Category: Lajme

Propozimi për 80 km/h në autostrada rikthen debatin politik në Zvicër mes kursimit të energjisë dhe rritjes së shpejtësisë

Partia e Gjelbër në Zvicër “Green Party of Switzerland” ka propozuar uljen e kufirit të shpejtësisë në autostradat zvicerane nga 120 km/h në 80 km/h, me qëllim reduktimin e konsumit të karburantit dhe kursimin e energjisë, porcjell albinfo.ch.

Liderja e partisë, Liza Mazzone Liza Mazzone, ka theksuar se një masë e ngjashme ishte zbatuar edhe gjatë krizës globale të naftës në vitin 1973, kur mungesat e karburantit kishin detyruar autoritetet zvicerane të vendosnin përkohësisht kufirin e shpejtësisë në 100 km/h.

Sipas saj, masa të tilla mund të ndihmojnë në uljen e konsumit të energjisë në periudha të pasigurta ekonomike dhe gjeopolitike.

Në anën tjetër të spektrit politik, Partia Popullore Zvicerane Swiss People’s Party (SVP) po kërkon të kundërtën, duke propozuar rritjen e kufirit të shpejtësisë në autostrada në 130 km/h.

Ky debat ka hapur diskutime të reja në Zvicër mbi balancimin mes politikave të energjisë, mjedisit dhe lirisë së qarkullimit.

Komisioni Qendror i Zgjedhjeve ka miratuar Listën Preliminare të Votuesve për zgjedhjet e parakohshme të cilat do të mbahen më 7 qershor.

Lista Preliminare e Votuesve përmban: 2,092,202 votues, pra 15,912 votues më shumë në krahasim me zgjedhjet e parakoshme për Kuvendin e Kosovës, të mbajtura më 28 dhjetor 2026.

“Numri i votuesve të rinj që do të votojnë për herë të parë në zgjedhjet e parakohshme më 7 qershor, është: 22,131 votues, prej të cilëve: • 16,933 votues konsiderohen të rinj që, pas zgjedhjeve për Kuvend (28.12.2025), kanë arritur moshën 18 vjeç dhe do të votojnë për herë të parë në zgjedhjet e parakohshme për Kuvendin e Kosovës, që do të mbahen më 7 qershor.

“ Prej tyre 8,755 (51.70 %) janë meshkuj, ndërsa 8,178 (48.30 %) janë femra; dhe • 5,198 votues konsiderohen të regjistruar për herë të parë në Regjistrin Qendror Civil midis dy palë zgjedhjesh, ose votues që kanë rikthyer shtetësinë e Kosovës” , u theksua mes tjerash në mbledhjen e sotme të KQZ-së.

Sipas të dhënave nga ky raport, numri i përgithshëm i votuesve që janë larguar nga LPV pas zgjedhjeve për Kuvendin e Kosovës (28.12.2025) është 6,219.

Ky numër përfshin: • 5,826 votues të larguar si persona të vdekur, të evidentuar nga Agjencia e Regjistrit Civil (ARC); dhe • 393 votues të larguar për shkak të humbjes së shtetësisë së Republikës së Kosovës, të evidentuar nga ARC. Gjithashtu, në Listën Votuese nuk janë përfshirë 6,797 persona, të cilët përmes aktiviteteve të ndryshme të KQZ-së, gjatë vitit 2025, janë evidentuar si persona të vdekur përmes krahasimit të të dhënave me regjistrat e ARC-së, Departamentin e Pensioneve, bashkësitë fetare dhe verifikimet në terren.

Eurodeputeti Riho Terras, i cili është edhe raportues i Kosovës në Parlamentin Europian, ka komentuar vendimin e SHBA-së për tërheqjen e 5000 trupave amerikane nga Gjermania.

Ai tha se ky plan për tërheqje trupash s’është katastrofë, por se më serioze është situata për anulimin e raketave Tomahawk.

“Plani për të tërhequr 5,000 trupa amerikane nga Gjermania nuk është një katastrofë.
Shumë më serioze është anulimi i vendosjes së raketave Tomahawk. Estonia, Letonia, Lituania, Polonia duhet të veprojnë SË BASHKU dhe të bindin Donald Trump që të përdorë trupat nga Gjermania për të forcuar Korridorin e Suwałki-t”, shkroi ai në X.

Presidenti amerikan Donald Trump ka deklaruar se SHBA do të tërheqë 5,000 – dhe ndoshta edhe shumë më tepër – trupa të stacionuara në Gjermani, pasi kancelari gjerman Friedrich Merz kritikoi mënyrën se si SHBA po e trajton konfliktin me Iranin, duke thënë se Teherani e kishte “poshtëruar” Uashingtonin.

Gjykata Komerciale e Kosovës, përmes Dhomave të Shkallës së Parë, ka marrë një vendim domethënës duke pezulluar ekzekutimin e sanksionit të Organit Shqyrtues të Prokurimit (OSHP) ndaj kompanisë “N & B” sh.p.k. me seli në Skenderaj. Ky vendim vjen pasi kompania ishte futur në të ashtuquajturën “Lista e Zezë”, gjë që do t’i pamundësonte pjesëmarrjen në prokurim publik për një periudhë tre-mujore.

Konflikti administrativ nisi pas një vendimi të OSHP-së (nr. 1873/25) të datës 9 mars 2026, i cili aprovonte ankesën e Autoritetit Kontraktues, K.R.U Prishtina, për diskualifikimin e operatorit “N & B” sh.p.k.. Kompania akuzohej se gjatë aplikimit në tenderin për “Rehabilitimin i rrjetit të ujësjellësit Skullan, Ribar i Vogël dhe Batllavë”, kishte dorëzuar dëshmi me përmbajtje të rreme apo të falsifikuara.

Në këtë proces, kompania “N & B” sh.p.k. përfaqësohet nga avokati Taulant Ferizi nga Prishtina. Mbrojtja ka argumentuar para gjykatës se klienti i tyre nuk ka pasur asnjë njohuri për këtë procedurë tenderuese. Sipas tyre, operatori ekonomik “Keni Construction” sh.p.k. ka përdorur emrin, të dhënat dhe identitetin afarist të “N & B” sh.p.k. në mënyrë të paautorizuar, duke krijuar një konzorcium fiktiv pa dijeninë e paditësit.

Për të bindur gjykatën për domosdoshmërinë e masës së sigurisë, kompania ka paraqitur shifra specifike të dëmit që do të pësonte nga bllokimi tre-mujor.

Paditësi ka theksuar se diskualifikimi do t’ia pamundësonte nënshkrimin e kontratës për aktivitetin e prokurimit Nr. 203-25-8175-5-1-1, vlera e të cilit kap shifrën prej 7,000,000.00€.

Po ashtu, është përmendur rreziku i humbjes së kontratës për procedurën Nr. 616-25-1830-5-1-1, me vlerë prej 780,000.00€.

Kompania deklaroi se pothuajse i gjithë operimi i saj bazohet në kontrata publike dhe diskualifikimi do t’ia pamundësonte përfitimin e shumës prej 1,000,000.00€.

Pa këto të hyra, propozuesi ka argumentuar se nuk do të ketë mundësi të gjenerojë mjete për të paguar këstet mujore të kredive pranë bankave komerciale në Kosovë.

Gjyqtarja e rastit, Vlerona Maliqi, ka vlerësuar se kërkesa e kompanisë është e bazuar, duke cituar nevojën për parandalimin e dëmeve të pariparueshme:

“Gjykata vlerëson se janë plotësuar kushtet nga neni 100 par.1 dhe 2 i LKA-së për shtyrjen e ekzekutimit të aktit administrativ të kërkuar, pasi që paditësi/propozuesi i sigurimit pretendimet e paraqitura në propozim i ka mbështetur në argumente të qëndrueshme dhe prova materiale, duke i’a bërë të besueshme gjykatës dëmin që rrezikon t’i shkaktohet atij nga ekzekutimi i aktit administrativ të goditur.”

Më tej, gjykata ka arsyetuar se ky vendim nuk bie në ndesh me interesin e përgjithshëm:

“Gjykata poashtu vlerëson se shtyrja e ekzekutimit të vendimit në rastin konkret nuk është në kundërshtim me interesin publik, pasi që pa sqarimin e çështjeve kontestuese në këtë procedurë dhe pa sqarimin e bazës juridike të vendimit të kontestuar, ekzekutimi i këtij të fundit do të mund të shkaktonte dëm të pariparueshëm për paditësin.”

Në aktvendimin e saj, Gjykata vërejti se OSHP-ja, edhe pse ishte njoftuar rregullisht dhe i ishte lënë afati i duhur, nuk kishte dorëzuar asnjë deklarim lidhur me këtë kërkesë deri në momentin e marrjes së vendimit.

Përmes këtij aktvendimi, dënimi i OSHP-së pezullohet deri në nxjerrjen e një vendimi përfundimtar lidhur me ligjshmërinë e sanksionit. Ky është një zhvillim i rëndësishëm në praktikën e Gjykatës Komerciale, e cila ka vendosur të balancojë pretendimet për parregullsi në prokurim me të drejtën e kompanive për të operuar derisa të vërtetohet fajësia në merita.

Pala e pakënaqur ka të drejtë ankesë brenda shtatë ditësh në Dhomën e Shkallës së Dytë të Gjykatës Komerciale. /Gazeta Insajderi

Mytaher Haskuka nga Lëvizja Vetëvendosje ka deklaruar se subjekti i tij politik pret të fitojë mbi 50 për qind të votave në zgjedhjet e parakohshme parlamentare që pritet të mbahen më 7 qershor.

Sipas Haskukës, ndryshime në përqindje mund të ndodhin te partitë opozitare, si Lidhja Demokratike e Kosovës dhe Partia Demokratike e Kosovës, por jo edhe te Vetëvendosje.

“Unë mendoj që mund të ketë ndryshime në përqindje, por Lëvizja Vetëvendosje prapë do të jetë mbi 50 për qind. Ndryshimet mund të ndodhin brenda partive opozitare. Nuk besoj që do të ndryshojë numri i deputetëve që LVV i ka pasur. Mendoj që pas 7 qershorit përqindja do të jetë përafërsisht e njëjtë ose edhe më e lartë”, ka deklaruar Haskuka.

Ai ka shtuar se, sipas tij, opsioni i vetëm për qytetarët është mbështetja e LVV-së për të siguruar një shumicë edhe më të madhe në Kuvend.

“Fatkeqësisht, për Kosovën momentalisht nuk ka një alternativë më të mirëfilltë dhe Vetëvendosje është i vetmi opsion për stabilitet. Me një opozitë që bllokon ligje dhe bojkoton seancat për zgjedhjen e presidentit, qytetarët mund t’i japin LVV-së mbi 70 deputetë në mënyrë që të zgjidhet edhe presidenti”, është shprehur ai.

I pyetur nëse është e arritshme kjo shifër, Haskuka nuk e ka përjashtuar një mundësi të tillë.

“Në Kosovë nuk mund të përjashtohet as kjo alternativë, duke parë veprimet e opozitës gjatë viteve 2025 dhe 2026, të cilat tregojnë mungesë pjekurie politike”, ka shtuar ai.

Ndërkohë, sa i përket ndikimit të mundshëm të Vjosa Osmanit në rezultatin zgjedhor apo në raportet mes LVV-së dhe LDK-së, Haskuka ka thënë se efekti i saj mund të reflektohet vetëm brenda partive opozitare.

“Ajo mund të ndikojë në shpërndarjen e votave brenda opozitës, por jo te LVV. Mund të ndryshojë renditja për vendin e dytë, por jo për vendin e parë”, ka thënë Haskuka.

Ndryshe, sipas rezultateve të certifikuara nga Komisioni Qendror i Zgjedhjeve (KQZ) zgjedhjet e parakohshme të 28 dhjetorit 2025 janë dominuar nga Lëvizja Vetëvendosje e cila fitoi 51.10 për qind të votave të vlefshme, duke siguruar gjithsej 57 ulëse në Kuvendin e Kosovës.

Partia Demokratike e Kosovës (PDK) u rendit e dyta me 20.19 për qind, duke përfituar 22 mandate deputetësh.

Lidhja Demokratike e Kosovës (LDK) mori 13.24 për qind duke siguruar 15 ulëse në Kuvend. /teve1/

Kreu i AAK-së, Ramush Haradinaj ka kujtuar në përvjetorin e ndarjes nga jeta, veprimtarin e çështjes kombëtare, patriotin e madh, Smajl Haradinaj.

Përmes një postimi në Facebook, ai thotë se Smajl Haradinaj nuk kishte një jetë të lehtë.

“Ai përjetoi edhe tmerrin e burgjeve jugosllave, ndërsa të njëjtin fat e pësuan edhe pjesëtarë tjerë të familjes, djemtë; Naimi, Nasimi dhe Agroni, vajzat; Shqipja e Naimja, bashkëshortja Myzaqetja dhe bashkëshortja e Nasimit, Gjejlonja”.

“Sakrifica e tij ishte frymëzim për ne dhe për gjithë brezin e luftëtarëve të UÇK-së, në rrugën për realizimin e ëndrrës shekullore të shqiptarëve për të jetuar të lirë. Ai rriti dhe edukoi bij luftëtarë, Agronin dhe Nasimin, të cilët ndoqën rrugën e tij, duke u bërë pjesë e lavdisë së luftës çlirimtare. Lavdi jetës dhe veprës së Bacës Smajl!”, ka shkruar ai.

Labinot Tahiri pret Osmanin: E gatshme për t’i dhënë më të mirën vendit, më tha ‘‘Call me’’ nëse unë apo qytetarët kemi telashe

Labinot Tahiri, ka pritur në takim ish-presidenten Vjosa Osmani, e cila është në në formë shumë të mirë, e qetë dhe e gatshme për të dhënë më të mirën për vendin tonë ashtu si në të kaluarën, me një fushatë me moral politik , kombëtar e ndërkombëtar.

Tahiri, në postimin e tij ka shkruar se Osmani i ka thënë atij se nëse ai apo qytetarët ‘’kanë telashe’’ ta thërrasin atë.

Ndryshe, ‘’Call me’’, ishte deklarata më të cilën që presidenti i Shteteve të Bashkuara të Amerikës, Donald Trump, i ishte drejtuar Osmanit në nisjen e Bordit të Paqes.

“Po veproni shumë mirë, dhe kur gjërat nuk shkojnë mirë, më telefononi dhe ne do ta zgjidhim”, kishte thënë Trump drejtuar Osmanit.

Postimi i plotë i Tahirit:

CALL ME🫡🫶🏼😊

Sot pata knaqesi ta pres në vizitë te Noma në lagjen Panorama Residence, presidenten tonë të nderuar e të dashur për qytetarët tanë, gurbetqarët, motrat, zonjat e nënat tona

znj.Vjosa Osmani

E nderuar presidente, faleminderit që na vizituat qytetin tonë, një vend i fortë në ekonomi, politikë, mjekësi dhe arsim.

Ju e dini që ne kemi politikanë, biznesmenë mjekë e mësimdhënës të përkushtuar për qytetin dhe shtetin si për shendetin, ekonomine dhe arsimin për rininë dhe qytetarin tonë.

Të dashur bashkombas; ta dini se; presidentja ishte në formë shumë të mirë, e qetë dhe e gatshme për të dhënë më të mirën për vendin tonë ashtu si në të laluaren, me një fushatë me moral politik , kombetar e nderkombetar.

Faleminderit nga zemra për vizitën dhe për stafin tuaj. Me presidenten ishin të pranishem edhe kandidatët ferizajas të cilë janë në garë për deputet..!

Ajo ma la një amanet😀

Presidentja me tha: Labi, nëse ke telashe ti, qytetari dhe rinia jonë mos e leshoni vendin por vetem CALL ME 😀🫶🏼🫡

Jeni të mirëseardhur të gjithë, nga të gjitha partitë politike!

Me respekt

Labi Kosovës e Shqipërisë

Prokuroria Themelore në Pejë ka ngritur aktakuzë kundër të pandehurit M.N., për shkak të dyshimit të bazuar mirë se ka kryer veprën penale “Kontrabandimi me migrantë”, sipas Kodit Penal të Republikës së Kosovës.

Sipas aktakuzës, i pandehuri M.N., më datë 18 mars 2026, rreth orës 15:00, në fshatin Drelaj të Rugovës, me qëllim të përfitimit të dobisë pasurore për vete, ka tentuar të kontrabandojë migrantë drejt kufirit me Malin e Zi.

“I njëjti, fillimisht ishte takuar me disa shtetas të huaj të nacionalitetit sudanez në Stacionin e Autobusëve në Pejë, ku me kërkesën e tyre kishin arritur marrëveshje që t’i transportojë deri në afërsi të kufirit me Malin e Zi, me ç’rast ishte dakorduar që për këtë shërbim të kompensohej financiarisht pasi të arrinin në destinacionin e caktuar”.

Megjithatë, Prokuroria tha se gjatë realizimit të kësaj veprimtarie, automjeti i të pandehurit është vërejtur nga Policia Kufitare në lokacionin e lartcekur.

Me rastin e kontrollit, shtetasit e huaj janë identifikuar dhe i pandehuri është arrestuar, kurse vetura me të cilën dyshohet të jetë përdorur të kryhet vepra penale është sekuestruar.

Me këto veprime, ekziston dyshimi i bazuar mirë se i pandehuri ka përmbushur elementet e veprës penale “Kontrabandimi me migrantë”.

Prokurori i çështjes, me rastin e ngritjes së aktakuzës, i ka propozuar gjykatës kompetente që të pandehurin ta shpallë fajtor dhe ta dënojë sipas ligjit për veprën penale që i vihet në barrë.