vetëvritej.

    “Sot, rreth orës 13:00 Policia Rajonale e Ferizajt ka pranuar një informatë se një person mashkull, kosovar i moshës 62 vjeçar, kishte hipur mbi një vinç të lartë rreth 40 metra, afër një objekti banesorë në ndërtim në rrugën ’’Ahmet Kaciku’’ në Ferizaj dhe po tentonte të vetëvritej. Menjëherë në vendin e ngjarjes kanë dalë ekipe të policisë nga njësia reaguese dhe njësia e hetimeve së bashku me mbikëqyrësin e ndërrimit të stacionit të policisë në Ferizaj”, njoftoi Policia.

    Sipas njoftimit të Policisë, ai u shpëtua nga një zyrtar policor.

    “Janë marrë të gjitha masat e nevojshme për shpëtim nga ekipet në vendin e ngjarjes, është bllokuar për qarkullim rruga ” Ahmet Kaçiku ” dhe menjëherë mbikëqyrësi i ndërrimit ka filluar të negocioj me viktimën dhe ta bindë atë, që mos të kërcejë/bëjë vetëvrasje nga lartësia. Pas shumë përpjekjeve të mbikëqyrësit të ndërrimit Toger R.H, në ora 13:50 viktima është bindur dhe ka lejuar që të shpëtohet dhe të zbresë nga vinçi në tokë pa asnjë lëndim”, thuhet tutje në njoftimin e policisë.

    Tutje, bëhet e ditur se viktima është shoqëruar në stacionin e policisë në Ferizaj dhe nën autorizim të prokurorit kujdestar nga Prokuroria Themelore në Ferizaj, rasti është cilësuar ” Vetëvrasje në tentativë”, ndërsa policia po vazhdon hetimet.

     

  • Mjekë të huaj punojnë në Kosovë pa licenca

    Mjekë të huaj punojnë në Kosovë pa licenca

    Edhe pse e ndaluar me ligj, në Kosovë ka mjekë të huaj që ushtrojnë veprimtaritë e tyre pa u lajmëruar dhe pa u licencuar nga institucioni përkatës.

    Për këtë shkelje, Inspektorati Shëndetësor i Ministrisë së Shëndetësisë ka shqiptuar në vitin 2022 së paku 26 gjoba.

    Në një deklaratë dhënë Radios Evropa e Lirë thuhet se “Inspektorati Shëndetësor ka hasur në raste të ofrimit të shërbimit shëndetësor nga mjekë jokosovarë pa vendim për angazhim të përkohshëm nga Bordi Qendror për Regjistrim dhe Licencim nga Ministria e Shëndetësisë”.

    Sipas Ligjit për dhënien e lejes për punë dhe punësimin e shtetasve të huaj në Kosovë, secili person që hyn në Kosovë për punë, duhet ta ketë lejen e qëndrimit dhe atë të punës.

    Një Udhëzim Administrativ për licencimin e përkohshëm të profesionistëve shëndetësorë, i nxjerrë në tetor të vitit të kaluar, i obligon institucionet shëndetësore, publike dhe private, që të paraqesin kërkesë për leje apo licencim, në rast se angazhojnë profesionistë të huaj shëndetësorë.

    Leja dhe licencimi bëhet nga Bordi për Regjistrim dhe Licencim i Ministrisë së Shëndetësisë dhe monitorohet nga Inspektorati Shëndetësor.

    Në bazë të Udhëzimit Administrativ, institucionet shëndetësore që kanë të punësuar profesionistë të huaj shëndetësorë pa leje, gjobiten me 5.000 deri në 8.000 euro. Mjeku ose ndonjë profesionist tjetër shëndetësor i huaj, që punon pa leje pune, mund të gjobitet me 500 deri në 1.500 euro.

    Nga Inspektorati Shëndetësor tregojnë për REL-in se rastet zbulohen zakonisht gjatë bisedave me pacientë, të cilët i përshkruajnë mjekët dhe i japin emrat e tyre, por ata emra nuk figurojnë në librin e shënimeve të institucionit shëndetësor. Mjekët nga shteti i Turqisë përmenden në mënyrë të veçantë.

    Nga Oda e Mjekëve të Kosovës shprehin shqetësim për mënyrën sesi funksionojnë dhe licencohen mjekët ndërkombëtarë në Kosovë.

    Kryetari i kësaj ode, Pleurat Sejdiu, thotë se mjekët e huaj, të cilët kryejnë shërbime në Kosovë, sipas ligjit, duhet të anëtarësohen fillimisht në këtë odë, por, sipas tij, ata nuk e bëjnë një gjë të tillë.

    “Jemi të vetmit në Evropë dhe më gjerë, ku licencimin e tyre [mjekëve të huaj] e bën Ministria e Shëndetësisë dhe jo Oda. Nuk kemi të dhëna rreth aktivitetit të tyre. Me Ligjin e shëndetësisë, ata duhet të anëtarësohen në Odë, por me Udhëzimin Administrativ ky obligim është hequr”, thotë Sejdiu për Radion Evropa e Lirë.

    “Inspektorati Shëndetësor, në këtë aspekt, nuk bashkëpunon me ne”, shton ai.

    REL-i kontaktoi tri spitale private në Kosovë, për të cilat është në dijeni se herë pas here angazhojnë mjekë të huaj për të dhënë shërbime, por nga asnjëri prej tyre nuk pranuan të flasin për këtë temë.

    Bujar Vitija, kryeredaktor i gazetës “Shneta” që raporton për sektorin e shëndetësisë në Kosovë, thotë se mjekët e huaj që ofrojnë shërbime në Kosovë, në shumë raste, bëjnë shkelje ligjore duke mos i plotësuar të gjitha kriteret për licencim, ose duke mos u licencuar fare në Ministrinë e Shëndetësisë.

    “Në disa raste, këta mjekë vijnë për të rekrutuar pacientë për t’i trajtuar në vendet e tyre”, thotë ai, pa specifikuar më shumë.

    “Disa prej kritereve që nuk i plotësojnë, janë: mosnjohja e gjuhës shqipe, mosanëtarësimi në Odën e Mjekëve, mosregjistrimi për licencim në Ministrinë e Shëndetësisë…”, shton Vitija.

    Sipas tij, Ministria e Shëndetësisë duhet t’i rrisë kapacitetet e Inspektoratit Shëndetësor dhe të kërkojë më shumë përgjegjësi në monitorimin dhe mbikëqyrjen e këtyre rasteve.

    “Ata [mjekët e huaj] vijnë si turistë në Kosovë, zhvatin pacientët kosovarë dhe në shumë raste kalojnë pa u vërejtur fare nga Inspektorati Shëndetësor”, thotë Vitija.

    Në Inspektoratin Shëndetësor punojnë gjithsejtë 13 zyrtarë: kryeinspektori, asistenti ekzekutiv, zyrtari i arkivit dhe dhjetë inspektorë shëndetësorë.

    Kosova, viteve të fundit, është duke u përballur me mungesë mjekësh dhe infermierësh, pasi një numër i tyre ka migruar kryesisht në vendet e Bashkimit Evropian.

    Ministria e Shëndetësisë e Kosovës u ka bërë thirrje profesionistëve të fushave të ndryshme mjekësore në mesin e mërgatës shqiptare, që të angazhohen dhe punojnë në institucionet shëndetësore publike të Kosovës.