Category: Lajme

Një avion i mbikëqyrjes ushtarake kanadeze ka regjistruar zhurma nënujore gjatë kërkimit masiv në një pjesë të largët të Oqeanit Atlantik për një nëndetëse, e cila u zhduk përderisa po i dërgonte pesë persona te rrënojat e Titanikut.

Por, në deklaratën e Rojës Bregdetare të SHBA-së nuk specifikohet se çfarë mund të kenë qenë zhurmat e dëgjuara.

Megjithatë, kjo deklaratë jep një fije shprese për personat në nëndetësen e zhdukur, pasi që atyre vlerësohet se u ka mbetur oksigjen vetëm edhe për një ditë, nëse nëndetësja është ende në funksion.

Ndërkohë, mbetet ende e paqartë se si ekipet mund të arrijnë te nëndetësja e humbur, që mund të jetë deri në 12.500 metra nën sipërfaqen e ujit.

Të humbur në bordin e anijes janë piloti Stockton Rush, drejtori ekzekutiv i kompanisë që drejton ekspeditën. Në mesin e pasagjerëve të tij janë një aventurier britanik, dy anëtarë të një familje biznesi pakistaneze dhe një ekspert i Titanikut.

Roja Bregdetare shkroi në Twitter se një avion kanadez kishte “zbuluar zhurma nënujore në zonën e kërkimit”. Kërkuesit më pas dërguan një robot nënujor në atë zonë për kërkime. Sidoqoftë, këto kërkime “dhanë rezultate negative, por ato po vazhdojnë”.

“Të dhënat nga avioni P-3 janë ndarë me ekspertët e marinës amerikane për analiza të mëtejshme, të cilat do të merren parasysh në planet e ardhshme të kërkimit”, tha Roja Bregdetare.

Nëndetësja e ka humbur komunikimin me operatorët të dielën, kur ka qenë në zonën jugore të Njufaundllendit në Kanada.

Kompania OceanGate që mundëson këtë udhëtim, u kërkon pasagjerëve 250.000 dollarë për t’i parë nga afër pjesët e fundosura të anijes së famshme.

Pjesëmarrësit udhëtojnë rreth 595 kilometra me një anije të madhe, përmbi Titanik, dhe më pas e nisin një zhytje tetëorëshe me nëndetësen Titan, për të arritur në thellësi.

Sekretari i përgjithshëm i Organizatës së Kombeve të Bashkuara (OKB), Antonio Guterres, kritikoi të mërkurën atë që ai e quajti “financim të pamjaftueshëm kronik” të ndihmave humanitare në mbarë globin, pavarësisht nevojave në rritje për ndihma të tilla.

“Financimi i pamjaftueshëm kronik dhe nivelet rekorde të nevojave humanitare po e çojnë sistemin deri në pikën e thyerjes” i tha Guterres Segmentit të Çështjeve Humanitare të Këshillit Ekonomik dhe Social të OKB-së.

Ai shtoi se deri më tani, kur ka kaluar gjysma e vitit, janë marrë vetëm rreth 20 për qind e fondeve të nevojshme për ndihma humanitare sipas Apelit Global Humanitar të OKB-së.

“Kjo po shkakton një krizë brenda krizës”, shtoi Guterres. “Pa një zgjidhje për krizën e financimit, shkurtimet e mëtejshme janë të pashmangshme”.

Të hënën, më 19 qershor, donatorët ndërkombëtarë premtuan afro 1.5 miliardë dollarë ndihmë për Sudanin, i cili është goditur nga një krizë e rëndë humanitare që ka bërë që rreth 2.2 milionë njerëz të shpërngulen nga shtëpitë e tyre.

Përpara konferencës, një kërkesë e OKB-së për 2.57 miliardë dollarë për ndihma humanitare për Sudanin këtë vit ishte financuar vetëm rreth 17 për qind, ndërsa kërkesa për afro 500 milionë dollarë për refugjatët që largoheshin nga vendi u financua vetëm 15 për qind.

Muajin e kaluar, dy agjenci të Organizatës së Kombeve të Bashkuara (OKB) paralajmëruan edhe për rritje të krizës ushqimore, përfshirë rrezikun e vdekjes nga uria në Sudan, shkaku i luftës dhe në Haiti, Burkina Faso dhe Mali për shkak të kufizimeve në lëvizjen e njerëzve dhe mallrave. /REL

Gjykata Themelore në Mitrovicë, ka caktuar masën e paraburgimit në kohëzgjatje prej 30 ditësh, ndaj Urosh Vukashinoviq, i dyshuar për përfshirje në një rast sulmi ndaj gazetarëve më 16 qershor.

Lajmin e ka konfirmuar për “Betimi për Drejtësi“, nënkryetari i Gjykatës së Mitrovicës, Bekim Veliqi.

Ai tha se dje është mbajtur seanca dëgjimore dhe se masa e paraburgimit është caktuar nga gjyqtari i procedurës paraprake, Genc Hasani.

Ndryshe, më 17 qershor i është caktuar masa e paraburgimit të dyshuarit për sulm ndaj gazetarëve, Nemanja Vllaskoviq, kurse më 19 qershor iu caktua paraburgimi të dyshuarit tjetër, Dalibor Spasiq.

Vukasinoviq ishte arrestuar më 19 qershor, Vllaskoviq, më 16 qershor 2023, Spasiq u arrestua më 17 qershor.

Lidhur me arrestimin e tre të dyshuarve, ministri i Punëve të Brendshme, Xhelal Sveçla, tha se kriminelët që po marrin urdhra për sulme nga Beogradi, tashmë do të përballen me drejtësinë.

Drejtori i organizatës “Polcon”, Fitim Mulolli, në emisionin A23 në ATV, tha se ka indikacione që presidenti serb Aleksandar Vuçiq ka kërkuar negocim për shkëmbimin e policëve të kidnapuar me serbët e arrestuar për sulm ndaj KFOR-it dhe gazetarëve në veri.

Sipas Mulollit, një krahasim i tillë nuk ka analogji dhe se pala kosovare nuk duhet ta pranojë një gjë të tillë.

“Ka disa indikacione që ai ka kërkuar një negocim të tillë përmes kanaleve diplomatike. Unë po mendoj që pala kosovare duhet të jetë jashtëzakonisht e vendosur që të mos pranojë diçka të tillë, sepse nuk ka analogji në mes të kidnapimit të policëve tanë të cilët kanë qenë duke e bërë detyrën e vet zyrtare me veprimet e vandalëve serbë të cilët kanë qenë duke i bërë kundër KFOR-it dhe kundër gazetarëve tanë që kanë raportuar nga atje”, tha Mulolli.

Ai tha se beson që për këtë, Kosova do të gjejë përkrahje edhe nga faktorët ndërkombëtarë.

“Nuk mund të barazohet në asnjë mënyrë pesha e veprës së atyre vandalëve serbë me peshën e tre policëve të cilët kanë qenë duke e bërë detyrën e tyre të patrullimit në atë zonë. Po besoj që do të vazhdojë me u mbajtë kjo linjë nga kryeministri Kurti dhe Qeveria e Kosovës. Po besoj se në këtë do të gjejë përkrahje edhe te bashkësia ndërkombëtare sepse nuk ka analogji në mes të burgosurve që gjenden burgjet tona të cilët kanë qenë vandalë dhe tre policëve tanë që mbahen në mënyrë të padrejtë të cilët e kanë bërë detyrën e tyre zyrtare”, tha Mulolli. /atvlive.tv

Emisionin e plotë e gjeni në videon më poshtë:

Drejtori i organizatës “Gremin”, Lirim Krasniqi, në një lidhje të drejtpërdrejt në emisionin A23 në ATV, tha se problemet politike mes Kosovës dhe Serbisë nuk do të ndikojnë në uljen e ardhjes së bashkatdhetarëve në sezonin e verës, mirëpo sipas tij, atyre do t’u duhet t’i përdorin rrugët alternative dhe të shmangin Serbinë.

“Nuk e besoj që do të ndodh një gjë e tillë sepse bashkatdhetarët tanë e kanë dëshmuar ndër vite se sidomos në raste të krizave, gatishmëria e tyre është edhe më e lartë dhe në këtë rast kur po përballemi me një krizë politike dhe të sigurisë në veri, nuk besoj se kjo do të jetë arsye për mos me ardhë, apo nuk besoj që rrugët e tjera të cilat do ta rrisin koston për 20-30 për qind, do të ndikojnë në vendimet e tyre për të ardhur në Kosovë, sepse ne jemi dëshmitar se lidhja e diasporës me vendin e origjinës është shumë e fortë”, tha Krasniqi.

Ai tha se jo vetëm në këto tensionet e fundit me Serbinë, por përgjatë gjithë viteve të pasluftës, mërgimtarët që kanë kaluar nëpër serbi janë përballur me trajtime jo të dinjitetshme e shpesh herë edhe çnjerëzore nga policia e Serbisë.

“Unë besoj se ky është një fat në fatkeqësi, sepse kalimi përmes Serbisë ka qenë i vështirë për krizën politike të cilën e kemi tash. Do të thotë përgjatë gjithë viteve, që nga shpallja e pavarësisë së Kosovës e deri më tani, bashkatdhetarët tanë janë përballur me probleme të shumta gjatë kalimit nëpër serbi, probleme të cilat nuk lidhen me siguri por me trajtimin jo të dinjitetshëm dhe çnjerëzor që u është bërë atyre nga ana e policisë serbe”, tha Krasniqi.

Për këtë sezon, sipas Krasniqit, bashkatdhetarëve do t’u duhet ta përdorin rrugën përmes Kroacisë, apo transportin ajror për të ardhur në vendlindje. /atvlive.tv

Emisionin e plotë e gjeni në videon më poshtë:

Policia e Kosovës njofton se kanë arrestuar shtatë të dyshuar për veprën penale ‘kontrabandim me migrantë’.

Siç njofton policia, dyshohet se personat e arrestuar kanë organizuar kontrabandën me emigrantë duke përdorur Kosovën si vend transit.

“Zyrtarë policorë nga Sektori i Hetimeve-Departamenti i Policisë Kufitare, në bashkëpunim me Prokurorinë Themelore-Prizren, kanë arrestuar shtatë të dyshuar për veprën penale ‘kontrabandim me migrantë’. Dyshohet se personat e arrestuar kanë organizuar kontrabandën me emigrantë duke përdorur Kosovën si vend transit”, thuhet në njoftimin e policisë.

Sipas policisë të dyshuarit pas intervistimit me vendim të prokurorit dërgohen në mbajtje.

Lëvizja Vetëvendosje po vazhdon kritikat ndaj ndërmjetësve të dialogut, në prag të takimit të mundshëm Kurti-Vuçiq në Bruksel. Sipas partisë në pushtet, qasja e përfaqësuesit të politikës së jashtme të BE-së, Josep Borrell dhe ndërmjetësit të dialogut, Miroslav Lajçak është e padrejtë ndaj Kosovës.

Deputetja e mazhorancës, njëherësh kryetare e Komisionit parlamentar për Punë të Jashtme dhe Diasporë, Arbëreshë Kryeziu-Hyseni, thotë për KosovaPress se Borrell dhe Lajçak po dëshirojnë ta dërgojnë dialogun në temat që i leverdisin presidentit serb, Aleksandër Vuçiq.

Prandaj, sipas saj, ky i fundit përmes strukturave kriminale po krijon tension në veri në mënyrë që të nxjerr diçka prej këtyre situatave.

“Jam shumë e zhgënjyer dhe dëshpëruar prej qasjes që kreu i politikës së jashtme të BE-së ka treguar karshi krejt këtij procesi. Për mua vlerat e BE-së janë shumë më shumë përtej kësaj që ne kemi parë kohët e fundit, në veçanti me qasjen e pabarabartë që është treguar në raport me Kosovën dhe Serbinë… Tendenca e Vuçiqit ka qenë për të kthyer dialogun në drejtimin që ai ka dashur dhe për të kthyer në diskutim temat që atij i kanë konvenuar. Pak a shumë kjo ka qenë edhe ideja se si janë përpjekur edhe vet Brukseli të dërgojnë dialogun, por nuk ia kanë dal, në këtë moment që nuk ia kanë dal e kemi situatën që është krijuar në veri, pikërisht për shkak se edhe vet Vuçiq e kuptoi se dialogu i doli prej kontrollit dhe që nuk po mundet t’i arrijë kompromiset që po i dëshiron me kryeministrin Kurti. Andaj i është dashur të krijojë situata të tilla në mënyrë që të arrijë të nxjerr diçka prej këtyre situatave, por e ka të vështirë pasi ne nuk jemi duke bërë asgjë me atë që na lejon Kushtetuta dhe rendi juridik”, thotë ajo.

Sipas deputetes Kryeziu-Hyseni, ftesa për takim të nivelit të lartë në Bruksel është e vonshme.

Megjithatë, ajo shton se Qeveria e Kosovës është e angazhuar në maksimum për deeskalimin e situatës në veri, por thekson se kjo do të varet edhe nga pala tjetër.

“Një takim i tillë është kërkuar nga kryeministri Kurti pak javë më parë dhe nuk është pranuar me arsyetimin se nuk na duhet se fillimisht duhet të de-eskalohet situata. Ndërkohë, ndonjëherë më e eskaluar nuk ka qenë situata, pra palët është dashur të takohen më herët që mos të vinte situata deri këtu ku jemi sot. Ftesa për këtë takim është e vonshme, pasi është dashur të pritet të kidnapohen tre zyrtarët policorë për të shkuar në Bruksel për të vazhduar dialogun ose për të gjetur një kompromis. Si mund të gjesh kompromis me një president që të kërkon të lirosh kriminelët, ndërkohë ti je në anën tjetër që kërkon të lirosh tre policë të pafajshëm të cilët i arrestove në territor të huaj duke kryer detyrën e vet zyrtare… Qeveria jonë me qasjen e saj që ka treguar deri tani do të arrijë të ndërtojë një situatë ndryshe prej asaj që kemi pa së fundmi. Por mos të harrojmë se kjo nuk varet vetëm prej Republikës së Kosovës, pasi është shumë e rëndësishme që të paktën faktori ndërkombëtar mos të drejtoj presionin kah Kosova dhe mos të fsheh apo mbulojë atë që Serbia po bënë në këtë rast”, thekson Kryeziu-Hyseni.

Duke folur për masat ndëshkuese që Bashkimi Evropian po aplikon ndaj Kosovës për shkak të situatës në veri, ajo thotë se të njëjtat janë të padrejta.

“Këto mund të jenë masa që mund të vendosen në raport me Kosovën, por unë mendoj se BE-ja duhet të jetë i kujdesshëm në kuptimin se çfarë mase i vendos Kosovës dhe për çfarë. Ti mund t’i vendosësh masa një shteti për rritje të krimit të organizuar, kriminalitetit, autokracisë, mungesës së reformave, lirisë së shprehjes, e këto elemente me radhë, në të cilat Republika e Kosovës ka shënuar progres. Si mund t’i vendosesh sanksione apo masa një shteti që përgjatë kësaj periudhe dyvjeçare ka treguar progres të jashtëzakonshëm”, deklaron ajo.

Në anën tjetër, deputetja Kryeziu-Hyseni, thotë se tre policët e rrëmbyer nga forcat serbe duhet të lirohen pa asnjë kusht.

“Ata po akuzohen për armëmbajtje pa leje dhe po mbahen në njërën prej qendrave të paraburgimit në Serbi. Fillimisht janë akuzuar për terrorizëm, mandej ka rënë poshtë. Kemi pa që ka shumë të meta në vet aktakuzën që është ngritur ndaj këtyre tre zyrtarëve policorë. Ka mjaftueshëm arsye për të kuptuar se cila ka qenë tendenca e Serbisë për ( t’i rrëmbyer) këta persona. Këtu ka vetëm një arsye, (pasi janë rrëmbyer) që të krijohet kjo situatë që është krijuar sot, të eksalohet më shumë tensionet në veri”, thotë ajo.

Sipas kryetares së Komisionit për Punë të Jashtme, situata në veri po dëshmon se Serbia asnjëherë s’ka qenë e gatshme për të shkuar drejt normalizimit të raporteve, aq më pak drejt njohjes reciproke.

Bashkimi Evropian po pret që kryeministri i Kosovës, Albin Kurti dhe presidenti i Serbisë, Aleksandër Vuçiq të pranojnë ftesën për takim në Bruksel, pa vendosur asnjë kusht. Kurti ka deklaruar gjatë së martës së është i gatshëm të shkojë në Bruksel, ndërsa Vuçiq ka thënë se nuk dëshiron të flasë me Kurtin./kp