Një grua është arrestuar në Mitrovicë pasi që e njëjta dyshohet se ka kryer veprën penale “Keqtrajtim apo braktisje e fëmijës”.
E njëjta dyshohet se ka kryer veprën penale ndaj dy viktimave femra kosovare, njofton policia.
Pas intervistimit të palëve në prezencë të punëtorit të QPS-së me vendim të prokurorit e dyshuara është liruar në procedurë të rregullt.
Gjykata Themelore në Prishtinë, ka shpallur aktgjykim dënues ndaj të akuzuarit Latif Ibrahimi, duke e dënuar me 5 mijë euro gjobë për veprën penale “falsifikimi i dokumentit zyrtar”.
Aktgjykimi ndaj të akuzuarit Ibrahimi, u shpall të premten, nga kryetari i trupit gjykues, Kushtrim Shyti, raporton “Betimi për Drejtësi”.
Sipas aktgjykimit, i akuzuari Ibrahimi u dënua me 6 muaj burgim, por me pëlqimin e tij, dënimi me burgim iu zëvendësua me 5 mijë euro gjobë.
Sipas aktgjykimit, i akuzuari obligohet që t’i paguajë edhe shpenzimet e procedurës penale në shumë prej 100 euro në emër të paushallit gjyqësor si dhe 50 euro për fondin e viktimave të krimit.
Pala e pakënaqur, ndaj këtij vendimi ka të drejtë ankese në afat prej 30 ditësh.
Sipas aktakuzës së ngritur më 1 korrik 2020, Latif Ibrahimi akuzohet se më 3 dhjetor 2017, në zyrën e Gjendjes Civile në Fushë-Kosovë, duke shfrytëzuar detyrën zyrtare në cilësinë e personit zyrtar të Gjendjes Civile, në regjistër ka shënuar të dhëna të rreme, me qëllim që të pandehurit Marjan Veljiçkoviq t’ia mundësojë marrjen e dokumenteve personale të Republikës së Kosovës.
Tutje, sipas aktakuzës Ibrahimi ka bërë ndërhyrje në sistemin elektronik të Gjendjes Civile, duke përdorur të dhënat personale të Marjan Veliçkoviq, ashtu që ka bërë rishkrimin e lindjes respektivisht gjenerimin e numrit personal të dëshmitarit, kjo duke shtuar shkronjën “J” në mbiemrin e të njëjtit dhe të prindërve të tij – Veljiçkoviq.
Në aktakuzë, thuhet se me ndryshmin e tillë në sistemin elektronik të gjendjes civile, automatikisht është gjeneruar numër i ri personal për të pandehurin Marjan Veljiçkoviq, por të dhënat e tjera kanë mbetur të njëjta me ato të dëshmitarit, me të cilin rast të pandehurit Marjan Veljiçkoviq i është mundësuar të pajiset me letërnjoftim dhe pasaportë të Republikës së Kosovës.
Me këtë, akuzohet se ka kryer veprën penale “Falsifikimi i dokumentit zyrtar” nga neni 434, par.1 të Kodit Penal të Republikës së Kosovës, vepër kjo e dënueshme deri në 5 vite burgim.
Dhoma e Tregtisë dhe Industrisë Kosovë kërkon nga Qeveria e Kosovës që të bëhet ekzekutimi i menjëhershëm i pagesave për të gjitha bizneset të cilat tashmë kanë rekrutuar staf përmes platformës “Superpuna”.
Përmes një komunikate për media, pas ankesave të vazhdueshme të pranuara nga bizneset, Dhoma e Tregtisë ka shprehur shqetësimin e saj lidhur me vonesat e pagesave për punëtorët e rekrutuar përmes kësaj platforme, pagesa këto të cilat fillimisht duhet të kryhen nga bizneset në mënyrë vetanake për të gjithë të punësuarit e tek më pas të bëhet rimbursimi nga Qeveria e Kosovës.
“Aktualisht, subvencionimi nga Qeveria bëhet me një muaj diferencë, ngase deklarimi i punëtorëve në ATK bëhet deri më datë 15 të muajit vijues të angazhimit. Pra, për punëtorët e angazhuar në muajin mars, deklarimi në ATK bëhet deri më 15 prill. Proces ky i cili po zvarritet, konkretisht tek në muajin Maj është bërë subvencionimi i kompanive për muajt Shkurt dhe Mars”, thuhet aty.
Dhoma e Tregtisë thekson se bizneset nuk duhet të detyrohen të hyjnë në borxhe në banka për të kryer paga dhe më vonë të presin kompenzimin nga Qeveria me data të paqarta.
“Duke pasur parasysh kostot rreth përgatitjes së kërkesës, aprovimit, pagesës e tek me vonë kompensimit, ne mendojmë se ky proces do të duhej të thjeshtësohet duke bërë që autoritetet të paguajnë praktikantët direkt në vend se të përllogaritet pensioni e taksa bashkë me shumën e subvencionuar e cila për nga natyra nuk do të duhet të ishte e tatueshme… Për më tepër të gjitha kompanitë për të punësuar staf përmes plaformës Superpuna, duhet të mos kenë obligime në Administratën Tatimore të Kosovës, sfidë që e kanë shumica e bizneseve në këtë situatë të jashtëzakonshme për të bërit biznes”, thuhet në komunikatë.
Kryeministri i Kosovës, Albin Kurti, tha se është koha që Bashkimi Evropian ta ndryshojë qasjen ndaj Ballkanit Perëndimor, raporton Ekonomia Online.
Kurti në konferencën për ”Balkan Dialogues Initiative”, shtoi se sa i përket dialogut Kosova është konstruktive në këtë proces.
Kurse sa i përket të drejtave të minoriteteve, Kurti shtoi se është Kushtetuta e Kosovës e cila i garanton të drejtat për pakicat.
“Ka ardhur koha për Bashkimin Evropian që ta ndryshojë qasjen ndaj rajonit. Fondet e BE-së duhet të ndërlidhen me vlerat evropiane. Kur bëhet fjalë për bashkëpunim rajonal, ne kemi ratifikuar tri marrëveshjet nga procesi i Berlinit”.
“Sa i përket dialogut me Serbinë, ne jemi konstruktiv dhe kreativ në këtë proces. Ne besojmë se marrëveshja bazë e arritur është një hap i rëndësishëm”.
Modeli kroat sa shkon e diskutohet më shumë, kur është fjala për formimin e Asociacionit të komunave me shumicë serbe. Në pak sekonda, mund të mësoni se çfarë parasheh ky model, pse është zgjedhur dhe si po e komenton BE-ja.
E gjithë kjo ide, nisi me 9 maj kur kryeministri Albin Kurti, ka pritur në takim ministrin e Punëve të Jashtme dhe Evropiane të Kroacisë, Gordan Grlić Radman, me të cilin ka biseduar edhe për procesin e dialogut me Serbinë.
Sipas njoftimit të Qeverisë, Kurti e ka njoftuar diplomatin kroat se në takimin e fundit të nivelit të lartë, që u mbajt javën e kaluar në Bruksel, ka paraqitur vizionin e tij për zbatimin e nenit 7 të Marrëveshjes Bazike, bazuar në modelin kroat të trajtimit të pakicave kombëtare serbe.
“Në lidhje me të, ai tha duke qenë vend anëtare e BE-se dhe e NATO-s, Kosova e sheh Kroacinë si tregim suksesi dhe model që duhet ndjekur për sa i takon të arriturave ekonomike dhe demokratike, por edhe për sa i përket respektimit të të drejtave të minoriteteve”, thuhet në njoftimin e Qeverisë.
Por çfarë për përmban “Asociacioni kroat”?
Këshilli i Përbashkët i Komunave Serbe (Zajedničko veće opština – ZVO), përmbledh komunat ku jetojnë serbët në lindje të Kroacisë, është modeli të cilin kryeministri i Kosovës, Albin Kurti, e ka dhënë si propozim në Bruksel për Asociacionin e Komunave me shumicë Serbe.
Kurti pas përfundimit të takimit me presidentin serb, Aleksandër Vuçiç e ndërmjetësit, Josep Borrell e Miroslav Lajçak tha se ka dhënë këtë variant si “draft-vizioni”.
Ky model kroat, i cili është krijuar pas përfundimit të konflikteve në Sllavoninë Lindore në Kroaci, është futur në Marrëveshjen e Erdutit me dokumentin me anë të të cilit është konfirmuar ri-integrimi paqësor i rajoneve që kontrolloheshin nga serbët nën autoritetin e Zagrebit.
Organi është gardian i interesave të komunitetit serb në dy qarqe kroate: Osijek-Baranja dhe Vukovar-Srem, ndërsa përbëhet nga përfaqësues të nëntë komunave.
Ai është mekanizëm politik, këshillues dhe koordinues, i zgjedhur në mënyrë demokratike që ka kompetenca “vetëmenaxhuese” sa i përket çështjeve të të drejtave civile dhe kombëtare të serbëve, si dhe çështjeve të identitetit, kulturës, pjesëmarrjes dhe integrimit të tyre në shoqërinë kroate.
Këshilli i Përbashkët i Komunave Serbe mund të jetë shoqatë qytetarësh të cilën, sipas ligjit kroat, mund ta formojë kushdo nga tre persona – ajo formohet në bazë të dokumenteve ndërkombëtare çfarë ka qenë Marrëveshja e Erdutit dhe vendimit të Qeverisë së Kroacisë. Pra, ajo nuk përbën një njësi territoriale.
Kjo pajisje për serbët në Kroaci ishte themeluar mbi bazën e “traditës shekullore të vetëqeverisjes serbe” në Kroaci, e cila shkon prapa në kohën e kuvendeve para kishtare/publike, përmes akteve ligjore dhe politike që rregullonin pozitën e serbëve në Kroaci gjatë shekujve XVIII dhe XIX.
Asambleja Themeluese e Këshillit të Përbashkët ishte mbajtur në vitin 1997 në Zagreb me nxitjen e Aleancës së Organizatave Serbe dhe anëtarëve të saj: Shoqatës Kulturore Serbe, Forumit Demokratik Serb, Komunitetit të Serbëve nga Rijeka dhe Istria si dhe Këshilli i Përbashkët i Komunave Serbe.
Pas miratimit të Aktit Kushtetues për të Drejtat e Pakicave Kombëtare në vitin 2002, kishte ndryshuar edhe struktura organizative e këshillave të pakicave kombëtare etnike. Anëtarët zgjidhen me votim të fshehtë, në zgjedhjet e organizuara nga shteti kroat në të gjitha njësitë e vetëqeverisjes lokale.
Në nivel komunal, këshilli i serbëve zgjidhet nëse aty jetojnë së paku 200 pjesëtarë të komunitetit serb. Në nivel qarku ky numër arrin në 500. Në rastin kur janë të paktën 100 pjesëtarë, zgjidhet vetëm një përfaqësues i këshillit. Kjo vlenë për njësitë lokale, ku popullsia serbe e kalon pragun prej 1.5 për qind.
Këshilli i Komunave Serbe përbëhet nga kuvendi – organi më i lartë – në të cilin bëjnë pjesë anëtarët nga radhët e komunitetit serb, pavarësisht nga përkatësia e tyre partiake. Ata zgjidhen në përputhje me statutin e këtij instrumenti. Kuvendi përbëhet nga 28 anëtarë dhe kryesohet nga presidenti i këshillit.
Çfarë u vendos në takimin e djeshëm?
Takimi mes kryeministrit të Kosovës, Albin Kurti, dhe presidentit serb, Aleksandër Vuçiç në Bruksel u përmbyll me dy zhvillime pozitive dhe një negativ.
Si një arritje të madhe përmendi marrëveshjen për zbardhjen e fatit të të zhdukurve me dhunë të luftës së fundit.
Në bazë të dokumentit, Serbia ka pranuar që të hapë arkivat e saj dhe të mundësojë qasjen edhe dokumentet sekrete lidhur me luftën e zhvilluar në Kosovë për periudhën nga janari i vitit 1998 deri në dhjetor të vitit 2000.
Draft-statuti i parë për krijimin e Asociacionit të Komunave me shumicë serbe në Kosovë, ishte një tjetër zhvillim që u konsiderua pozitiv nga Borrell duke e konsideruar një hap të mirë drejt përmbylljes së kësaj çështje 10-vjeçare, por jo version përfundimtar.
Zyrtari i BE-së konfirmoi pakënaqësitë e mëdha të Kurtit për draft-statutin e paraqitur nga ekipi menaxhues, në të cilin Kosova nuk ka asnjë anëtar dhe Serbia ka një deputete në të.
Pikërisht kjo e fundit bëri të ditur se draft-statuti për Asociacionin është përpiluar për katër muaj që në vitin 2018-të. Si zhvillim negative, Borrell konsideroi zhvillimet e fundit në veri të Kosovës, përfshirë pjesëmarrjen e ulët në zgjedhjet lokale të pjesshme.
Kryediplomati i BE-së kërkoi që të bëhen më shumë përpjekje që serbët e Kosovës të rikthehen në institucione.
Nga ana tjetër, presidenti serb ishte më i zëshëm në drejtimin e akuzave ndaj kryeministrit të Kosovës duke pretenduar se nuk dëshiron që të formojë asociacionin. Por Albin Kurti në përfundim të takimit njoftoi opinionin publik se draft-statuti me mbi 60 nene nuk ishte i pranueshëm pasi binte ndesh me kushtetutën e Kosovës.
Ambasadori amerikan në Afrikën e Jugut akuzoi të enjten qeverinë e Afrikës së Jugut për dërgimin e armëve dhe municioneve në një anije mallrash ruse të sanksionuar në fund të vitit të kaluar, thanë mediat lokale.
“Ndër gjërat që vumë në dukje ishte ankorimi i anijes së mallrave në bazën detare të Simon’s Town nga data 6 deri më 8 dhjetor 2022, e cila ne jemi të bindur që ngarkoi armë dhe municione në atë anije në qytetin e Simonit ndërsa kthehej në Rusi. ”, tha ambasadori Reuben Brigety II për mediat lokale, përfshirë News24.com.
“Ne jemi të sigurt se armët ishin ngarkuar në atë anije dhe unë do të vë bast jetën time për saktësinë e këtij pohimi,” tha ambasadori gjithashtu në një video të lëshuar nga Newzroom Afrika, një kanal lokal lajmesh që ishte gjithashtu në konferencë.
“Armatosja e rusëve është jashtëzakonisht serioze dhe ne nuk e konsiderojmë këtë çështje të zgjidhur dhe ne do të donim që Afrika e Jugut të [fillojë] të praktikojë politikën e saj të mos-angazhimit”, tha ai, sipas të dy mediave.
Ambasadori i Shteteve të Bashkuara të Amerikës në Afrikën e Jugut ka akuzuar vendin për ofrimin e armëve për Rusinë, duke thënë se kjo është një shkelje e pozitës së neutralitetit që Afrikës së Jugut ka marrë në luftën në Ukrainë.
Armët u ngarkuan në një anije mallrash ruse që u ankorua fshehurazi në një bazë detare pranë Kejp Taun për tre ditë në muajin dhjetor të vitit 2022, dhe më pas u transportuan në Rusi, tha ambasadori amerikan Reuben Brigety më 11 maj.
“Ne jemi të sigurt se armët ishin ngarkuar në atë anije dhe unë mund të vë bast mbi jetën time për saktësinë e këtij pohimi”, tha ambasadori gjatë një konference me gazetarët, transmetoi një kanal vendor lajmesh.
“Armatosja e rusëve është jashtëzakonisht serioze dhe ne nuk e konsiderojmë këtë çështje të zgjidhur dhe do të donim që Afrika e Jugut të [fillojë] të praktikojë politikën e saj të neutralitetit”, tha ai.
Një zëdhënës i Departamentit amerikan të Shtetit, Vedant Patel, u tha gazetarëve se Shtetet e Bashkuara kanë shqetësime serioze për ankorimin e anijes, e cila është nën sanksionet e vendosura nga SHBA-ja.
Presidenti i Afrikës së Jugut Cyril Ramaphosa ishte në Kejp Taun duke iu përgjigjur pyetjeve në Parlament kur një ligjvënës i kërkoi atij t’i përgjigjej pretendimit të ambasadorit Brigety. Presidenti u përgjigj se duke thënë se “çështja është duke u shqyrtuar dhe me kalimin e kohës do të jemi në gjendje të flasim për të”.
Zyra e tij i quajti akuzat “zhgënjyese” dhe paralajmëroi se vërejtjet “minojnë frymën e bashkëpunimit dhe partneritetit” midis zyrtarëve të qeverisë së SHBA-së dhe Afrikës së Jugut që kishin diskutuar për këtë çështje.
Anija me këto ngarkesa nxitit spekulime kur u ankorua në fillim të dhjetorit në bazën detare të qytetit Simon.
Anëtari i parlamentit të opozitës Kobus Marais kërkoi përgjigje nga qeveria e asaj kohe, duke thënë se mallrat ishin shkarkuar dhe ngarkuar gjatë orëve të natës.
Zyra e Kontrollit të Pasurive të Huaja e Departamentit të Thesarit të SHBA-së shtoi anijen e ngarkesave, Lady R, në listën e saj të sanksioneve vitin e kaluar për shkak të dërgesave të supozuara të armëve për Rusin./REL/
Sot është 12 Maji – Dita Ndërkombëtare e Infermiereve, e cila përkon me 203-vjetorin e lindjes së Florence Nightingale, e cila njihet edhe si themeluesja e infermierisë në botë.
Rreth 2/3 e punëtorëve në QKUK, apo 60% të gjithë të punësuarve janë infermierë dhe kjo shifër flet për fuqinë potenciale që kanë.
Me këtë rast, Ministria e Shëndetësisë, organizon për herë të parë promovimin e Manualit të Parë të Procedurave Standarde të Infermierisë në Kujdesin Parësor Shëndetësor.
Sot do të shpallet ankandi i parë për parku me energji solare me kapacitet prej 100 Megawatt.
Ky ankand do të shpallet nga kryeministri i vendit, Albin Kurti, ministrja e Ekonomisë, Artane Rizvanolli e Administratorja e USAID-it, Samantha Power.
Sipas njoftimit të qeverisë, shpallja e ankandit do të bëhet në ora 15:00.
Krimet nga lufta e fundit në Kosovë vlerësohet të jenë të shumta në numër, por ata që i kanë hetuar këto krime, 24 vite pas luftës, jo edhe aq të shumtë.
Megjithatë më shumë se dy dekada pas, pretendohet të ndryshojë kjo gjendje.
19 personave, që kanë qenë zyrtar policor e janë marrë me zbulimin e këtyre rasteve, nga kjo e enjte u janë shtuar edhe 15 hetues të rinj, teksa qëllimi është të jenë 41 gjithsej.
Madje sektori mbi të cilin është vepruar, tashmë është shndërruar në Drejtori për Hetimin e Krimeve të Luftës me në krye Bashkim Spahiun.
Veçse ky fuqizim në polici duhet të kurorëzohet edhe me shtimin e prokurorëve special për hetimin e krimeve të luftës, që aktualisht aktiv janë vetëm katër të tillë.
Kështu thotë Amer Alija nga Fondi për të drejtën humanitare teksa thekson se policët e përzgjedhur duhet të plotësojnë patjetër një kriter.
“Me shtimin e 4 prokurorëve dhe shtimin e numrit të hetuesve, atëherë këto krime do të hetohen me më shumë efikasitet, se në të kaluarën. Por besoj se policët të cilët përzgjidhen, duhet të kenë njohuri të mira të gjuhën angleze dhe serbe sepse ata do të duhej ti analizonin të gjitha dosjet nga tribunal i Hagës…”, ka vijuar Alija.
Rikthimin e vëmendjes nga hetimi i krimeve të luftës po e shohin pozitive edhe në Institutin e Kosovës për Drejtësi megjithëse e konsiderojnë të vonshëm.
“Rritja e kapaciteteve duhet të jetë, në të gjitha drejtimet, duke filluar nga kapacitetet operative, njerëzore, duke shtuar edhe specializmet adekuate, në mënyrë që të ketë trajtim meritor të këtyre rasteve. Duhet theksuar se sado kohë që kalon në trajtimin e këtyre rasteve, definitivisht se edhe hetimi edhe gjykimi i këtyre rasteve për shkak të vjetërsimit të provave, vdekjes së dëshmitarëve, bëhet më I vështirë”, ka deklaruar Gëzim Shala, nga IKD-ja.
Së fundmi në këtë drejtim është bërë edhe një hap I rëndësishëm ku më 2 maj u miratuar edhe Deklarata për Personat e Zhdukur nga kryeministri i Kosovës, Albin Kurti dhe presidenti i Serbisë, Aleksandër Vuçiq.