ATV

Category: Lajme

  • Kodit Civil i duhet ende kohë për t’u proceduar në kuvend

    Kodit Civil i duhet ende kohë për t’u proceduar në kuvend

    Kryeministri Kurti dje për herë të parë mori pjesë në paradën e krenarisë dhe paralajmëroi procedimin e serishëm të projekt kodit civil në Kuvend.

    Kujtojmë që projekt Kodi Civil u dërgua për votim të mars të vitit të kaluar dhe dështoi, meqë opozita nuk mori pjesë në votim kurse një pjesë e pozitës votoi kundër.

    Në versionin që atëherë u dërgua në Kuvend dhe nuk u votua, projekt Kodi Civil lejonte bashkësitë civile të personave të gjinisë së njëjtë dhe saktësonte se kushtet e procedurat definohen me ligj të veçantë.

    Nga ekzekutivi thotë se po punojnë intensivisht që kurdo qe procedohet në kuvend, të mos dështoi.

    Projekt-kodi tashmë është kthyer në Ministri të Drejtësisë prej ku e para e këtij dikasteri, tha se janë vazhdimisht në bisedime me deputet, për ti bindur që kësaj here të votojnë pro.

    “Si ministri dhe si Qeveri nuk kemi hequr dorë nga ky dokument sepse vlerësojmë se është jashtëzakonisht i rëndësishëm dhe adreson interesin e përgjithshëm të qytetarëve të Kosovës dhe përveç nenit 1138 ka edhe nene tjera, ka edhe institute tjera, çështje tjera të cilat i adreson. Ne kemi qenë gjatë kësaj kohe në diskutime me deputetët e grupit parlamentar veç e veç, sepse kemi konsideruar se një dokument i tillë duhet të kaloi në kuvendin e Republikës së Kosovës”, tha Albulena Haxhiu, ministre e Drejtësisë.

    Megjithatë për dështimet e kaluara në këtë projekt-kod, Haxhiu fajëson edhe opozitën, pasi thotë se votuan kundër jo për shkak të kodit por për inate pulitke.

    “Arsyeja që më kanë thënë se në atë kohë nuk kanë dashur të marrin pjesë në votim ka qenë sepse kemi dashur të shohim dështimin tuaj, unë mendoj që është pak gabim”, tha Haxhiu.

    Sidoqoftë Haxhi thotë se janë në bisedime edhe me deputetët opozitarë, ku pa përmendur emra tha se kanë marrë garanci që do marrin pjesë në votim.
    “Kanë thënë se do marrin pjesë në votim, jo në tersi si grup parlamentar sepse keni parasysh që edhe brenda grupeve parlamentare ka mendime në raport me këtë”, tha Haxhiu.

    Në seancën e fundit kur dështoi kodi civil, 29 deputetë ishin kundër për shkak të nenit që flitet për bashkësinë civile të seksit të njëjtë.

    Aktualisht, martesën e dy personave të gjinisë së njëjtë e lejon vetëm Kushtetuta. Në Kuvendin e Kosovës, ose për shkak të bindjeve konservatore e fetare, ose për shkak të kalkulimeve politike, përveç Kodit Cviil ka dështuar edhe Ligji për Fertilizm të Asistuar. /atvlive.tv

    Edicionin Qendror të lajmeve në ATV e gjeni në videon më poshtë:

  • Ministria e Mbrojtjes ndër ministritë më jo-transparente në faqe zyrtare

    Ministria e Mbrojtjes ndër ministritë më jo-transparente në faqe zyrtare

    Me ardhjen në pushtet të qeverisë së udhëhequr nga kryeministri Albin Kurti, sipas vet atij, Forcës së Sigurisë së Kosovës iu kanë shtuar mbi 1000 trupa.

    “Në fillim kur erdhëm në qeverisje, FSK pati 2693 ushtarë. Për dy vite janë rekrutuar 1240 ushtarë të ri ndërsa edhe 612 ushtarë aktiv dhe 388 rezervë. 1240 ushtarë më shumë për dy vite”, tha Kurti.

    Duke polemizuar me deputetin Avdullah Hoti, për 80 milion euro pagesa të bëra në avanc nga buxheti i shteti, ministri i Financave Hekuran Murati theksoi se këto fonde janë dedikuar për blerje të armatimit.

    “Ky zë është rritë për shkak se nëse e shikoni ligjin për buxhet 100% avanci lejohet vetëm në rastet kur blehet armatimi”, tha Murati.

    Kujtojmë se nga marsi i vitit të kaluar, Kosova ka edhe një Fond të Sigurisë, që menaxhohet nga Ministria e Financave. Mirëpo, shuma e mbledhur në këtë fond, vazhdon të jetë e panjohur për publikun.

    Por, sa të vështirë e kanë qytetarët që përmes internetit t’i gjejnë të dhënat e përmendura nga qeveritarët?

    Një raport i Organizatës Jo-qeveritare, DemokraciPlus, i realizuar vitin e kaluar, për transparencën e ministrive në faqe zyrtare, tregon se Ministria e Mbrojtjes është ndër ministritë më jo-transparente sa i përket të dhënave që ofrohen në faqet zyrtare.

    Transparenca nuk është përmirësuar akoma në këtë ministri. Në web faqe mungojnë infot bazike nga kontakt personat në ministri, të dhënat për buxhet vjetor, raportet e shpenzimeve, plani i aktiviteteve, madje mungojnë të dhënat edhe numrin e pjesëtarëve në FSK.

    FSK-së iu anulua pjesëmarrja në stërvitjet e NATO-s Defender 23 me vendim të komandës së forace amerikane bnë Evropë, si pjesë e penalizimeve të Shteteve të Bashkuara ndaj Kosovës, për shkak të veprimeve të pakoordinuara të Qeverisë së Kosovës në veri të vendit. /atvlive.tv

    Edicionin Qendror të lajmeve në ATV e gjeni në videon më poshtë:

  • Zbatimi i marrëveshjes Kosovë-Serbi, në hije

    Zbatimi i marrëveshjes Kosovë-Serbi, në hije

    Serbët lokal në tri komunat veriore vazhdojnë të protestojnë dhe të kërkojnë largimin nga objektet komunale të kryetarëve shqiptarë të zgjedhur, largimin e policisë dhe formimin e Asociacionit të komunave me shumicë serbe. Ndërkohë ndërkombëtaret për de-eskalimin e situatës kanë kërkuar tërheqjen e policisë nga ndërtesat e komunave, kthimin në dialog dhe mbajtjen e zgjedhjeve të reja.

    Deputeti të Partisë Demokratike të Kosovës, Rashit Qalaj, vlerëson se kryetarët e komunave në veri të vendit nuk ka nevojë që të dorëhiqen, por është dashur më shumë koordinim paraprak me ndërkombëtarët.

    “Mendoj që është dashur që kryetarët të funksionojnë, mirëpo pas kësaj situate ne duhet të jemi shumë të kujdesshëm, të kontribuojmë në paqe të kontribuojmë në uljen e tensioneve atje”, tha Qalaj.

    Situata e fundit në veri të vendit ka zbehur marrëdhëniet e Kosovës me SHBA-në e BE-në, mirëpo analistët politik vlerësojnë se marrëdhëniet me e Kosovës mund të rikuperohen me formimin e Asociacionit të komunave me shumicë serbe.

    Megjithatë, Lëvizja Vetëvendosje për të gjithë situatën e krijuar në veri, vazhdon ta fajësoj Serbinë dhe gjithashtu edhe ndërmjetësin e dialogut nga BE-ja, Miroslav Lajçak.

    “Fillimisht Serbia nuk deshi të nënshkruajë marrëveshjen, pasi Kosova u dakordua në Bruksel, ku kryeministri jonë deshi të nënshkruajë atë, mirëpo Vuçiq nuk e nënshkruajti. Ai është gabimi i parë i ndërmjetësve. Ky gabim është saktësisht i zotëri Lajçak, aty dhe deklarimet e Vuçiq në javën pasuese se ai nuk zbaton pjesë të caktuara të marrëveshjes. Është një përpjekje e tyre që të sabotojnë marrëveshjen. Kosova është e gatshme dhe e përkushtuar siç ka qenë në fillim që të nënshkruajë dhe të zbatojë atë plan, por ne nuk jemi të interesuar që të jemi në agjendat qysh do që i ka menduar Vuçiq në të kaluarën”, tha deputeti i LV-së, Armend Muja.

    Kosova dhe Serbia janë pajtuar për marrëveshje më 27 shkurt në Bruksel dhe aneksin e zbatimit të saj më 18 mars në Ohër, kurse i dërguari amerikan për Ballkanin Perëndimor Gabriel Escobar ka konstatuar në Prishtinë se të dyja palët e kanë shkelur këtë marrëveshje. /atvlive.tv

    Edicionin Qendror të lajmeve në ATV e gjeni në videon më poshtë:

  • Kurti nuk ndryshon qëndrim për veriun, thotë se kryetarët e kanë vendin në komunë

    Kurti nuk ndryshon qëndrim për veriun, thotë se kryetarët e kanë vendin në komunë

    Kryeministri Albin Kurti nuk ka ndryshuar qëndrim për çështjen e veriut.

    Ai vazhdon të insistoj se kryetarët e komunave, punën duhet të kryejnë në zyrë, derisa thotë se nuk duhet të ketë ndarje etnike ku këto objekte të u takojnë vetëm qytetarëve serb.

    Madje thotë se ishte i brengosur mos kryetari i Leposaviqit Lulzim Hetemi do lëshoj pe, brengë të cilën tha se njësoj e kishte edhe vetë Hetemi.

    “Kur e thirra kisha brengë se mos ishte mërzitur brenda në zyrë u bënë shumë javë, por unë teksa isha i brengosur se mos ishte mërzitur ai, ai ishte brengosur se mos isha mërzitur unë. Kështu unë i shqetësuar mos po lëshon pe ai, e ai i shqetësuar mos po lëshojë pe unë”, tha Kurti.

    Megjithatë Kurti foli edhe për mundësinë e zgjedhjeve të jashtëzakonshme në komunat veriore për të cilat nuk ishte kundër, vetëm se deri atëherë kërkoj që kryetarët ta zhvillojnë mandatin qetësisht.

    Sipas Kurtit edhe prania e policisë do ishte më vogël nëpër objekte komunale, nëse grupet terroriste që po shfaqin dhunë në veri, do të arrestohesh.

    Kryeministri tha se i qëndron prapa Amerikës e BE-se në vlerat demokratike dhe besimit në një të ardhme pa luftë të bazuar në barazi e drejtësi.

    Këto deklarime Kryeministri Kurti i bëri në mbledhjen e këshillit të përgjithshëm të Lëvizjes Vetëvendosje, ku para delegatëve e aktivistëve, tregoi edhe për arritjet e Qeverisë së tij që nga marrja e mandatit. /atvlive.tv

    Edicionin Qendror të lajmeve në ATV e gjeni në videon më poshtë:

  • Hapat e ardhshëm të Shtëpisë së Bardhë, pas raportimit të Escobarit

    Hapat e ardhshëm të Shtëpisë së Bardhë, pas raportimit të Escobarit

    Duke folur për Institutin për Politikë dhe Ekonomi, me seli në Beograd, Gabriel Escobar konfirmoi se hapat e ardhshëm të Shteteve të Bashkaura në raport me Kosovën, do të merren pasi ai të raportojë në Shtëpinë e Bardhë.

    “Jam i ftuar në Shtëpinë e Bardhë për të raportuar për rezultatet e udhëtimit tim në Beograd dhe në Prishtinë. Bazuar në progresin ose mungesën e progresit, do të duhet të vendosemi për drejtimin e veprimeve tona”, tha Escobar.

    Escobar sqaroi edhe një herë edhe Kosova dhe Serbia janë partnerë të Shteteve të Bashkuara dhe kryeministri Kurti është po ashtu partner amerikan, por partner i zorshëm.

    “Më duhet këtë ta bëj të qartë – zoti Kurti është partner i yni. Nganjëherë është partner i zorshëm, por gjithsesi se partner. Kosova është partneri i ynë. Serbia është partneri ynë. Andaj, edhe në të ardhmen, ne duam të përdorim marrëdhëniet e mira që kemi me Kosovën, dhe marrëdhëniet në përmirësim që kemi me Serbinë, për të gjetur mënyra të pranueshme reciprokisht dhe përfituese në mënyrë që të dyja të mund të jenë pjesë e Bashkimit Evropian”, tha Escobar

    Escobar ishte në Prishtinë e Beograd bashkë me ndërmjetësuesin e BE-së në dialog Miroslav Lajcak. Në raportimin e Lajcakut thuhet se Kryeministrit Kurti nuk i ka refuzuar shprehimisht kërkesat e tyre, por nuk i ngutet ti zbatojë ato. /atvlive.tv

    Edicionin Qendror të lajmeve në ATV e gjeni në videon më poshtë:

  • Kurti: Kosova qëndron prapa ShBA-së dhe BE-së, serbët të marrin pjesë në zgjedhje

    Kurti: Kosova qëndron prapa ShBA-së dhe BE-së, serbët të marrin pjesë në zgjedhje

    Kryeministri i Kosovës, Albin Kurti thotë se Kosova qëndron pas vlerave demokratike të Shteteve të Bashkuara të Amerikës dhe Bashkimit Evropian dhe se situata në veri mund të qetësohet vetëm duke ndalur dhunën ndaj policisë, KFOR-it, gazetarëve dhe kryetarëve të komunave.

    Në mbledhjen e sotme të Këshillit të Përgjithshëm të Lëvizjes Vetëvendosje, Kurti i ka bërë thirrje bashkësisë ndërkombëtare që të intensifikojë dialogun për zbatimin e marrëveshjes së 27 shkurtit në Bruksel dhe 18 marsit në Ohër.

    “Kosova është prapa SHBA-së dhe BE-së në çdo kuptim të fjalës, në politikën anti-Putin dhe në vlerat demokratike. Është një aleat i pa kompromis. Rruga përpara për të de-përshkallëzuar situatën në veri do të thotë ndalim i menjëhershëm i dhunës nga grupet kriminale kundër policisë, NATO-s, gazetarëve dhe kryetarëve (veriorë). Në përputhje me situatën e sigurisë, largimin e këtyre bandave dhe arrestimin e tyre, prania e policisë mund të zvogëlohej proporcionalisht”.

    “Duhet të intensifikohet dialogu për zbatimin e marrëveshjes së 27 shkurtit dhe 18 marsit. Ne kemi nevojë për një sekuencë të balancuar dhe të drejtë të marrëveshjes bazë”, tha Kurti.

    Ai shtoi se deri në zgjedhjet e jashtëzakonshme në komunat veriore, kryetarët aktualë duhet të kryejnë detyrat e tyre dhe ftoi serbët që të marrin pjesë në to.

    “Kryetarët e zgjedhur kanë marrë pak vota, ndërsa të tjerët nuk kanë marrë asnjë votë. Serbët duhet të shkojnë në zgjedhje, jo të bojkotojnë. Zgjedhjet duhet të jenë të lira, të hapura, pa frikë, pa kërcënime, pa grupe kriminale”, tha ai.

  • “Le Figaro”: Macron dhe Scholz diskutuan se si Ballkani Perëndimor dhe Ukraina të hynë në BE

    “Le Figaro”: Macron dhe Scholz diskutuan se si Ballkani Perëndimor dhe Ukraina të hynë në BE

    Acarimi në Kosovë dhe situata e tensionuar politike në Mal të Zi aktualisht nuk janë në favor të përpjekjeve për anëtarësimin më të shpejtë të fqinjëve në Bashkimin Evropian, ndonëse shumica e anëtarëve të BE-së tani e konsiderojnë të nevojshme për arsye gjeopolitike dhe stabilitet të bazuar në vlerat evropiane.

    Dhe liderët e Gjermanisë dhe Francës, Olaf Scholz dhe Emmanuel Macron, folën për këtë privatisht në Potsdam, raporton gazeta parisiene “Le Figaro” dhe citon burime zyrtare franceze se duhet të krijohen “formate të shumëfishta” për atë lidhje.

    Burime të BE-së në Bruksel kanë thënë për agjencinë Beta se ka shqetësim për Kosovën dhe paqartësi politike në Mal të Zi, pasi kjo është reflektuar tek dy vendet në negociatat për anëtarësim në BE, transmeton Paparaci.

    Por ata theksojnë se në mesin e anëtarëve të BE-së ekziston besimi se fqinjët duhet të inkurajohen për t’iu afruar BE-së dhe këtë e tregon edhe njoftimi i Presidentes së Komisionit Evropian, Ursula von der Leyen, se ekonomia e fortë dhe mbështetja politike është gati për synimin që Ballkani Perëndimor, Ukraina dhe Moldavia të bashkohen sa më shpejt, për komunitetin politik evropian dhe më pas për të hapur derën e anëtarësimit në BE përmes negociatave, sipas meritës.

    Në media dhe në mesin e analistëve në BE, ka dyshime veçanërisht për atë që komuniteti politik evropian mund të prodhojë në mënyrë të prekshme, sepse kjo përkon kryesisht me metodologjinë e re të zgjerimit të miratuar.

    E përditshmja spanjolle “Periodico” është një nga ata që besojnë se deklaratat e liderëve të BE-së në takimin e fundit të Komunitetit Politik Evropian në Moldavi dhe “premtimet për perspektivën evropiane fshehin faktin se në afat të mesëm nuk do të ketë shtet të ri që hyn në BE”.

    “Periodiko” dhe disa qendra analitike në BE kujtojnë se Scholz dhe Macron kanë deklaruar në disa raste se nuk mund të ketë anëtarë të rinj derisa të ketë një reformë themelore institucionale dhe ekonomike në vetë Bashkimin Evropian.

    Synimi i asaj reforme duhet të jetë, siç u përmend, forcimi i strukturës demokratike brenda Unionit, veçanërisht që BE-ja të mos pengohet nga sistemi i votimit, e drejta e vetos, kur ka 35 anëtarë, si dhe sigurimi i buxhetit e fondeve për inkorporimin e tyre në sistemin ligjor dhe kërkesën e tregut të vetëm të BE-së.

    Gazeta franceze “Le Figaro”, megjithatë, bëri të ditur se kancelari Scholz dhe presidenti Macron “shkëmbyen mendime pikërisht për këtë çështje, sepse BE-ja duhet të deklarojë në fund të vitit për fillimin e negociatave me Ukrainën dhe Moldavinë”.

    Nuk ka pasur asnjë njoftim për takimin Scholz-Macron dhe “Le Figaro” i referohet burimeve të Pallatit Elysée, presidencës së Francës, dhe thotë se Macron, në takimin e fundit të liderëve perëndimorë në Bratislavë, ka kërkuar që “themelet të jenë u hodhën sa më shpejt të jetë e mundur për afrimin sa më të shpejtë të anëtarësimit të Ukrainës, Moldavisë dhe vendeve të Ballkanit Perëndimor në BE”.

  • Dita e Çlirimit të Prishtinës, Krasniqi: 24 vite më parë Serbia u gjunjëzua

    Dita e Çlirimit të Prishtinës, Krasniqi: 24 vite më parë Serbia u gjunjëzua

    Në 24-vjetorin e Çlirimit të Prishtinës, kreu i PDK-së, Memli Krasniqi ka thënë se sot duhet nderuar “luftëtarët, veprimtarët, intelektualët dhe martirët ndër breza të cilët u bën urë e dritë për këtë ditë”.

    Përmes një postimi në Facebook, Krasniqi thotë se sot përulemi para vetëmohimit të pjestarëve të Ushtrisë Çlirimtare të Kosovës, posaçërisht dëshmorëve, të cilët besuan në idealin e luftës së tyre, edhe atëherë kur pak kush kishte më shpresa.

    “Sot, është obligimi ynë, si shtet e popull, që duke kujtuar e nderuar të kaluarën, të ndërtojmë një vend të zhvilluar – ku secili mund të projektoj një të ardhme të dinjitetshme e prosperuese”, ka shkruar ai mes tjerash.

    Postimi i plotë:

    Urime Dita e Çlirimit, Prishtinë!

    10, 11 dhe 12 qershori, Kosovën e ndërlidhin historikisht si asnjë datë tjetër.

    Betimi i burrave të kombit, me 10 qershor 1878, në Prizren, shndërrohet në amanet që do të përcillet brez pas brezi, për t’u përmbushur saktësisht 112 vite më vonë – në Prishtinë!

    Me 10 qershor 1999 Serbia gjunjëzohet!

    Me 11 qershor 1999 Prishtina çlirohet!

    Me 12 qershor 1999 liria vjen në Kosovë!

    112 vite sakrificë, dhembje, luftë e përpjekje për liri – pa humbur asnjëherë fokusin nga qëllimi final – çlirimi dhe pavarësia e Kosovës.

    Sot, nderojmë të gjithë luftëtarët, veprimtarët, intelektualët dhe martirët ndër breza, të cilët, u bën urë e dritë për këtë ditë.

    Nderojmë dëshmorët dhe martirët e Prishtinës!

    Sot, përulemi para vetëmohimit të pjestarëve të Ushtrisë Çlirimtare të Kosovës, posaçërisht dëshmorëve, të cilët besuan në idealin e luftës së tyre, edhe atëherë kur pak kush kishte më shpresa.

    Sot, është obligimi ynë, si shtet e popull, që duke kujtuar e nderuar të kaluarën, të ndërtojmë një vend të zhvilluar – ku secili mund të projektoj një të ardhme të dinjitetshme e prosperuese.

    E përjetshme qoftë Kosova!

  • Abazoviq: Zgjedhjet në Mal të Zi shumë më mirë se herave të tjera, nuk ka tensione

    Abazoviq: Zgjedhjet në Mal të Zi shumë më mirë se herave të tjera, nuk ka tensione

    Kryeministri i Malit të Zi, Dritan Abazoviq, ka thënë se në këto zgjedhje parlamentare që po mbahen sot situata është në rregull.

    Pasi ka votuar, ai para mediave ka thënë se është i bindur që do të punohet më shumë në të mirë të Malit të Zi.

    “Ju falënderoj që keni ardhur dhe që i përcillni zgjedhjet, atmosfera është e relaksuar. Është shumë kënaqësi të konstatoj nga pozita e kryeministrit se është gjendja shumë më mirë se që ka qenë më herët, nuk ka tensione, partitë politike shumicën e debateve i kanë pasur për zhvillimin ekonomik dhe integrimin evropian të Malit të Zi”.

    “Në këtë frymë shpresoj që do të mbarohen zgjedhjet, pastaj sigurisht që do të ketë bisedime pasi në Parlamentin e Malit të Zi kemi pasë shumë fytyra të reja dhe jam i bindur që do të vijmë në një zgjidhje shumë të mirë”.

    “Sa më përket mua apo partisë që e përfaqësojë, unë nuk kam dilemë se ne kontributin tonë e kemi dhënë jashtëzakonisht dhe se duhet të vazhdojmë me të njëjtën forcë t’i promovojmë ato vlera me të cilat luftojmë”, ka thënë Abazoviq.

  • “Do të vendosim për veprimet e radhës”, çfarë tha Gabriel Escobar për raportimin në Shtëpinë e Bardhë?

    “Do të vendosim për veprimet e radhës”, çfarë tha Gabriel Escobar për raportimin në Shtëpinë e Bardhë?

    Emisari i Shteteve të Bashkuara të Amerikës në dialogun Kosovë -Serbi ka thënë në një intervistë se është ftuar për të raportuar në Shtëpinë e Bardhë rreth rezultatit të vizitës në Kosovë dhe Serbi që kishte gjatë kësaj jave. Escobar në Prishtinë ka paraqitur tri kërkesa të SHBA’së dhe BE’së për Kosovën deeskalimin e situatës në Veri, zgjedhjet e reja në katër komunat dhe kthimin në dialogun për normalizim.

    Kryeministrit Kurti për këtë qëllim i është kërkuar ta tërheq pjesëtarët e njësisë speciale nga objektetet e komunave dhe që kryetarët shqiptarë të punojnë nga objekte alternative.

    “Duhet të merremi vesh për këtë sot dhe nesër sepse të premten unë dhe Lajcak duhet t’u raportojmë eprorëve tanë se a ishim të suksesshëm apo jo”, kishte thënë Escobar të mërkurën.

    Por, kjo kërkesë deri tash s’është përmbushur. Uashingtoni dhe Brukseli Presidentit të Serbisë i kanë kërkuar që të nxis serbët të dalin në zgjedhje pa kushte, nëse ato mbahen. Të premten Emisari i BE’së Miroslav Lajçak i ka raportuar Kryediplomatit të BE’së Josep Borell, i cili ka tashmë i ka njoftuar vendet e BE’së rreth vizitës.

    Duke folur rreth raportimit në Shtëpinë e Bardhë, Escobar në intervistën për Institutin për Politikë dhe Ekonomi të Evropës Juglindore, ka thënë se është i ftuar në Shtëpinë e Bardhë për të raportuar për vizitën në Kosovë dhe Serbi. Ai megjithatë nuk ka treguar nëse e ka kryer raportimin.

    “Jam ftuar që Shtëpisë së Bardhë t’i raportojë për rezultatet e vizitës sonë në Beograd dhe Prishtinë. Në bazë të përparimit apo mungesës së tij do të vendosim për drejtimin e veprimit tonë” ka thënë Escobar.

    Ndryshe duke komentuar deklaratën e Ambasadorit të SHBA në Serbi Christopher Hill se “nuk e di a është Kurti partner i SHBA, Escobar ka thënë se Kurti është partner, por patner i vështirë”.

    “Më duhet ta sqaroj, z.Kurti është partneri ynë. Ai nganjëherë është partner i vështirë, por është partner. Kosova është partneri jonë. Serbia është partneri jonë. Kështu që në të ardhmen, ne duam t’i përdorim marrëdhëniet e mira që kemi me Kosovën dhe përmirësimin e marrëdhënieve që kemi me Serbinë që të gjejmë një rrugë të pranueshme dhe me beneficione për të dyja, që të mund të jenë pjesë e BE-së”, tha Escobar.

    Diplomati amerikan gjatë qëndrimit në Prishtinë kishte paralajmëruar pasoja nëse Kosova nuk do të ndërmarrë veprimet e kërkuara.

    Në ditën kur Lajçak raportoi në Bruksel për rezultatin, Zëdhënësi i BE’së Peter Stano konfirmoi vazhdimin e bisedimeve për gjendjen në Veri pa dhënë detaje.