Category: Lajme

Ministri i Punëve të Brendshme, Xhelal Sveçla ka reaguar pas arrestimit të një personi që ka kërcënuar nënkryetaren e Komunës së Leposaviqit, Dragana Miletiq.

Me anë të një postimi në Facebook, Sveçla ka shkruar se tashmë, koha e pandëshkueshmërisë ka marrë fund.

“Krimi dhe kërcënimi nuk kalojnë. Pardje është ndaluar kontrabanda me mallra, dje është konfiskuar vetura në kërkim ndërkombëtar, sot është arrestuar personi që ka kërcënuar nënkryetaren e Komunës së Leposaviqit, znj. Dragana Miletic. Të gjitha këto në veri të vendit. Koha e pandëshkueshmërisë ka marrë fund”, ka shkruar ai.

Kryetari i Lidhjes Demokratike të Kosovës (LDK), Lumir Abdixhiku tha se Kosova po futet në një situatë shqetësuese dhe tepër të paqartë, kjo si shkak i verimeve të pamatura të kryeministrit Albin Kurti.

Sipas tij, shqetësuese është edhe mosgatishmëria e Kurtit që të koordinohet me aleatët. Ai madje tha se Kosova mund të ketë edhe pasoja të tjera nga ShBA-ja, BE-ja e NATO.

Abdixhiku shpreson që Kurti të reflektojë, ndërsa i bëri thirrje presidentes Vjosa Osmani që të jetë “më e qartë dhe më e zëshme në këtë moment kritik për Kosovën”.

Këto komente ai i bëri pas takimit me të dërguarin e posaçëm i Shteteve të Bashkuara të Amerikës për Ballkanin Perëndimor, Gabriel Escobar, dhe atë të Bashkimit Evropian për dialogun Kosovë-Serbi, Miroslav Lajçak.

“Po futemi në një situatë tepër shqetësuese për Republikën dhe për më tepër të paqartë. Shqetësuese për shkak të gjendjes së relacioneve që Kosova i ka me aleatët e saj e të paqartë për shkak të mungesës së planit dhe gatishmërisë së kryeministrit për dakordim me aleatët tanë”.

“Në këtë fazë, Kosovës i mbetet t’i sheh pasojat që mund t’i vijnë nga vlerësim i tillë, në radhë të parë nga ShBA-ja, Bashkimi Evropian dhe nga NATO-ja. Një gjendje të tillë si LDK e kemi të vështirë ta pranojmë, veprimet tona do të jenë publike, por në të njëjtën kohë ne shpresojmë që ju media ta transmetoni sa më qartë këtë gjendje, si gjendje e paparë deri më tani. Unë shpresoj që ai të reflektojë dhe sërish i bëj thirrje presidentes të jetë më e qartë, më e zëshme, në këtë moment kritik për Kosovën”, tha Abdixhiku.

Në Agjencinë për ndihmë juridike falas, është rritur numri i qytetarëve që kanë kërkuar ndihmë juridike falas. Në 2021 ishin 4599 qytetarë që kërkuan ndihmë, e në vitin 2022, ky numër është rritur për 30 përqind. Megjithatë, është e rëndësishme që ndihmën juridike falas të bëhet në mënyrë përmbajtjesorë dhe jo vetëm për ta përmbushur aspektin formal juridik.

Kështu u tha në konferencën “Të bashkuar për qasje në drejtësi”, e cila u organizua në kuadër të javës për ndihmë juridike falas, ku Ministrisë së Drejtësisë iu kërkuar që të ndaj fonde më shumë për këtë çështje me qëllim që t’iu ndihmohet qytetarëve që kanë nevojë.

Ministrja e Drejtësisë, Albulena Haxhiu, tha se qasja në drejtësi është një kriter i rëndësishëm dhe një shtyllë themelore në shoqërinë tonë dhe si institucion përgjegjës kanë marrë veprime konkrete në mënyrë që të jenë shembulli më i mirë në përmbushjen e obligimeve kushtetuese, siç është edhe ofrimi e shërbimeve juridike fals.

“Në vitin 2021, Agjencia ka ofruar ndihmë juridike falas për 4599 qytetarë të kategorive të ndryshme në gjithë territorin e Kosovës. Ndërsa në vitin 2022, ky numër është rritur për 30 % dhe kjo e gjitha fal fushatave vetëdijësuese dhe ndryshimeve ligjore që e kemi bërë. Gjatë vitit 2022, ndihma juridike fals iu është ofruar 2619 grave duke shënuar kështu rritje nga viti paraprak për më shumë se 30 % . Ndërsa këtë vit agjencia numëron, deri në këtë moment që po flasim Agjencia numëron 10 përqind raste më shumë në të cilat ofron ndihmën në krahasim me periudhën e njëjtë të viteve paraprake. Ministria e Drejtësisë është në proces të krijimit të akteve nënligjore me qëllim të ofrimit të kushteve sa më të mira në drejtim të përmbushjes së obligimit ndaj qytetarëve, që të sigurojmë qasje në drejtësi dhe shërbime cilësore për të gjithë. Progresi në këtë drejtim vetëm sa i ka bërë më të vetëdijshëm se ka ende punë për të bërë”, tha ajo, duke shtuar se edhe gazetarët që pengohen në punë, do të marrin ndihmën juridike falas.

Albert Zogaj, kryesues i Këshillit Gjyqësor të Kosovës, tha se kanë ende punë në rritjen e nivelit vetëdijesimit që qytetarët ta dinë se e kanë një derë të hapur për të kërkuar ndihmën juridike falas.

“Është e rëndësishme që ndihmën juridike falas ta bëjmë në mënyrë përmbajtjesorë, që të mos jenë vetëm në aspektin formal juridik, por të jetë përmbajtjesor…Kosova e ka këtë sfidën e numrit të madh dhe ngarkesave, d.m.th po japim edhe disa tregues të Këshillit Gjyqësor që janë si përpjekje që ne të rrisim cilësinë dhe besueshmërinë dhe në këtë kontekst me ndihmën e partnerëve, kemi hartuar strategjinë për qasje në drejtësi dhe shumë aktivitete tjera të cilat e lehtësojnë qasjen e qytetarit në drejtësi”, tha ai.

Zëvendëskryesues i Këshillit Prokurorial të Kosovës, Veton Shabani, tha seçdoherë kur diskutohen të drejtat e njeriut, është e rëndësishme që të jenë të mbledhura të gjitha institucionet për të diskutuar sfidat dhe rekomandimet në mënyrë që të tejkalohen ato.

“Për Këshillin Prokurorial të Kosovës ndër parimet kryesore me të cilat veprojmë janë respektimi i drejtave dhe lirive të njeriut, mosdiskriminimi dhe qasja në drejtësi. Si prokurorë të shtetit është detyrë e jona të përfaqësojmë interesin publik dhe të mbrojmë drejtësinë në shoqëri por gjithashtu duhet të jemi të vetëdijshëm për sfidat dhe vështirësitë që shumë qytetarë kanë kur përballën me sistemin e drejtësisë e që në shumë raste ndodh për shkak të kushteve të vështira ekonomike, prandaj javën e ndihmës juridike falas e shohim si një mundësi për të ngritur ndërgjegjësimin dhe për të përmirësuar qasjen e barabartë për të gjithë qytetarët e Kosovës. Të gjithë qytetarët pa marrë parasysh statusin e tyre statusin material, duhet të kenë të mundësi të realizojnë të drejtën e tyre gjyqësore”, tha ai.

Kryetari i Odës së Avokatëve të Kosovës, Behar Ejupi tha se konferenca për qasjen në drejtësi, ofron një platformë të rëndësishme për të diskutuar sfidat dhe mundësitë në fushën e ndihmës juridike falas

“Avokatët janë pikë kyçe në sigurinë e drejtësisë në mënyrë të ndershme dhe të barabartë për të gjithë. Avokatët janë përfaqësuesit e interesave të klientëve dhe janë përgjegjës për të mbrojtur të drejtat dhe liritë e tyre…..Gjithmonë me një kërkesë për Ministrinë e Drejtësisë që të ndaj fonde më shumë për këtë çështje me të vetmin qëllim që t’iu ndihmohet qytetarëve që vërtet kanë nevojë dhe ne iu garantojmë se do të ofrojmë shërbime cilësore dhe do të jemi transparent ndaj gjithë qytetarëve për sa i përket angazhimit të avokatëve. Nuk do të ketë benifit asnjë anëtarë kundër tjetrit, do të kenë benifite vetëm qytetarët”, Ejupi.

I dërguari i posaçëm i Shteteve të Bashkuara të Amerikës për Ballkanin Perëndimor, Gabriel Escobar, dhe ai i Bashkimit Evropian për dialogun Kosovë-Serbi, Miroslav Lajçak, e kanë përfunduar takimin me presidenten, Vjosa Osmani, raporton Ekonomia Online.

Ata janë drejtuar në Zyrën e BE-së për t’u takuar me kryetarë të partive opozitare.

I parë në shkoi kryetari i Partisë Demokratike të Kosovës, Memli Krasniqi, pas tij erdhi edhe kryetari i Aleancës për Ardhmërinë e Kosovës, Ramush Haradinaj. I fundi në takim shkoi kreu i LDK-së, Lumir Abdixhiku.

Banka Qendrore e Kosovës (BQK), të martën ka përsëritur konkursin për guvernator të ri i cili do të jetë i hapur deri më 21 qershor 2023.

Pas dështimit të përzgjedhjes së guvernatorit nga Kuvendi i Kosovës, procesi kthehet në pikën zero, dhe BQK-ja për herë të dytë ka shpallur konkursin për këtë pozitë.

Sipas njoftimit të BQK-së, emërimi do të jetë për një mandat pesëvjeçar duke filluar nga data e emërimit.

“Lista e kandidatëve që kualifikohen nga ana e Panelit do t’i dërgohet Kuvendit të Republikës së Kosovës, i cili do të përzgjedhë një individ. Miratimi dhe emërimi për këtë pozitë do të bëhet nga Presidenti/ja i/e Republikës së Kosovës në pajtim me nenin 84.27 të Kushtetutës së Republikës së Kosovës dhe nenin 38.2 të Ligjit nr. 03/L-209 për Bankën Qendrore të Republikës së Kosovës”, thuhet në publikimin e fundit të BQK-së, raporton KosovaPress.

Ndryshe, procesi i përzgjedhjes së guvernatorit kishte ngecur në Komisionin parlamentar për Buxhet, Punë dhe Transfere, i cili kishte kërkuar nga kryeparlamentari Glauk Konjufca që ta kthej këtë proces në pikën zero.

Ditë më parë edhe shoqëria civile në vend është shprehur e shqetësuar me prolongimin e emërimit të guvernatorit të ri në Bankën Qendrore të Kosovës (BQK).

Për konkursin e parë deri më 16 dhjetor 2022 ka qenë afati i fundit për aplikim për të gjithë atë që kanë synuar këtë pozitë.

Fillimisht për të qenë në krye të BQK-së kishin aplikuar 11 persona, përfshirë edhe ish-guvernatorin Fehmi Mehmeti.

Përveç tij, për ta drejtuar institucionin më të lartë financiar kanë qenë në garë edhe Nexhat Kryeziu, Shkëndije Himaj, Emanuel Bajra, Mentor Nimani, Bezad Halilaj, Artan Ajazaj, Valdrin Krasniqi, Mentor Geci, Genc Rraci dhe Ardian Uka.

Prej tyre, për këtë pozitë u patën kualifikuar katër kandidatë: Ahmet Ismaili, Nexhat Kryeziu, Lulzim Ismajli dhe Shkëndije Himaj.

Guvernatorit Fehmi Mehmeti i zgjedhur më 15 mars të vitit 2018 i kishte mbaruar mandati më 28 mars të vitit 2023.

Ndërsa, prej 29 marsit, Bashkim Nurboja është emëruar ushtrues detyre i guvernatorit të BQK-së.

Drejtori i Përgjithshëm i Policisë së Kosovës, Gazmend Hoxha kërkoi që për situatën e sigurisë në veri, raportimi të mbahet me dyer të mbyllura për medie në Komisionin për Siguri dhe Mbrojtje.

Ai shtoi se fokus kanë rendin dhe sigurinë në katër komunat veriore të vendit. Sipas tij, numri i vrasjeve është ulur, ndërsa është rritur numri i rasteve të dhunës në familje.

“Për shkak të ndjeshmërisë në veri të vendit do të preferoja të kalojmë në një seancë të mbyllur. Fatkeqësisht edhe këtë vit jemi përball me situata të rënda në fushën e mbajtjes të rendit dhe sigurisë publike sidomos në veri të vendit, me aktivitetit të cilat kanë pas për qëllim pengimin në zbatimin e ligjit të barabartë për të gjithë qytetarët. Policia e Kosovës me përkrahjen edhe të institucioneve tjera shtetërore dhe qytetarëve ka arritur të menaxhojë situatën me maturi dhe profesionalizëm”.

“Kemi pasur bllokim të rrugëve përmes barrikadave, aktivitete penguese përmes zyrtarëve policorë, por edhe aktivitete tjera kriminale. Fal angazhimit tonë është shtuar aktiviteti policorë në parandalimin e krimit, dhe aktiviteteve tjera të jashtëligjshme. Janë mbyllur rrugët ilegale në veri të cilat janë shfrytëzuar nga strukturat kriminale për aktivitete të kontrabandës kufitare. Në atë zonë ne kemi rritur kapacitetet tona, si në infrastrukturë por edhe në burime njerëzore”.

“Gjatë vitit të kaluar falë punës dhe parandalimit të dukurive negative kemi disa rezultate pozitive siç janë ulja e numrit të vrasjeve, veprave penale të grabitjeve, vjedhjeve dhe të tjera, ndërsa është rritur numri i rasteve të dhunës në familje”.

Kreu i misionit të OSBE-së në Kosovë, Michael Davenport, është takuar me emisarin e BE-së, Miroslav Lajçak, për të diskutuar për situatën në veri dhe zgjedhjet atje.

Davenport tha se OSBE do të ndihmojë Komisionin Qendror Zgjedhor në “zgjedhjet gjithëpërfshirëse”.

“Me Miroslav Lajcak sot u theksua rëndësia e progresit në dialogun e lehtësuar nga BE dhe pjesëmarrjen e plotë të të gjitha komuniteteve në institucione dhe zgjedhje. OSBE në Kosovë qëndron fuqishëm përkrah KFOR-it dhe EULEX-it në përmbushjen e mandateve tona përkatëse në Kosovë. Mbështetje e fortë për thirrjen e BE-së për depërshkallëzimin dhe mbajtjen e zgjedhjeve gjithëpërfshirëse në komunat veriore. OSBE do të ndihmojë institucionet e Kosovës, përfshirë Komisionin Qendror të Zgjedhjeve, për të ofruar integrim dhe dialog duke përfshirë të gjitha komunitetet”, ka shkruar ai në Twitter.

Në Dhomat e Specializuara të Kosovës në Hagë po vazhdon gjykimi kundër Pjetër Shalës, me intervistimin e dëshmitarit të shtatë të Zyrës së Prokurorit të Specializuar (ZPS).

Gjatë kësaj seance, mbrojtja e të akuzuarit po vazhdon parashtrimin e kundra-pyetjeve të saj, e cila me kërkesë po të saj ka vijuar të jetë e mbyllur për publikun.

Sipas avokatit Mohamed Hédi Aouini, iu nevojiten 15 minuta kohë për t’i parashtruar pyetjet e tyre.

“Vlerësojmë se do të na duhen 15 minuta, në mos më pak, varet se si do të jenë përgjigjet, do të mbyllim një dokument të diskutimit që kishim dje”, tha ai.

Pjetër Shala i cili po qëndron në paraburgim prej marsit të vitit 2021, po merr pjesë në seancë përmes video-lidhjes.

Sipas Speciales, “Krimet për të cilat akuzohet Shala u kryen përafërsisht midis 17 majit 1999 dhe 5 qershorit 1999 kundër personave që u mbajtën të ndaluar në fabrikën e metalit në Kukës (Shqipëri), që pretendohet se përdorej prej Ushtrisë Çlirimtare të Kosovës”.

Pjetër Shala u arrestua më 16 mars 2021 nga autoritetet belge dhe u transferua në Hagë më 15 prill të atij viti, në bazë të një kërkese për bashkëpunim në zbatimin e fletëarrestit dhe urdhrit për transferim lëshuar nga Dhomat e Specializuara të Kosovës.